الموت الحي الفصل الثالث وثمانون 83 - بقلم براء الموسوي

مرحبا حبايبي العسل شلونكم ❤️❤️

•••••••••••••••••••••••••

ارْحَم نَفسَك من الحِقْدِ فإنّه عَطَب نارٌ وأنتَ الحَطَب.

•••••••••••••••••••••••••

#الموت الحي
#للكاتبة براء الموسوي

زبيدة : كاعدة ارتب الملابس ودخل هارون ، حاجيته بدون ما اشيل راسي

هااا حبيبي الله يساعدك ، ليش تأخرت صارلي هواي داتصل عليك ومترد عليه ، قلقتني

ما سمعت صوته ، شلت راسي وباوعتله ، تفاجئت من شفت وجهه مگلوب

ذبيت الي بأيدي وكمتله ، شبيك حبيبي ليش ساكت

اباوعله رفع ايده مسح على شعري وتنهد

هارون : زبيدة بدلي ملابسج ولحكيني لجوه

زبيدة : نبرة صوته ما ريحتني ، ليش ؟

بلع ريكه وجاوبني بتردد

هارون : ديمة ، سوت حادث وو واحنه لازم نروحلها للمستشفى وفورًا

زبيدة : بهت وجهي من سمعته ، ييـ يا ديمة هاي؟ بس ديمة اختي !!

على بختك هارون اختي سووت حادث ، يمته ،شوكت متحجيييي شبيييك

هارون : ما اعرف بس معين ستوه خابرني وبلغني انُ اكو ناس متصلين عليه ومبلغي

زبيدة : احس الدنيا ضاگت بعيني ، دفعت هارون وركضت البس وجسمي يرجف مثل السعفة من الخوف

اممـ امشي اخذني للمستشفى بسرررررعة هارووون بسرررررعة

طلعت اركض ويا ودكات گلبي تسابق خطواتي ، دخيلك ياربي دخيلك كلشي ولا اهلي

هايييي شبيييك هارون لييييش تسوق على كيييفك رايييحن لحفلة احننننه سوووق اسررررع شنو تمشيييي على بييييض

هارون : طيب طيب راح اسرع بس حاولي تهدأين

زبيدة : عوفني معليك بيه ، حضنت اديه وبجيت يارب دخيلك كون مابيها شي يارب فدوة لأسمك
كون اختي بخير

طول الطريق لساني يلهج بالدعاء ودمعتي على خدي ما نشفت ، وصلنا للمستشفى واني نزلت اركض وهارون ورايه

ووينها وينهااا بأي غرفة بأي طابق

هارون : اوكفي خلي اخابر معين

الووو هاا معين انتو وين ، اي هاي وياها يمي ، ماشي ماشي

زبيدة : هااا شكلك

هارون : تعاي وياي

زبيدة : مشيت وياا مثل التايهه ، صعدنا للدرج نركض وصلنا للممر وشفتهم كاعدين هناك

اباوع لمعين يفتر بالممر ولازم راسه ودنيا حاضنه انها ودادا وتبجي

رحتلهم ابجي ، ششبيها ديمة شبيها

كامتلي دادا حضنتني

ام حسن : ادعيلها يمه ادعيلها

زبيدة : ابتعدت احاجيها وحلكي يرجف من الخوف ، ححـ حالتها موزينة ؟

هزتلي راسي بإيجاب

ززين ششـ شلون سوت الحادث

معين : كل النعرفه اكو سيارة حمل ساحكتها وهي تمشي والناس الخيرة جايبيها للمستشفى

وهاي صارلها تلث ساعات جوه ولحد الان ماطلع الدكتور من يمها

بس قبل شويه طلعت الممرضة وكلتلنه وضعها حرج

زبيدة : لزمت راسي ، لا يربي لاا

دنيا : ياربي منين اجتنه هالمصيبة ، تعبنا والله تعبنا من الهم وجزعت رواحنا

حمزية : حرام يمه لتحجين هيج هذا جزع وميجوز كولي يا الله وادعيلها

دنيا : يارب تكوم بالسلامة يارب

اباوع للكل منهار ، امي ودادا حالتهن حالة ، معين يبجي مثل الجهال وزبيدة جنها ضايعه وبس ترجف

