رواية الرعناء والأشيب الفصل السادس 6 - بقلم زهراء العراقيه

الصراع السادس

التليفون على صدري و صافنه بعبث على الكنتور . واسمع صوته
-وياي وين رحتي .؟الو

حاولت قدر الامكان اكبت ارتباكي و اخليه يكمل بس بداخلي اريد  اسد الخط . اصبعي يم زر الاغلاق ما اريد اسمع منه اعترافه بمعرفة شي يخصني
غمضت اعيوني واسمع  عتابة ليش رحت
جاوبت بصوت ضعيف واضح كل ما اعانيه
-لا وياك   . كمل

- شكمل احجي واحجي وانت ماكو

- اسفة

-لا تعتذرين يلا مصار شي . بس كلت الج ممصدك انت وافقتي ع واحد مثل ضروفي . كان قصدي بيج شي بنظرج هههههههه وحده بجمالك  .. صغيرة و تخبل تقبل بواحد مطلق وعنده بنت اكيد اني ساحرج ههههههه

-ها هذا قصدك بس ؟!

-ههههههه اي والله مو قصدي انت مجنونه حتى اتقبلين بيه مو هالدرجه مستنقص نفسي بس احجي واقع حال خطبت الاكبر منج ورفضت بسبب اني مطلق . حتى أيست الكه بت حلال من يدرون جنت اشرب ..

الو وياي

نيوفر .  .

-اها اي وياك  .
براكين الخوف الي بداخلي مطرت عليها غيوم افكار فيصل وطفتها هو وين يفكر واني راح بالي هو الي على راسه بطحة بعد . 
مكالمة عادية صح اتوسطها الخوف بس نهايتها عبالي خير بس  كال جملة طشرت ضميري الى اشلاء
-الحمدللة من قبلتي بيه مثل ما اني . واني هم صريح وياكم من البداية حتى لا يضل شي خايف منه ينكشف واصغر كدامكم !

الصبح . كالمعتاد شغل و اكعد ع المكينة اخيط ملابس الي . اشتريت سيتات حاضر و كم ثوب بيت حاضر واخذت كم قطعة اخيطهم . اجتني سما
-اكلج شو رضوان البارحه ما اجه بالليل
-شنو بات برة؟
- اكيد ؛ ما رجع وبابا كعد الصبح يدردم عليه
- والله مدري بشنو يفكر ساعة يهج لغير دولة ساعة يفض شراكته ويه صديقة 

.
ثاني يوم . رحنا انشوف البدلات واسعار الاجار . حتى نطلع اذا رحنا اهناك ناخذ بدلة منا

من رجعنا هلكانين اني وتمارة . شفنا رضوان كاعد يدخن بالحديقة

اتخوصرت اله تمارة من فوك عباتها

- خير يا طير . صارلك ايام ما انشوفك دومك طالع ويومين مو اهنا اتبات ..

-جنت اطقس

شرت عباتها على الحبل وهي تحجي وياه واني دخلت لجوة . اتخيل نفسي بالبدلة البيضة اشلون راح يطلع شكلي
مرضي لو لا؟ ااه  يا حلمي قرب حباب قبل لا تخلص خل اعيشك بالاول ؛كلت لنفسي ماطول سما مو اهنا .خل اجرب شكلي اشلون يصير بالملابس النسائية؟ 
فتحت كنتوري حاطه الاكياس جوة بسفطتهم . طلعت اي واحد بيهم عبثا .
فتحت الكيس بدقة حتى اكدر ارجعه للثوب كما كان لا تمارة تاكل گلبي اتريد اتحطن بالجنطه كما هنه حتى ما قستهن واخذتلي من الثياب سايد واحد .

طلع لونه وردي و بي فتحه مثلثه يم الفخذ مغطايه بتور اسود و تعلاكاته سود  
لزمته وافتريت بيه .

