الموت الحي الفصل السادس وثمانون 86 - بقلم براء الموسوي

مرحبا حبايبي العسل شلونكم❤️❤️

•••••••••••••••••••••••••••••••••

"دين تُدان ، تُفعل تُجازى "

••••••••••••••••••••••••••••••

#الموت الحي
#للكاتبة براء الموسوي

فاضل : جنت اجي بسيارتي للمحافظة واروح لجامعتها اخذها وو واروح للـ لواحد من بيتونا

ببـ بفترتها جنت ككـ كايللها إني اريدها وببـ بس اتخرج اخطبها و وههـ هي اامنت بيه واطتني
روححـ روحها ععـ على هذا الاساس

اا استمرت ععـ علاقتنا ببـ بعض 3 سنوات ومحد چچـ جان يدري بينا

للـ لحد ما اا اني حبـ حبيت غفران بالكلية وهي حبتني
و وممـ من ضضـ ضمنت انُ غفران رايدتني مثل ما اا انـ اني رايدها

قـ قررت ارجع للمحافظة وانهي ككـ كلشي بيني وبين زهراء ببـ بس انصدمت بخبر حملها ممـ من فؤاد

بوكتها خفت اا ارجع واعترف بفـ بفعلتي وياها ويذبحوني اخوانها الي همه اصدقاء عمري للـ لو يجبروني اتزوجها وساعتها راح اخخـ اخسر غفران

فأخذت قرار إني اغلس وما اخلي لزمة على روحي وارجع ما دام هي رفضت تذكر منو الشخص الغلطت ويا

والزاد إصراري اكثر قرار ابويه بزواج ياسر منها حتى يستر عليها ويحميها من اهلها

تتـ تالي صصـ صدمني خبر ممـ موتها مذبوحة على ادين اخوتها ببـ بعد ما ياسر رفض يتزوجها

ععـ عشت ععـ عمري اذب لوم موتها ععـ على ياسر وحاولت انسى ونسيت وتزوجت

كل وعبالي إني فريت بعملتي وخلصت من الموت والفضيحة

اا اخذت البنية الاحبها وو والله رزقني منها 3 بنات غغُ غنني عن الدنيا كلها وراوني الجنة واني عايش

تتـ تالي دارت الدنيا ودارت ورجعتلي ششـ شايله حوبة زهراء الـ الطلعت ببـ بأعز ماعندي

بناتي ، حبيباتي ، انيساتي وفرحتي

وو والـ اليوم اكتشفت إنُ الفضحية الهربت منها قبل 27 رجعتلي وو واني الصنعتها بإيدي

والـ الموت العشت عمري ااا اخاف منه ششـ شكله صصـ صار قريب ككـ كلش قريب

ولهذا السبب اني جمعتكم حتى اطلب منكم تبرولي الـ الذمة وتغفرولي و وتتـ تدعولي الله ييـ يغفرلي الذنب السويته

ييـ يمه ادعيلي آني خايف ممـ ما اريد اتعذب بگبري وينتهي ممـ مصيري بجهنم

زبيدة : ختم كلامه ومرر عيونه على الكل بطريقة مخيفة يقشعر الها البدن

وبعدها حاول ينطق الشهادتين بس ثگل لسانه وما گدر حتى ينطق اول حرف من الشهادتين

وانتهى بي الامر يصارع سكرات الموت ويغادر الحياة بروح محملة بالذنوب والكبائر

مات عمي فاضل ومات ويا كلشي ببيت النوح

بيبيتي تدمرت دمار وخيم الحزن على ملامحها الحلوة وجدي اكتفى بإنه يعتكف على نفسه

ومن اللحظة الي شهك بيها عمي فاضل انفاسه الاخيرة والنوح ما عاد نوح

ترك الشغل والاملاك والفلوس وكلشي بأيد عمي عبدالله وانعزل على نفسه بالمكتب

لا گمنه نشوفه ولا حتى نحس بي عايش ويانه وعمي عبدالله مو اقل من حالهم

عمي فؤاد تكفل بفاتحة عمي فاضل وسواله عزاء ما سوو لشيوخ وعمتي بيداء وبدرية تكفلن بفاتحة النسوان

وبالعزائين ما حضرو لا بيبيتي ولا جدي ، الكل جان عاذرهم عبالهم متأثرين على موتت ابنهم

ميدرون الوجع الي انضاف على وجع موته عليهم شنو

اما هيام ومنال خوات زهراء الله يرحمها فذني بعالم ثاني

الصدمة الوكعت على راسهن مو سهلة وهن يعرفن انُ الشخص الجان طول عمره مكابلهن وكاعد هو نفسه
الچان سبب موت اختهن العزيزة

والأدهى من هيج وساطة خوال هارون القتلة وفزعتهم لفاضل ، صديق عمرهم الجانو مستعدين يفدو برواحهم وهمه راضين

والي بيوم وليلة طلع هو نفس الشخص الخله اديهم تتلطخ بدم اختهم ، نفس الشخص الصارلهم سنين يدورون عليه وعجزو يلگو

اثاري ربنا زارعه گبال عيونهم ومغطي على قلوبهم في سبيل لينكشف ويعرفو حتى تفتر الدنيا ويصير هالحدث العظيم هذا

عجيبة هالدنيا من تدور ، تصير تخوف ، حيل تخوف

تنهدت وتجيت راسي على جتف دادا واني اباوع على خالة وئام الكملت صلاة وكعدت تندعي

باوعت لديمة الطلعت تمشي على كيفها ، حبيبتي الحمدلله بعد مرور 4 شهور على حادثها كدرت
توكف على رجليها من جديد

ديمة : عفيه متطلعون لهالمسكينة تشوفون شبيها تره ورمت گلبي من القهر

زبيدة : شبيها ؟

ديمة : كل شوية تشمر شباك غرفتي بحصو وتضل تصيح حنين فتحيلي الشباك

خلي واحد منكم ياخذها لبيتها خطية كسرت خاطري
والله لو اگدر اني اطلعلها

زبيدة : لا وين تطلعين ، كعدي انتِ اني طالعتلها ، فتحت باب البيت وطلعت لكيتها واكفه يم شباك ديمة

لابسه دشداشة سودة وشامره حجابها بالكاع وكالعادة لازمه دشداشتها المدمايه بأيد وبالأيد الثانية لازمه حصوايات وتشمر الشبابيك وتصيح حتى حنين تطلعلها

تمشيت يمها وهي من شافتني ابتسمت

غفران : وين صرتي حنونه صارلي ساعة اصيحلج

زبيدة : دنكت اخذت حجابها خليه على راسها وحاوطت جتافها باديه ممشيتها

حاجتني وهي تضحك

غفران : راح تجين ويايه مو

زبيدة : هزيتلها راسي

غفران : هههههه تدرين حكتلج بلوز ابيض ادري بيج تحبين هذا اللون

زبيدة : عاشت ايدج يله هسه خلي ندخل وبعدين عود نشوفه

دخلتها لبيتهم ولكيت ممرضتها كاعدة بالطرمة تراسل وبس شافتني كامت

اشرتلها تكعد بمكانها ومشيت بغفران لداخل البيت ، كعدتها بغرفتها وصبيتلها مي بالكلاص البلاستك حتى تشرب ومتجرح نفسها

شبعتي ؟

غفران : عاشت ايدج يمه حبيبتي اي شبعت

زبيدة : طبطبت على ايدها واجيت ابتعد بس فزيت من جرتني عليها وبجت

غفران : حبابه حنونه لتروحين خاف يشوفج فاضل ويزين شعرج ويطلع دمج

خليج هنا يمي اني اضمج بالكنتور وما اخلي يضربج والله حبابه حنونة حبابه لخاطري لتروحين

زبيدة : غمضت عيوني متنهده بقهر ، كسرت خاطري شلون كامت تبجي خطية

مسحت دموعها وابتسمتلها محاولة اطمنها

لتخافين ما راح اروح وفاضل اصلًا مسافر ما موجود هنا

غفران : صدك ما موجود

زبيدة : اي واني راح اروح اصيح لأسواق ولغزل حتى نصب غدة ونتغدة سوه ، شتكولين

غفران : اي اي حلو نكعد سوه

زبيدة : اي طبعًا نكعد سوه بس علما اصيحلهن ونصب انتِ تمددي وتغطي زين خوش

هزتلي راسها ، ابتسمتلها ورفعت الغطة غطيتها وطلعت للطرمة وعطت بالممرضة

كوميييي اوكفييي

الممرضة : ليش تصيحين

زبيدة : عزيزتي احنه جايبيج لهنا حتى تعتنين بالمريضة الجوه مو حتى تكعدين تكنكين وتطگيلي بعلجج

شنو معناها عايفة المرة المريضة تطلع وحدها بله صار عليها شي ، تكهربت ، حركت نفسها ، شردت من البيت
وينج عنها انتِ

الممرضة : غافلتني وطلعت والله

زبيدة : لا والله لعد انتِ هنا شنو دورج غير تراقبيها !!

