رواية الرعناء والأشيب الفصل الرابع عشر 14 - بقلم زهراء العراقيه

سديت الخط وطلعت
-خالة
خالة
دورتها . لكيتها بالحديقة
- منو كال اني وافقت ؟
ما جاوبت واتبعت اسلوبها تغلس عني ولا كأني موجودة  يمها
-احجي وياج  خالة اني يمتى  كلت موافقه هاا اشلون تنطون كلمة للناس
- شوفي هاشم وينه تلكاه خانس على شغلة
تركتني وراحت للمطبخ واني وراها فايرة
- خالة اني موافقت  . ومدامج هيج بس اتريدين اتخلصين مني وضحكتي عليه والله لخابر لينا بنفسي واكول الها .
تليفوني بأيدي
جرته مني
- غبية والله ، انطيناهم كلمة وهاي هي  
نلعب عليهم قابل

تليفوني ما رجعته وخلتني الوب ودمي غليان

بالليل كالت للزلم دزينا موافقه

اعترضت واعترفت الهم من وحدها هيج سوت
جان علي يحف لرضوان بالهول و بابا بصلح برموت عطلان

والدي
- ما يصير لازم موافقتها  اشلون هيج تتصرفين عيب من الناس
تمارة بثقة مكروهه
-معليك توافق !

علي جان مسوي الخيط  بأيده على شكل مقص ويحف توقف
- غير توافق الا اكولين الهم ؛وانت يحظي اميرة اتكول  ابوه صاحب املاك واخوه يشتغل بالوزارة خماط شنو متانية الركضة ،دزوجيه و افتكي مني لو عاجبتج خلقتي
ايدي على خدي وكاعده جنت يم بابا اريده يوخر عني مرته
ضحكت بداخلي على كلمات علي لا ويعترف هو مطين عيشتي بعكاريته
بتوسل
- بابا  خليها اترجع الي تليفوني حباب لا تضغط عليه بالهشكل
انطلقت تمارة بالكلام المعاد وبابا قاطعها بكوله
- بوية تعالي وياي

رحت وراه وسط انظار تمارة الي ودها تجي ورانا مبينه، دخل لغرفته بس دخلت طلب مني اسد الباب .

- بوية خليت اخوج علي بس يسأل بشكل سطحي وكلها مدحت بيهم .
لو الرفض على شخصة جان بيها باب وجواب  بس هاي مال ما ازوج واظل على ذكراه عوفيها انت كبرتي . خل عندج خبرة بالحياة  كل انسان لازم يكون عنده حياة اذا مارادها الله تكمل وعوض بغيرها
نتقبل الامر
بجيت محد فاهمني محد حاس بيه اني براكيني ما نخمدت وهمه حايرين يخلصون نفسهم من حملي
هو رجل عنده عادي مو هاي امي ورة شهرين اتزوج وحده ثانية وعاشرها ولا كأنو متأثر حتى من ما كدرت اتراعيني اعطاني لبيبتي في سبيل راحتها  .

ما قتنعت ابد بكلامه بس حسيته قوي واني بورطه بابا موافق و بس يريد اقناعي
لدرجة اجتنا بيبي المريضة . وهمين ضغطت عليه اوافق لا اظل طول العمر ارملة و وصفتلي حالتها مع الترمل. خالتي الي بعيده عني اجتني ورة ثلاث ايام وهم كعدت اتحاول وياي .. لمياء دزتها اميرة وهم قرت مأساتها عليه يم الاهل ، حتى من عمتي ام فيصل خابرت خفت واتخيل الي راح اتكول وافقي على العريس بس الحمدلله ماتدري سألت على اولاد ابنها وسمعت  صوت هاشم . .
.

