الموت الحي الفصل الرابع وسبعون 74 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : سديت جنطتي وانداريت عليه لكيته واكف بمكانه يباوعلي

تجاهلته ومشيت ساحبة جنطتي وراي ، طلعت من الغرفة وسديت الباب وراي

سندت ظهري على الحايط وعضيت شفايفي حتى لتطلع صوت شهكاتي ، كتمت الغصة بداخلي ما اريد احد يسمعني

جريت نفس وكمت اردد بداخلي ، اهدي اهدي حبابه لتبجين

وكفت عدل وحمحمت ، عفت جنطتي ورحت لغرفة جدي ، دكيت الباب ودخلت لكيته كاعد يشتغل وبس شافني گلب وجهه

السلام عليكم

النوح : وعليكم السلام ، اذا جايه وعندج شي اجلي لغير وقت ماعندي مجال استقبل احد

زبيدة : ميحتاج ما راح اخذ من وقتك الثمين هواي هنه حجايتين خبلغك بيهن واروح

النوح : احجي بسرعة عندج خمس دقايق

زبيدة : اني وهارون قررنا ننفصل واني اجيت ابلغك إني باجر حروح اوكل محامي حتى يمشيلي بالاجراءات ، ما اريد نطول بالسالفة ياريت كلشي يمشي بأسرع وقت

اباوعله عگد حواجبة واشرلي بايده

النوح : عيدي عيدي شنو ؟ ما سمعت شتفضلتي ؟

زبيدة : لا سمعت وماكو داعي ارجع اعيد

النوح : انتِ شكاعدة تمسلتين شنووو قررتو تنفصلون هيييي بكيفكمممم

زبيدة : اعتقد اني ويا اصحاب الشأن مو انت

النوح : انتووو عايشييين عندي هاي اولاً ، ثانيًا انيييي متفق وياكم من البدااااية ، هذا الزواج جان اله مقابل ، انتِ اخذتي رادتج وذاك اخذ حريته

فعلى اي اساس تجون هسه تنقضون العقد والاتفاق البيناتنا ، شنو هي هيته لو بكيفكم

زبيدة : اني عن نفسي متنازلة عن كل الاتفاقيات البيناتنا اما بالنسبة لحفيدك فهذا شي ميخصني
أموركم حلوها بيناتكم وطلعوني خارج قوس

اني العليه بلغتك بإلي راح يصير حتى لتكول محد انطاني خبر وهسه من رخصتك

انداريت دامشي واستوقفني صوته

النوح : اخوج مبين ما بقى شي واجيبه للعراق ومجموعة الرجال القتلو ابن دنيا شبه لكيناهم

اذا تنفصلين انتِ وهارون كلشي اوكفه واسويها ، اخر همي اريح كلبج ما دامج تردين تكسرين الاتفاق البيني وبينج

زبيدة : انداريت عليه ، على راحتك الي تريده سوي

النوح : هيج صار الحجي ؟

زبيدة : اي ، اخوية عنده رب يحاسبه وياخذ حقنا منه في يوم من الايام واختي الله عوضها عن ابنها الراح وهسه عايشة ومستقرة واذا ما اقتصت من الاذوها بالدنيا فأكو آخرة هي الفيصل بينها وبينهم

النوح : يعني ما گام يهمج كل الحجيته

زبيدة : تؤ بطل يهمني

النوح : خوش ما دام هيج الحجي فبسيطة ، اخذي راحتج

زبيدة : الي يطلع بايدك سوي اني لهنا واكلك ستوب بعد مابيه اكمل

هالعلاقة استنزفت مني بما فيه الكفاية واعترفلك ما كمت اكدر اتحمل اكثر

تريد اتنازلك عن البيت ، المزرعة ، كلشي مستعدة اسوي بس خليني الملم شتات نفسي الي تدمرت من يوم الدست بي عتبة بابكم ولليوم

هالمرة اريد اشتري راحة بالي واني الي ابادر وانسحب ، احنه عايشين حياة وحدة مو مال نعيشها بهالتعاسة

من رخصتك

طلعت من الغرفة واخذت جنطتي نازلة جوه ، صارن بوجهي الحباب ، كملت مشي ولا كإني اشوف احد

سبحان الله البرود الي انذب عليه بلحظتها غريب ، مجان عندي اي ردة فعل ، اتحرك بصمت لساني ساكت واحس روحي فارغة