حرت ياربي حرت اواسيهم لو اواسي روحي

ضلينا كاعدين ونلوب ، نريد بس واحد يطلع ويطمنا عليها وماكو

تالي بعد ساعة طلع الدكتور من العناية

كمناله نركض

معين : هاا دكتور بشرنا

زبيدة : ملامح الدكتور ابد مجانت تبشر بالخير وهالشي خلانا كلنا ندخل بأنذار وعيونه على حلكه نريده ينطق ويبرد گلوبنا

وئام : احجي دكتور والله گلبي راح يوكف

الدكتور : اول شي اريدكم تهدئون وتستوعبون الكلام الي راح اكوله

المريضة اجتنا جدًا متضررة من الحادثة وللأسف شدة الضرر ادت لتلف احدى الكليتان عدها
بالإضافة لتمزق بالطحال

وسبب تأخر نقل المريضة للمستشفى وتفاقم هذا الضرر اضطرينا نشيللها الكلى اليسرى هي والطحال

وهم يؤسفني ابلغكم انها متعرضة لصدمة سببتلها سكر من النوع الاول

زبيدة : غمضت عيوني وبجيت ، مو هذا الردت اسمعه منك دكتور مو هذا

وئام : ولج يمه سودة بوجهي عليج منين اجاج كل هذا منين

النوح : اللهم إني لا اسألك رد القضاء لكني اسألك الطف فيه دخيلك يا إلهي دخيلك

الدكتور : احمدو الله وشكرو لان الحادث جان كلش جبير والحمدلله من طلعت منه بنتكم عايشة

والصارلها تكدر تتعايش ويا ، هي محظوظة انها ما خسرت اطرافها ولا فقدت بصرها ولا ادراكها بسبب
الحادث

اعرف الصار مو سهل عليكم بس مع هذا لازم تتعاملون ويه الموقف بعقلانية وتساعدون المريضة
تتخطى الصار

دنيا : زين دكتور عوفك من كل هذا اختي شلونه وضعها هسه

معين : اي اي دكتور ششلونه وضعها راح تعيش مو

الدكتور : الحياة بيد الله سبحانه وتعالى بس خلي اطمنكم انها تقريبًا بخير

بس حاليًا راح نبقيها بالعناية المركزة ومنا لمن تتخطى مرحلة الخطر بشكل كامل عود ننقلها لغرفة خاصة

نتنمالها الشفاء بأسرع وقت ، من رخصتكم

زبيدة : كعدت وصميت حلكي كاتمه شهكاتي ، يروحي
يدمدم هاي شصاير بيج

متستاهلين هالاذية والله متستاهليها ، عسى هالحادث بيه ولا بيج يا گلبي يا حنينة

حسيت بأيد تشدني عليها ، حضنته وبجيت من كل كلبي

هارون : خليج قويه حبيبتي وكولي يا الله

زبيدة : شلون تريدني اصير قويه واختي خسرت كلتها وطحالها وفوك كل هذا تفاقم عليها السكر

حموت من القهر عليها هارون حموت ، ابتعدت احاجي ، تتذكر من كتلك گلبي صارله ديوجعني
واحس روحي مختنگه

اثاري گلبي حاس يهارون حاس إنُ حيصير شي يوجعه وفعلاً صار هالشي

هارون : خلص حبيبتي خلص ، مو مهم هي شنو فقدت المهم انها عايشة وان شاء الله راح تتخطى
الصار وتكمل حياتها وانتو حواليها متعوفوها

ما راح تعوفيها انتِ زبد مو

زبيدة : هزيت راسي بنفي واني ابجي

ما اعوفها والله ما اعوفها

__________________________________

بصائر : وكفتني سيارة حليم ببيت اهلي ، فتحت الباب ونزلت اركض

دكيت الجرس بسرعة ، ايد على الجرس وايد على الباب

انفتحت الباب ودخلت اركض ، لاكتني امي

هناء : شبيج يمه شجاج تلهثين

بصائر : امين وين

هناء : اجه الصبح گلي ذبيت ديمة عد أهلها وطب نام شكو شبيج

بصائر : عفتها ورحت اهرول للغرفة ، فتحت الباب ودخلت لكيته متمدد بس كاعد منايم

دار راسه عليه باوعلي وغمض عيونه

امين : نعم بصائر شتردين

بصائر : انتتت ويييينك صارلنااا من الظهر ندگ عليك وانتتت ماكووو

امين : خير شتردون

بصائر : رديت الباب وتقربت منه

امين انت شسوي لديمة ؟

امين : هاي شبسرعة لحكت السالفة توصللكم

بصائر : سالفتيش امين ، البنية ساحكتها سيارة بنفس المنطقة الخابرتني البارحة كتلي اشتريت بيها
شقة