صاح الي  رضوان صعدت لغرفته .
لكيته مدد والتلفزيون على مباراة
يباوع ابسرعه طفاه من الريمونت
- ها نوفة  تعبتي من حرب الاقناع الي شنوها ابوية وتمارة
يضحك يربي يضحك واني حال الضيم حالي
-خرب مصلمج اشكد حقنة ، ادري لو مزوجه عن حب جان اسويتي

اتعجبت حديثه عن الحب  واستنكرته
- فيصل هم بالاقناع والخوف اخذتيه لا تنسين ، هذا حتى ميحتاج اي سؤال عنه شي زايد من بابا  سأل عنه بشكل سطحي اني عندي معرفة بالناس
صفن عليه
اكعدي ليش واكفة

-رضوان  كافي غسل مخ انت الثاني مليت من هاي السيرة

-الناس يردون موعد للكعده ماكو مجال اليوم نحدد شنكول الهم  اشوكت يجون لو الله وياكم ،اكعدي لا تتغابين

نفخت بحكلي هوى وطلعته وتأفأفت
- هذا نقيب هو اني موعوده بالعسكرين

ضحك

- نصيبج . نيوفر اكلج شغلة .

- كول

- اخذيه يا نيوفر واخلصي من الوحده ترة تكتل ، لا اتحسبين احد اهنا دايم الج ، اني غركان بمشاكلي وبيت عمج الي نكثوا الوعد وعصوا على التنازل و علي من هسة ما يفكر غير بروحه . بيت وحدج الج ولجهالج وحياة ثانيه عبارة عن رفاهية الج ولاطفالج
- من يكول يكدر يتحملنا
- هسة وافقي موافقه  مبدائيه وتصفى على خطبة الج مني كلمة تطول اشكد ما تردين وبس ما ارتاحيتي وردتي تنسحبين اني اول الناس وياج
دورت بعيونه عن الامان والصدق ولكيت ظالتي
هز راسه
-  نيوفر كلمة واخذيها مني سالفه جبروني طلعيها من بالج لا ابوج يسويها ولا اخلي تمارة تفرضه عليج . بس انت وافقي على خطوبة ما يصير نساعدج بضياعج بعدج طفلة كلج ٢٢ سنة والحياة طويلة .
-ترة حصير ٢٣
-ما تفرق ترة
اكثر شخص تأثرت بكلامه من كل الي رسلوهم الي هو بس كان تاركني يمكن استوي على نار هادية حتى من يحجي وياي هو ويعرض عليه فكرة بس خطوبة اكون اكثر ليونه من الزن . وبالفعل كلت يا نيوفر ليش العناد اشو محد حاس بنارج وكلها اتكول عليج عنيده وتتندمين  ترة خل احاول عاد واخلص من الملامة . بس ما ارتاح افض السالفة   . منو يدري يجوز يطلعني من عذابي ويريح بالي والكه عنده استقرار ولو الفكرة صعبة صعبة حيل . من حددنا موعد الكعده ظليت الوم بروحي والندم اكلني اني ويني وين الزواج والله مستحية من نفسي ومن فيصل حيل لو لا خوفي من بابا اكول اله بطلت .

،
اميرة وتمارة صايرات واحد ضدي احسهم متفقين عليه ولا يحسن
اميرة
- دكومي يااا يلا مظل وكت

تمارة
- فضيها وكومي ويه اختج
ظليت ادردم ورحت  ،  ويه اميرة للحفافه حفيت و ما عاجبني الوضع
اخذت المراية منها اشوف حاجبي
صارلي سنة ونص ما حافته
مسويته كسرة جديده ثخين و مكصوص من اطرافه جنت دوم اسويه هلال رفيع ويلحك ربعه بس هسة برز اعيوني .
انطتني خبطات وما ادري ايش . رجعت للبيت  تمارة ما خلتني اسوي غده اكلنا سريع سريع و الضهر نظفوا البيت م جديد و حضروا الاستقبال و بخروه
  سبحت و حطيت شي خفيف تحت الحاح اميرة
-اميرة انت ما حاسة بيه مثل المغصوبة حتى اخلص من الحاحكم وما اتكولون عليه غلط .
- شفتينا كلنا نفس  الرأي فوافقتي
لا اظلين كالبه وجهج واتكولين ما حاسة بيج . ادري بيج كارهتني ههههههه

-كلش والله مزعوجه منج

- بعدين تدعين الي واتكولين الي الحمدلله عندي اخت فهيمة اهدت لي حضنا لطيفا مثل حضن النقيب 

