الموت الحي الفصل الخامس وسبعون 75 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

امين : كعدت من النوم ، باوعت للساعة بالـ10 الصبح

تنهدت بضيق ، اليوم سبت رغم عندي شغل بس ما كدرت اطلع ، احس روحي تعبان ومرهق مو شلون ما جان فكلت اخذ اجازة اليوم ارتاح بيها والاحد ارجع للشغل

عاد انعم الله على الاسطا والمدير من شافو وضعي ما كالو لا گبل كلولي براحتك

وخرت الغطه عني وكمت من الفراش ، جريت باكيت الجكاير وطلعت من الغرفة

سمعت صوت تطكطك جدورة بالمطبخ ، هاي اكيد امي ، عود وصيتها اني متشتغل ولا تطبخ شي اليوم كتلها راح اجيب سمج شوي من بره بس ميفيد وياها تموت اذا متهلك روحها بالشغل

طبيت للمطبخ ، انتِ وتالي وياج يمه مو كتلج لتطبخين شـ.....

سكتت من شفتها گبالي ، اباوع لفستانها الوردي وشعرها الاشگر المفتوح على طولة

للحظة صفنت عليها بعدين استوعب ، لحظة هاي شرجعها لهنا ؟

باوعتلها اندارت عليه من سمعت صوتي وبس شافتني تلبكت وتداركت نفسها وابتسمت

ديمة : صباح الخير

امين : انتِ شعندج هنا ؟

هناء : اني جبتها

امين : انداريت على امي لكيتها وراي ، عفوًا !! ما فهمت انتِ جبتيها !!

هناء : اي اني ، جنتي مكانها هنا ببيتها شعدها باقية عند العالم هذا بيتها واحنه اهلها

امين : اهلها شنو يمه انتِ ليش تغثيني ، يعني اني اكلج ما اريدها وراح اطلگها ترحين تجيبيها وتزعيها بوجهي

صدك تحجين !!

وانتِ ، اني مو كتلج بعد ما اريد اشوف وجهج ولو حتى بالصدفة شرجعج لهنا متكليلي شرجعج امشيييي رجعيييي لاهلج يييييله

اباوعلها گبل بجت ومشت بس امي لزمتها

هناء : اسمع لك هذاااا بيتيييي انييي ، استقبل بي اليعجبني واطرد منه الميعجبني ، وديمة بنتي حالها من حال بصائر وبما انها بنتي يعني بيتي هو بيتها

وانت لسانك تحطه بلهاتك وصوتك ما اسمعه ، ديمة راح تبقى هنا وتعيش معززة مكرمة وغصبًا ما عليك

امين : ما اريدها انيييي ما اريييدهااا شنووو هيييي جبرررر

هناء : وعنك ما ردتها بحالك هي واصلاً هي من رجعت فرجعت علمودي وعلمود اسلام واذا انت متعافي ومتريدها اني اريدها وما ممكن استغني عنها

ديمة : ععـ عفيه امين لتتعارك ويه خالة ، اا اني حروح وارجع هسه ، ااا اسفة ووو والله مقصدت اسببلك ازعاج هيج

امين : حرام بالحرم كلشي ما افتهمت منها تبجي وتحجي سوه

هناء : والحسين الشهيد يا امين اذا طلعت ديمة من البيت يآني اطلع قبلها وانت بكيفك

امين : فركت وجهي استغفر الله العلي العظيم ، براحتج يمه براحتج خليج وياها شبعي بيها واني طالعلج من البيت

هناء : الله ومحمد وعلي وياك يمه اطبگ الباب وراك زين

ديمة : اباوعله جر باب المطبخ وطلع من البيت كله

انداريت على خالة ، ليش سويتي هيج خالة حبابة خليني ارجع لبيت اهلي ، خلص مبين امين ميريدني بعد ما اريد افرض نفسي عليه الله يخليج

هناء : بس وكافي تناشغين متشوفين روحج فرفحت وانتِ مريضة

تعاي بعد امج وهذا امين اني اعلمه ، والله ما ربيته ولا علمته يصير قاسي وحاقد هيج مدري عليمن طالعلي هو واخته

لا اني ولا ابوهم هيج ، يله يله كافي حبيبتي لتبجين تره وداعتج اكبر جذاب هذا

هسه تشوفي نافش ريشة ومعنفص عليج لان ضايج منج ، انطي مدة وهو غصبًا ما عليه راح يرجع

امين يحبج يموت عليج وهذا الحب البكلبه راح يرجعه ، وهم لتنسين يا امي انتِ جرحتي وكسرتي بخاطرة فهم حقة يزعل منج

انطي الوقت واني متأكدة مع الايام راح يبرد گلبه من ناحيتج ، صحيح هو صعب بس والله حنين ويه اليحبهم ابني واعرفه

ديمة : مسحت دموعي ، حبابة خالة اني سولفتلج على كلشي صار بيني وبين امين بس ما اريدج تحجين بالموضوع كدامه

ما اريد اذكره بالسالفة واقهره اكثر وهم هو ميقبل احجيلج اي شي حتى لا اغثج واني ما اريده يزعل مني اكثر

هناء : خلص ولا يهمج اعتبريني كلشي ما ادري بس عوفيني اساعدج من بعيد لبعيد

واذا ما خليتج انتِ وامين تنامون على نفس المخدة ووجهوك تضحك اني مو هناء

بس هاا كون انتِ تطلعين كد حجايتج وفعلاً تردين تبدين صفحة جديدة ويه ابني وتعيشين وتتعايشين ويه كل ظروفة سواء جانت زينة او مو زينة مو شويه وتجزعين

ديمة : لا هاهي خالة اني قررت ، بالفترة الي ابتعد بيها امين عني تيقنت انه مو شخص عادي بالنسبة الي

ما اجذب عليج واكلج احبه واموت عليه بس بنفس الوقت ما اكدر اعيش وهو ما موجود بحياتي

حتى انتو رغم إني عشت وانولدت ببيت اهلي بس ما اشوف نفسي مرتاحة الا وياكم

ولهذا خلص اني اخذت عهد على نفسي ، حبقى وياكم واشارككم الحلوة والمرة

والحياة الاريدها راح اسعى حتى احصلها وياكم وبجانبكم اهم شي عندي ما اخسركم

وامين راح اسعى بكل طاقتي حتى ارجع علاقتي بي
وان شاء الله ربي ينطيني الصبر والقوة ويرزقني على كد نيتي