دامشي وسمعت صوت رجلين تهرول ورايه يتبعها صوت بيبتي التحثني حتى اوكف

تحسرت وانداريت لكيت بيبتي واكفه ورايه وتلهث

حمزية : شبيج وشنو هاي الجنطة البيدج ، وين رايحة ؟

زبيدة : انتهت اقامتي هنا وصار لازم اروح

حمزية : شنو انتهت اقامتج ، احجي بالقلم العريض شنو سالفتج ووين رايحة

زبيدة : ماعندي القابلية احجي سألي النوح وهو يسولفلج

حمزية : اوكفي مو احجي وياج زبيدة ولللللج

زبيدة : عفتها ومشيت ما جان عندي القابلية احجي بوقتها

وصلت لاهلي دكيت الجرس ، طلعتلي خالة وئام

وئام : هلوو زبد تعـ... شنو هاي الجنطة

زبيدة : تستقبلوني يمكم ؟

__________________________________

بصائر : للصبح ما نمت ولا غمضت عيني ، الليل كله كضيته دمعتي ما نشفت

كل بنية تعيش هالليلة بشكل مختلف والكل يسموها الليلة المستحيل تنسي سواء جانت حلوة لو مرة

وفعلًا هالليلة من كد ما جانت مرة عليه راح تضل مطبوعة بذاكرتي منا لمن اموت

عمري ما راح انسى حسراته كدامي وهو يتلمس اسم زبيدة الموشوم على مكان كلبه

لو شلون انتفض من كتله امسح الوشم وليش ما شلته ، ردة فعله جانت صدمة بالنسبة الي ، تمنيت بوقتها ما سائلته حتى لا انصدم هالصدمة

لا وفوگ كل هذا عافني وطلع حتى ما فكر يبررلي موقفة وهياتني كاعدة وحدي وهو لسه ماكو

صار الفجر كمت صليت ومن كملت شفته طب بس وضعه مو طبيعي

مو متوازن وتعبان بشكل ، انوب شافني وصفن بوجهي وكام يضحك

حليم : هاي شنو ، ههههههه خرب عرضك حليم بس لا تيهت واجيت للمسجد

انوب مسجد نساء امشي على ريحتجن مو بأيدي بعد روحي

بصائر : ضليت صافنه بوجهه ، ياا هذا شبي !!

اشفته دنگ عليه وقدم وجهه من وجهي

حليم : شو خلي اباوعلج هههههه خشمج جنه سرسيحه خرب عرضج على هالخشم

بصائر : لزمت خشمي وكرمشت وجهي ايع ريحته تكتل

لحظة لحظة هذا جاي يتطوطح وريحته مو طيبة ، اكيد شارب ، باوعتله بإشمئزاز ودفعته

انت سكران ؟!!!

حليم : استغفر الله سكران شنو ، اني شارب شارب

شارب لو لحيه ههههههههههه

بصائر : ثاني كسرة انكسرتها بهذا اليوم من بعد سالفة الوشم هي هاي الكسرة

اني انولدت بعائلة ملتزمة دينيًا ، عمري وحياتي ما شفت اخواني يشربون جكارة وحتى من اسلام جان يشرب نركيلة يستحي يشربها كدامي وكدام امي

وهي مجرد جكارة ونركيلة واليوم هه ، اليوم اني اول مرة بحياتي اصادف انسان مخمور وللاسف من القدر حب يراويني هاي الحالة راواني ياها برجلي

وبيوم عرسي

حليم : ليش صافنه بوجهي ، تردين فلوس لو تردين انام وياج

تره جيبي ستوني فرغته وطاقة ماعندي يعني مابيها مجال تحصلين لا هاي ولا هاي

بصائر : كمت لميت السجادة وجريت ايده

حليم : وين ماخذتني كتلج ما عندي طاقة اسوي شي دوري غيري

بصائر : ما رديت عليه اخذت ايده ومشيت نيمته على الجرباية وغطيته واني اخذت مخدة ولحافة ورحت نمت على القنفه

