الموت الحي الفصل السابع وسبعون 77 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : خزرته وحجيت ويا بتحذير ، هارون !!

هارون : روحه

زبيدة : غمضت عيوني على اثر القشعرة الي اجتاحتني من سمعت حجايته

يمكن لو اكول انُ كلبي راد يطلع من حلكي ابين دابالغ بس حقيقة هو هذا الشعور الحسيته بلحظتها

بس مجان باستطاعتي غير إني اتجاهل هاي المشاعر
وادوس على نفسي وامشي

عبرته ومشيت بس استوقفني صوته وهو يحجي

هارون : شهرين واسبوع وعشر ساعات ونص وانتِ عايفتني ، شلون كدرتي ؟

كلبج شلون طاوعج ، ما حن ؟ ما اشتاق ؟ ، شلون كدرتي تخلي يصمد كل هاي المدة وهو بعيد عني

زبيدة : مثل ما انت گلبك ولسانك طاوعنك تجرحني وتهين مشاعري

هارون : وانتِ كاعدة تسويها وحدة بوحدة يعني

زبيدة : انداريت عليه ، طبعًا لا ، عمرك لتتخيل إني ابتعدت حتى اعلمك درس لو حتى اخليك تجي تحجي هالحجي داسترد كرامتي وارجعلك

لاً ابدًا اني خطيت هاي الخطوة رفقًا بنفسي وبمشاعري ، ما ردت اعيش وياك واضل طول عمري اجدي منك الحب والاهتمام وتاليتي اموت ذليلة
واني جوه جناحك

هارون : انسي كل الصار للحظة وحدة وتعاي يمي اريد اشبگج ثواني مو اكثر ، اوعدج بس ثواني

زبيدة : دمعت عيوني وااااخ شكد تمنيت لو عندي القدرة اكله اي ، اشبگه حيل وابوسه واشمه

بس ما كدرت ، نفسه گلبي اليريده كاعد يمنعني اتقرب ويمكن سبب ثباتي بهالموقف الحساس هو استيعاب عقلي وگلبي

أنُ اكبر غلط إني ارجع نفسي لنفس النقطة العافرت وشبعت ضيم ياله كدرت اطلع منها وياريتني لو صدك كادرة اطلع منها

اباوعله سحب اديه ثنيناهن بوسهن وخله وجهه عليهن

هارون : زبيدة اني تعبااان ، حيل تعبان ومحتاجج ، الله يخليج ابقي وياي ولو شويه

همستله بصوت ناصي ، اذا تعبان عندك رب العالمين ارحم منك ومني وهو الي كفيل بأنه يساعدك اني ما بأيدي شي

من رخصتك

سحبت اديه عفته ومشيت ، اجذب اذا اكول ما حنيت ولا اشتاقيت ، رغم الفترة الي ابتعدت بيها بس ما انكر انه ما غاب عن ذهني ولو لحظة وحدة

بس كاعدة اجذب على روحي ، مثل اليجذب الجذبة ويصدكها ، داحاول اقنع روحي انُ الفراق علاج ومصيري اتعود وراح اسعى واحاول إني اصدك
هاي الجذبة مهما كلفني هالشي

وصلت للمكان المتلمين بي الكل ، صارت بوجهي بصائر الكاعدة يم امين

اباوعلها شلون تخوزر بيه وكإني عدوتها رغم إني ما اشوفها اصلاً ، والله حريمة هيج وحدة عدها هيج اهل

إخوتها وامها درة مالت الله بس هي مدري شبيها اليباوعلها يحس الحقد يبث من وجها بث

واني لوما استحي من امين وخالة هناء جان عرفت شلون اتصرف وياها خصوصاً بعد ما سولفلي خواتي شمسوية بيهن

سولفتلي ديمة شسوت بيها قبل زواجها وشلون ورمت وجها من الضرب وبعد زواجها حولت على دنيا وشدت وياها ذيج الشدة

والمشكلة خواتي طايحظهن ويحاولن يتجنبن المشاكل ولا وحدة منهن وصلت الحجي لرجلها حتى يخلولها حد

الغريب انُ هالبنية ابد مجانت هيج والله اتذكرها قبل جانت درة مالت الله ، فد ادب وخجل ولطف شايله مو طبيعي شغيرها هسه ما ادري

تنهدت ورحت كعدت يم خواتي اباوع كلها تباوعلي صفح والتبسبس ماله والي عليه

ضحكت بداخلي عليهن ، عود عبالهن يعني من يسون هيج راح يقرهني ويغيضني ، اشفق عليهن بصراحة شكد تافهات وماعدهن شخصية

اااااخ يا بابا شلون جنت عايش بهذا المستنقع القذر وصامد رغم لا هذا جوك ولا هذا طبعك

اباوعلهم ناس حياتهم عبارة عن غيبة ونميمة وحقد وغيرة ، ناس تضحك بوجه ناس وناس تحجي بظهر ناس

لا عدهم الفه ولا عدهم محبة ، يحبوك ويدعموك ويوكفون بصفك حتى تنجح وتصير بس المهم متصير احسن منهم

ولهذا السبب اشوفهم على مصالحهم يتفقون ويصيرون گلب على گلب وبس تنتهي هاي المصالح تظهر وجوهم الحقيقية

شتت تفكيري صوت دنيا وهي تحاجيني

دنيا : وين جنتِ حبيبتي؟

زبيدة : رحت اشوف الخيول شويه

مدري شرادت تحجي وسكتت من شافت هارون يطب ويكعد گبالنا

دنيا : شفتي هناك مو ؟

زبيدة : هزيتلها راسي ، اي

دنيا : زين خوما سوالج شي ؟

زبيدة : هاا لا مسوالي شي

ديمة : هم حجه وياج ؟

زبيدة : اي بس اني ما انطيته مجال ما اريد احجي بشي

اني اجيت اشوف جدجن شيريد وارجع لا اكثر ولا اقل

ديمة : بس خطية زبيدة شوفي شلون ذبلان وتعبان مدري ليش انقهرت عليه احسه طيب

دنيا : انجبي ديمة كلشي مابي الرجال كوه تردين تطلعي شحاله

زبيدة : باوعتله صح اليباوعله من بعيد يكول كلشي مابي ، زيانه جديد ، لحيته محدده ومرتبة ، هندامه حلو

بس الي يتقرب منه مستحيل مينتبه على عيونه الزايد الحزن بيهن و وجهه الضعفان لو شفايفه
الشاحبة والي مبين رايح لونها بسبب قلة الاكل
والشرب

والنوبات مبينه ماخذة من عافيته عافية ، اشحت بنظري عنه لان جان كاعد گبالي ورفعت ايدي فركت عيوني حتى لا ابجي

