رواية الرعناء والأشيب الفصل الحادي عشر 11 - بقلم زهراء العراقيه

نيوفر
-كله مني
الوم بنفسي وابجي بغزارة ؛اجت اميرة كعدت يمي
وهو واكف يمي وبيدي العصير  الي جابه من برة
نطق صوته يمي كان هادئ مابيه بحه لكن بيه خشونة هادية! اكو هالة هدوء و وقار اتحيط بيه بحيث واني بهاي الحالة عم السكون بداخلي وكل وتيرة بيه تسمع كل حرف ينطقة بدقة وهو يختار كلماته
- مو منج عادي كلنا  وگعنا الي واگف يمج حتى من البيتونه وگع و هاي كلشي مابيه وكبرت
كمل بفخر و شموخ
-هاي الولد اذا ما يجري دمها بالصغر ما تصير رجال بالمستقبل
باوعت بوجه  مستغربة
-وكعت من البيتونه وبعدك عايش اشعجب ما متت
شفت ابتسامة غطاها بطرف اصبعه حك خشمه
انتبهت لنفسي احجي مع شخص غريب
واميرة همست
-دسكتي ترديه يموت
طلع الطبيب
رائد
-ها دكتور طمنا
- الحمدلله صار افضل وهمزين اتلاحكتوا .وكفنا النزيف و خيطنا الجرح لكن لازم نسوي مفراس و نشوف النتائج 
اذا كان صاير فطر بالجمجة او لا.
نزيت من سمعت كلمة فطر
احس گلبي الي انفطر ليتني ميته ولا سامعه هاي الكلمة . دخلت اركض لأبني متجاهلة تحذيرات الممرضة .
ما اعرف اشلون أتبدل رائد  برضوان وابوية وظلينا بالمستشفى ثاني يوم الصبح الا سوو اله اشعة . بس مو مفراس كالو خطر هسة هو طفل و توه واكع والحمدلله اطمنت ماكو فطر او نزف داخلي . طلعنا من المستشفى الي مصاريفها باهضة
.
تعبت حيل وهم السبب ثاني مرهقني هو مختار اهنا بالعراق الحقير راجع ورجع لحياته طبيعية عباله اذا مرت سنوات ينسي كلشي نسة الاتفاق ، اني شفته بالكرادة بس لا يلتقي برضوان اااخ يا حسرتي والله يكتله ادعي من الله يكون ناسي شكلة ،

،

رائد
رجعت لبيتي واني استذكر اللحظات الي عشتها اليوم فزع خوف و طفل دامي ام مفجوعه ، اتصلت بلينا تتصل بهم تفهم اشصار وياهم و هم اطرد الحنين لتجربة الابوة والحسرة على مشاهد اليوم
ياريت الله اخذ مني اشياء ثانية احتار بيها مع فقداني للأولاد اظل احتار احاول اوصل الها وانسى المفقود . لا بالعكس كلشي تمام عندي الفلوس والسلطه تحت منصب قابل للترقية ماعندي سعي لمادة او لشي ينسيني النقص !

*
نيوفر
اهتميت بأطفالي اكثر من قبل حسيت كلام رضوان صحيح اني ام مهملة و تمارة هم صح اشوية عندي فهاوة اتجاهم
حاولت اتعلم من اغلاطي ،صرت اركز اذا احد ينصحني ؛
.
كعدت بأحد الصبحيات اغير لتوتو ورحت اتريك ؛شفت رضوان كاعد  ينتظر احلام تكمل اله البيض
مبدل اليوم عنده دوام  . لبسة دوم جاكيت و قميص و بنطلون كابوي   لبسة تقريبا رسمي بحكم الدوام و العمر  مرات يكسرة ببنطلون كابوي سواء اسود او نيلي لو ازرق  عكس علي الي نزل لابس فانيلة حاصرة جسمة حصر مع  بنطلون  كابوي تسعين حذاء رياضي من غير جواريب والبدي اخضر والبنطلون ابيض والجل تارس شعره ترس
ما اعرف شنو موده هاي نازلة بصراحه ما احب غير لبس رضوان او فيصل حذاء يعني جواريب  ما يحبون الملزك والمحزك
نزلت همين سما بصدريتها
-نونو حبابة بيضه عين
جنت واگفه واگلي بيضه الي و لعلي الي گعد وخلصت وانطيته و بديت اگلي لسما
وخلصت  گعدت اكل  وياها بنفس البيضه
رضوان
-ادري الناس اجت ورايه وكعدت تاكل واني انتظر احلام .
مجاوبت
صاح
-احلام
-ها ها والله  ممنتبه الك . دقايق وتخلص
-صارلج قرن عمي لو كايل لنيوفر اشرفلي
إتأخرت
-اي غير انت اتريدها بالطماطه
سما متكعد راحه اتعيب عليها واتلقد عليها وهي ورانه واكفه
كفاي على احلام و وجه سما عليها
ضحكنا وعلي مشغول يراسل و ياكل  .

