الموت الحي الفصل الثاني وسبعون 72 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : واكفه داحضر الغدة وسمعت صوت رجلين ، باوعت لكيت هارون دخل للمطبخ ينشف بوجهه مبين هستوه كاعد من النوم

هارون : صباح الخير

زبيدة : ابتسمت ، صباح النور

هارون : شجاي تسوين

زبيدة : داحضر الغدة

هارون : ستوها بالـ10 مو بعد وكت ؟

زبيدة : عدنه دجاجة تتغدة ويه الاذان فلازم نكمللها الاكل قبل لا يأذن حتى متشحتنه بره

جوعان ؟ تريد اسويلك ريوك لو تنتظر للاذان حتى نتغدة سوه

هارون : احم لا انتظر ما بقى شي للاذان

زبيدة : رجعت اكمل بس حسيت بي يباوعلي ، شلت راسي باوعتله وهو راسًا سوه روحه يفتح الثلاجة

ضليت اباوعله يفتح الباب ويسدها انوب طلع للطرمة ورجع طب بنفس الدقيقة

ياا هذا شبي ؟

شفته اجه وكف يمي وباوعلي

هارون : احم شراح تسوين غده

زبيدة : داگلي بيذنجان وبتيته وفلفل وبصل شريد اسوي مثلاً قيمة ؟

غير تبسي ، شفته كرمش ملامحه ، ذبيت الخاشوكة من ايدي وانداريت عليه

شبيك ؟ شنو متحب التبسي ؟

هارون : هاا لالا عادي احبه

زبيدة : جديات اذا متحبه عادي والله گلي اسويلك شي ثاني

هارون : ليش تلحين مو كتلج احبه

زبيدة : لعد شبيك كلبت خلقتك

اباوعله تنهد وكام يمسد على ركبته ، انوب شفته يباوعلي ويدنك

ابتسمت ومسحت على جتفه ، شبيك حبيبي مبين عندك حجي ، اذا تحب تسولف اني اسمعك

اختفت ابتسامتي من دنك عليه باسني من شفتي وابتعد

هارون : ااا اني رايح اشوف الدجاجات مالت خالتج

زبيدة : اا اوك

طلع بره وعافني مصدومة من تصرفه الصار بدون اي سابق انذار

تلمست شفايفي صافنه على الموقف بس ما كدرت ما ابتسم ، لكن للاسف اني دومي منغصة ، بعز لحظتي الجميلة وفززني صوت خالتي

عقيلة : شنوووو هاييييي الثعويللللله

زبيدة : باوعت للبيذنجان احترك ، ركضت طفيت الطباخ و ويه ما شلت الطاوة طبت هي

عقيلة : هااا حركتييي الاكل مووو ، اهمداج يغبره حتى بهاي ما فلحتي

زبيدة : شبيج تره ما احترك الاكل بس البيذنجان كسب شويه

عقيلة : يا كسب صار فحمة ، دذبي لنروح نسمم اااخ منج حتى نعمة الله ما خلصت من اذيتج

راح يأذن الاذان شلون بيه اني لو معتمدة على روحي واني الطابخة مو اشرفلي ، راح تخربطيلي جدولي واني مرة مريضة وعندي علاج شكول عليج

زبيدة : لزمت راسي وصحت يبوووووووووو

عقيلة : قز القرط يبو على عمرج ان شاء الله لييييش تولويين

زبيدة : غير من وراج نرفزتيني

عقيلة : غير حركتي الاكل

زبيدة : حسوي غيره والله بس سكتي والعباس ابو فاضل راح اسوي غيره منا لحد اذان الظهر تلكين غداج جاهز

ممكن هسه تتفضلين ترحين تسترحين بالصالة وتباوعين مسلسلج الجميل علما يصير الاذان وتصيلين حتى اصبلج الغدة

باوعتلي صفح وعوجت حلكها

عقيلة : ماشي

زبيدة : راحت للصالة وشويه ورجعتلي ، هاا خالة امريني

عقيلة : رجلج وين شو ماهو جوه

زبيدة : طلع للطرمة يشوف دجاجاتج

عقيلة : يااا لعد خلي اروح يمه

زبيدة : اباوعلها طلعت مهرولة تمشي جنها بطريق ، لابسة دشداشة نيلي ولافه شيله بيضة على وجها

ابتسمت للامانة خالتي عقيلة تجنن رغم جبيرة بالعمر بس الي يشوفها يحس وجها يشع جمال وطاقة رغم الكاع ما حاملاتها بسبب وكاحتها حتى وهي بهالعمر

رجعت اكمل طبخ وهي ضلت بره يم هارون ، الفاجأني والخوفني اكثر انُ مرت نص ساعة وهمه مالهم صوت

وذوله الاثنين اني شخصية ما اامن اعوفهم وحدهم هيج لان لا ذيج تسكت ولا ذاك عنده حوصلة ويتحمل

ذبيت الجفجير من ايدي ورحت اطمئن لان صدك ضل بالي ، فتحت باب المطبخ وطلعت لمكان كن الدجاج

وصلت للكن وشفتهم كاعدين جوه ، رجلي الشفيه لازم الدجاجة الخانسه بحضنه وخالتي واكفة تسولف ويا ومنطقة لا وهو يجاوبها ويتفاعل وياها

هزيت ايدي وضحكت ، رجعت دخلت جوه اكمل طبخ وهمه ماكو شويه ودخلو لجوه

اباوع لخالتي حاضنه ايد هارون وتمشي وتسولف ويا

عقيلة : بعد روحي زحمتك وتعبتك والله

هارون : تدللين حجيه بأي وقت

عقيلة : الله يحفظك ويخليك لشبابك يبعد گلبي

هارون : شكراً

زبيدة : طبو جوه ثنيناتهم واسمع المدح النزل من خالتي على هارون ماكو الا شويه وتسوي نبي استغفر الله