شبيدي عليك يا حبيبي شبيدي ، انت الوصلتني والوصلت نفسك لهالمرحلة

حسيت بأيد تمسح على ظهري ، باوعت لكيتها ديمة

ديمة : لتزعلين حبابه

زبيدة : ابتسمتلها ، فدوة لكلبها حبيبتي شكد حنينة

نوال : اكول زبيدة شلونج شو من اجيتي لسه وانتِ ساكته

زبيدة : شريد احجي مثلاً ؟

نوال : يعني شسويتي ماسويتي بهاي الشهرين طمنينا عنج رحتي والروحة روحى

زبيدة : ما سويت شي كاعدة وساكتة

غفران : شهرين بس كاعدة بالبيت جان استثمرتي هاي الفترة وطورتي نفسج

زبيدة : انطيني نبذة عن الاشياء الطورتيها انتِ بهاي الفترة حتى اتعلم منج

يله اسمع منج شنو سويتي انتِ اتحفيني

ضلت ساكته ما ردت عليه ، انطيها بس تلغي وتعقب على فلان وعلان شكد تلعب نفسي منها

دنيا : جدو مكتلنا شنو سبب هاي الجمعة اليوم ، صراحة كلش قلقتنا

النوح : هسه شويه اصبرو ويجيكم الصافي

دنيا : اي نصبر شورانا

زبيدة : باوعت لتيومي لكيته يباوعلي ويبتسم ، كمت اخذته من حضن يوسف بوسته وشلته

يمه خالاتي حبيباتي ، صدقة للكبران اروح اني ، نزلته واخذت ايده حتى اكوم اتمشه

يحيى : اوكفي زبد جاي وياج اريد امشي رجليه شويه من رخصتكم

زبيدة : مشيت اني ويا وتيم

يحيى : شلونج ؟ ولتكليلي الحمدلله ، نحمده ونشكره على السراء والضراء بس سؤالي واضح

زبيدة : موزينة

يحيى : واضح عليج

زبيدة : اعرف رغم داحاول ما ابين

يحيى : متكدرين

زبيدة : هم اعرف

يحيى : سمعت من رميم راح تتطلگين انتِ وهارون

زبيدة : اي

يحيى : رغم اعرف القرار صدر من ناحيتج مو من ناحيته ، بس احسج متردين هذا الطلاگ

زبيدة : اريد وما اريد

يحيى : شلون يعني

زبيدة : هارون هواي اذآني عمو والطلاگ هو الشي الوحيد اليكدر يخلصني من هاي الاذيه

بس مع هذا نفسيتي ممتقبله عواقب هذا الانفصال
ما اتخيل نفسي خلص بعد اطلع من حياته للأبد و
اتحرم عليه لا ويصير بالنسبة الي شخص غريب
ميحق الي حتى اسأل عنه

يحيى : تحبي ؟

زبيدة : نزلت دموعي وجاوبته ، للأسف

يحيى : اذا تحبي وتشوفين هذا الانفصال بي اذيه الج بطلي عنه ليش هالاذى النفسي الكاعدة تسببي لروحج

زبيدة : ما اگدر خلص اني قررت وما ممكن اتراجع عن قراري

يحيى : وشراح تسوين بعد ما تنفصلين ؟

زبيدة : ادور على تعيين بمدرسة اهلية ، لكيت كان بها ما لكيت ارجع اخذ غراضي من بيتنا القديم وارجع افتح مشروعي مالت الطبخ

هم اساعد الهي روحي وهم ابدي ابني لنفسي شغل مستقل يعيشني ، بالنهاية محد دايم لأحد

يحيى : شما يكون قرارج خلي ببالج إني دائمًا وياج وبصفج ومستعد كلشي اسوي في سبيل تكونين سعيدة

زبيدة : حبيبي انت عمو والله ماكو منك

يحيى : يله ولك امسح دموعك وخليك زلمة خشن شنو هاي من شوكت انت دمعتك هينه هيج

زبيدة : ضحكت ومسحت دموعي

يحيى : بعد روحي حبيب هيج اريدك لتبجي ، يله امشينا نرجع تعبت رجليه خرب يومج خمس مرات فريتنا بالمزرعة

زبيدة : دحرك رجليك شويه صاير عندك كرش من الكعدة

يحيى : لا بشرفج زبد صدك طالعلي كرش

زبيدة : والله هياته مبين من القميص

يحيى : لااا مو خوش سالفة هاي ، بس تدرين كله من وره رميم الف مرة كتلها لتخليني اتعشه وتجبرني

زبيدة : وشلون تجبرك بله خوما تعبي الاكل بحلكك كوه

يحيى : لا ولج بس يعني تسوي العشه كبه لو دولمة لو باگلا بالدهن وتريدني ما اتعشه شهالكفر هذا

زبيدة : ههههه

يحيى : تضحك ام الوصخ دمشي امشي جنج روايح صفرة صايرة كاتلج الحب عشتو عود عدها مشاعر

زبيدة : اهووو لو ادري ما حاجيه

يحيى : انجبي لج

تيم : عيب ذدو ثنو هدا الكلام

يحيى : حجه البنگلاديشي ، تراسليت بليز ( ترجم رجاءً)

زبيدة : صدك هو ليش ديحجي هيج

يحيى : غير مگابل العاملات وكاعد انوب ذاك اليوم يوسف ودنيا طلعو يتعشون وخلو يمنه وهو خبصنه

كل ساعة واجانه يعد ويصف ، يريد ياكل ، يريد يلعب
يريد يصعد ، اهله وين

واني صافن واكول يا كلب ابن كلب الساعة بالوحدة بالليل يريد ياكل ويلعب اثاري السربوت طلع يحجي على روحه

زبيدة : ضحكت وضليت امشي واسولف ويا ، شويه ورجعنا يمهم

من وصلنا صفنت من شفت سيارات بيك اب ثنين دخلن للبيت وشايلات عجلين بالبدي

باوعت لجدو بس شافهن دخلن اشر للسيارات يوكفت بالحديقة

ديمة : يمه هاي شنو طلي

صاحب : طلي !! هسه من الزم روحي واطيحلها دك هم واحد يگلي ليش

لج ديمة هذا طلي ؟ بشرفج !! يا طلي هذا البگد المطي ، امين شوفلك صرفة ويه مرتك

ديمة : شبيك هستوني تذكرته هذا زوج البقرة شنو اسمه

يوسف : اسمه امين

ديمة : شنو هذا الحجي يوسف مو عيب عليك يعني اني بقرة

يوسف : هههههه هاك استلم ما زعلت على رجلها زعلت على روحها ، الك الله يمكرود

ديمة : باوعت لامين ، اسفة والله مو عليك حشاك طبعًا ، اكول هارون صدك هي البقرة نفسها الهايشة ؟

هارون : اي

ديمة : زين ليش يسموها هايشة اذا هي بقرة

هارون : بالمغرب والجزائر عدهم كلمة هايشة يعني غلطة يوصفون بيها الشخص الغبي العقليته بدائية

وبالعراق ما اعرف ليش يسموها هايشة يمكن لنفس السبب

امين : منتبهلك دائمًا تحب تحجي بهيج مواضيع مبين عليك تحب شغلك

هارون : صح الشي الاحبه والاتعلق بي ما اعوفه واستمتع واني اتأمله واسولف بي وإن جانت هالسوالف بيني وبين نفسي

زبيدة : انتبهتله يحجي ويباوعلي ، درت وجهي عنه وحاجيت جدي

ممكن نعرف ليش طلبت تجمعنا اليوم ، تره اني ما اكدر ابقى هنا لوقت متأخر لازم ارجع قبل الليل

ما رد عليه ورفع موبايله يخابر ولا كإنما احجي ويا
يربي صبرني وخليني امشي هالجم ساعة على خير

النوح : الووو هاا كلشي تم لو بعد

خوش خوش

نزل حبيبي يله همتك طبخانا الغالي ما بقى وقت يله استعجلو

زبيدة : تفاجئنا من ردة فعل جدي البينت اسنانه من بعد ما سوه هالاتصال الغريب

دامشي اكعد يم خواتي ووكفت من شفت سيارة عالية مضلله تدخل من باب البيت وتستلم المكان هورنات

هاي شنو !!

الكل كام واندار على مكان السيارة ، اباوع لجدي راح يهرول بحركته واشر للسواق ينزلون العجولة من السيارات

صارت عيني على الباب الي انفتحت ، شهكت اول ما شفت عيسى اخو هارون ينزل

يوتبعه معين !!