احجي شسويت للبنية اني الفترة ذيج كلها ساكته وحاطة گلبي بشيشه لتروح تسويلها شي بعد ما عرفت بسالفة راسل وهبه

تالي اتفاجئ اليوم بهذا الخبر ، شسويت انت امين شسويت وليش ديمة انسحكت بنفس الشارع الحجيتلي عنه انت البارحة

امين : لحظة لحظة منيه المسحوگة

بصائر : ديمة امين ديمة ضاربتها سيارة وهسه خابر يوسف حليم گله وضعها كلش حرج وابد مو زينه

اباوعله فز من مكانه وكام بسرعة يلبس بقميصه

امين : امشييي امشييي ، بيا مستشفى هي متحجيييين شبييييج

بصائر : امشي حليم واكف بره هو ياخذنا ، ركض هو فتح باب الغرفة وصفن من شاف امي بوجهه

هناء : انتظروني البس عبايتي واجي وياكم

بصائر : يمه

هناء : اشش ما اريد اسمع كلمة منكم مو وكت الحجي هسه

بصائر : راحت امي بسرعة لبست واحنه طلعنا ويه حليم

حليم : متگلي وينك من خرب غيرتك اذا عندك غيرة طاحت ايدي واني ادك عليك ومتجاوب

المن مشتري موبايل اذا ماستخدمة متگلي المن

امين : انجب وسوق وانت ساكت تره البيه كافيني ما ناقصك

بصائر : وصلنا للمستشفى ونزل امين وامي يركضون واني وحليم وراهم

اباوع لأمين صعد على الدرج يركض واني وامي لحكنا هو وحليم بالمصعد

وصلنا للمكان الي بي ديمة ، لكيت امين واكف يم معين مخبوص ويسأله عنها

امين : شبيها شبيها

معين : عايشة تحت رحمة الله

يوسف : اهدئ امين شجاك

امين : اني هادئ بس فهموني شبيها

وئام : استئصلو كليتها وطحالها ، انتتت وييينك عنهاا ويييينك

من الصبح وهسه ظهر ما افتقدت مرتك ما كلتتت وينهااا ما وينها اكلت شربت تزقنبت صار عليها شييي
وهييي بالكلية

زبيدة : لحظة خالة لحظة ، هو اليوم مو جمعة !!

دنيا : اي صح اليوم جمعة يعني ديمة ماعدها دوام اصلاً

زبيدة : كمت على حيلي وكفت گبال امين ، امين اليوم عطلة والمفروض ديمة تكون بالبيت

معقولة هي من الصبح لحد الان هي مموجودة وولا واحد بيكم استفقدها

يوسف وهارون والكل يتصل عليك جهازك مغلق ولوما يوسف يبلغ اختك تاخذ رجلها وتجي لبيتكم تبلغكم مجان دريتو

النوح : حفيدتي من الصبح وهسه عصريات الدنيا وهي مو ببيتك ، وين جنت عنها ؟

وئام : واني اعرف بتي مستحيل تطلع من باب البيت بدون متنطي خبر لعمتها

زبيدة : خالة ديمة بلغتج قبل لا تطلع من البيت ؟

هناء : لا وامين من البارحة اخذها وطلع واليوم الظهر من رجع وسألته عنها گلي ذبيتها عد اهلها

زبيدة : باوعت لأمين ، هااا امين شنو فلمك ما ناوي تحجي

بصائر : انتِ شهالاسلوب الجاي تحجين بي

زبيدة : انتتتتِ اشششش لتدخلين وخليج خارج قوس

جاوب امين ليش ساكت وين اخذت اختي وليش صارلها كل هذا ومن الاساس ليش جذبت وكلت انك ذبيتها عدنا

بصائر : اباوع لأمين وجهه صار اصفر وميعرف شيرد على زبيدة

امين : زبيدة الله يخليج مو وقت النقاش هسه ، اختج بالعناية خلي تتعدى مرحلة الخطر وشتردين تسأليني سألي راح اجاوبج ما طاير اني