اهز بأيدي واباوع لروحي بالمراية

اميرة
-بس يا ترة هذا اشلون يحضن اخاف لازم تاخذين اله تحية ههههههه
- حرامات انت اختي الكبيرة ما اكدر ارد رد مشفي للغليل الي بداخلي منج
- هههههه والله على وكاحتج هو ياخذ تحية الج وهو المنون همين

سما
ادخلت واخيرا انتهت من القراية وهي اتلم كتبها من السرير
- ترة اني حيل متحمسة اشوفه 

-ههههه تعالي اقتل حماسج 
كلبت بفونها اميرة وكعدت يمها سما
شو هاي صاحت
-يا الله هذاااااا
عافت التليفون واصفك و تهفي
-ولكم زفوني اني اله ياااايابة هذا علبة مكسرات
أميرة
- الله يجعله اخ في نظرج يمعوده هذا مثل اخوج الكبير
سما
- ياارب يتمم ع خير

الشي الوحيد الي مريحني هو رائد اخو لينا . الي حيل ارتاح لوجودها بحياتي صرت مثل البلسم لروحي صارلي اهواي ما حاجيه وياها ولا مفضفضة الها . بس بعد اليوم راح ارجع اتواصل وياها

**
رائد
اخذت قاطي . و رحت لبيت اهلي حتى لا نتأخر اخذهم اني بسيارتي للنساء  و والدي يرافق اخوية والبقيه من المقربين بسيارتهم الى بيت عروسة المستقبل

وكفت كدام مراية الممر اعدل بياخه قميصي كأخر لمسة قبل الخروج
شفت  لينا خلفي

-بعد الي كولته اله اعتقدت راح تكنسل
عدلت  رباطي بعدم اهتمام
- ليش يعني  بعد ما انطي الهم كلمة اخلف ؟
التفتت عليها وبنظراتها التعجب.
- ماكو سبب يستاهل
اكذب اذا اكول الي كالته لينا البارحه والي قريته ما اثر بيه وخلاني الليل كله سهران افكر بالقرار السليم . لكن بالتالي وبعد ما انطوا  موافقه لأختي بان نجي وسألو عنا و اتفقنا على الموعد حتى ما طلبوا يلتقون بيه قبل المشية لأنهم بالاساس عدهم معرفة سطحية بيه ،
اسوق واني استذكر كلماتها للنيوفر من اعترفت  للينا كمعالجه نفسية الها   . بفترة مراهقتها اكو نقطة سودة كبيرة  لحد الان مكادر استوعب هالملاك عدها ماضي .  باحد ساعات ليلة البارحة قررت انسحب بس ابسرعه تدخلت الافكار و تضاربت براسي ، كونها مكانت تعترف للينا وهي على دراية بخطبتي الها فكالت الحقيقة كما هي للمعالجة النفسية اااه يا لينا ياريت لو ما كلتي الي ولا قريت الرسائل الي امنت ورسلتهن الج نيوفر
ضربت على الاسترين

امي
-اشبيك يوم
كملت طريقي من غير ما انطق وصلت لبيتهم و ذاك  الاندفاع غزاني شعور معاكس اله من وصلت للصدك بعد معرفتي بسالفه البارحه .
اول ما دخلت وعتبت عتبة بيتهم حسيت بأريحية كبيرة وهذا فال خير الي وخفف من ترددي
النساء دخلونهن من باب المطبخ للبيت و احنه لغرفة الضيوف

