الموت الحي الفصل الثالث وسبعون 73 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

" بعد مرور شهر "

زبيدة : واكفة كدام ميز التواليت البس بالتراجي وعيوني عليه واكف عني بمسافة قليلة ويشاهد بصمت مثل عادته

كملت وانداريت متقربة منه بخطوات بطيئة ، وكفت كبالة ورفعت اديه محاوطة ركبته

بعدك مُصر متروح ؟

هارون : الف مرة سألتيني وكتلج ما اروح وبعدين اني جم مرة كتلج لتتقربين مني هيج

زبيدة : ابتسمت ونزلت ايدي مخليتها على الجهة اليسار من صدرة بالتحديد گلبه

حركت اطراف اظافري بخفة على منطقة صدرة وهمستله لسانك يكول متريد قربي بس الظاهر دكات هالحلو الي بصدرك اله رأي ثاني

رد عليه بنبرة باردة خالية من المشاعر ، عجيب هالانسان شكد يكدر يسيطر على انفعالاته الخارجية لكن للاسف دائما انفعالاته الداخلية تخرب عليه كل هالمجهود الصعب الي ديبذله

هارون : لتضلين تمسلتين بكلام ماله اي معنى وبطلي هالسوالف

زبيدة : بدون لا اجاوبه مشيت ايدي على جتفه ونزلت اصابعي بخفه ممشيتها على طول زنده لحد ايده

لزمت كفه ورفعته مخليته على خدي غمضت من ملمس ايده صار على بشرتي ، انحنيت بشفايفي مقبلة ابهامه

همست بخفوت يمكن تقنعني انُ كلامي فعلا ماله اي معنى بس شلون راح تقنعني رجفة جسمك الواضحة هاي مالها اي معنى

حسيت بأيده تشد على خصري مقربتني عليه ، سند جبينه على جبيني وغمض عيونه

هارون : انتِ وتالي وياج متكليلي شتردين مني

زبيدة : اريدك

هارون : بـ****

زبيدة : قاطعته الله يخليك كافي جذب ، ابتعدت ورفعت راسي مباوعه بعيونه

كلشي بيك ، عيونك ، شفايفك ، ايدك ، حضنك حتى شعر ايدك كل ذني يشهدن على جذب لسانك

تكرهني ، بس عيونك التباوعلي بهيام تكلك جذاب ، شفايفك التبادلني بكل مرة تكلك جذاب
ايدك الي بوكت عصبيتك تتخله وره ظهرك حتى
لترفعها عليه وبدون قصد تاذيني تكلك جذاب

حضنك الي كلما ادخل بي احس ضلوعي تتكسر يكلك جذاب ، لمست شعر ايده ، حتى شعر ايدك الكلما اتقربلك تكزبر خاضعة لتاثير جسمك بيه تكلك جذاب

فعن اي كرهه دتحجي انت !!

وكالعادة راح تغلس عني وتسوي نفسك ولا كإنما سمعت شي وتدفعني وتروح بدون متعلق على كلامي ، حفظت هالاصوانة

سمعت صوت موبايلي يدك ، ابتعدت عنه ورحت اخذت الموبايل من على الميز ورديت الووو

سهير : الوو وينج يمعودة بعد ساعة تبلش الحنة وانتِ ماكو

زبيدة : يله كملت ماعندي شي هسه بس البس حجابي واجي

سهير : وياومن راح تجين

زبيدة : صاحب راح يجيبني

سهير : وشعجب حبيب الگلب خلاج

زبيدة : باوعتله بالمراية وجاوبتها ، هاي بعد الله هدا ، يله ولج لتاخريني خلي الحك لا اروح اتاخر ويعوفوني

سديته منها ورحت ركض لبست حذائي ، كملت وكمت بسرعة سحبت الصاية والحجاب

وكفت لبستهن وحاجيته ، حبيبي عشاك حضرته وخليته بالفرن اذا جعت بس حمي وتعشى لتنتظرني وهم ملابسك كويتهن الك خاف تريد تطلع تلكاهن بالكنتور

كملت وكمت اخذت جنطتي من يمه وتقدمت بسته من شفايفه

يله حبيب باي

هارون : باي

زبيدة : طلعت من الغرفة ونزلت جوه تلكاني صاحب متخصرلي

شبيك ؟

صاحب : وينج ست الحسن صارلج نص ساعة

زبيدة : علساس انتِ باقي هنا منتظرني لسواد عيوني يعني ، بطل هالكلاوات

اباوعله اندار يباوع ورا ورجع باوعلي وخزرني

صاحب : انتِ شبيج تردين تطيحين حظي ، نصي صوتج ليسمعج احد

زبيدة : كلبت عيوني يله فضني تأخرت تره

صاحب : تفضلي ست اني بخدمتج

زبيدة : اي عفيه ، طلعت ويا وهو صعد وحرك السيارة

صاحب : زبيدة

زبيدة : نعم

صاحب : اخيج اني ساعديني

زبيدة : وداعة بابا الي حيطلع بأيدي حسوي وراح احاجيها الك واقنعها

صاحب : والله

زبيدة : ياا شبيك والله

صاحب : والعباس ابو فاضل اذا صارت السالفة الي ببالي اله اشتريلج سيارة

زبيدة : ههههههه عمي كلشي ما اريد منك غير تكون مرتاح وسعيد انت وذيج ام راس اليابس

صاحب : والله يا زبيدة انتِ ماكو منج

زبيدة : ابتسمتله وانداريت اباوع للطريق علما نوصل

تنهدت متذكرة احداث هذا الشهر

من بعد الموقف الصار بيني وبين هارون اخر مرة ، فجأة قررت يبتعد عني لدرجة حتى حجي صار ميحجي وياي

رغم إني حاولت بشتى الطرق افهمه انُ اني مالي ذنب بكل الي صار وإني من الاساس حاظرة رقم حليم وهو ديراسلني من ارقام جديدة مع هذا رفض يسمع مني اي شي

وكالعادة اخذ غراضه وطلع من البيت واختفى لمدة 3 ايام ومن رجع تقوقع على نفسه اكثر

حرت شلون اتعامل ويا ، وكلما ازهك اتعوذ من الشيطان واذكر روحي انُ الداسوي لنفسي مو لاحد

هالعلاقة بالنسبة الي حرب وتحدي وإني لازم اكسب هالحرب وانقذ نفسي من الالم العاشته امي

تواصلت ويه سهير واكدتلي انُ هارون مو طبيعي واكو شي جبير مخلي ردة فعله تجاه هيج مواضيع
عنيفة لهالدرجة

وبدوري حاولت ادور على جواب لتساؤلاتي لكن للاسف ملكيت اي شي وحتى من سألت بيت جدي ودورت بتقاريره الطبيه محصلت شي

وهيج مر الشهر بطوله هو يحاول يبتعد واني اقترب ، ساعات هو يضعف ويلين من ناحيتي وساعات يحسسني إني اصلا ما موجودة لدرجة اني نفسي كمت اقنتع انه محاس بوجودي وهيج باقين اني ويا بين مد وجزر

واليوم حنة حليم وبصائر واني عناد بي رحت رغم شفته يكرضم ويحوص وهو يشوفني اتحضر
لكن مع هذا ما علق ولا منعني من الروحة واني من شفته هيج سويتها صدك وراح اروح رغم إني مطايقه الروحة من الاساس

