الموت الحي الفصل الرابع وثمانون 84 - بقلم براء الموسوي

مرحبا حبايبي العسل شلونكم ❤️❤️

•••••••••••••••••••••••

تعيش الأغنام طوال حياتها خائفة من الذئاب ثم يأكلها الراعي .🖤

•••••••••••••••••••••••

#الموت الحب
#للكاتبة براء الموسوي

زبيدة : نزلنا من السيارة ووكفنا بالشارع ننتظر سيارة الإسعاف توصل

دقيقة ووصلت السيارة ونزلو المسعفين ديمة من على السدية

تنهدت وابتسمتلها محاولة اخفف عنها ، حبيبتي صارلها عشر ايام بالمستشفى واليوم ياله كتبلها الطبيب خروج

ولانها متكسرة ما كدرنا نجيبها بسياراتنا فاضطرينا نجيبها بسيارة الإسعاف وندخلها للبيت عن طريق
السدية

معين : على كيفكم شباب شويه شويه فدوة اروحلكم
لتروح تتأذه

هاا حبيبتي دمدم خوما جاي تنخضين وتتوجعين من نحركج

ديمة : لا اني زينة

معين: عساج دوم يبعد اخوج

زبيدة : دخلناها جوه تحت انظار الكل وصلنا لبيتنا لكينا دادا واكفتلنا هناك وفاتحتلنا الباب

ام حسن : فتحتلكم باب الغرفة طببوها بسرعة لتاخذ برد

زبيدة : دخلوها المسعفين للغرفة الجوه الجهزناها الها

وصلوها للجرباية واجه معين شالها على كيفه نيمها على الجرباية وعدل نومتها

معين : هاا حبيبتي مرتاحة هيج ؟

ديمة : اي

زبيدة : طلع معين تشكر منهم واحنه كعدنا داير مدايرها

هاا يالشكرة شلون تحسين نفسج هسه

ديمة : الحمدلله احسن

دنيا : كلاتج بعدها توجعج يروحي

ديمة : اي شويه

ام حسن : سكتي سكتي لا توجعج ولا ابد شو جنج ورد بس اني اكلج انتِ جاي تدللين علينا

وئام : خليها تدلل بعد روحي روحها

زبيدة : ابتسمت وطبطبت على راسها ، دمدم سباعية واني متأكدة راح توكف على حيلها وترجع مثل الاول واحسن

مو خالة ؟

وئام : ان شاء الله اني امها وگلبي يعلمني أنها راح تكون بخير

زبيدة : ههههه لعد ما دام گلبج حسج خلص اني مطمئنه

يله حب خلونا نعوف ديمة ترتاح حتى بعد شويه نكعدها تاخذ علاجها وتاكل

وام الزبد شلون حتسويلج اكل صحي من الكتبه الج الدكتور يمه شنو من اكل يلوك لهالحلك اليخبل

ام حسن : اكل صحي شنو ولج هي وينها وين الاكل الصحي

زبيدة : دادا الدكتور كتبلها نظام غذائي لازم تستمر عليه اقل شي 3 شهور حتى تصير زينة

ولتنسين هي هستوها شايله كلى يعني ميصير تاكل اي شي على الاقل بس هالفترة لحد ما جسمها يتعود
على وجود كلى وحدة

وهم انتِ يروحي لتخافين اكلج وعلاجج اني الحعتني بي من الالف للياء

وتره هي صعوبتها بس هالجم شهر وبعدها تكومين على حيلج مثل قبل واحسن كلها شدة وتزول ان شاء الله

ديمة : ان شاء الله وشكرًا زبيدة

زبيدة : دنكت بست راسها ، لتشكريني ، انتِ كوني بخير وساعتها صدكيني راح تملكيني الدنيا

ابتعدت وغطيتها زين وعليتلها التدفئة ، طلعنا من الغرفة لكينا دنيا سابقتنا وكاعدة تخابر

هاي الثانية هم سودة عليه بهالعشر ايام تعلعلت تعلعل عايفه تيم وذاك يريد يموت من البجي يوميه يخابرها وكل شهكة يشهكها تشك صدره من البجي

ومو مال نجيبه للمستشفى نخاف عليه لا يلكط عدوى خصوصاً الدنيا شته والامراض تتحجج

دنيا : ماشي يروحي هسه يجي بابا يجيبك الي ، لا ما راح اكل عمية انتظرك ماشي ماشي يله بيباي يگلبي

زبيدة : هاا شلونه ؟

دنيا : ذبيت الموبايل ، ااااخ يمه ولج كسر خاطري لا يقبل ينام ولا يقبل ياكل من البارحة لليوم

سودة عليه صارله ايام شحاله عاد اني ما تحملت كلت ليوسف يروح للبيت يبدل ويجيب هدوم اله ولتيم ويجيبه ويجيني للهنا

زبيدة : اني بس اريد افتهم انتِ ليش مترحين لبيتج

دنيا : واعوف ديمة !! شبيه تخبلت

زبيدة : مو اني يمها وامج ودادا هم كلنا موجودين فشلها داعي بقيتج هنا

دنيا : حتى لو ما اعوفها لحد ما اطمئن على صحتها بنفسي

زبيدة : على راحتج حبيبتي

يله اني اروح اجيب هدوم واجي اسوي الكم ولديمة اكل

طلعت من بيتنا ودخلت لبيت جدي ، طبعًا محد موجود بيبتي وجدي من الصبح طلعو لكربلاء
يوفون نذر علمود كومة ديمة بالسلامة