عمامها و والدهم و ابن شيخ عشيرتهم و احنه ايضا ناسنا ويانا 

**

نيوفر
دخلت لينا وامها و اختها الكبيرة وبتها شابه من عمري لهفة بت كريمه اخت لينا .
و خالته واثنين عماته وام ابوه   .
بالهول
تمارة كانت معتنيه حيل بنفسها وطلعت الهم على سنكة عشرة 
اني سلام عادي ما ركزن بيه بس بيبتيه من كعدت اعتقد كعدت اصورني  من فوك لجوه لدرجه خجلتني و اتحاشيت النظر عليها . الغريب بالامر لينا لا تشاقه ولا تضحك جانت حيل جاده وطول الوقت ساكته
قدمت الهم الضيافه وبدن جدة رائد  بالكلام.. اني بالي مو يمها بس گلبي لعب   
لينا ابد ما اتصلت بيه من انطيتهم موافقه . بس لا ما راضية بعد الجلسات الي اخذتها  عدها ومعرفتها بكل احداث حياتي خلتها ما اتريدني زوجه لأخوها
ركزت بيها ردتها بس اتباوع الي لكن ابد ولا اكلمت حتى من اميرة حجت وياها جاوبت ع كد السؤال باختصار 
الكلام كان للبقية
همست لأميرة
- لينا شو متغيره
-يمكن تعبانه لو بتها مسهرتها .
والدة رائد كعدت اتعدد محاسن رائد وصفاته
-  دارس بالكلية الحربية . مسافر اهواي بالخارج ويعرف اشوية الانكليزية .
-وانت نيوفر اشعجب ما مكملة دونا عن خواتج
تمارة  جاوبت بدل عني
-نصيب . ابن عمي شافها بمناسبة وهي بعدها صغيره ظل يلح عليها لان عجبته منا من اخذها الله يرحمة

عيني على لينا الي متضايقه حيل . وتندمن اشد الندم بس اشمدريني هى راح تخطبني لأخوها ليش ما عارضت او انطت أي سبب  اله اذا ما راضية عبالي مقدرة وما مأثر بيها كلامي ،
من راحو واتفقو على كلشي
ابسرعه راسلت لينا كالعاده بهيج مواضيع ما اوجها كله رسائل وياها
- مرحبا
شفتها ما ردت رغم هي  شايفه اتصلت مرة واثنين الا ردت.
-اعذريني ما كنت يم الجهاز
كلت بتشنج حتى اعيوني غمضتها كأنها واكفه كدامي لصعوبة الكلام
- لينا طبعا احترمتج اني حيل اليوم رغم مبينه جايه غصبا عنج ولا ودج اكون اني مرت اخوج مع هذا ما بحتي سري الي امنتج بيه والله مراح انساها الج.
ساكته شو وما اتبادلني الكلام   .
-الو انت وياي
الو
-الو وياج
يادوب سمعت صوتها.
-لا تخافين كم يوم واكول  بطلت هسة ما اكدر اهلي ضاغطين عليه ترة . بس اهم شي لا اخسرج وهمين حقج اني هم نسيت هاي السالفه انت اخته اشلون اقبلين راحت عن بالي
اسفة لينا بس انت المفروض ما اتخليني بهيج موقف من يمج اسديها بوجه اخوج

ماكو جواب والتليفون انسدبوجهي

اه يالله لهلدرجة المعالجه شايفتني ما استاهل . هاي عود المثقفه الواعية هيج نظرتها صارت عليه
انهضمت حيل و انجرحت من تصرفها

**
رائد
كاعد  يم امي الي صدعت راسي بوصفها لقاء اليوم

اجتنا لينا
- رائد  ممكن اشوية كمت وراها بس وصلنا للغرفه انلطقت دموعها
- شفت اشلون  موقف اني بيه . البنية اتصلت تشكرني لان حفظت سرها
وكعدت على الاريكه تبجي مكدرت اكمل كلام
-خنت مهتني بسبب فطرة الاخوة  نصحتك  و كلت الك كلشي وانت ما فرقت عندك بس اني  كرهت نفسي حيل وصغرت كدام نفسي

حاولت  اهديها
و ربتت على متنها
- من طيب گلبج اصرفتي هيج يمكن افضل الي اكون على دارية

-تدري اتكول كم يوم وابين رفضي اله مدامج انت ما موافقه  شايفتني اليوم مغثوثه وضايجه . بس والله ضايجه من نفسي طلعت سرها وانت بكل الاحوال طلعت رايدها

- بصراحه حاولت حتى افكرش بس سمعتها و انست وهمه شالوا  و هم منو منا نظيف ميه مية اني ياما سويت الاتعس منها بمراهقتي وين اكو بنية ماعدها غلطه صافية مصفا مثل الملاك

كملت ببكائها هديتها وراضيتها

واتصلت بالناس معجل موضوع العقد .
وتحدد ما سمحت لنفسي اتخاذل وعدت نفسي اتكفل امام  الله واتولى اولادها واولاد فيصل  واطلع  بعمل يفيدني دنيا واخره ، وخليت لينا تتصل بيها افهمها ما عدها مانع لا ترفكش  من  يمها .