صاحب : يله ست وصلنا

زبيدة : هاا ، اي عاشت ايدك

نزلت من السيارة متوجهه للقاعة ، انطيت بطاقتي بباب الدخول ودخلت جوه

باوعت على الحضور ، ما كدرت اميز اهلي وين كد ما القاعة مكتضه بالناس خو الاغاني كد ما عاليه تسطر الاذان

صارت عيني على كوشة العروس ، شفت بصائر كاعدة على كوشتها والابتسامة مزينه وجها ، والاغلبية واكفين يمها

حتى اكون صريحة رغم بعد اخر موقف صار بيني وبين بصائر صح ماكمت اتقبلها الا انها اليوم ما شاء الله طالعة جدًا جميلة

دخلت للمغاسل ، نزعت صايتي وحجابي ورتبت نفسي ومكياجي ، باوعت لروحي بالمرايه وتنهدت

ادري وجودي بحفلة حنتها هي وذاك الحقير غلط بغلط بس اني ومع عنادي ويه هارون على الجيه

بس هم ما ردت اخلي لزمة عليه لان ادري اذا ما حضرت راح اطلع ميته على حليم وكاتلني القهر ولهالسبب ما حضرت

اعرف عقلية ناسنا السزز ومالي خلك القال والقيل البيه كافيني

اخذت جزداني وطلعت من المغاسل وتوجهت للستيج لان شفت خالة هناء ورميم واكفات هناك

وصلت يمهن وهن بدورهن اول ما شافني تقربن مني بوستهن وباركت الهن

الف مبروك ، الله يجعلها عليهم زواجة الدهر

هناء : بعد عمري زبد يوم النفرحلج بالنونو

زبيدة : حبيبتي خالة

رميم : لك زبد هاي شطالع شهالكيك

زبيدة : طالعه عليج ، غمزتلها عمو يحيى وين عن هالجمال اليوم

رميم : فاهمته لعمج انتِ

زبيدة : ههههه اكيد

رحت سلمت على الباقين ، دورت بالمكان ما لكيت دنيا بس شفت ديمة واكفه على صفحة تباوع من بعيد

تقربت منها ، خليت ايدي على جتفها وهي فزت منداره عليه

باوعتلها عيونها مدمعة ومبينه تريد تبجي وكون مصبرة على نفسها ، رغم المكياج الخالته بس مع هذا
وجهها تعبان

حضنتها ومسحت على راسها ، همستلها شبيج حبيبتي ليش هيج تعبانه

بادلتني وتنهدت بحسرة

ديمة : مابيه بس هرموناتي متخربطة عوفج مني ، هاي شنو طالعة تخبلين

زبيدة : اباوعلها دتحاول متبين انها ضايجة بس مدتكدر ، حاولت اسايرها حتى لا اضغط عليها

حبيبتي انتِ التخبلين ، بس شعجب لابسة فستان اسود اليوم ، هاي اول مرة اشوفج لابسه هيج لون بمناسبة

ديمة : اعرف بس حسيت هاللون يعبر عن مودي هالفترة فكلت خلي اشتري

زبيدة : ومع هذا طالعة تحفه

ابتسمتلي بدون لتحجي ، صدك ردت اسألج وين دنيا ؟

ديمة : ما اعرف هستوها جانت هنا

____________________________________

يوسف : لك انتتتتت مخببببل

اكووو واحدددد يسكرررر بيووووم عرسسسسه

باوعت لاخوتي الواكفين يباوعوله بسخط

انتووو وييين جنتتتو عنه اني وعلي بله ماكلين تبن ولازمين القاعة والمعازيم انتووو وين جنتو

كريم : ويا والله ومثل ما وصانه ابويه سوينه

جياد : واني من صبح الله باقي ويا للان

يوسف : لعد شلون شربببب

كريم : غافلنا والله وطلع تالي رجع شايل بطله ويفتر هنا شوفة عينك

علي : استغفر الله ، الف استغفر الله شلون بينه هسه

حنته راح تبلش وهو صاير خردة من الشرب

كريم : يمعود دخابر مرتك شوفها وين صارت

يوسف : هسه كلتلي جاي تحضرها وتجي

علي : ياربي دخيلك عدي هالليوم على خير والله فشلة من مرته واهلها شنريد نكللهم

يوسف : تفلت عليه ، طيح الله حظك يا نذل

حليم : هاي شنو الدنيا مطرت

جياد : هاك استلم

يوسف : نفضت اديه ولزمت راسي مباوعله ، والله هالولد راح يدمر روحه ويدمر بنت العالم

باوعت لباب المخزن الي بكفه القاعة انفتحت ودخلت دنيا تهرول

دنيا : هاك هاك بسرعة خلي يشربها وهذا نومي خلي يحاول ياكله بلكت يصحه

اسفه تأخرت عليكم كوه كدرت اطلع اخذ السيارة حتى اجيبلكم الكهوة والماركت جان بعيد هلي تأخرت

يوسف : اخذت الكهوة منها وثنيت رجليه ، خليت القوطية بايده هاااك تزوحر

حليم : اييع

يوسف : اترس حلكك تبن واشرب

دنيا : بله هذا صدك يحجي

علي : سكتي بودي اشرب من دمه لوما العالم ، اجه يفضحنا الله يفضحه

جياد : عاد زين انتِ كدرتي تطلعين احنه بس نطلع بسيارتنه كدام كراينه نثير الانتباه واحنه ما عايزين

دنيا : ما صار شي ، هاكم هذا العطر جبته من سيارته وهذا معطر فم خلي يحط منه من يصحصح ليروح احد يشم ريحته

يوسف : عاشت ايدج حبيبتي روحي انتِ للقاعة احنه نتكفل بالباقي

دنيا : هزيت راسي ومشيت راجعة لقاعة النساء ، دخلت من باب المطبخ ولكيت سهير منتظرتني

سهير : هااا بشري

دنيا : كعدت وجريت نفس جبتلهم اليردو

سهير : الحمدلله

دنيا : طمنيني خوما حس عليه تيم من طلعت

سهير : لا باقي ويه امج ولا حس

دنيا : الحمدلله

سهير : هاج شربي مي وعدلي روحج حتى ندخل

دنيا : يله اي ، كمت رتبت ملابسي وشربت مي حتى اهدئ وطلعت وياها لكيت جمانة وابريز واكفات بباب الدخول يستقبلن المعازيم

ابريز : وين جنتن انتن صارلي ساعة ادور عليجن

دنيا : طلعت اجيب عطري من سيارة يوسف وسهير جانت واكفتلي ، ليش صاير شي ؟

ابريز : لا بس المعازيم ديسألون عليجن تعالن اوكفن يمي شويه خلي الناس تشوفجن واخذن راحتجن