رضوان
-جواريبي ع الحبل ومفقودات انت ماخذهن
علي هو وياكل
- ادري اني البس حتى اخذهن
احلام واخيرا حطت الماعون كدام رضوان
وكالت
-اي كوله يبطل يلبس  حتى تعبت من غسلهم
شاركت بالحديث
- اضاهر جواريبك ما مفقودات ع الحبل اضاهر واكعات بالنشافه ههههه
ضحكت سما كيفت واحلام
بنتر
-اني شريتهن بيدي
-غير لونهم قهوائي واني وانشف ملابس شفتهم بين النشافه والتصريف واكعات صدكي  حتى النشافه اتشكل من وراهن لازم انطلعهن 

هز ايده رضوان وطلع لدوامه بعد ما غسل اديه .
وراح علي وراه يصيح وصلني اخيك
الخط عطلان
سما هم ركضت
-ارضيوي الله يخليك وياكم وياكم
ضحكت عليهم و المصيبة هي سيارة بابا رضوان راح ياخذها ويفلت هههههه
وخطية بابا يتعمد يتكرها اله ويروح هو بخط الدائرة . اما تمارة تبدي توزع الشغل والمهام الزايده علينا اني و احلام   .

بيوم  طلعت بالليل الساعه تسعة ونص او اكثر لو اقل اشو جسمي مدبك من الرضاعه كلت خل اسبح وانام مو زين ارضع اوليدي لازم اسبح قبلها  واعقم صدري زين بصابونه ديتول،
ضليت مصدومة حتى الخاولي وكع من ايدي من شفت الي شفته  احلام مدنكه يم زرف المفتاح و اتباوع من  الزرف

فزت هي من حركتي و وجها صار اصفر كركم
-ا اني
خلت وركضت ركض الغبية وهي شاكين بيها حامل مجنت مستوعبة شي هاي اشبيها؟
وكفت يم الدرج اهز بأيدي و سمعتها كالت اااه
صعدت الدرجات ع السريع لكيتها واكعه
يم اخر الدرجات الكبار الفوك
ولازمه ضهرها
-اااه ضهرري ضهري
نيوفر
دكيت الباب ع رضوان فتح وهو يلبس اضاهر سامع صوتها ويريد يطلع
- مرتك وكعت
-اااخ ضهري
دنك عليها واجت سما همين وظلت اصيح لأمها تجي اشوف احلام  
لاحظت نزف نزل لرجلها .
مقبلت يشيلها رضوان ضهرها يأذيها
اجت تمارة وخلفها علي
-ها اشبيها
علي كال شيلها يمعود
شالها وهي تبجي طلع بيها لبرة عفة بيت كل يوم مطلعين واحد مشيول للمستشفى
راحت سما جابت الها عباية واخذوها رضوان وتمارة
اني دخلت شفت علي بالهول ينشف بشعرة !  وسما يمه
سألت بحيرة و استفهام
-علي انت جنت بالحمام وطلعت من سمعت اصواتنا؟
جاوب بنتر
-اي عندج مانع
لا اراديا ضربت على صدري ورحت ركضت لغرفتي  وسما اجت ورايه
احجي ويه روحي بصوت مسموع
-علي جان بالحمام  عزه عزه
- ليش انت شفتي شي؟
- شنو شفت مثلا لا شنو شنو قصدج سما
جاوبتني بتلعثم
-لا لا ماكو شي هيج هيج وحدي امسلت
-سما! ونبي الله جاوبي شنو قصدج بشفت شي
-هيج مدري لأن شفتج سألتي علي ع حمامه  وقت الوكعه
بتوجس و شك يريد يتحول يقين
-اي اي وشنو عبالج شفت
وجها انكلب اصفر وسكتت
وكعدت الف وادور واضغط عليها تحجي
-العباس عليج اذا اتعرفين شي كولي الي
-يوه ينوفر  اي اي اني شاكه بحلام حاطه عينها ع علي
انصدمت  و انفزع گلبي اتمالكت اعصابي وسألتها
-اها شنو شفتي وهيج شكيتي
- جنت بس اشوف اهتمامها وغيرتها من تسمعه يحجي ع بنات الكلية؛بس عبالي اني متوهمة
بس قبل فترة طلعت اتصل بصديقتي بلليل لان ابنج يبجي ؛ وشفت باب غرفة علي مفتوح
ويكول الها
-الله عليج اطلعي منا انت مثل اختي صح بس ما يصير دخلتج عليه وحدنا  وراها هي طلعت وتبجي وشافتني واخترعت ابسرعه كالت الي جان علي يفرمت جاهزي ووجهت تليفونها كدامي رغم اني مسالت عن تبرير  . 