ما اعرف شلون من القهر كدرت اغفه

ما كعدت الصبح غير على صوت طكطكه بالغرفة ، فتحت عيوني لكيت حليم كاعد كدامي

مبدل ملابسه ومبين عليه سابح

حليم : صباح الخير بصائر

بصائر : كعدت مرجعة ظهري على القنفه بدون لا ارد عليه وهو من انتبه عليه تحمحم

حليم : اعرف الصار البارحة جان غلط وانتِ شما تحجين عليه يكون حقج والله يلوم الي يلومج

بس ممكن نكعد نحجي شويه ، ياريت لو تسمحيلي اكعد وياج ونسولف

باعي حتى حضرت النه الريوك خلي نكعد نتريك سوه ونسولف ، انتِ وجهج اصفر ولازم تاكلين

هاا شتكولين

بصائر : خلي اغسل واجيك ، دخلت للحمام غسلت وبدلت سيت النوم بتراك ستن ، شلت شعري وطلعت لكيته مرتب الاكل ومنتظرني

حليم : تفضلي استريحي ، تحبين اصبلج جاي لو كهوة

بصائر : كعدت على صفحة وباوعتله ، ما اريد اكل شي ولا اشرب شي رجاءً كول العندك

رغم كل الي صار بس ما زلت اريد اسمع منك ، اتمنى تنطيني ولو مبرر واحد على الي صار البارحة

اباوعله تنهد واجه كعد على القنفة الي بصفي

حليم : باعي بصائر اني اعرف الصار البارحة اكبر غلط قبل ليكون بحقي فبحقج

ولو شكد ما اعتذرلج هم اكون مقصر ، حتى انتِ اي ردة فعل تبدر منج تكونين محقة بيها

بس صدكيني اني ما جنت ناوي اسوي هيج ولا اعوفج ، كل ما بالموضوع إني جنت متوتر ، عليه ضغط بالشغل ومخبوص بالتجهيز للعرس انوب انتِ
شفتي الوشم

واني منا متوتر ما لكيت نفسي غير اطلع من الغرفة ، بلحظتها ما عرفت شلون افسرلج الموقف الصار
وحتى اتجنب يصير بيني وبينج شي مو حلو فضلت إني اطلع

بصائر : طيب اجي وياك واعبر هاي ، الشرب شلون راح تفسره الي زائد انت من تقدمتلي وحاجاك امين
مو كتله انت مبطل شرب ومن زمان

اشو البارحة كلامك اختلف واجيت سكران وحالتك حالة

اباوعله توتر وكام يمسح على ركبته

حليم : احم كتلج البارحة جنت مضغوط وما لكيت نفسي غير اشرب ما جنت متقصد

بصائر : يعني اني هسه اذا انضغط لو اتعب اروح انام بغرفة امي هل من المنطقي البارحة لان انضغطت اروح لبيت اهلي وما ارجعلك غير الفجر

ومن تسألني بكل بساطة اكلك جنت مضغوطة وطلعت ارتاح وارجع مجنت متقصدة !!

شبيك ؟ ليش متجاوبني مو تريد نتناقش هياتني داسولف وياك ناقشني

حليم : انتِ ليش جاي تصعبين الامور هيج

بصائر : ليش شسويت ؟

حليم : احسج متردين الموضوع ينتهي على خير وكاعدتلي على الزلة مو اعتذرت منج شنو ترديني اسوي اكثر من هذا

بصائر : ما اريد منك تعتذر مني يكفي تراجع نفسك وتعرف حجم الغلط السويته

انت جذبت على اخوية وخدعته وهذا الشي بحد ذاته يخليني ما اثق بيك لانك مو كد كلمتك

اباوعله تنهد وجاوبني

حليم : ما راح اعلق على كلامج ولا ازعل منه بس رجاءً خلي الصار البارحة بيناتنا ما اريد احد يعرف وخصوصاً امين

اني ما اريد اخسر أخوج، ما عولت الكه واحد يفهمني مثله وكلش صعب عليه اتفشل ويا

رجاءً لتحجين لاهلج ولا لاي احد عن الصار ، ما اريد العلاقة البين عوائلنا تخرب

بصائر : وانت الهامك من كل هذا عوائلنا

طيب واحنه ما جبت طارينا ، كلامك عبارة عن اعتذار وتحذير لا اكثر

برأيك يعني احنه هسه لكينا حل

حليم : ماكو مشكلة حتى نكعد ندورلها على حل ، احنخ تزوجنا زواج تقليدي ومصيرنا مع الايام نتأقلم ويه بعض

