رواية الرعناء والأشيب الفصل الثالث عشر 13 - بقلم زهراء العراقيه

مساء الورد
تم تكملة الجزء و دمجه مع جزء ثاني هنا 
الرجاء قرائة البارت من البداية لان البارحه نزل من غير تدقيق فكان اكو اغلاط

نيوفر
دخلت للبيت وادفع بهاشم كدامي حلكه مليان حلويات وبيده كاكاو ابو المكسرات
اتلكاه صوفي اخذه  منه
واني رحت اهبد ع سما وين راحت لكيتها بالمطبخ يم امها
وامها تبجي
-شكو

مجاوبت تمارة
سما
- هجمو علينا عماد و عدنان و جايبين ااتلاثه من ولد خالتهم صاحوا لرضوان طلع الهم شبعوا كتل كسروا مثل ما كسر أحلام
شهكت بفزع
- يمة رضوان وهسة وينه
- علي دافع اله وهم اكل تكسيرة زينه منهم جايبين تواثي جايين حامين علينا حمي
-عسى اديهم تتكسر
الجيران ادخلوا و بعدوهم لكن شردوا 
واخذوا رضوان للمستشفى  هو وعلي وبابا لحكهم
- ولج علي همين اكسر يمه اوليدي الدم ينزف من راسه  الله ياخذج يا احلام يا هبادة البيوت كسرتي ولدي من الله لا يرضى عليج
سالت سما
-وهسة اشلونهم ليش من اتصل محد يجاوب منهم
-تليفوناتهم اهنا الولد والبابا  حاير بيهم
ورضوان جبروا رجله و ايده و راسه خابرني بابا قبل اشوية . و علي مابيه شي هاي امي تحب تنعى كم خياط براسه بس سودة عليه رضوان حتى غايب عن الوعي من الوجع

كمت ابجي وبصياح
-الجيران ليش ما تدخلوا من وكت ليش خلوهم يدموه
-الكلاب طلع الهم هاشم كالوا اله صيح خالك
طلع  الهم دخلوه  للحديقه و دك تواثي فاجئوه .

-ايا كلاب يا حقراء هاي عليه كعده وربي ابوية اذا سكت على مود اخوته صدك اضوج

- حقراء هسة ام احلام الحقيره و خالاتها اجني فرغن الغرفة و دك غلط علينا وعلى رضوان

-هو رضوان صحيح غلط كسر بتهم تكسيرة زينه انوب بابا اخذ تليفونها ومنعها صارت مثل الي معنفين بتهم . بس همه مقصروا بهاي سوايتهم انقطعت القرابة الي بينا

تمارة
-كون تنكطع واخلص منها بنات الشوارع اسماء وأخواتها(تقصد سلفتها ام احلام )
اخذت منها بت حتى اكسر عينها وتبطل كالات . شوفتني الويل بولدي حسبنا الله ونعم الوكيل

-لو ماخذه لمياء . درة من الله وهمين صح امها عكرة بس مالها شغله ببناتها الي يزوجن كافيه خيرها شرها

خزرتني و بصياح عالي جاوبت منفعلة
-الج عين اتلومين ولج مو انت اساس البلة ذليتينا بين الگرابة والغربة ولي من وجهي لا ابتلي بيج !

عدة الليلة قلق على اخوتي . بالليل طلع علي ابسرعه نام تعبان . الصبح خرج بابا رضوان من المشفى ؛ الفقير بهذا الزمن ينوكل حقه وحتى من يعتدي عليه الكل يتوقع منه يتنازل عن حقه واذا ما سوة اتصير عيوب الدنيا كلها بيه ؛
اني وهاشم كابلنا رضوان
اني اقرة ايات يم راسه وهو نايم وجه مزورك خطية سودة عليه ؛ و هاشم انطرح ابصفة
دخلت تمارة
-طلعي ابنج لا يأذي خاله
فتح رضوان بتعب
-خليه يمي 
-هذا حرك لا يدوس على كسورك
كأنها ذكرته بالكسور الي مالية جسده دار وجه عنا

-اطلعن وعوفني
كمت اريد اطلع
-تعالي اخذي ابنج
هاشم
- ما ما اليد خالو حبيبي
خالوا خالوا اشلون اتلوح للتواليت
ضحكت رغم الحزن وطلعت و وراية تمارة ادردم على ابني الي لازك لخاله