اسمعي حبيبتي تره انتِ هنا وظيفتج دتاخذين عليها راتب وتره اذا مجاي تأدين هالوظيفة على اتم وجه معناها اكلج كله حرام في حال لو مجنتِ تعرفين

فياريت انوب تنتبهين على نفسج حتى لتضطرينا نستغني عن خدماتج بعد

وهالحالة لوما متكررة اكثر من مرة مچان تجرأت اجي واحجي وياج بس انتِ مصختيها كلش

هاي اول واخر مرة اشوف غفران بره بهالمنظر والله اذا تكررت هالحالة بعد اطردج منا افتهمتي

وهسه امشي انطيها ابره مهدئة ، على حد علمي هسه موعد نومتها ، انطيها دواها وخليها تهدئ علما يرجعن
بناتها من الكلية ويبقن وياها

هزتلي راسها ، عفتها ومشيت طالعة من البيت ، شفت اشواق وغزل يمشن من بعيد

غزل : انتِ جنتِ ببيتنا ، شعندج ؟

زبيدة : امجن جانت بره تضرب البيوت نفس كل يوم ، فطلعت ارجعها وحاجيت الممرضة السخيفة تنتبه عليها

اشواق : هاي وتالي وياها اني چم مرة كتلها تنتبه

زبيدة : ما صار شي اني هسه رزلتها وطلعت ، لتحاجنها انتن

امشن روحن للبيت واني هسه ادزلجن غداجن بأيد العاملة

اباوعلهن صفنن بوجهي

رفعت حواجبي مأشرتلهن ، شبيجن صفنتن ، امشن ارتاحن وهسه غداجن يوصلجن

عفتهن ورحت لبيتنا ، طلبت من العاملة توديلهن غده وكعدت

ديمة : هاا وديتيها

زبيدة : اي بس والله كسرت خاطري ، هاي اول مرة احجي وياها وياريتني ما حاجيه

المرة عقلها منتهي وتهذي ، هي والطفل سوه والله ، كل ادراك ما عدها وانوب عبالها اني حنين وجبلت
بيه ما خلتني اطلع وتبجي مردت گلبي مرد والله

وئام : إلهي لتجعلها شماته عليه ، والله العظيم اني لا جاي اتشمت ولا اتشفى بيها بالعكس مقهورة عليها

بس حرگة كلبها على ضناها رجعتني لسنين بعيدة ، حيل بعيدة

وگت الي استشهد عمجن وقرر جدجن يزوجني لواحد من ولده ، لزمني هي وهيام ومنال مددني بالمطبخ وطاحلي تدفر ببطني

حتى اطرح وميضطر واحد من رجولتهن ياخذني ، ابد ما انسى شحاطة غفران السودة ام كعب البسمار شلون جانت تدوس حيل ببطني في سبيل اطرح

لو ايدها التعت بشعري وتركع راسي بالكاع حتى افقد ويموت البطني

يمكن هسه لو عدها وعي احتمال اجي على بالها وتكول لو ادري الدنيا راح تضوكني نفس مرارة الحال ما جنت راح احاول اخسرج ضناج العزيز الغالي

زبيدة : اباوعلها تمسح بدموعها ويرجعن ينزلن

وئام : الف رحمة على والديج يا وسيلة هاليوم وكل يوم ، ربي يحاوطج بريحة الجنة بحق الحبيب محمد

لوما انتِ يا طيبة چان اني هسه حال الضيم حالي
بعد گلبي يا وسيلة الوحيدة انتِ الما اذيتيني ولا شفت منج شر

زبيدة : ابتسمت بخفه واستأذنت منهم وطلعت راجعه للبيت

دخلت للبيت الي خيم عليه الحزن والهدوء على غير العادة ، باوعت لعمتي بدرية الكاعدة تقره قرآن وصعدت فوك

فتحت باب غرفتي ودخلت ، رحت سبحت كرسي صعدت جبت جنطة ونزلت

اخذت الجنطة وتمشيت كاعدة على الجرباية ، فتحت الجنطة وصارت صورتها گبالي

سحبت الصورة ورفعتها لوجهي ، اباوع لأبتسامتها ولغمازاتها الداخلات بخدودها وهي تضحك

مشيت عيوني على ملامحها وغمضت عيوني متخيله روحي حاضنتها ودافنه راسي بركبتها ادور على ريحتها

حسيت بأيد تمسح على جتافي ، وراس ينسند عليه

هارون : امج ؟

زبيدة : حلوة مو ؟

هارون : تشبهلج

زبيدة : اعرف

بس هي احلى وروحها انظف ، چان عدها گلب عظيم
يحتوي كل الناس بمصائبهم

جانت نظيفة لدرجة انها متگدر تكره احد ولا تحقد على احد مهما سوه وياها ، ابتسمت وحجيت بغصة

ويمكن لهذا السبب الله خذاها لان وجودها بهالدنيا الحقيرة خسارة ، خسارة على نقاوتها وصفائها الما شفت منه بالدنيا

هارون : اني سامعج اكثر من مرة تگليلي انُ ريحتي مثل ريحتها

زبيدة : هزيت راسي وانداريت عليه شابكته ، خليت انفي على منطقة ركبته وغمضت عيوني مستنشقة ريحته بحيل

جانت هيج ريحتها بالضبط ، ريحة حنية ودفو ، كلما اشمها احس الدنيا بعدها بخير

وسبحان الزرع نفس هالريحة بيك ، ابتعدت وباوعتله ، تدري اني كلما اشمك اتذكرها

رغم إني ما ناسيتها ابد بس افرح من اشمك لان احس اكو شي منها حتى بعد وفاتها داگدر احس بي

واني كتلك سابقًا وحرجع اكلك هسه ، هارون اني حبيتك لان التمست بيك شي من امي

وهذا الشي اني مستعدة اضيع الدنيا وما بيها ولا اضيعه

هارون : هو الي ما ممكن يضيعج مو انتِ

واذا جانت ريحتي تذكرج بأمج

فإنت كلج على بعضج تذكريني بذاك الطفل البريئ ابو تسع سنين الما هامه من الدنيا شي غير إنه يدور على السعادة ويعيشها

واني هالشعور حسيته وياج ومستعد اضيع الدنيا وما بيها ولا اضيعه على كولتج

زبيدة : مسحت على لحيته وهو باس باطن ايدي

انداريت اضم الصورة وارجعها ويه باقي الصور فوك الكنتور ، ما اريد اشوفهن كدام هارون وابجي

هارون : جيبي وين صاعدة اني اخليهن

زبيدة : نزلني من الكرسي واحذهن حطهن فوك الكنتور

هارون : تعاي حبيبي

زبيدة : مشيت ويا ، كعد على القنفه وكعدني بحضنه

هارون : شبيج ضايجة شو احسج اليوم مو على بعضج ولتكليلي هرمونات دورتج مو هذا موعدها

زبيدة : لا والله ما بيه شي بس احس روحي متكأبه هالفترة

لتخلي ببالك حبيبي اني زينة والله ولو اكو شي انت چان اجيت سولفتلك بسرعة تدري بيه ما اضم عليك شي

هارون : اذا على وضع البيت فعادي الصار مو قليل واكيد ردة فعلج طبيعية

زبيدة : صدك هارون ردت اسألك سؤال بس دائمًا يروح عن بالي وهستوني تذكرت

هارون : سألي

زبيدة : انت ملحك على خالتك زهراء لو لا

هارون : اي ملحك عليها واتذكر وكت الصارت شغلتها جنت بالثالث ابتدائي

زبيدة : زين هي جانت حبابة لو لا شو كلها تمدح بيها بغض النظر عن الصارلها

اباوعله تحسر وجاوبني

هارون : شوفي زبيدة ، خلي ببالج شغلة ماكو وحدة حبابه تنطي روحها وحطي على جملتي الف خط احمر

هي لو حبابه متبيع شرفها وسمعتها علمود واحد گلها احبج

واصلًا تدرين اني ما استغربت من حجة عمي فاضل لان جنت ادري

زبيدة : فتحت عيوني ، جنت تدري !!