كملت الغدة وطفيت النار على التمن وطلعت لكيتهم كاعدين بالصالة

هاا أصب غده لو بعد

عقيلة : لا بعد ربع ساعة يأذن خلي نصلي حتى نتغدة براحتنه

زبيدة : خوش ، طبيت للغرفة اخذت تراك وخاولي ودخلت للحمام داسبح لان ريحتي كلها ريحة تكلا صارت

سبحت وطلعت لكيت خالتي تصلي وهارون واكف بالمطبخ يتوضه

هارون : نعيمًا

زبيدة : الله ينعم عليك

نكث اديه واندار باوعلي وقطب حواجبه

هارون : هاي ليش طالعه هيج الجو برد لتضلين تفترين وشعرج رطب لتتمرضين

زبيدة : نسيت اجيب الڤير ويايه دانشفه

هارون : شو اطيني الخاولي

زبيدة : اخذ الخاولي من ايدي ووكف وراي ينشف بشعري

غمضت عيوني براحة والله سنحت سنحه من هاي التمام انوب هو من ينشف يدلك راسي بالخاولي
خلاني انعس

لمن كمل لف الخاولي على شعري وراح يصلي علما كملو اني كمت صبيت الغدة وطلعت فرشت السفرة ونقلت الاكل

صحتهم وكعدنا نتغدة ، كملنا اكل واني شلت المواعين ورحت اعزل المطبخ

كملت وطلعت صليت ، كملت صلا وكعدت شويه ، اباوع لخالتي طلعت من غرفتها بأيدها كيس متوسط الحجم

انتبهتلها تدنت يم هارون وخلت الكيس يم المخدة المستند عليها هارون

هارون : شنو هذا ؟

زبيدة : اسمعها تسولف ويا بالهمس عود متريد تسمعني عشتو

عقيلة : هاي كرزات من الشمال وبنصهن اكو قمر الدين ، اكل كلش طيبات ومن تكمل تعالي اطيك ساهون وكوكاكولا

هارون : و ليش تهمسين هيج

عقيلة : ما اريد مرتك ام نفس الدنيه تسمع حتى لتاكل حاجاتك ، ذيج الجيه اكلتلي بيضتي مالت الدجاجة واطتني بيض معامل عبالها تضحك عليه

بس شنو الله كشفها الي من عبن اني نيتي صافية و الجذب ميعبر عليه

هارون : وشلون كشفتيها بله

عقيلة : البيضه مالتي لونها اصفر طوخ وبيض المعامل لونه اصفر فاتح شنو عبالكم ما اعرف اني كلشي اعرف

هارون : بشرفج

عقيلة : والحسين

هارون : سلام الله عليه

زبيدة : والنبي خرب ضحك هاي خالتي عايشة اللحظة كلش وهارون ماخذها على كد عقلها وديسايرها

بس للامانة حسيتها كلش لطيفة ويه هارون ، خصوصاً من كعدت يمه تشيف ركي وتنطي
وهو ياكل من ايدها

كملت تسبيح وكمت لميت السجادة ودخلت للغرفة تمددت اكلب بموبايلي، اباوع لهارون دخل وراي ومن شافني متمدده اجه نام بصفي

شلت راسي نمت على ايده وهو بدورة حاوطني وقربني لصدره

شبكته وغمضت عيوني

هارون : اكول

زبيدة : كول

هارون : خالتج طلعت كلش تحبج

زبيدة : هههه اي كلش مبين

هارون : احجي صدك من جنه بره كالت عليج وكحه بس كلبج طيب وحنينه وهم وصتني عليج

كلتلي انها تحبج وتريدني ادير بالي عليج وابقى وياج ما ازعلج

زبيدة : اممم صدك

هارون : اي

زبيدة : وانت شنو رأيك بوصيتها راح تمشي عليها لو لا ؟

ما رد عليه ، فتحت عيوني وكعدت مقابيله ، ليش متجاوبني

حتدير بالك عليه وتبقى وياي لو لا ؟

هارون : انتِ شنو رأيج

زبيدة : معندي رأي داسألك والمفروض منك تجاوبني مو صحيح ؟

ما جاوبني بس رفع ايده وبطرف اصبعه سحب سير التيشيرت العلاكات منزله عن زندي

كزبر جسمي من تلمس جتفي باطراف اصابعه ورفع جسمه مخلي شفايفه على زندي

باس زندي وابتعد ساحبني عليه ، رجعت خليك راسي على صدره

هارون

هارون : نعم

زبيدة : الى متى ؟

هارون : شنو ؟

زبيدة : الى متى كلما اسألك عن شي يخص علاقتنا تحاول تدورلك اي شي يخليك تتهرب من الاجابة

هارون : ما جاي اتهرب بـ...

زبيدة : بس شنو هارون

سكت ما جاوبني ، من شفته هيج ابتعدت وانداريت منطيته ظهري

حسيت بي يخلي ايده على شعري ويتنهد

هارون : زبيدة انيـ ...