كاعد بابا بالهول ودخل علي للبيت 
-وين جنت ؟

بأيده اوراق
- جنت اقدم ابلاغ و شكوى واخذت شهود من الجيران وياي .
-عليمن ولك
على ولد عمك دمك ولحمك!
ادخلت اني بالحديث منفعلة
- ولد عمة جابوا الغرب اولاد خالاتهم و كسروا ولدك بوية

ابوية
-اسكتي انت
- كلامها صحيح والله الا اخليهم يبوسون رجلين رضوان هالعارات يسبعون علينا لو بيهم خير ما جان اتكاثروا

تمار
-يمه ما اريد مشاكل
سدوا السالفه والحمدلله انت ما بيك شي سليم يا يمه على شنو هالثارات راح اتكب مدامك بخير
جاوبتها اني
-ابنج بخير  هاهي عندج ولعد رضوان الدم الي خسرة جسمة المكسر  عادي عندج المهم ابنج بخير وما تردين مشاكل
صاح عليه علي ؛وسكتني جنت فاقده اعصابي من برودها  الخوافه

علي 
-هسة شنو تردون اتنازل مو راح الشرطة اجرجرهم مثل المطاية و هسة راح ناخذ الهم تصوير كامرة بيت ام احمد جيران مصورتهم من متعدين بابهم شكولاتهم واضحه والشهود يعني راحوا بيها  تقارير رضوان واتوديهم بداهية
حطهن على القنفه

ابوية
-وحدك تصرف زعطوط ماعدنا عشيرة ماعدنا عمام ولك احنه اخوه ونحلها اتروح تتنازل

تمارة
-اي يمة

دخلت اني
-لا تتنازل علي وربي ابوك طيب يقنعة عمك  بس يخليه يصالح و يجي ابن عمك الشفية يبوس راس رضوان ويضحك على ابوك يطلعون منه.....
بعدني ما مكملة وصاح بيه والدي
هزئني
- غبرة طايحه الحظ شنو صبغج وكع واتكولين يضحك عليه .امشي لا تدخلين

زلة لسان وطلعت مني خليت وطلعت دمي يفور على رضوان حقة حيضيع
علي راحله

واني دخلت وراه لكينه هاشم يشربه ماي ويوكع عليه منا ومنا
علي اخذه منه وكعد رضوان عدل وشربه

كعد يمه
- رضوان اني قدمت شكوى على اولاد عمك .بس ابوك يريد اروح اتنازل . انت شتكول
- يريد يصالحهم ابوك
بالكوة نطق تعبان
- مبين والدك واعرفه اهم شي لا يخسر اخوته ويعتبره طيش شباب واتعاركوا

- كلة لأبوك اذا تتنازل رضوان چتال الهم 

- هاا يعني ما اتنازل
- تنازل اني چتالهم

طلع علي واني كلبي فاخ من سمعت بكلام رضوان
صعد  والدي اله واني واكفه ع صفحه لازمه كلبي لا بابا يقنعه

ظل يحجي بابا وياه بهداوة وكله لا تستعجلون خلينا احنا الكبار  نحلها
رضوان ساكت مابيه حيل للمناهدة

-تنازل ما انتازل بوية خليهم يتربون
وغمض قافل الحديث
بوية حجى راد ما قبل رضوان وبما ان المشتكي علي لزموه والا اتروح تتنازل ابوية دخل يبدل و علي اختفة من البيت وابوية ظل محتار . الضحى عمامي اجوني . مسوين القاء قبض عليهم وموقفهم صعب حيل .
ياارب ابوية يريد يتنازل اوووف
و اخوته واكفين بعينه ؛ايام وعلي ما يجي للبيت و ما يتواصل لا ويه عمام ولا ويه ابوية ورضوان معند ولد عمنا بالسجن ؛مشاكل ما منها مشاكل

*
رائد
ما كدرت المح اله استصعبت الامر شفتها ابنية جدية و الحزن متلبسها .
تركت الموضوع بيد لينا ؛
- صدوك تحجي رائد
- اي
-رائد احسك احساسک بالفراغ خلاك تدور خيارات بديلة تكسر وحدتك مو كلش مدروسة
لكن فكر .ترة بينكم فروقات اهواي