هارون : اي ، جانت تجي خالتي العصريات تاخذني وياها لبيت جدي وبحجة يجي عمي فاضل حتى يرجعني للبيت

وهي تطلعني اله ويختلون سوه بالبستان ، يمعودة انتِ شتحجين حبابتيش هاي

زبيدة : استغفر الله زين ما خافو واحد يلزمهم او يشوفون يعني ماكو هيج جرئة

هارون : چانو يضحكون عليه يكلولي خلي نلعب لعبة الملك والملكة والحارس وعلساس هي ويا الملك والملكة والمملكة مالتهم البستان واني الحارس الاوكف احرسهم خاف يجي احد

واني جنت طفل وبسهولة ينضحك عليه بس من كبرت شويه ووعيت افتهمت معنى التصرفات الجانو
يتصرفوها

زبيدة : استغفر الله ياربي انوب حتى الطفل البريئ ما سلم من ذنبهم

اعوذ بالله الواحد شلون يكدر يتعدى حدود رب العالمين ويسوي هيج فعل لا وبنص اهله وناسه
بلا خجل ولا خوف

يكلك اذكرو محاسن مواتاكم بس اذا الموتى تلث ارباع حياتهم حرام بحرام فيا محاسن نريد نذكرها

__________________________________

بصائر : كاعدة اقره بالليل وحسيت نفسي مشتهيه شي حلو ، بالبداية غلست ورجعت اكمل قرايه

لان هالفترة جاي انظم اكلي علمود صحة الطفل
وما اريد اخربط وااذيي نفسي

بس حجيي وتخطيطاتي كلها تبخرت من حسيت روحي كامت تلوب على شي حلو

والله حتى قراية ما كمت اعرف اقره

ذبيت الملزمة وكمت رحت للمطبخ ، فتحت الثلاجة لكيت علاگة نمنمات طلعتهن وفتحتهن ادور لكيت نساتل وكيكات

رجعتهن هازه راسي ، لالا مو هذا الاريده

طلعت من المطبخ افتر بالصالة واحس روحي حرانه اريد اعض شي بس ما اعرف شنو هو

سمعت باب البيت ينفتح ويدخل حليم

حليم : السلام عليكم ، عفية ما دامج كاعدة اطيني اي شي اكله اليوم الشغل لفوك راسي ومابيه اوكف من الجوع والله

بصائر : مسحت على وجهي وجاوبته ، وعليكم السلام اي ميخالف هسه احميلك العشه

انداريت دامشي واستوقفني صوته

حليم : اوكفي اوكفي ، هاي ليش تلهثين هيج وشبي وجهج وصدرج هيج حمر

بصائر : هفيت على وجهي وجاوبته ، وو والله ما ادري بس فجأة حسيت بروحي محترة واريد اكل شي حلو
الظاهر بدت عندي النساوة

حليم : وعليمن تلهثين ومخبوصة ، مشتهيه شي حلو امشي فتحي الثلاجة تارسها الج اني حلويات ونساتل

بصائر : لالا ما اريد نساتل وهالسوالف ما مشتهيتهن

حليم : لعد شمشتهيه حلويات مال بيت ؟ تردين اروح هسه لأمي تسويلج الحلاوة العاجبتج تره عادي متكول شي هي

بصائر : لالا ما مشتهيه حلويات مال بيت

حليم : لعد شمشتهيه

بصائر : ما اعرف بس احس روحي اريد اكل شي حلو وبارد وو وكون بي شي منعش

حليم : عصير ليمون بالنعناع

بصائر : ااااكل ااااكل العصير ينوووكل

حليم : وشبيييج تصيحييين

بصائر : مو انت ما جاي تفهمني

حليم : وشمدريني اني شنووو هي حزروة چمالة عليه انتتتِ فوك اكلان التبن الماكله اليـ...

هاي ليش جاي تعضين بأصبعج ؟

بصائر : ما ادري اسناني جاي يوجعني اريد اعض شي

اباوعله قدم ايده مني وابتسم

حليم : هاج عضيني هم حلو وهم قابل للعض واذا تحبين بيه مجال اسويلج انتعاش

بصائر : صفنت بوجهه وهو من شاف ردة فعلي بلع ريگه ونزل ايده

حليم : احم راح اروح ابدل واعلي التدفئة ثلجت من البرد وعشه ما اريد ارتاحي انتِ رايح انام

بصائر : صفنت مسترجعه كلامه ، لحظة لحظة اوكف
عرفت اني شمشتهيه

حليم : صلِ على محمد وال محمد ، بشري شطلع المحروس رايد بهالليل

بصائر : موطة بالليمون

حليم : بشرفج

بصائر : والحسين

حليم : سلام الله عليه بس خليني اذكرج الدنيا بعدها باردة وينج وين الموطة بهالبرد

بصائر : ما ادري بس مشتهيتها راح اموت واحجي جد ما جاي ابالغ صدك محتاجتها

حليم : متكدرين تصبرين علما يجي الصيف

بصائر : يا صيف هذا انت صدك تحجي

احس جسمي ياكل بيه ، ولو اكدر اصبر ما شفتني الوب هيج

حليم : تكدرين تنتظرين ساعة

بصائر : هاا

حليم : ساعة ساعة ، تكدرين تنتظريني اطلع اجيبلج واجي

بصائر : صدك والله

حليم : مشاقي وياج قبل ؟

بصائر : هاا لا بسـ...

حليم : لتبسبسين كعدي وانتظريني شويه اجيبلج واجي

بصائر : حليم

اندار عليه واشرلي

حليم : هااا

بصائر : عفية مو تجيبلي من الاسواق

حليم : لعد منين اجيبلج بس لا ترديني اني الاسويها

بصائر : لا يمعود اني استنكف اكل من ايدك بس اقصد جيبلي من محل يبيع موطة مو من الاسواق

حليم : ولو جاي تجاوزين بس ميخالف رايح اجيب بس مو الج لهذا المسكين البطنج

بصائر : طلع واني كل عقلي كعدت انتظره ، اباوع للملازم وضميري يأنبني بس ما اگدر اكوم

والله نص ساعة وسمعت باب البيت ينسد ، كمت بلهفة فتحتله الباب لكيته شايل هواي علاليك

حليم : هاج عيني بالعافية

بصائر : اخذت منه العلاكة وكعدت لكيته مشتريلي علبة جبيرة ولأن الجو بارد ممايعه الموطة

اباوعلها ماليه العلبة وعليها بسكت مال كبوس ، كمت للمطبخ جبتلي خاشوكة جبيرة وطلعت لكيته جايب عشه ويا وكاعد گبالي يفتح العلاليك

كعدت بمكاني وجريت العلبة اخذت كميه خليتها بحلكي وغمضت عيوني

كلمة وحدة طلعت مني ، ااااالله

يمه احس روحي اول مرة اكل ، هيج فد شعور غريب بس حلو

اكلت خاشوكة ثانية ومطگت ، شلت راسي لكيته خال ايده على خده وصافن عليه

اشرتله شبيك ؟

حليم : لهالدرجة عجبتج

بصائر : اذا اكلك احس نفسي اول مرة اكل موطة تصدكني

حليم : حلو احساس الحمل

بصائر : اكلت وجاوبته ، صراحة ما اعرف وهذا اول شعور غريب اجربه خلال هالفترة

كملت اكل وتنهدت مباوعتله ، شكرًا

حليم : على شنو ؟

بصائر : لان طلعت بهالليل وجبتلي الشي الاريده

حليم : ولا يهمج ما سويت شي

بصائر : هزيت راسي وكمت ماخذه العلبة وياي

ثاني يوم چان موعد مراجعتي يم الدكتورة ، العصر اجتي سهير ويه حليم ورحنه للطبيبة

باوعت لسهير الي منداره واصلًا متباوع بوجهي ، رغم مرور اربع شهور على الحادثة والي صار بس بقى موقفها نفسه تجاهي هي واهلي وأهل حليم

جنت متصورة البُعد والايام تخلي الواحد ينسى او على الاقل يخف الزعل الي بداخله بس طلعت غلطانة

حليم : بصائر

بصائر : باوعتله ، هاا

حليم : وصلنا يله نزلي

بصائر : اي ، فتحت الباب ونزلت ويه سهير

دخلنا للعيادة وكعدنا ننتظر سرانا يوصل ولحسن الحظ چان اسمنا ثاني اسم فبسرعة دخلنا

سوتلي الدكتورة مجموعة تحاليل واخذتلي سونر حتى تطمئن على الجنين

الطبيبة : لالا ما شاء الله صحة الجنين ممتازة وصحة الأم ايضًا جدًا جيدة

وهم الف مبروك حتنوركم بنوته حلوة بعد كم شهر ان شاء الله

بصائر : اني حامل ببنية !!