گلبي راد يوكف من شفته واكف على رجليه ويمشي ، اي والله هياته ديمشي

اباوع لخواتي وخالة ودادا راحلة يركضن شمرن رواحهن عليه يحضنن بي وهو شابكهن ويبجي واني متصنمه بمكاني

وئام : بعد روحي حبيبي ، يمه عشت وشفتك متشافي يبعد امك

ام حسن : الحمدلله على سلامتك حبيبي

معين : الله يسلمكم يارب

دنيا : يمه ممصدكة شفتك حبيبي انت ، بوسته من خدوده وشبكته

بجيت بفرح وااااخ من دموع الفرح صارلها شكد غايبة عني

ابتعد يبوسنه وسودة عليه هو هم يبجي مبين عليه طاير من الفرح

معين : زبد وينها شو ماهي

زبيدة : رفعت ايدي مأشرتله ، اني هنا

معين : تعاي حبيبتي مشتاقلج

زبيدة : لالا انت تعال امشيلي اريد اشوفك

اباوعله ابتسم وهزلي راسه ، تقدم مبتعد عن خواتي

هو يمشي واني اباوع على رجليه شلون يدوسن الكاع ، شفته وكف كبالي

شلت راسي عليه وغرغرت الدمعة بعيني ، رفعت اديه لزمت اديه وهزيت راسي مستفهمه

انت واكف مو ؟

معين : اي واكف

زبيدة : ييـ يعني رجعت تمشي ؟، تكدر تكوم وتكعد وحدك ، ماكو عربانة بعد مو؟

جاوبني وهو يسحبني ويحضني

معين : ماكو بعد حبيبتي ماكو

زبيدة : شبكته وانهاريت من البجي ، لالا ما اصدك انت واكف على رجليك ، اي والله هياتك واكف

هذا ظهرك مستقيم ، ابتعدت باوعت لطولة ورجعت حضنته ، حبيبي انتتت ممصدكة والله ممصدكة

ضحكت وسط دموعي ، اباوع لرجليه وارجع اباوعله واني اضحك ، هههههه رجعت تمشي رجعتتت ما راح تعبي هيج لالا ما راح هههههه

احب نفسي معين اني احبها ، احبها هواي ههههههههه

معين : تستاهل الحب ، حبيبتي انتِ متتخيلين شكد اشتاقيتلجن انتِ والبنات

تعالن ولجن تعالن خلي اشبع منجن صارلي شكد ما شايفجن

زبيدة : اجن خواتي وهو حضنه تلاثتنه لگلبه

ابتسمت من كل وكلبي ، انشرح صدري وهذا جان ثاني خبر حلو اسمعه من فترة طويلة

حمزية : كافي ولكم كلبي راح يوكف من البجي

زبيدة : ابتعدنا عن معين لان جدو صاحله حتى يذبحون الدابة جوه رجليه وهو ابتسم ومشه يمهم

ذبحو العجولة جوه رجليه واخذوهن الطباخين الجايبهم جدو ديطبخوهن

وما انسى بيبي الي ركعتنا بهلهولة رنانه بمناسبة رجعت معين وعيسى للعراق بعد غياب 7 شهور

البيت كله انخبص بيت عمو عبدالله يشبكون ويبوسون بعيسى واحنه وبيت عمو يحيى وامين مخبوصين بمعين

حبيبي الفرحة مسايعته وميقبل يكعد ، كلها ملتمه
عليهم واني واكفة اباوع ومبتسمة

حسيت بثاني اهم انجاز سويته بحياتي ، الاول ريحت ديمة من راسل وهبه والثاني كدرت بفضل الله اخلي اخوية يرجع يمشي على رجليه من جدة وجديد

حقيقة جنت محتاجة هيج فرحة تذكرني انُ تضحيتي مراحت هباءً منثورا ، الف الحمدلله والشكر يارب دائمًا وابدًا

باوعت لدنيا ونزلت دموعي سامحيني حبيبتي دنيا ماكدرت اتحمل وادوس على نفسي اكثر في سبيل ارجعلج حقج وابرد كلبج بألي كسروج واخذو منج
ضناج

بس اني مؤمنة انُ رب العالمين راح ياخذلج حقج
اني جان عندي وسيلة وحدة اكدر اساعدج بيها

اما رب العالمين فتحت رحمته الدنيا وما بيها وهو كفيل بإنه يتولى زمام الامور واني كلي ثقة بي
انه حياخذ حقج وحق كل انسان مظلوم وبالدنيا
قبل الاخرة

قاطع شرودي كلينسه تتقدم الي ، باوعت لوشم ايده ومديت ايدي اخذت الكلينسه منه

مسحت دموعي وخشمي وباوعتله ، شكراً

هارون : العفو

زبيدة : تنهدت واني اتابع بنظري حركات الكاعدين

هارون : فرحتي ؟

زبيدة : برجعة معين ؟ اكيد

هارون : وانتِ دائمًا من تفرحين تبجين

زبيدة : باوعتله ، مو بس من افرح حتى من احزن ، الانسان سلاحة مشاعره ودموعه هي الرصاصة التطلع
من تنضغط هاي المشاعر سواء بحزن او فرح

دنيا : زبيدة تعاي ليش واكفه هناك

زبيدة : اجيت ، عفته ورحت كعدت يمهم

معين : افييييش ياريحة العراق

صدك لا كالو رحت لبيت الله واجيت مثل بيتي ما لكيت

شكد جانت امريكا جميلة بس جامدة ، باردة تحس مابيها روح مدري لان انتو مو ويايه احس بنقص

لك امين شبيك خانس من اجيت لسه ما سمعت صوتك تفاعل ويايه شويه ، شبيكم وجوهكم تلطم

امين : صافن عليك ، سبحان مغير الاحوال وين جنت ووين صرت

فرحان برجعتك هواي وهم من شفتك اخذتلي لحظة صمت ، حالتك خلتني احس انُ كلشي ممكن ووارد يصير بهالدنيا

والا منو يصدك انت الي ايسونا تلث ارباع اطباء العراق انك ترجع تمشي على رجليك بس تسافر حتى تحاول محاولة شبه فاشلة حتى ترجع تمشي بس مع هذا تنصدم من تلكه نفسك واكف على رجليك

معين : الف الحمدلله ، الله مغرگني بفضلة وما اعرف شلةن اشكره

يوسف : صدكني الصار ما صار الا لان نيتك صافية

ديمة : فعلاً اني بالجديد صرت مؤمنة بهذا المبدئ ، اي انسان يسوي اي شي حتى لو جان شي مستحيل بس يسعى اله وبنية صادقة راح يحققه

صاحب : صايرة متحجية ست ديمة

ديمة : الفضل لدكتورة سهير هي العلمتني

سهير : حبيبتي دمدم اني بخدمتج

دنيا : رفعت حاجبي هاي شنو ، بتزاكرو من ورايه

ديمة : ههههههه والله لو تدرين بالمضموم

زبيدة : احم دمدوم متجين نطبب جنطة معين للبيت ، ما اكدر اشيلها وحدي ، سحلتها وكمت اجر بالجنط واجرها

طببتها لبيتنا ودفعتنا

ديمة : اوي شبيج خلعتي ايدي

زبيدة : اسمعي ولج والكعبة الشريفة اذا اسمع بيج مفتته عليه لاحد اكطعج تكطع

خو اذا سمعت بهارون يدري بيه اروح لسهير يمه شسوي بيج والنبي دمج اخلي بطولج

دنيا : وليش متردي يعرف ست ؟

زبيدة : انداريت باوعتلها لكيتها واكفه بالباب

دنيا : انتظر منج جواب ، شكو بيها واذا درة بيج تراجعين يم سهير

زبيدة : مشيت عنها مختصرة الحديث بجملة وحدة ، انتن تعرفن شي واني اعرف شي

دنيا : لزمت ايدها ، اوكفي زبيدة ، ليش متردين هارون يدري بيج تراجعين اخصائية نفسية ؟