يوم العقد  كان يوم عادي تم عقدنا عند مكتب الشيخ هي والدها وزوجه ابوها

**

نيوفر
كنت الليل بطولة مقضيته سهر  بسهر و الدموع مالية وجناتي ليش الانسان    يضطر يعذب نفسه . ما كدرت اخالف كلام الي حولي ما معقولة اني الصح وهمه غلط اكيد اني قراري الغلط مال اظل ع ذكرى زوجي واكيد الافضل لأطفالي  ولمستقبلهم انسان غني و رايدهم ومصر عليهم فرصة لا تعوض 
هذا الي خلاني استمر بصراحه.

رحت مع ابوية وتمارة
نزلت من السيارة شفناه هو هم توه واصل مع امه
دخلنا لمكتب الشيخ في بيته كان
ما كدرت اباوع اله احس نفسي دسوي جريمه من اقرن اسمي مع اسم ثاني العقل والمنطق احسه راح يكبلني اجتني فكرة مجنونه بنص العقد اخلي واطلع قبل لا اكول للشيخ نعم نسيت ان اذكر الكم شي مو مهم جدا هو رائد من الطائفة السنية وانا من الطائفة الشيعية
لهذا اتفقنا عقدنا يتم  يم شيخ على المذهب الحنيفي بناء على طلب والده .

اسمع احاديث بعد العقد وبعد ما كلت كلمة موافقه  احس الساني انعقد وراسي مطاطيته على الارض لأن احس بمشاعر  داخلية مفتخرة بهذي الزيجه
خاصة من طلعنا وشفت قفاه من وكف و بابا يمه واني وتمارة خلفهم . وامه سابقتنا  اتباوع الي ومبتسمة
ندستني تمارة
- شوفي علابيتيه متينه
هااا
(تقصد رقبته متينه )
-وامتونه همين عريضه يكولون الرجال الهيج يصير ابو بيت وقيادي ومسؤول
صفنت على تمارة وهزيت ايدي
نزلتها هي وكالت عيب اتهزيها
-هاي كلها عرفتيها من امتونه

ندار بابا وكال يلا بينا
مشت يمه تمارة واني اتقدمت خطوتين صرت يمه ردت اعكبة
كال بصوت مسموع
- مبروك ام هاشم .

مرديت رجعت عقدت الساني عليه
حتى مباوعت اله اشوفه مبتسم ضايج مني لأن مرديت
تمارة اكلته اكل بالكلام والتبريكات
لحد ما طلعنا واعتذر بابا عن عزومته من عرض علينا بذوق لأن اليوم  عدنا  موعد فحوصات لرضوان لراسه دكتورة اليوم يكعد
..
مرن كم يوم
ولا حس ولا خبر من لينا حيرتني حيل من هسة شلت هم على كاهلي مواجهة اهلة والعيش وسطهم اشلون راح اتكون علاقتي بيهم زين لينا اشلون راح تتعامل وياي راح تتغير علية ليش ساكته ما معترضة ليش ليش؟ مبينه جان ما رايدتني وغصبا عنها صار الي صار
اتصل بيها لو اتركها على هواها .
ما اكدر اكول كله من اهلي داخلي طمع بماله و مركزه و صيت اهلة هذا شي غريزي الانسان ما يهوى تفويت الفرص 
رغم رفضي من داخل و رغم ادري صعبة اعاشر شخص غير فيصل لكن اني حطول فترة الخطوبة اكثر من ما يمكن حتى بس ما ارتاح اترك كلشي وما اندم على الفرصة ع الاقل جربت. 

