رواية الرعناء والأشيب الفصل الخامس والعشرون 25 - بقلم زهراء العراقيه

الكسرةُ في اللغةِ العربية أقوى من الضَمة
ولكِن : إذا أتيتني مكسوراً , ضَممتُكَ!

ما اعرف اعجاب ام حب من اول نظرة او حب واهم ، لشاب اعجبني شكله
ساعة واكفة كدام المراية المدورة الي هي بالاصل ما نيوفر جابتها مع ميز تواليت بسيط ، اشوف التغيرات الي طرت عليه ملامحي احسها هالسنة حاطتها هالة نضوج بسيطة مع تعبيراته   ، كبرت على مشاعر مراهقة اكيد الي ديصير وياي سببه اكثر من مشاعر واهمة ،
حضرت نفسي على اتم وجه وحطيت مكياج مبطن لعيني الوسيعة و ملامحي الشرقية  طلعت ويه علي ،
لكيناه مشغل السيارة وينتظر ، اخذني بيها
و علي راح للشارع واني كعدت بالخلف ،  لحد ما وصلنا للهفة ما نطقنا حرف ، اني الساني على باب شفتي واكف يريد يطلع الحروف وأساله شمخلص و مترددة
دخلت لهفة سلمت وكعدت يمي ،
-اشلونج  سوسو
ندستها وابتسمت لا يسمعها الولد
متعمده كالت
-ها سوسو اليوم عندج اختبار
دست ع رجلها الا سكتت هم ناقص تفضحني كدامه ، وجه غير منفرج ،
همست الي لهفة
-ترة كلش غثيث
مقبلت عليه و ندستها تسكت
-اكول اخي انت ما اداوم ،؟
ياربي سبقتني لهفة بسؤاله ،
جاوبها
- خريج فنون تشكيلية
-اها واو يعني انت فنان مرهف
-  اي وتخرجت عاطل مرهف
- عادي المهم مرهف
ابتسم الي شفتها بالمراية اني كل جوارحي وياه من يرد عليها ، نزلنا من عده احنه النقيض بلبسنا لكن ارواحنا حيل قريبة
جانت حالة شعرها المدرجته ، لونه بيه شقار خفيف كانها صبغه قديم بس حيل حلوة عليها، و وجهه ابيض صغير ، و بعيون صغيره تكبرها بوضع الكحل بنهايتها خشومها صغير مدبب مو طويل حاد مثلي ، دومها حاسدتني عليه ، واني اكول الها شفايدته و ابو دمعه ما يباوع لوجهي وتضحك عليه  واتكول غثيث ما هضمته
وخلصت السنة واني لا حاجيه وياه ولا منسقة اموري امل ان يجي بيوم ويدك بابي  ، اما لهفة مره اجتنا لبيتنا وبعدين عرفت سبب الزيارة اشوف رضوان هي بطلت تمدح او تطري بيه بالمزح كدامي ،
لكن من اجت بس تسال  هو اهنا لو طالع ، 

***
نيوفر

هاشم
يصيح ماما اريد لفة جوعان
توتو يبجي  جوعان
واني اگلي بايد وايد تثرم زلاطه و ايد تغسل مواعين للعشا المتأخر بسبب تأخير رائد بالسوك ،
انوب صاحلي

- نوفة تعالي امسحي هذي الشاشة ليش متربة

صحت بعدين
-تعالي هسة ما اكدر اشوف
طفيت عن الاكل ورحت اله

-الصبح مسحتها شصير اني للعشه ؟لهذا اليعوي ؟ الك ؟
باوعت اله بغل وقهر
-شوف شوف اشلون كاعد يقهر

