الموت الحي الفصل السادس وسبعون 76 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : دارجع اكمل وتوقفت من شفت هارون يوكف جهازة وينزل يطگ القفل مالت الباب ويندار عليه

رفعتله حاجبي ، اكو شي ؟

وكفت عدل وباوعتله ليش قفلت الباب وليش خليت صاحب يطلع ؟

سند ظهره على الحايط وضم اديه ، اشر براسه عليه

هارون : حتى تاخذين راحتج

زبيدة : ميحتاج انتِ موجود وبكل الاحوال ما راح اكدر اخذ راحتي ، حالك من حال صاحب

رجعت لوضعي وفزيت من جرني حيل من ايدي ، خزرته ونترت ايدي منه

ايدييي شبيييك

هارون : شنو هاي نغمة جديدة انوب

زبيدة : نغمتيش ما جاي اسمع شي اني

هارون : شنو حالي من حال صاحب ؟

زبيدة : وليش مستغرب هيج ، انت ابن عمي وهو ابن عمتي وبكل الاحوال ميصير انزع الحجاب لا كدامه ولا كدامك

هارون : قبل جم يوم عينج متغمض اذا مو بحضني وهسه فجأة قررتي تحرميني على نفسج

زبيدة : تؤ غلطان مو فجأة ، واخاف ناسي خليني اذكرك

اني من اللحظة الاخذت بيها جنطتي وطلعت من غرفتنا وانت بالنسبة شخص غريب ميجمعني بي اي شي

وهسه عوفني اتمرن ولتضل تحتك بيه وتحرجني وتحرج نفسك ، حاول تعتبرني ما موجودة مثل ما اني جاي اعتبرك ما موجود

هارون : لسانج يحجي شي وعيونج تحجي شي ثاني

زبيدة : يكلك من عاشر قوم اربعين يوم صار منهم واني عشت وياك شهور فطبيعي اخذ من طباعك

وهسه عوفني ، نترت ايدي منه وعفته واكف بمكانه ، اخذت نفس ورجعت اكمل يوغا

الهدوء عم بالمكان وبس صوت نفسي كمت اسمعه ، ما انطيت نفسي مجال افتح عيني واباوع

ضليت اعد واخذ نفس لحد ما اوصل لعدد معين حتى اتوقف

33 ، 34 ، 35 ، 36 سبعـ... توقفت من حسيت بادين تحاوط خصري بإحكام

انفاسه ضربت اذاني من الحجاب ، قشعر جسمي من حسيت بي يرفع البلوز ويتلمس بطني باصابعه

همس بصوت ناصي يم اذاني

هارون : لو مهما صار ومهما مر عليه ما ممكن اسمح إنج تتحرمين عليه

هاي الريحة ، هذا القرب ، هذا الجسم ، وهذا الشعور لو اعرف اسوي الما سوا بشر حتى لا استغني عنهن

زبيدة : بلعت ريكي ولزمت اديه محاولة اوخرهن عني

كافي وخر هارون لتستفزني وتخليني امد ايدي وتصير مو خوش وياك

هارون : اني الراح اصير مو خوش اذا ضليتي تفكرين بموضوع الطلاگ

زبيدة : شوكت تستوعب إني ما جاي افكر ، اني نفذت وجاي امشي بالاجراءات وراح اتطلك منك

فلت اديه مني ودارني عليه ، غمضت عيوني بألم من شد ايده على زندي

هارون : انتِ الي استوعبي إني لو اموت ما اطلكج عندي استعداد اعوفج العمر كله هيج ولا اطلكج

ترديني اطلكج حتى يجي ذاك الخنيوة ياخذج ويشبع بيج تردين تاخذيييي وتعوفينييي

هووو انتتتتتن كللللجن جذابااااات ونفس الطينة

زبيدة : انت شوكت تبطل هالافكار القذرة الي بدماغك لك بطل هذا الشك الراح يموتك

هو اني لو اريد حليم جان اخذته وهو اعزب شنو مخبلة حتى اخذه هسه وهو رجال متزوج

هارون : حتى لو متزوج يكدر ياخذج على مرته الشرع والقانون يسمحله واني لو تموتيييين ما اعوووووفج الللللله تعرفييين شنو يعنيييي
لو تموتتييين

زبيدة : كافي هارون تره دمرتني ودمرت نفسك بهذا الشك ، شوكت تستوعب إني ما حبيت ولا راح احب احد غيرك بهالدنيا

لا حليم ولا اي رجال بهذا الكون يساوي عندي اظفر من اظفارك ، لك اني لوما احبك اتحملك واصبر على كل سوالفك الطايح حظها ؟

هارون : اذا هالكد تحبيني ليش ترديني اطلكج

زبيدة : انت سبب هذا القرار ، انت الخليتني احس إني وحدة ماعندي كرامة وذبيت روحي عليك

منو العيرني بهاي المشاعر مو انتتتت ، منو الگال انتِ الذليتي روحج ولزكتيلي موووو انتتتتت

اني الجانت روحي كلها ترجف لو سمعت نبرة صوتك بالمكان ، هاي عيوني مجانن يغمضن لحد ميشوفنك نايم ومرتاح

قمصانك الي اغسلهن اكعد اشمشم بيهن وابوسهن عبالك جاي ابوس هدوم ابني مو رجلي

شنو الما سويته الك ، تحملت جفائك ، كلامك المثل السم واسلوبك الزفت وياي

كل هذا جنت اتحمله واجيب واحطلك اعذار ، زبيدة ميخالف تحملي هو تعبان

زبيدة تغاضي لتضلين تدققين هو طبعه جاف ومع الايام راح يتأقلم وياج ويتغير ، شدعوة عليج زبيدة تتحسسين من كلشي

رغم كلامك جان جارح وياي وماكو وحدة تتحمله بس اني جنت اتحمله لان ادري بي بس حجي لسان
والي بكلبك يختلف

جنت اصبر روحي واكول انُ انت تحبني واكو سبب يخليك تتعامل وياي هيج لإني جنت احس ، احس انك تحبني بكد ما اني احبك واكثر

تالي مع الاسف طلعت مو ثقة ، رخيصة ولزكة

اني رخيصة يا هارون !! لان حبيتك وحبيت انطي لعلاقتنا فرصة صرت رخيصة ؟

بس الظاهر اني غلطت من حاولت وياك من البداية ، وااااخ شكد متندمة لان حاولت

بس السبب مو منك ولا مني السبب من جدك وحسبي الله ونعم الوكيل عليه هو الفرضنا على بعض

وبالنهاية محد تأذة من هاي العلاقة غيري اني ، اني الدخلت بيها مكسورة وطلعت منها مكسورة

كلكم مصيركم تتخطون وتعيشون حياتكم مثل الورد ويمكن احسن الا اني

اني ما انسى ولا اتخطى يا هارون ولهذا السبب راح اعيش عمري كله بوجع حالي من حال امي

فالله يخليك ساعدني الملم ما تبقى من زبيدة قبل لا اضعف واصير النسخة الثانية من وسيلة