اكو شي صاير وياج خايفة هارون يدري بي ، احجيلي حبيبتي ، تحسين نفسج دتعانين من شي معين وتستحين تكولين لاحد ؟

زبيدة : لا اني مابيه شي بس ما أريده يدري وينجرح لو ينقهر ، واني ادري اذا سمع راح يجي بباله إني
مصدكة انه مخبل مثل ميكولون واني ما اريده يحس هيج

ارتاحيتي هسه ؟ من رخصتج

دنيا : اباوعلها عافتنا وطلعت ، هاي اختج مو صاحية والله

ديمة : رفعت كتافي ، تحبه

دنيا : والله ؟

ديمة : اي شبيج ، هارون حلو يستاهل ينحب

دنيا : وهي بالشكل ؟

ديمة : لعد بيمن هي لو بالشكل لو بالاخلاق وهو عنده شكل وماعنده اخلاق

حتى امين هسه هو ماعنده شكل كلش كلش واو بس عنده اخلاق فيستاهل ينحب

دنيا : ليش انتِ تحبين امين ؟

ديمة : هاا ، اكلج اني يمكن سمعت معين يصيحلي خلي اروح اشوفه عيب الرجال هستوه اجه من السفر
واحنه كاعدين هنا نسولف شلون يصير تؤ تؤ

دنيا : اباوعلها هي هم الثانية عافتني ودخلت لجوه

صفكت اديه لا والله خواتي مو صاحيات وحدة تريد تطلك وهي كاعدة تبصبص على رجلها من جوه لجوه والثانية راح يصيرلها سنة متزوجة وهي متدري بروحها اذا تحب رجلها لو لا

يمه همزين اني صريحة ويه رجلي ، وينه بعد گلبي ابو الخلقة والاخلاق خلي اروح يمه قبل لا اتسودن

طلعت بره لكيت خواتي كاعدات وزبيدة طايحة لديمة تكرص وذيج كل شويه وتكمز

كعدت يم يوسف وانتجيت عليه ، ضلينا كاعدين علما خلصو الطباخين طبخ ، اتذكر بيومها تغدينا بـ3 الظهر

التمينا كلنا على السفرة وبلشنا من بلش جدي

النوح : اليوم هذا الغدة على شرف شفاء معين ورجعته هو وعيسى بالسلامة

معين : مشكور حجي ما جان الها داعي اني اتصلت بيك حتى اسوي مفاجئة لاهلي مو علمود تتكلف هيج

النوح : انجب ولك انت حفيدي وواجبي هذا تجاهك

زبيدة : هه

النوح : اكو شي يضحك ست زبيدة

زبيدة : اي

النوح : لعد ضحكينا وياج

زبيدة : ميحتاج خلي السوالف بگلبي احـ... هاي شنو
شفت نور تخلي ماعون الحكاكة كدامي وطبعًا ما فاتتني حركة هارون وهو يأشرلها

نور : هاج زبد هاي الحكاكة ادري بيج تحبيها

زبيدة : رجعت الماعون عليها ، شكراً حبيبتي بس اني معدتي متضايقة وما اكدر اكل شي دسم

باوعت لهارون گلب خلقته وكام من الاكل ، ندستني ديمة

ديمة : ليش هيج تسوين

زبيدة : انجبي انتِ

عفت خاشوكتي وكمت دخلت لبيتنا غسلت وطلعت لكيت نور بوجهي

نور : هاج هاي حباية معدة اشربيها حتى تتحسن معدتج

زبيدة : اااخ منك اااخ جيبي

اخذت الحباية شربتها لان صدك جانت معدتي تأذيني بس اني من النوع الي ما ادير بال اكل كلشي ما ادقق على هالسوالف

كملت كلاص المي وضليت كاعدة يمهم للعصر ، بيت عمو يحيى واهل امين ترخصو حتى يرحون رغم جدو لح عليهم شكد يبقون بس هم اصرو يرحون
لان من الصبح جايين

وفعلاً طلعو ما عدى خواتي بقن حتى يباتن هنا لان معين طلب من يوسف وامين يبقوهن وهمه ما كالو لا

اما اني صار الوقت حتى اروح دخلت وياهم حتى اسلم عليهم واروح بس استلمتني دنيا بالمطبخ

دنيا : هاا شو حطيتي جنطتج على جتفج

زبيدة : غير اروح

دنيا : صدك تحجين وين تردين تولين غير معين ستوه رجع شعدج رايحة

زبيدة : ما اريد ابقى هنا ، اختنكت

دنيا : يعني معين خبص روحه وطاح تواسيل ليوسف وامين حتى يبقونا تالي تطلعيله انتِ صفح

لعد المن بقينا احنه غير علمود اللمه بشرفج زبيدة
خليج لترحين حبابه حبابه

وئام : منو هاي التريد تروح بس لا زبد

دنيا : اي شفتي بله

وئام : لا زبد مو كلنا ملومين صارلنا هواي مكاعدين هالكعدة والله ازعل اذا رحتي

زبيدة : خو انتن اذا اتفقتن على واحد تطلعنه *** ****

دنيا : هههههه طيح الله حظج على هاللسان

وئام : ابوها منو ، رحمة الله عليك يا حبيبي

يله ولج امشي خابري خالتج كليلها اليوم ما ارجع غير
هالحجي والله ابسطج لا ومو بس هيج ازعل عليج

دماغ سز صارلنا شهرين ما شايفج شنو مالنا حق عليج لو مو اهلج احنه

زبيدة : يبووو خلص عمي خلص باقية خبصتوني

دنيا : متمشين اله بالعين الحمرة

زبيدة : دمشي لج جنج ططوة

دنيا : هههههههه

____________________________________

بصائر : رجعنا للبيت واني طول الطريق افكر بيها ، طول ما احنه كاعدين هناك اني عيني عليها

جنت كاعدتلها شلون اليدورله زله على واحد بس ما شفت عليها شي ، طول الوقت جانت صافنة ومالها شغلة بأحد

سهير : بصائر حبيبتي تحبين نروح لمكان لو نرجع گبل للبيت

بصائر : لا سهورة للبيت فدوة عندي امتحان واريد اكعد اقره

جياد : الله يساعدج دراستكم صعبة والله ذاك اليوم كعدت الفجر لكيتج كاعدة بره تقرين انقهرت عليج

سهير : يله هانت هي بس هالسنة وتخلصين على خير ان شاء الله

بصائر : ان شاء الله يارب

جياد : صدك بصائر حليم ما كلج شوكت راح يرجع

بصائر : اليوم الصبح راسلني گلي لو اليوم بالليل توصل طيارته لو باجر الصبح

سهير : تأخر هالمرة مو

جياد : اي هو كل مرة يسافر يخلص العقود بأسبوع ويرجع بس هالمرة بقى اسبوعين علمود الإجراءات يجوز طولن علما خلصن