دنيا : وكفنا بصفها نستقبل المعازيم

اجن خواتي بوسني ، بعد عمري طالعات لعابات فدوة رحتلهن

زبيدة : شبيجن انتن شو وحدة عيونها مدمعة والثانية وجها اصفر

شنو صاير شي اني ما ادري بي ؟

دنيا : دجاوبها ولفت انتباهي صوت الجهاز الي بايده ابريز ، باوعت بفضول داشوف شبيها

ابريز : الووو نعم ، منو هاي ؟ خلي تنطيكم اسمها بله

دنيا : شكو ؟

ابريز : ام الاستعلامات دتكول اكو وحدة جايه بدون بطاقة وتريد تفوت جوه

دنيا : اي خلي تفوت شنو يعني

ابريز : على يا اساس تدخل بدون بطاقة شنو هيته هي

الووو هاا عيني كتيلي شنو اسمها ، سجى !! يا سجى هاي

دنيا : ضليت صافنه من سمعت اسمها ، باوعت لخواتي الرفعن حواجبهن وكأنُ فهمن بشنو دافكر

ابريز : اي عيني كتيلي بنت العاملة ، اي اي عرفتها

عدها البطاقة مالت العاملات ؟ هاا كتيلي ملابسة العاملات اصلاً

تمام لعد لتخليها تدخل ، كلت ممنوع تدخل للقاعة ولا بأي شكل من الاشكال

كلت لا ولا من الباب الخارجي ، لا اذا دخلت وصار شي انتِ تتحملين كافة المسؤولية ، تمام عزيزتي عاشت ايدج

هههههههههه ومن اكلجن الطيب ميفيد ويه هيج ناس
تطلعني متكبرة ومتعالية على العالم

هاجن استملن الانسه مسويه بالعناد وجايه بملابس تختلف عن ملابس باقي العاملات وتريد تدخل حالها من المعازيم لا والمفروض منه نتفشل يعني وندخلها

ههههههه والله ضحكتني دخلي تتونس بالشارع لا حضت برجيلها ولا خذت سيد علي

جمانة : عزه شكد صلفه هاي

دنيا : باوعت لزبيدة الي ابتسامتها وصلت لاذانها

كرصتها ، لتتمضحكين حينتبهون الج

زبيدة : والله شكلي حبلش احب ابريز

ديمة : واني هم

دنيا : ابتسمت عاد انتن والله اذا شديتن باحد متعوفنه بحاله

بس تردن الصراحة ، اني كيفت ههههههه حيل تستاهل

زبيدة : هههههه اي هيج عبري عن مشاعرج وصيري صريحة

اخذت اديهن ومشينه يم بيت جدي

وطبعًا ما خلصت من انتقاد عمتي ونسوان عمامي طلعني جايه عريانة للحفلة

بيداء : انتِ متستحين ؟ شنو هذا اللبس وين كاعدة حضرتج !!

زبيدة : باوعت لروحي ، جنت لابسة فستان طويل على طول الجسم ردانه طويلة مفتوح من الظهر والافخاذ ، لونه زيتي وقماشة شلون جلد الحيه

شبي لبسي ؟

بيداء : ظهرج وصدرج وافخادج كلهن طالعات تره لبسج كله حرام وميجوز ، ادري رجلج ما شافج من طلعتي

زبيدة : لا شافني وكلي فتحة فستانج صغيرة لو اكبر تطلع احلى

وبعدين مو بس لبسي حرام ، حجيج على العالم وطعنج باعراضهم هم حرام ، عمايلج وسوالفج ويه جناينج هم حرام

ركزي على نفسج وعوفيني اتحمل الحرام وحدي وربي اليحاسبني مو انتِ

دنيا : كافي زبيدة العالم دتباوعلجن فشلة

زبيدة : لحد يسوي روحة قديس عليه هاي السوالف ما احبها

حمزية : كافي سكتي ولج فوگ ما عمتج تخاف عليج وتنصحج

زبيدة : الانبياء لو جانو ينصحون قومهم بهذا الاسلوب التهجمي ما جان احد انهده بهالكون

غفران : اكو واحد عاقل يلبس جلد حية !

زبيدة : ابتسمتلها اي اني

عفتهن ومشيت واكفه على صفحة ، خواتي بقن هناك يحاجن بيبتي الصارت عصبية ، اخذت نفس ، صايراتلي مصلحات امهات الوصخ دنصحن رواحجن
بالاول

غفران : شفتي اختج شلون تحاجينه

بيداء : والله يهالبنية فلا مأدبة

دنيا : عمه فدوة لكلبج اليوم عدنه فرحة ومنريدها تخرب ، رجاءً عوفن اختي بحالها وعدن هالليلة على خير ولتخجلني ويه عيالي

حمزية : روحي يمه وتونسي مالج شغل بسيطة وتصير

دنيا : يله دمدوم تعاي وياي ، مشيت واخذت ديمة وياي

جريت زبيدة ورحنا يم امي ودادا اخذت تيم منها وكمت اركصه واركص ويا ، دفعتهن

شبيييجن دتونسن يحظي ، يله دمدم يله زبد هذا جوك تره هيج مناسبة مو دوم نحصلها

زبيدة : يا ركص كاعدة تسمعين الاغاني الحاطيها انتو كل حماس مابيها

دنيا : ذيج الدي جي روحيلها خلي تحطلج الاغنية الترديها وعيشي حياتج

اباوعلها صفنت شويه وابتسمت هازه راسها

زبيدة : والله فكرة

دنيا : شنو ؟

زبيدة : رايحة رايحة

دنيا : اباوعلها ركضت على الستيج شاورت ام الدي جي ونزلت وكفت بالنص واشرت للبنات

انخفضت اضواء القاعة وتركزت على الوسط ، بدت الاغنية وزبيدة نزعت حذائها وسحبت سهير ونور للنص وكامت تركص

بس مو رقص عادي ، لا شرقي !!

باوعت لديمة : هاي شبيها تخبلت ؟

ديمة : والله عرفتها مراح تكعد راحة

دنيا : اباوعلها خرب يومها لعبت لعب بحيث خلتنه صافنين

احنه خواتها خو ولا مرة شفناها تركص هيج ، بس مبينه سوت هيج بالعناد لان زبيدة مو من النوع
التحب تركص كدام احد غريب

انوب المعزاية مطلعه اغنية مصرية اتذكر اسمها
اه لو لعبت يا زهر و ماخذه الساحة الها والبنات داير مدايرها

وكل شويه تسوي حركة وتمد رجلها من فتحة الفستان تراويها لعمتي بيداء لو تحرگ خصرها شلون الراقصات

تالي طلع مقطع كلش سخيف من الاغنية وهي كامت تدك على صدرها وتغني وتأشر على جهة بيت جدي

زبيدة : بس خلاص أنا نفسي إتسدت
بعد ما إيدي للواطي إتمدت

دنيا : اباوع لديمة تصفكلها وامي ودادا منطلقات الا اني ما عجبني تصرفها خصوصا من شفت البعض كامن يبسبين عليها وهي ولا يمها

صدك تنرفزت بيومها لان بيت جدي وكرايبنه ما عدهم هالسوالف وهي خلت الحجي عليها مالي والي

مر الوقت وهي ما كعدت ذبت لحم حتى ديمة على واهسها كامت تركص

اخر شي من سمعت بحليم يريد يفوت يحني بصائر وكفت واخذت حذائها واجتني تتمشه

زبيدة : ااااخ يمه گلبي فحط ، شكو شبيج لابسه وجهج بالمكلوب

دنيا : ليش تسوين هيج ؟

زبيدة : رفعت كتافي ، ليش شسويت ؟

دنيا : انتِ تدرين بطبع اهلنا ترحين تركصين كدامهم هيج ليش ؟ ما سمعتي الحجي الي انحجه عليج

زبيدة : اخر همي همه والحايط عندي تتوقعين إنُ اني زبيدة ممكن اهتم لنظرة الناس الي ؟

بشرفج دنيا !!