- اعرف ؛ حبيت الي من مستواي ريما وشنو الي صار على العكس افكارها حيل بعيده عني واعرف لو ارجع الها هسة ترحب لكن بعد الزواج تبدي المشاكل بينا اعرفها ما تتنازل عن هواها   . اما لبنى عاشت مثل ظلي و حيل مماشيه اموري لدرجه ما كدرت تتحمل و راحت لا تساوي فكري فاد ولا اجتماعي .
-بس نيوفر عدها هواجس من الصعب هسة افاتحها بهيج موضوع
-انتظري وقت مناسب وفاتحيها

-ترة نيوفر بنت بسيطة بفكارها يا عيني انت متشعب بالحياة وهي عايشة على سطحها بسطحية كل الي تعرف اسويه هي اتكون ربة بيت .

- اعتقد هي الملائمة الي .
حسيت لينا بس اتريدني احيد عن الموصوع رغم أنها كنت احسها قبل هي اتلمح الي عنها وتمدحها كدامي لكن هسة بغير واهس كالت حشوف وقت مناسب ولو ادري رفضها نسبته كبيرة لكن ححاول
- شوفي الوقت المناسب وفاتحيهم

*

نيوفر
عمامي كل يوم يجون يتوسلون لرضوان لأن  موقفهم جدا صعب الشروع بقتل لأن التقارير الطبية ما تبشر بخير الضربات بكل انحاء جسدة وضربة راسه مؤذية بحيث مراجعات واطباء خلت ابوية يروكض بيه خطية ، انقلب الموقف ضدهم والمصاريف كلها ع عمي ابو احلام ؛سالفه كتلت احلام انست صارو همه المحقوقين والي يتعذرون 
شرط عليهم رضوان وحتى فاجئ والدي وكال الهم اتنازل بس بشروط . اترجعون كرامتي  اول شي .وتتنازلون عن الغايب ماعندي  واريد اطلك!

من راحوا النقاشات علكت بينهم اني مدخلت لا اعك بالكلام .
،،
المختصر طلعوا ولد عمي وسوة كعده عمام اعتذروا وطاحوا على راس رضوان بس اولاد خالتهم بابا قاضاهم عشائريا لأن من غير عشيرة و داسوا عتبت بيتنا و ضربوا ابنا بغير حق هو كتل مرته بت عمه همه شدخلهم بس شنكول ناس شرانين . المهم طلعوا من التوقيف ولو هو المفروض حتى لو اتنازل رضوان الحكومه تاخذ حق الدولة بهيج فعل مشين بس احنه كلشي عدنا نزيه زيادة عن اللزوم تقريبا فضت المشكلة لكن بعدها بيها ذيول بعده ممطلق احلام منا من يوكف على رجله

؛
بيوم اجتنا اميرة الصبح وعلى وجهه البهجة جنت افتر بالبيت واعزل من خلصت رحت احضر  مقدمات الغدة  اجتي ورايه
-شسوين ؟
-احضر للغده وانكع تمن اكولج شسوي مرك؟
-هسة دعفويه تعالي وياي

جرتني من ايدي ورحت وياها للغرفة طلعت الجهال وسدت الباب
-عندي سالفه وياج
-ماذا
كعدنا على الارض والطريقه الي كعدت بيها بحماس وتوتر خلتني اضحك
-ههههههه اشبيج اميرة
- عيني انت يا نيوفر لكل انسان بينا تجي فرصة . ما تعرف ضروف تجيك بأي وقت وانت عليك تستغلها لو تتخلى عنها وتخسر بعدين
والفرصة اجت
- يا سلام شنو هاي الفرصة تعينج طلع ؟
لو شنو
-لا ولج الج اجت مو الي
-هههه الي اني ؟شنو تعيني طلع واني سادس ابتدائي لو عريس لقطة هههههه
كلتها بشقة وضحك بروح خلصانه من المشاكل
- تقريبا صح
-ها تعيني طلع؟
-لا تتغابين
تقريبا عرفت ملامح الموضوع مالتها بس ردتها ما اتكوله حتى لا اعرف اختي ماتحس بيه لهلدرجه وتفتح وياي هيج سالفة
- عريس لقطة يا نيوفر
-صدك؟ ههههههه
- اي والله عوفي الشقة والضحك عريس كامل مكمل
- اميرة ؟
- اسمعيني
-ما اسمع كافي لا اتكملين
وكفت منتفضه
-اسمعي هاي فرصة عمر يا عيني مو اي عريس ،دري جرحج ما ألتم وادري كلش زين حجم معاناتج بس هاي الزواجه غير اتغير مجرى حياتج وحياة اولادج
- منو بالله هذا الي هيج مخليج ناسية مشاعر اختج
اني رجلي بعده معشش بداخلي
-رائد اخو لينا
الموضوع كله مستفز مهلكد اهتميت ولا ركزت بالاسم
تعالي اكعدي
كعدتني على السرير
-انت مرتاحه اهنا احلفج بالله
- لا اكيد
كلتها واني صاكه اسنوني وصايرة اعصاب