سهير : هيج الظاهر

بصائر : وصلنا للبيت ، نزلت تشكرت منهم ودخلت جوه صاعدة لغرفتي

فتحت باب الغرفة ودخلت ، شمرت الجنطة ورحت اسبح حتى اصحصح واكعد اقره

طبيت سبحت وطلعت ، دابدل وسمعت الباب يندگ
لبست بلوز التراگ وصحت منو

اجاني صوت العاملة ، كتلها تفضلي ، اباوع دخلت هاي الاسمها سجى

سجى : مساء الخير ست

بصائر : مساء النور ، محتاجة شي ؟

سجى : لا ست سلامتج بس حبيت اسألج عندج ملابس اغسلهم الج

بصائر : لا ميحتاج اني اغسلهم

سجى : ليش ست تتعبين نفسج انطيني اني اغسلهم

بصائر : ماكو داعي هن كم لبسة هسه اخليهم بالغسالة
ساعة ويكملون

اخذت ملازمي وكعدت ، اخذي راحتج

شلت راسي لكيتها بعدها واكفه ، اكو شي ؟

سجى : ست ما شاء الله عليج انتِ كلش حلوة حتى احلى من ذيج المسمومة وخواتها

بصائر : ابتسمت شكرًا حبيبتي عيونج الاحلى بس منو المسمومة وخواتها

سجى : والله يا ست خاف احجي وتزعلين

بصائر : احجي ما ازعل

سجى : هاي دنيا وخواتها

بصائر : ليش شمسوياتلج حتى تحجين عليهن هيج

سجى : متكبرات وشايلات خشومهن عبالك هن احسن من العالم وهن لو تباوعين عليهن من جوه استغفر الله من ذنبهن

شايفة هاي الوسطانية مدري شسمها والله ، هاي الضخمة

بصائر : زبيدة ؟

سجى : اي هي هاي ، تنكط سم استغفر الله من ذنبها خو ست دنيا قبل لتتزوجين استاذ حليم كل يوم جايبتها ولازكتها عدنا حتى تحنن كلب استاذ حليم
وتخلي يخطبها بس انتِ عندج بخت وما اخذها

بصائر : وانتِ شمدريج بكل هذا

سجى : غير اني عايشة عدهم واشوف الطالع والطاب يا ست

تدرين والحجي بيناتنه ست دنيا كلبت الدنيا وشكد حاولت تخرب العرس وتقنع ست رميم متخطبج بس الله ما نولها مرادها

بصائر : صدك والله ؟

سجى : وروح ابوية

بصائر : ابتسمت وذبيت الملزمة من ايدي ، كمت على حيلي ووكفت كدامها

تنهدت وجريتها من القميص مالتها ، اسمعيني عزيزتي
هاي السوالف بطليهن ولتحاولين تمشيهن عليه

اني ونسوان حماية نتجازة بيناتنا ، انتِ لتدخلين بيناتنا وتكعدين تنقلين حجي حتى تخربين مثل السوس الينخر بالعظم

لتحاولين تشبچين راس براس ، اني قبل لا اتزوج حليم اختها لدنيا جانت متزوجة يعني مستحيل تصبح وتمسي هنا حتى حليم يخطبها مثل ما
تفضلتي

اما عن شغلة انها ما جانت راضية على زواجي من حليم فهم اني وياها نتجازه انتِ مالج دخل خليج بنفسج والتهي بروحج احسلج

واذا ماكو احد هنا يردج عن القال والقيل الجاي تسوي فآني الاردج واطردج منا واعتقد الي الصلاحية بهذا
الشي ما دام اني جنه بهالبيت

سجى : ست اني اااا انـ...

بصائر : ما اريد اسمع صوتج ، امشي طلعي بره ما اريد اشوف هنا بعد

سجى : صصـ صار ست

بصائر : طلعت ، واني رجعت كعدت ، شمرت الملزمة ولزمت راسي

عجيييب دخيلك ياربي شنو هالبنية ، يعني ذاك اليوم سمعتها تحجي عليه يم العاملات وتستهزأ وتألف عليه حجي ما صاير

يا مغرورة يا مترد عليه من اسلم عليها احسها شادة وياي والخ من التهم الباطلة واني اصلاً راسي ما ملحكة احكه من الدراسة ويني وينها

لا وبعين صلفة جايتني هسه تمدح بيه وتذم بدنيا وخواتها ، صحيح اني ما احب دنيا لا هي ولا خواتها

بس مع هذا ما اكدر عينك عينك اجذب واكول كلام هاي الحية صحيح

لان من تزوجت لليوم دنيا مالها كل شغلة بيه ولا اني الي شغلة بيها كل وحدة بينا ملتهية بحياتها

بس هاي الادبسز تريد تسوي مشاكل وتشعل النار بالبيت

اثاري جمانة كلامها صح من حذرتني منها من البداية

تنهدت ودنكت شلت الملزمة وبلشت ادرس ، لثمانية بالليل خابرني حليم

جاوبته ومن بعد السلام الرسمي الدار بيناتنا بلغني انُ طيارته بعد ساعة واحتمال الفجريات يوصل

سلمت عليه وسديت المكالمة ، شلت راسي وباوعت للمرايه وصفنت بشكلي

باوعت لشعري شلون مخربط ووجهي شلون تعبان من القرايه

اجه ببالي حليم ، يعني هذا الشايف وعايف من يجي يشوفني بهاي الخلقة شراح يكول

بشرفج بصائر يعني انتِ مقتنعة بروحج ، رجعت باوعت للغرفة شلون مهوسه

يله خلي ما اكمل اليوم باجر عندي عطلة عود اكمل بعدين ، رحت لميت هوسة الملازم وعزلت الغرفة وعطرتها

رحت فتحت كنتور حليم حضرتله ملابس حتى من يجي گبل يبدل يسبح ويبدل

كملت كلشي وتفرغت لروحي ، رحت طلعت فستان شتائي بهاري وقصير يصير قالب واحد على الجسم لونه نيلي ، كعدت سرحت شعري وعفته على طولة

خليت مكياج بسيط وغمقت الحمرة ، باوعت لروحي
والله انكلب شكلي رأس على عقب تحولت من سعد لسعاد

كمت وباوعت للساعة جانت بالعشرة بالليل ، كعدت اكلب بموبايلي التهي علما يوصل

بـ12 سمعت الباب ينفتح ، شفته دخل للغرفة
شايل جنطته ويا ، اباوعله بس شافني ضل صافن

ابتسمت حتى امحي التوتر الغلف المكان ، كمت تقربت منه ، بسته من خده ، الحمدلله على السلامة

حليم : الله يسلمج

احم ليش بعدج كاعدة لسه

بصائر : جنت انتظرك

حليم : هاا

بصائر : اي ، متعشي لو انزل اسويلك اكل

حليم : لالا اكلت بالطيارة شكرًا

بصائر : لعد هياتهن ملابسك روح اسبح وارتاح

حليم : ما جان اكو داعي تتعبين نفسج

بصائر : لا بالعكس تعبك راحة

ابتسمت من تقرب باسني من راسي وطبطب على جتفي

حليم : شكراً

بصائر : العفو ، انداريت شلت الملابس دانطيهن اله وشفته يباوع لرجليه

احم الملابس

حليم : اي عاشت ايدج

بصائر : اخذ الملابس ودخل للحمام واني كعدت اراجع القريته مو بأيدي احس بنقص اذا كعدت بدون لا اقره

اباوعله شويه وطلع من الحمام بس جسمه كله منكع يادوب لابس البجامة

نسيت منظرة وركزت بشغلة وحدة الدنيا شته وهو طالع هيج هسه اكيد يتمرض

كمت بسرعة ، هاي شنو ليش طالع هيج هسه عندك زكام

حليم : زكام ؟!

بصائر : مو باوع الجسم بالشته تصير مناعته ضعيفة وانت من تطلع هيج تزيد احتمالية انخافض المناعة عندك وبهالحالة العدوات الفايروسية تدخللك بسهولة عن طريق الجهاز التنفسي

وو هم لـ....

