رواية الرعناء والأشيب الفصل العاشر 10 - بقلم زهراء العراقيه

نيوفر

اريد بس الوقت يمهلني لحظة وحده استوعب الموقف الي اني بيه قبل لا ارجع انطه الفلوس لأبني ؛ اهنا حسيت احساس جديد اذا كنت يم اهلي احس نفسي حمل ثقيل مع اولاد و مالي بيت خاص بيه مثل قبل هسة زودهم هذا الرجال باني بالمجتمع شخص محتاج ذليل حتى يمد ايده لجيبة وينطيني صدقة بمجرد معرفة اني زوجة شهيد وينك يا فيصل يكولون المحبين حتى لو ماتوا يشفون احبابهم . دشفوني اشلون واكفه
اعيوني دمعت اريد اسيطر عليهم واكبت دموعي لازم واجه هيج موقف بقوة اكثر من ضعف ودموع . لكن هي فرضت نفسها وطلعت وحدها تجري حتى انفاسي احسها تفاقمت معدت اكدر اسحب نفسي
بودي اضربه على خده مثل الضربة الي ضربنياها و وجعني حيل خلاني ازردي لعابي و اريدانطق انشليت و شفتي ترجف بس متعرف اطلع كلمات

-ها نيوفر ليش تأخرتي خليهم يلعبون

قطعت كلامها لينا وهي اشوفني كدام أخوها أخذت الفلوس من ابني؛ مجيئها خلاني احسم الموقف خاصه الرجال دار وجه يريد يطلع شي من سيارته يعني
ها هي حكم وحده و عباله ضميرة ارتاح بالكم فلس مايدري حطمني .
- انت يا ضابط .
التفتت عليه
ولينا اجت يمي كالت شكو؟وعينها ع المبلغ الي عندي .
اندفعت حيل من نظرة اعيونه وهو يحرك حاجب بمعنى شكو؟
- خدمة ثانية اختي .؟

اندفعت وشمرت الفلوس بوجهه اتناثرت
- لم افلوسك عيني اني مبحاجه الكم
-خير بدر مني شي غلط اني
كالها بعصبيه لكن بصوت ناصي بالكوة متحكم بنفسه
عطت وطلعت مني طبقة صوت عاليه وحاده ممزوجه ببكاء مكبت مكفاها دموعي الي طلعت لا انوب صوت الشهقات طلع ويه كلامي اثبت ضعفي
- ممادة ايدي الك؛ولا بحاجه الكم ؛ اختك هي الي الحت اخيط الها اني لا بحاجه لفلوس ولا لشي و لشفقة

مشيت عنه وردت ارجع للداخل و لينا اتحاول اتفهمني
وخرت ايدها عن متني . ووصلت يم الباب وكلت واني ابجي
-اصلا مردت اخذ منج افلوس اني اجيت مجاملة الج لا اكثر .
اختي ورايه تسالني
جريت ابني منها وبحركه غبيه شلت صوفي هم و اتمنيت لو عندي ايد ثالثه اشيل هاشم واهرب بيهم من هذا البيت المتكبر مثل اصحابة

مشيت من يم سيارته و دمعة اجر دمعة
طول الطريق و اميرة تتسال واخذت مني مصطفى
- انكطع كلبي واني امشي وراج
اشصار و ليش اتصيحين عليهم و ليش طلعنا احنه حتى ملحكت اخابر رضوان او حاتم ياخذنا
شافتني ما اوكف وكفت هي.
-امشي بعد اكثر خلينا ع الشارع و ننتظر رضوان خل اخابرة

خابرت وكالت اله اخذ تكسي ونرجع لو تجي احنه بالشارع .

ظلينا واكفات وهي مسكتت واني محجيت معاونت اسكت عن البجي . اخوزر بنظراتي بالهوى واتخيل الموقف الزبالة الي خلتني بيه اميرة اذا احجي هسة افقد عن شعوري واسوي مصيبة بالشارع .