هناء : بعد روحي ويلوموني لان ما اريد افرط بيج

ديمة : حضنتها وغمضت عيوني متنهدة

ابتعدت وهي ابتسمتلي

هناء : يله يمه تعاي نكمل التمن الاحمر علما يجون الولد حتى نتغدة سوه

ديمة : تتوقعين امين راح يرجع ؟

هناء : اكيد يعني قابل وين يروح ، وكف طكطك علينا وطلع هسه ساعة ثنين يرجع وجايب الغدة وياا

ابني جنه سمجة اذا يطلع من مكانه يموت وامين هذا مكانه وما راح يعوفه يله امشينا

وما اوصيج شما يحجي وياج غلسي ولتطي وجه وتتعاركين ويا

ديمة : صار

هناء : وردة دمدم

ديمة : رجعت وياها ، علمتني شلون اطبخ التمن الاحمر ، من كملته رحت اصلي بس قبلها خليت جهازي على الشحن لان انطفه من الليل وتعاجزت ارجع اشحنه

فتحته ورة ما خليته على الشحن ، حسيت سطل ووكع على راسي من شفت فوك المية مكالمة بين امي ودادا وخواتي

ياااا اني شلون نسيت انطيهم خبر قبل لا اطلع !!

بعدني داتصل عليهم وطلع رقم زبيدة بوجهي ، جانت متصلة عليه

فتحت الخط وجاوبتها وياريتني ما جاوبتها لان اجاني صوتها يرعد

زبيدة : لجججج مطييييي انتتتتتتِ ويييييين

ديمة : احم

زبيدة : وقز القرط الي بكلبج يلللط وييينج

ديمة : رجعت لبيتي

زبيدة : منيلج بيت انتِ ام الوصخ

ديمة : احترمي نفسج زبيدة اقصد رجعت لبيت زوجي يعني امين

حسيت بصوتها يروح ، ثواني ورجعلي صوتها

زبيدة : بسيطة اني الج جاييتج جاييتج

ديمة : سدت الموبايل بوجهي ، عزه هاي بس لا راح تجي تبسطني

وفعلاً ماكو ربع ساعة واندكت الباب ، شويه وسمعت صوت خالة هناء تأهل بزبيدة

اباوع للباب انفتحت ودخلت زبيدة ويه خالة ، اباوعلها بس شافتني خزرتني وكعدت على القنفة

هههـ هلو زبيدة

زبيدة : هلا بيج بعد گلبي تعاي كعدي ، اريدج يمي

ديمة : لالا مرتاحة هيج ، اي شلونج

زبيدة : زينة تعاي كعدي بصفي

هناء : مترحين شبيج مصفصفه ، اخذي راحتج حبيبتي زبد اني حروح اقره قران اليوم عندي ختمة اريد اكضيها من رخصتج

ديمة : حسيت بخالة طلعت حجة حتى تطلع وتعوفنا وحدنا وفعلاً بس طلعت باوعت اني لزبيدة وشفتها
كوه مسيطرة على روحها حتى لتكوم تكتلني

زبيدة : تعاي كعدي يمي

ديمة : ماا

زبيدة : احترمي نفسج و تعاي خلي نحجي مثل الاوادم

ديمة : كعدت يمها وهي تنهدت وباوعتلي

زبيدة : ما راح اتعارك وياج بس اريدج تجاوبيني على سؤال واحد

شرجعج لهنا ؟

ديمة : صفنت مسترجعة ذاكرتي ليلة البارحة

"عودة "

ديمة : متمددة بفراشي واسمع اغاني حزينة حتى اتذكر امين وابجي بالزايد

مدري شجنت احس بوقتها بس اريد اطلع الي بكلبي
وهيج طريقة تخليني ابند من البجي وارتاح

ولسوء حظي اكيد طفه موبايلي واني بعز البجية وخرب عليه كل الاجواء

وخرت الهيتفونات وتأفأفت ، شمرته وكمت طلعت من الغرفة رحت اخذ شاحنة زبيدة

فتحت باب غرفتها لكيتها غافية بس مبينه باجية لان دموعها جافة على خدودها

شفت موبايلها على الشحن ، شلته من الشحن لكيته 100 ، اخذت الشاحنة وردت ارجع لغرفتي بس باوعت لموبايلها وكلت خلي اخذه اسمع بي ومن اكمل احطه الها على الشحن

اخذت الموبايل هو والشاحنة وطلعت راجعة لغرفتي
دخلت وتمددت على فراشي ، اخذت موبايلها فتحته لان اعرف الرمز

دخلت على اليوتيوب حتى ابحث على الاغاني الاريدها وصفنت على بحثها

سجل البحث مالتها جان عبارة عن ؟

-كيفية التعامل مع الشخص المصاب بطيف من التوحد ؟

-كيفية جعل الشخص الانطوائي اجتماعي ؟

- ماهي الامور التي تجعل الشخص الانطوائي سعيد ؟

-هل الرجال يحبون الورود ؟

- كيف اجعل زوجي سعيد ؟

- كيف اكون لطيفة ؟

- كيفية التعامل مع رجل برج العقرب ؟

استغربت من الاشياء الشفتها بقائمة بحثها ، اغلبية الاشياء الباحثة عنها جانت الها علاقة بشخص مو طبيعي

واكيد ما راح اخذ وقت حتى اعرف انُ هالشخص هو هارون

والي ظاهرلي انُ زبيدة مهتمة بهالهارون اهتمام مو طبيعي رغم انها جانت تشوف الموت ولا تشوفه
شغيرها !!