-خرب يومها ولج لكفتها اتباوع عليه من زرف الباب بكل عين وكحه مخافت احد يلكفها
-كلبة لأن منطلع من غرفنا بعد العشا كلمن بهمه بكل غباء  ما تكدر تخفي اهتمامه بيه
-ثول والله ثول رضوان يسواها واشبيه اتروح ادور زلم عريانه من وراه  وهي شنو اشوف من هذا الثقب الصغير

ضحكت سما ع كلمتي وتداركت الموقف سما بعدها بنية ميصير احجي وياها هيج بس هاي طلعتني من طوري .حسيت براحه من خابروا وكالوا سقطت! بداخلي اكول بيها صالح لأخوية كل ما تحبل اتسقط ما يريد يربطه بيها ،

اجوي للبيت طلعنا انشوفهم
دخلت تمارة
بس شافتني صاحت عليه
- كلبة سقطتي المرة بخبالج ، هاي هي لازم مسشتفى امراض عقلية انت

رضوان مباوع لوجهي ودخل مرته لغرفة ابوي الي هم كعد قلق عليها
متكدر تصعد فوك .بس اني ظليت صافنه ع كلمات تمارة شنو سقطت ! من دخلوها طلع الي والدي وسالني بكل وضوح
-انت سقطتي أحلام
- ش شنو؟ اني سقطت منو؟ بوية اني شعليه
ضربني راشدي خفيف ما اذاني جسديا  لكن كسرني من داخلي
- اتحملت منج كلشي وكلت خطية بس توصل بيج اتوكعين بت عمج
سما اجتي يمي لزمت ايدي وكالت
-بابا لا اصدكها هاي اتريد اضيع سالفتها ولفقت هيج ع نيوفر
بصياح
-يا سالفه هاي
ضغطت على ايدها وحتى كرصتها
وكلت
- بابا مسقطتها والله ولا لمستها
سما اتباوع الي بستفهام اشرت الها بحاجبي  بان تسكت وخزرتها
تمارة وبابا ما صدكوني . وذكرت الهم تمارة هدتي عليها بالسكين و خنكي الها لدرجه وصلتها للأختناق
طلع رضوان من الغرفة وشاف بابا يغسل بشراعي ولازمه خدي
-عوفها بوية كافي ، ملامة لا انصير بأثنين
مفهمت قصده وحلفت
-والقران رضوان اني مدخلني والله معليه
علي
- لعد تتبلى عليج .
ابد مهديت خدي الي انضربت عليه
باوعت لعلي بتحسف وكلت
-انت من زمان تكرهني رجائا ما دخلك
سكت احتراما لبابا من سكته هو هم
- والله العظيم ما ضربتها ولا دفعتها
تمارة
-كافي لا اتلحون وياها . ترة هي من تضرب وتفقد ما تدري شسوي من تصحى اتكول اني شسويت . ؟ بعدين واضحه شصعدها لفوك هي اصلا ما تصعد لفوك ولا تدخل غرفتكم مو هي اول وحده اهناك صاحتلك رضوان؟  ؛ اني هم ما اصدك احلام بكلشي بس بهاي مصدكه

دخلت لغرفتي منهارة محد مصدك واكلت كف من والدي ظلم ونظرة رضوان ذبحتني  من ردت ادخل
باوعلي وكلي
- ما صدكتها تحبل مو والله كبرت .