-فيصل الله يرحمه راح بعد ،انت وحدج اتعانين اهنا وتمارة ما مريحتج ومهما كان ظاله من غير بيت يحوي اولادج بأمان
-اي واكوم اجيب الهم رجل ام يشيب عيشتهم ويوكف الهم ع اللگمه مثل مصار وياي

- لا هذا غير . ضروفه غير كل رجل ، هذا راد اطفالج ورادج ..هذا ما يخلف عقيم
.-شنو رائد ما ينجب اولاد؟
- اي يحبي  دسمعيني حبابه ، الرجل شافج وعارفج و رايدج بجدية انت واولادج  هذا شي جدا مناسب الج جمال ومال ومنصب واخلاق فرصة لا تكرر لأن اهمهن هو ما يخلف وراح يعوض الحرمان بأولادج.
-اخاف يطلع حركة كلبه بيهم الله يخليج اسكتي لا اتكرهيني بالرجال خلي يزوج وحده غيري اني لا ؛  اني مرت رجلي حتى ما اعرف جثمانه وين اصلا ؛ تدرين اني لهسة احسه مميت من تتصل امه أتأمل اتكلي رجع فيصل، كل ما يدك تليفوني اتأمله هو . كل ما يجينا احد من اهله  يتهيأ الي هو وياهم والله العظيم فيصل رجلي بعدني على ذمته

بندفاع زايد و حرگة بالكلام ردت
- نيوفر شنو هذا التفكير دارت سنته وانت اتكولين هيج ولج اشحال شفنه جثته وهي يمثلون بيها الدواعش

ردها خرسني وياريت السمع فقدته قبل لا اسمع كلامها
-شنو  فيصل. شفتوا جثمانه

توترت ورادت تسندني شافت اعصابي اشنجت
- احجيلي عفيه شفتوه ؟ليش اني ما ادري
- ماردنا نمرد كلبج بشوفه عزيزتج يروحي؛ عمامه جابولة فيديو  ما اعرف اشلون اتوصلوا اله
بدموع و روح جزعة جاوبتها
- لج اني ما مؤمنه بموته لأن ماله جثمان

-تعالي ارجعي اكعدي ليش هيج اترعشين سودة عليه فلت الساني   ،ابوج ظم عليج انتي ما عايزة

ابجي واباوع بعيونها اتسأل بيها بنظراتي
- شافوا عمامه لفيصل فيديوهات اله كاطعين راسه و جسمة نصفة متهشم اصلا و حركوهم حرك
اشرت الها بيدي تسكت بعيوني بحر من الدمع و بروحي حركة دهر كامل
طلبت منها اتعوفني بحالي . فتحت اجروحي من جديد . ظليت النهار  بطولة عايشه بس البواجي تواسيني