انتبهت بأعلى الشاشة اكو اشعار وصل ، سحبت الشاشة وشفت رسالة وصلت من رقم على الواتساب

ركزت على الاسم والصورة ، سهير !! ، تفاجئت من شوكت زبيدة وسهير اكو بيناتهن علاقة ويتواصلن ؟

فضولي خلاني ادخل على الرسالة واقراها ، جانت سهير دازه رسالة لزبيدة

سهير : زبيدة اني من البداية كتلج التعامل ويه شخصية مثل هارون صعبة جدًا وانتِ اصريتي انج تتحملين كافة العواقب المهم متخسري

ما راح اكلج ليش استسلمتي بنصف الطريق ، اني وياج بكل قرار يريحج بس حابة اذكرج بعدج عن هارون ما راح يكون سهل عليج

متأكدة انج مستعدة لهذا القرار ؟ والاهم من هذا ، عندج القابلية تتحملين النتائج الموجوعة الراح تشوفيها من بعد هالانفصال

انتظر منج الرد

ديمة : صفنت ، بصفة سهير شنو حتى تدخل بهيج موضوع بين زبيدة وهارون

اعرف بوقتها تصرفي عيب وغلط مو صحيح الانسان يكون متطفل على غيره بهالطريقة السخيفة بس اني فضولي بساعتها جان اكبر من إني افكر بأي شي

رجعت بالرسائل لوره وشفت الكلام الداير بين زبيدة وسهير ، محادثات ، صور ، رسائل صوتية

حرفيًا ساعتين اني كاعدة اقره واسمع واني مصدومة
معقولة هاي زبيدة المتقبل الواحد يگلها على عينج حاجب دتتحمل وتسوي كل هذا علمود رجال !!

زين هاي شوكت حبته لهارون هالكد مو جانت تكرهه وتزوجته زواج مصلحة !!

والصدمني اكثر انُ هو ممطنيها وجه او بالاحرى رافض يصارحها بمشاعرة

ومع هذا هي ما يأست ومن التواريخ مبين صارلها شهور تحاول ويا

عززه لعد شكد طلعت متعلقة بي بحيث دتحاول بكل الطرق تكسبه بس لان تحبه !!

طيب ليش مكلتلنا ؟ احنه مو خواتها واقربلها من سهير ، ليش ما حجت النا ، معقولة تستحي ؟

صفنت على الرسائل ومدري ليش اجت على بالي نفسي

يعني زبيدة الشافت ضيم من زوجها بس مع هذا ضلت تحاول وتعافر حتى تنجح هالعلاقة بس لمجرد انها حست انُ هارون يبادلها نفس المشاعر رغم انه ممصارحها

واني !! اني الله رزقني بانسان ، الكلمة اذا جانت تطلع
من لسانه فتكون حتى تمسح على گلبي

حيصيرلنا سنة اني وامين متزوجين ، ما اتذكر انه مرة غثني بحجاية لو قهرني ، حتى من جان يتعارك وياي فبكل مرة يكون الحق ويا ومع هذا يجي هو يصالحني

لا فديوم كسر بخاطري حتى طلباتي المتخلص مجان يتذمر وينزعج منها ، جان يحاول يكل الطرق يخليني راضية حتى لو جان هالرضا على حساب راحته

ما عاتبتي فد يوم على شي ولا فرض عليه شي ، دائمًا جان يحاول يكون الزوج المثالي بعيني

قدملي اشياء ممكن تكون عادية بالنسبة الي بس تكسر الظهر وتهد الحيل بالنسبة اله ومع هذا اني مجنت اسمعه حتى كلمة حلوة تخفف عنه هذا المجهود او على الاقل تحسسه بقيمة الديسوي الي

ما اتذكر بيوم انتظرته على غدة لو عشه ، لا فديوم كعدت سألته شنو الي مضايقك ، اكلت ، شربت ، شلون جان يومك ؟

وهو جان بعطلته حتى ريوك ميتريك الا اكعد اني والتم وياهم على نفس السفرة ياله يقبل ياكل

وحسب الفهمته اني هارون كلشي ما مقدم لزبيدة وهي تموت على الكاع اليمشي عليها

واني امين لو بايده يشعلي العشرة شمع ميكول لا ومع هذا اني خطوة وحدة بعلاقتي ويا ما فكرت اخطي

شنو فرقي عن زبيدة ؟ الفلوس !! هي بنفسها اعترفت انها مو سعيدة رغم انُ متوفرلها كلشي

اني هسه اذا احصل فلوس الدنيا ويجيني شخص نفس هارون ما راح اكون سعيدة ويا

من بديت اقارن بيني وبين زبيدة شفت نفسي شكد ساذجة وذرة شخصية ماعندي وعذرت امين والكل من نظرولي على إني مادية

كل عقلي اني عفت الناس اليموتون عليه علمود فلسين فلوس ، اذا ربحت الحياة الاريدها ما اعتقد راح اربح واني بعيدة عن الناس الاحبهم ويحبوني

وهم لو اريد اكون صريحة ويه نفسي اني ما ممكن الكه واحد يحبني مثل ما امين يحبني واكون اكبر غبية اذا افرط بهيج انسان علمود وصخ دنيا

الفلوس تجي بس الناس الزينة المُحبة والاخلاص بالعلاقة مو بسهولة ينلكه واني هالناس الله دزهم الي رحمة

ومتأكدة اذا خسرتهم راح اضل طول عمري اعض اصابعي ندم على فراكهم

بلحظتها وبدون اي تردد مني اتصلت على خالة هناء من موبايل زبيدة ، رغم الوقت جان متأخر بس مهمني

الحجي القريته والسمعته اثر بيه لدرجة خلاني اريد ابدي واصحح كل خطأ بدر مني وهذا السويته

اول ما جاوبتني خالة وبدون سابق انذار حجيتلها ، حرفيًا كلشي ما عدى سالفة راسل وهبه اعتبرتهم ماضي وما اريد اذكره حتى ويه نفسي

ما خليت شي ما سولفته الها ، لا جملت نفسي ولا انطيت اعذار لتصرفاتي كل الردته بوقتها اكون صادقة وياها

وهي بنفسها من سمعتني ودرت بيه ارجع لامين طلبت مني ارجع للبيت ، ويا الله مو عبالك كلتلي رجعي عبالك فوتتني للجنة

اول ما سديت الخط منها ، رحت لميت هدومي وطبيت سبحت وبدلت وضليت كاعدة انتظر الصبح واول ما صارت بـ8 الصبح طلعت من البيت ورجعت لبيت امين

تنهدت وهذا طل الي صار بالحرف الواحد

اباوعلها صافنه بوجهي وفاتحه عيونها شلون الممستوعبة السمعته

زبيدة : انتِ شلون تتجرأين تتجاوزين على خصوصيتي هيج ؟

ديمة : اني اسفة مجنت رايدة اتجاوز هيج بس صار عندي فضول

زبيدة : وفضولج يخليج تدورين بمحادثات خاصة هيج ؟ اني لو اريد من البداية جان سولفت الج شلون تسوين هيج ؟