حليم : هوب هوب ، على كيفج افتهم الجاي تحجي بس تفاجئت من كلتي زكام ، احنه هالمفردة ما دارجة عدنه بالعراق

هي لو استبراد لو افلاونزا وحدة منهن لو انتِ كاعدة تراجع محاضراتج براسي

بصائر : هههههه لا والله بس عبالي متعرف شنو يعني زكام فكلت اشرحلك

على كل حال روح بدل او على الاقل نشف جسمك واوكف دانطيك كلاو تلبسه حتى تندفى

دنكت فتحت الجرار وطلعت كلاو ، تقدمت انطيته اله ، دارجع لمكاني وتفاجئت من لزم ايدي

باوعتله باستفهام

حليم : طالعة حلوة اليوم ، هذا اللون لايكلج

بصائر : صدك ؟

حليم : اي ، حلو هذا النوع من التراجي دائمًا لبسي

بصائر : قشعر جسمي من تلمس طرف اذاني باصابعه

ضليت واكفه بمكاني احس صار بيه شلل خصوصاً من نزل ايده وكام يمشي اصابعه على وجهي وشفايفي

غمضت عيوني من جذبني عليه وباسني من شفايفي ، ما كدرت ابادله ولا ادفعه ضليت مثل ما اني لا بادلت ولا رفضت

فاجأتني جرئته وحركاته لكن مع هذا ما منعته جنت حابة نتمم زواجنا ، كل وعبالي اذا تممنا زواجنا راح تتولد مشاعر جديدة بيناتنه

وبسبب تفكيري سلمته زمام الامور وخليته يتقربلي بس رغم إني احبه بس بليلتها ابد محسيت إني ويه
الشخص الصح

تصرفاته ، حركاته ، اسلوبه بالتعامل وياي ابد مجان اسلوب شخص اول مرة يتقرب من مرة

وهالشي ترك بصمة مو حلوة بداخلي تجاهه ، خلصت الليلة الما اعرف شلون بدت وشلون خلصت

كل الاتذكرة انه بعد ما تمم زواجه مني تغطه واندار منطيني ظهره

اتذكر بس كلمة وحدة سمعتها منه قبل لينام

گلي شكرًا

شكًرا على شنو وين كاعد هذا !!

كمت من يمه ، دخلت بوجهي للحمام سبحت واني صافنه مدري شبيه جمدت ، سبحت على السريع
وطلعت ابدل

كملت تبديل واجيت نمت بصفه بس اذا اكول عيني غفت ، ضليت للفجر كاعدة واول ما بلشت عيني
تغفه سمعت صوت الموبايل مالته يمطر اشعارات

بالبداية غلست بس زعجني الصوت وهو غط بالنوم وميسمع ، گمت اخذت الموبايل من يم راسه

ردت انصي الصوت ما تنصى اله افتح البصمة ياله يشتغل وهو موبايله بي رمز ، فتحت الرمز لان
شفته مرة يفتحه كدامي

دانصي الصوت وشفت خمس فيديوات واصلاته من واحد اسمه ليو على الماسنجر

گلبي نغزني ودخلت المحادثة ، صارن كدامي فيديوات ، دخلت عليهن

طلع بوجهي حليم كاعد بالملهى ومكعد وحدة اجنبية بحضنه هو يشرب وهو تبوس بي

طلعت من الفيديو وطبيت الثاني شفت محتواهن كله نفس الشي بس بأيام وامكان مختلفة لان لبس حليم يختلف

اخر فيديو شفته خله معدتي تكلب لان البنية الجانت كاعدة بحضن حليم ربي كما خلقتني

بلحظتها كلشي ما سويت بس اخذت الموبايل ورحت كعدت على القنفة وضليت على نفس الكعدة للصبح

الساعة بالتسعة كعد هو يمط بروحه ، اندار عليه شافني كاعدة ، كام على حيله مشه للحمام وصبح عليه

حليم : صباح الخير

بصائر : ما رديت وهو من شافني صافنه بوجهه وما ادر اجه وكف كدامي

حليم : جاي احاجيج بيج شي ؟

بصائر : فتحت جهازة ودخلت على اخر فيديو ، عليت الصوت ودرت الموبايل عليه

اباوعله كام يبلعم ، من شفته كام يتأتأ ويحاول يبرر لروحه ما تحملت

ذبيت الموبايل على القنفه وگبل كمت وصفكته راشدي

______________________________

زبيدة : كعدت الصبح ، باوعت للغرفة دنيا نايمة على الجرباية وتيم شابكها ونايم

وديمة نايمة بين خالة ودادا بالكاع واني نمت على القنفة ، البارحة ضلينا كاعدين للفجر

طلعنا السوالف الصارلها سنين مضمومة وشكد استرجعنا ذكريات قديمة ، بجينا وضحكنا هواي

ابتسمت ، الله يديم علينا هاي اللمة ، وخرت الغطة وكمت غسلت واخذت حجابي ونزلت جوه

سويت جاي وصبيتلي كوب وطلعت اتمشى بالحديقة ، اباوع الدنيا ماطرة البارحة وصايرة
ريحة الكاع ترد الروح

اخذت رشفه وضحكت من شفت معين يطلع من البيت مهرول

معين : هااا صباح الخير ، هاي شنو خيانة من الصبح

زبيدة : هههههه صباحك ورد حبيبي

هاك اشرب ، اخذ كوبي شرب منه ولف اديه على جتافي ومشه

معين : افيييش

زبيدة : تخبل الريحة مو

معين : تتذكرين من جنه نطلع نتريك الصبح بهيج اجواء يوم الجمعة وتطلع امي وسيلة شايلة طاوة
المخلمة ونتلم كلنا عليها

زبيدة : وانت ابو كرش جنت تاكل جنك مفجوع ، ايييع شكد اكرهك

معين : سكتي اني هم من كمت اتذكر سوالفي تلعب روحي

زبيدة : الفات مات حبيبي ، المهم هسه انت رجعت لفطرتك السليمة الخلقك بيها رب العالمين

رجعت انسان نظيف مو نقي تمامًا بس على الاقل رجعت طيب ، حنين ، تحب اهلك ومتفكر بس بمصحلتك

معين : مرات الظروف الصعبة تكسر بالانسان شي وتصلح شي

زبيدة : فعلاً

عوفنا من الماضي وخلي نسولف على الحاضر ، انت شلونك ، شلون تحس نفسك والاطباء هناك شبلغوك عن حالتك

معين : اني الحمدلله بألف خير

والاطباء بلغوني إني رجعت مثل قبل واحسن ، بس نبهو عليه استمر سنة على تمارين معينة حتى تبقى اعصابي نشطة وهم كلولي لتضغط هواي على نفسك
واني ماشي بنصيحتهم

زبيدة : مبين عليك ، ضربت بطنه الكروش رايح والاوردة مبينه

كلش كلش متغير زغلان وحليان هواي

معين : اي صارلي كومة اتمرن وهناك الجو ساعد بتغيير نفسيتي للافضل

بس انتِ عكسي ، احسج ضعفانه شنو تاكلين بالدين

زبيدة : لا بالعكس بس انت تدري بيه ساعات تجيني حالات واكطع الاكل بدون سبب

معين : ادري دائمًا تجيج حالات بس عمرها ما جانت بدون سبب

زبيدة : انساني هسه وتعال عندي سؤال ، انت عادي تركض

معين : اي اكدر

زبيدة : لعد يله خلي الكوب هناك وانزع حذائك وانطيني ايدك وخلي نركض ، كمشت ايده وركضت وهو يركض وياي ويضحك