هارون : ككـ كافي ححـ حبابة لتبجين اني اسف

مسحت دموعي بدون لا اباوعله ورحت فتحت قفل الباب وطلعت

صارت بوجهي هيام وعمتي بيداء يتمضحكن ، تجاهلتهن وكملت طريقي

مشيت واني ابجي ، طبيت لبيتنا وصعدت بوجهي لغرفتي

فتحت الكنتور وكمت اطلع هدومي تحت هوسة وتساؤلات خالة ودادا

وئام : وين رايحة ولج وليش تبجين

زبيدة : ذبيت البلوز من ايدي وكعدت ابجي ، اريد اروح منا ما اريد ابقى هنا بعد

ام حسن : ليش حبيبتي منو حاجاج كليلي اطيحلج حظه والله

زبيدة : محد حجة وياي بس اني ما اكدر ابقى هنا واشوفه كبالي يوميه

جنت متصورة الموضوع سهل بس طلع ابد مو سهل فالافضل إني اطلع منا

وئام : ووين تردين ترحين ، قابل عندج احد تروحيله

زبيدة : مسحت دموعي وبللت شفايفي ، اي عندي حروح ابقى يم خالتي منا لمن يرجع معين

وعود من يرجع بالسلامة يشتريلنا بيت ونطلع كلنا سوه منا اما هسه لازم اروح اني وعود امشي بإجراءات الطلاق مناك

وئام : وتعوفينا وحدنا يمه

زبيدة : مجبورة خالة ، اذا ابقى هنا اتأذه ويمكن اضعف وابطل واني ما اريد اتراجع عن قراري

ام حسن : زين حبيتي على راحتج منضغط عليج احنه بس على الاقل روحي ابقي بييتنا القديم عاد اختج قريبة عليج واحنه هم شوكت منريد نجي نشوفج

زبيدة : لا ما اريد اروح هناك ، محتاجة ابقى ويه نفسي شويه

ولتخافون راح اجي بين فترة وفترة اشوفكم بس فدوة هسه خلوني اسوي اليريحني واني وعد بس اتحسن اجي

وئام : هاهي حبيبتي ما دام روحتج منا تريحج روحي

زبيدة : مسحت دموعي ، هزيت راسي وكمت لميت باقي ملابسي وطلعت من البيت بعد ما ودعتهن

لاكوني الحراس بالباب

: تحبين نحضرلج السيارة ست

زبيدة : لا ميحتاج هسه راح اروح اخذ تكسي

: على راحتج ست

زبيدة : مشيت وسحبت جنطتي وراي ، وهياتج يا زبيدة طلعتي من هالبيت باتعس حال مثل ما طبيتيله وانتِ باتعس حال

ضليت امشي لحد ما وصلت للشارع التجاري ، اشرت لسيارة تكسي وكفتلي ، انطيته العنوان وخليت غراضي بالجنطة

صعدت وسندت راسي على الجامه ودموعي نزلت

طول الطريق اني دمعتي ما نشفت ، حتى السايق من شاف وضعي سألني وغلست عنه مابيه احجي ويه احد

وصلت بوقت متأخر من الظهر لبابل لان ازدحامات والسايق رجال جبير ويسوق على كيفه

دليته على بيت خالتي ، وصلني للباب ، انطيته اجرته ونزلت جنطتي ومشيت

دكيت الجرس وضليت واكفة شويه وطلعلي ولد صغير

: منو انتِ ؟

زبيدة : حاولت ابتسمله ، خالة عقيلة موجودة

: منو اگلها ؟

زبيدة : زبيدة

: اوكفي هسه اصيحلها

زبيدة : ضليت واكفه بمكاني شويه وطلعت خالتي تلف بشيلتها ، اسمعها تحجي ويه الولد

عقيلة : والله يإذا طلعت تجذب يمصطفى الا اخلي الديج ينگرك

زبيدة : باوعتلها وهي أول ما شافتني صفنت بوجهي
واول جملة كالتها الي

عقيلة : شبيج ؟

زبيدة : عادي ابقى عندج هالفترة ؟

عقيلة : اي اكيد هله بيج تعاي طبي

زبيدة : دخلت وياها بدون حتى لا اسلم عليها ، طبيت وياها لجوه لكيت بنية واكفه تصب جاي عرفتها ماجدة بنت خالتي الجبيرة

ماجدة : ياا هاي زبيدة شلونج عيني شخبارج

زبيدة : بوستني ورحبت بيه

ماجدة : اهلاً وسهلاً بيج عيوني تفضلي استريحي جوه باردة عليج هنايه

عقيلة : تعاي زبيدة طبي

زبيدة : دخلت للصالة وكعدت قريب على الصوبة

عقيلة : تعاي بيبي مياسة فرشي لخالتج بغرفتي خلي ترتاح

زبيدة : سمعت صوت بنية من الغرفة تگلها صار

باوعت لخالتي وتنهدت ، خالة اني اسفة لان اجيت بدون موعد بس جنت مضـ...

عقيلة : اش كلشي لتحجين مو وكت حجي هسه انتِ جايه تعبانه صلي و تغدي ونامي ومن تكعدين نحجي

ماجدة صبي غدة لاخيتج

ماجدة : بعيني

زبيدة : لا لا شكراً ما أشتهي العسل هسه

عقيلة : مو مشكلة ارتاحي وعود اكلي يله كومي گبل نامي مبين عليج تعبانة

زبيدة : هزيت راسي وكمت طبيت للغرفة لكيت بنية يطلع عمرها 13 سنة واكفه ترتب البطانية على الدوشك وبس شافتني ابتسمت وسلمت عليه بدون حتى لتسألني اني منو

مياسة : هلوو

زبيدة : هلو بيج حبيبتي اني زبيدة أصير بنت خالة امج اخاف متعرفيني

مياسة : اهلا بيج خالة ، حضرتلج الفراش وشغلتلج التدفئة تفضلي ارتاحي

تحبين اخذ جنطتج ارتبها الج

زبيدة : لا حبيبتي تسلمين كلج ذوق ، ابتسمتلي وترخصت وطلعت

ذبيت كل غراضي وبس جريت حجابي وتمددت اريد انام راسي يريد ينفجر

وفعلاً شويه وغفيت

_____________________________

ديمة : فتحت كنتوري وطلعت كل ذهبي

شمرت كلشي على الجرباية وكعدت اشوفهن ، طلعت الاكسسوارات الجاياتني من اهلي واهل امين عزلتهن على صفحة

صفنت على الباقيات ، لزمت طقم وباوعتله جانن موديلة يجنن اجاني هدية من جدو بزواجي

كلبي ما انطاني اضحي بي قررت احتفظ بي واخلي خليته ويه الذهب الاريده ، رجعت اباوع شفت هدايا بيبتي هم خليتهن ويه الباقيات

اخر شي بقن هدايا عمامي وعماتي ، باوعت للطقم الهدا الي عمو فؤاد وكرمشت وجهي

ايييع اكره عمو فؤاد رغم هديته حلوة ، جان هاديني هو وزوجته طقم ذهب مرصع بألماس فخم ويجنن بس اني ما احبهم لاهو ولاومرته فراح استغني عن هديتهم

سديت العلبة وخليتها بالجنطة وخليت الطقم الهدو الي اخوان هارون وامه هم وياهن

ابتسمت صار عندي 4 اطقم ذهب خلي نشوف شكد راح يجيبن اذا اريد ابيعهن

كمت عزلت الاريد ابيعهن على جهة وضميت الباقي بالكنتور وطلعت من الغرفة

صعدت لفوك ، مشيت عيوني على الصالة ، البنكة ، الحياطين المتآكله ورايح بياضها ، فتحت غرفة بصائر