جنت انظف بالبيت مطلعه المدات و انكث بيهم الساعه ٩ الصبح
واندكت الباب .  جنت معصبة شعري
وكفت خلف الباب وكلت منو
-اني عمي

فتحت الباب من سمعت صوت عمي ابو منال دخلته هو مرته و رحت صحت لتمارة طلعت الهم وصحت لبابا همين جان يوم عطلة جمعة

مرته باركت الي و بس تحجي وياي وتتسال وتمارة ما قصرت
- لج عيني واحد واصل هو الي عينلج حاتم
-اي ادري كالي حاتم جا مو ابو حاتم جان بالمشية
-ها نسيت
-والله مبارك عليكم والله لمياء من كالت الي نوفة ما موافقه جانت ،كلت اكول لأميرة اتكول الهم على لمياء

- ههههه النسوان مكومات يا ام منال بس هو رايدها للنوفة

-اشعجب عود

-بعد قسمته ويريدها

حسيت بتعاملها متغير ام منال من هسة بدت الناس تتغير عليه و تنطيني حجم واهمية  ما دري  يمكن مجرد احساس وهمي .
عرفنا سبب جيتهم يتوسطون للصلح بينا وبين بيت عمي رابح ابو زيدان اب احلام

ابوية
- والله اني لا بنيتي القطع والا المكاتل ويه اخوية بس همه كبروها من شغلة رجال ومرته الى قواضي ومستشفيات هاي لحد قبل كم يوم اخذته للطبيب لحد الان يعاني من راسه . والله لو غيرهم لعفنهم بالسجون بس ارجع واكول الدم مايصير ماي

ابو منال
-انت تدري هو ما راضي على ولده ولا يدري بيهم

- يصير خير يصير خير

للعصر اجونه عمي رابح هذا الي راد يقتلني اذا اذكروه هم العم الصغير   و بته احلام الوسطانية الي كومت البيت وما كعدته . اجه هو ولده مع عمي ابو منال وحالفين على  الصلح  ولده واحد عمرة من عمر اميرة والثاني من عمر علي
رضوان ما طلع اصلا الهم ولا راضي على الكعده الثانية . هي ذيج هم مغرم عليها

ثاني يوم هم اجونه وجابو اثنين عجولة والا ينزل الهم رضوان .  وذبحوا جوة رجليه اثنين عجولة واتخضبت الحديقه بدمهم  . اعتقد صار صلح رسمي هسة لكن قلب رضوان ما صافي بس لخاطر والدي  وحنيته على اخوته سكت
،
وكفت كدام سما الي تقرة
-انتهين اني شغل و طبخ ونفخ وانت عيني عيني كاعده

خابرتني اهنا اميرة

بعد السلام
-امورة ليش ما جيتي البارحه
- بتي مريضه . بعدين لحم وترسني حاتم منكم ههههه كون كل يوم يذبحون
- لا اسم الله معناها كل يوم يطشرون رضوان هو شباقي بيه
ضحكت  وكالت خطية

- اكلج خابرتج اكلج خطيبج ترة يريد بعد ما يجاز يجي يشوفج  لينا كالت الي
غصة وحزت بية نسيته!
- ها ليش
-شنو ليش لعد المن الخطبة
-اكلج وين يجي اني مخشبه هههه
- ليش ما تستخدمين الخبطات الجبتيهن وياج يحظي
-اتعاجز
- هههههه خرب حظج يا اعجوزية هم كولي قصة واتعاجزتي.
-يبو لا اذكريني هههههههه عود ردت اجرب واقرة رواياتج بس شربة الجاي خمس ساعات يوصفون بيها والبرده اخذ ربع ساعه يوصف بشكلها اني شنو دخلني هههههه
هو كتب لينا  بس اقرة كم كلمه بين السطور ويلحك ربعه
- حبابة اعتني بنفسج زين هليام
وانتهت المكالمة على   النصايح منها

ما سمحت لنفسي افكر بيه رحت اشوف شنو وراية . لكن حز بنفسي شي ليش لينا اكول لأميرة واني لا ؟ وابد ما اتصلت اعتذرت