وكالعادة هيام وعمي عبدالله وياهم ، صعدت فوك فتحت باب غرفتي ودخلت الملي كم لبسه اكضي بيهم هالفترة حتى ما اضل طالعة طابه

ما اريد انشغل عن ديمة خصوصاً بهالفترة اريد اكرسلها كل وقتي منا لمن تكوم بصحة وسلامة

دالم بهدومي و سمعت الباب تنفتح ، شلت راسي وشفت هارون

هارون : السلام عليكم

زبيدة : هلا حبيبي وعليكم السلام

هارون : ليش جاي تلمين هدومج !! وين رايحه ؟

زبيدة : ذبيت البلوز من ايدي وتقدمت وكفت گباله ، نزلت اديه لزمت اديه رفعتهن لشفايفي بوستهن وتنهدت

اني اسفه

هارون : على شنو ؟

زبيدة : ادري بروحي هواي هملتك هالچم يوم بس شوفة عينك ديمة ماخذه كل وقتي ومجنت كادره اعوفها ولا لحظة وحدة

رفع ايدي باسها وحضنها لصدره

هارون : عليمن تعتذرين اني مقدر وضعج وبالعكس الجاي تسوي انتِ ودنيا ومعين مو مبادرة حلوة ولا جميل منكم هذا واجبكم تجاه اختكم

فعلى شنو اصلاً كاعدة تبرريلي صدك تحجين انتِ بابا هاي اختج لحمج ودمج ، قصري ويه الدنيا كلها ولتقصرين وياها

زبيدة : زين اذا انت هيج رأيك لعد ليش مدتاكل ولا دتنام زين

نور سولفتلي عليك تكول مجاي تتغده بالبيت وتضل اليوم كله بالدوام ومترجع غير نص الليل

ليش هيج حبيبي ، احنه هيج متفقين ؟ مو كلنا لتضغط على نفسك أكثر من اللازم حتى لتتعب
وتتمرض

هارون : شسوي زبيدة ما اشتهي اطب للبيت وانتِ موبي ولا عيني تاخذ نوم بعيد عن ريحتج ، الاكل ماصخ مالي كل شهية بي لان مو من ايدج

فإلمن باقي بالبيت متكليلي ، عاد كلت اشغل روحي بين الدوام والمحمية حتى ارجع تعبان وگبل انام

زبيدة : ابتسمت وشبكته حيل ، اووووف يربي ويجيني واحد يلومني ويگلي ليش هالكد احبك

ابتعدت ابوس بخدوده وشفايفه ، اموت عليك اني ، ربي ميحرمني منك بحق الحبيب محمد

هارون : ولا يحرمني منج يارب

صدك نسيتيني ، المن جاي تلمين هدومج ؟

زبيدة : قررت ابقى هالفترة ببيت اهلي

هارون : ليش ؟

زبيدة : كتلك ما اريد اعوف ديمة واخاف لا تحتاجني وخوما اضل اني رايحة جايه منا لهنا فكلت ابقى هناك

هارون : لعد ابقى وياج

زبيدة : وكفت على اطراف اصابعي بسته من شفته وابتعدت

تمام لعد حروح اني اخذلك ملابس ، انت اسبقني لهناك واني اجيب الجنطة والحكك

هارون : راح اخذ تيمور واطلع ادخن بره وانتظرج

زبيدة : اوك ، راح هو شال تيمور وطلع واني رحت طلعتله ملابس وشلت الجنطة ونزلت لكيته منتظرني

مشيت ويا لبيت اهلي دخلنا ، انطيت الجنطة للعاملة ووصيتها تدلي هارون على غرفتي واني رحت اسوي
العشه

سويت اكل ديمة وعفته على صفحة حتى من يجي وقت العلاج اوكلها وانطيها دواها

انوب سويتلهم عشه وقدمته الهم واخذت حصة هارون حطيتها بصينية وصعدت فوك

دخلت لغرفتي ما لكيت هارون بس سمعت صوت دوش وتيمور كدامي نايم على القنفة

عفية هالتيمور نعلعلا بليسه تنبل مال نوم ، من شفته وشافني نايم

خليت صينية الاكل على الطبلة ونزعت حجابي وشمرت روحي على الجرباية

كلت خلي اناملي ساعتين واكعد علمود ديمة هم اريح شويه وهم حتى اكول نمت واكدر اسهر ويه ديمة

وقتت موبايلي وغمضت عيوني هستوني داغفه وحسيت بأيد رطبة تفتح قميصي

فتحت عيوني على كيفي شفت هارون يفتح بدكم قميصي ومن كمل دنك وخله راسه على صدري فوك
التوب اللابسته

تنهدت وحضنته امسح على راسه ، بسته من كصته وكعدت على حيلي موخرة راسه من على صدري

كعدت عدل افرك بعيوني ، حبيبي بلا زحمه عليك جيب صينية الاكل لهنا

گام جاب الصينية خلاها على الجرباية ، تربعت واخذت الصمونة سويت لكمة صغيرة وقدمتها من حلكه

هارون : شنو ؟

زبيدة : افتح حلكك يله ما اعوفك الا تفرغ كل الاكل الي بالصينية

هارون : اني اكل انتِ روحي نامي

زبيدة : نفيت براسي ، ماكو يله افتح حلكك

اباوعله ابتسم وباس باطن ايدي واكل ، ضليت اسويله لكم واوكله وهو حبيبي ميكول لا

سودة عليه من عمت عينهم الي ببالي مدري شلون ولا واحد بيهم سأل هذا صارله عشر ايام شدياكل شديشرب وين جاي يروح لنص الليل وليش هالكد ديتأخر