أما هسه ياريت تنطين الفرصة الي ولنفسج نتعود على بعض واعتقد هذا الحل الانسب في حال لو جنتِ تحسين اكو مشكلة

بصائر : هزيت راسي وكمت

بلا زحمة عليك خلي نستعجل بالروحة للبيت ، امي هناك منتظرتني واريد الحك عليها

حليم : رغم إني حاجز يومين بس على راحتج

بصائر : رحت بدلت وهو بدل واخذ الغراض وطلع واني لحكته

وصلنا لببيتهم ولكينا المزايق والدگ والركص بالشارع ما صاير

اباوع لابو طاير بي طيور ، حضنه بنص الناس وبوسه جنه ممصدك ابنه تزوج وولد اخو يحضنون بي وهو يبادلهم ويضحك

مبين على اهله يحبو هواي ، بس الفاجأني اخوته ما تقربو منه حتى سلام ما سلمو عليه

فززني من شرودي صوت ابو ، ركزت بنظري عليه شفته لابس بنطرون اسود وقميص وردي فاتح

ابتسمت على شكله ، سبحان الله شكد شايل جمال ابوهم ، صاحب بشرة بيضة وعيون زرك تكول كزاز كد ما صافية

يحيى : هلا بويه هلا حبيبتي تعاي ابوسج

بصائر : بوسني وحضني من جتفي اني وحليم

يحيى : تعال ولك ميثم اخذلنا صورة سوه

ميثم : صار جدو

بصائر : اجه ابن علي اخذلنا صورة بالموبايل واشرلنا بمعنى تم

يحيى : نورتو البيت حبايبي نورتو ، يله حبيبي ابو حازم جيب الدابة

بصائر : جابو الذبيجة ذبحوها جوه رجلينه ، درت وجهي رغم إني متعلمة على شوفة الدم بس المنظر مجان محبب الي

يحيى : يله ابني اخذ مرتك ودخلوا جوه

حليم : تعاي

بصائر : دخلت ويا واستقبلتنا امه بالهلاهل

رميم : صباحية مباركة بعد روحي

بصائر : بوسناها ودخلنا سلمنا وصعدنا لغرفتنا ، فتحتلي الباب وخلاني ادخل وهو طلع

سديت الباب وبس شفت امي موجودة بجيت وركضت حضنتها وهي من شافتني ابجي كامت تبجي وياي

هناء : حبيبتي ، امي انتِ شلونج يبعد گلبي

بصائر : ابتعدت ومسحت دموعي ، الحمدلله زينه

هناء : عساج دوم بعد گلبي

يله تعالي بدلي حضرتلج قفطانج وهاي الربطة الستن كويتها الج وحضرتلج الحذاء مالتج

بصائر : دنكت بست اديها ، عاشت ايدج حبيبتي

رحت بدلت ووكفت هي تعدل شعري ، باوعتلها حسيتها بيها شي

شبيج يمه

هناء : هاا لا حبيبتي مابيه شي

بصائر : انداريت عليها ولزمت اديها ، احجيلي شصاير ولتكليلي عروس وما عروس

سولفيلي شبيج

هناء : اخوج امين

بصائر : لزمت گلبي شبي ؟

هناء : البارحة بالليل اخذ مرته شمرها عند اهلها وسمعته باذاني يكلها بعد ما اريد رجلج تعبت باب بيتي

بصائر : وعلى هاي ضايجة ؟ من يطبها مرض عساها بالزايد يارب يطلكها ونخلص منها

هناء : ما اريد ازمخ بيج واقهرج واليوم صبحتج بس يمه نصيحة لتخليج غليضة قلب

تره الانسان اليحقد ميعيش ولا بعمره يرتاح ، طول حياته يضل قلق وتعيس

خلي كلبج واسع وعوفي ديمة بحالها تره اني ما اقبل عليها ومثل ما احبج احبها

البنية عدها مواقف متنسى واذا انتِ ناسية فخليني اذكرج

تتذكرين من عطل موبايلج ولابتوبج وهي اخذت الفلوس المجمعتهن انطتهن الج حتى تصلحيهن وكلتلج لتكلين لامين