زبيدة : اي فعلًا صدك انت وين حتطير

بس اقسملك بالله يا امين اذا طلع الك سبب من الي صار ويه ديمة ولو ذرة محد يرحمك مني والله محد يرحمك

جرني معين من كدامه

معين : كافي زبيدة

زبيدة : شنو هو الكافي معين متشوف الوضع شلون يثير الشك لا والزاد الطين بله وجهه الصوفر وارتباكه الواضح من حجت خالة هناء لا

هارون : تعاي زبيدة امشي وياي

زبيدة : عوفني هارون

هارون : كلتتتت تعاييي

زبيدة : جرني من ايدي ومشه ، مشيت ويا واني افور

هارون : هذا مو اسلوب تحجين بي ويه رجل اختج

زبيدة : يا اسلوب يا صخام هارون ، اختي بين الحياة والموت ورجلها من البارحة چان وياها وهسه من نسمع بالحادث تطلع جانت وحدها وهو ما موجود

لا واليفت الگلب اكثر انه مجذب على امه وكايللها انُ ديمة عدنه وههـ وهي اصلاً مو يمنه

نزلت دموعي واني احجي ، تعرف گلبي دينمرد واني اتخيلها تمشي بالشارع وحدها واجتها السيارة لا بيها ولا عليها ضربتها

شگالت روحها بلحظتها وشلون تحملت كل هذا الألم ، زين هي بسرعة فقدت الوعي لو ضلت تتلوى من وجع عضامها

اذا جانت واعيه شلون كدرت تتحمل هالكم من الألم
هارون احنه لسه نار بسيطة منكدر نتحملها هي شلون
كدرت تتحمل وجع جسمها

شلون كدرت تسمع صوت عضامها وهن يتكسرن لو صوت جتفها وهو ينخلع اثر الضربه القوية

اني حتخبل هارون والله حتخبل مدابطل اتخيل شكلها وتخيلاتي تعبتني والله العظيم تعبتني

هارون : خلص يگلبي خلص ، عيونج الحلوة راحت من البجي

زبيدة : حضنته وشهكت ، خايفة عليها هارون ميته خوف

هارون : ان شاء الله مابيها شي وتكوملكم بصحة وسلامة

زبيدة : آمين يارب آمين

هارون : تمشين نرجع بس توعديني متنفعلين وتنتظرين ديمة تصحى ياله تحجين بكل الأمور التخص حادثها

زبيدة : مسحت دموعي ، خلص وعد مراح احجي شي

باسني براسي وحضني ومشه ، مشيت ويا راجعه لغرفة العناية ، كعدت وهو كعد يمي يمسد على اديه

واني عيوني على الباب واندعي تتجاوز مرحلة الخطر ويطلعوها منا

ضلينا كاعدين گبال غرفتها لثاني يوم وماكو اي تحسن بحالتها

للظهر ياله بلغنا الدكتور إنها تجاوزت مرحلة الخطر وصار وضعها طبيعي وراح يطلعوها لغرفة خاصة

هناء : يمه حليم امشي اخذني للبيت اجيب ملابس لديمة خاف تكعد وتحتاج ملابس

حليم : اي خالة بعيني يله امشي

بصائر : اخذوني وياكم اني تعبت بعد مابيه اوكف

زبيدة : راحت ام امين ودمعتها خدها ، خطية كسرت خاطرنا البارحة بس تبجي

وميحتاج اكول هي وديمة شكد متعلقات ببعض ، وديمة تموت عليها لدرجة حتى متقبل تبات عدنه علمودها

خطية بيت جدي من اطمئنو على ديمة راحو يرتاحون ويرجعون همه وبيت عمو يحيى

البقى بالمستشفى خالة ودادا ودنيا ويوسف وامين واني وهارون الباقين كلهم راحو

اباوع لديمة حبيبتي حاطيلها رقبة ولافين رجليها واديها سودة عليه تكسر الخاطر

تنهدت وحمدت الله وشكرته ، المهم تكون عايشة وماعدها اعاقة

دنيا : حبيبي انت ارجع علمود تيم واني حبقى هنا

يوسف : لا ما اروح باقي وياج واذا على تيم فلتخافين عليه باقي يم سهير وسهير متحتاج توصية

دنيا : هزيت راسي وتنهدت

ضلينا كاعدين يم ديمة ، مر وقت وانتهى مفعول المهدئ عنها وكعدت تبجي وتون من الوجع

اجه الممرض مدري شنطاها بحيث رجعت هدأت ونامت واستمر نومها لثاني يوم

وهيج استمرينا 3 ايام بالمستشفى وباليوم الثالث ياله كعدت ديمة

...