للمغرب اتوضيت و صليت وقريت كم اية وهديت لفيصل الفاتحه اني جنت هاملة هذا الشي وما اقرة اله ابد عقلي يكلي يجيج ماهو بالقبر . ليتني متت ولا هذا العذاب الي يجدد  عليه،
اميرة ظلت تشعر بالذنب لأنها كالت الي خبوه عني وليتهم ظلوا مخبيه !
لثاني يوم هي يمنا كمت من فراشي وهم اتصنع البسة بوجه اطفالي
اول ما صبحت بوجه تمارة ظلت تحجي عليه البارحه ما اشتغلت وسما عدها امتحانات سادس منطيها فترة تقرة بيها
خلصت تنظيف واميرة ساعدتني شو ما راحت لبيتها . وكفت كدام المراية  اتلمس بشرتي الحنطية احسها حيل خشنه صايره ما اهتم بوجهي ميبس . اعيوني النرجسية ذبلانه من سهر البارحه .
فتحت شعري الاسود على طولة ومشطته جان مخربط. هو سرح  مو خشن بس بيه تكسيرات ؛ صاير هليام بيه خفه بسبب التساقط هو بقت عليه كلشي جاي يساقط مني مثل الشجرة ليلة خريف  جاحد ، اوصفلكم طولي لأول مرة ١٦١ اتسم بالرقبة الطويلة عندي شامة بعلابيتي كبيرة (رقبتي)  وزني ابد ما يزداد مهما اكل قبل الزواج كنت اعاني من النحافة المفرطة بعض الشي وبعد الزواج شايلة نفسي ع الاقل عظام الرقبة اشوية خفت مو كلش ضاهرة اتخوف ، طلعت صورة فيصل حبيبي
-ما مثلين بيك حبيبي انت روحك صعدت للسما يم ربك وراسك بجسدك مثل ما خلقك ربك ،  الله يعوضك خير .
بسته
واجه ببالي طلب اميرة تذكرت رائد
لا يمكن افكر بغيرك يا فيصل ماكو رجل بعدك انكشف عليه
الضهرية جنت اكتر بملابس الصغير بالمجر
كعدت يمي اميرة
-ها امورة اليوم اتباتين
- اي قلبي ابات هههههه حاتم يكول حلوة الحرية ومكيف
-خاف عنده وحده
-هههههههههه صدك ضحكت اشحده اقتله
اكولج ع طاري حاتم . حبابه فكري بموضوع رائد لا تنسين
- اميرة كافي حبابه . ماشفتي اشصار بيه البارحه
- فكري بعقل ما يرفض والله ما يرفض
ظلت اتلح و غثتني .
صار المغرب طلعت اسوي عشة لفيت بورك وصاج دجاج و كبة لكيت كم وحده باقية اخاف حاتم يجي ع العشا .
دخل علي سال ع العشا وطلع  ، ورة عشر دقايق واكفة اقلي  البورك وأميرة اجتي فوك راسي اتلح واتلح واني مغلسة
-ولج غبية انت عاجبج عيشتج هيج هااااا
واخيرا سمحت لنفسي اجاوبها  بعد ما مليت
-عاجبتني وكافي حبابة ارحميني دزي رفض الهم وخلاص مليت والله ترة مليت
- وج زنكيل و اخلاق و نسب يشرف والله گلبي مدا ينطيني ارفض والله  خسارة خسارة عظيمة بحياتج
طفيت عن الاكل وكابلتها بوكفتي جاوبتها بجزع وروح خلصانه   احجي واديه تأشر بالهوى
- اني بعد فيصل ما اكدر اشوف رجال مو انوب توه خطية دارت سنته اجيب واحد ثاني ياخذ مكانه بگلبي واولاده ، انت اشبيج اميرة هاااا  هسة اذا مات حاتم ؛اول ما ادور سنته تزوجين ؟
شهكت و خزرتني
-اسم الله
-شفتي اشلون صعبة ..عفية خليني بحالي موضوع رائد لا اتفتحي كدام تمارة والله تخبصني خبص

اضاهر زعلت اميرة طلعت من المطبخ وما حجت . وحتى ما ظلت على العشا اتصلت بزوجها اجه اخذها
ليش دا تضغط عليه وهي اقرب شخص الي ودا اشوف توني طلعت من صدمة موت فيصل توني رجعت للحياة
دزيت الها رسالة ورة العشا
:لا ازعلين علية امورة گلبي والله مقصدي الله يحفظ الج حاتم واطفالج . لا تنسين دزي الرد للينا وكولي الها نيوفر ما موافقه ما تفكر بالزواج والله يسعد اخوها اني اخجل ابلغها )

**
رائد
خابرت لينا
-ها لينا شنو القضية ماكو  رد
- رائد مبين الرد رفض صارلهم اسبوعين ومبينه اميرة تتحرج اتكول الي و نيوفر اصلا ما تتصل واضحة مثل وضوح الشمس . وكوني المعالج وبحكم التقرب الي صار بينا اعرفها للنيوفر مراح اتوافق بس لخاطرك اقحمت نفسي بهيج بموضوع