*
رائد

شفتها ظلت صافنه بوجهي ؛خانتني نظراتي وركزت بتفاصيل هالوجه النقي الملائكي ! من اعيونها العسلية الامعة نزلت دموع . خجلت من قدر عزة نفسها محبيت احرجها اكثر درت وجهي عنها ملتفت ع السيارة مثل نفسي اطلع شي حتى البنية تاخذهم واتروح .ما اكدر اوصفها مرة ارملة ابد لو لا منادات ابنها بماما ما كنت صدكت هالبنية اليافعة ام
اجت لينا سمعتها اصيح الها
كلمتني هي بصوت مبحوح ينذر بالبكاء

مفهمت هي ليش رافضة و تتكلم بعصبية وترعش منتفظة حاولت اكبت غضبي من طرشت الفلوس بوجهي بهذا الشكل .
ثارت عليه وطلعت والمصيبة اخذت الطفل الثالثةمن صديقة لينا اميرة حسيت اني اسرعت وفهمت الموضوع غلط .لكن بعد فوات الاوان
مشت من يمي رغم الدموع الغاسلة وجها و الاطفال الي شايلتهم كدرت تنطيني نظرة قاتلة . نظرة انسان عزيز نفس مجروح مأثرت بيها الدموع حتى تكدر اتوصلها الي .
ودعني ابنها الابيضاني
بباي عمو الشلتي
واطلعت العاصفة من بيتنا خلفت وراها سكون رهيب و رجعت للبيت كائبته المعهوده من طلعوا ،

بذعر و اتهام
-شصار ؟

شنو سويت
سألت بتوجس
-هي خالة ام مسعد بعدها تجي اتنظف؟

اعيونها اتغلاط الي بالها وهي تجاوب بهمس مخنوك
- اى اي بعدها شنو هاي
اشرت على الفلوس
وهي اتباوع للأرض

- اتوقعتها تشغتل عدنا!
-تعال تعال ندخل لجوة وكمل الي يا استاذ

سولفت الها الموقف وهي حطت ايدها على جبينها تستمع بضجر
-هاي اخت اميرة الي كولت الك عليها وجبناها بالحيلة لهنا حتى اشوفها واتعرف عليها وادرس حالتها.
حضرتك عكيت الدنيا
لا جواب مني وبالي يم الطفل الي اشرلي و كلي باي ضاحك كل صياح وثورة امة ما اثرت بيه وما نسى يودعني
-رائد رائد هي هاهو انت معي
- ها وياج كملي
-اني ردت اشوفها وكانت هادية الي يشوفها ما يكول هاي نفسها الي وصفت حالتها اختها مجرد،وحده حزينه بس بفضلك وهذا الجانب الزين الوحيد الي انت سويته من خليتني اشوفها من تنفعل
لاحظت حركات اديها اشمر بيهن من تتكلم وهذا يدل على ضياع الشخص وخوفه
عدم السيطرة على كبت المشاعر الي بداخلها بحيث طلعت كلها شهدنا الدموع و العتاب الداخلي بصياح وانفعال زايد
ممكن الشخص الطبيعي يعصب من هذا الموقف لكن يكبت بداخله الغضب ويطلع منه كلام موزن على قدر الموقف ما يبالغ
المهم يا استاذ اني جبتها هي واطفالها حتى اشوف احتضانها الهم اعتقد احنه زدنا حالتها تعس والله محرجه من اميرة

-خابريها

-بأي وجه بالله . اوف اني لو عندي مكان او عياده مكان عرضتها لنفس الموقف ولو هي الله يسامحها هم معانده جبناها بغته

تحجي واني هم سرح بالي وفكري بدموع ها من انسكبت بسبب سوء فهمي . يعني شفتها بالحديقة تعدل بالحديقة و وحدها عبالي مو خطار اني معرفها اصلا حتى اظنها من الاقارب اول مرة اتزورنا صديقات لينا وامي عندي معرفة بيهم موصلهم او مصادفهم .