عيني ع الباب لا سما تچفت
يوه مكدر خل اوكف يمه وانزع احسن مصيبه بابنا قفله عطلان اشوكت انشيل ونرتاح من الاجار ويكما بيتنا

لبسته ورحت للمراية
داريت صدري بأديه
يمه شنو هذا فضيع  .. حسيت بتيار من الخجل  من اتخيلت المراية فيصل

انفتح الباب
نزيت التفتت لنها تمارة
شهگت واني ابسرعه لگفت ثوبي الواكع جواہا لبسته مكلوبي فوق الثوب

سدت الباب وبعصبية
- اشلون اتلبسيه غبيه مو كتلج اريدهن يضلن بجياسهن كدام عيالج هاااا

سكتت وباوعت للارض اعيوني دمعت من الخجل شافتني بيه
-هسة يصير كله ريحه عرك انزعيه . مستعجلة ع شنو يحضي ع طياح الحظ ،
يلا انزعيه واياج ثم اياج اتلعبين بالمكياج وتستخدميه من هسة خلي كلشي بكراتينه كدام عيالج كله جديد . تردين شي اخذي مني خوش

هزيت براسي بمعنا اي واريدها تسكت لا احد يسمع صوتها

-لا وبعد المفعوصة  اول شي اجه بالها ملابس النوم ميته ع

قاطعت وابل الرزايل بصوت مخنوك مجحرش
-كافي عاد ليش اكرهيني هلكد .

نظرتها المتعصبة بدت تتغير وارتبكت جاوبت بتلعثم
- اكرهج؟!!

ظليت امسح بدموعي وكعدت ع السرير
اريدها تطلع احس نفسي حيل انغمتت وفرحتي تلاشت
اجت يمي
- الله يشهد ما اكره احد بيكم  واتمنى الكم كل الخير .
هدأت صوتها اكثر وكملت
- انت لأن اخاف عليج واحاسبج عبالج شاده وياج . بس والله اني سعيت اشكد حتى هاي الزواج اتم .. اكلج شغله وما اضوجين اني كلت الهم عليج

باوعت عليها مستنكرة فعلتها
-اي وقبل فترة اذا اذكرين كتلج ع عريس بس همه اترددوا عبالهم اترفضون  . هسة شجعتهم  مرة لخ واجوي

-يعني شنو انت كلتي الهم

-لا ولج لا اتفهمين غلط ما دللت بيج خليت امي اتلمح الهم .  المهم اخوج رضوان اثاريه هاي الايام كاتل نفسه رايح يسال بوحدة الولد الي يدوام بيها سأل نص جماعته عليه ورايح بالمنطقة مالتهم يطقس ما كفاه كلمه ابويه من كال لبوج واتكفل فيصل لا راح بنفسه الا رتاح كلها حمدت بيه
ضربتني بخفة على متني وكالت
- مو رخيصه وانذبج احنه .بس فكرنا بمصلحتج تزوجين واحد مو من المحافظة اسلم حل .

وصلت يم الباب ..

-انزعي الثوب . باجر من نكمل شراية ملابس الطلعة اشبعي قياس بيهم .
طلعت .
هسة لو مشاعري تنطق كل صوت بيها ينطق شكل لأن صارت متعدده ما مفهومة
اتمنى اوعى اكثر وافهم هاي العائلة اكثر مشاعري اتجاهم اتخربطت

اجاني ايمن
-هاج هذا فيصل
جابلي تليفون امه
فيصل يتصل
رديت واني اباوع لوجهي بالمراية
بعد السلام
-شنو جاي اسوين
بعفوية
-جنت ابدل
سكت اشوية طول بسكته
ممتعوده اني ابدي بفتح اي موضوع او اي سؤال بس حيرتني سكته ذكرتني بمختار و قصة شنو لابسة ويضل يتحسر من اوصف اله اها يعني فيصل مثله بادرت بالكلام
-  الو انت وياي
-ها اي وياج  وياج اي شنو جاي اتقيسين جهازج . اكيد ذوقج حلو

-اكثريته ع ذوق اميرة و تمارة .

