رواية الرعناء والأشيب الفصل التاسع عشر 19 - بقلم زهراء العراقيه

أحقا انتي لي ...
هل تحقق حلمي ...
احساس بالامان والاطمئنان يعتريني..
فأنتي الان ملكي ..
وليس لأحد ان ان يطيل النظر الى عينيك ..
فيما عداي  ...
انا المتيم فيك عشقا ...
                     من كتابات روز الفياض

سألتة أستفزني حيل
- ليش تضحك ؟
تاتأت و ضحكة خلاني اوصل لقمة عصبيتي وتوتري اوف منك لساني ولا اكدر اضبك
- شرطي تصارحيني بكل ما يجول ويصول ببالج
صرت فاهية معرف شكول غير الحماوة الي تطلع من وجهي عكس فهاوة الساني الي اشنج من الخجل والفشلة انوب بعدني مماخذه عليه توني دا اريد أقلم نفسي ، واعاملة كزوج من غير حواجز ،
درت وجهي ونزلت رجلية اريد اطلع من يمه
حط اديه على امتوني
- تعالي وين رايحه بعد ما اعترفتي ب الي يصول ويجول بهذا البال
اشر على دماغي
- ماكو طلعة منا !¿
،
وانطمر من جديد جرح الماضي بس بتربة هشة و مرطوبة حيل اقل ضربة رجل تفتح المدفون علية ،صحيت من النوم لكيت راسي على صدر زوجي ما رفعت نفسي و قربت راسي وحطيت اذني علية اريد اسمع للجوة اضلوعه ، جانت دكاته  مثل صاحبها هادية مدري لأن نايم قربت اذني اكثر صرت اسمع صوتها اكثر حتى خوفتني رفعت راسي
عنه اتحرك
كمت وهو فتح ،
- وين رايحه
-اريد اصلي اذن
- نوفة
تأفأت بداخلي ما حب هالاسم حيل بس صرت اسكت لخاطر ما ازعجه يكول نيوفر صعب وماله معنى !
كام لبس فانيلته وكال اني قبلج ، دخل قبلي ،رجع بالنهار انرسمت على وجه الجدية الي اخاف اتقربله منها ، واحسه ما يقربلي ،

خابرني الضهرية رضوان عفت صب الغده ودخلت لغرفتي ارد جان رائد حاط بحضنه رائد و مكنك ،
سطر اذني اصياح رضوان ورزلني ذيج الرزالة عارف كلشي
-ها اشلون عرفت
رجع صاح بيه
- هذا همج ، غبية ولج هاي سمعة شيكولون الناس علينا عميتي علينا اني زوجها راح يكولون عليه مكر ،و اخوية عار مخليها بيتنا صغرتوني انت واخيج الله لا يرضى عليكم
سدة بوجهي وكانما باب و انرصد بوجهي