الدكتورة : اي هياتها الوكيحة تتحرك يمه يمه مبينه حتشيب راسكم من الوكاحة اذا طلعت

هههههه مبارك الكم حياتي ، ان شاء الله تكوملينا بالسلامة انتِ والكتكوته الصغيرة

بصائر : انتبهت لسهير طول ما الدكتورة تحجي هي تباوع على جهاز السونار وعيونها مدمعة

شتت نظري عنها وابتسمت للدكتورة بخفه وكمت تشكرت منها اني وسهير وطلعنا

لكينه حليم منتظرنابالسيارة صعدنا وهو حرك

حليم : هاا شلونها صحتج

سهير : مبروك راح تجيكم بنوته

حليم : بنية !!

سهير : ليش شبيها البنية

حليم : لا مو هذا قصدي بس احنه خلفتنا كلها ولد فأستغربت من كلتي بيها بنية

سهير : شيجي من رب العالمين الحمدلله اهم شي الصحة السليمة للطفل

حليم : اي والنعم بالله

بصائر : حسيت بي يباوعلي ، ضليت منطيته ظهري واباوع من الجامة

وصلنا سهير للبيت ورجعنا لبيتنا

حليم : مبروك

بصائر : على شنو

حليم : على معرفة جنس الطفل

بصائر : وليش تباركلي الي المفروض تبارك لسهير الطفل هذا الها ولجياد لا إلي ولا الك حتى تباركلي

فتحت باب السيارة ونزلت داخلة للبيت وهيج مر الاسبوع

_______________________________

معين : شلون تحسين نفسج هسه

ديمة : استشقت هوى من البستان بعمق وجاوبته

جسديًا زينة بس نفسيةً لا بس داحاول اقاوم حتى اتعافى

معين : ديمة ليش متقبلين تراجعين عند طبيب نفسي
والله موزين عليج هذا الكبت

ديمة : ما راح يفيد صدكني ، اني من خلال تجربتي البسيطة ويه ظروف الحياة اكتشفت انُ الانسان هو الطبيب النفسي لنفسه

واني داحاول اعالج نفسي بنفسي وما اريد واحد يساعدني اني اهل لهالمهمة

معين : ليش ؟

ديمة : وكفت وانداريت عليه ، ببساطة هالشي يريحني

اذا چان الكلام يوجع فالافضل الي إني التزم الصمت حتى لا احس بوجع حتى لو چان بعد هالوجع راحة

طبطبت على ايده وانتو هم لتشيلون همي تره اني بخير ما دامي بينكم

اخذت ايده خليتها على جتفي وحاجيته ، يله امشينا نرجع للبيت اني تعبت من المشي

معين : اشيلج ؟

ديمة : ابتسمت لا شنو السالفة حبيبي اگدر امشي بس تعبت شويه وهم بردت

معين : يله لعد امشينه

ديمة : لزمت ايده ومشينه داخلين لجوه بس وقفونا الحراس بالباب وبلغونا انُ عمي عبدالله يريدنا

رحنا لبيت جدي لكينه عمي كاعد ويه هارون وزبيدة وبيبي وامي ودادا ينتظرونا

سلمنا وكعدنا

عبدالله : تعاي حبيبتي كعدي بصفي

ديمة : كمت كعدت بصفه وهو حضني وباسني من راسي

عبدالله : شلونج عمو حبيبتي

ديمة : الحمدلله زينة

عبدالله : اكيد زينه لو تضحكين عليه ، احجي ملعونة جاي تجذبين على عمج

ديمة : ابتسمت لا والله عمو اني زينة

عبدالله : الف الحمدلله ، عساج دوم يبعد عمج

شوفي بويه اني الصارلج والله ما قابل بي والله شاهد لوما ام رجلج مرة جبيرة وواكفه بعيني چان وديته
لأمين وره الشمس بس المرة الجبيرة رادعتني عنه

واليوم تفاجئت من جدج بلغني انُ شيخ عشيرته لرجلج متصل عليه ومبلغه انه جايب مشيه وجاي عگب باجر

زبيدة : والمن المشية ؟!

عبدالله : على اساس يردون يعزون جدج وهم حتى يحجون بموضوع ديمة أمين

زبيدة : شنو يمه ما سمعت

ليش هو اصلاً اكو موضوع واحد بس بينه وبين ديمة حتى يحجون بي !!!! لا والاخ عنده عين وجرئة يجي ويطلب ينحجي بموضوعه اليخزي

يعني عجيبة الصلافة العند هالناس والله عجيبة

عبدالله : يا عمي يا حبيبتي الامور متنحل هيج خلينا نفتهم من الجماعة هسه شخسرانين احنه

زبيدة : ماكو هيج حجي ، جية هالناس مرفوضة من الاساي وديمة مستحيل ترجع لأمين وشحدها اصلًا تكول اريد ارجعله

هارون : كافي زبيدة الموضوع هذا يم اختج مو يمج
لتضلين تمسلتين من يمج

وئام : لا بالعكس كلام زبيدة هو الصح والي لازم يتنفذ ، اني عن نفسي لا يمكن اخليها ترجعله بعد السوا بيها

اني بنتي غالية وما ممكن ارجع اذبها بالنار مرة ثانية
هالمرة الله ستر ورجعتلي عدلة مرة ثانية اخسرها واضل اعضعض اصابعي ندم

امين انتهى بالنسبة النا ولديمة ولا اني ولا اخوها ولا خواتها ولا ام حسن نقبل ترجعله

عبدالله : ادري هي عركة يا ام معين شبيكم واحد يصد والثاني يرد

تره جاي نتفاهم مو نتعارك احنه

معين : هذا الموضوع مابي تفاهم عمي ومن البداية مخصوم ، ديمة متريد ترجع لأمين بعد واصلاً جيته كلش مالها داعي

زبيدة : وعلى هذا الأساس لازم تبلغو يسحب اهله ويبتعد الف متر عنه وميراوينه وجهه بعد

ديمة : اباوعلهم ناس تجر وتعر ، من جهه زبيدة المتفضة هي وامي ورافضات فكرة وجود امين اصلاً
ببيتنا

ومن جهه ثانية عمي الكاعد يقنعهم ويحاول يهدئ الاوضاع ، ومن بين كل هذا ولا واحد بيهم اندار عليه وسألني عن رأيي

كل واحد بيهم يفتي من يمه وكإنهم تعودو يكونون همه المقررين عني ، ناسين إني بشر حالي من حالهم وإلي رأي والموضوع يخصني والمفروض يسألوني
عنه قبل لا يحجون بكيفهم

تحمحمت حتى الفت انتباههم وباوعت لعمي ، عمو خلي الجماعة يجون

زبيدة : انتِ شكاعدة تمسلتين بسسس لا حنتي و تردييين ترجعيييله لج انتِ ماعندج كرااامة

ديمة : كمت وكفت كبالها ، انتِ مو رجعتي لهارون بعد كل السوا بيج

تقبلين اكول عنج ماعندج كرامة ؟

ليش من ناحيتج القبول يسمى حب وتضحية ومن ناحية غيرج القبول ذلة وقلة كرامة

ياريت انوب قبل لتنعتيني بإني عديمة كرامة تباوعين لنفسج ولحياتج

اما حياتي آني فآني الاتكفل بيها مالكم علاقة انتو ، مو طفلة اني ولا ما اكدر ادبر اموري

عمو بلا زحمة عليك بلغ جدو إني موافقة وخلي يجون ، يله من رخصتكم

عفتهم وطلعت راجعة لبيتنا

____________________________

بصائر : نزلني السايق بباب البيت ، نزلت وفتحت الباب داخلة لجوه

سديت الباب ورايه وتمشيت بسرعة حتى اطلع الاكل من الثلاجة لان ميته جوع

دادخل للمطبخ وفزيت من شفت وحدة لابسة دشداشة حمرة ومدخلتها على جوانب ملابسها الداخلية بحيث جسمها كله مبين

اباوعلها اندارت عليه ، صفنت بوجهها ، هاي شعدها هنا ؟

سجى : الله يساعدج ست

بصائر : انتِ شجابج هنا !