زبيدة : سد الموضوع هارون ما اريد نتناقش وتاليها نتعارك

تغطيت وغمضت عيوني وهو ضل يمسد على راسي ويلعب بشعري

هستوني داغفه وسمعت صوت موبايله يدگ ، حسيت بي يبتعد ويكوم يجاوب

هارون : الووو هاا صاحب

شوكت صار هالحجي و خوما اكو احد بيكم تأذه ، يعني كلكم زينين ؟ ، زين ما عرفتو السبب شنو ؟

خوش يله يله جاي هسه كايم ابدل لالا ما اتأخر

زبيدة : كمت بسرعة من شفته يركض يبدل هدومه ومبين مستعجل

خير هارون شصاير

هارون : خابرني صاحب اكو عشر سيارات واكفات بالباب الخارجي وراميه بيتنا بالسلاح وثنين من الحرس متصوبين

وهصه خابروني ولازم اروح

زبيدة : يااا زين ما عرفتو ليش

هارون : محد يعرف الشرطة هسه هناك مطوقة المكان واني لازم اروح ما اكدر اعوف جدي يهيج موقف

زبيدة : زين بس طمني بيت جدي خوما احد بيهم صارله شي غير الحرس

هارون : لا محد بي شي ، خطية بس الحرس مصوبين

زبيدة : الله لا يوفقهم ادري حياة الناس لعبة

هارون : اكيد اكو سبب جبير خلاهم يسوون هيج

زبيدة : طيب انتظرني ابدل اجي وياك

هارون : لا خليج يم خالتج وين عايفتها وجايه

زبيدة : ماشي بس الله عليك طمني اول ما توصل

هارون : ماشي

زبيدة : بدل بسرعة واخذ غراضة وطلع

هارون : يله اني طالع ديربالج على روحج واي شي يصير وياج خابريني

زبيدة : ميخالف

طلع من البيت واني سديت الباب ورا ودخلت جوه يم خالتي

عقيلة : شكو شبي رجلج طلع يركض

زبيدة : حجيتلها الي صار وخطية كامت تلوب وياي

عقيلة : دخيلك ربي عاد كون محد تضرر

زبيدة : لا خطية اكو حارسين متصوبين

عقيلة : يا يمه يا عيني هم حظهم هذا خطية

زبيدة : اي والله

______________________________

دنيا : ملمومين كلنا بالصالة ننتظر عمو والولد الي طلعو من الظهر وهسه مغربيه ولسه ما اجو

ضل بالنا عليهم انوب نتصل محد يرد ، خابرت امي ودادا هم ميردن

للسبعة بالليل ياله اجو بس شنو رواحهم بخشمهم صايره وعمو يحيى صاير بارود

رميم : وينكم يمعودين وكعتو كلوبنا مو دنتصل عليكم ليش متردون

يحيى : بيا حال احنه حتى حلوكنه تيهناها وينه وين الموبايلات

كون تشوفين الهوسه هناك ، الدنيا مكلوبه والمركز مكتض واحنه مخبوصين ويه العالم ما صارلنا مجال
نخطي منا لهنا

دنيا : اجت العاملة قدمتلهم مي وهمه شربو وكعدو

زين عمو فهمونا شنو الصاير وليش ذوله العالم رامين بيت جدي بالسلاح

يحيى : ما ادري شكلج والله يا بويه بس هذا ابن عمج اكبر سايب وخسيس بالدنيا

دنيا : يا هو منهم ؟

يوسف : موسى

رميم : ليش شمسوي الولد هو ذاك كام من شدة شكبرها

كريم : وهنا رباط السالفة يمه

حسب الفهمنا من العالم الافندي طلع مسوي علاقة ويه مرة متزوجة ورجلها لاكفها تحجي ويا وتدزله صور تخيلي حتى طلعة طالعة ويا

تالي الرجال كتل مرته خوش كتله واخذ عنوان الشفيه وراحله وهناك بس شافه طالع لحكه وضربه طلقة ومناك رايح لاهله مبلغهم انه ضرب ذاك النذل

جياد : والرجال خطية ما متحمل الصدمة گبل واكع من القهر وأهله التهو ويا والبارحة من تحسنت صحته قررو اهله ياخذوله حقه

رميم : يا يمه عزه بعيني مرة متزوجة

يحيى : اي والله شلون نفسية حقيرة شايل

سهير : بس ميخالف عمو هو غلط الناس شنو ذنبها

يوسف : للاسف تصرفهم جان غلط وضيعو حقهم ، يعني هو غلطان تجون انتو ترمون اهله ليش قابل همه موصي

علي : من حركة دمهم ابنهم من القهر جان راح بالرجلين من ورة ثنين سياب ما حطو الله بين عيونهم من سوو هالعملة القذرة هاي

دنيا : زين وهسه شصار وين توصلو

يوسف : جدج بالبداية خله الموضوع يمشي بشكل قانوني بس من انفضحت السالفة قرر يتنازل عن الدعوة وياخذ مشيه ويروحلهم بعد جم يوم

كون تشوفين جدج وعمامج شلون صارت وجوهم جنها فلس من الفشلة خصوصاً من طلعت السالفة كدام الضباط والعالم بالمركز

رميم : عمت عينه كون والله يستاهلها هالرصاصة وحيل بي هالادبسز

يحيى : رجال عدك مرة وجهال والله منعم عليك تمشي اعوج ليش شينطيك الله بعد حتى يملي عينك

ابريز : زين عمو انتو راح تحضرون وياهم

يحيى : لعد شلون بويه خوما نعوف عمي بهاي الشدة

ابريز : بس عمو ومشية حليم نسيتوها تره بعدلها 3 ايام

يحيى : ادري بويه هي المشية على المواد راح تصير وره يومين من مشيه حليم

دنيا : ضلو يتناقشون بالموضوع شويه وكامو يرتاحون لان خطية اجوي من الدوام وگبل طلعو

اشرلي يوسف واني اخذت تيومي وصعدت ، طبينا للغرفة ، راح هو بدل واجه تمدد

يوسف : حبيبتي طفي الضوه اريد انام وابد لحد يكعدني اني اكعد وحدي

دنيا : على راحتك حبيبي ، سودة عليه تعبتك اليوم اني

اخذ ايدي باسها وابتسم

يوسف : اني خادم لهاي الادين ، شعندي غيرج اني ، اخدمج انتِ واني بقمة سعادتي

دنيا : اووو يوسف شو صاير كيوت انت ، تعال ابوسك دنكت بوسته من خدوده ، افيييش يمه احبك احبك