خابرت سما
- ولج سما رضوان اشلون عرف

-  اووف بابا كال اله ما صبر ،
وماتدرين اشسوة بينا لأن هو الوحيد الي ما داري وحس نفسه مغفل اخذ ملابسة وطلع ،
- عزة
- اشوكت خابرج ؟
-قبل اشوية ، اووف منها حتى من طردنها مخلصنه من المشاكل
-ليش عاف البيت شنو يحبها وهيج كلب الجو علينا
- لو اشوفين اشسوة بينا اتلازم ويه علي وكله ليش ما كلت الي غبي ليش استغفلتني وخليتني ملفي وحده كلك
علي ميعرف شيكول هو جان خايف يكله ويصرف غلط ويكتلها رضوان
،
تعبت من هاي المشاكل مال الأهل كون تعدي على خير و يطلع رضوان من هاي الازمة وما تنعدم ثقته بعلي  ،
بعد ثلاث ايام بالصدفة انتبهت للتقويم بتليفوني صارلنا شهر على زواجنا بس محس نفسي مرتاحه ولا ماخذه راحتي على الرغم البيت مبيه احد غيرنا ، كلشي بيه من اثاث ثمين وغالي واهواي يحطون هو واهلة تحفيات كبيرة و موبيليات بحيث بس الركض ورة الولد وحده ماخذ حيلي تعال منا و انزل منا ولا تلعب بهاي العب بألعابك بس كلشي ممنوع مرغوب يتركون الالعاب ويشلعون قلبي بالعبث حتى توتو صاير متعب وتوة يطلع رحي حتى تكمل أسنانه و نحس بس يبجي واذا سكت يأذي بزحفه او حجلته ، رائد طريقة دوامه صارت حلوة هليام يروح بالنهار وبالليل كله يمي لو بين يوم ويوم طبعا هو مو دوامه الرسمي  بس عادي معظم اهل المناصب هيج على الاقل رائد قايم بعملة وما يسرق ولا ياخذ افلوس من الفضائيين ولا يتبرع الحمدلله حيل يخاف الله وعينه متروسة بس ما اعرف ليش الحلو ما يكمل ، منعزل و مايحب الكلام واني لغوية و صوتي عالي ويمة الصم حتى لا ازعجه  وهمين لا ياخذ عني فكرة سوقية او قروية وهذا سبب عدم راحتي دومي متقيدة يمه ،  عزمونا للمرة الثانية اهلة يوم الجمعة الجاي  ، مو هلكد احب اروح الهم احس نفسي غريبة بوسطهم وبوسط احاديثهم ،
لكن لازم اروح حتى لا اعزل نفسي عنهم ما يصير ذولة اهلة و حقة عليه أتألف وياهم وعلى الاقل اشوف لينا خطية خابرتني ثاني يوم من مخابرتي الها مرة لخ جان رائد يمي واتحنطت ، اخذت تليفوني ورحت للهول  واعتذرت الها على الازعاج وانشالله ما اعيدها واطلب مهدأ ، وهليام رجعت مثل قبل هي تتصل و هي تراسل تذكرني و اكعد وياها ساعه واثنين بس مراسلة شالعه كلبها لأن من ما منهارة ما افضفض استحي الا رسايل الا اخذ راحتي كأني احجي لنفسي ، كل الي يدور ببالي ، كلامها يريحني دائما تطلب مني ما احاول انسى الماضي او اجاهلة اصارح نفسي غلطت والغلط عده واخذت من الراح دروس والجاي لازم احاذر بيه واعيش لأجلة واني راضية عن نفسي لأن الهروب و التناسي يأذي بأقل ذكرى  ،

ملتهية انظف وجهالي يمي يهوسون و رائد بالدوام رنت تليفوني جانت سما ،

- ها سمسمة اشلونج حبي
-نيوفر
تبجي والشهكات تتزاحم من حلكها
-اشبيج شكو سما؟
خرعتني حيل
- لج احلام انتحرت !
-ها !
- لج من ضرب اخوتها و طلاك رضوان الها عند الشيخ يمكن
- احجي سما ماتت ؟
- ما اعرف خابرتني لما( جنتهم )
تدعي علينا لاكيها مكطعه شريانها بالحمام

اني بفلم لو علم احلام تنتحر هاي الوكحه السليطة !

بهت لوني جف الساني سديت الخط وخافقي مصدوم ، انتحر من ضرب اخوتها مو لان تطلكت لان الطلاك مناها ،
احلام ضحية ضحية اهل هذي الزيجه بغير دولة ممنوعه و هي ضحية ام وضحية عمي الي ما عرف يختار الها ام صالحة ، اثاري بعض الامهات هم  نقمة !
دموعي اتحجرت بالمدمع ما تقبل تطلع واتريح عيني ظلت تحركني ،
خابرني علي فتحت خط بس اريد اسمع خبر  عنها يكول ما بيها شي بعدها تتنفس
- كله من وراج لو ما موصلتها لاهلها بس لبوج جان طلكها وخلصنه ، ليش هيج ارتاحيتي هسة هااا !؟