سجى : ست رميم دزتني ابقى هنا

بصائر : وشنو المناسبة ؟

سجى : استاذ حليم طلب منها

بصائر : لا والله

سجى : اي والله ست حتى سأليها

بصائر : دروحي بدلي ملابسج وحجابج هذا لو تلبسي مثل الاوادم لو لتفيكيلي بي

ولبسج كله اريده فورمل ممنوع اشوفج لابسة دشاديش وتراكات انتِ مكاعدة ببيت ابوج افتهمتي

سجى: صار ست

بصائر : امشي يله بدلي ملابسج وبعد ممنوع تبقين بهالمنظر

اباوعلها دنكت وطلعت من المطبخ ، يا الله شكد اكره حركات التمسكن هاي ، مسحت على راسي ودخلت لغرفتي سبحت وبدلت ملابسي وطلعت اصلي

كملت صلاة وكمت دالم السجادة وشفت حليم يدخل

حليم : السلام عليكم

بصائر : خليت السجادة على صفحة وكمتله ، وعليكم السلام

بلا زحمه ممكن اسألك سؤال ، انت منو عتب عليك وكلك جيبلي زفت الطين لهنا

حليم : شتقصدين ؟

بصائر : اقصد منو يعني ست الحسن والجمال سجى منو كلك تجيبها لهنا

اني انت كلك على بعضك ممتحمله وجودك ولعبانه روحي منك انوب عليه المنافقة هاي تگابلني وتكعد

حليم : انتِ ملاحظة نفسج كلش جاي تتمادين بالحجي وياي ، تره لا عبالج من تشوفيني ساكت معناها خايف منج

وحق ربج اني اگدر اشيلج والطج بالكاع وانعل ابو ابو اليطلع وراج

بس انتِ حامل وادري وضعج صعب فميهينلي بيج حتى الحجاية المو حلوة ومع هذا ما مسموحلج تستغلين تقديري لوضعج وتتجاوزين حدودج وياي

والعاملة البرة مو اني الجبتها ، مجرد إني جاي اشوفج تتعبين هالفترة ، ترجعين من الدوام تطبخين وتنظفين وهم وراج قراية وزيدي عليها الحمل

كل ذني جاي اشوفهن مأثرات عليج وما جاي يخلنج ترتاحين فمن باب الإنسانية بحقج طلبت من امي تدزلنا عاملة لا على التعيين تبقى عدنا وتخدمج منا لمن تولدين

واني اصلاً ما ادري بإمي راح تدز هاي المدري شسميتيها وحتى لو دزتها

فشنو المشكلة بالموضوع حتى هيج فاير دمج وتلكيتني تجاوز بدون اي سبب

رجاءً انوب انتبهي على ملافضج حتى لتضطريني تجرحج واذيج وانتِ بوضع نفسي متنطيني اغثج
بي

بصائر : اباوعله عافني ودخل للحمام راكع الباب ورا

تحسرت وطلعت بره ، حميت الاكل ومن حمه صبيت وطلعت اصيحه لكيته كاعد بالصالة يكلب بالتلفزيون

احم يله كوم تغده

حليم : ما اريد

بصائر : ليش ؟

حليم : ما اشتهي

بصائر : كعدت بصفه ولميت رجليه متنهده ، اني اسفة

ما چان بقصدي احاجيك بهالأسلوب بس اني مضغوطة هالفترة وعندي تراكمات تجبرني اكون
اوفر برداة فعلي

واليوم وجود هالبنية استفزني لأن ما احبها بواسطة شفتها منافقة وتحب تسوي مشاكل ومن شفتها هنا
تنرفزت وصارت بوجهك

اعذرني والله ما چان قصدي اتجاوز عليك ، وهم بصراحة اني ممنونه منك هالفترة لان جاي تراعي
وضعي بهواي امور

وادري بيك هواي دتغلس عن تصرفاتي المستفزة بس صدكني مو بأيدي

يمكن هاي اول مرة افتحلك گلبي بس صدگني اني تعبانه من جهة علاقتي بأهلي الي خربت وللأن
عجزت اصلحها

ومن جهة ثانية تأنيب الضمير البديت هستوني احس بي ، يوم عن يوم يمر واني اشوف نفسي شسويت
بنفسي وبأهلي اكره روحي اكثر

ساعات اكول لو مرايحة وحاجيه لأخوية مو چان هو هسه مرتاح ، مو جانت ديمة مخسرانة صحتها واني السبب

وساعات ثانية اكول لا همزين كتله وخليته يعرف الحقيقة وهياتني كدامك صارلي شهور اعيش صراع
نفسي ويه ذاتي

ولحد الأن ما كدرت اصفى واعرف اني شنو موقفي الحقيقي بالضبط

حليم : اخوج باچر راح ياخذ شيخكم ومجموعة ناس من معارفكم ويروح لبيت جدج حتى يحل المشكلة الصايرة بين وبين ديمة ويرجعها

بصائر : وانت شمدريك

حليم : عبدالله مخابر ابويه ومبلغه واني من خابرت امين گلي انه ناوي يعتذر منها گدام الكل ويرجعها

بصائر : مدري ليش من سمعت بأمين يريد يرجع ديمة شي بيه فرح

ابد ما ضجت ولا فكرت للحظة إني ممكن اتمنى انها مترجع بالعكس بلحظتها تمنيتها تقبل ترجعله

ويمكن لو صدك ديمة رجعت لأمين راح اكون اني اسعد وحدة بالدنيا ، ما اعرف ليش بس يمكن لأن راح يكون ضميري مرتاح ولو شويه

حليم : هاا بشري كدرتي تحددين موقفج

بصائر : هزيت راسي

اي كدرت احدده ، اني ندمانه على كلشي غلط بدر مني واتمنى ديمة ترجع لأمين ويبدون بداية جديدة
حتى لو اكون اني بعيدة عن هالبداية

المهم إني اسمع أنهم بخير وعايشين سوه بدون مشاكل

تنهدت وباوعتله ، يله تكوم تتغدة حرجع احمي الغدة واصبه مرة ثانية ، رجاءً لتكول لا

حليم : يله هاي لخاطرج كايم

بصائر : شكراً

حليم : العفو

__________________________________

هارون : ما راح تنزلين

زبيدة : لا ما راح انزل

هارون : عود زعلانة من ديمة ؟

زبيدة : لا بالعكس بس هي كلامها صحيح ، فعلًا اني نسيت نفسي وتدخلت بشي ميخصني

وبكل الاحوال اني مالي حق اوصفها هالوصف واني جنت اتعس منها

و لا عبالك اني زعلانة منها ، لا ابدًا بس احس وجودي ماله داعي وما اريد بعد اتدخل وازعجها

كل واحد بينا واعي وفاهم وهم حر بحياته ، شلون ميريد يعيشها خلي يعيشها هو اعرف بمصلحته

بس انت انزل وابقى ويه معين تره معين عصبي وميتحمل بسرعة المقابل يگدر يستفزه وهو مريض
سكر ميتحمل انفعال

وهم وصي دنيا على ديمة لتخليها تبجي لو تنفعل هواي وهم ابرتها مالت الأنسولين خلي تاخذها
لتروح تتخربط

هارون : مو علساس متردين تدخلين بعد

زبيدة : هاا اني ما جاي ادخل بس هالأمور تتعلق بصحتهم يعني ما بيها شي اذا حرصت عليها

يله حروح احضرلك ملابسك ، رحت طلعتله ملابس انطيتهن اله وكعدت انتظره يرجع حتى يسولفلي الي صار

____________________________

دنيا : كاعدة اباوع لديمة الي ضامه اديها وتباوع للفراغ ببرود

شيخ عشيرة امين وخوالة اجوي قبل شويه واستقبلوهم جدي وعمامي وعمو يحيى والولد

شفت هارون ينزل من فوگ مبدل ، كمتله ، هاا
وين زبيدة

هارون : ما قبلت تنزل ووصتني اكلج تطين لديمة ابرتها

دنيا : ستوني انطيتهيا بس زبيدة شبيها صايرة ام عقلين محل زعل هسه

هارون : عوفيها انتِ هسه هي بعدين تهدئ وتنزل تصالح ديمة

المهم هسه ديمة خليج وياها وخاف امين يطلب يكعد وياها حاجيها حتى تقبل على الاقل تكون اجتمعت بي بعد الصار وفرغت گلبها ولو شويه

دنيا : ماشي

راح هارون واني كعدت قريب باب الاستقبال اسمعهم شيحجون ، الكل جان ساكت ما عدى رجال واحد جان يحجي

: بدايةً احنا جايين نعزيكم بوفاة ابنكم المرحوم فاضل ، الله يرحمة ويرجعل مأوى الجنة

النوح : شكرًا جزيلًا ويرحم امواتكم ان شاء الله

: شوف حجي اني اليوم جاي ومتعني طالبك لأول مرة وما اريدك تردني

النوح : طلبك لو متعلق بيه تشلع عيوني بس السالفة الجايني عليها تخص شخص غيري فتعذرني من هسه

: حجي احنه نعرف ابنه غلطان والغلط راكبه من ساسه لراسه والله يشهد آني لو عندي بنيه ورجلها
هيج مسوي وياي والله لأكسرله رجليه

بس يا اخي العزيز انتو هم بيكم صوج وبنتكم ما قاصرة ، يعني اكو وحدة تنخطب لواحد وتفسخ ومتگل لرجلها اني جنت مخطوبة

دنيا : صفنت على كلام الرجال وديمة گبل اندارت عليه مستغربة وكإنها دتريدني ااكدلها السمعته