تقبلين اني ادور وراج متستحين انتِ ؟

ديمة : اسفة

زبيدة : اسفج ما مقبول واني زعلت منج

ديمة : شبيج زبيدة هسه اني غريبة ، حبابة لتزعلين مني والنبي ممتقصدة وادري تصرفي غلط بس جنت حابة اعرف شنو علاقتج بسهير

زبيدة : وعرفتي عاشت ايدج

ديمة : تدرين زبيدة متتخلين كلامج شكد اثر بيه

يا الله يا زبيدة ابد متوقعتج تحبين هارون لهاي الدرجة وفوگ كل الحجا وياج قررتي تنفصلين عنه
بس ابد منطيني بي

وحتى تعاركتي ويه دنيا لان حجت عليه ، فدوة انتِ شكد طلعتي زوجة حبابة ومثالية

زبيدة : قصدج زوجة ماعدها كرامة

ديمة : لالا لتكولين هيج بالعكس انتِ لوما تدرين بهارون يحبج مجان سويتي كل هذا

زبيدة : اي بالمشمس يحبني

ديمة : لعد شتفسرين نظراته الج والورود الينطيها الج كل يوم حتى بوساته ، عفوًا منج بس اكو واحد يطيح لوحدة بوس من امكان عيب ويشمشم بيها وهو ميحبها

مو منطق هذا

ما سمعت منها رد ، شلت راسي باوعتلها ، لكيت خالة ايدها على حلكها وصافنة بوجهي

زبيدة : عزة العزاج لج انتِ بس لا قريتي الملاحظات الكاتبتهن

ديمة : هااا هو اني ما قريتهن كلهن بس شفتج كاتبة انه دائمًا يبوسج 3 مرات بنفس الوقت

ودائمًا من تنامين يشبكج ويشمج ومن تطلعين ويا الصبح ينطيج وردة قبل ليروح للدوام ووو

زبيدة : كافيييي سكتييي سكتيييي خررررب يوووومج شمخلييييه انتتتتتتتِ

ديمة : شبيج صرتي حمرة

تره لا عبالج لان اني متزوجة يعني ما استحي

زبيدة : لااااا مبين عليج المستحه كلللش مبين

ديمة : يووو زبيدة عاد لتصيرين كلش احنه متزوجات وعادي نحجي بهالسوالف فتحيلي گلبج

زبيدة : اذا متسكتين اقسم بالله لالطمج على حلكج لطمة اوكع بيها اسنانج

لج طايحة الحظ انتِ شمسوية ممخلية شي يعتب عليج بالجهاز اذا ممفتشه بي

ديمة : اسفة والله كتلج صار عندي فضول

زبيدة : انعل ابو فضولج السزز هذا

ديمة : لزمت ايدها ، زعلتي مني ؟ نترت ايدي ولزمت راسها

زبيدة : وخري عني طيح الله حظج يبووو يالفشلة الآني بيها

يربي لعد ما لكيت غير ديمة تفضحني كدامها ، اسمعي ولج الشفتي اذا يطلع لبشر حلكج افركه

ديمة : لا وعد مراح احجي لاحد سرج ببير

زبيدة : مسحت على وجهي ، زين وانتِ شراح تسوين
هسه ، متأكدة تردين تبقين هنا

هزتلي راسها وابتسمت

ديمة : متأكدة ما اريد اروح منا

لزمت اديها ، ساعديني زبيدة اني محتاجتج انتِ ودنيا هالفترة

اني ما اريد اصادق احد بعد ولا افتح گلبي لاحد غيرجن ، انتن خواتي وادري مستحيل تضرني في يوم الايام لذلك اريد تساعدني

اريد ارجع اكسب امين من جدة وجديد ، اريد اتغير واغير حياتي وياي

زبيدة : ما دامج نويتي تبدين بداية جديدة اني اول وحدة اوكف وياج ومثل ما كلنا وكفنا ويه معين حنوكف وياج

ديمة : حضنتها وابتسمت ، احبج هواي اني

زبيدة : مسحت على راسها ، اني هم هواي احبج واتمنى دائمًا اشوفج سعيدة

ديمة : واني هم اتمنى العلاقة بينج وبين هارون تتحسن وتعيشون سوه احلى حياة

اباوعلها تنهدت ومسحت عيونها الدمعن

زبيدة : ما راح يتحسن شي اني مصرة على الانفصال وهسه مثل ما انتِ نويتي تغيرين نفسج اني هم على واهسج راح اسعى ارجع زبيدة القديمة

ديمة : متأكدة راح تكدرين ، انتِ قوية وراح توصلين للي تردي اني واثقة منج

زبيدة : ابتسمتلها وطبطبت على ايدها شكراً

يله اعوفج تأخرت وصار لازم اروح للبيت

ديمة : وامي ودادا ؟

زبيدة : لتخافين اني راح اتكفل بكلشي

ديمة : طلعت وياها اوصلها للباب رغم توسلنا بيها اني وخالة تبقى على الغدة بس ما قبلت

وكفت داسد الباب وراها وتذكرت شغلة ، صحت باسمها ، زبييييدة ، اندارت عليه واشرتلي

زبيدة : نعم ؟

ديمة : مديت راسي وتفلت عليها ، وهي گبل لزمت وجها وعاطت بيه

زبيدة : هاييي لييييش

ديمة : تتذكرين من مرة كلتي اذا اتزوج تفلو بنص خلقتي

انتِ تزوجتي ولان جنتِ مغصوبة عبرناها الج بس هسه ما دام طلعتي تحبين او سوري ميتة بالحب

فتستاهلين التفلة

اباوعلها شاحت بنظرها عني وسوت نفسها متسمع بس سوتلي بسيطة بايدها وراحت

ابتسمت على ردة فعلها وسديت الباب داخلة جوه

______________________________

دنيا : سديت الموبايل بعد ما بلغتني زبيدة بسوايته ديمة

يوسف : هاا بشري

دنيا : طلعت راجعة لبيت امين

يوسف : والله عاشت ايدها ما دام رجلها زين وياها ليش تهدم بيتها ، كلشي بالدنيا اله حل