ديمة : نايمة واسمع اصوات ضجة داير مدايري بس مداكدر افتح عيوني واشوف شي

شويه شويه بديت احس وياريتني محاسه لأن اول ما استوعبت بدت الآلام تحاوطني من كل صفحة

صحت بوجع احس روحي تلوب من الالم ، شويه وحسيت بشي بارد يدخل جسمي

فتحت عيوني على كيفي وغمضتهن بسرعة من صدح ضوه قوي اذاني

رجعت مرة ثانية فتحت عيوني واسمع صوت زبيدة يحاجيني ، حركت عيوني بالمكان

شفت نفسي بغرفة لونها ابيض واهلي دايري مدايري
من بين الكل ما ركزت الا على ذاك اللابس اسود وواكف بباب الغرفة يباوعلي وعيونه تبث خوف

دمعت عيوني واني استرجع كل الصار وبدون شعور دموعي اخذت طريقها تزين خدودي

دنيا : حبيبتي ديمة ، يگلبي انتِ شبيج تبجين يوجعج شي اكو بيج شي

معين : لحد يحاجيها اني طالع احاجي الدكتور

زبيدة : طلع معين يركض جاب الدكتور واجه

الدكتور : هاا سلامات باباتي سلامات ، شلونها الحلوة

شو اشوف عيونج ، يله خلي اشوفج شاطرة بالرياضيات ذني شكد بله

ديمة : عيوني عليه وجاوبت الدكتور ، أربعة

الدكتور : وذني ؟

ديمة : واحد

الدكتور : حركي رجليج

ديمة : حركتهن وونيت بألم

الدكتور : جاي تحسين بيهن ؟

ديمة : اي

الدكتور : واديج حبابه هم حركيهن ، عفيه ورد انتِ

ديمة : سويت مثل مگال وحسيت بيهن

كمل الدكتور فصح وتحمدلي بالسلامة وطلع

حسيت باهلي اجوي بوسوني وحضنوني

زبيدة : بعد عمري الحمدلله على سلامتج

وئام : يمه حبيبتي شتحسين يبعد امج خوما لسه متوجعة

ديمة : بلعت ريكي وحجيت ، زبيدة سسـ سدي الباب و تتـ تعالو كلكم قريب مني اريد احجي وياكم

اباوع لزبيدة راحت سدت الباب واجتي هي والكل تقربو مني

تحمحمت حتى يطلع صوتي عدل وبديت احجي

ااني ققـ قبل تلث سنوات ونص تتـ تعرفت على ولد وياي بالجامعة اا اسـ اسمه راسل

دنيا : صميت حلكها بخفه وهمستلها ، شبييج ديمة حبيبتي شجاي تحجين انتِ

ديمة : وخري ايدج وخليني احجي

يوسف : عوفيها دنيا ، كملي حبيبتي شتردين تكولين

ديمة : الولد الجنت احبه جان خخـ خريج هندسة معمارية نفسي وجاي يدرس ماستر بجامعتي

تعرفت عليه وبمرور الأيام حبني وحبيته وعرض عليه الزواج من اول ما اعترفلي واني الجنت ارفض بسبب ظروفنا بوقتها

كحيت بألم وكملت ، هذا الولد اني ثقيت بي لان جانت نيته صافية وياي فـ نزلت دموعي

فمن كد مجنت اثق بي كمت اامن اطلع ويا لمكانات عامة واكعد ويا كدام الناس

تطورت علاقتنا ووصلنا لمرحلة كمنا نخطط لزواجنا واول مرة انفردنا اني من اخذني لشقة گلي انه اشتراها حتى من نتزوج نعيش بيها

ببـ بس الله شاهد عليه والقران الكريم راسل ما لمسني ولا صارت بيني وبينه علاقة بالحرام