ضحك
جان مدد رجل ع رجل و مطروح ع الاريكه بالصالة 
- مضوجتج كعدتي كمت اسبح
- يبوو يعني بس جابني امسح وكام
رحت للمطبخ ادردم عليهم ، اجاني
- اساعدج
-اي والله ياريت ،  تاخذ مني توتو موتني يلج ،وما تقبل انطيهم تصبيره
-التصبيرة تغنيهم عن العشة كم مرة عدتها الج
اخذ وكال
-راح اسبحه وياي
اتعجبت ومن اندهاشي الخاشوكه وكعت بالطاوة
-دربالج
وراح للحمام شايل توتو، هذا سوه الهواين  توتو محبته احسها سيطرت على رائد حيل وين جانو قبل اول زواجي واحد مماخذ ع الثاني سبحان مغير الاحوال ،
كملت عشا وانتظرتهم يطلعون ، طلع توتو ،
-هاي شنو توتو يلمع
- شعبالج لعد طلعت اله وجه
اثنينهن على روسهم خاوليات كعده ع الميز ومشط اله شعراتها الي بدن ينزلن على رقبته ومشط هو وطلع وطلعت وراه جنت محضرة الميز وهاشم و صوفي كاعدين يمطكون اجه رائد وسمى الا بلشوا همه !
-اكلج ليش  رائد لهسة ممطهر لازم نطهرة
واني اسوة لفة لتوتو
-  مو بس هو حتى اخوته
ابتسمت من تذكرت رائد الحقنه نزعه حفوظته
-ليش هيج همه كبار
- والله ابوهم المرحوم جنت الج عليه ، يكول من يجي الثالث نطهرهم سوة، وبعد التهيت ونسيت هاي السالفة

جان ياكل زبادي خالي من الدسم
جاوبني بعد ما بلعها ،
- عكب باجر ما دامني مجاز ، نطهرهم كلهم  ، وهم مدام عطله عند هاشم ،
-اوك

،،
ورة العشا
كال الي لازم  نذبح الهم تجرات دم   واصريت من افلوس ابوهم
- ليش ؟
- مو لأن اكو شي بس والله هو جان ناوي
يذبح الهم عجل ،  من اولد سواء جبت بنت او ولد جان ناوي يذبح ويطهر صوفي و هشومي
-ها هي مثل  ما تردين

وكف وكال اااخ ضهري
جنت كاعده ع السرير يمه ، رحت اله
-اشبيه ضهرك
التفت عليه و شالني
-حديد
-هههههه ، كايلة الك اني احبك ؟
-لا ما كايلة
ضربته على الصدرة
- مو الصبح كلتها الك ؟
جملت اعيونه التجاعيد الثلاثية الي ضهرت من ضحك بسته من خده و كعد وحطني بحضنه ، باسني من رقبتي وكال
-ريحتج عافيتي
-  هههه والله احبك ، و ختمت كلامي بقبلة 

،
انخبصت اعزم على الغده اهلي واهله هو عزمهم و كال راح يجيب الي بنت ام مسعد تساعدني
-هااا عدها بنية ، زين ليش مو هي ؟
- تعبانه من اعيونها ، وبتها محتاجه العمل  لزمت شغل امها
-لا ما اريدها
- ليش
- اتروح تطلع ركبتها طويله واتحط عينها عليك مناقصه اني
جان يريد يطلع للسوك ، اخذ مفاتيحه وباوع للمراية للمرة المية
- لا المرة متزوجه وعدها خمس اولاد ،
-ها هيج لعد ميخالف ، بس والله ثولة اني عبالي ام مسعد اربعينية ههههه
-لا من عمر والدتي ،
طلع اووف شدعوة عليه هيج يلمع لمع من يطلع ، يستنقي مسواك لو نسوان !؟
*

سما
رجعت من الدوام ،
امي كالت الي يوسف ليش ما يرد ع اخته
- اشمدريني
- اجتنه خطية مخروعه ع امها مغافلتهم وطالعه ، اجت تسألنا عليها بلكت جايه علينا

-يا خطية
- خطية رضوان تعبان اخذ وياه رجلها يوصلة  للكراج يشوفوها ،
-لا حول ولا قوة الا بالله
،
رجع النا رضوان وكال لكيناها متيها بالاسواق ،
،
عزمونا نيوفر  ورائد على طهور الاولاد ،