سد الخط وكلامه جان اصياح ،

رجعت اتصلت بسما
-الله يخليج سما شوفي الي اخبارها الله يخليج

- ما ندري محد جاي ينطينا خبر
-يعني شنو اتوفت ، لج اذا متوفية اني الي قتلتها
دموعي حارة ، ما اعتقد اكو دموع اشد حرارة من دموع الندم ¡
روجة ندم اجيبني وثانية اتوديني صرت ادعي تتصل مرة لخ سما اطمني ، حتى على احلام دكيت ماكو عنها اي خبر اهلها مكتمين و لما غلقت خطها وابوي راح الهم وبعد ما رجع و هم ما شايل تليفون ، تمارة هم اتصلت لامتني والوجع زاد
وجع الندم و الحسرة على فعل اقترفته و اتمنى الزمن يرجع و امحيه ، صار موجع قلوب البشر ومثير همومهم الليل الداجي بسواده المظلم ومحد انطاني خبر ، سويت بيض و قدمته لجهالي دا اوكل توتو ببال سارح دخل علينا رائد
- مساء الخير
مساء الخير !
-ها رائد اجيت
- ردي السلام ، وانت هم رد
وضحك بوجه هاشم
وكف هاشم يريد يشبكه
-لا لا اديك بيهن اكل لا ارجع اكعد ،
رجع هاشم كعد وما زالت اعيونه على رائد
وكف يمنا
-ليش مسوية بيض ؟
-مبيه حيل
-ليش ما كلتي اجيب وياي  من برة
- ما حاجه ، اصلا مدري بيك اشوكت تجي عبالي نص الليل مثل البارحة

فتح الثلاجة طلع بطل لبن وكعد يشرب منه
-جوعان
- اطلب من برة 
كلتها وشلت توتو غسلت اله
-ليش اتغسلين بالسنك ، مو اكو مغسلة
- ها اسفة نسيت
اخذت توتو ورحت للمغسلة
سمعته يكول
- ليش اقل شي وتتحسسين
كالها لأن اخذت الولد وحلكه موغف صابون ، ضايجه من دقته و انتباهه الدقيق الماشفت اله مثيل ،  رجعت وحاجيت الجهال
-ما خلصتوا ادري هو بيض
جان بعده كاعد وبيده البطل ،  ويباوع علية وعلى حركاتي
حطيت الطاوة بالسنك
هاشم
-اليد بعد جاي
رائد
- كول شاي

هاشم
-شاي

-جيب كوبك
اجيت اخذه اعترضني ورائد
- لا ماكو شاي بعد كوم غسل
صوفي هم اعترض ويريد همه اترسه نصه ماي يشربوه مثل الشربت
كام يبجي صوفي ما يقبل يغسل

- حباب خل اصبلة خطية
بحزم
-لا و سوي الي عشا ما اريد كل برة

شلت الطاوة بغضب ورجعتها حيل ،وصوفي يبجي وهاشم يلح يريد و توتو يلج  ورائد مصر اسوي عشة
-ليش اتركعين بالغراض
درت وجهي عليه
- يعني شتخسر اذا خليتهم يشربون جاي ، مو خطية شوف دموعه
واشرت على صوفي
همست من باجر اجيب الهم اني افضلي
-شجيبين ؟ ماكو بالليل ممنوع على الاطفال بابا انت ما اتفهمين ، طفل يشرب منبهات بالليل اشعنده ،
كام معصب مني
-  اجيب الهم يكلك اني استكثر عليهم ، اني اشكبرني ما اكثر بيه اصلا هو مو زين للكبار ويه الوجبات خاف عبالج ، مشى عني ويدردم
مجنت اعرف مضر وهمه ثولوني . صحت بيهم وضربت هاشم موتني لحيحه طلع رائد عباله عناد بيه ،
- ليش ؟كم مرة كلت الج الضرب ممنوع ممنوع ماكو عق.....
سكت واخذ هاشم الي يبجي وعظم الضربه كدام رائد مستغل الموقف
كال
- استغفر الله
واخذ صوفي مني وراحوا