دنيا : كافي ديمة الله يخليج اسكتي

ديمة : عوفوني احجي رجاءً

باوعت لأمين ورجعت اكمل ، بنفس الوقت الجنت مرتبطة بي براسل جان عندي صديقة اسمها هبه

هاي هبه جانت صندوق اسراري واكثر وحدة اامن بيها بالدنيا جنت عادتها وحدة من خواتي وعمري ما خيرتهن عليها

بمرة من المرات اخذني راسل للمطعم وگلي انه عازمني ومن رحت شفت مرة جبيرة بالعمر وبنات اثنين من عمري

بيومها عرفني عليهن وگلي أن هالمرة امه والبنات ذني خواته

متتخيلون بوقتها شلون طرت من الفرح واني اشوف الانسان الحبيته نيته صادقة ويايه لدرجة انه يعرفني على امه وخواته ، عرضه وشرفه

شهكت وكملت بعد لقائي بأهل راسل تقوة علاقتي بي اكثر وبيوم من الايام

ااتـ اتصل عليه راسل يبجي وبلغني انُ امه بين الحياة والموت ومحتاجة عملية فورية والا حتموت وهو معنده يسوي العملية الها

وو وانـ اني بوقتها صدكته وو سكتت وبجيت

ورحت بكت الفلوس الجامعتهن زبيدة حتى تنطيهن لبابا وشلتهن ورحت لشقة راسل حتى انطيهن اله

وهناك تفاجئت بصوري الخاصة تنعرض على شاشة التلفزيون ويرافقها فيديو الي ولخواتي واحنه بالمسبح

ضحكت اي الولد الحبيته طلع يضحك عليه حتى يسحب مني فلوس ومنو ساعده ؟ تخيلو نفسها هبه صديقة عمري السولفتلكم عليها

هي الطلعت ساحبة صوري وفيديواتي من موبايلي واني ما اعرف ودازتهن لراسل

بيومها انضربت وانهانيت وفوك كل هذا تهددت بصوري وتخيرت اما انطيهم 100 مليون لو يبيعون
هالصور والفيديوات ويفضحوني

رجعت لبيت اهلي مهدود حيلي وما اعرف شسوي ، خذلت اهلي وبكت فلوس اختي شريد احاجيهم
وشلون اواجههم

ومن قهري من نفسي بنفس اليوم اعترفت لأهلي وسولفلتهم كلشي

وبيومها ابويه لأول مرة بحياته ضربني ومن گد الضرب والخوف كمت اتدرر على نفسي وصار عندي سكر

وبسبب شعوري بتأنيب الضمير والخجل والعار والمعيار الكمت اسمعه من اهلي قررت اقبل بأبن جوارينا الي تقدملي حتى اخلص من الآني بي

وهياتني كدامكم انعاد عليه نفس الموقف بس هالمرة
الاخذني للشقة وهددني مو راسل ولا هبه

هالمرة الكسرني ابن جوارينا ، زوجي الي عاملني مثل ما يعاملون العاهرات

واذا قبل تهددت بصوري فهالمرة تهددت بستري ، زوجي واكثر انسان المفروض إني احتمي بي
جان ناوي يذبني بالشارع عريانة مثل ما الله
خلقني

بس لانه عرف إني جنت على علاقة بواحد قبل لا اخذه لا واتهمني إني جنت زانية بطريقة غير شرعية
حتى لا انفضح وأبين من اتزوج

بجيت وباوعتله ، اني صح حبيت وصح غلطت وياك بس والله العظيم محد لزمني غيرك وعمري ما فكرة
ولا راح افكر إني انطي شرفي لأحد

مو لأن احبك لا بس اني غالية واهلي ربوني اصون نفسي وما انطي روحي لواحد بالحرام

تنهدت وكملت اني حجيت كل العندي ومن هاللحظة ماعندي شي اضمه لا عنك ولا عن غيرك

الكلام الحجيته هسه جان كابوس محاربني وين ما اروح واليوم قررت إني اصحى من هذا الكابوس
واتخطى