رحنا واو البيت مزين بورد الياسمين ، و البخور معطر البيت كله ،
و طباخ يجهز الغده و يرسله ،ونيوفر و وياها مرة فوق الثلاثين اساعدها
واجتي كريمه و رهف اويلي امنين اجيب ملابسها يخبلن ، اوفر اسود و فوكه يلك مخطط بزيوتني واسود و ذهبي ، و بالوسط بيه حزام ذهبي ، والشادو زيتوني خفيف ،
المصيبة رائد ما عازل النساء عن الرجال كلها خبط ، اني شردت بغرفة نيوفر استحي ، حتى حاتم واميرة و اهلة رائد بس ابوه  واخوه ما اجو بس نسوانهم ،
واحنه بيتنا كله اجه عدا ايمن وعلي

،
اجتني  اميرةو قفصت عليه وسألتني
لهفة شعدها ويه رضوان معجبة
-عااا ، ما عدها شي
- ولج منتبه عليها اكلته اكل بنظرها ، و شفته راح يخابر برة راحت وراه
رحت وراهم وشفتها ورجعت ما راويتهم وجهي

-يمكن معجبة شعلينا
- ما ادري بس هي وين واحنه وين
-ليش اشبينا
- اشبينا ناس ع كدنا
دخلت نيوفر
-شسون هااا تعالن ساعدني
اميرة
-اشعدج هو طبخ وعند الطباخ
-دتعاي تعاي ، رائد ورطني باكثر من صنف
،
وانتهت العزومة ، و بالليل سألني رضوان عن اوضاع لهفة !؟
و شنو تدرس
جاوبته وكال
الله يستر عليها خوش ابنية ، صدك لا كالوا لا تاخذ بالمضاهر
،
طلعت لهفة مو سهلة و كدرت تلين الحديد مو حظي معرف الين الحجارة يوسف الثكيل ، بودي اروح أسالها شسوت واتعلم منها !

***
نيوفر
دموع خوش ابنية بنت ام مسعد متزوجه من عاطل عايش على قفاها لا شغله ولا عمله ومشوفها المر ، اصغر ولد عدها بالاول متوسط، خريجة معهد التقني /الزراعي ،
تشتغل سكرتيرة  بمعهد  دروس تقوية الصبح والعصر كامت تطلع تشتغل بدل امها بس باللبيوت الي تعرفها بالعالي وسخية العطاء ، لأجل اولادها وبناتها ، دومها تشكي قلة الحال خطية من ضيمها تجيني كل يوم احد من الصبح واتروح الضحى لأن الحد عطلتها ، انعم عليه بيها رائد من  كثر ما اشكي تعبي من البيت وتنظيفة وهم اسليني ، واقترحت  علية اطلع واتعرف على جاراتي ، شجعتني حيل اطلع للبيت الي ابصفي و بالفعل من رحت المرة رحبت بيه تطلع من عمر اميرة نازكه وحبابة وعدها اطفال من عمر اطفالي ،
وطلعت من قيدي لكن من شفتها اشلون تلبس ببيتها غرت وحاولت اقلدها  باللبس دحجي الكم مختصرات مرت عليه خلال سنة ٢٠١٦ لأن المضمون بسيط وما يحتاج  تطويل بيه   ، مشاكل مبسطة بيني وبين رائد وهاي طبيعية لأي زوجين مرات يطول بالزعل يومين واراضيه ، اتعلقت بيه و تركت سالفه مراسلة رقم فيصل القديم الي اخر مرة شكيت اله وفاة بيبي ، من نهدها تركته والتهيت برائد وتغيره عليه و بعدين مرضة وحسيت نفسي تعايشت مع حياتي مع كل ذكرياتي والي صار من كسر جبر ظلم تمرد مني فقد احباء ، عادي كل البشر تمر بدوامة تغيير حياتية ،
جارتي ردت الزيارة الي واتعرفت عليها اكثر ، هي اسمها نيزك ، رائد رحب بالفكرة وما عارض اختلاطي بيها ، دموع دوم اتحذرني من ريما واني ما بيدي شي اذا راح لهلة وحده او اتصلت بيه هي شريد اسوي اخليه ع الثقة واريح بالي ،
سنة ٢٠١٧ ، شهر الواحد ، جان الجو مو حيل بارد دافي و اني البس بهاري بيه ، اجتني دموع يوم الاحد دتنظف هي اتسولف واني القط خضروات ، جانت تجلف بالطباخ ، قاطتعها بسؤال
- اكلج حلوة جبتج امنين جبتيها عجبتني
-جبة! ، قصدج صاية ، هاي لينا انتطنياها
- هاا والله حلوة بعدها جديده
كعدت كدامي كدام الميز الدائري
- عيني يحصرة عليه ، اخذ منها ملابس صح جديده تخبل تلبسها قليل لكن تعز علية نفسي  ، تدرين ما اشتري اني يا دوب الحك على جهالي
-الله يساعدج
-اي والله تعبانه حيل ، بس يلا يجي يوم وتفرج و احصل تعيين حكومي لأن والله ٢٧٥  بالشهر   ماتسد شي