دنيا : بس تصرفج مو صحيح ، اوك كتلج ركصي وتونسي بس مو هيج

زبيدة : اكلج شو جيبي تيم ووخري عني

اخذت تيومي ودخلت للحمام من سمعت بالجلب راح يدخل

كعدت تيم على المغسلة ووكفت اغسل اديه

تيم : ذبيدة

زبيدة : هاا يا روحها

تيم : ذوعان

زبيدة : نكثت اديه بوجهه وضحكت ، اصيرلك اكل ، يله تعال نطلع حتى اوكلك

لبست صاية فوك ملابسي وذبيت الحجاب عليه واخذت تيومي وطلعت ، فتحت جنطتي جان عندي بسكت مملح طلعته وكمت اوكل تيومي

تيم : ذبيدة

زبيدة : هاا حبيبي

تيم : اكل ويا

زبيدة : قدم البسكتايه من حلكي ، ابتسمت وجريته عضيته وبوسته يمه صدقة للنفسه طيبة

الك حبيبي اني مو جوعانة ، وكلته وضليت اباوع للعالم الي انخبصت من دخلو العرسان

لحظة هاي بصائر شوكت كامت ما انتبهتلها

باوعتلها من دخلت هي وحليم ، صوت الهلاهل تعالا بكل مكان ، انطفت الاضائة بكل القاعة واشتغلت موسيقى رومانسية لحظة دخولهم

شكلهم جان حلو سوه لكن اي شخص شديد الملاحظة مثلي جان حيلاحظ ابتسامة بصائر المتوترة والخجلانة وابتسامة حليم الباردة الي متدل على اي شي حقيقي ممكن يعيشه الانسان بهيج يوم

شكد تمنيت ادعي على حليم بهاي الليلة لان بسببه علاقتي بهارون توترت بعد ما جانت جاي تتحسن

بس كلبي ما انطاني من شفته وياها تمنيت من كل كلبي يعيش وياها بسلام وميأذيها لانها بالنهاية انسانه وتحبه

وهي هاي المشكلة حبها اله مخليها تعتقد انُ كل الي حذروها منه جان كلامهم طالع بدافع الغيرة والحقد مو الحرص على مصلحتها

اباوعلهم يركصون سلو ، هي تباوعله وهو عيونه تفتر على القاعة واني من شفته هيج عدلت كرسيي وكعدت بشكل جانبي حتى ليشوفني وفعلا ما شافني

انتهت فقرتهم ودخلوا اهله واهلها يركصون وياهم انوب راح هو وياها للكوشة ، حناها وبوسها وضل كاعد يمها شويه وطلع

ورجعت ولعت الحفلة بعد خروجة وهالمرة هي الركصت ويه صديقاتها رغم كل التوتر الجان مبين عليها بس جانت مبينه فرحانة

ابتسمت متذكرة زواجي اني وهارون ، ياريتني حابه هارون قبل لا نتزوج حتى اكدر اعيش هاي الفرحة

تنهدت وحضنت تيم البده يغفي ، ضليت حاضنته واتابع الحفلة لحد ما خلص الوقت واجت الزفة والكل كام تحضر الها لان حليم طلب الحنه والزفة يصيرن بنفس اليوم والكل وافقه الرأي

شلت تيم وكمت انطيته لدنيا ودخلت للمغاسل عدلت ملابسي وطلعت بره انتظر صاحب يوصلني لان الكل طلع للزفة واني مالي خلك اروح

اجه هو اخذني اني وامه ورجعني للبيت ، تشكرت منه على التوصيله وصعدت فوگ

فتحت الباب ودخلت عالكه الاضوية ، شفت هارون كاعد وحاط تيمور بحضنه

ذبيت جنطتي وحاجيته

السلام عليكم

هارون : هله

زبيدة : كعدت كدامه وذبيت حجابي وصايتي ، نزعت حذائي وباوعتله

تعشيت ؟

هارون : لا وما اريد عشاج

زبيدة : تنهدت ومطيت جسمي ، مكانك خالي حبيبي تونست هواي هناك

هارون : طبعًا تتونسين غير كحلتي عيونج بشوفة حبيب الگلب

زبيدة : هذا الاسلوب السخيف بطله رجاءً انت نفسك من دتحجي هالحجي ما مقتنع بنفسك

جان صوتي شويه عالي وهذا المطي ( تيمور) عباله جاي اتهجم على هارون فكاملي على حيله وكام يهز بروحه حتى يكمز عليه

رفعت ايدي اسمع انت الثاني تره مالي خلكك والنبي اذا كمزت عليه وعضيتني نفس ذاك اليوم اركعك ميت جلاق واطردك منا افتهمتتتتت لو لااااا

هارون : شحدج

زبيدة : خو انت لو تفكر تحن على روحك وعليه مثل ما جاي تحن على هالحيوانات جان احنه بخير

كمت متوجهه للحمام ، مريت من يمه ووكفت من لزم ايدي مرجعني عليه

هارون : هاي شحاطة برجلج

زبيدة : عكدت حواجبي باستفهام ، باوعت على فخذي جنت لابسه سلسله تحاوط منطقة الفخذ وبيها حية طويلة تمتد شلون الكلادة على طول الفخذ

طبعًا اني افتهمت على شنو يعني جاي يسأل بس استغبيت

ما فهمت قصدك شبيها رجلي على كولتك ؟

هارون : اول مرة اشوف اكسسوارات تنحط على الرجل

زبيدة : وهاي شفت وبالمناسبة هذا اسمه فخذ مو رجل انت طبيب المفروض تعرف بهالسوالف اكثر مني

بس ما كتلي ليش تسأل

هارون : مجرد استغربت

زبيدة : استغربت لو عجبك وحبيت تسأل ؟

هارون : الشي الميطلع من لساني تجاهج ماكو داعي تخمني من ذاتج

روحي بدلي لترحين تستبردين بسبب الخزي اللابسته

زبيدة : صميت ايدي ومشيت بدون لا اجاوبه

___________

بصائر : السيارات تمشي بموازاتنا والكل مشغل اغاني ويركص

كل الناس جانو فرحانين بما فيهم اني الا حليم جان مبين عليه ، تعبان ، ضايج ، ماله خلك بحيث طول الطريق هو بس يسوق حتى ما فكر أنه يلتفت عليه ولو التفاته وحدة

للحظة حسيت نفسي مموجودة ويا واستحي اني البادر واحجي ويا ، فترة الخطوبة مالتنا ما طولت
وهو بكل هالفترة ما اجانه وزارني غير مرة وحدة

وحتى مخابره من جان يخابرني فحتى يسألني عن ترتيبات العرس واحتياجاتي اي شي عن علاقتنا مجنه نحجي ومن سولفت لامي كلتلي يمكن يستحي منج
واني قنعت نفسي بهالعذر

رجعني لواقعي صوت الهورنات الي تعالت من وصلنا للفندق ، اباوعله وكف سيارته ونزل ساعدني حتى انزل

