رواية الرعناء والأشيب الفصل السابع 7 - بقلم زهراء العراقيه

صراعي السابع مع الحياة

ركضت للهول و الهبطة ضاعفت سرعتي شفته بزوية كاعد ..

-هاشم
التفت عليه،عمتي وراية

رجع صاح من البزونة خرشمته
عضيت اصبعي و كلمته بغضب
-ولك مطي هبطتني
وخر عنها خرمشتك شيطان وكاعد تتماطل وياها .
لازم بزونه صغيره حتى صوت مواء ما تموي كأنها مريضه وهذا لازك مدري شريد يسوي بيها ومخرمشته بوجه وبأيده
وخرتها عنه

- تعال غسل اديك تلوثت وكح

يضحك و يضرب بيه مسوي ايده ع شكل مسدس . لطمني اخر شي بوكس وجعني
-ولك ايي خرب ترة اكتلت
غسلت اله ،نزلته لجوة
-اليد توبتي اريد طوبتي)
-روح شوف وين شامرها
فوء فوء
يقصد شامر طوبته فوك
-وين فوك السطح
-لا اهنا اهنا
دخل للغرفة واشر ع الكنتور

يا شو ما اشوفها هاي صايرة ورة البطانيات . من يجي ابوك ينوشها

ما ما
رحت اخيط برادي عندي مال جيرانه . اني اخيط واساعد فيصل شايلة نفسي . ولو هو هليام ما مسوي سلف وعنده مبلغ ضامه يريد يشوفله فرصة يشتري عقار .
بس اني احس بوقت فراغ كبير فكعد اخيط

وكف يمي هاشم
وكام يلح واتحول الحاحه بجي زهكني
كومني بالكرسي ما وصلت . جبت سكملي يستخدمه فيصل بتصليح الكهرباء من المحولة عاليه .

رحت جبته صعدت دنوشها
ولك لا تصعد
صعد وياي هالاغم و صل يمي ويضحك عنده لعبة نشت الطوبة شمرته. ودنزل
يلا ويلك انزل
فاهي شلته و دنزل درجه درجه السكملي اتهزهز يضحك مكيف

نزلت
- ولك اجيت اوكع من وراك ..خواصري توجعني..
.
من ما نزل فيصل تأجلت فرحتي و تأجل أطمناني عليه وظليت انام وكلبي جمر  واصحى مشتعلة اتصل ما يرد .

؛
رائد

وصلت للبيت مسرع من سمعت بخبر امي مريضة
سالت لينا عنها الي اتلكتني بالاحضان

-حبيبي رائد والله الك وحشة

-لينا اشبيها امي

-ما بيها شي ماخذة برد واستغليت حرارتها المرتفعه وكولت الك حتى تجي وانشوفك .

اتعديتها ورحت لأمي سلمت عليها

- يمة الا اوكع الا اشوفك ليش يا روحي
تقلق راحتي عليك
-يوم ريحي بالج اني بخير
-خيريش مرتك واطلكتها لا تقبل اتكول السبب و لا هي فهمنا منها شي . فجئة راحت لهلها وانت طلكتها

افرك بجبيني المقتضب
-يوم اني ما اجيكم حتى لا ادوخكم وادوخوني بهاي الأسئلة انتهت علاقتنا وها هي .

- صارلك سنة مطلك يوم وعايش وحدك عزابي انروحلك للبيت ما نلكاك . نتصل بيك لو ترد لو لا
كحت
حطيت ايدي على جبينها
-يوم حرارتج مرتفعه . نامي وارتاحي حتى العلاج يجيب مفعولة
لاحظتها ازداد سخطها وحزنها

- لا تخافين عليه يوم اني بخير طول ما انت بخير
بس اتركوني على راحتي . اني احب الوحده .

.

تركتها وطلعت .
للينا كاعده بالصالة تقرة مجلة

- ضربتيها ابر لو علاج شراب

-ابر وعلاج

احس هم بلسانها كلام اتخاف اتكوله واطلع .
قابلتها بالكعده . اتقلب بالمجلة بشكل عشوائي. وعينها تتلاعب مابيني وبين المجلة

- سمعت خبر.

جاوبتها بعدم اهتمام

-لبنى انخطبت .
-ها يعني تدري بيها
-الله يهنيها
-ما ناوي تفتح كلبك الي ..

طلعت باكيتي . ورثت جكارة
- حباب لا ادخن مو زين ع الجنين . طفيتها وحل السكوت

قطعته بسؤالي عن زوجها المسافر يريد ياخذ أقامة ويسوي لم شمل وياخذها وياه للسويد على ما أتخلص هي الماستر

زوجها ابن عمي .

و اني النقيب رائد مناف . عمري٣٦ عام تابع لوزارة الدفاع احب القتال من صغري حلمي اصير مدافع . قدمت على وزارة الداخلية كنت هاويها  بس ما نقبلت بسبب عداوة شخص وية الوالد اتوسط يخرب حلمي بس ما استسلمت وقدمت
على وزارة الدفاع و دخلت دورة ضباط .