رديت عليها بعفوية
-ليش تشتغلين بالبيوت ليش ما اسوين مشروع صغير خاص بيج بالبيت مثلا لف كبب وبيع ع المحلات ، خياطة ، اي شي
ابتسمت وكالت بروح تعبانة من تلطيش الحياة
- مابيها نفع جنت اشتغل بالكيك الله وكيلج تعبه اكثر من ربحه و مرات يطلع عليه بخسارة ، واني ما ادخل لبيت ياهو الجان ، البيوت الي جانت تدخلها امي ، يعني الواصلة و الي ايدهم سخية ،
- احجي الج وية رائد بلكت يحصل الج تعين
همست وكأنها ادندن ويه نفسها
- لا تحجين طلبنا منهم من قبل وشافولي وظيفتي بالمعهد ، الحكومي بس للحبايب مو النا !
- الله يرزقج يارب ، يلا كملي المطبخ و روحي للطابق الثاني، وها عفية بعد ما اتخلصين اكون اني خلصت تحضير غده ونعزل سوة المخزن ،
- خوش ، يداده
نكعت الخضرة وردت اطلع
-ام هاشم
درت وجهي عليها ، وهزيت راسي بمعنى نعم
- اي او اكلج هيج هيج انسي
- شكو ام احمد محتاجه شي ،
-لا بس
شفتها مترددة و محتارة عبالي محتاجه ومستحية ، رحت لغرفتي طلعت خمسين و رجعت الها حطيتها بأيدها
-لا هاي شنو سيد رائد ما مخليني محتاجه
حطتهم على الميز وكالت
- بس اني حيل حبيتج والله جنج مثلنا بت ناس طيبة و على كد حالهم و من اهل الله ما عندج مكر نسوانهم 
- شنو حبي نسوان منو
- هاي كرايب سيد رائد ترة عينها منه والجمعه الفاتت اجتهم هي وامها و هو جان اهناك ، ترة حركاتها واضحه وسمعت امه اتكول شكو بيها اذا رائد
اترددت اتكمل بس اني حوصلتي صارت نار وتسعر حتى زمخت بيها اتكمل
-كملي رحمة لهلج شكالت عمتي
-اووف كالت اخذها لريما اله بس كون هو يقنع ، ما مقتنعه بيج اتكول ما تعرف تجامل و تختلط بأقربنا
-اها ست ريما همين
حطيت كفي على الميز و ادك الارض برجلي و صاكه أسناني وردد هم ريما رجعت  ريما ريما

المرة رجعت تنظف وتمسح بجام الطباخ ،
رحت لغرفتي وافكر بكلامها ، عمتي اتكول ما اختلط وما تعرف اجامل ، اووف كله من ورة ذيج الحفلة الي صارت
عرس بت خالتهم و اصرت عمتي اروح ، ورحنا اني ولينا اشترينا فساتين و تقريبا لينا فرضت ذوقها عليه من ردت اشتري واحد طويل ولونه وردي و كله كرستال لامع حبيته
لكنها  كالت هذا يبين ضعفك و يطغي على لون بشرتج قنعتني اشتري غيره هي حيل عجبها لونه اسود و بيه خط شفاف يبرز الخصر و منفوش من جوة ، رائد طار عقله من لبسته وبالكوة خلاني اروح للحفلة ، واهناك اتورطت ظليت بس كاعده لأن لاحظته من اكوم تطلع ركبي السمر يختلف عن لون باقي ساقي ، الجواريب الشفافه ما ضامه لونهم
خاصه من لبست كعب ، اني عرفته هيج وما ردته لو لا الحاح لينا واحراجي منها
ما كلت الها السبب
البنات تركص و تفتر واني لازكه بمكاني عبالهم غير اجتماعية ، 
،
ثاني يوم رائد التحق ووداني لهلي لأن يتأخر ١٤ يوم ، واتأخر بسبب انذار ١٦ يوم  ،الا اجه شو سلامه ثكيل و ابسرعه اخذني للبيت ما ظل يم اهلي كالمعتاد ،
بس وصلنا عافني وراح سبح ونام !
ابد ما صدكت هذا رائد !