كلمن يصيح يا روحي الكبر اعوذ بالله منهم ويكلك ليش تكرهيهم

هارون : عوفيني واكلي

زبيدة : نزلت الخاشوكة وتنهدت ، انت تدري بيه اذا متضايقة ما اكدر لا اكل ولا اشرب

هارون : موضوع ديمة المضايقج مو

زبيدة : ليش عبالك الصار سهل

والله العظيم يا هارون يالي مسكتني هو وضع ديمة والا هالأمين محد يخلصه مني

الحقير قليل الشرف والغيرة سوايته هاي ميسويلها حتى ابن الشوراع

الكلب النذل خسر اختي صحتها وعافيتها فوك ما هي ماعدها عافية لا وعينه صلفة وبيوم الحادث اجه ووكف ويانا بالمستشفى

ولا چنه قاتل القتيل وماشي بجنازته

لاواني العبالي امين ماكو منه ودومي اكول امين يختلف عن باقي الزلم وامين استثناء للقاعدة الماخذتها عن الزلم

اثاري اول ما الله خله بأظافيره طحين شاخ وعليمن على مرته ستره وغطا

هارون : اختج هم غلطانه ليش ضمت عليه

زبيدة شمرت الخاشوكة ، لتستفزني هارون

اني مو ما ادري باختي غلطانه حتى تجي انت تگلي ، اني اول الناس الاخذو منها موقف جبير بسبب
الصار

ولعبت لعب لان اهلي ضمو على امين ومكلوله
واعتبرت السوو خداع واستغفال لكن مع كل الصار امين ماله حق ولو واحد بالميه بالي سوا

عرفت الحقيقة ، ضجت ، انقهرت ، رجولتك خلتك بموقف صعب وانت كرجل شرقي متكدر تتقبل الي صار

بكل بساطة طلكها ، خلي تولي عوفها وامضي بحياتك الحياة مواكفه عليها ولا على غيرها

بس هو سوايته سوايه طايحظها وجان الغرض منها انه يذلها ويهين كرامتها حتى يسترد شويه من رجولته الحس انه فقدها من انخدع

لكن للأسف بسوايته هاي ما ثبت لنفسه وللناس الا شغلة وحدة انه مو رجال وبلا غيره وشرف

والدين الچان يحجي بي ماهو الا غطاء ساتر على حقده وغله وكرهه وحقارته

لكن مثل ميكولون رب ضارةً نافعه ، شاء الله سبحانه وتعالى يراوينا من خلال هالموقف وينطينه درس

انه لنرفع سقف توقعاتنا بأحد ولا نتخيل انُ كلمن حافظة ايتين وچم حديث انسان شريف ويخاف ربه

اثاري الشرف والغيرة والرجولة طلعت خُلق ، مبدئ الانسان يمشي عليه بغض النظر عن الدين والعقيدة

___________________________________

بصائر : متمدده ودخل حليم خله علاكة يم راسي

حليم : هاج هذا علاج جبته الج من الصيدلية بلكت تخف صخونتج

بصائر : كوه كعدت موخره الغطه عني ، فتحت العلاكة اخذت العلاج ورجعت تمددت

صارلي اسبوع شحالني والصخونة متقبل تفكني ، مدري شجايه

ساعة اكول من الحمل وساعة اكول من قهري على زعل امين مني

دمعت عيوني واني اتذكر الحجي السمعته من البنات بخصوص ديمة والله العظيم اني شكد جنت كارهتها

بس والله وداعة امي ما تخيلت امين راح يسوي وياها هالسوايه ابد مجنت حاطة ببالي هالشي

كلشي توقعت من امين الا انه يحقر وياها لهالدرجة اني نفسي ممستوعبة اخويه ابو گلب الطيب يطلع منه هذا

والله اني كل وعبالي إني من راح اسولفله حيطلكها ويعوفها والله ما ادري بي راح يسوي كل هذا

واااخ شكد تندمت لان حجيتله لو ادري حاطة سم بزردومي ولا حاجيته ومتحمله كل هالقهر والذنوب

حجاية ، حجاية وحدة گلبت حياتي گلاب

خسرتني امي الاعتبرها روحي من الدنيا

واخوتي الماعندي غيرهم

وفوگ كل هذا ذنب البنية الخسرت صحتها وعافيتها بسببي

فززني صوت حليم وهو يحاجيني

حليم : بصائر

بصائر : مجان الي خلك اجاوبه ضليت ساكته ودموعي تنزل بصمت

رجع كرر اسمي اكثر من مرة واني مغلسة عليه اخر شي حسيت بي يهزني بخفه

حليم : بصائر انتِ نمتي ؟

بصائر : من حسيت بي جاي يلح وهو يسألني غمضت عيوني واستمريت بتجاهله

حسيت بي يكوم من يمي ويتمدد على القنفه القريبة من الجرباية

شويه وسمعت صوته يحجي بخفه بالمكان ، الظاهر ميريدني اسمع شيكول

حليم : الووو هاا وينج ؟

ما كدرت اجاوبج جان يمي احد ، المهم فارغة ؟

اي اريد اجي ، خوش لعد تحضري ، دزيتلج هذا الفستان لبسي علما ابدل واجيج

اي وجهزيلي المشروب والثلج والليمون مو تنسي ، ماشي محتاجة شي اجيبه وياي ؟

خوش لعد يله مسافة الطريق ، لا ما اتأخر ، لتستعجلين على رزقج لاحكه ، ههههه يله بيباي