باوعت منا منا الغرفة جبيرة بس عايزها هواي شغلات
صحيح كاملة بيها جربابة وكنتور مال نفر واحد بس مع هذا عايزها ترتيب وصبغ

فتحت المخزن جان مخزن متوسط الحجم بس فارغ كلشي مابي غير معدات تصليح ودعاسيگ

نزلت جوه نفس الشي البيت جبير يطلع 200 متر بس ما مرتب واغلبية المساحة ما مستثمريها صح

هناء : شجاي تسوين

ديمة : انداريت عليها ، هاا خالة تحاجيني ؟

هناء : اي ليش اكو غيرج وياي بالبيت ، اباوعلج صارلج ساعة صافنة ويا صاعدة يا نازلة

ديمة : اكلج الصراحة بس فدوة مو تزعلين مني

هناء : كولي بعد امج ما ازعل منج اني

ديمة : لزمت ايدها وكعدت ، خالة انتِ مملاحظة انُ البيت عايزة هواي مهوس وعايزة هواي ترميم

هناء : ادري يمه بس شنسوي الحال على الگد منين نرممه

ديمة : طيب واذا اساعدكم اني ترممو

هناء : شلون تساعدينا يعني ؟

ديمة : شوفي اني عندي كوووومة ذهب هدايا اجوني بعرسي فكلت ابيع كم طقم ونحاول نرتب ولو شي بسيط من البيت بفلوسهم

هناء : لالا شيلي هالفكرة من راسج على يا اساس تبعين ذهبج ، لا امي لا حبيبتي ذهبج الج والولد من الله يرزقهم يعدلو انتِ مالج شغلة

ديمة : دسمعيني ياخالة ، اني هذا الذهب اصلا ما البسه لان مو ستايلي باللبس فعليمن مخليته مدفي الكنتور خلي استفاد منه

لتسويلي براسج لا انطيني فرصة اشرحلج

باعي خالة ، عندج المطبخ الكاونتر مالته صاير شحاله وانتِ من المسح والجلف راحن ادياتج ، الطباخ نفس الشي تعبان ويرادله تغيير

حياطين البيت كلها يرادلها صبغ من جديد حتى ترجع الحياة للبيت

انتِ ظهرج يوجعج ويراد نجدد المغاسل ونخلي صحيات حتى تكدرين تاخذين راحتج من تستخدمين الحمام

عندج اسلام هم خطية شاب ويريد ياخذ راحته ، يبقى بالداخليات ، يسبح بكيفه ، ينام على راحته

وبعدين مصيرة يتزوج واول تالي يعزل فاحنه ليش نخلي معلعل منا لذاك الوكت خو نرتبله غرفة بصائر
حتى ينام بيها

ونطلع الاغراض المنريدهن من المخزن ونسويله حمام وتواليت حتى يستقر فوك ويرتاح

هناء : انتِ تدرين كلامج هذا شكد يريد ويكلف

ديمة : ميخالف العافية بالتداريج ، خلي نرتب البيت شويه شويه

وبعدين تره احنه راح نقتصد ، البيت اني وامين واسلام نصبغه سوه ميحتاج نجيب عمال وبهالحالة بس المطبخ والمغاسل راح يكلفنا

هناء : وعبالج يعني المطبخ والمغاسل يرادلهن هيج مليون ومليونين ويصيرن لج امي يرادلنا كومة فلوس

ديمة : هسه اني خلي ابيع هالذهب واشوف شكد يجيب وعود نشوف شلون نتصرف بعدين

هناء : كتلج لا كعدي وسكتي

ديمة : عفيه خالة لتكسرين واهسي فدوة اروحلج ، اني كلش عاجبني اغير من ديكور البيت خلي البيت
يتنفس شويه

واذا على الفلوس فآني عايشة وياكم يعني بيتكم هو بيتي يعني اي فلس راح اخلي بهالبيت اني مخسرانه بي بالعكس

حبابة خالة بداعتي عندج اذا تحبيني لتكسرين بخاطري خليني احس إني مسوية انجاز ولو مرة وحدة بحياتي

بست أيدها حبابة حبابة

هناء : اااخ منج اااخ

ديمة : هاا هسه شكلتي ؟

هناء : شنو المطلوب مني

ديمة : اريدج اذا حجه امين تكليله اني وياها اتفقنا لتخلي يخرب عليه لان ادري بي بس يسمع ما راح يقبل

هناء : حتى لو حجيت اني صدكيني ما راح يقبل

ديمة : ادري بس بالنهاية اكيد مراح يكسر حجايتج واذا حجة كليله اني مسوية سلفة ويه ديمة انت معليك

هناء : امري لله الواحد القاهر هاهي

ديمة : ضحكت وحضنتها ، يييييمه ييييمه شكدددد احبج احللللى عمة بالدنيا لك شنو انت مارشملو

هناء : ههههههه شنو هذا المارشملو

ديمة : ما اعرف بس شغلة طيبة عود اشتري واضوكج ياها

المهم هسه امشينا نطلع ما دام بس اني وياج هنا خلي نستغل الفرصة

هناء : هسه ؟

ديمة : اي هسه دك الطبل وهو حامي مو هيج يكولون

هناء : الحديد يحظي يا طبل هذا اليحمو

ديمة : ههههههه اي قابل اني شمعرفني

يله كومينا يييله ، رحنا بدلنا وهي خابرت امين انطته خبر قبل لنطلع

جانت الدنيا صبح وباردة ثلج ويوم جمعة يعني اجواء تجننن وطبعًا امين كام ميكعد بالبيت من اني موجودة حتى الجمعة كام يطلع يكعد بالمحل ويه اسلام

طلعنا اني وخالة اخذنا تكسي وبوجهنا للصايغ مالتنا ، دخلناله وهو تلكاني ذاك الملگه لان چنه اني وامي بوگت العز نصبح ونمسي عنده

طلعت الجنطة وقدمتله علب الذهب يشوفهن ومثل ما توقعت كلش عجبنه لان ذهب ثكيل ومطعم باحجار كريمة من الماس والخ من الزينة الفخمة

: واو قطعة ، بس على حد علمي هذا مو ذوقج

ديمة : ولهالسبب اجيتك حتى ابيعهم

: الست منو اول مرة اشوفها

ديمة : ابتسمت وباوعتلها ام زوجي

: اهلاً وسهلاً مدام نورتي المحل

هناء : شكراً جزيلاً

ديمة : هاا حتاخذهن ؟

: اكيد بس انتظريني ثواني بلا زحمة

ديمة : وزنهم بعد ما تأكد انهم ذهب حقيقي انوب باوعلي وابتسم

شكد يصيرون ؟

انطاني اسعارهم واني وخالة گبل وحدة صفنت بوجه الثانية

بلعت ريكي ورجعت سألته ، عفوًا كلت شكد يصيرون ؟

عاد عليه نفس الرقم واني استبشرت ملامحي والله اجيت ابجي من الفرحة

فزيت من جرتني خالة على صفحة بعد ما استأذنت من الصايغ

هناء : امشي خلي نطلع

ديمة : نطلع شنو انتِ سمعتي المبلغ !!