***
رائد
اجيت تعبان من الدوام صارلي ثلاث ايام مو على بعضي و دوم دايخ من ورة الامر ومشاكله وياي ، يمكن سكري مرتفع ، بس رجعت لفيت راسي ونمت ،
بالليل حسيت بحركة نوفة ، صحيت وطلبت منها عشا، تعشيت واخذت علاج و رجعت للنوم صارلي يومين ما نايم عدل من ضغط الواجبات ، شفتها كعدت فوك راسي ،
- اشوكت اتنامين
-يا نوم هذا بعد وكت الجهال كاعدين بالصاله ،
- هاا عود كعديني للصلاة

***
نيوفر
اكو واحد عسكري يجي لمرته بس نايم و ما مهتم الها هاي جديده عليه لا اضاهر امه وخالته لاعبت بيه لعب ، جايني مكتفي  ، !

ثاني يوم الا انتبه الي واشوية اهتم ، بس احسة تعبان سألته كال من السكر !، والسكر شعليه لا هو عنده سالفه اني گلبي حاسني بس الاحسن ما اسرع واخسر

***
سما
التقيت بلهفة
و من بين المواضيع كالت
- صدوك البارحه تعالي اشبعي ضحك من لعبنا اني و رضوان كلاش هههههه

ياربي اشلون تحجي عنه كأنه طيف عيد مر عليها اعيونها تلمع شوگ و عشك واعجاب
- لهفة ، انت ليش معجبة بيه ؟
اشمعنا ، اشو اشوفج اتخبلين والف واحد يتمناج منا ، وخاصه منذر خطبج وكلها تدري (منذر طالب وياها )

-ما اعرف احسه مميز ، وهو شعور مو بيدي ، من ادخل لصفحته احس بخافقي ينبض محبة ، من العب وياه والزك اله اريد اخذ اكثر وقت ممكن بالحديث وياه
احسه ما ينظرلي ابد نظرة دونية ، اتمنى حرصة عليج يفيض عليه بيه

-هذا يمكن شعور بالنقص لأن يذكرج بأخوج لا اكثر

- لا لا ابد ،

ما كدرت ولا أجرأت و اكلت الها البارحه رضوان راح ويانه لبيت جيرانه مقابلة لخطبة بتهم نرجس اخت  معجب بيها حيل ، و البنية ما تنجب وهذا الشي الي خلانا نتردد لكن رضوان فاجئنا بصرارة ومن رحنا قابلانهم ادهشنا شرطة !

جانت خالة البنية كاعده والام بس متدري الدنيا وين صفت والبنية كاعدة يمهن كدام رضوان واني وماما
بعد احاديثهم الجانبية
امي كالت
- رضوان يمة احجي ويه البنية لعد احنا المن جايين
واخيرا نطق وباوع الها
كانت نرجس . صاحبة عيون نرجسية اسم على مسمى ، طويلة يمكن بطول رضوان وهذا شي معجبني ، جسمها بيه ترسة وبطن خفيفه بارزة و صاحبة ملامح  حاده ، عيون بيضوية و خشم صح مو مدبب لكن بيه طول و شفايف صغيرة بيضة  شي ع شي حلوة البنية بس امها احلى منها ، امها من اصول تركمانية يوسف ماخذ جمالها ،
رضوان و هو يلعب بسبحته الصغيره الصفرة مبين متوتر
- احنه بعد عرفناكم وعرفنا اصلكم  الطيب  انشالله اذا صار نصيب مراح اقصر وياج اخليج قريبه على امج  ببيتنا ، ويمها تداريها اشوكت ما ردتي ،
واعاملج بما يرضي الله بس بخصوص الاطفال، اني اريد اكيد اصير اب ، لكن مو هسة عندي قطعة ارض و جاي اسعى لبنائها من اسوي بيت ، اتزوج !
اهنا كلها صفنت بوجهه حتى امي ما متفق وياها هيج ،
خالة نرجس
-قصدك تتزوج على نرجس اذا صارت قسمة
- اي خالة من هسة اكول الكم ، اخاف اتكولن انت وافقت وليش قبلت من البداية ، اني مشتريها للمستورة و مراح اخلي عليها قصور ابد واي ضمان اني جاهز ،