اااخ يا دنيا ليش هيج
دخلت سما معصبة مني
-ليش ما خليتيني افضحهم ها لييش
-كاف رعونة انت الثانية اذا كلنا هيج تابلى ع اخوج واصير السالفه بيها دم مو بعيد تتبلى علينا بشرفنا وج هاي متخاف الله جاهلة مسمومة ماخذة الدنيا شيطنة
طالعه على خالاتها امهات السحورة و الزواج المتعة .

ما اعرف امنين جبت العقل والصبر وسكتت لخاطر اخوتي ضيعتهم بالسابق ما اريد اكرر الاغلاط
الصبح طلعت من غرفتي وسمعت نقاش حاد ؛ وطاري اسمي
علي
-خابروا اميرة كولوا الها
-رضوان اني خايف على ولدها منها
واهواي مناوشات كلاميه خلتني اوكف اسمع عليهم مدامي اني المقصود.

تمارة
- اميرة شسوي الها مو خلت هاي لينا تعالجها عود وجلسات شو كلشي ماكو انوب زادت !

رجعت لغرفتي واباوع لجدرانها واباوع لأختي النايمه واطفالي .

حسيت نفسي داخل مؤامرة كلها ضدي لينا طلعت اتعالج خبالي .
دقيقة يا نوفة ، مو جنتي تسألين ليش ابوج يقبل اتروحين الهم او هي تجي بكل سهولة مو جنتي تسألين حاتم اشعجب يخلي مرته تجينا كل اسبوع . ااااخ يا غبائي اثاري اني مغفله ؛ وما ادري
صدمة عمر مرت عليه صدك الدنيا ادور زعلي كل ما انهض اتعثرني بالتايهات
دفنت زعلي واضطهادي داخلي وطلعت ريكت اطفالي ولا كأني سامعه شي بس اعيوني تلمع دمع وما احجي حتى لا يبين بصوتي شي ،دزيت رسالة لأميرة ادزلي رقم لينا ؟ ودزته وفرحت هي من زمان اتريدني اتواصل وياها عبالها اريد اطمن عليها من نهد حادث هاشم ما شفتها .

*

رائد

رجعت للبيت ومقرر بداخلي القرار
اسبح واروح افاتح اهلي بموضوعي .
،
اول المندهشين امي

- يوم انت هذا قرارك نابع من كل گلبك لو لأن گلبك مكسور ع ريما من ترجتك
ترجعون

بالفعل هي صارلها فترة تتوسل وحتى رسلت امها لأمي ؛بس كنت مستأثر لكرامتي لكن بعد الي عانيته حتى بالدوام افكر و الوحدة قاتلة فاتحه عليه ذارعاتها
بالكئابة والبؤس 
خاصة شفت اخواني من التمينا بعزومه بعد ولاده لينا ورجوع و زوجها
شفتهم كلهم عدهم عوائلهم و ازواجهم الا انا وحيد مثير للشفقة على حالتي لا زوجه ولا ابن ، مثل القصر المهجور
فكرت وفكرت  ؛ ما لكيت حل الي غير الزواج من ريما ، وهي عدها بنت ما اداعيني بطفل بالمستقبل ،اهلي جادلوني لكن بالاخير زافقوني ،وتحدد اليوم الي اخطب بيه ريما

*
نيوفر

اكتب وامسح  هذا الحجي بعد العشا
كتبت .
مساء الخير . اني نيوفر اخت اميرة.
دست بسرعه حتى ما اتردد

*

رائد

جاي اتعشة مع الاهل
لينا وزوجها ويانا  ،

واحاديث عابرة مع صوت الشوكه والسكين
امي
-لينا صرتي ام وما بطلتي هاي العادة عوفي التليفون واكلي انت مرضع

- اووه ماما صرت ام وبعدج اتحاسبيني
ضحك زوجها عليها وشكاها لأمي
- خالة شوفيها ٢٤ ساعة لازمته
ما اهتمت لحديثهم وكأن الي بالتليفون اكثر اهمية من حديثهم
- ياا ماما  تذكرين نيوفر
امي
- اخت صديقتج ؟