دنيا : ما عساي اكول غير الله يهديهم على بعض

يوسف : وانتِ ما ناويه تنهدين عليه

دنيا : ضحكت ، يو ييوسف والله الك خلگ

يوسف : مو بأيدي مشتاقلج

دنيا : كعدت بحضنه وبسته من خدودة ، اني هم مشتاقتلك يروحي بس دتشوفني شلون داتعب

خلي يهدئ البيت شويه وناخذ تيومي ونسافر لاي مكان نغير جو شتكول ؟

يوسف : هاهي خادم اني

دنيا : خادم ربك يروحي ، بسته وكمت انزل جوه يم خالة والبنات

نزلت لكيت الصالة فارغة بيها بس خالة والبنات وسجى وامها واكفات والاوضاع سكووون

كعدت بصف جمانة ، ندستها شكو ؟

جمانة : تابعي بصمت واستمتعي

دنيا : رجعت عيوني على خالة الحاطة رجل على رجل وتباوع لام نجاح وسجى

ام نجاح : امريني ست شنو ردتي مني

رميم : اعتقد انتِ من اجيتيني وكتيلي ام علي اني تعبت من الشغل وماعندي معيل يعيلني حتى اكعد

ومن كتلج يا ام نجاح كعدي معززة مكرمة وراتبج يوصلج كل شهر رفضتي وكتيلي اذا تردون تعوضوني عن خدمتي شغلو بنتي بمكاني واحنه ما رفضنا احترامًا الج

بس مو بمعناها بنتج تستغل هذا الاحترام وتتجاوز الحدود وتعاند اوامر صاحبة البيت الي هي آني

ام نجاح : يااا ولج بصائر شمسوية للست سودة بوجهي بس لا مفشلتني ويه الجماعة

ابريز : ام نجاح بطلي هالسوالف عزيزتي الكدامج مو مدمغين حتى تمشين هالسخافات عليهم

انتِ كاعدة ويه بنتج بنفس السويت حتى بالغرفة مشاركتها وحسب علمنا انتِ طول اليوم متمددة بفراشج فشلون تردين تقنعيني انج ما شفتيها
من طلعت من يمج بزي مو رسمي

ام نجاح : صح اني شفتها بس ما ادري بيها لازم تلبس زي رسمي

ابريز : ههههههه صدك والله يعني متدرين انُ احنه نفرض زي رسمي على العاملات بمناسباتنا

ذكروني بلا زحمة ام نجاح صارلها جم سنة تخدم هنا ؟

جمانة : اربعين سنة ، مو صح ؟

ابريز : بالضبط

ام نجاح : يعني واذا لبست وترتبت مثلكم يا ست شكو بيها يتيمة ومطلكة ومهضومة ، هم تريد تفرح بشبابها اعتبرنها اخيتجن

ابريز : اخيتنه شنو كل عقلج انتِ !! من تكون بنتج حتى تتجرأين اصلا حتى تقارينها بينا

رميم : كافي ابريز لتمصخيها ، باعي ام نجاح السالفة مو سالفة لبس

اني تعليقلي على موضوع العناد ، اني من افرض شي هنا يتنفذ بدون كاف لام ، حضرة جناب بنتج المصون
عايفة العاملات مكسور ظهرهن من الصبح

وهي رايحتلي للصالون كاشخة ومبدلة وجايتني مكيفة بروحها ، شنو الاستهتار والتهاون بالعمل هذا

عود شنو يعني تريد تمشي حجايتها عليه مثلاً

سجى : العفو ست اني خدامة جوه رجليج امشي حجايتي عليج ليش منو اني

رميم : لتتخيلين هذا الكلام راح يغير موقفي تجاه تصرفج السخيف بالعرس وعاشت ايدها ابريز من
منعتج تدخلين للقاعة حتى تصيرلج عبرة بعد
ومتتصرفين من راسج

اني هالمرة راح اعديها الج واعتبر طردتج من القاعة عقاب الج على تصرفج الغير عقلاني

المرة الجاية راح يكون عقابج شديد وصدكيني ماعندي مانع اطلعج من هذا البيت مثل الله واحد

فلزمي نفسج وانتبهي لشغلج افضل ، تمشين عدل وبدون عناد اخليج على راسي لا والله تمشين حسب ما يملي عليج راسج انداري واخذي الباب بطولج

مفهوووم

سجى : حاضر ست متتكرر بعد

رميم : روحي لشغلج يله

دنيا : راحت تتبجبج كالعادة وامها مشت وراها حانية ظهرها عود مقهورة

اني مو حقيرة ولا ماعندي رحمة بس هيج تصرفات تستفزني ، اكره التصنع الهدفه استعطاف المقابل حرفيًا لعبت نفسي

جمانة : عاشت ايدج خالة ما قصرتي بيها والله

رميم : اني ليش ما ردت بنية صغيرة تجي تشتغل هنا لان ادري راح تبدي الغيرة وتاليها هيج يصير

شكول عليك يا يحيى اني عايزة مشاكل البيه كافيني
جمالة عليه انوب ام نجاح وبتها

ابريز : يله كافي سدو الموضوع لتضلون تتناقشون بيهن هيج ، كومو تحضرو للصلا حتى نتغدة

اني صاعدة اصلي واجيب جهالي وانزل

دنيا : صعدن البنات واني ضليت كاعدة جوه ويه خالة ، صليت وتيم كاعد كبالي ، كملت ونزل عمو والولد

كلنا كعدنا على السفرة

حليم : يله بويه بلش تره ميت جوع اني وما متريك

يحيى : مرتك وين ؟

دنيا : اباوع لحليم صفن وطفر شلون الجان ناسي شي وتذكر

صعد فوك يركض ، وعلي كام يهز بايدة

علي : استلمو نسه مرته الاثول

رميم : لتكول على اخوك اثول تأدب

يحيى : ما صار شي

دنيا : شويه ونزل حليم وهي ويا

يحيى : هلا هلا نورت السفرة بصيدلانيتنا

بصائر : تسلم عمو منورة بوجودكم

رميم : استريحي حبيبتي شبيك ولك اسحب الكرسي لمرتك

حليم : هاا اي ، تفضلي

دنيا : كعدو وبده عمو واحنه بلشنا ورا

يوسف : شبي الحلو

دنيا : سلامتك حبيبي

ابريز : ما كتلي حليم وين حترحون انت وبصائر شهر عسل

حليم : ما راح نروح

ابريز : ليش ؟

حليم : بصائر عدها دوام وعطلتها بس اسبوع وترجع تداوم فراح نأجل شهر العسل لعطلة نصف السنة

جياد : ما دام هيج سفرتكم علينا وين تحب مرت اخونا تسافر

بصائر : ابتسمت اي مكان ماكو فرق

سهير : اني اقترح عليج ترحين للصين

بصائر : شمعنى ؟

حليم : الظاهر عاجبها توكلنا وردان (صراصير)