يوسف : ههههههه اني هم احبج يله ولج اخذي ابنج وعوفيني انام

دنيا : يله ماما تعال نعوف بابا ينام

تيم : يله بيباي بابي

يوسف : بيباي يبعد روحي

دنيا : ابتسمت واخذت تيم ونزلت للمطبخ ، احس روحي ميته من الجوع ومن الهبطة الاكلتها نسيت اكل

دخلت للمطبخ وشفت سجى واكفه تنظف والبنات كاعدات يسولفن

جمانة : هاا حبيبتي شو نزلتي مو كلتي انام

دنيا : جوعانة وما اكدر انام اذا ما اكل وحتى لو نمت هسه ما راح انام بالليل واني ما اريد اخربط نومي

سهير : لعد تعاي كعدي ، حبيبتي سجاوي حضري الاكل لدنيا بلا زحمة عليج

سجى : بعيني ست

دنيا : لا ميحتاج اني اسوي لروحي ، هاج سهير كعدي تيومي يمج

سهير : هلا بكلبي هلا

تيم : عبيبتي عبيبتي سوسو

دنيا : هههههه بعد حلكي هالحلك ، رحت حميت الاكل وصبيت وكعدت يمهن اكل واوكل تيم وياي

جمانة : تدرن سمعت ابريز تكل لخالة خلي نأجل المشية لحد ما تهدئ الاوضاع بس عمو ما قبل

سهير : صحيح اني ما اتراهم ويه ابريز بس للصراحة بهاي النقطة اني اتفق وياها يعني دتشوفن الاوضاع
شلون متوترة وعمو والولد ملتهين ويه بيت عمو النوح

وهاي شوفة عينجن لحد الان الشباب كاعدين يتناقشون بالموضوع ويخابرون فلان ويرجعون يتصلون بعلان وهم احس فشلة نفرح والناس
ديمرون بمشكلة

سجى : اذا تسمحولي انطي رأيي ، اني احس هاي البنية وجها مو خير عليكم يعني اذا تشوفون هي بعدها ما اجت ولا ارتبطت رسميةً بيكم وفكرتكم

وتره لا عبالكم هاي خزعبلات تره والله اكو بنات فكر و وين ميرحن يفكرن الناس الحواليهم فديرو بالكم منها

جمانة : وانتِ اصلاً شعليج ودخلتي هيج على الخط

وعلى يا اساس تحجين على البنية هيج وانتِ ممتعاملة وياها ليش تشيلين ذمتها مو حرام وعيب هذا التصرف

سجى : العفو ست يمكن اني تجاوزت حدودي

جمانة : مو يمكن اكيد انتبهي على تصرفاتج انوب رجاءً

دنيا : اباوعلها ذبت المواعين من ايدها وطلعت تناشغ

شدعوة شبسرعة لحكت دموعها تنزل حتى كامت تنشغ ، دقيقة ما مرت حتى تتفاعل هيج

سهير : شدعوة جمانة شنو هذا الاسلوب مو عيب تحاجيها هيج

جمانة : سكتي انتِ هاي متنعطي وجه واذا نفسحلها المجال تكوم تتمادى

سهير : ليش احسج شاده وياها ؟ شايفه عليها شي

جمانة : لا بس اتمنى اشوف

______________________________

زبيدة : خابرني هارون وسولفلي كلشي ، والله احترك كلبي من سمعت بسواية موسى

يعني مرته والواحد يحجي الاله والعليه ، حلوة تخبل ونظيفة تنكرط كرط ما عايزها شي حتى يروح يدور
وراها

ولو هذا مو مبرر ابد عمره ما جان الاهمال مبرر للخيانة الي يخاف ربه ويؤمن بهذا الرباط المقدس (الزواج) ما ممكن يخون ، اكو الف طريقة لحل هالمشاكل الا الخيانة

هارون : الوو وينج

زبيدة : تنهدت وجاوبته ، وياك بس شردت شويه

قهرتني والله هارون ، اني هذا الموضوع كلش اتحسس منه ، يعني هذا اخوك ما استحه على روحه من سوه هالسوايه الطايحظها

شتسواله هسه من انفضح واهله ومرته والناس كلها درت بسالفته والله لو منه وجهي بعد ما اراوي

هارون : وليش متكولين هي الطاي حظها الي انطته مجال وسمحتله يتمادى وياها لو هي شريفة ما سوت السوته

بس هو انتن النسوان دومجن تذبن الصوج بالزلم ومتباوعن على رواحجن وعلى القذارة والقرف اليجي منجن

هو طايح حظة ونكس هي شبيها ليش قبلت تخون رجلها ويا ، تكليلي هاملها هذا مو مبرر

بس انتن دائمًا تخلن الرجال شماعه تعلكن عليها خياناتجن وسوالفجن المكسرة

زبيدة : عزه هذا شبي خبصني خبيصه انوب طبك الموبايل بوجهي

عابت اي والله ولا ينعدل هالرجال

تنهدت وخابرت خالة وصيتها على نفسها وعلى دادا وسديته ، اخذت موبايلي ودخلت سولفت لخالتي

عقيلة : يمه صخام الصخمني متزوجة

زبيدة : اي والله هستوه هارون سولفلي

عقيلة : يمه يمه اعوذ بالله وين وصل بينا الحال ، انوب النسوان كامن يخونن رجولتهن

زبيدة : وين عايشة انتِ خالة عبالج كل الناس نظيفة مثلج ومتسويها

عقيلة : وكتكم مو خوش وكت يا خالة

زبيدة : اي والله لا عاب حلكج صدك وكتنا مو خوش وكت

_______________________________

صباحًا

دنيا : طلعت من البيت الساعة بالتسعة الصبح متوجهه للمكان الي كعدت واني عندي النيه اتوجهله