بصائر : اسمعه وعاضه البطانية حتى لينسمع صوت شهكاتي

عجييييب شكد حسيت نفسي ذليلة بيومها ، معقولة مشاعري عنده رخيصة لدرجة حتى ما كلف نفسه يطلع من الغرفة ويخابر خوفًا لا اسمعه

بلعت شهكاتي وكعدت امسح بدموعي ، باوعتله مندمج يخابر وحتى محاس عليه

كمت على حيلي وهو شافني وفز من مكانه شلون المسويله عمله

وكفت كدامه ودنكت على كيفي كاعدة على ركباتي بحيث صرت بمستوى وهو كاعد

خليت شعري وره اذاني وبلعت ريگي محاجيته

ليش ؟

حليم : شبيج ؟

بصائر : ليش حياتي هيج

جبت عمري كله ماشيه مثل الساعة اروح بدربي وارجع بدربي ، لا عمري اذيت احد ولا كسرت بخاطر احد

زين اذا اني طول هالسنين ماشيه عدل ليش اخذتك ؟ شناقصني او بالأحرى شمسويه بحياتي حتى رب
العالمين يعاقبني هالعقاب ويخليك قسمتي

عود لأن اذيت ديمة !!! ماهي هم ما قصرت ولعبت لعب بأخوية والسويته اني ردة فعل طبيعية على
السوء الشفته منها

حليم : بصائر اهدي انتِ حامل ومريضة لتشدين اعصابج هيج

كومي كومي لتكعدين هيج بالكاع موزين عليج

بصائر : اجه يكومني دفعت ايده

وخر لتلزمني ، باوعتله تدري اني من تزوجتك ولليوم كلما اشوفك اسأل نفسي سؤال واحد

يا ترى زواجي منك عقاب لو ابتلاء ؟

تصدك اذا اكلك صارت امنية حياتي اعرف جواب هذا السؤال وارتاح حتى اذا هذا الاني بي ابتلاء اصبر عليه منا لمن انتصر وافوز بهذا الاختبار

واذا عقاب اسعى إني اكفر عن ذنوبي عسى ولعل الله يغفرلي ويسامحني او على الاقل ينظر بأمري ويخفف عني

مسحت دموعي حيل ، صدك حليم مدامنا كاعدين كاعدين

اريد اسألك سؤال واتمنى تجاوبني عليه بصراحة ، عود ليش حليم انت ليش متحبني مثل ما اني احبك

اباوعله تنهد ومسح على وجهه بتردد

حليم : مرة سألت سؤالج هذا لزبيدة ، كتلها ليش متحبيني مثل ما اني احبج وجوابها الي چان

حليم اني ما اكدر اتقبلك وما احس روحي راهمه على روحك

بيومها ما فهمت معنى كلامها بس من تزوجتج فهمت هي شنو تقصد بذاك الوقت

اثاري فعلًا الروح تركض ورا التهوى واني ما اهواج ولا اكدر افرض نفسي عليج

بصائر : زين ليش تزوجتني ما بقيت هيج حر نفسك منا لمن تحس انك مستعد تبدي من جديد وتتزوج الي
يهواها گلبك

حليم : چان عبالي اذا بديت علاقة جديه والحلال راح اكدر اتخطى حبي لزبيدة بس طلعت غلطان حيل غلطان

ونتيجة غلطي جاي اشوفه بعيني ، ظلمت نفسي وظلمتج وياي وانتِ متستاهلين

اعرف كلامي هذا جرحج هواي ومتتخيلين شكد كاره روحي واني احجي هيج بس والله ما جاي اكدر
اضل امثل واجذب عليج أكثر من هيج

هالعلاقة صارت مثل القيد اللازم ركبتي وخانكني لا اني الكادر اتحمله ولا اني الكادر الكه القفل واتحرر
منه

بصائر : هزيت راسي ، اني ممتنه لصراحتك وياي ، اخذ راحتك واطلع اني من اليوم بعد مالي علاقة بيك شتريد تسوي سوي

وياريت لو تعتبرني ضيفة مدة اقامتي يمك تنتهي من اولد ووعد منا لذاك اليوم ما ازعجك

كمت ودخلت للحمام ، كعدت على الارضية وضميت وجهي بين رجليه وبجيت

هسه اني ما مستغربة من كلامه بس ليش مقهورة ومكسور گلبي ما اعرف

ضليت كاعدة وابجي على حظي المصخم الاغبر الما ذبني بس على الغبر

شويه وحسيت الباب يندك

حليم : بصائر انتِ زينة ؟

يمعودة ردي عليه خوما بيج شي ، بصائر لتخليني اكسر الباب اذا جاي تسمعيني جاوبيني

بصائر : كمت فتحت الحنفية غسلت وطلعت فتحت الباب لكيته بوجهي

عبرته ومشيت نايمة بمكاني ، حضنت روحي وغفيت
بدون ما احس

ثاني يوم نايمة وكعدت على صوت صياح

كمت من النوم مخترعة

____________________________________

زبيدة : فتحت الباب الغرفة ودخلت مبتسمة

صباحووو على كولتك يا حلو

ديمة : صباح النور

زبيدة : خليت الصينية على الميز وتقدمت شلت الغطة وشلتها داخلة للحمام

بدلتلها الكيس وغسلتلها ، انداريت اخذ الخاولي دانشف وجها وشفتها تبجي

هاي ليش حبيبتي ليش ، شنو اذيتج بدون ما انتبه

ديمة : ااا انتِ ممجبورة تتحمليني وتتحملين قرفي

زبيدة : انجبي لج شنو هذا الحجي ، انقرف عليمن عشتو وبعدين على شنو مجبورة تره هذا واجبي تجاهجج