تذكري تذكري بذاك الوكت جانت ستوها كاعدة عدنه وماخذة اخوج

لتخلين الكرهه الي بكلبج ينسيج زينة الناس المرو بحياتج

بصائر : مسحت على جتفي وباستني

هناء : لازم اروح اخوتج سودة عليه عفتهم بلا غدة وهم يالله اروح اسويلهم اكل قبل ليجون من الشغل

بالمناسبة هاي هدايا بسيطة من اخوانج ، حبايبي البارحة للصبح ما نامو يكولون البيت راحت روحه من راحت بصائر

بصائر : بعد عمري همه الله ليحرمني منهم ، اخذت الكيس من عدها وهي ودعتني وطلعت

فتحت الكيس وشفت علب مالت اكسسوارات ، كعدت وفتحتهن ، شفت الاولى جان مكتوب عليها امين ، فتحتها شفت كلادة ذهب كل ناعمة ومرسوم بيها نظارة طبيبة

بعد گلبي الميناسني ، ابتسمت ولبستها ، رجعت فتحت هدية اسلام جانت هم كلادة وبيها كبسولة

خربت ضحك هاي اخوتي ممصدكين اختهم تشتغل بكادر طبي

سمعت صوت الباب ينفتح ، شلت راسي شفت بنية بوجهي

: مرحبا

بصائر : ابتسمتلها مراحب تفضلي

: الف مبروك على زواجكم

بصائر : حبيبتي تسلمين الله يبارك بيج بس عفوًا منج ممكن تعرفيني على نفسج

: اني سجى

_________________________________

دنيا : والله عرفت ، من البداية عرفت ركصج هذا راح يسويلج مشكلة

وهاج استملي طلعو مصوريج ، لج مو كتلج والله كلبي جان حاسني من شفتهن يتبسبسن كون الكفها واعرف عدهن شي

اااخ منج زبيدة اااخ بس لو تبطلين عنادج احنه بخير

زبيدة : اكلج لتضلين تمسلتين اليسمعج يكول جنت عريانه خفي علينا

تره المقطع كلشي مابي شنو اول وحدة اخر وحدة اركص بعرس

دنيا : لا مو اول وحدة بس انتِ تدرين العالم كله يدري بحليم يريدج وانتِ تصرفج بعرسه كلش مو لائق

وبعدين رجلج شدعوة عليه هيج طلع عربانه گبل اجه تعارك وياج غير يفتهم منج بالاول

وئام : والله اني من البداية ما جنت راضيه على هذا الزواج لان ادري هاي العالم شنو من مله

دنيا : الصوج مو بيهم الصوج بالحمارة القبلت بابنهم المسودن وعاشت تحت رحمته بعد كل السوا بيها

زبيدة : انتِ ليش متحترمين نفسج وبعدين شنوووو مسووودن احجييي عدل

وئام : كل عقلج وكاعدة تدافعيله هم

زبيدة : ما جاي ادافعله بس مرضة ماله علاقة بالمشاكل الصارت بيناتنه ماله داعي هذا الكلام

دنيا : على كيفج على كيفج شبيج كمتي تتراجفين

زبيدة : اذا متسكتين وحق هو الله اركعج بالكلاص
شبييييييج

دنيا : اريد اوعيج على روحج ، تذكرين زبيدة الاولية شجانت تسوي من احد يدوسلها على طرف

وينهاا هاي وينهاا اشو كاعدة واعصابج باردة ولا كإنما صاير شي

رجلج الشفية بدال لا يعاركج كون يحاسب الصورج بدون علمج ياله يرجع عليج

لان السالفة بيها فضيحة ، تدرين اذا انتشر الفيديو شراح يصير بيييج عبالج العالم راح تعوفج بحالح

زبيدة : طزز بالعالم

وئام : استوعبي الكلام يمه تره الصار مو شويه احنه لوما نخاف عليج منحجي هيج وياج

زبيدة : يا جماعة حاولو تفهموني الله يخليكم اني من اجيت لهنا مو حتى تحلولي مشكلتي

الموضوع بالنسبة الي مخصوم اني ما جاي ادور حل للمشكلة

نكثت ايدي خلص البيني وبين هارون انتهى من قبل ساعة واني مصرة على الطلاگ غير هذا الكلام ماعندي