اخذني بسرعة ودخلني لداخل الفندق ، صعدنا بالمصعد وتوجهنا لغرفتنه ، ثواتي ووصلنا للغرفة الحاجزيها

حليم : يله تعاي

بصائر : اخذ ايدي ومشه باتجاه الغرفة ، فتح الباب وسوالي مجال ادخل

حليم : تفضلي دخلي وهسه امج وامي يصعدن يمج
ارتاحي اني يمكن اتأخر

بصائر : هزيت راسي وهو مجرد انه نطق هالجملة عافني وراح واكفه بمكاني ، بلعت ريكي ورفعت الكبوس عن راسي ، باوعت للغرفة بوضوح

جانت غرفة عرسان بامتياز ، باوعت عالسرير جانت الجرباية مزينه بورد احمر على حرفي وحرف حليم

ابتسمت على جمال ترتيب وتصميم الغرفة ، فززني دخول امي وخالة رميم

رميم : شبيج حبيبتي ليش ترجفين هيج ، اسم الله الرحمن عليج ، هسه وصيت خدمة الغرف يجيبولج يانسون حتى تهدأين

شبيج يحظي هاي احلى ليلة بالعمر لتكضيها خايفة عيشها بكل تفاصيلها

وانتِ ام امين شجاج عليمن هالبجي حرام عليج هاي بدال ما تهدين بنتج

هناء : ما اصدك راح ارجع للبيت وحدي بلياها فرحناتلها والله بس مقهورة على روحي هاي وحيدني
ما اكدر بدونها

بصائر : حضنت امي وكمت ابجي

رميم : يا عيني صلو على محمد شجاكم ، شو ام امين على بختج قابل وين عايفتها انتِ ودتبجين هيج

لج عيني هاي صارت بنيتنا وبعيونا نحطها وهياتها قريبة عليج شوكت مترديها نجيبها الج واحنه الممنونين

هناء : والنعم منكم حبيبتي ام علي

رميم : يله كافي بجي وانتِ عيني اليوم ليلة ابني لتخربيها عليه وتضلين تبجين تره ولدي مثل ابوهم ماعدهم حوصله فصيري سباعية

شو تعاي اطيني بوسة وامشي وياي نجهزلج غراضج ونطلع

بصائر : لزمت ايدي واخذتني طلعتلي ملابس وبخرت الغرفة وحضرت ملابس لحليم وجابت العشة خلته على صفحة وكعدت ويه امي يقرن قران بالغرفة

نص ساعة تقريبًا وكامن

رميم : يله يكلبي كعدي انتِ ارتاحي واني امج طالعات شويه ويجي رجلج وهياته القران كعدي اقري قران واهدي

عسى ربي يكتلبلكم زواج مبارك ويفتحلكم ابواب السعادة من هالليوم

بصائر : آمين خالة ، بوستني هي وامي وطلعت ، تنهدت وفتحت القران وبديت اقرا

لحد ما سمعت صوت الباب ينفتح وكفت قرائه وكمت على حيلي

رفعت راسي من شفته دخل وسد الباب ورا ، اباوعله خله اديه بجيوبه وتقرب واكف كبالي

باوعلي من فوگ لجوه وابتسم ، رديتله الابتسامة

حليم : هاا تتعشين لو نبلش

بصائر : عفوًا !

حليم : احم اسف نسيت ، اقصد اخذي راحتج روحي بدلي حتى نكعد نتعشه

مو هيج الزلم يكولون لنسوانهم

بصائر : ما ادري هاي اول مرة اتزوج

حليم : اني هم

على كل حال روحي بدلي بالحمام واني راح ابدل هنا وانتظرج لان كلش جوعان

بصائر : هزيت راسي ودخلت للحمام ، فتحت سحاب بدلتي من الجانب ونزعتها ، سبحت على السريع ومسحت مكياجي مبدلته بشي خفيف ونازك

لبست سيت النوم وعدلت شعري وطلعت امشي بتردد

شفته كاعد وفارش اديه على راس القنفه مرجع راسه لورة واول ما شافني مال براسه مباوعلي

اشرلي يأيده

حليم : تعاي يله

بصائر : تقدمت كعدت يمه وهو كام جاب العشه خلا كدامي

حليم : يله اكلي لتستحين

بصائر : بلعت ريكي وباوعتله

حليم : اذا تضلين تباوعيلي هيج ما راح اكل واعوفج واطلع

ما احب الاجواء المتوتره هيج رجاءً لتوتريني تره اني كوه مصبر على روحي

بصائر : لالا حاكل ، مديت ايدي الترجف ، اخذت الصمونه وبلشت اكل وهو من شافني اكلت كام ياكل

كملت قبله وضليت كاعدة اباوعله ، يربي شكد حلو ملامحه تاخذ العقل لحد الان ممصدكة اني صرت مرته وهسه كاعده ويا واكدر اباوعله على راحتي

شفته كمل وكام شال الاكل ودخل للحمام ، شويه وطلع ينشف باديه ويباوعلي

اباوعله تنهد ورجع صعد بصفي ولزم الريمونت يكلب بالتلفزيون ، كمت غسلت وطلعت كعدت ينفس مكاني

وهو من كعدت بصفه تحمحم ورفع ايده محاوط جتفي ، سحبني عليه ، رخيت راسي من صار على صدره

تنهدت من فرك جتفي بايده ، باسني من راسي وتحسر

حليم : الجو برد مو

بصائر : اي

حليم : تحبين الشته لو الصيف انتِ

بصائر : الشته وانت

حليم : اني هم ، احم ما كتيلي شنو برجج

بصائر : السرطان وانت ؟

حليم : الحوت

ابراجنا عاطفية صحيح

بصائر : صحيح

حليم : شلونها دراستج

بصائر : ابتسمت زينه

حليم : كصيدلانية اذا اشرحلج حالة معينه تكدرين تفهمين صاحبها من شنو يعاني وتطي علاج ؟

بصائر : اعتقد اي اكدر

اباوعله ابتعد وكعد عدل بحيث صار وجهه بوجهي

حليم : اذا اجاج مريض وكلج اني مخنوك ، احس روحي طالعة وكلبي ينبض بقوة ، جسمي كله يرجف
وتعبان ، الدنيا صغيرة بعيني واحس الحياة ماصخة ومالها طعم

شراح تكتبيله علاج ؟

بصائر : اذا شخص غريب راح اقترح عليه يراجع طبيب اختصاص واذا شخص قريب عليه راح ارفع ايدي واخليها على گلبه

خليت ايدي بتردد على صدرة ، اكله اخذ نفس واهدئ
اني يمك ووياك ، اذا مخنوك اخذك نشم هوى حتى ترتاح واذا كلبك ينبض بقوة ادلكه الك حتى يهدئ

اذا اديك يرجفن راح الزمن وامسح عليهن ديهدئن واذا الحياة ماصخة بالنسبة الك اني اساعدك حتى
تحس بطعمها

اباوعله صفن بوجهي ومد ايده ساحبني من خصري عليه ، رفعت راسي عليه واول ما صارت عيني بعينه
باسني من شفايفي