واخيرا والدي تكلم بالعادة يكره أحاديث على  الاكل
- احاديثكم مراح أتجلوها وانت اتركيه للتليفون
-بابا ما اكدر تذكر البنية الي سولفت الك عليها .
طلعت اذكى منا كلنا . اني واميرة نحاول نسوي الها جلسات من غير ما تحس
زوجها
-والله ادخلين دخلات انتي يرادلج علاج
- لا يرادلي درع غباء البنية هسة دتراسل وياها ..انتظروا اشوية خل تكمل

الحديث عن هذي البنية لفت الي انتباهي البنية الي ثارت بيه احساس الانجذاب لتكوين عائلة سيرتها تطرب بداخلي مشاعر تداعب خيالي  ،لو تصلح هي لكان اختاريتها ؛ لكنها زوجة مترملة قبل فترة مو طويلة حزنها و الحالة الي وصلت الها بسبب فقدان زوجها تبين قدر حبها اله ،
ما اعتقد احصل مثلها بيوم مرة بالهوفاء،
كملت فجاءة لينا قاطعه الصمت حتى احنه نسينا سالفتها
- رائد نيوفر طلعت كاشفتنا يااااي  كتلي مرة اشلون ما تحس . طلعت حاسة
-شنو؟
-تدري اني اتقرب الها حتى اساعدها
واعترفت هسة هي مجانت مهتمه اصلا وماشيه على هوى اختها . لكنها هسة بحاجه الى احد يعالجها بالفعل
هسة الا اعترف من حست بالحاجة جانت ماخذتنا ع گد عقلنا

زرعت بداخلي بسمة وبهجة غريبة هالبنت ذكية و عدها عزة نفس وعناد و كبرياء
هزيت راسي وشربت ماي
البسمة اتحولت الى ضحكة
ضحكة قوية بيها اهواب شبه مني
خلت الحاضرين يصفنون بس لينا بادلتنياه
امي
- يوم عيد ابني اشوف ضحكتك
باوعت لوالدي ومستمر بالضحك بالكوة وكفته للضحك
-اسف اسف يابة مو قصدي .
كمت بدفع كرسيي ونهضت
لينا
-تضحك عليه مو ..طلعت هي معلمة واحنه انروح نتعلم منها على هالدكة
لا انوب نهت المراسلة راحت ترضع
حضرة جنابها
احتفت اخر ابتسامه على وجهي
واترخصت من عدهم

اشبيك يا رائد عندك رغبة قوي بيها . و بأولادها . شنو لأن عدها نفس كبريائك انت بأشد احتياجك مثلها و ما ترضخ لأحد بس هذا مو مبرر يا رائد لا هي من قاعك ولا انت هم !

*
نيوفر
كذبت على لينا باني كاشفة لعبتهم وماشيتهم  حتى احافظ على كرامتي ع الاقل شنو مغلفة وهيج يسون وياي ،
؛
خابرت اميرة تدز حاتم وتوسلت الها هي تبلغ اهلي .
اخذت اطفالي هربت من نظراتهم الي البائسة

اتلكتني  بالأسئلة من اشوكت كاشفتهم هي و لينا وصدك دافعه احلام
جواباتي كانت مختصرة جدا
-لا ما دفعت احلام
ولينا بمزاجي مشيتها
ظليت يمها يومين وما ماخذة راحتي لكن اهون الي من اجواء البيت
جنت اغسل مواعين العشا وحاتم طلع ويه جماعته
اميرة تغسل ملابس ندكت الباب . سمعت

هاشم يصيح خالووو  اجة ذكرني من يتلكة ابوة نزلت دمعه مني ورحت لغرفة اميرة هاربة من مواجهته .