كعدت على الكرسي محتارة شنو الي فاقدني لب عقلي اي هم بيهم ؟

سويت اله عشى وصحته يجي، ما اجة ، دخلت للغرفة شفته حاطهم ع اديه اثنينهم هاشم نايم بس صوفي يحوس اعرفه ما ينام لانه مو كلش ماخذ على رائد بعده يحب لعب وياه بس مو لدرجه ينام بحضنه  ،
-العشة كمل
- ساعه صارلج ،
هم عقب
كام اكل قليل وراح يباوع تليفزيون
نعس صوفي و رحت نيمته هو وتوتو
وطلعت برة بالحديقة ، اسمع صوت الطبيعة بالحديقة الي هو صوت الصرصر و بس كاعده ما اهز نفسي بالمرجوحه
خابرت سما ما ردت ، خابرت اميرة
- ها امورة بشري ما عرف حاتم شي
- الحمدلله يكولون حالتها استقرت ، لان خاسرة اهواي دم اهلها ما مكتشفيها ابسرعه
- ياا ،هم الحمدللة طلعت عايشة

سديت منها والحمدللة من الله انطاها فرصة ثانية مثلي ما اتوفت كافرة ، غضب العباد اهون من غضب ربهم يعذبوها بالدنيا والا الاخرة ، الخبر ما زال عني الشعور بالذنب والندم  والاحتسار
- شسوين ؟
واكف ع يمنتي رائد اديه بجيوب سروالة
- افكر
-تعالي فكري جوة اهنا بك ،
هم ادخل بيه  وكومني من مكاني وكلي اكعدي بالصالة فكري ، وهو كعد يباوع تليفزيون ، كمت عزلت المطبخ ، ورحت انطرحت على سريري ، اجتني كومه افكار مدري ليش انرسمت صورة مختار بخيالي و ذاك اليوم الاكشر ،اتبدل الفكر بعرسي من فيصل ، كلامه سوالفة ضحكاته ، احداث حياتي شو بسرعة تمشي ، نامي يا نوفة شنو هالافكار الي تجيج ، يووه ،حطيت ع راسي المخده ماكو انوب فكري بفيصل زاد ،سوده عليه عسى ما اسوي اله اي شي ياكل ماصخ مالح ياكل اتعلمت بروسهم بعض الاكلات وهو وامه ساكتين مو رائد الا سويت اله اكل خاص و ناشف و دقق بتجفيفه عن الدهن الا أكل  ، ااه يا فيصل احسك موالمني اكثر على گدي وعلى گدك ليش عجلت رحت ، حسيت بدخول رائد غمضت اعيوني مريد اشوف واقعي وين جايبني ،  حسيته صعد على السرير
- نوفة الساحبة طفيها من ننام ، هلو بس لا نمتي ،
دخل وياي بالغطة ، والسبلت يكفخ علينا !،
حط ايده  على خصري ،