- ليش . المفروض هو الج غير اتفرحين نفسج ب الي ترديه .
- ميخالف حلو ذوقهن
-اهم شي كون كفن . ادري بيه مهرج قليل بس انشالله معزتج  تغلى عندي بمرور العشرة وادللج

-انشالله

كلامه اخذ منحدر اخر منحدر مريح للنفس و كلامه و وعوده و تخطيطه ع حفلة العرس اني بس اسمع واكول اي اي
ميخالف اي .
قرر نجي قبل يوم لديالى  . و انزف من بيت خالته لبيته واسوي حفلة بالبيت الوضع مو تمام و يجي ياخذني   .
انتهت المكالمة .
كلمت نفسي
والله يا نيوفر انكتبت الج حياة جديدة و حلوة الحمدللة . تذكرت  مكالماتي ويه مختار والحسرة والندم خلاني اكره ذيج الايام 
بس هسة  صارتلي عبرة ابتعد عن الغلط ومن ازوج لا اناقش ولا اعاند قرارتي كلها غلط ومن اعاند محد يتأذى غيري . شنو حصلت من جنت طفلة وازعل ع الاكل محد يحس بالجوع غيري . شنو حصلت من اتحديت تمارة والضروف وردت اعيش قصة حب قوية غير طخيت راسي بالارض وراس اهلي . راح اريح اهلي بابا رضوان ما اعذبهم وارجعلهم .

؛
رائد
اذا كنت مشغول طول اليوم لدرجة تنسى تذكر الي بداخلك  انت بنعمة كبيرة . بالدوام عندي هذا الانشغال . لكن من اجي مجاز لبيتي يتغير الوضع

رحت جبت مرتي من بيت اهلها
هي طول الطريق اسبح بسبحتها الإلكترونية .
تأفأفت حسيت حياتنا حيل فترت  قبل كان لقائها بيه بعد الفراق بيه لهفة وشوك محبين حتى خواطر بطلت تكتب وترسل الي رغم اني ما بيوم كنت ابادلها بوحده لكنها ما انقطعت عنها طوال السنتين من زواجنا . قربت اوصل يم سيطرة فتحت ضوء السيارة اتعديتها  قطعت الصمت لبنى
- هاي شنو . رائد بزلفك شيبتين ذني ؟

قربت راسها اكثر دشوف شيب لو لمعة شعري عاكسة .
شكهت واتلمستهن واني اباوع للطريق بحذر و حزم  .
سودة عليه حبيبي اكيد انت مهموم

بدت تمسح على صدري
وخرت ايدها بطريقه منزعجه
-احنه بالشارع .. رجائا لا تحاولين اتحسين نفسج السبب الي بيه كافيني ما اريد اشيل ذنبج
- هسة اني شنو كلت . كل ما بالامر خايفه عليك . مناك ذولة يحاربوك بشغلك واني ضاغطه عليك بحزني . بس شسوي ليش اكذب عليك الموضوع صعب عليه بصراحه لهسة عندي امل اصير معجزة واحبل
ضربت الاستيرن بقوة
-سدي السالفه
سكتتها بصوتي خايفه دارت وجهه ع الجامه
-اسف .  اسف حبيبتي
دنيت راسها عليه بسته وعيني ع الطريق

-زين اشرحلي حبيبي شنو اتحس طول الوقت ساكت من تجي مجاز ومن اتروح ع كد السؤال اليومي اتصالك . اني مرتك حبيبي

-احس؟؟
تنهدت
- شوفي يا لبني خليني ساكت افضل  احيانا صعوبة شرح المشاعر كفيلة اتخليك ساكت  طول اليوم . ضغط العمل و ضغط والدي من سمع بالخبر لليوم يريدني اشوف حل اما اسفرج للخارج على امل اكو حل الج او ازوج مخليني  بشتات فكري. صدكي بالدوام امشي واحجي ويه نفسي .

؛

نيوفر
يا دكات گلبي على هونج لاحگہ على الضربات لا تستعجلين خليني اعرف اخذ انفاسي يجي سراج .  فرحتي خلتني بين شتين الاضطراب و السعادة .
كاعده على كرسي مغلف قماش  ابيض
ويمي كرسي ثاني ابيض ونشرة اضوية بيضه على شكل جمبذة ورد خلفي لازمه ماسكتي و قرأني ومراية صغيره . 
كل اشوية اشوف وجهي. احس الحمرة حيل طوخ  ومكياجي ثكيل مكبرني مهلكد عجبني بس سكتت معترضت بس تمارة همين معجبها الا اشوية تتلاغه ويه الصالونه بس ام فيصل لمت الموقف جانت ويانا .