وصدك تعاي يعني اني لو أمر بظرف صحي وما اكدر ادخل للحمام راح تستنكفين انتِ تساعديني

ديمة : لا ما راح استنكف

زبيدة : لعد انجبي ، مسحت عيونها ونشفت وجها ، يله كافي لتبجين واذا سمعتج بعد تحجين هيج ازعل منج

علكت الخاولي ودنكت شلتها ومشيت ، حصرتني الضحكة وباوعتلها

اكول دمدم تتذكرين من جنت اشيلج شيلة العروسة وانتِ تعيشين اللحظة وتغنين اغاني شاطي باطي

باعي هسه انعاد الموقف ، اني لو منج اعيش اللحظة ، افتريت بيها وغنيت النشيد الجانت تغني وهي صغيرة من چنه نشيليها شيلة العروسة

طلع البرد علينا من مـن ثنيـات الوداع وجب الشكـر عليـنا مـا دعــــا لله داع

ههههههههه بشرفج ديمة شكد جنتِ مغرورة انتِ بحيث عبالج نشيد طلع البدر انتِ المقصودة بي

شفتها ابتسمت بستها من خدها ، يييمه يالبنات شحلاتهن وهن يضحكن يمه

نزلتها على الجرباية واخذت الصينية وبديت اوكلها واسولف وياها

شويه وسمعنا الباب يندك ، انداريت شفت دنيا مادة راسها

دنيا : صباح الخير عيني ، بلا زحمه اكو ضيف يريد يشوف ديمة تسمحوله يدخل

زبيدة : باوعت لتيم اللابد وره رجليها وابتسمت

اي عيني خلي يتفضل

دنيا : تفضل عزيزي

تيم : هلاوو هلاوو شباح خير

زبيدة : يمه بعد روحي شباح النور ، اباوعله تقرب صعد على الجربابة حضني وباسني بادلته وضحكت افيييش يمه شهالبوسه الحلوة

تيم : نونج

زبيدة : زينة يبعد گلبي

تيم : دمدم عبيبي تعاي بوسة

دنيا : على كيفك حبيبي خالة تره عدها اوا

تيم : ياا ختيه

زبيدة : عضيت سبابتي اااخ يمه اللسان ، اباوعله تقرب على كيفه باس ديمة على كيفه من خدها وكعد يمها منتجي على جتفها ويمسح على ايدها

تيم : يا عبيبتي يا دمدم عدج اوا هنا

ديمة : اي حبيبي

دنيا : بعد عمري من البارحة يوسف كايله دمدم مريضة وهو من اجه لسه خابصني شوكت يروح يشوفها وشوكت يروح يشوفها ما عولت اقنعه
ينام ويجيج الصبح

تاليها كعدلي من الثمانية شلع گلبي عاد انتظرج تكعدين حتى يجيج

ديمة : حضنته ، حبيبي فدوة لكلبه شكد حنين

زبيدة : دنسولف وسمعنا صوت خالة وئام تصيح

طلعنا نركض على صوتها للصالة لكينه خالة هناء واكفة بباب البيت وخالة وئام واكفه گبالها

وئام : شعددج جايه هاا شنووو من صلافة شايليييين انتووو

يعني بعد كل السوا ابنج ببنتي وهم الج عين وجايه لهنا ، شتردووون منها بعد متكليلي شتردون

خسرتوها صحتها وعافيتها ولوما ستر الله جان ماتت والرببببح بييييكم انتو

هناء : اني ما راح اعتب على كلامج ولا الومج لان كل حجيج صحيح واني لو جنت بمكانج يمكن جنت راح اسوي اكثر من هيج

الحق بأيدج والله يلوم اليلومج بس الله يخليج ولخاطر الخبز والملح البيناتنه خليني اشوف ديمة
ولو خمس دقايق واروح

وئام : شتشوفين منها بالضبط رجليها المسكرات لو خياط العمليات والجروح البجسمها

شجايه تشوفين بالضبط سولفيلي ، امشي رجعي منين ما اجيتي باحترامج احسلج بيتي يتعذرج انتِ وكل واحد يجي من طرفج ييييله منااا ييييله

زبيدة : خالة ليش تحاجيها هيج قابل خالة هناء هي الموصية ابنها يسوي هيج

شلون تعامليها بهذا الأسلوب وليش اصلا دتحمليها ذنب مو ذنبها ، كلنا ندري بخالة شلون گلبها على گلب
ديمة وتحبها تموت عليها

دنيا : ومو بمعناها امين غلط كون هي تتحمل المسؤولية ، خالة هناء بريئة من فعلة امين مثل ما انتِ بريئة من فعلة مبين

وئام : انتتتتن اسكتتتتتن وحسجننن ما اسمععععه اني ضليت اسمع كلامجن واسكت وانجب منا لمن انطاح حظجن وراح تموتني من القهر عليجن

وانتِ الثانية توكلي ورجعي منين ما اجيتي احسن ما افقد اخر ذرة صبر عندي واصيحلج الحرس والله

ديمة : ييييمه

زبيدة : سمعنا ديمة تصيح لامها ، اباوع لخالة وئام راحتلها تركض

وئام : هاا امي هاا حبيبتي

ديمة : وو والله العظيم اذا سمعتج ممـ مرة ثانية تحاجين خالة هناء بهذا الأسلوب وو والله يا يمه
انسى انج امي