دنيا : انتِ شايفه روحج من جاي تحجين هالجملة شلون صوتج مهزوز وترجفين

انتِ نفسج ما مقتنعه بهذا الكلام

زبيدة : انتِ ليش مترجعين لبيتج وتفكيني منج تره جاي تنرفزيني

ام حسن : يمه زبيدة صحيح تصرف رجلج وياج غلط ويستاهل تزعلين منه بس متوصل تتطلكين وتهجمين بيتج بس لان سمعج كلام مو حلو وتعارك

زبيدة : ما راح انفصل علمود سالفة الصور كتلكم الموضوع تافه بالنسبة الي

دنيا : لعد ليش تردين تتطلكين هيج نساوة

زبيدة : عندي اسبابي الشخصية الي افضل احتفظ بيها لنفسي

ورجاءً لحد يتدخل بقراراتي ، اني واعية ومسؤولة عن نفسي

وئام : مو هنا المشكلة يا زبيدة انتِ بزواجج من هارون كلتي انُ عندج اسبابج الخاصة وهسه بقرارج من الانفصال عنه هم جاي تكولين عندج اسبابج الخاصة

زبيدة : اتمنى مثل ما احترمتو رغبتي سابقًا تحترموها هسه

اني وهارون راح ننفصل والقرار مخصوم بالنسبة الي فرجاءً خلوني امشي بحياتي مثل ما اني اريد

عفتهم وكمت دخلت للاستقبال ، سديت الباب عليه وتمددت على القنفة

بديت استرجع كلامه بآذاني

"انتِ الحبيتني مو اني وانتِ الحاولتي تتقربيلي وفرضتي روحج عليه مو اني الطلبت منج هذا القرب"

" انتِ الذبيتي روحج عليه ولزكتيلي "

"انتِ الذليتي نفسج وكرامتج وبقيتي وياي محد ضربج على ايدج وكلج رجعي"

لميت شفايفي واطلقت العنان لدموعي ، يربي لعد شكد طلعت اني رخيصة وبلا كرامة

اول مرة بحياتي احس إني عالة على احد ، اول مرة احس إني فعلاً بلا كرامة

وفعلاً هارون نجح انه يحسسني بهذا الاحساس ، غريب شكد طلعت مغفلة وشكد ضعيفة لدرجة

اقرب انسان لگلبي والي ما جنت اتصور في يوم انه ممكن يحسسني إني ذليلة اله ، يلزم عليه نقاط ضعفي
ويستغل هاي النقاط حتى يكسرني

وفي سبيل يبرئ نفسه يعيرني بمشاعري تجاهه بس اني استاهل اني البادرت شنو المفروض اتوقع منه مثلاً

بكل الاحوال هو جان ضامني وضامن وجودي الدائم بحياته لدرجة كلش عادي عنده انه يجرحني ويأذيني

عباله كل مرة تسلم الجرة واغلس وامضي حتى لا اخسره بس هالمرة لا

اني من البداية كلت إني مستحيل اقبل على نفسي اصير مثل امي

امي فشلت بإنها نحافظ على ابوية ولا هي الضلت وحاربت حتى تكسبه ولا هي الي ابتعدت عنه وحافظت على ما تبقى من ذاتها

واني اعترف اليوم خسرت فرصة إني اكسب الانسان الاحبه بس لا يمكن اخسر ذاتي

اني لجئت للقرار الثاني الما كدرت امي تسوي وهو الانفصال

اذا جان انفصالي عن هارون يرجعلي احترامي امام نفسي فآني جاهزة ومستعدة لابشع العواقب

المهم إني ما اخسر نفسي ، ما اخسر زبيدة

____________________________________

امين : واكف اشتغل وبالي يمها

شمرت لشه اللحم من ايدي ومسحت وجهي بقميصي

طلعي من راسي من خرب غيرتج

وسام : شبيك ولك

امين : اختنكت تعال كمل مكاني

نزعت الجفوف وطلعت غسلت وكعدت بره ، سحبت باكيت الجكاير ورث جكارة وكعدت ادخن

هسه اني مو طردتها ليش ضميري يأنبني ، ليش كاتلني القهر لان نهرتها وبجيتها

رغم كل الي صار بس متندم على ردة فعلي الموضوع ما ازوع كلشي واعاملها بهاي الطريقة

لو شما تسوي المفروض اعاملها بأصلي واخلاقي ما اكسر بيها هيج

ما انكر إني رغم ضايج ننها بس كسرت خاطري من شفتها شلون تنشغ وتبجي وتتوسل ما ازعل منها