سهير : هههههههه لا طبعًا

بس احس انُ بصائر حتتونس هناك خصوصًا هالدولة الها علاقة بمهنتها كون مخترع مهنة الصيدلة ودستور الادوية صيني الاصل

بصائر : الله صدك ؟

سهير : والله غير هيج الصين بيها طبيعة خلابة ، عجيب شكد تجنن

حليم : كلش تجنن خصوصًا اكلهم عدهم شوربة جلاب هناك اله تلوك لهالحلك

جياد : طيح الله حظك وحظ اليريد يسفرك

جمانة : اني اكول لو تسافرون لمدينة الحب احلى ، مو دنيا انتِ ويوسف سافرتو واتذكر رجعتو ميتين بجمالها

دنيا : ابتسمت وباوعت ليوسف الغمزلي

يوسف : حلوة باريس تجنن

بصائر : لا مو حلوة وقذرة ما اريد اروحلها

دنيا : ضلينا صافنين عليها من عاطت بيوسف ، هاي شبيها

يوسف : انتِ مسافرتلها ؟

بصائر : احم لا بس دائمًا اسمع انها مو نظيفة والكلام الينگال عليها مجرد اعلام الحقيقة تختلف

يوسف : اي هاي كلش بالليل تصير هيج بسبب المخمورين والمتعاطين الينامون ويشربون بالشوارع

دنيا : تجاهل يوسف نرتها بوجهه وتغاضى عن الموقف وضل يتناقش وياها لحد ما كملنا اكل وكمنا غسلنا وكعدنا نشرب جاي

كملنا وصعدنا فوگ ، دامشي اني وتيم وسمعت صوت صياح من غرفة حليم

خير ان شاء الله !!

__________________________________

ديمة : سمعت الباب يندگ ، لبست حجابي وطلعت بسرعة فتحتها

صار بوجهي اسلام

اسلام : اهووو هم انتِ عبالي راح تبقيلج جم اسبوع يم اهلج حتى نخلص منج

ديمة : طبعًا اسلام ميدري وعباله اني جنت رايحة اسير يم اهلي والحمدلله من طلع ميدري حتى اتجنب الاحراجات كدامه

اسلام : هااا شو ساكته بس لا متناكرة ويه امين

ديمة : هاا لالا ، شلونك اسلام

اسلام : شبيج دمدوم اكو شي مضوجج ، بس لا امين مزعلج والنبي العب بي لعب كلشي ولا انتِ

ديمة : لا والله امين ماله علاقة بس اني متكائبة شويه ، احس وحشة على بصائر ممتعودة على عدم وجودها

اسلام : سكتي اني احس البيت يريد ياكلني متعود على صوتها بالبيت بس يله هي هاي سنة الحياة

وهي هاي وياها شمرة عصا شوكت ما تشتاقيلها تعاي كليلي واخذج من هالعين قبل هالعين

ديمة : فدوة لكلبك متقصر

هناء : هاا يمه الله يساعدك

اسلام : ويساعدج حبيبتي

هناء : يله نصب غدة

اسلام : شتصبون يمه امين رايح يجيب السمج ويجي

هناء : هو كلك ؟

اسلام : اي اجاني للمحل اخذ فلوس مني گلي طلعت مستعجل ونسيت فلوسي بالبيت وهسه من خابرته گلي كملت روح واني لاحكگ

هناء : خوش لعد امي روح اسبح وارتاح ، مصلي مو

اسلام : اي لعد شلون اول ما اذن صليت بالمحل

هناء : عاشت ايدك حبيبي ، الله يرضى عليك ويفتحها بوجهك وبوجه كلمن عزيز على گلبي بحق الحبيب محمد

اسلام : امين يارب ، يله من رخصتكم

ديمة : راح اسلام وخالة باوعتلي

هناء : سمعي ديمة هسه يجي امين تكعدين عادي تاكلين ويانا ، نوم ويا بالغرفة متنامين تردين تصعدين بغرفة بصائر تردين تنامين بالاستقبال بكيفج المهم لتنامين يمه بالغرفة

ديمة : مو خاف عباله اني رجعت بس علمودج ويزيد بزعله عليه

هناء : لا اني اريده يشتاقلج يحس بفراغ لان انتِ ما موجودة ويا بنفس المكان وانتِ هم خليج طبيعية كلش بس نوم لتنامين يمه على الاقل هالفترة

ديمة : صار خالة

رجعت احمي التمن واحضر السلطات ، فرشت السفرة و سمعت الباب يندگ طلع اسلام فتح الباب

اباوع طب امين ينافخ ، باوعلي صفح وخله السمج بالسفرة

هناء : عاشت ايدك بعد روحي يله يمه اكعد احنه منتظريك تره اللكمة متنزل بزردومي اذا ما انت موجود

ديمة : حرجته خالة من كلتله احنه منظريك والظاهر هالشي جبره يكعد حتى ليكسر بخاطر امه

لان الظاهر من طبته علينا جان ناوي يعوف الاكل ويكوم بس خالة سبقته وتداركت الموقف

كعد كبالي وبلشنا ناكل وخالة واسلام يفلسون سمج ويخلون كدامي

ابتسمت ، كلش احب معاملتهم الي ، حنيتهم تذكرني بحنيه بابا هم جان من اكعد يمه يفلس ويخلي كدامي

كملنا اكل بكل هدوء وكمت اني لميت المواعين ووكفت اغسلهن ، رتبت المطبخ وصبيت جاي الهم

طلعت انطيت لاسلام وخالة

لعد امين وين ؟

هناء : بغرفتكم وديله الجاي وتعاي

ديمة : صار

رحت للغرفة ، تنهدت وسميت بسم الله وفتحت الباب ، كفختني ريحة الدخان

اباوعله متمدد على الجرباية ويدخن انوب شفته خال نفاضة الجكاير على الجرباية تنرفزت بس غلست

بلعت ريكي وتقدمت منه ، قربت الصينية وهو من شافني فتح عيونه وباوعلي يطرف عينه

اشرلي اخلي الاستكان على الجرباية

يربي حتخرب الفرشة بس يله فدوة اله ، خليت الصينية على الجرباية وباوعتله

محتاج شي ؟

امين : عود عبالج هاي السوالف راح تفيد يعني؟

ديمة : كعدت بصفه ولزمت ايده ، باوعتله وابتسمت هازه راسي

اي اني عندي احساس راح تفيد

امين : غلطانة

ديمة : حتى لو اطلع غلطانة يكفيني شرف المحاولة ، بكل الاحوال اني ربحانة وحتى لو تعبت واني احاول
اراضيك انت تستاهل التعب