دگ موبايلي شلته

الووو هاا حبيبي صباح الخير

: صباح النور هاا طلعتي لو بعدج

دنيا : لا طلعت بس اكلك معين برأيك الراح اسوي صح لو غلط

معين : وكل عقلج جايه تسأليني اذا جان الراح تسوي صح لو غلط وحتى لو لنفرض جان هالفعل مو صحيح
فآني صاحب الفكرة واني الاتحمل كامل المسؤولية

يله روحي ما اريد ااخرج ، انتظرج تبلغيني بأخر المستجدات اول ما تطلعين

دنيا : تمام ، سديته منه وصعدت بالسيارة ، وصلني السايق ووكفلي على الشارع

تمشيت للمحل واول ما وصلت للمكتبة الي جانت فارغة من الناس دخلت ولكيت رجال بعمر بابا
واكف يرتب الرفوف

اندار عليه شافني وابتسم ابتسامة دافيه ، رديتله الابتسامة

صباح الخير عمو

: صباح النور بنتي

دنيا : حضرتك ابو فلاح صح ؟

: اي نعم تفضلي

دنيا : ممكن اخذ من وقتك شويه اذا ما بيها ازعاج

ابو فلاح : لا ابدًا كل الهلا بيج عمو استريحي

دنيا : كعدت وهو اجه كعد يمي

ابو فلاح : تفضلي احجي

دنيا : حتى اكون صريحة وياك اني جنت جايه لهنا واعصابي تلفانه وكلش مخنوكه بس اول ما شفتك حسيت بالاطمئنان وكإني شايفه والدي المرحوم كدامي

ابو فلاح : الله يرحمه برحمته الواسعة

دنيا : آمين ويرحم امواتك عمو

عمو انت متعرفني ، اني دنيا اخت معين الولد الي مأجرلكم البيت الكاعدين بي انتو هسه

ابو فلاح : اهلاً وسهلاً بيج بنتي ، خير ان شاء الله ماكو شي صاير

دنيا : لا والله يا عمو الصاير ابد مو خير ولهذا السبب اني اضطريت اجي لهنا اليوم

فتحت موبايلي وطلعت المحادثة الدارت بيني وبين ديمة

اني والله من شفتك كلبي ما انطاني ازعجك واهدد راحتك بهذا المكان بس صدكني مضطرة

عمو احنه ناس طول عمرنا ماشين بصف الحايط ونحاول نكون بعيدين كل البعد عن المشاكل في سبيل نحافظ على السلام الداخلي الي دنعافر ومنحصلة

اختي الصغيرة متزوجة ولد اسمه امين اعتقد تعرفه هو يصير جوارينكم

ابو فلاح : اعرفه خوش ولد ودرة مالت الله

دنيا : ولان هو درة مالت الله ، احنه منريد العلاقة البينه وبين اختي تخرب بس لان اختي مع احترامي لحضرتك وعفوًا للمفردة عربانه واكو من يحركها على مزاجه

ابو فلاح : ما فهمت قصدج

دنيا : عمو اني اختي بالفترة السابقة علاقتها بزوجها هواي توترت وللاسف احد الاسباب كان بنت حضرتك

ابو فلاح : بنتي اني !! على بختج عمو شنو هذا الحجي

دنيا : حقك متصدكني وابد متنلام ومع هذا اني عندي الدليل اليثبتلك كلامي صحيح

فتحت الرسائل الصوتية الجانت تدزهن تقى لديمة وتعلمها شلون تتجاوز وتغلط على امين والله حتى بووحدة من الرسائل كايلتلها سوي حساب على الفيس
وتحارشي بي بلكت يرد عليج وتلزميها عليه لزمة حتى يطلكج

من غير تحريضها الها على البوگ وافتعال المشاكل والتذمر والخ من الامور

اباوع للرجال ضل صافن على الحجي السمعة وحقه والله لان اكو حجي مينلبس عليه ثوب

ابو فلاح : هذا صوت بنتي تقى

دنيا : هي بذاتها

ومو بس هيج ، سولفتله سالفة ام كاظم واتصلت عليها وخليتها تحجي ويا وتشرحله كل الي صار

حتى ضربهن لديمة هي واختها سولفته ما خليت شي شفت وجه الرجال صار اسود من القهر وحقه والله

ابو فلاح : والله اليوم انعل والديهن يعني اني ما اخلص من مشاكلهن حسبي الله عليهن من بنات دومهم مسودات وجهي

بس والله والله اله اجنزهن واكسرلج الخيزرانه على ظهرهن وانتِ يابويه مسحي الصار بوجهي وعلى هالشارب اجيبها تطيح على اختج هي واختها

دنيا : لا عمو الله عليك لتمد ايدك على اي وحدة منهن وانت محلف هسه امام الله وموقفك هذا بالنسبة النا يسوه الدنيا

احنه كل الي نريده من حضرتك ونعتذر على هالتصرف بس الي نتمى منكم تتركون البيت وتلكون غيره حتى لتكبر المشاكل اكثر

فتحت جنطتي وطلعت الفلوس خليتهن على الميز ، تفضل عمو هذا ايجار هالشهر الي دفعتو كامل مناقص ولا دينار

والله يا عمو يعز عليه اخليك بهذا الموقف بس صدكني احنه مضطرين حتى نقطع حبل الوصل بين بنتك واختي وحتى لتضل تسويلنه مشاكل