ككـ كلشي ولا خالة هناء ، هالمرة خط احمر بالنسبة الي ما مسموح لأحد يمسها ولو بكلمة

زز زبيدة روحي صيحيها ببـ بسرعة قسمًا بالله اذا طلعت منا ورجعت لبيتها مكسورة خاطر

يحرم عليه احجي وياكم بعد ، لزمت منطقة كلاتي وصحت ، امشييي صيحيلها

زبيدة : اي اي رايحة بس لتصيحين ، طلعت بره لكيتها حاطة حجابها على حلكها وتبجي

مسحت على جتفها ، ميخالف خالة ميخالف حبيبتي امسحيها بوجوهنا ، احنه كلنا ندري انتِ مالج ذنب بألي صار

وخالة وئام فاقدة اعصابها هلي كامت تخبص بالحجي والله احنه مالنا غنى عنج والله شاهد معزتج بكلوبنا جبيرة ومحفوظة وعمرنا ما راح نفكر نحملج
ذنب انتِ ما سويتي

هناء : الله يجبر بخاطرجن مثل ما جبرتن خاطري

زبيدة : باوعتلها وابتسمت ، يله خالة مسحي دموعج وامشينا تره ديمة خبصتنا ومنتظرج

دخلت للغرفة واني دخلت وراها ، اباوعلها ركضت شمرت روحها على ديمة حضنتها وكامت تبجي

هناء : سودة عليه يبعد گلبي بيه ولا بيج ان شاء الله حبيبتي انتِ

ديمة : اسم الله عليج خالة حبيبتي شنو هذا الكلام

بعدتها عني ومسحت دموعها ، لزمت اديها وتنهدت ، لتبجين خالة والله اني زينة

هناء : خجلانة منج يمه ومالي عين حتى اشيل راسي واباوعلج

كله صوجي اني من الله ياخذني ولا يوفقني كل الانتِ بي اني السبب بي

ديمة : لا خالة لتكولين هيج انتِ شعليج

هناء : لا يمه الصوج من البداية مني اني السمعتج تحجين ويه سهير وتكدر صدري عليج وكلاني القهر
من سمعت قصتج

ومن حرگة گلبي بيومها ما لكيت روحي الا افضفض لبصائر واني دمعتي على خدي على حالج

تالي متالي بتي ما حفظت سري وراحت لاخوها خبطت الحجي شامي عامي وحجتني حجي اني ما كايلته وخلت اخوها يسودن ويسوي كل هذا

والله شاهد يا ديمة وانتِ تدرين بيه ما اقسم جذب امين صارله عشر ايام نايم بالفراش ودمعته ما نشفت من على خده

اجه حجالي ومتندم على عدد شعر راسه لان صدك بصائر واذاج والنبي الشريف هو عباله انتِ مسويه
علاقة بالحرام ميدري ببصائر جانت تجذب عليه
والله ميدري يا ديمة

زبيدة : لحظة خالة لحظة ، يعني بصائر هي المسولفه لأمين وكايلتله ديمة مسويه علاقة بالحرام ويه راسل ؟

هزتلي راسها ورفعت حجابها غطت وجها وبجت

أشتدت ملامحي وصفنت على وضع ديمة وبديت استرجع كلامها وهي تسولف عن امين

فعلًا اغلب الكلام الحجته ديمة يتركز على موضوع واحد وهو الخيانة

رجعت باوعت لديمة ، صفنت على حالها وحال ام امين شلون وحده حاضنه الثانية ويبجن مثل الجهال

وحق من سوه محمد نبي يا بصائر اني الج

طلعت من الغرفة وصعدت فوك اركض جريت حجابي شمرته شلون ما جان على راسي وطلعت اركض

لاكتني دنيا على الدرج

دنيا : وين رايحة ؟

زبيدة : دوخري ، نزلت ركض وبوجهي للحراس اخذت سويج وحدة من السيارات ورحت للكراج اخذت سيارة وحركت متوجهه لبيت عمو يحيى وگلبي محترك

النذلة السافلة ما بقت شي ما سوته من غلها وحقدها علينا وصل بيها الحال تطعن بشرف اختي جذب عينك عينك

لا وبعين صلفه راسمتلي سيناريوهات ما انزل الله بها من سلطان الچلبة الحقيرة

الحقد والغيرة عمن عيونها بس والله والخلق محمد اله اعميهن الج هالعيون واخليج متشوفين بعد ووووووالله

دست بانزين وروحي مفرفحه اريد بس اوصل واخيرًا نزلت

عفت السيارة بالشارع ونزلت اركض طبيت جوه دفعت باب المطبخ ودخلت لكيتهم كاعدين يتريكون

يحيى : شبيج بويه زبد

زبيدة : مشيت عيوني عليهم ما لكيتها بيناتهم

وينها ؟

رميم : ياهي ؟

يحيى : راح اكوم اركعج بالنعال شبييييج

زبيدة : بصائر قنااااادر ويييييين

حليم : نايمة بغرفتنا شتردين منها

زبيدة : صعدت اركض لغرفة حليم ، ناييييمة المسعدددددد نايييييمة

اني شفت باب الغرفة وحسيت عبالك لكيت باب الجنة ، ركضت فتحت الباب الغرفة ودخلت قافلتها وراي