اني ساكت عيني على سلاحي وبالي يم كلام لينا . جهاز الندائات ينادي يمي بأسم زوار للمقر .
ابتعدت عنه وطلعت برة الحضيره
-  انت هم احسك اتريد تقحم نفسك بأي حياة حتى لو ما مقتنع بيها . بالاول ريما وهسة نيوفر ؛  رائد تريث بالمرة الثالثه ارجوك ، وانسى السالفه مال نيوفر
-احسك مرتاحه للي صار
-اني مو مرتاحه بس ما اريدك تتعجل الزواجه ما احسها متكافئة 

سديت الخط
رجعت كعدت على الكرسي . احس راسي مثقل بالهموم الى متى يا رائد الى متى وحيد تعبان الكون نافرك ،
رجعت طلعت اشتم هوى    امشي  والبك اتلكاني . ما احس بلسعاته .قدر لسعات الزمن . كلت لنفسي كافي رائد لا تأخذ وحده غير كفئ حتى بس تطلع من الي انت بيه   ريما صفحه وطويتها . ولا تفكر بشخص مو الك نيوفر تحتاج اسنين  مو سنة حتى تكدر تبدي من جديد . الله يكون بالعون بس و اكدر اجتاز هذا العذاب . اهم شي الملم ما تبقى من الكرامة وابتعد  عن التفكير بهذي الامور ولا تعجل ولا تندفع خلف حماسك ورغباتك مرة ثانية

*
نيوفر

ضوجة و ملل و حتى الانسانه الي بديت افضفض الها بالرسائل مكدر اتواصل وياها بعد رفضي استحي وهي شو بعد ما اتصلت او سألت يمكن زعلت لينا .
كنت العب ويه جهالي واختل خلف البرده و همه يدورون عليه وهكذا اختل بماكن بايخه حتى يلكوني
منا من صاحتلي تمارة وعلى صوتها واضح الانذار لشي صار او بدر مني

رحت الها بالهول واكفه وحدها ومخوصرة

- ست نيوفر جايج عريس ورافضة واني اخر من يعلم
-  يوه عبالي صاير شي . اي شي مو مهم للذكر
- الحمدلله اختج الثولة الثانية ما دازة رفض الهم والا جنت سودت عيشتكم
انتم الاثنين
رحت لغرفتي ضايجه من كلامها اتريد تخلص مني
-تعاي احاجيج
تعالي
دخلت
احجي وياج لا تعوفيني وترحين
-خالة سدي السالفه . المفروض انتي الي اتكولين الي عيب من الناس ازوج و اني رجلي صارلة سنه من استشهد
-يا ناس يا بطيخ ولج رائد الي متقدم الج اتعرفين شنو رائد هااا هاي فرصة ما منها فرصة بنات ابيوت يتمننها
بس شنو عجبه بيج ما اعرف ارملة و عندج ولد اووف لو خاطبين سما والله افضل عاد توافق ابسرعه وما تشلع گلبي مثلج .
كلامها يطول ذكرةما اهتميت اله
لكن بكعده العشا وحظي حتى علي ما طالع موجود
و رضوان كسر رجلة بعده مجبر ومغيرين اله الجبيرة بس ايده حاط الها باندج
ياكل ببطى كون ايد وحده يكدر يحرك
و يباوع لهاشم و ذاك يسوي حركات بوجه و يضحك خاله اخر شي وكفته تمارة
-بيبي سد حلكك واكل عيب لا تعيب .
لازم ترزلني
-علمي ابنج اداب النعمة
سكتت اشوية وكالت لأبويا على العريس محد اهتم و رضوان كال  انطوهم رفض ما اعتقد نيوفر جاهزة لحياة جديده .