هناء : ولان سمعت المبلغ جاي اكلج خلي نطلع ، حرامات تبيعين هيج قطع وتذبين فلوسهن على البيت

ديمة : قحط المهم بيتنا هسه لاحكين نلبس ذهب شنسوي بالزينة وبيتنا شحالة

خلي نرتب البيت وشوكت ما الله يرزق امين هو يشتريلي وبعدين اني بعت بس الشغلات الثكيلة

الاشياء البسيطة الاحبها عفتها وهم اكو هدية ثكيلة من جدو وبيبي عفتهن ، فدوة خالة خليني على راحتي

سحبت ايدها ورجعت للرجال ، انطيته موافقتي على المبلغ وسلمته الوصولات ديتأكد الذهب الي كلشي يصير ما اريد اوكع نفسي بمشاكل

بعنا الذهب على خير واخذنا الفلوس وطلعنا وخالة كل عقلها حطت الفلوس بالجنطة ولفت السير على ايدها ولفت روحها بالعباية ومشت

غير خربتني ضحك صارت منفوخة من منطقة الصدر
جنها وحدة حامل من فوگ ومع هذا ما دارت بال

اخذنا تكسي واصرت السايق يكون رجال كلش جبير حتى إذا راد يبوكنا نكدر نكتله ونشرد

والله بيومها صدك ضحكت من كل كلبي ، رجعنا للبيت وهي انطتني الفلوس اضمهن

ضميتهن وطلعت للمطبخ ، اليوم هي واعدتني تعلمني اسوي مقلوبة لان الولد يحبوها وهي صار هواي ممسويتها الهم واني مكلت لا

وكفت اتعلم هي تكلي سوي هيج وهيج واني انفذ بكل حماس

كملنا الاكل وعفنا يتهدر ، اذن الاذان طلعنا صلينه
وانتظرنا الولد

ماكو شويه واندكت الباب طلعت فتحتها وابتسمت من شفتهم

الله يساعدكم

رد عليه اسلام بنفس الحماس عكس امين الجاوب من وره خشمه ولو هو لو عليه اصلاً ميرد بس ميريد يحسس اسلام

على اساس اسلام محاس وهو يشوفني انام بغرفة بصائر مدري شلون يفكر امين

سديت الباب ودخلت احضر السفرة علما يبدلون ويصلون داصب

هناء : يله يمه صبي

ديمة : عطتلها من الطبخ ، صار خالة

جبت الصينية وكلبت الجدار بيها ، اباوع للمقلوبة شلون نزلت قالب واحد والبخار يفوح منها

افييييش شنو هالجمال لج ديمة صايرة تبدعين ، لالا اذا ابقى هيج ابدع انوب انافس زبيدة

شلت الصينية وطلعت خليتها بالسفرة وجبت المواعين واجيت

اسلام : حيييل صار شكد ما ماكلين مقلوبة شذكرج بيها اليوم يمه

امين : ليش تعبتي روحج يمه اني مو كايلج لتطبخين اكل بي وكفة هواي ويتعبج

هناء : ماكو تعب اكلو بعد امكم وعوفو الحجي

ديمة : اباوعلهم كلمن غرف لنفسه وبلشو ياكلون واني صافنة منتظرة اشوف ردة فعلهم

اسلام : اويلي لج يمه بس فهميني انتِ شنو شهالاكل اليخبل

امين : عاشت ايدج حبيبتي

هناء : هههههه الف عافية بس مو اني الطبخت اليوم ديومة هي الطبخت واني بس علمتها

ديمة : اختفت ابتسامتي من شفت اسلام ذب الخاشوكة ولزم بطنه

اسلام : اااخ ولج يمه كتيلي منو طبخت ، ديمة !! ضاع شبابك يا اسلام سودة بوجهي ما تهنيت بشبابك وراح تموت

ديمة : اباوعله ذب روحه على خالة وكام يصيح

اسلام : بده المفعول بطني كامت توجعني اخ اخ تسممت اخ راح اموت

ديمة : جان يمي الغطة مالت حافظة الخبز شلته وركعته بي

كافييي احترررم نفسك ابو الجذب شنو طابختلكم الاكل على لحم فيران حتى تتسممون

رد وهو يقلد عليه

اسلام : مدا استحمل حموت حموت

ديمة : والنبي اكوم اجرك من كفشتك لتضل تعيب ، شنو خالة الاكل مو طيب ؟

هناء : ههههه دوخر انت ذاب روحك عليه جنك عجل عرب

وانتِ ما عليج بي الاكل يخبل عاشت ايدج حبيبتي لبسي خيولي يريد يضوجج

ديمة : اباوعله كعد وكام يضحك

اسلام : لالا والله عاشت ايدج بس اني من الصدمة صار عندي تسمم مؤقت وهسه راح

ديمة : ابتسمت صدك طيب

اسلام : مو كنالج اي شبيج لزكتي

ديمة : ههههههه فرحانة لان عجبكم ، هاك هاك اكل

صبيتله بعد وهو يضحك وياكل ، باوعت لامين الكاعد كبالي ، لكيته ياكل وهو مدنك حتى ما شارك بالحديث

سالته بصوت ناصي ، عجبك الاكل

امين : عادي

ديمة : ما لحيت عليه ورجعت اكمل اكلي ، كملنا غدة واني كمت غسلت المواعين وصحت لخالة انطيتها الفلوس وكتلها تحاجيهم مدامهم كاعدين

وديتلهم الجاي وطبيت لغرفة خالة وسديت الباب ، كعدت اسمعها تسولف وياها

بالبداية جان الكلام عادي بيناتهم وشويه شويه بدت تعلى اصواتهم او صوت امين وخالة بالتحديد

البيت بلحظة انگلب گلاب من الصياح والمرادد بينهم حتى اسلام تدخل وكام يتصايح ويه امين لان ديعلي صوته على خالة

شويه واختفت أصواتهم ، فزيت على فتحة باب الغرفة ، كمت على حيلي من شفت امين يطب ويسد الباب ورا

امين : كعدي كعدي اريد احجي وياج

ديمة : كعدت وهو سحب الكرسي الي يم الباب وكعد كبالي

امين : سؤال واحد وضح وصريح ، من الاخير ديمة انتِ وين تردين توصلين من كل هالتصرفات ؟

ديمة : ما اريد اوصل لشي والله

امين : عود يعني عبالج من تسوين هيج راح تبردين گلبي من ناحيتج وترجعيني وياج مثل قبل

اذا اكو هيج فكرة ببالج فيستحسن تشيليها من راسج لان اني مو مثل ما انتِ متخيلتني

اني لا طيب ولا فطير حتى انسى اليأذيني وبمجرد موقف تافه مثل هذا امحي كل حجاية وكل إهانة توجع سمعتها

ديمة : اني ما اريد منك تنسى اصلاً اني مناسيه حتى اجي بجرئة اطلب منك تنسى

بس صدكني اني داسوي كل هذا بنية صافية علمودي وعلمودكم كلكم غايتي من كل هذا مو حتى اثير عطفك

امين : شوفي اني لا راح اتعارك وياج ولا اتجادل زايد عن اللزوم و اغث روحي ، نقطة على السطر فلوسج تاخذيهن وتشيلين فكرة انج تحطين ايدج بإي شي بهالبيت

ديمة : انت ليش تسوي هيج داكلك والله العظيم اني مو علمودك علمود خالة واسلام

خطية خليهم يفرحون شويه من يشوفون الروح ردت للبيت اني

حتى دافكر ببصائر خلي نجدد البيت على عينها وهم هي اول وتالي الله حيرزقها باطفال وحيجوكم هنا ويكبرون يمكم ميعجبك تخلي البيت جنه الهم