رحت لبيتي اضرب اسداس بخماس
بوضع العراق الي بهوي للدرك السفلي او الهاوية بسبب سياسيات الفاشلين على الحكم والفساد الي دخل النا الجراذ تأذى الشعب من مواطنيه و منتسبيه .
العشا قطعته هليام احسه يثكل عليه مثل كل يوم اشرب كوب شاي و اتصفح نت لو العب دوريات كرة قدم بالبلي وانام
ومرات اسهر مع الرفقة، اليوم خاطري مكدر ما طلعت بالليل ولا لعبت اصفحت اشوي بالنت بملل وسديته .. اباوع للسكف وفكري شارد عني بناحية اخرى ، اكو نغزة بدت تسعر بضميري و تذكرت ملامح موقف اليوم . اريد انام ما اكدر ضمير ليش يصحى بالليل ينذرلك انت غلطان انت غلطان اعرف نفسي غلطت لكن من غير ادنى قصد وهي هم حساسة زيادة ، هليام كثرت تبرعاتنا اصلا شكو ام ثكالى لو زوجه نلم الها مبلغ من يستشهد رجلها ونساعد بعض .
هسة اشلون بيها هذي الحرمة اوف كأنه الشعرة الي قصمت ضهر الجمل يعني هي ناقصه واني سهرتها .

باوعت للساعه توها داخله ع ٩
اتصلت بلينا
- ها رائد ليش رحت امي تسأل عنك

- بعد السالفة الي صارت ما اكدر اظل مزاجي اتعكر

-اها اهم شي مزاج حضرتك اكولك ما تجي اريحلك مزاجك بجلسة وحده

زجرتها محذر
-لينااا

-هيج ولا كأنك سمعت شي هههه اشبيك يا ابو الشباب ما اتريد اتربح اختك

- اكلج خابرتي البنية

-يا ابنية،؟

- اخت اميرة اشلون صارت

-اهااا ، اضاهر ضميرك متعبك

-لا ابد بس يعني اتصلت بيج حتى أكلج كولي لأمي باجر اجيها ولا يهمها

-اهااا خوش ههه

- واجت ببالي أسال عن البنية لا تنسين طلعت من البيت زعلانه بسببي

راحت عن لهجتها السخرية وكالت بجدية
- اتصلت بأختها وكالت معصبة حيل وراجعة للبيت حالفه ماتدخل بيتنا وما عليها بالبرد

-يابرد

-مو اني جبتها للبيت عود اتقيس احجام النوافذ حتى اتخيط برد ومشت عليها المسكينه لو لا انت تدخلت هجوم وخربت شغلي ههههههه
بس كسرت خاطري اتكول اختها حيل اتحسس راح اظل الليل كولة تبجي . هي حالتها تعبانه . اني باجر اعرف اشلون اطيب خاطرها

سديت الخط منزعج كلش من نفسي اكو شخص ديتألم وسهران بسببي منهار واني زودتها عليه ،

*

نيوفر

بسرير و هاشم نايم يمي يدفر بضهري و صوفي متوسد على رجليه محنطني وغافي و رائد ديرضع
واختي تدرس يمي ،
ابعد صدري عن توتو لأن نوبة البكاء رجعت مرة لخ بس تذكرت الموقف
تمللت سما
- انسي نيوفر يعني سوء فهم بسيط لا اتكبريها
-اسكتي انت ما شفتي الموقف

(تاتأت وتحسفت )
- عادي حبي عدي الحياة متوكف ع هذا الموقف باجر تنسيه لا اكبريها
دك تلفونها
-هاي صديقتي نهى
كعد رائد يريد يكمل رضاعه بجى
طلعت لبرة سما وتليوفنها بيدها
،
شكله رتبه الي على متنة كلشي بيه يخوف هالة شموخه قوية حتى من طلع افلوسه من جيبه انتبهت لعروق ايده بارزة خضره
كان أسمرأني مائل للحنطاوي و جه ملتحي يتخلل لحيته كم شيبة بيضه
و راسة مجرد يم زلفه شيبات مزودات هالة التكبر والتبجل عنده كأنه من البشوات او من زمن الامراء الشامخين على خلق الله انفه رافعه لفوك من يحجي وجه طاغي عليه العبوس .
لكن تصرفه اليوم اوحى الي هو عنده نوع من الانسانية اساسا اني ما زعلت منه قدر ما زعلت من نفسي وشككت بروحي وثقتي بنفسي انزاحت شنو الي بيه اوحى الى اني محتاجه . ولو اني لابسه عباء ما مبين لبسي المستور الحال؟ واطفالي شو يلمعون لمع عندي خير من الله وما قاصرة وياهم ، ما انتبه الهم ؟دخلت سما وركعة الباب خرعت توتو
-اسم الله
اشبيج خرعتيه الجهال
كعدت ع سريرها غاضبة
-اشبيج ولج
حطت تليفونها بغضب وممتجاوب وياي
هاي اشبيها ؟