تشجنت كل اعضائي اثر هالفعل ، ما جنت متوقعته حيسوي هيج وبدون سابق انذار

فزيت من شالني واخذني للجرباية وبدت ليلتنا من لحظتها

جان هادئ وحذر وياي ، شكد ما جنت خايفة منه بس اسلوبه الهادئ خلاني ما اتوتر

الليلة مرت بكل سلام لحد ما شفته ينزع فانيلته الداخلية ويبقى بدون شي من فوگ

لمجرد إني باوعت لجسمه شهكت وفزيت من مكاني دافعته عني حتى هو فز مخترع

حليم : شبيييج ؟

بصائر : صفنت على صدرة واشرت بايدي عليه ، ششـ شنو هذا ؟

حليم : شنو ؟

بصائر : وكفت الدمعة بعيني واني اعيط بي ، هذا الوششم الي على صدرك شنوووو

صفن بوجهي شلون الي استذكر شي ، شفته خله ايدي على صدرة مكان الوشم بالضبط وغمض عيونه

حليم : ااااااخ يهالوشم اااااخ

بصائر : ضليت باهته بوجهه ، اباوعله يتحسر كدامي ، حتى ما فكر يبررلي الموقف

فتح عيونه وباوعلي عاض شفايفه

حليم : هذا الوشم قديم

بصائر : بس هيج قديم وانتهى الموضوع بالنسبة الك ؟

حليم : يعني شسوي مثلاً

بصائر : تشيله مثلاً

حليم : اشيله !!

بصائر : نزلت دموعي من شفته يهز راسه برفض

حليم : لالا ما اشيله اشيله شنو

بصائر : اباوعله اخذ قميصه لبسه وطلع عايفني وحدي

واشم اسم زبيدة على صدرة وخاف من فكرة انه يشيله اكثر مما يخاف من فكرة جرح مشاعري واني
اشوفه !!!

___________________________________

ديمة : طلعت ملابسي حتى ابدل وشفت الباب ينفتح ويدخل امين

اول ما شافني عكد حواجبه

امين : السلام عليكم

ديمة : وعليكم السلام ، الله يساعدك

امين : شعندج هنا ؟!

ديمة : ذبيت الملابس مستغربة من كلامه ، ما فهمت قصدك شنو يعني شعندي هنا ؟

فزيت من عاط بيه بصوت عالي

امين : اني وياج مو متفقين اذا خلص عرس بصائر ترحين لاهلج حتى نبلش بمعاملة الطلاگ ، شنو متفهمين انتِ لو ثقافتج اجنبية

ديمة : ششـ شنو تتـ تريدني اروح اليوم ؟

امين : لعد شعندج باقية عندي ، عرس بصائر وخلص شنو السبب اليخليني استقبلج يمي بعد غير عرس اختي

ديمة : بلعت الغصة الي تجمعت بصدري وجاوبته

اسفه معبالي تريدني اروح اليوم ، ههـ هسه حروح الم ملابسي واروح

اعتذر مرة ثانية ما عبالي وجودي زاعجك لهالدرجة ، مشيت بسرعة فتحت باب الكنتور واديه يرجفن

فجأة وكفت وباوعتله ، لو اكلك ، اا اني حروح هسه واا ادز احد بعـ بعدين ياخذون اغراضي

لبست جبتي وحجابي بسرعة وهو يباوعلي

حطلع هسه والله بس البس جواريبي ، دقيقة بس

لبست الجواريب شلون ما جان واخذت جنطتي وموبايلي وطلعت سادة حلكي حتى ليطلع صوتي وتسمعني خالة

فتحت باب البيت وطلعت امشي بالشارع وعيوني تجري ، ما توقعت اخر لقاء بيني وبين امين حيكون صعب لهاي الدرجة

دامشي واستوقفني صوت بالشارع ، انداريت لكيته هو ، مسحت دموعي بسرعة وباوعتله

امين : امشي اني اوصلج لترحين بتكسي

ديمة : لالا لتزحم نفسك ، انت هستوك راجع روح ارتاح واني هسه اضل اتمشه لحد ما الكه تكسي

امين : مسؤوليتي هسه اوصلج لاهلج سالمة والا انتِ متهميني يله امشي

ديمة : شفته مشه ، مشيت ورا ، شغل الستوته واشرلي اصعد ، صعدت وهو حرك

الطريق كله مضى بصمت لحد ما وصلني لباب بيت جدي

امين : يله نزلي

ديمة : نزلت وباوعتله اميـ..

امين : ما اريد اسمع صوتج

ديمة : ما انطاني فرصة احجي ، گبل حرك وعافني واكفه بالباب

مشيت داخلة جوه ، دكيت الباب على بيتنا ، طلعتلي دنيا بوجهي

دنيا : هاي شعندج هناا بهالوقت

ديمة : ذبيت روحي بحضنها وبجيت

دنيا : ياا شبيج حبيبتي

ديمة : على صوتي اجن امي ودادا يركضن ، ما تحملت كعدت بالكاع وكمت انشغ

________________________________

زبيدة : غافيه وسمعت موبايلي يدك ، مديت ايدي اخذته وباوعت لكيتها دنيا

فزيت من مكاني وجاوبت ، الووو هاا دنيا ، لحظة شنو هذا صوت البجي اليمج

دنيا : اني عند اهلي اذا تكدرين تعاي

زبيدة : وخرت الغطة وكمت ، يله يله اجيت

كمت من مكاني وعلى اثر حركتي كعد هارون

هارون : شبيج ؟

زبيدة : دنيا اختي بايته يم اهلي وتريدني ، كمل نومتك انت

لفيت الروب عليه وشمرت الحجاب ونزلت بسرعة ، فتحت الباب وطلعت اركض

وصلت للبيت لكيت اضويته كلها معتلكه والباب مفتوحة ، دفعت الباب ودخلت لكيتهن كلهن ملتمات على ديمة المنتهيه من البجي

لزمت كلبي ، شبيها ديمة وليش هيج دتبجي

دنيا : باوعت لديمة وباوعت لزبيدة متنهده ، تعاي كعدي داسولفلج

زبيدة : عوفج مني كاعدة لو واكفه احجي تره كلبي حيوكف من الخوف

دنيا : بديت اسولفلها الصار بالتفصيل وديمة تناشغ من البجي وزبيدة وامي ودادا صافنات عليه

وهذا كل الصار ، البنية شالت هي واهلها بس ، بس امين الظاهر بعده على موقفه واليوم مثل مكالت ديمة فاجأها من طلب منها تروح او بالاحرى طردها

زبيدة : كل هذا صاير واني اخر من يعلم ؟

دنيا : الصار بذيج الفترة انه جنه ملتهين شوفة عينج وما كدرنا نلتقي داسولفلج

زبيدة : باوعت لديمة وهزيت راسي

ديمة : حبابه زبيدة لتباوعيلي هيج تره مناقصتج

زبيدة : يعني شترديني اسويلج واني اسمع انُ كل هالقبح طلع من حلكج وعليمن ؟ على امين !!