يعني شنو المشكلة اذا رتبنه البيت لاولاد بصائر واولاد اسلام و حتى ااا اولادنا

ههههه اتخيل نسوي حديقة صغيرونه ويجون همه يلعبون بيها ، اعرف تفكيري بعيد شويه بس عادي شخسرانين احنه

امين : اولادنا كتيلي ههههه ومنين راح يجون ذوله بس لا راح يشتريهم النا جدج

ديمة : تنهدت كمت كعدت بالكاع ولزمت اديه ، ممكن تبطل تستهزء وتسمعني بصدق ، امين اني سبق وكتلك وهسه حرجع اعيد عليك

اني عندي امل وثقة برب العالمين انُ يرزقني خير لان رجعت واني نيتي صادقة ونظيفة فأبد ما مستبعدة فكرة انُ اني وياك امورنا تتصافى

وعادي حتى لو طولنا ياله تصالحنا اني مستعدة اصبر منا لمن يبرد كلبك عليه وتسامحني

اما هسه فصدكني اني من حبي الكم ولبيتنا اريد ارتبه للبيت واعزله واخلي باحلى صورة لان حرفيًا بديت احسه بيتي

واذا على الفلوس فطز فدوة الكم وجوه رجليكم اخر همي صارت الماديات ، اني داحاول اتغير يا امين ومحتاجة مساعدتكم لتكسرون واهسي فدوة

امين : كلامج حلو واتمنى لو اكدر اصدكج بس تعذريني اني نفسي طابت منج بعد وما اكدر اضغط على روحي أكثر

ديمة : ععـ عادي كتلك اني مستعدة اصبر ، المهم هسه بس هالمرة لتكسر بخاطري حباب امين والله بنفسي اسوي شي يحسسني إني وحدة منكم

امين : مستحيل فلس احمر ما ممكن اخليج تذبين على البيت ، اني هنا المسؤول عن البيت واني الاتكفل بكلشي انتِ خليج خارج قوس

واذا عيشتنا ما عاجبتج ومو كد المقام تكدرين ترجعين لاهلج محد جبرج تبقين هنا

ديمة : انتتتت شبيييك بس فهمنيي شبيييك

اني وين احجي وانت وين تحجي ، داكلك اني رجعت علمودكم تكلي اذا معاجبتج عيشتنا رجعي لاهلج

هو اني لو اريد ابقى عند اهلي ارجع لهنا ، انت شويه اصفن ويه روحك واسأل نفسك هالسؤال

اني اذا ما اريدك وما اريد عيشتك وما اريد اهلك المن رجعت اشوف طولك واروح مثلاً ؟!

كافي خليك شويه عقلاني وفكر بينه بمنطق ، صح اني اتمنى علاقتنا ترجع مثل قبل واحسن

لكن مع هذا بيعتي للذهب وسعيي إني ارتب البيت ابد معليه بعلاقتنا اني وياك كل ما بالموضوع كوني من اهل البيت وعندي القابلية اساعد فليش ما اساعد
بكل الاحوال هو الي مو لغيري

واذا غاثتك سالفة الفلوس ياعمي وقعلي على ورقة تعترف بيك إني مداينتك كذا مليون ومن الله يرزقك رجعهم الي

اعتبرني مصرف واخذت مني قرض علمود اهلك

فكر شويه ، اسلام اخوك خطية شاب طول بعرض شنة معناها ينام ويه خالة بنفس الغرفة هم شاب ومن حقه تكون عنده غرفة وحدة ياخذ راحته بيها

يكون اله حمام خاص يدخله شوكت ميعجبه مو يضل يحمحم و واكف على صفحة لحد ما تطلع مرت اخو ياله يدخل

لتصير اناني فكر بخالة ، هي اغلب وقتها بالمطبخ شيصير يعني سوينالها ديكور حلو ومرتب وجددنا الها والله حتى نفسيتها تتبدل

من تشوف اكو حياة وتجدد بالبيت ، انت ساعدني هالمرة ومو لخاطري لخاطر اهلك

كمت من مكاني ، رحت اخذت جنطتي من الميز وطلعت دفتري شلعت ورقة واخذت قلم

هاك اكتب على هالورقة إني اطلبك ***** واخذها ابصم عليها وخليها عندك وبالمستقبل رجعلي فلوسي

شفته صفن بوجهي وهز ايده وكام ، لزمت ايده بسرعة وبجيت

حباب لتسوي هيج وتكسر بخاطري ، اذا تحب الله بداعة ابوك المتوفي اقبل حباب امين حباب

نتر ايدي منه وهز راسه

امين : راح اعتبرهن دين وارجعهن الج

ديمة : صدك والله

امين : اي وهم مو لخاطرج لخاطر امي واخوية

ديمة : ممـ ميخالف

ابتسمت وتقدمت بتردد حضنته وغمضت عيوني ، تنهدت من شميته ريحته جانت طيبة بشكل

هاي اول مرة اتجرئ واسويها قبل جانت تلعب نفسي منه واحسه مبهذل ومو نظيف فولا مرة انطتني نفسي اتقرب منه واستنشقه بهالطريقة

ابتعدت لكيت يباوعلي ، ابتسمته بامتنان ، شكراً هواي

هز راسه وعافني وطلع

__________________________________

بصائر : دامشط شعري وشفت حليم يدخل للغرفة ويطبك الباب بقوة

انداريت وباوعتله لكيته ساند ظهره على الحايط ويباوعلي بس ملامحه جانت ابد متبشر بالخير

ابتسمتله ، اكو شي ليش دتباوعلي هيج ؟

حليم : اسمعي بصائر اني ما احب احجي حجاية مو حلوة تخشن خاطرج

بس ياريت انوب تنتبهين للهجتج وطريقة كلامج من تحجين ويه اهلي

بصائر : ليش اني شحجيت وياهم ؟ والله كلشي ماحجيت

حليم : لتحلفين ، اني جنت كاعد وشفتج شلون رديتي على يوسف ونترتي بي

طبعًا اني ما حجيت كدامهم حتى لا احرجج وفضلت انُ نحجي هنا وبيناتنه ، شوفي بصائر هاي اول واخر مرة اسمعج تنترين بوجه اخواني

اهلي خط احمر من جبيرهم لاصغر طفل بيهم ما مسموحلج تتعاملين ويا بهاي الطريقة السخيفة

بصائر : يعني هاي عصبيتك هسه علمود يوسف ؟

حليم : اي طبعًا ليش يوسف شيصير مني مو اخوية واكبر مني ومثل ما واجب عليه احترامه انتِ هم واجب عليج

والرجال ما حاجاج شي حتى تنفعلين هيج عليه جان جاي يتناقش وياج حاله حال الكل شبيج شديتيها ويا

بصائر : شمرت المشط وكمت على حيلي

اني مو هاي اخلاقي بس انت شفت مرت اخوك شلون تفيك نرفزتني دخيل الله ولا تنطاق لا هي ولا رجلها

حليم : على منو جاي تحجين انتِ

بصائر : منو يعني ست الحسن والجمال دنيا افندي

حليم : هيووو انتبهي على الفاظج شو تستهزائين حضرة جنابج

وبعدين شسوتلج البنية حتى هيج ميتة منها حتى ما حجت ولا نطقت هي اصلاً دنيا الها حس حتى الواحد يلاحظ وجودها ويكرها