صاحو الي ، اضطريت اطلع

رضوان
- شنو حصلتي لجوء اهنا
استغربت جيته هو هيج وقت بشغله
انتبهت  لتفاصيلة تعبان مرهق وين رضوان المهتم بنفسه اكثر من اي شي وين جان عود ريحان فواح ويانع هسة ذبلان  وكم شيبة طالعه من راسه .
كعدت يمهم
وهو يسولف ويه اميرة عن حاتم واندار عليه بالكلام
-اي وانت اشعجب ظاله ايام اهنا.
هو بيتهم اشكبرة يلا حضري نفسج
تجرأت 
ولزمت ايده
-وروح امي رضوان اني ما دفعتها ولا اتقربت الها والله

دنك
-خالة اتكول ما اتحسين بنفسج من اتفقدين

-لا والله وراس ابوية بذيج الفترة من تلفت اعصابي حتى من افقد ادري بنفسي مأذيه احد بس مستنكرة فعلتي مو لهلدرجة .  بعدين اميرة ما كالت الك اني كشفت لعبتكم مال المعالجة النفسية وعادي تقبلت الفكرة و جاي اعصابي تتحسن  ويه لينا كلامها  ونصايحها  .
خلتني اكون اهدأ من قبل
-هو اني هم شاك بيها ؛ هي شصير اذبها براسج لكن تعبان ومابيه حتى اتأكد منها لأن تعبت تعبت منها ومن اجواء البيت
عبالي من ازوج ارتاح شو زاد ارهاقي

معرفت شكول او اشلون اوسيه ما اعرف اواسي احد
بادرت اميرة وكعدت يمة كلش قريبه  علية
-خوية ليش مهموم ، الله يعوضك بغيره بعدكم شباب توك ٣٣ لا اتحسسني انك شايب هههههه
ما بادلها الضحكه وجاوبها  بهم
- ورطت نفسي ويه احلام حيل  متعبتني
سكتنا وهو ظل يشكي الي بداخله كانه انفجر لأنه مو بعادته الكلام عن ال بيته كدام اي احد .
- بس يلا طلبات وتاخذ وما اعرف وين اتودي الفلوس ؛ واذا ما اقبل الكه الخبر واصل لأمها و اعاتبها ليش اطلع اسرارناو اتعارك وياها اصير مشكلة اظل ايام حتى لو اطول اسبوع تكيف انوب حتى تهمل متطلباتي ترتاح مني من نزاعل، ظال اني الي اراضي وجاي على نفسي واكول صغيره وتعقل
-هاي لانك مشيت ورة كلام خالة تمارة كالت الك اخذها صغيرة وربيها هاك استلم شوف فارق العمر اشلون لعب دورة ،كولت الك اتأنى يا خوية واخذلك وحده تناسبك مو هاي قرأة  وكتابة تتهجة متعرف تقرة اشلون باجر عكبة تربي اطفالك ،
- انت جاي زودين همي و ندمي ؟
ظل يحك براسه  و نتكأ على القنفة مهموم
رحت جبت اله عصير وكيك من الثلاجه
وحطيت كدامه

اميرة
- والله فايدة نيوفر الوحيدة من اجت الكيك هذا
تاكل وتضحك
خلت رضوان ياكل وياها واني صافنه على الاثنين  .
وحده المادة لاعبة دور بحياتها و منغصة راحتها وية زوجها الموظف البسيط عليه اجار ومصاريف تفوق طاقته . بحيث بابا ما زال مخصص الها مبلغ شهري خطية
و هذا رضوان مشكلته مشكلة غلط من اخذ احلام . غلط دفعه الثمن راحته ؛ بوقتها حط نفسة امام خيارين إما لمياء لو احلام  بنات اعمامه المتوفرات للزواج ؛ صارت بيه عقدة ما يقبل يخطب غريبة لا يتعرض لنفس الموقف الي اتعرض اله من خطب ال حبها .رغم مخاوفة جانت مبالغة لكنها تبقى بسببي و هذا الي زود همي و زادني كره لذيج الفترة السودة .
رجعت للبيت وية رضوان رجعني واتوسلت اله ابقى يم اميرة ما قبل وعاد جملته
-حتى لو ابن عمج يقبى عيب منا كاعده يمهم .