ابو فلاح : هاهي بويه الي تردو يصير بس انطوني مهلة الكه بيت وتدللون

دنيا : شكرًا جزيلاً لتفهمك ونعتذر اذا سببنالك اي ازعاج

ابو فلاح : زين سويتو ورحم الله والديكم من بلغتوني

دنيا : ابتسمتله وطلعت متصلة بمعين

معين : هاا شصار

دنيا : سويت الكتلي عليه

معين : اي والرجال شكال

دنيا : شكال يعني خطية ملامحه كلها انكلبت من سمع
بس مع هذا جان من جانبنه ينطي العافية عاد زين وكف ويه الحق

معين : جنت متوقع هيج راح تكون ردة فعله ، المهم هسه خلصنه من زفت الطين هاي واختج الي حساب ثاني وياها من ارجع

هذا دماغها المحشه تبن اني الراح انظفه الها بس خلي ينطيني الصحة والعافية واكدر اوكف على رجليه وسهلة

دنيا : درجعلنا بالسلامة هسه والله كريم ، لتضل تاكل بروحك موزين عليك حبيبي انت

معين : بالي يمكم وهنا اني كاعد مربط كلشي ما اكدر اسوي

دنيا : ميخالف حبيبي هانت ما بقى شي هنه كم شهر وترجعلنه

معين : ادعيلي دنيا

دنيا : ما احتاج وصية يبعد اختك انت وخواتي دومكم على لساني واول من يجي على لساني وقت الدعاء

يله حبيبي اعوفك ترتاح واني اروح للدوام تأخرت

معين : الله وياج

_________________________________

زبيدة : مر 5 ايام على الحادثة الصارت ، مشية حليم على بصائر تمت على خير ولو اني اشوف بصائر هواي على حليم بس بعد هاي قسمتهم والله يسعدهم ويكتبلهم الخير سوه

اما سالفة موسى فكدر جدي يحلها بأقل خسائر ممكنه

حسب الفهمته من هارون مسوين كعدة وجدي واكف ويه اهل الرجال الصوب موسى ومحاول من خلال معارفه والواسطات يقنع أهل الولد بفصل

وهمه رضو بالفصل لكن بشرط انُ موسى ميدخل للمحافظة الساكن بيها الرجال واذا صارت ولكفو هناك راح يقتلو وجدي وافق على شرطهم وتقريبًا الموضوع أنحل

او ما انحل الله اعلم بعد

عقيلة : باجر ترحين مو ؟

زبيدة : ابتسمت وهزيت راسي ان شاء الله

عقيلة : راح ترجعين تجيني ؟

زبيدة : انتِ ترديني اجي ؟

عقيلة : والله الي يريد يجي ما اطرده اني

زبيدة : تقربت تمددت على رجليها ، تدرين اني من جنت صغيرة جنت اكرهج

عقيلة : مسمومة بس عليمن تطلعين بيت جدج منو

زبيدة : هههههه هاي قبل هسه كمت اشوفج طيبة ونوعًا ما كمت احبج

مسدت على راسي ودنكت باستي بشعري

عقيلة : انتِ اول ما اجيتي للدنيا طلعتي من رحم امج ودخلتي لكلبي

جنت وما زلت اشوف وسيلة بيج صح انتِ طايح حظج وماخذه وكاحة اهل ابوج السرا*** بس مع
ذلك

انتِ ماخذه شكل امج ، حنيتها ، نفسيتها الطيبة ، وكلشي حلو بيها

زبيدة : هسه صارت نفسيتي طيبة قبل خمس ايام طلعتيني ماكلة مال اليتيم

دمغتني ورجعت تلعب بشعري

عقيلة : غير احبج واللاشيج ما سامعه المثل اليكول من حبك لاشاك

زبيدة : بست أيدها اني هم احبج ، كمت حضنتها وتنهدت يربي ريحة العجايز تخبل

عقيلة : اكلج

زبيدة : هاا

عقيلة : عدي ساهون ومن السما كومي اخذي من فوك الكنتور بس ضميهن زين حتى ليشوفوهن جهال ميلاد

زبيدة : واذا شافوهن

عقيلة : غير ياكلوهن مو بزرة ارضه حتى ترب الصلا ما سلمن منهم ما بقى بس اني ما اخذو مني لحمة

زبيدة : هههههه والله سوالفج يا خالة

ضلينا كاعدين نسولف وبيومها سهرنه ونمنا بوقت متأخر

ثاني يوم اجتي ميلاد الصبح ، بوست خالتي وسلمت عليها وطلعت راجعه للبيت

وصلت الظهر ، نزلت لكيت حراس جديد ، سلمت عليهم ودخلت جوه تلكتني بيبي الركضت حضنتني

حمزية : هلا هلا ومية الهلا

زبيدة : ههههههه هاي شنو هالملگه هذا زوزو

حمزية : شكول عليج يمعزاية شلتي البيت ورحتي وياج الاسبوع كوه مر

زبيدة : ههههه صدك

حمزية : والله ، طبي طبي

زبيدة : لا بس خلي اذب الجنط واروح لاهلي اسلم عليهم ، فدوة خلي العاملة تصعدلي الجنط دقايق واجي

حمزية : صار

زبيدة : طلعت من البيت وبوجهي لبيتنا ، دكيت الباب طلعتلي دادا گبل شبكتها سلااااام

ام حسن : ههههه وعليكم السلام بعد كلبي

زبيدة : بوستها ورحت لخالة سلمت عليها وحضنتها

اووو عمي مو اسبوع تكول شهر اشتاقيتلكم هواي والله شنو هاي شو طلعت احبكم

وئام : بعد عمري انتِ ، طمنيني شلونج

زبيدة : الحمدلله كلش زينة واجيت اسلم عليجن واروح

ام حسن : ابقي تغدي يمنه

زبيدة : والله جايه تعبانه واريد انام البارحة نظفت بيت خالتي وضليت سهرانه وياها وانوب اجيت تعبانه وبدون نوم صايره خردة