النوح : مخطوبة شنو

: يا حجي حفيدتك من اخذت ابنه ما بلغته انها جانت مخطوبة وفاسخة وانتو هم من اجه خطب منكم ما بلغتو بهالشي

واني حسب السمعته سابقًا انتو وابو البنية ما جنتو على وفاق ومتدرون بهاي التفاصيل فالغلط من البداية من اهل البنية

ليش من البداية ما حجوله ، يعني حلوة بحقه يعرف من الناس أنُ مرته جانت عاقدة سيد ومنفصلة

صح هي ما بيها شي ومرته لا اول ولا اخر وحدة تفسخ بس يبقى الاستغفال حرام وميجوز

وهي لو كايلته والله ما چان راح يعوفها بالعكس احنه زلمنا يخافون ربهم وخوش اوادم

اني امين اعرفه والدنيا كلها تشهدله شكد انسان خلوق ومؤدب وماله شغلة بأحد ، رجال بار بأمه
واخوته وهو المُعيل الهم

بس شسوي الشيطان ركب راسه وخلا يتصرف هالتصرف التعبان

والله يشهد يا حجي وهذا كدامك يسمعني من اجه وسولفلي غسلته غسلة غسل ولبس وابد ما قبلت
عليه

لان سوايته ميسويها واحد شريف و مربى مثله ، بس نكدر تكول السوا ساعة شيطان وصدكني متندم عليها

وهذا كدامك اجاني براسه وگلي شيخ امشينا لأهل مرتي اني ندمان على السويته وعاض اصابعي من الندم هم

وهو لوما شاريها ويدري بيها خوش آدمية وتربية ناس والنعم منهم ما چان تعنى وجابنه حتى يتعذر
منها ومنكم امام الكل ويطلب السماح منها

واني جاي براسي واتمنى منكم متردونه الا واحنه مستبشرين خير وجنتنا ويانا

النوح : كرامتكم محفوظة وجيتكم على راسنا من فوگ واني لو عليه ما اطلعكم منا الا وانتو ماخذين التردو

بس كتلك الموضوع مو يمي ، اني رجال العليه اوصله لحفيدتي إن قبلت خيرً على خير وإن ما قبلت فهي حرة وما اگدر اضغط عليها

: زين تسمحولنا نحجي وياها واحنه مو غربة اني وويلادي بمقام جدها وعمامها وانتو اهلها وهي هم بنيتنا

النوح : امشي جدي هارون صيح لاخيتك خلي تدخل لهنا

دنيا : رجعت لوره وطلع هارون من الإستقبال صاعد فوگ شويه ونزل بأيده شي اسود اباوعله وكف گبال ديمة

هارون : كومي ديمة هاج هاي الصاية والجواريب لبسيهن وعدلي حجابج وامشي وياي يردوج جوه

ديمة : اخذت الملابس من ايده ودخلت للحمام غسلت ولبست ، عدلت شكلي وطلعت لاحكة هارون للإستقبال

دكيت الباب وفتحها الي هارون واشرلي ادخل

دخلت للإستقبال وصار بوجهي هو ، بسرعة درت عيوني عنه وگلت السلام عليكم ورحت كعدت يم معين

رد الكل عليه وحاجاني رجال جبير بگد جدي

: شلونج جدي ان شاء الله بخير

ديمة : الحمدلله بخير

: عساج دوم ان شاء الله

بوية انتِ اكيد سمعتي الحجي الدار بيناتنه مو صحيح

ديمة : هزيت راسي بإيجاب

: احنه اليوم اجينه نخلي ابنا يحب على راسج ويعتذر منج على الصار ونتمنى منج واحنه كلنا امل أنج تقبلين تردين لبيت رجلج وترجعين المياة لمجاريها بيناتكم

ومن هسه احنه جاهزين لكل طلباتج وشتردين احنه قبله حاضرين وركابنه سداده بإلي تردي

ديمة : شلت راسي باوعت لعيونه التباوعلي بلهفه ، جانت شفايفه تتحرك بخفه ، نزلت عيني على ايده ، انتبهت لابهامة يتحرك على اصابعه شلون الجاي
يسَبح

تنهدت وباوعت لعمو يحيى الي ابتسملي حتى يطمني

اخذت نفس وحجيت موجهه الكلام لشيخهم

عمو اني اقدر جيتكم وممتنه لوجودكم بس اني ماخذة قراري من زمان

اني اريد اتطلك واتمنى منكم تحترمون رغبتي ومتضغطون عليه

: ليش يا بنتي تهدمين بيتج وانتِ رجلج رايدج وشاريج ، تره يا بويه ماكو مرة ورجال ميصير
بيناتهم مشاكل

هي هاي الحياة بيها الحلو وبيها المر خوما احنه نضوگ منها الحلو ونستلذ بي ومن نضوگ المر
نجزع لو ونتبطر عليه

الله ما خلقنا كاملين يا بنتي وطبيعي نغلط والبي حظ بينه الي يتعلم من اغلاطة

ديمة : غلط عن غلط يختلف عمو ، اكو اغلاط متنمحي ولا بسهولة نگدر نتخطاها

والسوا امين مو شويه واني بصراحة اكتفيت من هاي العلاقة واريد اشوف حياتي وانهض بمستقبلي الي شبه ضاع بسبب المشاكل

وياريت متضغطون عليه اكثر من هيج ، اني قراري نهائي وغير قابل للتغيير

من رخصتكم

عفتهم وطلعت تاركتهم يسولفون بيناتنهم ، تلكتني دنيا بالباب حضنتني

ضليت واكفه بمكاني ماعندي ردة فعل ، باوعت لأمي
لكيتها تباوعلي وتبجي

ابتعدت عن دنيا وتقربت كعدت يم امي ، مسحت دموعها وحاجيتها

ليش تبجين

وئام : خفت ، خفت عليج لا تقبلين ترجعيله ويروح يموتج بحالة عصبية وساعتها شريد اسوي بلياج

اني لو يصير عليكم شي اموت والله يا ديمة اموت
واذا غفران تخبلت على بنتها فآني ما اتحمل گبل اموت ما اتحمل فراگ واحد بيكم والله ما اتحمل

ديمة : حضنتها وطبطبت على ظهرها محاولة اهدئها

كافي لتبجين اني هنا يمج ، ابتعدت امسح بدموعها وابوس بأيدها

لتخافين اني من اليوم ما راح اخليج تخافين بعد وامين راح انفصل عنه وان شاء الله ربنا يعوضني
خير من الي شفته

بيداء : بس لا ناوية تتزوجين بعد يعمه

ديمة : باوعتلها بطرف عيني وتجاهلتها

اخذت مي شربت امي وباوعت للباب ينفتح ويطلع منه معين ينافخ مبين روحه واصله لخشمه

معين : كومي طبي امين يريدج

ديمة : مو قبل شويه جنت جوه

معين : اهله طلعو وهو طلب من جدي يشوفج على انفراد وجدج ما گال لا

ديمة : ماكو مشكلة ، ذبيت الگلاص من ايدي وكمت دخلت للإستقبال لكيته كاعد واول ما شافني گام

انداريت سديت الباب بكل هدوء وضميت اديه مباوعتله

امين : ششـ شلونج

ديمة : كلش زينه انت شلونك

امين : موزين

ديمة : اي ان شاء الله مع الأيام تصير زين

ممكن تحجي بسرعة اريد اطلع تعبت من الوكفه ، تدري انت اني حاليًا عايشة بكلى وحدة وبصفر طحال فما اگدر اتعب نفسي هواي

اباوعله تقرب من عندي ووكف گبالي مباشرةً ، حاوط وجهي باديه ثنيناتهن وهمس

امين : ترديني اطلگج

ديمة : هزيت راسي ، اي

امين : بس اني ما اريد اعوفج

ديمة : حتى لو المهم رأيي اني

لزمت اديه المحاوطه خدودي ، اذا عبالك من تتستر على السبب الحقيقي الخلاك تتصرف وياي بهالطريقة راح تلين گلبي من ناحيتك فإنت غلطان

الواكفة كدامك هسه مو ديمة التدور على نظرة وحدة من عيونك تشفي ولو شويه من اشتياقها تجاهك

الصار غيرنا هواي ولا انت بقيت امين الشاب الطيب ولا اني بقيت ديمة الفاهية

انت تغيرت وغيرت ديمة التحبك وياك وهذا التغير خلق منه اشخاص منعرفهم

واني تعذرني ما اگدر ابقى ويه واحد احسه غريب وما اعرفه

امين : ديمة اني احبج والصار غصبًا عني صدكيني ، من قهري تصرفت بدون وعي والله العظيم ما جنت ناوي اسوي كل هذا وياج