*
رائد
يرن التلفون وما اترد . ما عفتها منا من ردت
-اكلج اذا هي بس تبجي وانت تدرين بحالتها ليش ما تتصلين بيها ع الاقل اتصال
ردت بصوت نعسان
-ها شنو . هي منو؟

- مرت الشهيد

تثاوبت واخذت وقت ضلت صامته
-رائد تدري هسة بيش الساعة

- لا مادري اني حتى النوم طار من عيني

سكتت
وبآلم
-اي ضميرك يأنبك مو؟
- خابريها هسة احلفك بالله خابريها طيبي خاطرها
-اها اتراوغ لعد اعترف رائد ضميرك أنبك مو دتفكر بيها اوووف اشكد قلبك صافي بس ليش جامد ويه الناس
بلهجة أمرة و غاضبة
- لينا خابريها هسة لا ازودين كلام

-اخاف نايمه ما اريد ازعجها واعتذراي الها اريده يكون بشكل البق حتى اتقرب الها ؛ باجر اروح ومتفقه مع اميرة؛ نام رائد؛ تصبح على خير
-وانت من اهلة.
كلامها مقنع ما عارضت .

*
نيوفر
ثاني يوم اهنا جانت صدمة الي من اجتنا اميرة مرة لخ العصر . لا وبعد تمارة كامت اتعدل بالبيت واجيب منا واتحط اهنا ومهتمة

سألت سما اشبيها امج جاينه احد مهم
-مدري

نزلت احلام من فوك وكالعادة اتعمدت من شافتني سوت ردة فعل قوية عود اتبين هي اتخاف مني كأني مختلة
-يوومه
وشردت راكضه من يمي للمطبخ جنت شايل توتو و واكفة بالممر
؛
طلعت الضيفة لينا . فاجئتني وقدمت أعتذار و حتى باستني وراضتني .بصراحه خجلتني بأخلاقه العالية واهنا تندمت اشد الندم ما كملت دراسة و ما صار عندي او التقيت بهيج صديقات خلوقات .
ظلت يمنا وقت حلو وهم استطرقت ع موضوع استشهاد فيصل واميرة سولفت الها التفاصيل

كالت مواسية الي
- يلا شهيد ومنزلة عند الله كبيرة وهو راح برجليه يدافع عن الوطن

-لا راح لأجل الراتب

جاوبت بقتضاب وكأني دطلع اعتراضي كدام لينا فلزمت نفسي وكلت بأقل حده
-اقصد من كلنا اله بطل من راح لمنطقة ساخنه كال ما اكدر اعيش اولادي من الأعمال الحرة الي كبرت عليها هو العمر واحد وبيد الله
جاوبت برقة وعذوبة وكأنها اتريد تبجي
- الله يرحمة حبي
عرفت السبب اثاري دموعي السائبة متوسده ع خدي من غير احساس مني
اتعذرت واترخصت من عدهم .

،،
ماكو شي جديد يطري عليه انام اصحى على نفس الوتر
اهلي اهتمامهم الي بدروه بالفترة الاخيره رجع طبيعي مو مبالغ ، بابا حيل يحب الولد هو بطبعة قريب للولد اكثر من البنات و الأطفال صغار يجذبون ببرائتهم لهذا بدأ يتعلق بيهم و رضوان همين حيل يحب هاشم محبة خاصة لأن السانه حلو و يحبه لخاله . ايمن همين يحبهم رغم هو اشوية قاسي و يضرب لأن يغار من هاشم ماخذ الجو منه هو عمره ١٣ سنه ويغار
تمارة ماعدها مشاعر ويه اطفالي مثل ما وياي ماعدها اي مشاعر وية اطفال اميرة غير ، اميرة عدها بس ولد واحد واثنين بنات .
احلام من سقطت لهسة ما حبلت وبس تفتعل مشاكل وية رجلها الي مشغول يبني المستقبل يداوم بوضيفته الصبح يجي ساعتين يرتاح يطلع للكافتريا مالتهم هو وصديقه يرجع ب١٢ بالليل هلكان .يريد يشتري قطعه ارض