ممـ ما ماجاي استوعب ، كلبج شلون انطاج تحاجي هيج

ياعمي اني شكد معروف عني اني بلا احساس وما استحي من اكبر واحد وهم ما افكر اسويها

لج بس فهميني انتِ شنوووو الى متى تبقين عربانه هييييج ؟

ولج كل امة محمد وامة الكفرة نفسهم يتعظون وانتِ متتعظين

ديمة : والله هي ضحكت عليه

زبيدة : ضحكت علييييج ليش يمه زعطوطة انتِ ويضحكون عليج

عمرج راح يصير 23 سنة شكبررررج تصيرين حتى تستوعبين انج مو طفلة حتى تجين تتبكبكين وتكولين ضحكو عليه

يا مرة هاي ديمة يا مرررررة ، بالاول هبه وراسل وسامحناج ومضينه بحجة كلبج طيب وانخدعتي

بس هسسسسه شنو عذرججج ، هم رجعتي لدرب الصديقات الطيحن حظج وهم هدمتي زواجج الي
انتتتتتتتِ نفسسسسج اختاريتيييي

اكووو احدددد جبررررج على هالزواج ، لا امين ولا احنه جبرناج حتى ترحيين تمنين عليه لان قبلتي بي
لا وتعيري بفقرة

لج ما استحيتي على نفسج ما خجلتي من روحج وانتِ مستلمة الولد شهور طلعتها لروحة

خليني يشتغل من الصبح لليل وهم ما اكتفيتي وفوك كل هذا حتى تطفشي تكليله انت مو من مستواي

ليش يمه انتتتتِ قندرتيييش حتى يكون امين مو من مستواج

علمود الفلوس سويتي هيج !! مو هاي انييي ودنيا يمج جان اجيتي كتيلنه اني ممرتاحة ويه امين
وما جاي ارتاح لان احس بالنقص وياااا

جااان بعنه البيت مالتنه واخذنه حصتنا من شغل ابويه وفتحناله مشروع جبير يسترزق بي

ما اجيتي اكلتييي تبن وكلتي اني ما جاي اشبع حتى اشيل ذهبي وفلوس معين انطيهن الج حتى تفتحين مكتب تصميم انتِ وامين حتى تشبعين وتترسين عينج

جان اكو الف حل يغير حياتج رأس على عقب بس انتِ اختاريتي الطريق الأسهل وهو انج تجرحي حتى
يطلكج

ما اعرف دماغج هذا المحشة صوف شلون استوعب
هيج فكرة سخيفة ومنحطة

دنيا : كافي زبيدة مو جمالة انتِ

زبيدة : لا مو كافي خليها تسمعني ، خلي اواجهها بالحقيقة

باوعتلها ، انتِ صح كسبتي التردي وامين راح يطلكج بس وداعة امي راح تخسرين اضعاف الكسبتي

واول شي راح تخسري هو الانسان اليحبج بكل جوارحة

لج بهذا الوكت صعب تلكين واحد مثل امين لو تلفين الدنيا كلها

منو بينه هسه تلكه رجال يحبها ، يحاميلها ، يكسر ظهره من الصبح لليل في سبيل يوفرلها الراحة
يدوس على نفسه ويتحمل الاهاين من انكس الناس
حتى لينميها جوعانة

لج انتتتتتِ شايفه رجلججج شلون راح ينكطم من الضعف والتعب انتتتتتِ مو نفسج كتيلي امين من يجي ويلكه الاكل قليل مياكل حتى انتو تشبعون

من انتِ نفسج كلتيلي امين كل اسبوع يطلع يجيبلج برگر ومقبلات من المطعم الغالي التحبي ورغم هو ماعنده بس ما مقصر وياج

مو كاااام يغسسسل مواعين بعد الساعة 11 ويضل نوبات للـ3 علمود يزود مصروفج الشهري

منوووو يسوووي هيج بهالوووكت احجيليييي منوووو

انتِ الله انطاج جوهرة لو تحفين متحصلين منهاااا
الفلووووس مو كلشييييي يا ديمة مو كلشيييي

هاي دنيا كدامج رجلها عنده فلوس ويكدر يجيبلها كلشي ، بس ميكدر بفلوسه يرجع بيوضها ولا يكدر يخليها تصير ام مرة ثانية

اني رجلي عندة فلوس وشريد منه يجيبلي يس شنو فائدة الفلوس واني اجدي من الكلمة جداوة

تعرفين شنو شعور المرة من تحب رجلها وتتمنى منه الكلمة وبمقابل هذا الحب متحصل منه غير الصمت

انتِ صح رجلج ماعنده فلوس ، بس عنده مشاعر تجاهج ، يكدر يخليج تنامين مبتسمة ، يكدر يسويج ام ، يكدر يحسسج انُ الج قيمة مو حالج حال الحايط وجودج وعدمه واحد

انتِ عندج اليسوه ابو الفلوس يا ديمة لكن للأسف عطاء رب العالمين الج ما عرفتي شلون تحافظين عليه

اسفي عليج والله هذا الاكدر اكوله الج على سواياتج
بالعافية عليج خلي تفيدج الفلوس عود

عفتها وطلعت راجعه لغرفتي ، بيومها ما نمت للصبح
كل اتذكر هي شحاجيه ويه امين اخلي نفسي بمكانه
واموت قهر

شكد خطية انت يا امين والله الناس الطيبة المثلك ميستاهلون الاذيه

ضليت كاعدة للصبح ، شكد حاولت انام بس ما كدرت احس اكو شي كاتم على نفسي

اخر شي من شفت روحي مابيه انام كمت من الفراش غسلت ونزلت لكيت جدي وبيبتي كاعدين ، صبحت عليهم

صباح الخير

تفاجئت من بيهم رد عليه ، تقدمت يمهم ، مو داحجي وياكم شنو متسمعوني ؟

النوح : حجية اني طالع افتر على الحظاير (*الحظائر)

زبيدة : ياا هذا شبي رجلج

حمزية : سألي روحج وشوفي روحج شمسويه

زبيدة : اباوعلها حتى هي عافتني وكامت ، هزيت ايدي عشتو عساكم ما حجيتو وياي

دخلت للمطبخ اسويلي ريوك ، طكيتلي بيضة ووكفت اصبلي جاي

داصب وشفت ام هارون واكفه تباوعلي وتتبسم ، اشرتلها اكو شي ؟

هيام : سلامتج حبيبتي

زبيدة : حبيبتي !!!

لالا الظاهر اكو شي اليوم شو الادوار منكلبه ، طلعت تريكت وحدي لان كلها تعبانة من العرس ونايمة

بس اني وجدي وبيبتي وام هارون كاعدين ، داتريك وشفت هارون نزل

هارون : صباح الخير

حمزية : صباح الخيرات حبيبي اكعد تريك

هارون : ما اريد ، جدي طلع ؟

حمزية : اي طلع ما صارله حتى عشر دقايق

هارون : خوش

زبيدة : طلع هارون واني رجعت اكل ، كملت بسرعة وكمت خليت الصينية بالمطبخ وطلعت لاهلي

دكيت الباب فتحتها الي دادا

دادا : صباح الخير حبيبتي تعاي طبي

زبيدة : رديت عليها ودخلت لكيت دنيا وخالة كاعدات بالصالة

انتو هم ما نمتو مو ؟

دنيا : لا والله ، الليل كله اني كاعدة ويه ديمة ، للصبح هي تبجي تالي سكرها علك من البجي الله ستر عليها

كوه انطيتها دواها حتى تهدئ وتنام تالي صدك هدئت ونامت بالسبعة الصبح وهاي شوفة عينج احنه كاعدين