فوگ ضيمها وقهرها جمالة عليها انتِ ، ششفتي منها اصلاً حتى تكرهيها

وبعدين خاف عبالج اني بيوم الصبحة ما شفتج شلون دفعتيها كدام الوادم من اجت تباركلج

لج ما استحيتي على نفسج ما كلتي عيب اتصرف بهالهمجية كدام الناس هسه على الاقل احترميني الي

يوسف لو دره بيج هيج مسويه ويه مرته واجه عتبني شريد اكله شعندج وياها حتى جاي تنفريها هيج ؟

بصائر : كلش كافي عمايلها هي وخواتها بيه ، ما شفتهن شلون خربلي الحنة مالتي

ذيج الادبسز كلبت حفلتي ملهى وكعدت تركص مصري حتى تغورني وتخلي الناس تقارن بيني وبينها

ترس اذاني سمعت العالم يكولون هاي الجان حليم يريدها ، لك حتى خواتها ولا وحدة بيهن ردتها وكعدتها

اكرهن ذني البنات تلاثتهن اني ما اطيييقهن كسرن فرحتي الله يكسر فرحتهن

حليم : ما فهمت ممـ منو الركصت بعرسنا ، زز زبيدة تقصدين

بصائر : اي زفت الطين ساعة السودة الحضرت بيها

اباوعله صفن وكام يمسح على لحيته ويتحسر

حليم : يعني حضرت ؟

بصائر : صدك تحجي انتتتتت

لااا مو طبيعييي انتتت والله مو طبيعيييي

عفته وطبيت للحمام ساده الباب وراي ، كعدت بالكاع وصميت حلكي حتى لا يسمع صوتي

الكلب الحقير اشكيله منها وهو حاير يسألني اذا حضرت لو لا ، يربي اني وين ذبيت روحي وييين

ضليت كاعدة بالحمام لحد ما سمعت بي طلع ياله طلعت

ومن رجع تجاهلته واسبوع اني ما احجي ويا ، صحيح يجمعنا فراش واحد بس لا اني احجي ويا ولا هو كلف نفسه يصالحني

_______________________________

زبيدة : متمدده على رجلين خالتي وكاعدة اتابع فلم هندي وياهم

ماجدة : اشوفج هواي مركزة بالفلم

زبيدة : هاا ؟

ماجدة : ههههه مثل ما توقعت بالج مو يمنه ، خيرج بالج بيمن مشغول

زبيدة : لا هيج سلامتج

ماجدة : الله يسلمج يارب ، يله كومو حبايبي صارت بالوحدة والفلم خلص وراكم مدارس باجر

زبيدة : اباوع لابنها وبتها كامو وياها طبو للاستقبال بعد ما سلمو علينا ، حسيت بخالتي تمسح على راسي

عقيلة : انتِ متعاركة ويه رجلج مو ؟

زبيدة : تؤ

عقيلة : لعد شبيج مصفرة وحالتج حالة

زبيدة : راح اتطلگ

والله شهكت شهكة ثقبت اذاني بيها

عقيلة : يااا صخام الصخمج ولج ليش يريد يطلكج
شمسوية

زبيدة : هو هاي انتو دائمًا تذبون اللوم على المرة وتسألوها شمسوية ، محد يكول يمكن هو المسوي ، او يمكن هي التريد تتطلك منه مو هو

عقيلة : وهسه يعني انتِ التردي يطلكج ؟

زبيدة : اي

عقيلة : ليش شنو بس لا يدور عليج

زبيدة : لا بالعكس ماعنده هاي السالفة هو

عقيلة : ما دامه كاعد عليج وساكت وميدور منا منا ليش ترردي يطلكج يخالة

زبيدة : اكو امور صارت بيني وبينه جبرتنا نوصل لاخر الطريق وهو الطلاگ

عقيلة : ما حاولتي تحلين مشاكلكم بدال لا توصلون للطلاگ

زبيدة : الطلاق افضل حل على الاقل بالنسبة الي

عقيلة : وهو ؟ قابل ؟

زبيدة : تؤ هو اصلاً اني شردت مناك لان محد قابل

عقيلة : والله مدري شكلج يخالة بس تأني بالموضوع وصلي استخارة وشوفي

زبيدة : ما اريد اسوي اي شي يخليني افكر إني اتردد بالموضوع اني متأكدة من قراري وراح امشي بي

تبقى تسهيل الأمور تحت توفيق رب العالمين

عقيلة : اني بهاي المواقف ما اكدر اكول غير الله يقدملج الي بي الخير

وهذا بيتي مفتوح الج منا لمن شعر راسج يشيب ، اني وبيتي وفلوسي وكلشي املكه وياج

زبيدة : ابتسمت ودمعت عيوني

تصدكين رغم كلشي بعدني ممستوعبة فكرة إني اعوفه

عقيلة : تحبي ؟

زبيدة : ااااااه يا خالة ياريت ، ياريتني لو بس احبه

هارون طبلي شلون الفايروس سيطر على خلية بجسمي ولا اني الكادرة اقاوم وجودة ولا اني الكادرة اتعايش ويا

واكعة بين نارين ونار اصعب من نار

تنهدت وكمت من حضنها ، مسحت دموعي وطفيت التلفزيون واخذت ايدها مكومتها

دخلنا للغرفة ، وديتها لفراشها ورحت تمددت بفراشي ، بس خليت راسي على المخدة اجه على بالي

يا ترى شديسوي هسه ، هم كادر ينام لو مثلي مجافي النوم ، اجي على باله ويشتاقلي لو عادي متقبل عدم وجودي

لزمت موبايلي ودخلت على الواتساب ، اخذتني ايدي لرقم نور ، دزيتلها رسالة وحدة محتواها كلمة وحدة

شلونه ؟

جاوبتني وره لحظات

نور : محد يعرف من طلعتي من البيت وهو ما طلع من الغرفة بعد

زبيدة : كعدت على حيلي وكتبتلها

خوما عفتو وحده ، ادري بيكم مهملين تلكيكم اصلاً ناسي

نور : على بختج زبيدة والله طاحت وصله من لسانه واحنه نحاول نحجي ويا ومينطينه مجال و اخر مرة تعارك ويانه وكام يقفل على روحه الباب

زبيدة : زين جاي ياكل يشرب ، منو يغسل هدومه ويعزله الغوفة خوما عايفي بالهوسه

نور : لا العاملات جاي يصعدن اله الاكل للغرفة ومن يطلع للدوام ينظفن اله الغرفة ياله يطلعن

زبيدة : اي عاشت اديهم زين والنوبة هم كاعد تجي

نور : اي من بلغتنا خالة وئام انج عفتي البيت هو جان موجود وبيومها بالليل اجته النوبة وسودة عليه كلش تأذه

زبيدة : مسحت على راسي وتنهدت ، وشلون صار هسه ؟

نور : الحمدلله زين رغم عازل روحه ومينزل يمنه بس مع هذا صحته نوعًا ما زينه

زبيدة : الحمدلله ، طيب نور اني اترخص اراسلج بعدين

سديت الموبايل وشمرته ، شلون بيج يازبيدة مو علساس بعد مالج علاقة بي وينه حجيج اشو كله تبخر من سمعتي بي تعبان

اااااااخ كون الزمك يگلبي واطيحلك دگ بالنعال ووين ميوجعك على كد ما مأذيني

تنهدت وحطيت راسي على المخدة وغفيت ، ثاني يوم كعدت الصبح ويه خالتي وماجدة

عقيلة : تعاي زبد اليوم شلون بيضات من دجاجاتي راح تسوينه ماجدة بحياتج ما ماكله منهن