واني هم حنطيك مساحة تكتشف إني فعلاً رجعت لان اني اريد هيج

قشعر جسمي من حرك ابهامه على اصابعي ونترهن من ايده

ابتسمتله ، الف عافية على الجاي ، من رخصتك ، اخذت مخدة وطلعت صاعدة لغرفة بصائر

وهيج مر الاسبوع بين تجاهل امين اني وبين محاولاتي لتغيير كلشي ميعجبني والحمدلله داسعى
وما بقى الا انفذ

رجعت اداوم لان غبت اسبوع واذا الدكاترة يدرون بيه جاي اتسجل حضور واني كاعدة بالبيت الا يطيحون حظي

بس الله ينطي البنية جوارينا الكامت تجي وياي بالخط وتسجلني حضور من اغيب

__________________________________

زبيدة : مر اسبوع على اخر روحة الي للمحامي

واليوم المحامي جاب الاوراق التخص الطلاگ واجاني للبيت واني فضلت كلشي يصير بحضور جدي وهارون

وهذا الصار وهياتني اني كاعدة يم جدي والمحامي كونه عرف واقارب جدي اجه يسير يم جدي وهم يمشي المعاملة حتى نسرع بجلسة المحكمة ونخلص

المحامي : حجي صارت الساعة بالسبعة استاذ هارون وين صار

حمزية : وانت شبيك مستعجل الله يساعدكم على نار جهنم الراح تاكلكم اكل من كد ما هدمتو بيوت

المحامي : حجية اني هذا شغلي فشنو اله داعي هذا الكلام

النوح : امسحها بوجهي استاذ الحجية متقصد

زبيدة : كاعدة اهز برجلي واباوع للساعة وين صار هذا

باوعت للساعة صارله ساعتين يكول جاي

اباوع لوجوه الكل مستبشرة ما عدى نور وعمو عبدالله وصاحب وبيبتي وجدي

الباقين طايرين طيور ، احلف عليهم يردون السالفة تخلص بسرعة حتى يسوون حفلة

فززني من صفنتي صوته الصدح بالمكان

هارون : السلام عليكم

النوح : وين صرت انت

هارون : الطريق ازدحام ، ما عرفتونا ؟

زبيدة : يحجي ويأشر على المحامي

المحامي : اعرفك على نفسي اني محامي زوجتك

هارون : هاا اي اهلاً وسهلاً

النوح : تعال اكعد واسمع المحامي يريد يحجي وياك وويه مرتك

هارون : تفضل

زبيدة : قدمله المحامي الاوراق يقراهن

المحامي : ست زبيدة بلغتني انكم متراضين وهذا الورق يثبت للمحكمة انُ طلاقكم راح يكون بالتراضي وموكلتي متنازلة عن كل حقوقها فاذا انت موافق
وقعلي هنا

حتى معاملة طلاقكم تتم بكل سهولة والقاضي ميتعبكم و ويسألكم عن اسباب الانفصال ما دامكم متفقين

هارون : شو اشوف ، ايييييه بيها الخير

زبيدة : اباوعله اخذ الورقة قراها ومن كمل هز راسه ولزمها شكها بالنص

شهكت من شفتها يكطعها ويذبها بالگاع

هايييي ليييييييش

هارون : من الاخير اني طلاگ ما اطلگ

وهاي الورقة فوروها بماي وحطو فوكاها جاي واخذولكم استكانين ومزمزو بيهم

المحامي : تصرفك مو تصرف طبيب وشخص واعي
وفاهم

جان اكو الف طريقة تكدر بيها ترفض الانفصال بدال لا تتبع هاي الأساليب الهمجية

هارون : الگلك اني شخص واعي وفاهم ضاحك عليك للاسف

المحامي : من رخصتكم جميعًا وانتِ زبيدة تعالي وراي

زبيدة : اباوع لوجه جدي استبشر لا ويباوعلي بشماته

طلعت وره المحامي بسرعة ، اوكف استاذ ، وكف واندار عليه

المحامي : هيج زبيدة تجذبين عليه وتحرجيني انتِ مو كلتي زوجج موافق على الانفصال

زبيدة : والله العظيم اني حالي من حالك ما توقعته يرفض يطلگني

بس اني اكلك هذا سوه السالفة سالفة عناد

المحامي : وليش منكول انه متمسك بيج وميريد تنفصلون

زبيدة : ماكو هيج كلام صدكني هذا ديعاند وما شاء الله هو بالعناد سباق

المحامي : ومع هذا اكلج كعدي وفكري بالموضوع

زبيدة : اني بس اريد افتهم انت من جانبي لو من جانبه ؟

المحامي : لا من جانبج ولا من جانبه ، اني محامي وواجبي انصر الحق ، واني جاي اقترح عليج تفكرين بالموضوع يمكن اكو خيره برجعتكم لبعض

خوما اني كل موكلة تجيني اطلگها گبل مو كلشي يستدعي للطلاق هم اني ورايه رب يحاسبني

اني وظيفتي احل مشكلة مو بس اترفع واطلك ثنين طايشين قرر ينهون شراكتهم الزوجية على مزاجهم

من رخصتج

زبيدة : ما انطاني مجال احجي گبل طلع ، مسحت على راسي ومشيت

ولسوء حظي طلع بخلقتي ، تجاهلته وكملت مشي بس استوقفني صوته

هارون : ترديني اطلكج حتى تاخذين حبيب مو

زبيدة : انداريت عليه ، راح تطلگني وغصبًا ما عليك هم

اما حياتي الشخصية بعد الطلاگ مالك حق تدخل بيها ، احب ، اتزوج ، ابقى بدون زواج بكيفي اني حرة

هارون : شيليلي راسج وباوعيلي على السما ، شايفة هاي النجوم

اقربلج من إني احقق غايتج واطلكج ، عندج خيارين غيرهن ماكو

يا اما تبقين على ذمتي يا اما تبقين على ذمتي وانتِ اختاري اليعجبج غير هالكلام ماعندي