اباوعلها هستوها تريد تكوم

بصائر : ششـ شبيج انتتتِ تصيحين خرعتيني

زبيدة : اني شفتها كدامي نايمة وتذكرت حجي خالة هناء وفرفحت روحي

كمزت عليها والله شلتها من شعرها ولللللجججج انتتتِ كطفففف الجكااااارة تسوييييين كل هالعماييييل

بصائر : ااااخ شعري اااخ

زبيدة : وقز القررررط ، مطلتها بالكاع ونمت فوكاها لكطتها بعضة والله العظيم شلعت لحم من جلدها

ابتعدت وصفكتها راشدي

من ورررراج ومنننن ورررره شكوووولججج السزززز ياماااا بناااات راحنننن جووووه الترررراببب زووور
وهننن مالهنننن ذنبببب

اسمع الباب تفلش من الدك ولا اهتميت

سحلت شعرها ونترت راسها ، وووواالله العظيم يلو اختييي صاير عليها شي وخاسرتها ميكفيني دمج والله ميكفينيييي

بصائر : عوفينيييي ااااالله ياخذذذذجججج

زبيدة : راح ياخذني وراح ياخذج ، ويعرررض اعماااالج السززز هنااااك عوددد كابلينييي وكليلي شررراح تكليله

الفتتت حجييي وطعنت بشرف مرت اخوية جذذببب
ولج والله حريمة انتِ واخوج العار صاحين

واختيييي ذيج وياها تسمع صوتج كل ونه وكل دمعة تنزلها من الوجع تشك گلبي شك

بجيت واني اضربها ، شلووون انطاااج كلبج تتهميها بشرفها زور شلووون ويييين شفتها نامتتتت ويه
ذاك الجايف بالحرام حتى تتبلين عليها هيج

ما خفتيييي رببببج ولللللجججج اختتتييي الحاجتين صارن جواهااا والسببب انتتتتِ واخوووج وييين
ترحووون من الله ويييين

عطت من انكسرت الباب وحسيت بروحي انشاليت من عنها ، عوفونيييي عوفونيييي

معين : كافييي زبييييدة كافيييي

زبيدة : كمت اشيل روحي واركعها بالكاع اناشغ ، عوفني معين هاايييي الحقييييرة هيييي السببب
بالصار بدييييمة

النننذلة كايله لأخوها ديمة زانية وذااااك الكلب صدكها وراد يشمر اختييي بالشارع مصلخخخه

وخرررر وخرررر

اباوع لسهير وحليم ركضو عليها كوموها من الكاع وهي تبجي

تفلت عليها ، تففففف علييييج يا حقيرة من الله لا بوفقج هجمتييي بيييت اخوووج واخذتي عافية
اختي التسواج وتسوه راسج

عوفنيييي معييين عوفنيييي خلينييي ابررررد گلبييي بيهاااا

بصائر : ارجف من البجي والم واباوعلها ، اخوها شايلها وهي تحاول تتملص منه حتى ترجعلي

والكل ديحاول يحاجيها وهي تبجي وتغلط عليه حتى مدتسمع اليحاجيها

اخر شي شالها معين وراح هو ودنيا الجانت واكفه تباوع بصمت وقبل لتطلع باوعتلي بنظرة كلها شماته
ولحكتهم

سهير : انتِ زينة بيج شي ؟

رميم : امشي بدلي واخذيها انتِ وحليم للمستشفى

يحيى : احسبي حسابج بصائر راح يكون النا كلام ثاني من ترجعين

ولتتخيلين إني ممكن اتغاضى عن السمعته

بصائر : بدلتلي سهير واخذوني للمستشفى ، فحصتني الدكتورة والصدمة جانت انُ الطفل مبي شي

رغم زبيدة ملختني تملخ ومع هذا قطرة دم ما نزلت مني بالعكس اصلاً من فحصتني الدكتورة اكدتلي انُ الحنين بصحة جيدة وكل الاحتاجة إني انظم اكلي وارتاح

طلعنا من المستشفى واني بالي يم كلام الطبيبة ، عود ليش اني ما سقطت ؟

سهير : زبيدة مو حقيرة واني متأكدة إنها رغم ضربتج بس ابد ما تقربت لا لبطنج ولا لظهرج لان تدري بيج حامل

وما ممكن تحط نفسها بهيج موقف وتخليج تسقطين عمدًا ، هي مو خبيثة ولا حقودة حتى تأذي غيرها متعمدة

بصائر : شنو قصدج ؟

سهير : قصدي انُ مع الأسف عليج عمري ما تصورتج بهالشر

هاج دواج وادعي ربنا يتمم حملج على خير وميعاقبج بضناج لان المرة ميوجع گلبها غير شرفها وضناها

بصائر : نزلت وعافتني ، اجه حليم فتحلي الباب ونزلني دخلنا جو ولكينا الكل ملتمين بالصالة

رميم : هاا يمه بشر

حليم : الحنين بخير

رميم : الف الحمدلله

حليم : من رخصتكم

يحيى : اوكف

اسمع حليم انت ابني ويعز عليه احجي هالحجي وياك والله شاهد لساني ما جاي يطاوعني احجي هالكلام

بس من هاللحظة بيتي يتعذر وجود مرتك بيناتنا والاتمنى منك تاخذها وتطلعون تستقرون بره هالبيت
احسن الكم والنا

بصائر : بهت وجهي من سمعت كلامه ، للـ ليش عمو اا اني ششـ شنو سويتلكم

يحيى : مادام محد كايلج خليني اني اكلج ، اني من يوم الوعيت على هالدنيا واني عندي صاحب واحد
اسمه ياسر