باس رقبتي ، و بدأ يتلمس جسدي ، توقيته كان مو مناسب الي اني من تجيني التايهات كل همومهي تجدد عليه يعني شنو صار وياي اذكره والوم بنفسي ، جنت
اتذكر مشاهد من حياتي السابقة بنفس الوقت الي بدت لمساته تزيد كالعاده غمضت حتى لا اشوف نفسي بحضن واحد غيره ؟!
-فتحي نوفتي ...
باسني وكرر طلبه
فتحت ملبية طلبه ، بس التهى عن النظر لوجهي رجعت غمضت ما داخله بالمود و اعد الدقايق تنتهي ، هالمرة مثل طريقه فيصل التقليدية واني اساسا جان بفكري بيه ! ،
(فيصل جان يفتقد المعرفة بحقوق المراة خبرته ماخذها من الافلام بشكل خاطئ اهم شي يرضي نفسه  والمداعبة فقط 
بالقبل  لهذا حبيت طريقة تقرب رائد الي جانت جديده وحسيت بكل انش بجسدي مرغوب واله حق عليه ) ، انتهت هذي الليلة بنوم رائد واولادي و بسهري و ارهاقي ابسرعه غسلت لمساته ورحت ادعي لأحلام ما اتحمل حوبتها ولا طايقة نفسي
من الصبح خابرت سما كالت الي ماتدري عنها اذا تعرف شي تخابر ،
بعد.الريوك رائد تأخر ما راح ، شفته يلعب بازل مع هاشم الي مركز ومتحمس على العكس وياي يتملل من هاي اللعبة واني هم بس العبها مجبورة حسب تعليمات رائد
سويت جاي لرائد لان الصبح ما يشربه ويه الاكل مثلنا ،  وراه

كعدت يمه بس اني ع القنفة وهو ع الارض ويه هاشم يشرب و يرهم قطع
- اكول رائد انت بالجيش هم هيج نازك
باوعلي وابتسم
ورجع يشرب
- لا اهناك اذا اشوفيني متعرفيني ههههه واذا يجون يشوفوني  بالبيت هم ما يعرفوني اهل الجيش اني نفسي .
رفع كوب الجاي الي وكال
-اكول جاي اهناك
ضحكت
- بس الاحسن نربي الاولاد.على الاتكيت والنظام وانتقاء اسلوب وكلمات مهذبة بواجهون المجتمع بيهم
-انت شنو مخلص
شو هذا ضحك وهز ايده
-زوجج ما اتعرفيه شمخلص هههههه
كلية حربية يحلوة ، كومي يلا
غسلي الكوب ومشطي هالشعر
- هاي عبالي كلية شرطة
اشرلي اروح
-اشبيه شعري
رحت . باوعت بالمراية اشويه مهوس عدلته و غيرت ملابسي لتراك بيتي هذا كانه مراح يطلع اليوم وما شاء الله يدقق ويركز بكلشي مدري لانه عريس اضاهر اني ناسية هذا الشي ،

سمعت صوت رائد الي ما معتاده عليه عالي ،
وبجى بعدها هاشم  ،طلعت واتلكاني صوفي يضحك
رحت شفته لازمه من اذنه و يأشر اله
-اذا عدته مرة لخ اعاقبك ؟

وكفت بزوية الصاله محتصرة جسمي بيها واعيوني انملت دموع
قطع البازل منعثرة ومطشره كلها
و دموعه تجري و يبجي ، انتبه الي هاشم
-ماما
هدة رائد وشافني اشلون اباوع الهم
اجاني هاشم يبجي شلته و جريت وياي صوفي و دخلت بغرفتي و قفلتها عليه

دك الباب رائد
-افتحي ، نوفة افتحي الباب ،

شفت روحي بهاشم من اكسر شي نفس العقاب جان بالبداية من تمارة جرت اذن وتهديد بالعقاب و بعدين اطورت وصارت تضربني ،
ما اريد ما اريد اعيش اولادي بنفس الطريقة كعدت على الارض واحضن وابجي بيهم لو يصير ارجعهم لرحمي جان سويتها واحميهم
رائد يدك بالباب و الاطفال يتباجون . انتبهت توتو مو وياهم مو عندي ،
فتحت الباب و حاطه جهالي وراية
دفعني للخلف و دخل
- شكو يمعوده ليش هالتصرفات والحساسية
هاشم اخذ اخوك وروح منا