وانتِ تعرفيني حشرة بالگاع ما اكدر ااذي بس والله لعب بعقلي ابليس لعنة الله عليه وخلاني اني والحيوان سوه

وداعة امي بيومها واني احجي وياج روحي تلوب
وخاف عبالج جنت ناوي صدك اذبج بالشارع عريانة

وحق كلام الله وعساني انتهي واني واكف اذا جنت ناوي اسويها صدك

والله جنت اريد اخوفج واقهرج تدرين بيه مستحيل اسويها واصلًا بيومها الناس الساكنين بالعمارة كلهم
جانو طالعين بحملة لكربلاء

ومحد موجود غير خمس بيوت وكلهن بالطابق الاخير وبس الشقة مالتي جانت بهذا الطابق مفتوحة الباقيات كلهن اصحابهن مو بيهن

وداعة امي يا ديمة واني ما احلف بيها جذب والله ما جنت راح اسويها

ولج اني اغار عليج من كحل عينج شلون ترديني اعريج واذبج بره ، كل عقلج إني ممكن اسويها

والله جنت بس رايد اخوفج والله ومع انُ البالج ابد ما چان بنيتي بس هم ما راضي على روحي

وندمان على عدد شعر راسي واتمنى يرجع بيه الزمن
والله فلا اسوي السويته ولا اوصلج للوصلتيله هسه

ديمة : يعني انت ندمان

امين : ولأخر يوم بعمري راح ابقى ندمان

ديمة : واني مستعدة اسامحك بس بشرط

امين : الي تردي كله تم والله مستعد اشلعلج عيوني بس قبلي تسامحيني

ديمة : نزلت اديه عن وجهي وتنهدت ماسحه دموعي

بالإول طلگني وصدكني ساعتها راح اكون مسامحتك ومن كل گلبي هم

امين : ااا انـ انتِ شجاي تحجين

ديمة : انت مو تريدني اسامحك ، خلص اني موافقة ومستعدة اسامحك وانسى كلشي سويته وياي وحتى ابريلك الذمة امام الله بشرط انك تطلگني

امين : دد ديمة اني اريدج

ديمة : واني اسفه بس انت طلعت من نفسي بعد وما اكدر اجبر نفسي عليك

اتمنى منك متتأمل إني ممكن ارجعلك لأني حطلع منا وابلغ اهلي يمشون بإجراءات الطلاق بسرعة

وحاليًا ماكو عندك يمي غير المسامحة واني كتلك اقبل إني اسامحك بس من تطلكني وتعوفني اشوف حياتي بسلام

اني حجيت كل العندي وصار لازم اروح من رخصتك

عفته وطلعت قبل لا اسمع منه شيريد يكول

سبق وكلت اني وامين انتهينا وهالكلام اني جنت اعني بالحرف وراح ابقى مصرة عليه

مثل ما اصريت إني احارب الموت واعيش رغم كل الاذيه الحصلتها بس قاومت حتى ابقى حيه

بس يا ترى هل اني هسه اعتبر حيه ؟

_________________________________

زبيدة : دخلت للمطبخ حتى اسوي ريوك

اخذت البيض طكتيه ووكفت اخفقه وبالي يم ديمة البارحة الليل كله ما نمت افكر بيها

رغم هارون سولفلي كلشي ودنيا هم بس محد بيهم عرف شنو الحديث الدار بين ديمة وامين

تنهدت بسخط وكليت البيضة ، اني لازم ابطل طبعي الزبالة هذا

من انفعل اكوم اجفص واحجي حجي سخيف تاليها اتندم عليه ااااخ يالتسرع العندي اااخ لو ابطله چان اني بخير

سودة عليه كسرت بخاطرها وحتى ما انطيتها فرصة تحجي اكلتها حاصل فاصل

بس والله اني من خوفي عليها احجي هيج ، ما اريدها ترجع لأمين صحيح اني رجعت لهارون
وهارون هم ما قصر ويايه بالأذيه

بس الصار لديمة شي كلش جبير ، وضعها الصحي تدهور سكر وكلى وطحال ماكو وموقف بشع

يعني اني عمري ما اتخيل إني ممكن اغفى بحضن هارون ومن اكعد الصبح يخلي بأيدي فلوس

ويگلي هاي فلوس الليلة حالي حال العاهرات وبنات الليل

هذا الموقف بحد ذاته چان ممكن يخليني امحي هارون كله على بعضه من حياتي

تنهدت بضيق بس هم ميصير احاجي ديمة هيج ، اني شجايه وياها صايرة كلش ادبسز

مدري العيشة ويه هارون سوتني مثله والله ما ادري

طفيت النار وشلت الطاوة طلعتها على الميز ورجعت اصب جاي

رحت اخذ الاستكانات من الكاونتر وصفنت على المنظر الشافته عيني

اباوع لأيد طالعة قريب من سنادين الزرع المحطوطه بين المطبخ والشباك الخارجي اليطل على الحديقة

هديت الاستكاين من ايدي وركضت على مكان الزرع
واول ما وصلت شهكت من شفت ام هارون واكعه
ومغمى عليها

صحت بصوت عالي استنجد بيهم وكمت احاول اكعدها بس متكعد

على صياحي اجوي الكل وركض عيسى شالها من ايدي وطلع بيها يركض هو وموسى وعمي عبدالله

على عكس هارون الاجاني يركض يلزم بأديه ويحاجيني

هارون : شبيج شصايرلج ليش تصيحين

خوما بيج شي ، اذاج شي ، تعورتي ، انجويتي

زبيدة : ااا انـ اني زز زينه بس امك وو وكعت

اباوعله سوى روحه ميسمعني وكومني من الكاع يمسح على راسي

هارون : يعني انتِ هسه زينه ؟

زبيدة : هارون اني زينه بس امك الموزينه متروح وره ابوك واخوتك تشوفها

صفنت من حضني وباسني من راسي وابتعد يحجي ببرود

هارون : اني رايح ابدل على السريع واطلع للدوام صبيلي چاي حتى من انزل اشربه واروح لدوامي

زبيدة : هاا

هارون : يله رايح ابدل لتأخريني

زبيدة : اباوعله عافني وطلع صاعد فوك ، شويه ونزل متأنق وطالع على سنگه عشرة ولا كإنما شي صاير

هارون : وين الچاي حبيبي مو كلتج من انزل اريد چاي

زبيدة : بلعت ريكي وانداريت صبيتله چاي وانطيته اله

اخذه مني ووكف يشربه

هارون انت مستوعب انُ الوكعت هسه امك ، امك امك دتفهم لو لا

اباوعله نزل ماعون الجاي ونتر بيه

هارون : افتهمتتتت شبييييج تلحيييين شنو ما عندي عيون لو ما اشوف

هاج الاستكان والملحة الزايدة مالتج هاي بطليها تره تنرفزييين

زبيدة : عافني وطلع واني باهته على ردة فعله

هذا شبي ؟

طلعت من المطبخ لكيت نور تلوب وتبجي وبيبتي وعماتي يحاولن يهدأنها

تقربت حضنتها محاولة اهدأها ، خلص حبيبتي ليش تبجين ان شاء الله مابيها شي

تلكين ضغطها هابط لو تعبانه من الشغل ووكعت بدون متدري عادي دائمًا تصير لتخافين هسه همه اخذوها للمستشفى وان شاء الله تكوملكم بالسلامة

نور : آمين يارب آمين

زبيدة : ضلينا كاعدين للظهر اتصلو علينا گالو كعدت والساعة بالاربعة راح يراجعون بيها اخصائي

هذا كل الفهمنا منهم غير هيج اي تفاصيل ثانية ما انطونه

ديمة ودادا وخالة وبنات عمي فاضل اجوي يمنه و حرفيًا البيت انخبص لان همه من الصبح طلعو
ولحد الان ماكو اي خبر يطمنا

وهالشي قلق الكل الا هارون الي رجع من الدوام واول سؤال سألني يا

هارون : شمسويه غدة

زبيدة : تشريب

هارون : لعد صبي وصعديلي يا فوگ رايح اسبح واصلي مو تتأخرين ماشي حبيبي يله انتظرج

زبيدة : صعد فوگ واني رحت صبيتله وسؤال واحد يدور ببالي

هو ليش هيج ممهتم ؟!