هالبنية غريبة عجيبة سبحان الخلقها مدري شنو من تأثير عليها بحيث الواحد حتى وهو ضايج منها بدون شعور يشفق عليها

سمعت صوت مسج يجي لموبايلي ، سحبت الموبايل شفت رسالة من دنيا كاتبتلي بيها

دنيا : اني وتيومي طلعنا نغير جو بمنتزة الـ**** عادي تجي يمنا شويه اريد احجي وياك

امين : تنهدت وكتبتلها جاي ، كمت نزعت المريول ودخلت للمدير طلبت منه اذن وطلعت للبيت سبحت وبدلت وطلعت للمنتزة

وصلت لكيتها فارشة وكاعدة وتيم كدامها يلعب ، تقدمت شلت تيم بوسته ورجعته للمرجوحة واجيت يمها

السلام عليكم

دنيا : وعليكم السلام ، تفضل اكعد

امين : كعدت وشفتها طلعت كلاص سفري صبتلي جاي وقدمته الي

دنيا : تفضل

امين : اخذته منها وباوعتلها ، كولي خوية شنو تردين مني

دنيا : امين اني ادري بكلشي ، ديمة سولفتلي كلشي صار بيناتكم

واني شاهد الله ما راضيه على تصرفها وانت كل الحق بايدك وشما تسوي وياها مستاهله ، هي هواي جرحتك واذتك

واني بصراحة ما اعرف شلون اعتذرلك بالنيابة عنها

امين : ميحتاج تعتذرين اختج ما سوت شي مجرد صارحتني بمشاعرها وبلغتني برغبتها بالانفصال واني لبيته هذا كل ما بالموضوع

دنيا : واذا اكلك اختي جذابة وكل حجيها كلاوات تصدكني ؟

شوف امين انت تعرف انُ معزتك عندي من معزة معين وما افرق بينكم وداعة ابني

اني لو ما متأكدة انُ ديمة حجت هالحجي وتندمت فلا اجي واحاجيك

تخيل من البارحة لحد الان دمعتها ما نشفت ، الليل كله كضته تبجي وتناشغ بس لان عافتكم ورجعت لبيتنا

خلي نحجي بالمنطق هي لوما حاسة تجاهك بمشاعر تتأذة هيج لان طردتها وعفتها ؟

اي وحدة هسه لو متحب زوجها وزوجها راد يعوفها راح تكيف بس ردة فعل ديمة متدل على انها فرحانة

والله البارحة الليل كله هي تسولف عليك وعلى خالة هناء واسلام حتى بصائر الي اني وانت علاقتهن باخر فترة هواي توترت ذكرتها

ديمة تكول أنها تحس نفسها غريبة بيناتنا لانها متعودة عليكم وخسرانكم بالنسبة الها مو شوية

والغبية ستوها استوعبت حجم الغلط الي سوته واني متأكدة لو يرجع بيها الزمن مستحيل توكف بوجهك وتحاجيك هيج

امين : اني اقدر كلامج واحترم وجهة نظرج بس تعذريني ديمة هواي اذتني واني گلبي ملجوم منها

وما اعتقد في يوم من الايام راح يصفى كلبي من ناحيتها

دنيا : اني ما اريد كلبك يصفى من ناحيتها بس كل الاريده منك تكعد بينك وبين نفسك وتراجع فكرة الانفصال

ما اكلك لتزعل منها بس مع هذا انطي لنفسك فرصة تفكر بالموضوع

امين : احاول بس ما اوعدج

دنيا : يكفيني انك مكسرت بخاطري وراح تحاول وكلش ممنونه منك لان ما خجلتني واجيت

امين : ابتسمت لو مهما صار انتِ وزبيدة خواتي ومثل ما انتن تعدني مثل معين اني ما اخيرجن عن بصائر