اما علي طالب وغامض بالنسبة الي معرف عنه شي
سما عمرها ١٨ وبالسادس ادبي .
؛
صديقة اميرةشو كل جمعة يسون يمنا تجمع والتجمع مايشمل كل صديقاتها بس لينا واني ضافتني وياهن كالت الي وسعي دائرة معارفج وصادقي لينا خوش ابنية بصراحه ما احسها من ذاك البيت حيل متواضعه وحبابة حبيتها ودخلت قلبي لكني بعدني متحفظه يمها ..
مرات افعال احلام تغثني من اتحيل علي ع اطفالي لو هي تضوجهم لكني رجعت اشوية اتحكم بعصابي.

بيوم زارتنا الضحى لمياء اخت حاتم بت عمي
وظلت يمنا ع الغده
ومتأكده بوصية من اميرة جايه لأن هي هم بدت تتقرب مني واني بالاساس احبها واحترمها كأخت كبيرة . هي كبيرة بالعمر شابة ناضجة اتمنى حنكتها اصير بعقلي ههه . و ع طاري الحنكة هي من ذولي النساء الملتزمات حيل حجابها ابو التحنيك و نازل لكصتها مغطيها كلها وتلبس معاصم ولا قطرة مكياج تخلي و حواجبها طبيعيات لهذا اشوفها حيل رحمانية و روحها الحلوة طاغية ع شكلها
سمرة حيل و عدها نمش وملامحها خشنه . لهذا متأخرة بالزواج رغم هي موظفة وخلوقة خطية امها مستغلتها تاخذ راتبها و تخدم بالصغير والكبير ببيت اهلها .
المهم الساعه ب٣ حل رضوان من الدوم
شافنه بالهول اجه سلم
وكعد
صاح
-احلام صبي غده
لمحت اعيون لمياء اتباوع اله وتدنك لمحت ذيج الحسرة مال المحبين المحرومين لأني اعانيها من اباوع لصور فيصل

ورة نص الساعه سوالف الا كملت احلام صب غده

وتمارة تدرم عليها كدام لمياء
رضوان
-شنو هاي احلام وين الخضروات
-يووه نسيت
كامت اجيبها
تمارة كالت
-فاهية حيل مو هبة ريح يا لمياء شالعة كلبي
لمياء
-ميخالف عمة بعدها صغير تتعلم
- اووف بس اووف
عرفت سبب حسرة تمارة . هسة الا ندمت من رغبت رضوان باحلام و جانت اتكول ع لمياء جبيرة ومحلوة لرضوان ينظلم وياها. بينما احلام صح صغيره و اعيونها خضرة و سمرة و مربرة جميلة شكلا بس هسة شوفتها الويل لأن تسمع كلام امها والتحريض ،
كام رضوان خلص و ما احلام راحت ولا ردت

سما شالت وراه الصينية
دخل علينا علي بيده سجله
وعركان
سلم واجتي احلام
-شو تأخرت الساعه ب ٤
- موالخط عطل وصارت سالفه بينا ههههه
سما ميت جوع ع ما اسبح حضري
رادت اتكوم سما
احلام
-اكعدي حبي يم لمياء اصب اني غدة اله وراحت للمطبخ !

،،
ولدت لينا ومن الواجب اروح ويه اميرة الها ..
رحت لأميرة اني ويه سما من الصبح وصلنا علي غصبا ما عليه من قبل امه وراح .
طلعنا نشتري هدايا الها . افترينا السوك ..