وهالصاحب الله انطا بنات وقسم معزتهن نصفين ، معزة بگلب ابوهن ومعزة بگلي

وذولة ولدي الشايفتهم كبالج اني ما افرق بينهم وبينهن ذرة وحدة وبنات ياسر بالنسبة الي بناتي
الما رزقني بيهن القدر

والي يمسهن بورد امسه بنار واي واحد يفكر يتعدى حدوده وياهن راح يلكاني سچينة خاصرة ونابته
بي

وانتِ السويتي ويه ديمة الصغيرة مدللتنا مو شويه
واكون خسيس ونذل اذا اخلي ببيتي وحدة متخاف
ربها وتطعن بأعراض العالم

واول عرض طعنته طعنة عرض بنتي الفطيرة المسكينة المريضة

اني ما راح اهدم حياتج واطلب من ابني يتركج رغم ادري إني اذا اكله ما راح يرفض بس اني اخاف ربي

وادري لو ياسر عايش ما چان راح يهدم بيتج مثل ما هدمتي بيت بنته

ولذلك يا بنت الناس من اليوم اني بيتي يتعذر وجودج وما مسموحلج تشاركينا بعد لا بحزن ولا بفرح

حليم : صدك تحجي يابه ، شبيج يمه شو ساكته متحجين شنووو اخذ مرتي واطلع

رميم : اني ويه ابوك بكلشي

بغض النظر عن كل السوته مرتك ويه ديمة بس اني عندي جناين واخاف لا مرتك بحالة عصبية تروح تتبلى على وحدة منهن زور وتهدم بيت اخوانك مثل ما هدمت بيت اخوها

حليم : واني ما فكرتو بيه وين اولي

يحيى : بيوتنا تارسه البلد اختارلك اي بيت واخذ مرتك وروحو كعدو بي المهم ما اريد اشوفها هنا بعد

بصائر : حجيهم سهام وتنبت بروحي حتى مو بگلبي

ولأول مرة احس إني عالة على الكل ومحد يريدني ، لا اهل ، لا اخوة ، لا رجل وهسه حتى عيالي

الدمعة وكفت بعيني واكتفيت بالصمت واني اباوع بالوجوه اتمنى اشوف ولو شخص واحد من الموجودين يريدني ورافض وجودي

لكن للأسف مثل ما دخلت غريبة لهالبيت حطلع واني غريبة

والله الاعلم بمصيري الجاي شنو

____________________________________

معين : نزلييييي ييييله

زبيدة : لتصييييح

معين : تنزلين لا الطج على حلكج والله

زبيدة : فنك يييله

دنيا : كافييي شبيييكم

معين : متحاجييين اختج فضحتنا فضيحة وخلت الميشتهي يتفرج

شنو ولج مالج رداد انتتتِ ماعندج احد ترجعيله كلشي تفكرين بييي تسوي بدون متسألين احد

زبيدة : نزلت من السيارة وطبكت الباب ، اني لو اعتمد عليكم الكاكم كاعدين هناك تعاتبوها وتتحسبون

اني المعاتب والتحسب ميبرد گلبي ، خليكم انتو المثاليين على صفحة وعوفوني اني العوجة اتصرف

عفتهم ومشيت ، رغم كل الملامه السمعتها منهم آلا إني ارتاحيت كلش ارتاحيت

دخلت جوه لكيت هارون يفتر بالصالة ، اباوعله بس شافني رفعلي حاجبة

هارون : نورتي مدام

زبيدة : النور نورك حبيبي خير شو كلكم تباوعولي صفح !! اكو شي ؟

معين : اشو تحجين ولا كإنما حضرة جنابج مسويه شي

زبيدة : ومنو گال اني ممسويه شي ، بالعكس آني سويت وسويت هواي هم

ولو عايفيني اكثر والله جان طلعتها جنازة من غرفتها

معين : انتِ كاعدة تسمعين ؟

وئام : جاي اسمع وعاشت أيدها ولوما هي الرايحة جان اني الرحت

معين : يمه هذا مو حل يعني لو تروح تشتكي على زبيدة شنريد نسوي

زبيدة : انت ناسي احنه منو ؟ منو يگدر يشتكي علينا !!

ولك هو موسى وسوايته المينلبس عليها ثوب وما كدر القانون ولا حتى العشاير يسويله شي وذاك وينه دايح
يسافر ويروح ويجي وفنه اليگله على عينك حاجب

معين : مو يا اخـ... لحظة لحظة ، جاي تسمعون ؟

خير يا ستار هاي دخيلك يارب هاي شكو

دنيا : هذا مو صوت مرت عمي فاضل جاي تصيح ؟

وئام : اي اي هذا صوت غفران

ام حسن : دخيلك يارحمن امشووو شوفووو شكووو

زبيدة : طلعنا كلنا نركض على بيت عمي فاضل ، تفاجئنا من شفنه حنين بت عمي طالعة تركض
من بيتهم هدومها مشككه ومزينه صفر

نسمع بس صوت صياح امها تصيح ركضي حنين ركضي اجاج

باوعت على باب البيت شفت عمي فاضل طلع سلاحة بأيده يركض وره حنين ويصيح اوكفي

وهي تركض بروح مفرفحه تريد بس توصل للباب وكل شويه تكوم وترجع توكع من الخوف

عيني عليهم وفجأة شهكت ووكعت بالكاع اثر الصدمة من شفته سحب اقسام وهشم ظهر وراس حنين بالرصاص

تاركها تسبح بدمها الغرگ ارضية الحديقة ببحر مال دم

***************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.