-ما اعرف والله يا ابني فاجئتنا نشوف اخوها وابوها وهي هم شنو رأيها

البنية مدنكه ومستحية كأنها اول زواج الها ،
واني بس اقارنها بلهفة الي لمحت اله قبل نجي وما فاد التلميح وياه شو مو بباله
اصلا كال لهفة لو ما فوارقنا جان خليت علي ياخذها خوش ابنية ! بس هي مبينه مدللة و بت خير مو مال علي ومزاجايته

؛ اصلا علي ادري بيه  على علاقة بوحده من الكلية ومتفق زواج هاي قبل اشهر من بطل يوصلنا وبطل اهتمامه بلهفة يمكن لاحظ صدها وتركها ،
المهم رجعنامنهم  و امي بدت تعاتبه و اتكول اله فشلتني شنو جاي تخطب منهم اليوم واتكول ازوج عليها من هسة ،
كلت الك من البداية البنية عدها مشاكل بالرحم و بصعوبة اجيب اولاد رحمها حار يطرح ، انت اصريت شنو موعودين بالعقم والعواقر انت واختك
رد عليها بهدوء مستفز
- العقيم انت اتوسلتي الها تاخذه ، لو نرجس عدها ورث جان هم قنعتني ههههه
عصبت وهو ولا اهتم صعد لغرفته ،واني شردت عن وجهه معصبة ، ولهاي اللحظه اخاف على مشاعر لهفة وما كلت الها عن الخطبة ، ورة يومين ردوا خبر موافقين !
ورضوان طاير طيور مستعجل بالزواجه هاي ،

***
نيوفر

خابرتني دموع
-هلا حبي
-اشلونج ، عيني اشلونهم اطفالج
-زينين
-رجلج مو يم مو
-هااا
لا رائد بالدوام بالليل يجي !
- اي بالدوام اي ، اكلج احلفي بكتاب الله الكلام الي راح اكولة مراح اتضريني بيه واتكولين اني كلت
عرفت راح تكولي شي بخصوص ريما حلفت
-شنو عفيه يلا كولي
- جنت بشقة ريما انظفها ، و سمعتها اتخابر رجلج ،القادرة راح يجيها اليوم يمكن هسة هو يمها ، مو يمكن اكيد هسة وصل

سديت الخط منها ، مستهجنة ، يمها! هو خابروه فجئا قطع اجازته كال جاي تفتيش ساعتين زمن وارجع ، راح مستعجل ، اتصلت بيه رد عليه
و كال اجي بالليل واختصر الحديث وراح
اكو انقباضة بصدري خلتني احس معدتي راح توكع من مكانها ومن كثر انشداد  اعصابي وحيرتي عضيت اصبعي من غير ما احس خليت بيه طبع يسعر ،
يعني يمها و دموع لاكفتهم ويحجي ع الاخلاق ، كلكم نفس الشي بس وحده اتنطيهم مجال لاعبهم يسيل ، لبست عباتي ودكيت الباب ع نيزك طلبت منها بترجي اتخلي اولادي يمها وافقت بترحيب خليتهم ورحت ، العنوان مال ريما بيدي ، احتاريت بأي بناية هي كاعده ، لازم أسال عنها سالت الامن  مبينه بنية مرتبة و مثل ما داعيت اني صديقتها دلوني ، طلعت شقتها بالطابق الثاني ،  عفتهم ورحت الها ، صرت كدام باب شقتها ، العرگ يضخ من كصتي والتوتر خله ايدي ترجف رجف ، دكيته الجرس وحاطه ايدي على گلبي  طالبة منه يهدأ هذا غير معدتي التلعي ،
كل ردة فعل محضرتها طارت من عقلي وكأني امي البارحه ولادتني ما اعرف الكلام ،
انفتح الباب و هي متعجبة
- نيوفر ؟ عبالي مشتبه من شفتج بالعين ؟
-اي نوفة ،
سمعت صوت رجولي بالداخل عوجت راسي دشوف هي صايره كدامي دفعتها ودخلت
- اشبيع عزيزتي ليش هيج
انتظري
صرت بوسط الصالة ،وصحت من غير ادراك
-وينه وينه سمعت حسة وين ختل