معين : ههههههه مو صاحية انتِ والله

زبيدة : وكفت ولزمت اديه ، هههههه تعال مشتهيه نسوي شدة ياورد

افتريت وهو يفتر وياي ويقهقه ، اخر شي دخت ووكفت اخذ نفس وهو اجه شالني وفرني

معين : تتذكرين من كتلج اذا طبت اله اشيلج وافرج هاي شوفي

الله كتبلي عافية وكدرت اشيلج شوفي شوفي

زبيدة : ههههههههه ولك راح توكعني نزلني نزلني موزين الثگل على رجليك

نزلني واني حضنته وبوسته ، حبيبي معين فرحانه بيك هوووواي كلش هوووواي

معين : حبيبتي انتِ شكد حنينه

زبيدة : ابتعدت مبتسمة ، اني مو حنينة بس احبكم

معين : واحنه كلنا نموت عليج

زبيدة : كافي يله لتخجلني

معين : ههههههه ومن شوكت انتِ تخجلين

زبيدة : اووو من زمان ، حضنته وهو حاوطني ومشينه نسولف

داسولف ويه معين ومنطلقة وحسيت بأحد يباوعلنا ، رفعت راسي بسرعة وصارت عيني بعينه واكيد ميحتاج اكول منو

اباوعله شايل كوب ومستند على محجر البلكون يشرب ويباوعلنا ، بين من الوضعية مالته انه مو هستوه اجه

شفته رفع ايده سلم على معين ودخل جوه

تنهدت وانداريت لكيت معين رافعلي حاجبة

معين : هاا ولج شو تتحسرين

زبيدة : اتحسر شنو جاي ادفي روحي بردت الدنيا

معين : هال دامشي امشي ، بالمناسبة انتظر منج تحجيلي كلشي

زبيدة : احجيلك عن شنو

معين : امشينا ندخل هسه لان وجهج صدك كلب لونه من البرد بعدين نسولف

زبيدة : شلت الكوب من الكاع ولحكته للبيت ، دخلت لكيت البنات كاعدات وخالة ودادا بالمطبخ ديسون ريوك

صبحنا على الكل وكعدنا نتريك

اباوع لدنيا حاطة تيم على الميز وتجيب وتحط بحلكة وذاك مكيف ومستمع ميلحك يبلع اللكمة تركعه بالثانية

وئام : على كيفج يمه خنكتي الطفل

دنيا : شنو ؟

وئام : خففيله اكل موزين على صحته صايرة عنده سمنة

دنيا : ياا منيله والله بس خدود

دادا : لعد وهاي الزرور منين بعد امج

دنيا : يو يدادا صلو على النبي شلون بيه اني اخلص من حليم تطلعولي انتو

وئام : عود عبالج هيج حلو تره موزين

دنيا : هي خالة كلتلي ولدها كلهم جانو هيج ومن كبرو ضعفو وحدهم

فخلي ابني يتسمتع بطفولته عود بعدين من يكبر يضعف وحدة

زبيدة : خربت ضحك عليها لبست الوضعية ورجعت توكله وهو بعد روحي عنده شهية حلوة وياكل
ما شاء الله عليه

واني من اشوف الخدود تنتفخ من اللكمة اسناني تضل تحكني واريد اعضه بس اخاف لا هاي المسودنه تسوي عليه عزاء

كملنا ريوك وكعدنا بالصالة ، ندست ديمة ، شبيج

ديمة : خالة حبيبتي ضلت وحدها البارحة واليوم اني هنا منو حيطبخلهم

زبيدة : عمت عين الندارة

دنيا : الله يرحم ايام زمان جانت كلاص المي متجيبه لروحها هسه صايرة ام بيت

ديمة : لعد شلون غير عندي عائلة ومسؤولة مني

معين : عمت عينج

ديمة : ههههههه يااا شبيكم والله احجي صدك

حتى اسألو خالة ، هي تطبخ الغدة بالدوام واني بالعطلة اسوي الغدة وبالايام العادية اسوي العشه
واعزل البيت واغسل الملابس كلشي اني اسوي

وئام : وانتِ ليش تضغطين على روحج يا امي مو انتِ مريضة وموزين تضغطين على روحج

ديمة : لالا بالعكس اصلاً كلش متونسه اني وخالة حبيبتي معايفتني بس اني اتونس بالشغل صايرة
فكلش عادي متعايشة ويه الوضع بكل سلام

دنيا : ابتسمت حبيبتي الله يهديهم الج ويهديج عليهم

ديمة : اللهم امين

زبيدة : اكول خالة على طاري الطبخ شراح تسوون غدة

وئام : والله بعدني ما ادري ، شتكولون نشوي سمج من بره

معين : لا دخيلكم اني لعبانه روحي من السمج

دادا : لعد شتردين حبيبي كول شمشتهي واحنه نطبخلك

معين : اريد تمن ومرك ميهم بس كون تمن ومرك صارلي شكد ما ماكل اكل عراقي وهناك عيسى جان يجيبلنا اكل عربي بس مو نفس اكل البيت

وئام : ما دام هيج لعد حسوي سبيناغ ، شلون سبيناغ يخبل جابو البارحة ويه المسواك جديد فخلي نسوي

معين : اويلي اي يمه بروح ابوج

زبيدة : خالة خلي اسوي اني السبيناغ يرادله وكفه وحمس كومة واحنه هواي فلتعبين نفسج اني اطبخ

وئام : شيعجبج سوي زبد انتِ فصلي واحنه نلبس

زبيدة : حبيبتي خالة

معين : تدرين مشتاق لطبخج خرب يومج شكد اكلج طيب

زبيدة : غمزتله متشوفني كلت اني الراح اطبخ ادري بيك حنيت لأكلي الماكو منه

ديمة : ما شاء الله زبيدة شكد متواضعة انتِ

دنيا : ماكو هيج اصلاً تخرخر بساطة وتواضع

زبيدة : ضحكت وكمت للمطبخ ، طلعت السبيناغ غسلته وكعدت اسوي فقرتي المفضلة بطبخ هالاكلة

الثرم يربي فد شعور بالراحة يجيني من اثرم السبيناغ
عبالك كاعدة العب مو اطبخ

ضليت اشتغل وهمه اجو يمي كعدو والله مرات احس روحي بزونه وهمه جهالي يفترون وراي

اتذكر احنه جنه هيج ويه امي والظاهر من هي توفت اخذت اني مكانها

ديمة : اساعدج زبد

زبيدة : لا گلب استريحي

كملت ثرم وكمت اركب الطبخة ، كملت كلشي ويه اذان الظهر ورحت صليت قبلهم كملت ونزلت

داروح للمطبخ وسمعت الجرس يندك ، شفت تيم كمز من القنفة صحت بي اكعد لا اجي اعضك

رحت فتحت الباب صار هارون بوجهي

هارون : السلام عليكم

زبيدة : باوعتله شايل صينية بيها اكل ، رديت عليه وعليكم السلام

هارون : هذا ثواب مسويته بيبيتي اليوم وكلتلي اجيبه الكم

ييـ يعني مو اني كتلها هي وصتني

زبيدة : صدك

هارون : والله

زبيدة : اوك عاشت ايدك وكللها الله يجعله واصل ، اخذت الصينية واجيت اطب وهو حاجاني

هارون : اريد المواعين

زبيدة : رفعتله حاجبي ، ليش ؟

هارون : مو اني ههـ هي وصتني ارجعهن

زبيدة : اي روح واني اجيبهن بعدين

هارون : لا ماكو مشكلة انتظرج حتى اخذهن

زبيدة : اي ثواني

دخلت جوه واني اهز براسي ، ااااخ منك نعلون اااخ

طبيت للمطبخ وطبت وراي دادا تخرمش بخدودها

ام حسن : عزه العزاني ولج متستحين عايفة رجلج بالباب حتى ما كتيله تفضل

زبيدة : غسلت المواعين بعد ما فرغتهن وباوعتلها ، نسيت اكله تفضل

هاج هاي المواعين وديهن اله حيموت اذا راح بدونهن
خليتهن بالصينية وشلتها دانطينها الها وسحبتها بسرعة