فاريد اروح ارتاح العصر اجي اتعشه يمجن

وئام : خوش ننتظرج مو تتاخرين

زبيدة : لا انتن ويه الاذان خابرني واني اجي

ام حسن : خوش لعد روحي ارتاحي

زبيدة : هو هيج ، يله بوسات دزيتلهن بوسات وطلعت راجعه للبيت شفت جدي بوجهي سلمت عليه برسمية

انتبهت لكل ولدنا لابسين دشاديش والظاهر ومن سألت كالو حيرحون يصلون صلاة الجمعة بالجامع

باوعتلهم ما شاء الله اهل ابويه كلهم حلوين واكثر واحد بيهم جذبني عمو عبدالله من شفته رف كلبي لان جان لابس دشداشة ولاف السبحه على ايده وياربي شكد جان طالع يشبه بابا

ابتسمتله وصعدت فوك فتحت باب غرفتي وصار بوجهي ظهر هارون الواكف على ميز التواليت يرتب
روحه ومنطيني ظهره

ضميت اديه واستندت على الحايط متبعه حركته

اباوعله لابس دشداشة بيضة ناصعة البياض ، مزين شعره ومحدد لحيته بشكل مثالي

نزلت عيوني على رجليه جان لابس چركز اسود وساعة سودة بايدة ، شفته يباوعلي من المرايا

تعطر واخذ سبحته واندار عليه رافع حاجبة

هارون : شوكت وصلتي

زبيدة : عوفك مني وخلي نسولف عليك ، لك عيني هاي شنو ، شهالجمال والكاريزما طالع تجنن ما توقعت هيج لبس يلوكلك

فر السبحه على ايده وابتسم

هارون : مو المفروض اني الاتغزل بيج واكلج هالكلام لو اني غلطان ؟

زبيدة : تقربت وكفت كباله ورفعت جتافي ، ماكو مشكلة ماكو فرق بيناتنا

اني اغازلك بلساني وانت تغازلني بعيونك

تقرب عليه ناوي يبوسني ، ابتعدت عنه واشرتله بايدي على الباب

وراك صلاة اطلع ولتتأخر عليهم ، بيباي حبيبي

سويتله بوسه بالهوى ودخلت للحمام ، سبحت وطلعت بدلت وصليت ، طلعت بلغتهم إني ما اريد غده ورجعت نمت

ولان جنت تعبانه وعلى ابواب تجيني الشهرية والجو برد فكلش اصير خاملة بهيج اجواء وبودي بس انام

وهذا السويته ذبيت روحي على الجرباية ورحت بسبات عميق ما كعدت غير المغرب

كمت غسلت وبدلت وطلعت لبيت اهلي ، دخلت يمهم وكضيت باقي اليوم يمهم ، شكد توسلت بخواتي يجن

بس دنيا ماكدرت تجي لان باجر عقد السيد مالت حليم وبصائر بالنجف وهذا جان طلب بصائر وهي ملتهيه وياهم لان حفلة عقدهم قربت وديجهزون الها

وديمة اصلاً مدري شبيها تكول مالها خلك ومتكدر تعوف ام امين

طلعت من اهلي الساعة بـ12 ، تمشيت بالحديقة وكالعادة لكيت حبيب الگلب كاعد على المرجوحة
وحدة

تقربت منه وحركت ايدي ، هلاووو حبيب تستقبل ضيوف

هارون : علساس اذا كتلج ما استقبل راح ترحين

زبيدة : ضربته على جتفه وكعدت بصفه والله خوش صرت تعرفني

اباوعله راسه وضحك

هارون : ساعات احسج رجال والله

زبيدة : لا ايع لتشبهني بيهم اكرههم

شفته عكد حواجبة وصفن بوجهي

هارون : تكرهين الزلم !!!

زبيدة : ضحكت على ردة فعله ، اسفه اسفه ما اقصد شي بس انت بالنسبة الي مختلف عنهم يعني اني مستثنيتك عن الكل لتخاف همه كلهم ذكور وانت
رجالي فدوة لكلبك

هارون : صايرة متحجية

زبيدة : لعد اني من زمان متحجية بس انت ممكتشف مواهبي

هارون : امم كلش

زبيدة : شدتباوع ؟

هارون : اقرأ قصة

زبيدة : بالفيس ؟

هارون : هاا ؟

زبيدة : دتقرا قصة بالفيس مثل الاقراهن اني

هارون : طبعًا لا اني فارغ لهالسوالف

زبيدة : لعد شدتقرا

هارون : قصة عن احد الحيوانات المميزة بالنسبة الي

زبيدة : منو

هارون : الجمل

زبيدة : وشنو القصة ، احجيلي مدامنه كاعدين والجو حلو

هارون : يكلك بيوم من الايام جان اكو رجال بدوي عنده جمل فالرجال يسولف يكول بيوم الجمل مالتي جان خامل وميقبل يتحرك واني عندي شغل فمن كد ما نرفزني

كمت ضربته بعصا وضليت اصيح عليه واهينه باشبع الالفاظ توقعًا مني انه ما راح يفهمني ومن شفت ماكو نتيجة

كمت اخذت من فضلاته وضليت افركتهن على انفه واضربه لحد ما اغمى عليه

زبيدة : الكبر لفه هذا شكد حقير وميخاف الله

هارون : مو يكولون خوفكم من اذيه الارواح الميسمع صوتها غير ربها

المهم من يومها الجمل كام يمشي عدل ويطيعني بكل هدوء ، مضت الأيام والجمل ماشي مثل الساعة