لزمت بيهم رافضه وخرهم عني وطلعهم ، صوفي يبجي ويباوع الي راحله باسه وكله حبيبي لا تخاف ، هسة نجيكم ،
سد الباب واني مثل القطة الهايجه ومطلعه انيابي
- ليش تضربه مو انت تمنعني هااا
-ما ضربته ، لزمته من اذنه بس واني مو مثلج افقد واكعد اضرب بشكل عشوائي
- بس بجيته و خوفته اليوم جريت اذنه وباجر تضربه
كعدت ع السرير قوتي ذابت
وكف كدامي
-نوفه حبيبي ، اني من زوجتج مو بس جنت ادور على زوجه ، والا كنت اخذت وحده تتفهمتي على الاقل مو اقل تصرف مثلج تفسره الف تفسير  .

كعد يمي واني ضامه وجهي بين اديه والنار تسعر بيه سعر من كلامه يقصد اني مو من مستواه الثقافي  ما اكدر افهمه !

- نوفة او مثل ما اتحبين اكلج نيوفر ، مستحيل استقوة على يتيم ، اني رجل واحتاج احد انطيه حناني وحبي و يشاطرني ايامي ويملي عليه دنيتي ، انت واولادج امانه بر گبتي ليوم الدين وما يوم راح اجور عليكم
وخر اديه عن وجهي ،
باسني من جبيني
- ليش بجيتي وليش وكفتي بالزاوية
وكفتج اذتني حيل من جوة و ومسح على گلبه
ضمني لصدره وكال
- حسيتج شايفتني ذيب او وحش مو بشر
- ما ادري رائد اتذكرت من جانت تمارة تضربني
ظل يبوس براسي وكال
- ما ضربته بس هو غلط على اخوه ، ابن الكلب  هذا اللفظ لازم يتعلمه غلط ومايعيده ولازم يهابني يا نوفه هالولد يراد اله تربية رجل يلزمه من صغرة لازم اسيطر عليه .
دفنت راسي جوة صدرة
- اسفة
- لا تتعذرين باسني من علبتي
مراح اعيد بالكلام واوعد لأن الكلمات اتموت من تنطق ، بس راح اشوفين بعينج اذا الله انطاني  عمر اطلعهم الج زلم ينسند عليهم
نصى صوته بنبرة مازحه
-بس انت مو من جرة اذن توكفين بالزوية اني مو شلشبيل
حسني اهتز
عرفني اضحك
-اووه
هاي شنو
بصوت باجي 
-شنو؟
-شفتج وردت من بجيتي
واخذهن  مني واخذني مني وسلب لب العقل بأتقانه و رقته وياي حسسني شفتي حبة فاكهه من جنة يستذوقها و يثني عليها ، وقفنا صوت بواجي الاطفال، طلع الهم واخذهم وياه يشتري الهم ويراضيهم حتى توتو راح وياه بالسيارة اوي عيني عالرائد كيوت يروح للماركت بسيارة هههه الله يرحم دراجة رضوان الذبانه من جان مراهق اصعد وراه للمدرسة ، هسة الحمدلله رضوان يريد يشتري صول ،
،
العصر دخلت وبيدي سلة ملابس اريد اكويهم
شفت رائد واكف كدام خانتي ، الكنتور خمس ابواب الي خانتين سويتنا مجموعات سلايت بالوسط مجرات ع جول الكنتور و خانته رائد مثلي بيها تعاليك ملابس و خانات و بالباب تعاليك للشلات والاربطه بس اهنا اجه السؤال رائد ليش اهنا واكف  ،
لا وبيده ثوب
-رائد التفت ومثل الي ارتبك
- لا هيج بس اريد اعرف  قياس مرتي الجذابة
- هاا
يالله هذا الرجال راح يموتني على عشق حفظ هاي التفاصيل الدقيقه الي ما بيوم شفت رجل بالهدقة بعضها اكرها وبعضها احبها وبعضها اشوفها مو مهمه مثل قياسي بس لا يسال عن قياس بنطلوني وربي ما اعرف ،
،
راسلت لينا وحجيت الها الي صار واحاسيسي باني راح اظلم رائد بعقدي
وشكيت الها تعب بالي بسبب الي سويته بأحلام و خوفي من عدم تحمل رائد طباعي الي ما الي سيطرة عليها ويجي يوم ويتركني ،،