اميرة اصور بيه وحطت ابنها بحضني واخذتله صورة .

بدلتي منفوشة و من الخصر قماش شفاف اجت مودته ب ٢٠٠٩ و ٢٠١٠  يعني يبين منه الخصر . طرحتي قصيره وشعري لامته كله
زواجي  ب ٢٠١٠ شهر  التاسع

الصفكات والهلاهل دخلتني بجو  الاعراس واني ملكة هذا اليوم  بس اجمل الاصوات اصوات الناس الحولك من تضحك بنفس الوقت ابتسامات تتناثر عليه والاطراأت تتغزل بجمال أطلالتي من قبل المدعوات  . كفيلة اتكون سر بهجتي لكن نصف بهجتي انفردت بيه تمارة بموقف سوته قبل كم دقيقة   
طبعا اغلب المعازيم من اقارب تمارة

اجتني وحده سلمت عليه و اجت تمارة وكفت يمي
واتباوست وية المرة
- ما شاء الله عليها بت رجلج اتخبل كمر
- اي هي نيوفر احلى  خواتها 
- الله يسعدها بس صغيره  مو
- اي اصغيره بس اتعجبج ندارة و حبابة خوش ابنية

راحت المرة .. اني اباوع للناس بفكر شارد
اول مرة بحياتي اسمع مديح من قبل تمارة . اذا احد مدحني تكسر بيه !
بيوم الوداع و ترك بيتهم الا سمعته منها واني بثوبي الابيض مكنت متوقعه اسمعه حتى واني بالكفن الابيض اي يعني حتى من اموت عبالي ماعندي محاسن تذكرها تمارة . تضاعف حجم الرضا والحمد للرب احس نفسي  حيل مؤمنه واحب الله .

بعد الزفة

بغرفتي كاعده صافنه عليها ! هاي غرفتي؟
اول مرة جانت اشوف الاثاث التركي حيل حلوة ونازكه دخلت عمتي.

-ها يا عروسه شرأيج .ههه فيصل جهزها كلها على ذوقه اوليدي الحنين

ابتسمت برتباك.ذكرتني بيه وبالليله

اشرت ع الصينية
اكلي ابنيتي ما طول رجلج مشغول اشوية ويه جماعته خاف تستحين كدامه
دخلت بت بتها
عاطت ولج وخري منا .
انعل ابليسجن اشكد وكحات
طلعتها وراحت
كعدت ع طرف السرير.
اسمع صلوات وتصفيك هاي شنو  دايزفوه
شهكت راح يدخل

وكفت
رجعت  كعدت افرك بأديه.
دخل وبسمته مزينه ثغرة لابس قاط حني     . مرتب حيل ..

-تعاي تعاي
-شنو
-تعاي اشبيج
واكف يم الباب
تعالي اشاورج
رحت يمه بالي مشوش
-شنو!
حط ايد  جوة ضهري وحاول يحنيني
بخوف
-شسوي
-شووو
شالني

-ياا نزلني ثكيله

يا ثكيله مثل الريشه شنو اهلج ما يوكلوج . لخليج حبنتيه ببيتي كله بط و دولمة

افتر بيه

مدري رجلية الطايرة عن الارض لو روحي الي صعدت فوك السحاب . بنص فرحتي نغصت عليه ذكرى ماضيي مدري ليش اجتني صورتي واني بالزوية انضرب حاسه الدنيا نهاية العالم .
نيمني على السرير ببطئ وعينه على وجهي  بالاحرى شفتي 

عسل وغمز واشر عليهم . راح خلع الجاكيت وكلي كومي بدلي . 
طلع هو
رجعلي بسيت بيت .

واني بروبي الابيض الستن .
افتح بالترسيحة . اتذكر الليلة الي دخلت بيها غرفة مختار واشلون اتهجم عليه وطلب مني طلب غريب ذاك اليوم بعده برعبة و تفاصيلة ساكن خيالي

-اساعدج
وكف ورايه واني كدام ميز المراية ساعدني بفتح التسريحه

- اريد اكلج شي بس لا اتفهميني غلط .