زبيدة : اول ما ختمت ديمة كلامها ركض معين على امين ضربه بوكس ونام فوكا يضرب بي

ركضو هارون ويوسف يحاولون يجرون معين عن امين وميكدرون

كوه جرو عنه

معين : عوفونيييي للللللك نكسسسس قليل الشررررف تشمر عرضك بالشارع عريان

للللك شكلتتت لروححك شكلتتتت وييينهااا صلاتك وصومك وقال الله وقال الرسول

ربببببك ورسوللللك يقبلوووون بسوايتتتتك هايييي
متحجيييييي شبيييك انكصصص لسااااانك

يوسف : كافي عوفه شبييييك وانت امين امشي اطلع منا مع الاسف عليك عمري ما تصورتك بهاي الحقارة

وئام : حسبي الله ونعم الوكيل عليك دنيا واخره من الله لا يرحمك مثل ما مارحمة هالمسكينة وخفت الله بيها

دنيا : كام امين من الكاع وجهه ينزف ، باوع لديمة وفتح الباب وطلع

انداريت على ديمة لكيتها تبجي

زبيدة : كافي يروحي كافي وداعة عيونج لاشرب من دمه بس كومي على حيلج يبعد حيلي

ديمة : طلعو وعوفوني وحدي ما اريد اشوف احد

زبيدة : بـ...

ديمة : رجاءً زبيدة اريد ابقى وحدي الله يخليكم طلعو

زبيدة : طيب حبيبتي على راحتج ، اشرت للكل وطلعنا عايفيها وحدها

____________________________________

بصائر : كاعدة واندكت باب الغرفة ، صحت تفضل
دخلت سجى

سجى : العفو ست قاطعتج عن دراستج بس اخو حضرتج جوه ومنتظرج بالاستقبال

بصائر : اخويه !! ياهو منهم ؟

سجى : امين

بصائر : تمام جايه روحي انتِ ، ذبيت ملزمتي وكمت نزلت جوه

طبيت للإستقبال لكيته كاعد ، داروح اسلم عليه وشهكت من شفت وجهه كله دم

هاي شنو شبي وجهك ، تقدمت الزم وجهه وتفاجئت من مال بوجهه عني

شبيك امين ؟

امين : جاي اسألج سؤال واروح

بصائر : خير ان شاء الله اسأل

امين : انتِ من سولفتيلي قصة ديمة ويه راسل وهبه جنتِ متأكدة من كل السالفة ؟

بصائر : اي كتلك اني السالفة كلها سمعتها من امي ، هي بنفسها كلتلي انها سمعت ديمة وهي تسولف
لسهير سبب زواجها منك من الألف للياء

امين : يعني امي كلتلج راسل متقرب لديمة بالحرام

بصائر : هاا لا بس اني استنجت هالشي يعني من وحدة تروح ويه واحد للشقة شتسوي ويا مثلاً

امين : هااا يعني امي ما كلتلج انها سامعة ديمة تگل لسهير انه متقربلها بالحرام

بصائر : هاا لالا ما كلتلي

هز راسه ونزل ايده يحرك لحيته ، اباوعله بسرعة شال ايده ونزلها صافگني راشدي

شهكت مصدومة ولزمت خدي

امين : حسبي الله عليج ، حسبي الله عليج وعليه من الله يطيح حظج وينتقم مني على سوايتي النكسه

بصائر : ااا امـ امين ففـ فدوة اسسـ اسمعني

امين : وخريييي لج انتِ اجيتي وكتيلي انُ ديمة جانت عدها علاقة ويه واحد وتروحله للشقة وينلم وياها بالحرام

من كتلج إني من تزوجتها جانت بنية كتيلي اكو طرق ثانية تكدر تحافظ بيها على عذريتها

ومن سألتج انتِ شمدريج بكل هذا كتيلي هي حاجيه متحجييين كتيليييي لو ما كتيليييي

بصائر : هزيت راسي وبجيت كتلك اي كتلك بس والله مجان عبالي حتسوي هيج

كل الجان ببالي انك تطلكها وتعوفها معبالي حتنتقم منها والله معبالي الموضوع حيوصل لهالمواضيع

امين : من اليوم وجهج تخفيييي عنيي واني لا اخوج ولا اعرفج وللموت ابقى اتحسب عليج وعلى روحي

بصائر : دفعني وطلع من البيت دمعته على خده

كعدت لازمة خدي وابجي ، يربي كلشي ولا اخواني حتى ذوله خسرتهم

لطمت على وجهي اني شسويييت يربيييي شسويييت الحقد والغيرة عمت عيوني وخلتني اسوي شغلات عمري مجنت متخيله إني اسويها

وهاي الزرع الزرعته من حقدي حصدته اليوم وخسرت اخواني العشت طول عمري ادرس واتعب في سبيل
ارضيهم

تاليها خسرتهم وقبل لا اخسرهم خسرت نفسي

ومن هنا نُدرك إنَ من زرع في نفسه الكراهية والحقد ، كره نفسه وكرهه الجميع .