دنيا : الله يحفظك ويخليك لشبابك يا وردة

اصبلك بعد جاي ؟

امين : لا رحم الله والديج لازم اروح

دنيا : لعد يله اني هم اروح وياك ، تمتم حبيبي يله

تيم : وين

دينا : للبيت

تيم : ماا

دنيا : شنو ماا ؟

تيم : ميريد روح وحدك

دنيا : شنو اروح وحدي امشي يله تره ازعل منك

تيم : يله اجه

دنيا : بعد روحي اليسمع الكلام ، يله سوي لعمو بيباي

تيم : عبيبي عمو بيباي

امين : بيباي بعد عمك

دنيا : راح امين واني خابرت السايق اجه رجعني للبيت

اجه وصلني للبيت ، دخلت لكيت الدنيا مخبوصه ، خطار وناس كومة ، سلمت وصعدت اني وتيم

فتحت باب غرفتي لكيت يوسف كاعد يگلب بالتلفزيون وبس شافنه فتح اديه

يوسف : هلا هلا بالنواقيص العايفيني

دنيا : ضحكت وتقدمت حضنته وبسته من ركبته

يوسف : سودة بوجهي عليك يمكرود ييوسف البارحة الليل كله ما نمت وست الحسن طبت وجهه مورد

دنيا : ابتعدت وبسته من لحيته راحتلك فدوة ست الحسن

تيم : بابا

يوسف : هاا يبعد روحي يمه البارحة كلتني الوحشة

افييييش بويه اخذتو رويحتي وطلعتو والزهرة للصبح ما كدرت انام بس اتكلب

اني اذا ذيج المرة متنام بحضني وذاك الولد ميكعدني واني غافي ويصيح نمنم ما ارتاح

دنيا : سودة عليه والله اضطريت ابقى هناك البارحة

يوسف : خير خوما صاير شي

دنيا : خلي اروح ابارك لحليم وبصائر فشلة ما باركتلهم واجيك

عندي هواي حجي ولازم تسمعني لان حتخبل وما اعرف المن اسولف

يوسف : لعد روحي واني راح ابدل لتيم وانتظرج

دنيا : تمام ، طلعت من الغرفة وتوجهت لغرفة حليم دكيت الباب ودخلت لكيت يمهم ناس من معارف بيت عمو

ابتسمت من شفتهم ، سلمت على حليم وباركتله وتقربت دابارك لبصائر وابوسها

بس تفاجئت بيها من وخرت خدها ودفعتني بخفه
والله فد استحيت خصوصاً لا هواي ناس جان اكو

وردة فعلها سوت هدوء بالمكان ، اني كمت ابلعم من الموقف والدمعة صارت بطرف عيني

ومن كد ما انقهرت ما جان باستطاعتي اسوي شي غير إني استأذن واطلع

ومن يومها للاسف اكتشفت انُ الانسان اذا حقد يسوي اشياء عمر العقل ميتخيلها ، ابسطها انه يكون بلا ضمير

__________________________________

في اليوم التالي / صباحًا

: ست انتِ متأكدة من هذا القرار

زبيدة : اي حضرة المحامي متأكدة ومصرة على الانفصال

المحامي : طيب شنو اسباب الانفصال بالتحديد حجة ما متفاهمين متنقنع القاضي خصوصاً بالعراق واذا زوجج رفض القاضي ما راح يطلقكم بس لان حجتج انج ممتفاهمه ويا

زبيدة : استاذ اني وزوجي متفقين على الانفصال واعتقد بهيج حالة المحكمة ما راح تعارض قرارنا

المحامي : طيب ليش متنطون نفسكم فرصة انتِ وزوجج قبل لا تخطون هيج خطوة صعبة الطلاگ مو هين

كلشي بالدنيا اله حل اني لو عليه ما ادير بالي بالعكس الموضوع يخدم شغلي بس انتِ بنت صديقي وامرج يهمني اكثر من الماديات

زبيدة : استاذ كتلك الموضوع مخصوم بالنسبة الي اتمنى متضغط عليه

وياريت لو تمشي بالاجراءات بسرعة

المحامي : هاهي على راحتج

زبيدة : كمت سلمت عليه وطلعت راجعة للبيت ، وصلت للبيت فتحت الباب ودخلت لكيت خالة ودادا واكفات بالباب

وئام : وينج انتِ صارلي 3 ساعات اتصل بيج

زبيدة : جنت يم المحامي خير ؟

ام حسن : شنو ديمة مو وياج

زبيدة : وشعدها ديمة وياي !!!

اباوع لوجوهن اصفرت ، شبيجن ؟

وئام : اذا ديمة مو وياج لعد وين راحت ؟

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.