زبيدة : عضيت شفايفي وهزيت راسي مباوعتله

صدكني راح تطلكني سواء جنت راضي او لا ، اني هذا القرار ما راح اتراجع عنه ومستعدة كلشي اسوي في سبيل اخلص منك فلتختبر صبري

هارون : ايدج ومتمد شتردين تسوين سوي

زبيدة : هارون خلي نطلع منها بسلام افضل الك والي ، باوع حتى اكون صريحة وياك اني اكدر بكل سهولة

ارفع اوراق للمحكمة تثبت انُ اني وياك زواجنا مو حقيقي وانُ زواجنا ما تام وباقي مجرد عقد بأي وقت نكدر نفسخه

واعتقد القاضي من يدري زواجنا ما تام فوراً راح يطلگنا وغصبًا ما عليك

اباوعله حك حاجبة وتقرب مني

هارون : ماكو مشكلة اذا تحبين هسه نتمم زواجنا

زبيدة : ابتعدت عنه ، لو تموت يا هارون تعرف شنو يعني لو تموت متلزم شعره من راسي بعد

هارون : عاد زين يعني بس شعر راسج ما مسموحلي الزمه

زبيدة : لتستفزني هارون اني ما جاي اشاقة وياك

قرار الانفصال مخصوم بالنسبة الي وما ممكن اتراجع عنه ، هارون شأت ام ابيت اني وياك راح نتطلك

هارون : واذا طلكتج راح تكدرين تكملين حياتج طبيعي ؟

زبيدة : لا بله !!

هارون : سألتج جاوبيني

زبيدة : صفنت بسؤالة وهزيت راسي نافيه ، لا ليش اجذب

لا ما راح اكدر اكملها بشكل طبيعي بس على الاقل راح اكدر اكملها واني ضميري مرتاح

حتى من انوجع راح اذكر روحي إني نهضت بكرامتي واحترامي لذاتي وهالشي كافي يخفف عني وينطيني الدافع بالاستمرار

هارون : وراح تكملين حياتج وانتِ تحسين بهذا النقص ، صارحي نفسج انتِ متكدرين بدوني زبيدة

زبيدة : تقربو وكفت كدامه ورفعت راسي مباوعه لعيونه

اني من اجيت لهالبيت تكررت عليه جملتين عمري ما راح انساهن

جدي گلي مرة انُ هو اذا بيوم اصبعه وجعه ما راح يتردد انه يكطمه بس حتى يخلص من الالم المسببه اله وصدفة انت هم مرة عدت عليه نفس الجملة

واني هسه اخذت المبدئ مالتكم ومشيت عليه بس اني هالمرة مو اصبعي اليوجعني

اني روحي توجعني وتاكل بيه يا هارون على السويته بيها فلازم اتخلص من هذا الالم حتى يخدر جسمي وارتاح

وهذا الالم ما راح اكدر اخلص منه الا اذا ابتعدت عنك ، اني من البداية وجعتها لروحي وكت البادرت
واجيت اعترفتلك بمشاعري

وذليتها لروحي اكثر من فرضت نفسي عليك ، فحتى اخلص روحي من هالذلة والوجع لازم انفصل عنك

لان هاي روحي مو اصبعي اذا خسرتها اموت واني ما اريد زبيدة تموت

فهمت ليش اريد اتطلك منك

هارون : كتتتتلج طلااااك ما اطللللك

زبيدة : هالمرة اني المتنازلة والي راح اعوفك واتطلك
كافي رجاءً لتضل تلح

غمضت عيوني من حاوط وجهي باديه

هارون : متعوفيني متكدرين

زبيدة : اكدر وراح اعوفك ، كافي هارون عوفني

حاولت اسحب وجهي من بين اديه وفزيت من جرني عليه وباسني من شفايفي

دفعته بنفس اللحظة وعطت بي واني ارجف

هايييي اول واخرر مررررة اسمحلك تتجاوز حدودك هيج والله اذا انعادت راح امد ايدييي عليييك

وانتتت شايف الراشدي مالتييي شلونه وطلاك رااااح تطلكنيي ورجلك فووووك راسسسسك

عفته ومشيت بس شنو جسمي كله يختض ، فتحت باب البيت وصعدت اركض لغرفتي

فتحت الباب وكعدت على الجرباية ، تلمست شفايفي وبجيت

يربي هون عليه فدوة لاسمك ما اريد اضعف ، قويني وخليني اتخطى هالعلاقة ، تعبت اني يارب ، لتعوفني اني بحاجتك

للفجر ياله هدائت وغفيت ، ثاني يوم كعدت الصبح و قررت اروح العب رياضة حتى اغير جو

بدلت واخذت مطارتي وطلعت اركض بالشارع ، لحد ما تعبت ياله توقفت وشربت مي ، ارتاحيت شويه ورجعت ركض للبيت

دخلت للبيت وباوعت للساعة شفت روحي بعد بيه حيل ، عجبني العب حديد ، رحت للغرفة المخصصيها ولدنا لهاي السوالف

دخلت وتبسمرت بمكاني من لكيت هارون وصاحب يتمرنون ، ردت ارجع منين ما اجيت

بعدين كلت ليش انطي اهمية لازم اتعايش ويه فكرة إني ممكن اضل اشوفه بكل وقت خوما اضل طول عمري اتهرب منه

طبيت وسديت الباب وراي

صاحب : هاا صباح الخير زبد ، اكيد طالعه تتمرنين ما دامج جايه تلهثين ومطارتج بايدج

زبيدة : شفت هارون يرفعلي حاجبه سويت روحي ما اشوفه ، رديت على صاحب

صباح النور ، اي فعلاً جنت اركض وهستوني رجعت

صاحب : لو كايلتلي جان طلعت وياج

زبيدة : مشيت لنهاية الغرفة ذبيت مطارتي ولزمت الدمبلص ، ماكو مشكلة باجر نطلع سوه

صاحب : هاهي متفقين

زبيدة : كمت اتمرن واباوعلهم يركضون على جهاز الجري

طويت راسي على رجلية حتى تطگ عضامي ، من ارتاحيت كمت غمضت عيوني وسويت يوغا واني واكفه

سمعت صوت همس باوعت بطرف عيني شفت هارون يأشر لصاحب يطلع وذاك مجذب خبر وكف الجهاز وطلع من الغرفة

دارجع اكمل وتوقفت من شفت هارون يوكف جهازة وينزل يطگ القفل مالت الباب ويندار عليه

رفعتله حاجبي ، اكو شي ؟

******************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.