ماجدة : ديربالج زبيدة تره هذني البيضات ميطلعن بس للعزاز

زبيدة : ابتسمتلها بمجاملة ورحت غسلت وجهي وفرشت اسناني وطلعت لكيت ماجدة دتريد تلبس وتطلع

وين رايحة

ماجدة : ماعدنه خبز راح اطلع على الشارع اجيب خبز من الخباز واجي

زبيدة : لعد كعدي اني مختنكة واريد اتمشى شويه

ماجدة : لتزحمين نفسج حبيبتي

زبيدة : لا والله ماكو زحمة بس كتلج اني مخنوكة واريد امشي صارلي اسبوع نايمة اختنكت

ماجدة : ما دام هيج على راحتج وبما انُ انتِ طالعة طالعة جيبلنا وياج جرك بالسمسم والحلقوم حتى
نتعلل بيهن العصريات

زبيدة : تدللين ، رحت بدلت ملابسي ولبست حجابي وطلعت بس وقفتني ماجدة وهي تنطيني فلوس

ماجدة : تفضلي حبيبتي

زبيدة : شنو هاي مو عيب عليج تره والله ازعل منكم ، اني باقية هنا وياكم اكل واشرب وانام وترديني فوك كل هذا اخذ منكم تفاليس مال خبز

ماجدة : مو ميصير

عقيلة : لا يصير رجعي فلوسج احنه هنا جيب واحد

زبيدة : وهذا الاريد اوصله يله من رخصتكم

طلعت من البيت اتمشى ، بيت خالتي قريب على البساتين والدنيا شته والهوه يرد الروح

تمشيت للخباز ، اشتريت خبز وجرك ومشيت للاسواق عجبني اشتري نمنمات لجهال ماجدة رغم همه كبار
بالمتوسطة بس مع هذا اشتهيت الهم كم شغلة

خلصت كلشي وطلعت امشي واباوع للناس ، اخر شي ما تحملت طلعت موبايلي وكمت اصور الغيوم

داصور وحسيت بعيون تباوعلي ، انداريت بسرعة ما لكيت شي بس احس اكو احد يباوع عليه واني متأكدة من احساسي

بلعت ريكي ومشيت عيوني على المكان وصفنت على سيارة سودة مضلله واكفه بالزاويه ومشتغلة ، تفاجئت من شفتها كبل حركت اول ما تقربت منها

خفق گلبي من فكرت للحظة انه ممكن يطلع هو بس بعدين نفضت هالافكار الدرامية من راسي ومشيت ولا كإنما اكو شي

بيومها تغاضيت عن الصار وتواصلت ويه خواتي وداد وخالة طمنتهم عليه وسديته منهم راجعة لقوقعتي الداعرف شلون اطلع منها

وهيج مرن شهرين من حياتي

خواتي خطية ابد ما عافني ديمة 3 مرات اجتني وانوب تعذرت لان جان عدهم ترميم ودنيا كل اسبوع تجيني هي ويوسف

وطبعًا كل جيه الهم لا تخلو من التوسل حتى ارجع وياهم بس اني رفضت رفض قاطع ما اريد اشوف احد ولو حتى بالصدفة

خصوصًا بعد ما المحامي عاف القضية واني حفيت باديه ورجليه علمود احصل محامي غيره وبكل مرة احصل واحد ميمر عليه غير اسبوع بالزايد وما اشوفه الا يطفر مني

واكيد محد راح يستغرب اذا اكول انُ هاي سوالف جدي المتخلص

اخر شي زهكت ومليت من المحاولة فاضطريت انجب واكعد واسكت علما يرجع معين بخير وسلامة وعود اني اعلمهم

_________________________________

ديمة : كاعدة ومخليه الستناد بحضني ولازمه قلمي بايدي

شلت راسي وباوعت لامين واسلام الكاعدين كدامي

تحمحت وحجيت ، باوعو اول شي اريد البيت كله نصبغة بلون ابيض حتى يطلع وجهه

اسلام : وحضرتج بكيفج تقررين يجوز اني اريد اصبغ غرفتي خضرة

ديمة : خضرة شنو قابل انت سيد

عشتو على كولة زبيدة المهم البيت كله كون نصبغه ابيض حتى من نريد نغير ديكور الاثاث بإي وقت نكدر نغيره وبالالوان التعجبنه

وبكل الاحوال لان الحيطان بيض ما راح تطلع نشاز اااابد ، شتكولين خالة ؟

هناء : صحيح كلامج حبيبتي

اسلام : وبعد شتردين ست باربي

ديمة : شوف الطابق الفوگ اريد تجيبون عمال يسووله اعادة تدوير ويحولو مغاسل

اسلام : المن تردين المغاسل ؟

ديمة : غير الك ياعيني حتى تستقر فوك وتاخذ راحتك

اباوعله باوع لخالتي وابتسمو ثنيناتهم ، شبيكم ؟

اسلام : رحم الله والديج بس تره ماكو داعي اني مرتاح

ديمة : لا اله داعي وما دام اكو فلوس جوه ادينا لتشيلون هم خلي نستغل الفرصة

هسه خلصنه من سالفة المغاسل الفوگ بعد المغاسل الجوه ، اريد نجهز الحمام الجوه تجهيز غربي بحت

اسلام : على بختج ديمة انتِ مستوعبة على حجيج التكاليف الراح تصير شكد ؟

ديمة : معليك كتلك عدنا فلوس

شطبت كل الحجيته وباوعتلهم ، بقى عدنه بس الطبخ واني شفت بيجات بالفيس واخذت كتلوكات بيهن دزاينز يخبلن

اسلام : دزاينز !! عمت عينج اي والله

ديمة : هههههههه اسكت انت خليني افيك عليكم

تقربت على خالة خليت راسي على جتفها ، باعي خالة شنو رأيج بهذا الكاونتر يجنن واذا سوينا ابيض رخامي ومطعم بأسود لو رصاصي يطلع خرافيييي

هناء : خاف ميصلح اسود يمه

ديمة : على بختج خالة شعليها الالوان

اسلام : اني اكلج امي تريد احمر بس تستحي تكلج

هناء : دكل تبن احمر شنو قابل ابويه معرس

ديمة : ههههههه ليش اليعرس ابوها المفروض تلبس احمر

هناء : ههههه انجبي ولج

ديمة : ابتسمت ورجعت اتفق ويه خالة واسلام على كلشي وكل شويه اشيل راسي واباوعله الكا يباوعلي

شكد بودي اسأله واخذ رأيه بس ملامح وجهه متسويلي واهس اتقرب لو اسوي شي ففضلت اعوفه على راحته

المهم كملنا كلشي وثاني يوم راحو الولد جابو العمال وبدو يشتغلون على الصحيات

طبعًا احنه بهالفترة حولنا لبيت اهلي الجانو كاعدين بي اهل تقى الحية

فصخنا المطبخ وشلنا كل الغراض وبدينه نصبغ البيت اني وامين واسلام

ولا اكلكم ولا تكلولي شهرين ضبط كلفتنا نشتغل بالبيت ونعزل بي

وطبعًا الفلوس ما كفت فاضطريت بالخلسة اروح ابيع طقم ثاني بدون لا احد يدري حتى نكمل البيت مثل ما اني اريد

واكيد ما انسى شلاع الگلب الشفته بهاي الفترة لان جنت ارجع من الكلية يادوب اناملي ساعتين واروح اساعد الولد وارجع اقره