__________________________________

زبيدة : كاعدة ولازمة راسي عندي صداع فضيع وبالي كله يم ذاك النذل وسوايته ويه ديمة

دموعها وهي تحجي ، تعاتبه بعيونها وصوتها كوه يطلع من البجي

والله العظيم تمنيت بلحظتها اكوم واشرب من دمه بس الوكف بعيني وضعها

تنهدت ومسحت دموعي من حسيت بهارون يكعد يمي

هارون : شربي

زبيدة : اخذت منه الجاي ، شربت وخليت راسي على جتفه متحسره

هارون : تعبتي؟

زبيدة : مو جسديًا تفسيًا

هارون : ياريت لو اكدر ادير هالتعب واخلي بيه حتى اخفف عنج

اني متعلم واكدر اتحمل بس انتِ بسرعة تنكسين وتعبين وانتِ اذا تعبتي اني كلني اتعب وياج

زبيدة : هارون عود ليش انتو الزلم هيج مؤذيين ، حتى الزين بيكم لازم تطلع منيه اذيه سواء بقصد
او بغير قصد المهم انه يأذي

هارون : لو نريد نقيس الاذيه التجي منجن وبسببجن احنه نطلع ملائكة

ولو تاخذين بكلامي وتصفنين شويه راح تلاحظين انُ بداية كل مصيبة وسبب كل مشكلة تصير بهالكون تكون مرة

چم بيت انهجم بسبب مرة وچم عائلة تشردت بسبب مرة ، چم طفل انذب بالزبالة بسبب مرة وچم طفل تعقد بسبب مرة

الرجال مو اقل من المرة بالاذية لكن سبب الشر بالدنيا هو انتن

زبيدة : هو يحجي واني عيوني عليه ، حبيبي حالته حالة صايرة من 3 ايام وهو مضايك طعم النوم وهو قلة النوم ابد مو زينة عليه

ذبيت الكلاص من ايدي ولزمت ايده ، اكدر اطلب منك طلب ؟

هارون : عيوني الج

زبيدة : سالمة عيونك يا روحي ، شوف حبيبي اني كلش تعبانة واذا اشوفك تعبان اتعب بالزايد فلهذا اريدك تروح للبيت تسبح وتبدل ملابسك وتنام شويه

هارون : لا ما اعوفج

زبيدة : تره ميصير هيج صارلك تلث ايام باقي هنا وانت موزين عليك هالكم من الضغط غير هيج اني ادري بيك تتضايق من الزحمة ومع هذا ضاغط على نفسك وباقي حتى لتعوفني

واني هسه داكلك لخاطري امشي ارجع للبيت ونام وارتاح وعود تعالي بعدين

هارون : وانتِ شلون تبقين وحدج

زبيدة : اهلي وياي يا گلبي انت قابل حبقى اتصفن بالحيطان

روح انت ومن تكمل تعالي

هارون : ماشي راح اروح ارتاحلي ساعتين تلاثة واجيج

زبيدة : ماشي حبيبي

هارون : اذا احتاجيتي شي خابريني خوش

زبيدة : تمام ، گام اخذ كلاصات الجاي وباسني من راسي وراح

تنهدت وكمت دخلت لغرفة ديمة لكيت خالة تسولف وياها وهي صافنه والدمعة واكفه بعينها

الظاهر سولفولها على وضعها لان جانو كاعدين ديواسوها

ديمة : معين

معين : كولي حبيبي امريني شنو تردين

ديمة : اني اريد اتطلك من امين

دنيا : انتِ متأكدة من قرارج ؟

ديمة : باوعتلها ، اي هالمرة قراري ما منه رجعه

اني وامين انتهينا

************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

طبعًا هالبارت تصبيرة للي طلبو مني بارت سريع يفهمون منه اخر الأحداث فمثل مكتلكم اعتبرو هالبارت تصبيرة خفيفة وانتظرو البارت القادم
عن قريب ان شاء الله ❤️