- دسمع يرضوان واعرف منو العريس

محد سأل منو !مع هذا جاوبت نفسها

-العريس اخو لينا صديقة اميرة اذكروها  يمه رائد

رضوان
-النقيب رائد ،هذا الي عزمته بعرسي واجه هذا خوش رجال
-اي يمة

عتبي على اميرة بس ورطتني هاي الورطه حتى بابا اهتم وظل يعيد ويزيد متاكده خطب نيوفر ؟
ما جرحتني الكلمة لان ادري بوضعي كلش زين حتى لو مطلق متعجبين ليش خطبني الي ؟

علي
-اشعجب ليش خطب نيوفر اشمعنا يعني

تمارة
-اني ادري عادي هو واذا ملطك يزوج ممزوجه وبعده بعز شبابه اتمول اميرة عمره  ٣٧
بس اوف حرامات ما شايف سما . بس نيوفر حتى موصلها لهنا
الانظار كله التفتت عليه حتى اللگمه داخل بلعومي ظلت واكفة . بلعت عليها ماي
- اشبيكم ؛ مو كولت الك بابا من وصلني 
اشبيكم
اتغاضى بابا النظر
- اي شوفي نيوفر وردي الهم خبر

رضوان
-نيوفر فكري هذا ما يرفض غض النظر عن اهلة وما يملكون و وضعه الاجتماعي لكن خلوق وانسان متواضع جدا . ما كفاه التوسط الي ظل وياي منا من نقلني بفرع قريب على حينا و حضر عرسي من عزمته والله انسان كفأ

-ما افكر بالزواج . اني رفضته
تمارة
-ما وصلت رفضج اميرة الهم

كمت عن الاكل الحديث صار عنه وبس
و صوفي وراية يركض ، خابرت اميرة اتعاركت وياها عركه زينه خلتني امام وضع محرج جدا
،،
؛دخلت علينا تمارة الساعه ١١ بالليل سما تقرة واني اسمع أذكار قبل النوم
-وخري الهدفون
کالتها وهي اتبعده عن اذني
-ها خاله
- الرجال طلع لان ما يخلف عقيم رايدج . يعني شاري اطفالج اذا خايفه عليهم فكري خوش
كالت الكلمتين وطلعت
سما
-ليش خابصينا بيه
صدوك اميرة خطية حركت تليفونج ليش ما اتردين عليها
-زعلانه منها ورطتني ويه امج
- هههههه ما طلع رائد هذا بس اريد اعرف  كلشي عدهم المنصب والفلوس والاخلاق مكيفات عليه
- يا لعد الانسان شنو الامور الأساسية الي لازم اتكون بيه.برايج؟
-يكون صاك هههههه
- المشكله هالرائد ما قاصر جامعهن كلهن

بحماس مراهقة
-حبابة اوصفيه حبابه
ما ردت اكسر بحماس  المراهقة السن الي كنت دوم  الصم بيه اذا اسأل
فقبلت اوصفه
-جنتلة . وسكرت بصراحه بس من وجه مبين ذكي و مبين يحب السلطة والتسلط من اشواربة هههههه
-اي اي كملي
-اسمراني  جسمه رياضي مبين تعبان عليه وعلى نفسة اعيون مو وساع صغار واحواجبه مقوسة خشمه بيه طول اشويه بس ماشي حاله مو خشه و ملتحي و مبين عليه انفة و بالعالي خشمه بصراحه اول ما اشوفيه،  واكره شغله بيه يبين عطفة على الاقل منه بحيث ازعجني بالموقف الي اتعرفيه وازعجني من جان كلش رقيق ويه هاشم . حتى من باس توتو ذاك اليوم حسيت بمدا عطفة عليه كرهته ما احب احد يعطف عليهم ولا ينظرلهم نظرة المساكين .

-ممممم عوفينا ما مساكينج هذا اتخيلته بطل مسلسل تركي .
-يوه زلمنا العراقين ما يتحاجون اشجاب لجاب هههههه بس الحق يقال هو لبسة وطريقه حلاقته مطيته جمال قوي والا هو لو اجرد منهن  يكون شكلة عادي مو كلش حلو والعضلات المو كلش مبينه هم مطيته رجولة اكثر .
-اويلي
،،

الصبح راحت سما تقرة عنده مدرسة خصوصية انكلش واني كملت شغل  ودخلت اخيط بجامات هشومي المفتكه
دخلت تمارة وسدت الباب
-كومي عندي حجي وياج.
-اهووو خالة اذا ذاك الموضوع سديه
-دكومي

كومتني وكعدت يمها
- يخالة . لو تدرين اني اشكد احبج بهاي الدنيا ما اصدكين

اعيوني اتسعت عليها وصدمتي اكثر اتساع
- الله يا يمة حالج حال سما واكثر اخاف عليج من نفسج . يمكن ما عرفت اشلون اربيج على محبتي بس القسوة مجانت بقصد كره