*
رائد
انتهت اجازتي  و خابرت رضوان اخذت منه موعد اجيهم ازورهم ورحب بيه بحرارة  ، 
باجر العصر اروح الهم و لازم اقترب منها اكثر وافهمها اكثر .
رسائلها الي ابنعثت  سكرينات من لينا  اكثر من مرة ركزت بيهم بمرور الايام اتقبلت الامر مستذكر اخطاء بناتنا . منو بيهم مريم العذراء كريمه واجهت والدي بحبها لشخص واكيد كانت تتواصل وياه بالخفاء هذا شي متأكد منه لأني كنت وياها من اتروح تلتقيه كونه اخ صديقتها كنت طفل ما افهم شي

لينا كذلك اخذت زوجها عن حب لكن نيوفر واضح عليها عدم التوعية وكعها بفخ شاب سافل مدامها تزوجت و انسترت و كبرت ما يهم الماضي اصريت عليها و اصراري اثار استغراب  لينا الي ندمت حيل خانت امانتها حتى تخجل تتواصل وياها
.
ثاني يوم العصر   . رحت لبيتهم بالموعد و جلس يمي  رضوان مع احاديث  جانبية
والدها طالع . وعلي كعد يمي اشوية و اجوي جماعته طلع وياهم . اما رضوان هاشم كاعد يمه وكل اشوية يأذيه برجله منا من طلعت تليفوني وانطيته اله حتى يترك خاله بحاله
وأحاديثنا كانت تقتصر على العراق والكلاب السائبة داعش و الامور الي اصير وياي بالجيش ،
باوعت لساعتي اكثر من مرة  من اثناء حوارنا
تأخرت ثلث ساعه حتى الحوار مع رضوان صار ملل ادري اني جايه اله لو الها
الولد هم واضح عليه التملل اتعذر مني  رجله تأذيه بالكعده . سندته وهو كمل على عكازته
طلعت الي مرت والدها مرة مبينه معدلة وصاحبة كلمة وبت أصول و كعدت يمي اشوية وطلعت بعدها ورجعت بيدها  الصغير الي مدعو رائد
- اتفضل ابني هذا ابنك الصغير
-اي اعرفه !
حطيته بحضني و قبلته بسطحية واجاني الثالث
هاشم و صوفي متشابهين حيل بيضان و شعرهم اشقر و اعيونهم قريبه للون العسلي لكن رائد حنطي بشعر اسود ناعم توه منبت لكنه ما مرتاح بحضني
-اشكد عمره
-عمرة ثمن اشهر
طلعت المرة
و الطفل بدأ يغيم احتاريت اشلون امنعه من البكاء
استفزتني خدود مصطفى ،قربته عليه واخذت اخدوده ريحته كانت ترفه يانعه
ما حسيت غير و الطفل  متقيئ عليه
اضاهر الابوة مو سهلة لكيت نفسي مفترس واحد اشوفه داخل ع الارقام يريد يتصل ع القادة مالتي
-لا هاشم لا اطلع منا
والثاني مغورك بنطلوني و الكلنس ما نفع اتبحرث
والثالث خله رجلي الثانية عبارة عن نشأ راحة(حلقوم)

،

نيوفر
بالكوة شبعتني رزايل نيوفر الا سكتت عن البكاء مدري اشبيه من صارت صدك و خطيبي يطب ويطلع انهاريت خاصه من كالوا الي اطلع اله من غير حجاب ساعه كاملة كاعد واني ما طالعه ولا اكدر اوكف دمعي . هاي الحياة مراح تستمر هيج  القلب ما هاوي ،حكم العقل كان قاسي عليه
أذعنت لأمر تمارة من هددت اتخابر والدي يشوفلي صرفه .،وقررت ببالي اصارحه
و انهي كلشي صار ، ورضوان وياي اي هو كال .