ام حسن : ياا شبيج ولج

زبيدة : لحظة ، نزلت الصينية وركضت جريت الچفچير والچمچه ، فتحت الجدور

كلبت التمن خليت شويه وطلعت كرصة الحكاكة قسمتها وخليتها بالماعون واخذت الطاسة ترستها
مركة سبيناغ وخليها هي والتمن بالصينية

ام حسن : شجاي تسوين ولج

زبيدة : اوكفي ، طلعت الخضرة والفجل خليتهن بالماعون وشلت الصينية ، تفضلي انطيهن اله

ام حسن : دجيبي يالمسودنه

زبيدة : اخذت الصينية وطلعت واني فتحت شباك المطبخ وباوعتله اخذ الصينية وهز راسه ومشه

اباوعله من ابتعد عن باب البيت وكف اخذ شويه من الحكاكة غمسها بالمركة واكلها ياله مشه

ابتسمت وسديت الشباك ، انداريت وعطت من شفت دنيا وراي

انتِ شبيج جنج ابو الجنيب كل ساعة كامزتلي بمكان

دنيا : ما مرتاحتلج اني

زبيدة : اي ولترتاحيلي عشتو

امشي ساعديني بالصب مابيه حيل اصب وحدي

دنيا : لعد لحبيب الگلب الج خلك ومن توصل يمنه مالج خلك

زبيدة : شو انتِ صايرة هيلك

دنيا : رجاءً لتتجاوزين اني ام تيم العلم ما اسمحلج

زبيدة : اكو حركة جان يسويها هارون لو ما استحي جان سويتها الج بس اخلاقي متسمحلي

يله تعاي ولتلغين زايد

اجت تصب وياي وكل ساعة ذابتلها حجايه واني مغلسة

كملنا صب ورحنا تغدينا ، كملنا وكعدنا نشرب جاي بالصالة وندردش

خلص اليوم ركض ركض واجه الليل وما حسينا بي، وبالليل التمينا بعد ما صاحلي خواتي لان معين يريد يحاجيني ، رحت كعدت كدامه وهو بلش يحجي

معين : حبيبتي زبيدة اني اعرف انُ مو محلها نحجي بهذا الموضوع

بس تره اني ادري بكل المشاكل الصارتلج بالفترة السابقة وقبل لتسأليني دنيا سولفتلي كلشي

دنيا : اني اسفة زبيدة ما كدرت ما احجي لمعين

زبيدة : لا عادي هو بكل الاحوال جان راح يعرف بس اني ما ردته بذيج الفترة ينشغل بمشاكلنا هو البي كافي

معين : اني صح جنت بعيد بس كلشي ادري والله ينطي دنيا العافية من جانت تخابرني وتحجيلي شي

والا اني لو اعتمد عليجن كلشي متحجن الي وتقلقني فوك ما اني قلق

المهم مو هذا موضوعنا ، زبيدة انتِ متأكدة من قرارج

زبيدة : اي

واصلاً لوما العراقيل الجان ديسويها الي جدي جنا من زمان اني وهارون منفصلين

معين : اني ما راح اتدخل بالنهاية هاي حياتج وانتِ حرة بيها

بس الاريد اعرفه اني شنو المطلوب مني هسه

زبيدة : تحاجي جدي يفك ياخه عني وميضل كل ساعة مطفشلي محامي

6 محاميين خليت وشردهم مني ، مللني وجزعني وهو يحاول يلوي ذراعي بهاي السوالف

فياريت لو تحاجي وتخلي يجفيني شره

معين : وبعد شتردين

زبيدة : اريد نطلع منا ونعيش بغير مكان ، اني ما اكدر اكمل حياتي هنا

معين : نرجع لبيتنا اليم بيت ديمة ؟

زبيدة : ما اعرف بكيفكم المهم إني ما ابقى هنا

معين : طيب خليني احجي ويه جدي واشوف شلون اتصافى ويا

زبيدة : ومنا لحد ما تتصافون اني مضطرة اروح ابقى يم خالتي منا لمن تقررون تنتقلون ارجع

معين : ليش زبيدة شنو السالفة قابل منو يكدر يدنالج واني موجود

زبيدة : مو هيج السالفة بس اني ما اريد ابقى هنا وانزعج فالافضل إني اروح

واليوم هم ما اريد ابقى هنا اكثر واذا على شوفتكم فكل اسبوع نتجمع ونطلع لفد مكان سوه ونتونس
وهيج نكدر نتشاوف

عود من الله يسهل عليكم وتكدرون تطلعون منا ارجع استقر وياكم

معين : اذا هذا الشي يريحج فعلى راحتج حبيبتي

زبيدة : شكراً لان تفهمتو وضعي واحترمتو رغبتي

كمت وهسه تعذروني مضطرة اروح

معين : هسه ؟ صدك تحجين انتِ عمي وين كاعدة انتِ بالشارع ، دروحي نامي وباجر الصبح طلعي

وئام : اي يمه صدك شيطلع بهالليل عاد خليها الصبح
وعلى نور الرحمن طلعي

زبيدة : لا فدوة ما دام ستوها ليلت خليني اروح
هنا اختنكت وهم ما اكدر اعوف خالتي أكثر

وبعدين محروح وحدي السايق راح يوديني

معين : شريد اكلج على راحتج

زبيدة : صعدت فوك بدلت واخذت جنطتي ونزلت بوستهم وسلمت عليهم وطلعت بره

وكفت بنص الحديقة واخذت نظرة على البيت كله ، ما اعرف اذا طلعت منا راح ارجع اشوف هالبيت بعد لو لا

باوعت للورد الاحمر وابتسمت ، تقربت منهن مسحت عليهن ودنكت شميتهن

ابتعدت متنهده ، شكد تعبت بهذا البيت بس هم ما انسى إني عشت بي ايام حلوة راح تبقى مطبوعة بذاكرتي

عفت الورد وتمشيت ، اجاني صوته بگفاي

هارون : راح ترحين ؟

زبيدة : باوعتله ، اي

هارون : راح ترجعين تجين مرة ثانية ؟

زبيدة : رفعت جتافي ، الله اعلم بس ما اعتقد

هارون : يعني راح تستقرين ببابل

زبيدة : لا بس راح ابقى هناك منا لمن اهلي يشيلون واروح اكعد وياهم

هارون : احم ، يعني هاهي ماكو امل بعد ؟

زبيدة : بخصوص شنو ؟

هارون : بخصوصنا

زبيدة : تؤ هم ما اعتقد

هارون : عمري ماتوقعتج قاسية لهالدرجة

زبيدة : الفضل الك انت العلمتني اصير هيج

رمش عليه السايق ، رفضت المكالمة وباوعتله ، السايق دگ عليه لازم اروح من رخصتك

اباوعله مدلي ايده

هارون : مع السلامة زبيدة

زبيدة : عضيت شفتي وتقدمت خالة ايدي بايده ، صافحته وابتسمت الله يسلمك

سحبت ايدي منه ومشيت متوجهه لباب الخروج

دامشي وسمعته يصيحلي

هارون : زبيدة

زبيدة : انداريت عليه ، نعم ؟

هارون : اني احبج

*************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

حبيباتي بنات انوب من اريد انزل بارت انزل ستوري على الانستا ابلغكم واكلكم تره اليوم اكو بارت وباليوم الي ما انزل بي شي معناها ماكو بارت ، اتمنى تكونون فهمتو قصدي❤️

.