سكتت ودنكت ممتعوده اسمعها تحجي بهيج لهجة
حطت ايدها على متني
- نيوفر خايفة يا يمة لا يجي يوم لا اني ولا ابوج يمج . تبقين يم نسوان الخوة ترة كلهن ينكلبن على الحماية حياية ما يفرقن عن بعض المهم عدهن ياخذن الاخوة او الابن من اهله ، منو لأيتامج لا وانوب ولد باجر عكبة رضوان اذا صار عنده جهال  صدكي نظرة ما يباوع لجهالج يحتار  بأطفاله
- خالة الزواج  مو حل همين يتأذون اطفالي 
- لا هذا اتكول عنه اميره حنين ويه اخته والي حنين ويه اخته  هذا  جنه تحويج انت واطفالج  . ولا  تخافين الحرمان الي عنده راح يعوضه بيهم هو اضاهر متعمد ياخذ وحده عدها اتلاثه بمكان الواحد  وكلهم اصغار حتى يربيهم ويتعودون عليه من الصغر . هو لقطه الج وانت لقطه اله . صغيره وحلوة
-خالة عوفج من ولدي اني ما اكدر اتقبل رجل والله صعبة
- يمه تاخذين عليه والله . قابل المرحوم جنتي اتعرفيه يا يمة
-ما اكدر
-لا اصيرين انانية اجاج ابو لجهالج لا اتخليهم اهنا ياهو الي يجي يحركهم ماعدهم ولي ثابت .
-اني وليهم
-انت نفسج مو وليتها يا عيني حرمة ضعيفه
سكتت واتقربت اكثر
حطت ايدها على متني
- يوم  راح احجي وياج كأم وبتها . ومرة لمرة
المرة من غير رجال مثل المهرة من غير خيال مثل الخيمة بلا اعمده اقل نسمه هوى  اطير . هسة بعدج اصغيره بس اذا صرتي بعمري اشوفين المر وتتندمين .
فكري يا يمة . 
-ها شكلتي

دمعت كلمة يمة حيل كلمة عزيزه عليه بيها حنية تضاعف حنية الكون كلها
اخذتني لحضنها ودفنت راسي بيه
ما اهتميت  ولا تاثرت بطرحها  لموضوع الزواج گد تاثير هالكلمة البسيطة جدا يمكن البنات يكولنها باليوم ميت مرة ومرات من  غير ما يحسن بحروفها ينطقها  عادية كلمة دارجه كعادة البشرية 
لكن عند الفاقدة الام هاي الكلمة ثمنها  غالي  ،
- كولي يا يمة موافقه
- افكر 
-ها صدك اتفكرين يعني بيج مجال
حتى لا تبعدني عنها هزيت راسي
باستني عليه وظليت بحضنها
منا من اجه هاشم  غار وهجم عليه يحضن وخرت  وطلعت . نمت بفراشي شابكه هاشم  الي يدفر و يريد يفلت نفسه. ورة ربع ساعه لو اكثر
اتصلت بيه اميرة ورديت خطية البارحة شلعت گلبها
الفرحه سابقة صوتها
-ولج الف الف الحمدلله لو ادري من البداية كايله لتمارة اقنعج  والله كل ما اريد اتصل بلينا واكول الها الرفض گلبي ما ينطيني
-هههه شسالفه
-خابرتها وكلت الها موافقتج الف الحمدلله
-ها شنو منو وافق اني كلت بس افكر
- ههههههه شنو اتلعبون عليه لو تشاقين خابرتني تمارة كالت موافقه هسة اتكولين  الهم  وخبرتهم  !

الو
الو
نيوفر وياي
نيوفر
نوفه

*
رائد
العب حديد بالجم ودكت عليه لينا ما رديت مشغول . عيني على التليفون من اجته اشعارات ماسنجر
- مبروك البنية وافقت  عليك 
تركت الي بأيدي واتصلت
-يا ابنية؟
-اخت اميرة
سديت الخط وكأن بداخلي معركة وانتصرت بيها
رحت  محتفل ويه نفسي و رفعت اثقال .

يتبع

بنوتات قلبي اليوم صح بارت واحد لكن مو بارت بارتين معا   مال اليوم و البارحة و نأسف على التاخير كنت حيل بطيئة  بالكتابة