باختصار هلكت هلاك بس الحمدلله النتيجة طلعت خرافية والبيت گام يلمع بحيث الواحد يشتهي بس يكعد بي

لان هو اصلا بنائه حلو بس يرادله ترتيب والحمدلله الله قدرني وبمساعدة الشباب كدرت ارتبه

وبدينا ننقل غراضنا من جديد للبيت ، اني غرفتي بقت على حطتها لان اصلاً جديدة بس باقي الغرف فرغناها علمود نصبغها

وتقريبًا اكدر اكول خلصنا بس بقتلنا كم شغلة بسيطة ونكون كملنا كلشي وبالكامل

محد يكدر يتخيل الفرحة والانجاز الحسيت بي بوقتها واني اشوف البيت كدام عيني ، والله العظيم احس وكإني مسويه شي عجيب بحيث ممصدكة بروحي

خو من شفت خالة تبوس بيه وتتشكر مني حتى بجي بجيت واسلام فدوة لكلبه بس نظرات الامتنان الي بعيونه خلتني بودي اطير

الا ذاك الواحد ورغم كلشي سويته بس ما حصلت منه ولو نظرة تفرح گلبي

ومع هذا اني راضية المهم رب العالمين يشوفني داسعى

______________________________________

زبيدة : واكفه انطي اكل للدجاج ودگ موبايلي ، شفتها دنيا ابتسمت وجاوبتها

الووو هاا دندون شلونج

دنيا : شلونك يبذات

زبيدة : عايشة

دنيا : ااخ والله حرت شسوي وياج حتى اطلعج من هالحالة الانتِ بيها

زبيدة : يمعودة قابل شبيه هياتني صادقت دجاجات خالتي ووضعي مثل الوردة

دنيا : وردة ذبلانه قصدج

زبيدة : مو مهم ذبلانه مو ذبلانه ابقى وردة

دنيا : هههههه احبج وانتِ متواضعة

المهم اني خابرتج داكلج جدي هستوه خابرني وبلغني اوصلج خبر باجر الصبح لازم تكونين موجودة هناك

زبيدة : لا اروح ولا اوصل جفيني شرهم

دنيا : هنا المشكلة الموضوع ما متعلق بيج لان جدي طلب مني ومن ديمة ومن بيت عمو يحيى وامين يحضرون باجر الصبح

الكل معزوم على غدة وهو گال بعد الغدة راح يبلغنا بالموضوع اليريدنا بي

زبيدة : ما كدرتي تعرفين شيريد ؟

دنيا : لا والله حتى عمو يحيى حاول يفهم منه السالفة وما گدر

وهم هو وصاني اوصلج هالرسالة لان ما جاي تردين عليهم ، جدي يكلج لازم تجين واي اعذار تطلع منج
انتِ تتحملين نتائج عواقبها

زبيدة : طيب خلي اشوف وضعي وابلغج

سديته منها ودخلت سولفت لخالتي ونصحتني ما اعاند واروح واني هم من الاساس جان هذا رأيي مو لان ما اريد اعاند بس اريد اعرف شكو

وفعلاً ثاني يوم اخذت تكسي ورجعت لمحافظتنا ، وصلت الساعة بالعشرة الصبح

نزلت وسلمت على الحرس قبل لا ادخل ، دخلت لجوه لكيت الكل ملتمين بالحديقة واول ما كلت السلام عليكم كلها اندارت عليه

بلعت ريكي وتقدمت بوست خواتي وبيت عمو يحيى واهل امين ونور ، بيبتي وجدي مثكلين وجهم عليه
فسلمت عليهم من بعيد

وذيج الصفحة الثانية اني اصلا ما اطيقها فسلمت عليهم شلون ما جان وكعدت يم خواتي

ديمة : هاا زبد شو عيونج تفتر عليمن تدورين

زبيدة : ادور على حذاء كعب حتى انبته براسج

ديمة : قصدج دتدورين على هارون

زبيدة : خزرتها وهي انتبهت على جفصتها وضحكت

ديمة : اسفه اسفه والله ما اقصد عود هارون حذاء لا حشا حبيب اختي وزوجها

زبيدة : اذا متسكتين اهمشج هنا من شعفتج الصفرة وكدام امة محمد فانجبي

درت عيني على الاجواء وكالعادة كلها رياء وغيبة ونميمة ونفاق

صحت لنور وسألتها ، اكلج نورة ردت اسألج ، احم يعني

نور : بدون متسأليني هارون نايم وما راح ينزل لان ماله خلك

زبيدة : متأكدة ؟

نور : ياا قابل اجذب عليج

زبيدة : هزيت راسي وتنهدت وكمت على حيلي

دنيا : وين رايحة ؟

زبيدة : هسه اجي ، مشيت متوجهه للاسطبل ، من وصلتله ابتسمت ودخلت

شفت ملهم وملهمة ودمعت عيوني ، يروحي مرجان هاي شنو كبران

تقربت صعدت على الطبلة ومسحت عليهم وهن كامن يصهلن ، ابتسمت يعمري اكيد انتو مشتاقيلي مثل ما اني مشتاقتلكم

والله مداصدك صارلي شهرين مشايفتكم ، ابتسمت واني امسح على راس ملهم ، سبحان الحببني بشكو
شي هو يحبه

تحسرت ونزلت حتى اطلع ما اريد احد يشوفني مالي خلك الحجي ، خلي اكضي الشغلة الاجيت علمودها وارجع

انداريت داريد اطلع وفزيت من شفته واكف بباب الخروج مالت الاسطبل

باوعتله ، وخفق گلبي ، يربي هذا شصاير بي ، وجهه اصفر وذبلان بشكل

جريت نفس محاولة اهدئ نفسي ، اهدي زبيدة اهدي فدوة اروحلج

تنهدت ومشيت متجاهلته حتى اطلع بس شفته يجي من ناحيتي قاطع عليه الطريق

بلعت ريكي ومشيت من الناحية الثانية وهم قطع عليه الطريق

حكيت كصتي وباوعتله مدري شلون بلحظتها سيطرت على نفسي وما شبكته

هارون : ششـ شلونج

زبيدة : عادي توخر

هارون : لا

زبيدة : رفعت ايدي دفعته بخفه حتى امشي بس تفاجئت من جرني عليه

هارون : لترحين

زبيدة : رفعت راسي عليه ، صارت عيني بعينه ، احم هد ايدي

هارون : لا

زبيدة : خزرته وحجيت ويا بتحذير ، هارون !!

هارون : روحه

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة / حبيباتي بنات اني سبق وذكرت انُ التنزيل راح يكون على حسب وقت فراغي فكلش مالها داعي بعض التعليقات السخيفة من البعض

اني لا خليت نظام محدد للنشر ولا كتلكم بفلان جدول راح انزل من البداية كلت حتى لا اتفشل وياكم خلوني اكتب على وقت فراغي وانزللكم البارت مثل ما اريد

والميعجبها هذا الكلام ياعيني خلي تحذف الرواية لو تتركها لحد ما تكمل وترجعلها لا اني الجابره احد يقرأ ولا اني المأملتكم وكتلكم راح انزل يوميه حتى تحجون وتعترضون ففدوة الميكدر يلزم لسانه ويحترم نفسه حشا الزينين خلي يفارقنا ولينغص علينا الرواية

كل الحب ❤️

.