- شنو ؟

-وجهج يخبل من غير هذا المكياج ما اكومين اسبحين وهم شعرج ينزل

-ها اي
كيفت اصلا بس جنت مستحية .
طلعني للحمام لأن استحي وحدي
اشو اني طلعت ولكفتني امه جانت دتمر للمطبخ وصلختنا بهلووولة اشطولها مفهمت شي وخواتها هم
و فيصل يضحك
سبحت وشعري راحت عنه دسمت الدهون  ووكفه السبريه .
و راح عنه الصبغ . اني مقبلت اميش واميرة طاوعتني وما خلت تارة تفرض رايها واميش حطيت وقتي .

طلعت اتخنس ودخلت للغرفة شفته كاعد كدام الاكل وصافن

-واخيرا تعالي .  اكلي متت جوع

بس شعري
خليه ملفوف وتعاي

؛
٢٠١١ 
اصيح اااااه .  بطني بطني .

وعمتي يمي كاعده وتدعي
شدة وازول يمة شدي حيلج وكولي يا علي

صحت واني صاكه اسناني

-يااااااااا علي
اخذني يارب وريحني

اعض عض بالغطى

وراحت عمتي تتوسل بأحد يجي يشوفني

فيصل بالاستعلامات ما دخلوه بس اني وعمتي وصارت عندي ولاده فجائية اني توني داخله بالتاسع

كمت من ع السدية
-عمه عمه . تعالي الي .   يمة الحكيني اااايييي .

عمتي ما هي اختفت . اباوع بالوجوه وامشي . طبعا عفت عباتي ع السدية .

وامشي وادور   اباوع للحوامل ع السديات . صادفت وحده كاعده اني امشي ع كيف لا الطفل يوكع
-يمه خل نرجع
-يمه شنو هو لعب. يروحي  ظلي هيج كاعده واعصري خل يصير عندج توسع

بتها كاعده بطريقة تسهل الولاده .  وامها اخذت ايدها تفركها الها .
استهضمت حيل وحسيت بغربة ، دمعتي لاحت وجنتي الغربة مو غربة وطن وارض الغربة من ما عندك اهل او حضن ام الي هو يعادل كل الاهل .

-يا شكومج نوفر
عمتي ما ضابطه اسمي
وين عباتج دتعاي و وراها وحده ممرضة اضاهر جايبتها وجاية  . 

فحصتني .
ببرود
-بعدها
دخيلج شنو بعدها من جبناها اثنين ونص كالت الطبيبه هاي ولاده حولتنا عليكم وصارلها اربع ساعات .

مجاوبت ولا كأنه مرة تحجي وياها .
خابرت ابنها . اسمعه يصيح صوته يمي

-يمه جيبيها وتعاي الله يخليج

-وين نوديها . بهاي الليلة

-اطلعي يمه  اخذها ع لحسابي

- يمة امنين الك . انت دصبر .

سدته واني اهنا حسيت آلم اتمكن مني محد يحس بيه يا افلوس يا بعدني احس الطفل يريد يطلع و دا يدجج بيه بالسكاكين

صحت صيحه  .  لدرجه عمتي ما عرفتي . اني جنتها  الهاديةهيج اصيح

كمت اصيح بعلوا صوتي
و اضرب ببطني
اذا ما تجوني اكتل الالم بايدي بلكت اموت واتحسون  . اضرب وعمتي متكدر عليه احس قوتي تضاعفت و شراين راسي اجت اطك وكلشي بيه متقلص خليتهن ركاضهن ماله ولي

التمن عليه وتركت خلفي بركه ماي

اول ما دخلوني ولدت .
اشوف الممرضات يباوعن عليه بعدم رضا و انزعاج . حتى كالن وحده وكحه شسوت بالطوارئ . .ولا اهتميت اباوع للسكف براحه واني اسمع صرخات ابني اضج بالصاله
لبسوني و طلعت ع كرسي و ابني مقمط بحضني

شفت عمتي كاعده ع الدرج وايدها ع خدها تعابير وجهه اتغيرت من شافتنا طلعنا.
ركضت علينا

باستني من راسي
يمة اعذرينا عذبناج بسبب سلفة رجلج  .
اخذت الولد مني ورحنا لصالة الاستراحه .
طلعت صاحت رجلي . مقبلوا يطب يم الباب واكف .
اخذتله الولد وكالت اله يأذن براسه

اخذوني للبيت الصبح وعمتي خابرت اهلي كالت الهم ولدت فجأة

هاشم ابني اسمه هاشم فيصل .. بعد عشرة اشهر زواج شرف للدنيا  .