شلت الصينية وصعدتله ، فتحت باب الغرفة ولكيته يصلي ، كمل صلا واجه اخذ الصينية مني وباسني
من شفايفي

هارون : اسف حبيبي لأن صيحت عليج الصبح مو بقصدي بس انفعلت وصارت بوجهج

زبيدة : ما صار شي

هارون : يله كعدي خلي نتغدة

زبيدة : لا الف عافية مو جوعانة اني

هارون : زعلتي مني ؟

زبيدة : لا والله ما زعلت بس بالي يم نور وما اريد اعوفها فحنزل يمها

هارون : على راحتج بس اطي اكل لتيمور قبل لتنزلين

زبيدة : ماشي ، حطيت اكل لتيمور ورجعت نازله جوه

بقينا كاعدين وللـ 11 يالليل ياله طبو كلهم بس وجوهم ابد متبشر بالخير

اباوع لعمي عبدالله وولده عيونهم حمر دم اما هيام فكالعادة صافنه بعالم ثاني بس هالمرة وجها شاحب
لدرجة عبالك ميتة

منال : هااا بشرو شبيها

حمزية : متحجوووون

النوح : اللهم إني لا اسألك رد القضاء ولكنِ اسألك اللطف فيه

هيام طلع عدها سرطان بالثديين ولازمها عملية بأسرع وقت

نور : ععـ عملية شنو

زبيدة : جاوبها عيسى وهو يشاهك من البجي شلون الجهال

عيسى : يكول الطبيب تحاليلها ثبتت انُ الورم واصل لمرحلة متقدمة ببـ بجسمها ويحتاجون يستأصلولها الثدي بأسرع وقت

حتى لينتشر الورم اكثر ويشكل خطر على حياتها

زبيدة : جملة جدي وعيسى نزلت مثل الصاعقة على الكل

وبالذات نور الي وكعت بحضن امها تصرخ بشوغة من القهر هي ومنال وعمي وولدها اكثر شي تأثرو عليها

اما هي فآني مركزة بيها ، ساكته وهادئة بشكل عجيب ولا كإنما هي المقصودة بالكلام

اباوعلها وخرت نور عنها واكتفت أنها تبوسها وتمشي صاعدة فوگ بكل هدوء

رادت نور والولد يصعدون وراها بس جدي ما خلاهم

النوح : عوفوها ، الوضع الي هي بي مو سهل خلوها تختلي بنفسها شويه وبعدين عود صعدولها

ومن هسه اكلكم اني ضبطو رواحكم ولتنهارون كدامها تره هي هسه بحاجتكم صيرو اقوياء وسندوها مثل ما جانت تسندكم وانتو صغار

هسه دارت الدنيا وصار دوركم انتو الي لازم تديرون بالكم عليها مفهوم

زبيدة : ردو عليه بخاطر مكسور ودموع تجري ، مدري ليش حسيت إنُ هيام حاليًا محتاجة هارون

رغم شكد ما هو قاسي وياها بس هي حبها اله وتعلقها بي واضح كلش ومميز دونًا عن باقي اخوانه

تنهدت وصعدت فوك حتى ابلغه ، وصلت لغرفتنا ولكيتها مردودة ، اجيت ادخل بس استوقفني صوت
امه الاجاني من جوه

هيام : اجيت ابشرك يحبيبي ، حوبتك طلعت يبعد امك وروحها

الصدر الچان يضمك من تخاف بالليل غزى الورم وراح يكصو يحبيبي

هارون : اي يطبج مرض تستاهلين

هيام : حقك يروحي والله حقك شما تحجي وياي ، صدك استاهل

هارون : اذا تدرين بروحج تستاهلين المن جايتني تتبجبجين

امشي طلعي بره ما اريد اشوف وجهج

هيام : زين بس باوعلي ليش منطيني ظهرك حبيبي

هارون : ما اريد ، اذا اندار واحط عيني بعينج گبل اتقيء

صوتج بحد ذاته جاي يثير اشمأزازي فما بالج بشكلج المقرف والي للأسف طلعت اني نسخته الثانية

هيام : زين اني هسه راح اطلع بس خليني اطلب منك هالطلب

اني ما ضامنه نفسي اذا انام اليوم ممكن اكعد لو لا ويمكن اموت لان السرطان منتشر بكل جسمي

فحباب خليني بس اشبكك وابوسك بوسة وحدة والله ما اريد منك اكثر

هارون : يابه والله لو تصيرلج العافية بلزمة اضفر من اضافري هم ما انطيج هالاضفر

اني اكرهج شوكت تستوعبين هالشي ، يا بشر اني انقرف من نطق اسمج وتلعب روحي منج كلج على بعضج

نمتي ، كعدتي ، مرضتي ، صار بيج قز القرط ، متي اخر همي

انت الوحيدة الي بهالدنيا مخصصها تلث ارباع الكرهه والحقد الي بگلبي بس الها

اني ما كرهت احد بگد ما كرهتج ، انتِ دمرتيني ودمرتي حياتي

نهيتي مستقبلي وحطمتي طفولتي ، لج اني بكل مرة اوكف على المراية وازين شعري صفر اتذكرج واكرهج
اكثر

امشيييي طلعيييي مناااا امشيييي ما ارييييد اسمع صوتتتتج لتحاجينييي بعددد امشيييي

وخريييي وخرييييي لتلزمينيييي وخرييييي رااااح اتقيء

زبيدة : سمعت صوت ضربه قويه تبعها شهكة عالية من هيام

ما تحملت دفعت الباب ودخلت بسرعة ، لطمت على صدري من شفت هيام واكعه بالكاع وتون بوجع

ركضت شلتها من الگاع وكومتها ، اسم الله اسم الله على كيفج

باوعت لهارون الواكف يرجف ، عطت بي ، عزة بعينك لللللك انتتتتت شنوووو من بشرررر

هاييييي امممممك امممممك يا غبيييي انتتتت متخااااف من ااااالله

هارون : اخذيهاااا طلعييييهاااا بررررره يييييييله

زبيدة : طاحظك اي والله شهالعقوق هذااااا الانتتتت بيييي

اااامك هايييي جنتتتتك ونااارك شلوووون تمدددد ايددددك عليييييها

هيام : للـ لتحاجي هيج ههـ هو معليه اني وكعت وحدي

للـ لتضوجي حبيبي خخـ خاف تجي النوبة ويتخربط

ااا انـ اني طالعة ، ااععـ اعذرني حبيبي عكرت مزاجك
ههـ هياتني حطلع بس لتضوج من اروحلك فدوة اني وكل الدنيا حبيبي انت

زبيدة : اباوعلها طلعت من الغرفة تسحل بروحها سحل ودموعها عشرة عشرة

انداريت عليه ، لك ليش هيج هارون ، ولك انت متنام ليلك اذا عندك حيوان واحد مريض

تالي متالي تعامل امك هيج ؟ تمد ايدك عليها هارون ؟ وين صلاتك وصومك وانسانيتك وانت تكسر بخاطر امك جنتك ونارك هيج

وفوك كل هذا هي بنفسها اجتك تشتكي وتريد حضنك متأملة انه ممكن يخفف عنها

تالي هيج ردك عليها يكون !!

هارون : انتتتتتتِ انجبيييي ولتحجيييين بشيييي انتتتتِ متعرفيييي افتهمتييي لو لاااا

زبيدة : انت ليش كارهها لأمك لهالدرجة

شمسويتلك بحيث گلبك ما رف عليها ولو شويه ، لك اني الما احبها انمرد گلبي عليها

شفت عيونه دمعت واندار منطيني ظهره

تقربت وكفت گباله ، لتتهرب وواجهني ولو مرة وحدة

انت ليش هيج تعامل امك ، هارون حاجيني تره داحجي وياك اني لتتجاهلني مثل كل مرة

هارون : عوفيني زبيدة وطلعي بره

زبيدة : اكو شي مسويته الك ؟

هارون : كتتتتلج عوفينييييي

زبيدة : اسمع هارون اني بعد ما اتحمل هالغموض الانت بي وفاض بيه من السواد المحاوطك تره

واااالله العظيم واني ما اقسم جذب يهارون اذا ما سولفتلي عن السبب اليخليك تعامل امك بكل هالكره
والحقد راح اعوفك

والله هسه اشيل حلقتك من ايدي واخذ هدومي واطلع وبعد تحلم تشوف وجهي وانت تدري بيه
اذا حجيت شي اسوي

هارون تره الزواج مو بس فراش ، اني شاركتك كلشي بحياتي وما ضميت عليك ذرة وانت حتى ابسط امور حياتك خافيها عني ولا كإني مرتك

هارون : ما اگدر زبيدة ومو كلشي ينحجه ، عوفيني وطلعي رجاءً

زبيدة : براحتك اني طالعة بس وداعتك عندي اذا خطت رجلي بره هالغرفة ما راح ارجعلها بعد

واذا چان قبل اكو امل إني ارجعلك فاليوم اذا طلعت منا اعتبرني متت ومالي رجعه الك بعد

مشيت وعفته ، فتحت باب الغرفة واجيت اطلع بس استوقفني صوته

هارون : اوكفي

************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.