،
شفته
طلع من البيت وما اجه غير نص الليل جنت نايمه كالعاده ما يفوتني بحالي من نايمه  تعالي اكعدي و شوفي وياي فلم هالرجال اشبيه ما اعرف ساعه غدي ساعه منفرج ،  وبالليل يتغير
حتى ثاني يوم بالنهار كان يشاقة و يمزاحني  حتى نسيت اراسل لينا بيومها
وعرفت ليش اخذ قياسي جايب الي ثوب
معجبني مابيه شغل شو
لونه بينچ فاتح
كالي البسيه وهو مسنح على السرير
ويمه توتو لاطش نايم يمنا
لبسته كدامه وما رفع عينه عني ربكني
وكفلي و دارني بأيده كانه يراقصني.
-حيل حلوة بيه شنو رأيج
باوعت شو باللبس اختلف جان معاجبني هسة ،
-حلو حيل شكرا
وهاي جانت اول صوغه يجيبها الي ،

ثاني يوم جان يوم الجمعة لبست وهو  بالدوام كال امرلج اخذج حضري نفسج
كاعده والطخ بروحي واحاول اجر عيني مثل لينا وحرفيتها ومطلعه تصوير تعليم ع اليوتيوب وماكو نتيجه
اجه  رائد
-كملتوا
-الجهال كاملين بقيت بس اني
- ابدل ونطلع
صفن عليه
-اشبيها عينج
-ههههه عود اجرب اجر الها لاينر اويانير لاناير يبووو اخط عيني
-قصدج ايلاينر
-هااا اي يمكن هو هم طلعت تعرف بالمكياج
-شايفتني حاط مراية واتمكيج ، غير هو المعنى القريب لخط العين ، كملي ابسرعه وعجلي ترة العزومة على شرفج لأن زوج كريمه يريد يتعرف عليج لاول مره،
يالله انطيني الصبر طلع مسوين معزومه حتى بس يعرفوني على نسيبهم واني شعليه وليش اعرفه

-وليش لازم اعرفه ؟
-اي
كالها وهو ينزع ودخل للحمام
ليش لازم احنه اصلا الزلم تنعزل عن النسوان والله ناس بطرانه ذولة ،
من طلع
- نوفتي اليوم البسي الفستان الي جبته
- ها بعد بدلت
- ميخالف
كالها وهو يمشط شعره
شنو قصده ذوقي محلو واني الي عبالي ذكرني بشي ومهتم بيه طلع بس حتى ياخذني لأهله هيج سوة لخاطر الطلعه ذوقي ابد ما يعجبه لبسته واني ضايجه منه كد ما فرحت بيه من جابه كرهته لبست عباتي وصعدنا للسيارة ، وصلنا الهم وسلام وتعارف اكثر على اهلة زوج اخته رجال كبير ، واخته هم كبيرة من عمر تمارة بس عود مثلها لا عيني تخبل بالرشاقه واللياقه وشعرها لمتنها مدرج ومسويته مجعد اشقر فاتح  ولينا محجبه كدام زوج اختها بس الام خبلتني ام رائد الشعر كاريه يخبل اسود مسويته بيه لمعه بنفسجية ولاسنز واصغر بنفسها وكلهن كأهنهن طالعات من الصالون اصلا مبينات كلهن حريفات بيه ،
كريمه عدها ولد من عمر علي و بنية اكبر من سما بسنه اسمها لهفة و اخت ثالثه ١٧ سنه متكلفه وتارسه وجه مكياج مابيها براة غير محجبات كولهن
لفهة ابسرعه دخلت جو وياها من لقائنا الأول هي تشاقه وتضحك بس اني حذرة