ما مجهزته كاروك جايبه اله كركوت حبيبي ومجر بسيط بيه قطعتين ملابس تمارة كالت احنه جهزناج على اساس من احس بآلام اروح الهم بس بعد صارت فجئة و جبت ..
زوجي عسكري مسوي سلف حتى يكون نفسه ويسوي بيت النا كاعدين ببيت اجار والحمل ثكيل عليه وعنده اخت ممزوجه طالبه ..
الحمدلله عايشه وياهم ومرتاحه . طبعا ام فيصل توها بدت ترتاح اتكول جبتها اشلاع كلب بشلاع كلب ابو فيصل معذبني واني اشتغل واجيب للبيت وابنه دخلته جيش و زوجته  حتى يصير مسوؤل انوب انحرف من الأشكال  الي هناك  وكام يسكر و اجته ابنيه من مرته الاولى  بزعت وتطلكت ، من ابوه اتوفى وتركلة حمل صحى ع زمانه وبطل اشوية اشوية الشرب ببركة دعاء امة الثكلى  .
والحمدالله زوجته مزوجه من تاب حتى يصير من نصيبي .

.

٢٠١٤

ولك اكعد  هاشم تعال لا املخك والله .

عمتي
عوفيه يلعب للجاهل جا ترديه بس على التلفون

عمه خبلني وكح
هاي الولد كلها هيج  بعدج شنو شايفه هاي عمره تلاث سنوات من يكبر بعد شوفي وشوفي .
لا
لا عمة صيحي بيه كتل اخوه

ولكم كافي .
واخيرا صاحت بهاشم و مصطفى  .

كمت اتقيئ وحامي صعب .. غسلت واني احجي على فيصل جابرني اخلف فوكه فوكه حيلي انهد انوب هذا كلش وكح .

صحت بيه ولك عوووف النقطه
جانت عدنا نقطة طالعه وايراتها

-عمه هاي النقطه اشوكت يصلحها فيصل مو متت واني اراقب قرودتي صارت سولتهم بيها
يباوع الي و يركض للنقطة  عود شوفي ماما رحت يلا صيحي وسواها لعبة
عمتي طلعت برة بالحديقة ماخذه وياها شبزي

وصلتني رسالة من اميرة
- نفنف ما تجين بالعيد حبابه . 
- ميخالف بس ترة قرودتي ويه قرودتج يهججون تمارة و احلام ههههههه

ضحكت يلا خل يتحملونا

احلام زوجه رضوان وحامل .
تزوج رضوان بت عمي احليوة وصغيره عمرها ١٥ سنة من شالوا من الاجار لبيتهم الجديد .

اتصل بيه فيصل وصوته ما يتفسر
-اشبيك حبيبي . ضايج لا يكون انذار وما تنزل

- ياريت ع النزلة حبيبتي . نقلوا سريتنا  كاملة للموصل

شهكت
اكلك مو هي هاي الي بيها ارهاب هليام

اييه ايه
جاوب بجزع واضح واجه واحد يحجي وياه نهى المكالمه وشعوط كلبي وياه .

رحت اشكي همي لعمتي الي كاعده تثرم

عمه فيصل مراح يجي باجر

-خير

نقلوهم للموصل

يا يمة .ليش
ذبت السجينه وسمعنا اصياح هاشم
.

يتبع ..

التصووويت حبايب نفسكم دصوتون لغيري وانتم نفس العدد . ليش مدا يوصل للألف القصة تستاهل ترة مو قصيرة وحلوة امتعتني من قريت احداثها.

الرجاء ارفعوا القصة بالتصويت🌷🌷🌷🌷🌷

ماعندي وقت للنشر . معرف اشوكت انهي دروس بنتي ولا اعرف اشوكت يبدي وقت الفراغ 🌑 وتحية لكل ام تعاني مع أولادها بالفعل تستحقون درع تقدير