**
رائد
رجعت غضبان و ما اتحاجه وصلت امي وابوية واريد اطلع من بيتهم بس
والدي اعترض ما خلاني اطلع الا اناقشة
كعدت على اعصابي
سألت لينا شنو صاير اهناك
جاوبتها امي وسولفت الها الي صار

لينا
- من البداية ما موافقتك يا رائد
المهم اني هسة اترخص بالاستقبال اكعد انتظر نيوفر . ولو ادري بيكم اترجعون من وقت ما جان واعدتها
؛
-اني هم رايح

ابوية
- بوية انت ليش هالكد معصب اهدأ

- كلامهم بوية . يتوسلون حتى نروح نخطبها ؛ ومن اصير كعده يحرجوني بطلبات مالها داعي
امي
- ماما بس اهدأ وخل نتفاهم

-شنو نتفاهم شفتي اختج شنو طلبت ،لو اكتب الها نصف بيتي بأسمها و لو اشتري الها عقار .
-اتريد ضمان لبتها
- شنو اني  ثلاجة ولازم بيه ضمان . ما تعرفني هي حتى اتكول اتعذبت ويه زوجها الاول ورماها تاليها  ما انريد انعيد التجربة قابل اني ناقص  مثلة
امي
-ابني ما يصير هيج . معصب . انت ما فهمت خالتك . اتريد تامن على مستقبل بتها ولا تنسى هذا الزواج الثاني الها

- يوم اني افهم البشر ومن وجهم فهمت وعرفت همه هيج طلبوه لأني عقيم يستغلون هاي النقطة فضلوا يطلبون ومفضلين عليه بقبولهم ما سمعتي اختج شنو اتكول . والله كان بنفسي اشوف ولد لبنتي .
تماسكت اعصابي اهناك لخاطرج  ، بيت اختج ذاك ما اعتبه وبتهم خليها يمهم خل انشوف يجيها عريس بضمان من الشركة .

اخذت مفاتيحي   . وكاره الزواج لا ابو الي يفكر يزوج بهاي الساعة  التعبانه

طلعت للحديقة . فتحت الباب بغضب وهي فتحه وهي طلعه منه انصدمت برؤية البنية .
اتراجعت هي للخلف لان صرنا وجه بوجه
ارتبكت  جانت شايلة بس طفلها الصغير
ما اعرف اشبيها وجه صار احمر
-اني ما جنت ا اريد ادك ادك الجرس

شهكت  اجت تمطر

هزيت راسي اني ليش اخزر بيها . ردة فعلي من انصدم اتخلي نظراتي متوحشة
ما كدرت رقة هذي البنت تتحملها واجت تهوى للبكاء .
حاولت قدر الامكان يطلع صوتي هادي
-اتفضلي اتفضلي اني هم جنت طالع .

انتحيت عن الباب فاتحها الها وهي دخلت ردت ادخل اصيح احد الها
كالت
-ليش هيج رائد تقيأت
التفتت عليها رافع حاجبي بستسفار وتعجب
اشرت على نفسي
-اني
باوعت الي وازادت حمرة وجه من جديد
برتباك وتبرير
- لا لا ابني  ابني رائد مو انت
-اهااا ؛ ما لكيتي غير هذا الاسم المعقد
جاوبت وهي تمسح بعباتها
- ما احبة اصلا ثكيل حيل اصيحه توتو
صراحتها وعدم مجاملتها لفتت انتباهي واللقب هم 
-توتو!
مشيت عنها وكلت لنفسي
-توتو!
حتى هيبة للأسم ما بقت . دخلت لاختي شفتها واكفة يم شباك الاستقبال واتباوع لنيوفر ولازمه طرف البرده لا تنفتح كلها
- شسوين
نزت
-نززتني تدري .
-ما اطلعين الها ؟ مو شفتيها دخلت
-عجبتني وكفتكم سوة توتو
راحت .زارعة بداخلي ابتسامة خامدة ثورتي ضد موقف اليوم . 

يتبع .
مهم
النشر رجع يومي  بنات بعد ما اصلح النت
المهم انتم هم مقصرين ويه القصة .
كل بارت باليوم الواحد يصفى الى ٣ الف قارئ وبالايام يزود اكثر . ما اريد سوى على كل بارت الف يصوت . الرجاء الرجوع لجميع البارتات الي ما مصوته اصوت مجرد نجمة تضغط اعتقد هذا الحق القصة مدام تقرأ
الرجاء بليس اذا فرحتوني و وصلتوا اليوم جميع البارتات الى الالف وربي اكعد اكتب ١٢ وينزل هدية بالليل  👑👑