من خلصنا دنمشي و بالصدفه صارت عيني بعين شخص مألوف الي ،
حسيت الدنيا لفت بيه عشر لفات و صرت اشوف الواحد عشرة و جمدت كل مشاعري اريد امشي مكدر هو اتعداني وهم كأنه مصدوم . بس اني ظليت بمكاني
- نيوفر اشبيج دمشي وكفتي بالطريق
- م م مختار
-شنو؟!
- شفت مختار . خل نشرد.
كمت امشي ع السريع و اميره تتلفت وراها اتريد اشوفه
متغير وجسمه رياضي صاير شنو رجعه للعراق هالتلفان يا يابة اشكد خفت منه كانه كابوس كدامي ظليت الصبح كله الوج من الخوف والتوتر الي خلفه الي عاد عليه ذكرى الماضي .
.
العصر اشوية تناسيت القاء من ضليت اعدل بنفسي طبعا مذبيت الاسود بس اعتنيت حيل بروحي حتى حفيت وأخيرا . و اهتميت بهشومي كلش هو الوحيد الي راح اخذه وياي لأن ما امن اتركه ويه سما هالمشعوذ لا يحرك البيت ع البنية والجهال الي خليناهم يمها عفنا سما واخذنا حاتم لبيت اهل لينا
سالتها
-اكلج رجلها ما اجه
- راح يجي ورة يومين حجزه.
-خطية

وصلنا لبيتهم وكأني بعدني ما نسيت الي صار تنحرت يم الباب واميرة دكت الجرس .
فتحوا النا هالمرة بنوته شابة ورحبت بينا من عرفتها عن نفسها اميرة

-اني اميرة صديقة لينا .وهاي اختي
- اهلا بيكم حبايبي
-اني لهفة بت اختها لينا تنتظركم
دخلتنا . اتعرفنا ع اختها الكبيرة كريمه
وشفنا المولود بنت جميلة

اميرة سالت ام لهفة
-انشالله حتستقرين اهنا بالمحافظة
-اي حبيبتي بعد شعندي اهناك انتقل اهنا افضلي بعد ما اقالوني عن منصبي .
كالتها بأسف...

حديث عادي

*
رائد
بغرفتي يم اهلي ما رحت لبيتي هاي الاجازة ولدت لينا وظليت يمهم خاف يحتاجون شي والدي تعبان ..
سمعت بهذي البنت اخت اميرة اليوم راح تجي ويه اختها . طلعت للمطبخ . كعدت محتار اشوية . طلعت للحديقة والمح ذاك الملاك واكف ع المرجوحه وكوف ويريد يهز نفسه وهو واكف فلتت اديه ركضت اله بس ملحكت وكع منها وهي عاليه
- لهفة يوووم .
صحت اي احد ..

*
نيوفر سمعنا صوت رجل يصيح . يوم لهفة

طلعت اله لهفة ورجعت لونها مخطوف
- نيوفر ابنج وكع من المرجوحه
رحت اله اسابق الهوى واميرة وراية و حتى لينا طلعت

شفت دم طالع من راسه لو روحي اجيت ازفرها ويه نفسي الطالع
-هاشم . رحت يم الرجال و اخذته منه وابجي
هو راح ؛ واميرة
هاشم اشبيك
يبجي بصوت متقطع خوفني عليه بالزايد .
رجع الرجال الضابط اخ لينا وكال تعالو اوصلكم لطبيب يشوفه . ام لينا حطت اله شاش واحنه دنروح للسيارة ملحكت اتربطه ع وكفتنا خلته واحنه صعدنا وياه
كاعده خلفه و اتوسل اله
-عفية ابسرعه الله يخليك ابسرعه
اوليدي بحضني دمه ديطلع ابسرعه و اميرة تتصل برضوان و حاتم .
اتصل بيه رضوان
-غبيه شوكع الولد
صاير اعصاب لامني وسد الخط واني ابجي .

وصلنا للمسشتفى كان خاص .
اخذوه للولد .
دخل لعياده طبيب شفتهم يفحصون الجرح مدري اشصار بيه بعدين نقلوه لغير غرفة و طلعونا لبرة .
اميرة راحت تدفع الحساب كله باصات اهنا الكشف والطبابه .

اني واكفه بنص الممر والرجال ع مسافه يمي .

اتخيلت اوليدي راسه مفتوح وديخيطون بيه اكل بضافيري و الوم بروحي
حسيت الدنيا لفت بيه بس اكثر هالمرة مو مثل الصبح . صرت اترنح للخلف جسمي وحده يطوطح .
حسيت بأحد لزمني من ضهري ومتني واخذني كعدني ع مقعد . انتبهت هذآ اخو لينا

يتبع