**
نيوفر

حاولت ادخل للاستقبال واني محضرة الكلام مقدما على حافة الساني صحيح خدودي غدرتني ومحاولاتي اكون عادية وهادية فشلت بحرارة وجهي الي الحماوة تطلع منه تلسع لسع و صدري غصبا عني يصعد وينزل كأني طالعة من مرثون  ، اقرب شي الي اسمعه دگات گلبي وبس بهاي اللحظة ، دخلت وبلگبي سميت ، ردت انطق واسلم لكن الكلام غادرني من شفته مدنك وما حس بدخلتي جان مدنك على توتو ويمسح بملابسه عرفته متقيئ اشوية و صوفي لازم بأيد حلقومه من صحن الحلو الي كدامهم  والثانيه منتكأ بيها على رجل الرجال واصاير بنطلونه الاسود مملغط بالنشا مال الحلقوم وذاك ما مهتم او ما منتبه اله اصلا 
المشهد اثر بيه لهلدرجه اطفالي منقصين حنان عبالي رضوان مكفيهم لو همه مجرد أليفين واجتماعيين حتى بهاي السرعة ياخذون عليه بس توتو يلغي بلغة خاصه يريد يبكي ممرتاح
-السلام عليكم
كلتها بهمس شبه تشاور غير مسموع  للمقابل
رفع راسه وعلى وجه ابتسامة خفيفه
كام الي
ومد الي ايده بادلته السلام بس ابسرعه ابعدت ايدى؛ تلامسي مع ايده شكلي خطر بتنظيم دگات گلبي حرارت ايده انتقلت لأيدي وكأني ناقصة حرارة كعدت ابصف هشومي .
انتبهت اله واخيرا هشومي بايده تلفون دبل اسود من غير كفر ويلعب لعبة ما اعرفها
زاد ارتباكي الوضع بعدني اعده غريب مع علمي بينا عقد لكن هاي اول كعده النا وحدنا . اقصد على الاقل بس الجهال يمنى
بادر بالكلام قاطع الصمت بمواضيع اعتيادي السؤال عن الحال و الكلام الجانبي المعتاد

انتبهت اله  يسأل  ويمسح النشأ عن بنطلونه .

-هاشم رجع التليفون عيب

جاوبني وهو بعده مشغول بالمسح
-خليه يلعب على راحته
رجع الي صوفي
-انا انا الت تلف
يريد التليفون ورة اخوه

ما افتهمه رائد
-روح غسل وتعال
رجع للخلف صوفي اشويه دومه مخبوص على الطاولة وكع كلاص الماي والعصير ع الحلو
كمت اريد اشيل الصينيةواغسل لصوفي

الزمت ايدي من معصمي ووكف الي بعد ما لزمها
-اكعدي ،
- اريد اشيل ال.........
-مو كافي طلعتي الي متأخرة . مع اني ماخذ منكم موعد واجيت بيه . اني رجل احب الالتزام
اكعدي
كعدت منصاعة اله بس من داخلي ما حبيت كعدتي ولا انصياعي وكانا يأمرني

- اولا ليش اضربين هاشم ؟
-هاااا؟ شنو هو كلك ؟
- اي كال الي قبل لا اجي ضربتيه

تنهدت خجلة من اسوالف هذا ابو السان
- اني مو غريب راح اصير بمثابة اب الهم ماكو داعي للرسمية كدامي واذا سكب العصير على السجادة . قابل ببيتي اقصد بيتكم راح يتنازل عن طفولته ؟

يا الله معرف شنو ارد عليه لا وبعد يكول سكب مو اتبدة وهاشم من يحجي الرجال يباوع الي و مكيف وربي خل يطلع الا اجرجر اذاناتك ذني الي يسمعن علينا
ما صبرت استفزني هاشم من ضحك . عضيتله شفتي متناسية الرجال الي قبل اشوية عادته غريب

هي اقل الثواني واسمع صوتي ضحك رائد يجلجل بالبيت مو بس بغرفة الضيوف !
**
رائد
حاولت من البداية اتألف وياها خاصه اني بطبعي بسرعة احب افرض نفسي على الموجود والحضور . و استغليت موضوع ضربها لأبنها لكنها سوت حركة ثارت بيه شغلتين الاولى روحها الطفولية الي اتخلي طفل يستفزها و توهج خدودها عصبيه عليه وللثانية رغبتي بتذوق هالشفاه الي عضتهم خاصه هي من زمان داخلة ببالي بشكلها الطبيعي البسيط و العفوي . !!

يتبع
بارت ونصف في بارت 
هذا اخر بارت . قبل الزيارة اشوفكم بعد الزيارة تدرون اغلبكم اني من كربلاء