سدت الباب هي وكانت حيل خايفه
-نصي صوطج منا جيران
- ما انصي واليوم فضيحتج على ايدي
- لو سمحتي نصي صوطج و فهميني شكو

- وين رائد وينه؟!

- معن معن

صاحت  على اسم معن طلع من الممر وكال شكو ؟

- معن اخوية ، اليوم اجه من السفر اعتقد  هسة عرفتي نفسج اسرعتي و تصرفتي بغلاظه لو بعده مخج السميك ما فهم
انوب طلعت الام خالة رائد بجادر الصلاة
-كطعت صلاتي واجيت شكو يمه ،؟
سألت بتها وكلهم يباوعن الي بتمعن و استفسار بينما اني  اشنج لساني وصعب عليه النطق وگلبي تضامن وياه واحسه هو الثاني راح يشنل من شده الاحراج ، عيوني دمعن و انفاسي رافضة الهدوء
سألتني الخالة
-انت مو مرت رائد خير بنتي ليش جاية ؟
اقصد هلابيج باي وقت بس ليش جنت اتصيحين على بنيتي ؟

امنية مستحيلة راودتني بهاي اللحظة وهي الاختفاء او الصعود للسما بلمح البصر ،
تزايدت مشاعر الاحراج لدرجة الاختناق
وكفت كدامي ريما بكامل حليتها واناقتها
وحدة اعيونها  الزمردية اللون بسبب العدسات الي لابستهم
- اي وشنو بعد.!؟

سؤالها خله خطواتي ترجع للخلف وامشي  لبرة ببطئ كرهت اقدامي  ، وصلت لراس الشارع اخذت تكسي وليل بدة يخيم منا من صار مظلم بلون گلبي ، شقتها بعيدة عن منطقتنا ،

**
رائد
طلعت من المعسكر ، اذكرت وعدي لهاشم انحرفت عن طريق العوده للبيت ورحت متجه لغير واجهه وصلت لمحل الاجهزة جاي اعامل على ايباد للولد ، رن تليفوني، كانت امي
طلعت من المحل
-ها يوم اشلونج
- يمة  انت وين
-شنو  يمه ؟
خفت من عدم سلامها لا صاير شي
- مرتك ليش رايحه متهجمة على شقة ريما و ادورك بيها مفشلة البنية كدام امها واخوها !؟؟
-شنو
-عوزها بس تضربها ريما منهارة من سوايتها ، شنو هالتصرفات الهمجية،  تتهم المرة بشرفها و داخله اصيح وين رائد !
-يوم وحده وحده عليه ، مرتي شدلاها ببيت ريما انت متوهمة نوفه ما تعرف تطلع وحدها !
اكدت الي وكانت معصبة ، خابرت  نوفة خطها مشغول ، أستأذنت من ابو المحل من غير ما اشتري وسرعت للبيت ، جنت قريب عليه بنفس المنطقة بس من ردت اشتري انحرفت لغير شارع ،
دخلت ومحد بالبيت !!!

يتبع ..

البارحة تأخرت في كتابته لأنه طويل ليرضي من يقول بارتي قصير والنتيجة غفيت وتركته من غير تصحيح ،
محبتي لكم ❤🌹