جانت الساعه ب ١٠ الضحى كاعدين بالاستقبال اني عباتي على متني واطفالي يمي ما اتحكروا هالمره لأن كومه ناس اخوته رائد كلهم ، انحرجت من زوج كريمه شمخلصه همزين ضاع السؤال بين احاديث الي يمي ،  دخلت علينا وحده اربعينيه مع اولادها وطلعت عمه رائد اتريد تتعرف عليه واول ما سلمت كالت معزومين شهر عسلكم وطلع بعد يوم الثلاثاء يمي غداكم،  حبيتها وحبيت بساطتها ،

شفت لينا اخذت رائدوطلعت قادني الفضول بس ما دخلت ورحت عيب ،

**
رائد
-الحك هذي سوتها
- شنو الموضوع
-ريما بطريقها النا اتريد اشوف الي عفتها على مودها
-شنو
ياالله هسة شتريد مني مو خطبتها وامها اشرطت
- اوف هي اتريدك مبينه هالمرة بس امها طلعت زايد وخسرتك ريما مرة لخ بسببها حتى زعل صاير بينهن تدري لو لا ، قبل فترة اصالحن
- خابريها لا تجي وتحرج نفسها وتحرجني

رحت وشايل هم لا تجي اعرف  تصرفاتها ،
اباوع لنوفة مثل الارنبة بوسط فصيل من النعام كاعده واعيونها تتلفت اول ما شافتني استقرت عليه قريتها اتريدني يمها      ، مديت ايدي للهفة
-ممكن اكومين منا خالو اريد اجالس مرتي لو محجوزة اليوم الكم

***
نيوفر
رجعلي رائد اوووف من كاموا الي اعرفهم لينا و رائد اقصد الي متألفه وياهم حسيت بوحشه واستغراب مثل الطفل ،
.
كنت حذرة كلش بأكل القطايف رغم هي طيبة بس اخاف لا تنعثر ع عباتي لانها هشة
اكلت نص وحده و نفضت ايدي ومسحتها بكلنس
زوج كريمة كال
-والله عرفت تختار مبينه خوش بنية وخلوقة

كريمه
-دسكت خجلتها حتى بعد متاكل

يربي اثنينهن خجلوني
رائد
شال وحده من القطايف وكال
- اكلي عزيزتي ذولة اهلج ويه الگلمه دخلت وحده عرفتها وحده من صوتها لان جنت اباوع لرائد بخجل واقضم وهو مبتسم ،
-مرحبا ، مجتمعين عند النبي

قضمت قضمه وحده ورفعت راسي عليها
و رائد بطل يوكلني
سلمت عليهم واحد واحد صوتها عذب و حروفها تنطقها بأناقه مثل لبسها كانها بطلة مسلسل تركي مكياج سنبل مع شعر اسود متدرج بالطول من الخلف اطول من كدام  سرح ماي ، لابسه بنطلون تسعين ازرق يبيض عند الركب و بدي ابيض كعبها اطول من سيقاني !، احتاريت على شنو اصفن
بيها ، ياربي  تطلع خالة رائد بيبيته اي شي بس من محارمة !،

وصلت لنا كمت الها تلقائيا ويه رائد
خلفها بنت تلمع مثلها ،
-مدت ايدها عليها وهو هم مد ايده
كومه ظلت تتسالم وياه واتبارك اله بس شنو تحجي وتسكت وتكمل حسيت اعيونها تلمع
وكفت لينا يمها و اشرت الها    عليه
- هذي كنتنا الصغيره
ابسرعه حجت مرت حماية
-ها هذا بسمار عليه وضحكن
مديت ايدي شو ممدت ايدها عليه وظاله لازمه ايد رائد !!

يتبع

هلوووو اشلونكم ما وحشتكم بارت طويل لعيونكم طولة بارت ونص غير العادة 🌷