وبيوم من الايام عزمت اصدقائي بالبر وجان الجمل مربوط على صفحة واحنه كاعدين ندردش

جان عندي صديق عنده خبره بتربية الجمال ، بيومها فاجأني من گلي هذا الجمل العندك مو خالي ديربالك منه

ضلت حجايته تدك ببالي ، انتظرهم يرحون واني كمت فرشت بره بيتي وخليت مخاد بفراشي وحطيت فوكاهن لحاف ورحت ختلت بالسطح حتى اشوف الجمل شيسوي

مر وقت وشفت الجمل يكوم من مكانه ويمشي على اطراف اصابعه حتى ليطلع صوت

وكإنه مفترس ويريد ينفض على فريسة

زبيدة : اي وبعدين

هارون : يكول صاحب القصة بدون سابق انذار ركضت وشمر روحه على فراشي ، ثبت ركبته على اعلى الفراش وصار يضغط على ركبته حتى يخنكني

انوب كام يمزگ المخدة بانيابه ويصيح بصوت عالي ومن كمل وكام صحتله اني من فوگ وهو من شافني
بنفس اللحظة وكع وكام يرفس

وثاني يوم كعدت ولكيته ميت

زبيدة : يااا ليش ؟

هارون : حسب تفسير المختصين لحظتها كالو انُ من شدة القهر انفجر گلبه

زبيدة : يا عيني والله خطية

زين معقولة هالشي صحيح يعني ممكن احد ينفجر گلبه بس لمجرد انه انقهر

هارون : كلشي وارد خصوصاً الجمل اكثر كائن على وجه الارض يحقد وعمره ما ينسى

تخيلي اذا سويتي ويا موقف سواء زين مو زين ما راح ينسى الج لو مر عليه 30 سنة

زبيدة : لهالدرجة ؟

هارون : واكثر ، الجمل من اكثر الكائنات العدهم عزة نفس وحب للذات

لا يقبل على نفسه الاهانة ولا الاذيه ، كائن اذا حقد يدمر بالدرجة الاولى لو كلفه هالشي حياته

تدرين هو اذا شاف السجينة بإيد احد تلقائيًا يعرف انه راح يموت فيكوم يبجي وتوصل مرات من الخوف والقهر يتقيئ معدته

زبيدة : سبحان الله صدق الله سبحانه وتعالى من گال
{أَفَلَا يَنظُرُونَ إِلَى الْإِبِلِ كَيْفَ خُلِقَتْ}

تنهدت ومسحت على جتافي وباوعت لهارون ، اكلك الجو برد مو

هارون : اي بلش الشته غير

زبيدة : انت ليش ما عندك احساس يعني

هارون : ما فهمت ؟

زبيدة : هيج غلس

رجعت ضميت جسمي بايده الي ثلجن من البرد وباوعتله ، عود صدك هارون ؟

هارون : شبيج ؟

زبيدة : يعني ما راح تصير جنتل وتنطيني سترة تراكك البسها مثل المسلسلات !!

اباوعله تدنه عليه وعبر ايده على جتافي وحضني لصدره

هارون : اعتقد هيج احسن

زبيدة : ابتسمت وحضنته ، احسن بهواي

ضليت بحضنه فترة لحد ما اشتد الجو وكمنه ندخل جوه

باوعت للكاع وجريت نفس ، الكاع رطبة والهوى رغم برودته بس حلو

داتمشى وفزيت من انشاليت من مكاني ، يااا هاي شبيك هارون خرعتني صدك تحجي ، دفعته ونزلت

فززتني شبيك ؟

هارون : جاي احاول اسوي عندي احساس

زبيدة : صدك ؟

هارون : والله

زبيدة : ابتسمت بتوسع لعد يله شيل شيل ، رفعتله اديه وهو ضحك ورجع شالني وسوه روحه يكطفني واني كل عقلي عطت وهو يضحك عليه

حضني بقوة لصدره وهو شايلني ، باسني من ركبتي واخذني ودخلنا جوه

نمنا وكعدنا سوه ثاني يوم ، هو بقى بالغرفة واني نزلت اساعد بيبي ما صعدت غير الظهر حتى اكويله ملابسه لان عنده طلعه

هاا حبيب تأخرت عليك

باوعتله لكيته لازم موبايلي يضغط عليه واديه ترجف
تقربت منه ، شبيك حبيبي ليش دترجف ؟

اباوعله شال راسه باوعلي وخله موبايلي بايدي ، قطبت حواجبي وباوعت للشاشة لكيت صورة
بالواتساب وجواها رسالة

انتبهت للصورة جانت لحليم وبصائر

قريت الرسالة

حليم / جنت اتمنى اليوم الايد الالبسها الحلقة وابوسها هي ايدج ، و اتمنى الجبين الابوسه واباركله هو جبينج

اشتهيت احضنج الج كدام كل الناس واكول هي هاي الصارت حلالي

شيصير لو اني وياج اليوم عقدنا وشيصير لو كتبلنا القدر ننجمع سوه شراح ينقص من الدنيا لو انتِ الراح تغفين بحضني مو هاي

زبيدة : بلعت ريكي وباوعت لهارون الي عيونه صايره براسه

والله العظيم انـي جنت حاظرته وهـ....

خله اصبعه على شفايفه مقاطعني وحجه بكل هدوء

هارون : اش ما اريد اسمع شي

زبيدة : شبيك هارون والله اني مالي علاقة ، قابل اني موصيته

هارون : زبيدة

زبيدة : نعم

اباوعله رفع ايده بوجهي

هارون : من اليوم كل علاقة الج مابيه

***************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.