وئام : زبيدة تره انتِ هواي قسيتي عليها البارحة

زبيدة : والله اعرف بس اني متعمدة ردتها تعرف حجم الغلط السوته وإن جان كلامي تجاهها جارح

قابل اني اكرهها بالعكس اني لوما اريد مصلحتها جان كتلها لتديرين بال وانسي

بس يا خالة ديمة لازم تتعلم من اغلاطها ، كافي بعد هي مو طفلة لازم تستوعيب هذا الشي

دنيا : ميخالف على كيفج وياها اني بوكت السالفة غسلتها غسل وانتِ هم البارحة سويتي نفس الشي

المفروض مننسى انها مريضة على ساعة تروح من ادينا ونضل نعض اصابعنا ندم عليها

زبيدة : لا اسم الله عليها ، هسه اني طالعة احاجيها

دادا : لا يمه عوفيها خليها تنام ما عولناها تسكت وتنام

زبيدة : تمام لعد انتظرها لحد ما تكعد حتى احجي وياها

ضليت كاعدة للظهر وهي ما كعدت ، سألت دنيا عن سبب بيتتها هنا

دنيا : عود كلت لان بيت عمو مكتض بكرايبهم واني تعبانه ومو حمل هوسة فضلت اجي ابات هنا وارجع الصبح بس هاي شوفة عينج الصار ويه ديمة شسوه بينا

خابرت يوسف سولفتله وگلي ابقي لتجين

زبيطه : الله يساعدج

وصلتني رسالة على موبايلي ، فتحتها لكيتها من هارون كاتبلي بيها " تعاي بسرعة "

سديت الموبايل وكمت مستأذنه منهم ، رجعت للبيت وبوجهي لفوك ، فتحت الباب ودخلت لكيت هارون ضام اديه وواكف عبالك منتظرني

هاا ؟

هارون : تعاي تفضلي

زبيدة : استغربت لهجته ، سديت الباب ودخلت ، اي اتفضل ليش ما اتفضل ، خير صاير شي ؟

اباوعله مد ايده بجيبه طلع موبايله ، فتحه ومدري شكام يطكطك بي ، شويه وصدح صوت اغنية مصرية بكل الغرفة

دار الموبايل عليه وهو لازمة ، باوعت للشاشة لكيت روحي مصورة واني اركص البارحة ومبينه الكاميرا
متقصدتني لان التصوير مركز عليه اني دونً عن الكل

هارون : هاي انتِ لو اني غلطان

زبيدة : جاوبته باستغراب ، لا ما غلطان هاي اني بس
ليش تسأل علساس ممبين يمك ؟

هارون : يعني تعترفين انتِ الكاعدة تتمركصين

زبيدة : ما راح اسألك منو الصورني ولا منو الراواك هالتصوير

بس عود يعني انت من جبتني مناك لهنا حتى تسألني على شي هو مبين وواضح ؟ ، ليش !

هارون : شمعنى بعرسه ؟

زبيدة : ما فهمت

هارون : شمعنى بعرسه ركصتي هالركص عود شردتي توصليله رسالة مثلاً ؟

زبيدة : هههههه رسالتيش هارون شبيك

هارون : اني اكلج انتِ كلتي خلي اروح اركص حالي حال بنات الشوارع حتى اوصل لحبيب الگلب رسالة عود اني ما مهتمه وعايشة حياتي وسعيدة مو بس انت الشفت حياتك اني هم

زبيدة : انت كل عقلك تحجي ؟ اني اسوي هيج شي

هارون : ليش التركص هالركص بحنة الرجال الجان يحبها هيج شنو غايتها مثلاً جاي تتونس لو تأدي الواجب وتروح ؟

زبيدة : معقولة انت تفكر بيه هيج ؟

هارون : وليش حتى ما افكر بيج هيج يعني ، مو غريبة عليج انتِ بنفسج تعترفين انج متستحين وعينج صلفة والمفروض الواحد كلشي يتوقع منج

زبيدة : احترم نفسك وراقب الفاظك وانت تحجي وياي افتهمت لا

هارون : جان انتِ راقبتي نفسج وكرصتي روحج قبل لترحين تردحين هناك بنص الوادم جنج بنت ملهـ*

هاااااج باوعييييي كلها واكفه تباوعلج وانتِ بالننننص تهزيييين جسمج الهم برخص ، عوزهم بس يكيتون عليج حالج حال ذنيج الما حافظات رواحهن

وتره خاف عبالج من رحتي تركصين كدام الناس بهاي الطريقة راح يكولون شكد حلو جان رايدها واجتي تركص بعرسه وما مهتمه

بالعكس تصرفج هذا اذا يريد يدل على شي فيدل على استهتارج ورخصج وانتِ تهزين مفاتنج كدام
كل هالناس زلم جانو لو نسوان بس في سبيل توصلين خبر لذاك الارخص منج انج ما دايره بال لزواجة

زبيدة : تصدك ما انقهرت من كلامك عليه بكد ما انقهرت على عقيلتك المريضة هاي

والله العظيم يا انت اخر شخص ممكن جنت افكر انه يفكر بيه بهاي الطريقة ، هزيت راسي جنت متوقعتك تعرفني وما ممكن تفهمني غلط

هارون : ولاني اعرفج ومعاشرج اعرف اساليبج وبهاي السوالف انتِ مشهودتلج لاعندج مستحه ولا عندج خجل

زبيدة : يوم عن يوم جاي تثبتلي انك مريض واني امرض منك لان حبيتك وحاولت اكمل وياك

هارون : انتِ كلتيها ، انتِ الحبيتني مو اني وانتِ الحاولتي تتقربيلي وفرضتي روحج عليه مو اني الطلبت منج هذا القرب

زبيدة : هيج صار الحجي ؟

هارون : ماكو داعي ننكر الواقع ، انتِ الذبيتي روحج عليه ولزكتيلي

هذا اني وبعمري ما حاولت اثبت لا الج ولا لغيرج إني انسان طبيعي انتِ الذليتي نفسج وكرامتج وبقيتي وياي محد ضربج على ايدج وكلج رجعي

زبيدة : هزيت راسي وعضيت شفايفي ضاحكة ، تصدك كلامك صحيح

والله العظيم انت صح ، صدك اني الذليت نفسي وذبيت روحي عليك ، فعلاً اني ماعندي كرامة

بس الظاهر كلامك صحاني وخلاني استوعب اني وين جنت غاطة

طبطبت بايدي على جتفه ، عاشت ايدك حجيك صحاني والله

وبما انُ انت صحيت الكرامة المعدومة البداخلي فخليني اشكرك بطريقتي

سحبت ايدي من جتفه وقربتها من ايدي الثانية ، نزعت الحلقة من اصبعي وسحبت ايده خليتها بيها

ابتسمت ونزلت دمعتي ، انت حر ومن اليوم بعد ما اذل نفسي وافرض روحي عليك

انت الكسبت واني الخسرت ، بالعافية عليك

****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة/ حبايبي اني ممحدة موعد جديد للنشر ودانزل حسب وقت فراغي فالاتمنى منكم لحد يسألني عن موعد محدد لان اني ما اريد اخلي موعد
واتفاشل وياكم فخليني هيج انزل حسب فراغي افضل ❤️

.