حبيت بنت خالتي وفضلت عليه احد ثاني لأنها ما حبتني ما حبت جديتي ولا ترجحي اعتبرتني شخص معقد وتزوجت واحد غريب مقارب لأفكارها المنفتحه اكثر من اللازم وانجبت منه اثنين بنات . لكنه بالتالي عرف عليها بنت وتزوجها وما تحملت ريما وطلبت الطلاق قبل اثنين سنوات اما اني تم طلاقي قبل سنة واحده ولهسة مدا اكدر اواجه نفسي حيل كارها لروحي وكاره حياتي الشي الوحيد الي مخليني عايش عملي وهم محارب بيه كل يوم انقل بكتر من الاعلى مني لرفضي وجود الفصائيين و عدم اخذي رشاوي .
من دخلت علينا الجماعات المرتزقة وبدت تتكاثر مثل الوباء علينا صرت اسعى انقل للاماكن الي اصير بيها مواجهات .
والدي مسؤول كبير متقاعد
واخي الكبير مسؤول ايضا بالوازرة
وخواتي واصلات
عندي اخ واحد اكبر مني
وثلاث خوات
اكبر شخص عدنا اختنا استاذة ورئيسة قسم تسكن بمحافظة ثانية ويجي وراها اخي واني بعده و اثنين اخوات بعدي اصغرنا لينا متزوجه وحامل وساكنه عد اهلي
،
لازم انتظر والدي بما أني اجيت لا يعتب ويزعل.
،
العصر

-رائد مرتك و شافت حالها انت اشوكت اشوف حالك
- بوية لا تندمني بجيتي رجائا اشوكت ما اني اريد . 

- عمرك ٣٦  سنة اشوكت اشوف حالك هااا ما اكلي اشوكت  اصير أب

كاعدين بالحديقة والجو  زين بس يخنك بسبب الاشجار وغورة ناتجة منها .صوت العصافير هم ساعد بمضايقتي صاير عاشق للهدوء

تحملت كلام ابوية على اعصابي
الشخص الوحيد الي ما اكدر احتد وياه حتى اسكته .
- قبل رافض تتزوج حتى لا تكسر بخاطر البنية . هسة ليش يا بوية عاجبك حالك هيج

واشر عليه

رائد . رائد
-ها بوية وياي

-لا  .. انت صدك حالتك ميأوس منها .
شال جداحته والباكيت وتلفونه
- انصحك تتعالج يم اختك احسنلك .

تركني ودخل مذهول
اجتني لينا
-ترة سمعتكم كنت دا اريد اشوفك محتاج شي تشرب  . وسمعت اخر كلمات

ابتسمت

-اويلي هاي لحظه تنحسب ع التاريخ التاريخ صارت رائد يبتسم

تلاشت الابتسامه

-لا لا دخيلك شقصرها مثل النيزك يضهر ابسرعه ويختفي واسرع هم ..

رديت واني اتمطى على الكرسي
- حلو الوصف بس وجهي مو ليل ولا سما 

- ضحكت

-وجهي صار قبر بوسط الارض ضام داخله شخص ميت

جنت سارح بالسما .

انتبهت لسكوت لينا الغير معتاد منها

صافنه عليه وحاطه ايدها على ذقنها

- شكو اشبيج هيج تباوعين الي

- تدري رائد كلام بابا صحيح

ورثت جكارة متناسي تحذيرات لينا السابقة

- ليش متتعالج يمي .

خزرتها وظليت صافن عليه متعجب على وقاحة الطلب
- احم لا مو قصدي بس انت تحمل الامور اكثر من اللازم يعني تنطي للناس حجم اكبر حجمها الاصلي واظل سنوات تنعى شخص تخلى عنك 

صرفت نظري عنها و انفث بالدخان
- تدرين شي
بحماس و انتباه هزت راسها وقربته عليه
-كول

-جيتي غلط لهنا .
كمت  فتحت قفل السيارة و اشرت الها تفتح الباب .

*

نيوفر

اصيح اصياح حتى اخليه يسمعني

-الووو  فيصل اشوكت تجي
يمعود هذا شنو يمك قصف
جاوبني بسؤال 
- امي امي اشلونها

-هاي يمي اتريدها
-لا لا ماتسمع تشلع كلبي سلمي الي عليها ودربالج ع الجهال
ما ادري ما ادري اشوكت اجي داخلين انذار
لا تخافين وبطلي خياط انت حامل لا اكتلين هاشم .  هاشم لا اكتليه .
صيح اخر كلمتين
كال اكو قصف قريب علينا جاي نسمعه بس مو يم المقر
شهر كامل اني داخله انذار .

بعدها خابر وبشرني بنزولة راح يسحبوه مناك فد فرحت  حيل  طرت بالعلالي طفلة وفرحت بجية العيد
،
رحت سويت دولمة وعمتي ماخذه الجهال عني حتى اشتغل . صدوك حماتي تزوجت من اشهر . بس اني بالبيت .
و طلعت اشتريت سفن وببسي يحبة ع العشا الساعه جانت ب١١ ونص الضحى
وعمتي تضحك عليه اتكول من هسة اتحضرين العشا خل نتغده بالاول  وكلتهم غده بيومها بتيته كلي ههههه لأن بالغت بالعشا وتعبت . سويت مطبك دجاج ومقبلات ويه الدولمة .
بتلاثه صارت هو وما اجه وهو ب ١٠ كال سحبونا ادري ليش لهسة ما اجه اتصل جهازة مغلق . اكلوبنا صارت نار عليه
صار المغرب اني كاعده  بالحديقة وابجي .

هاشم
- ماما ليث تبثين
حطيته بحضني واباوع للباب
باوعت للسما واتضرعت
-يارب خليه يفتح الباب عليه بهاي الساعه لا تفجعني بيه
اجتني عمتي
-جهازج جهازج افتحي خط
جابت الي تليفوني يدك متعرف تفتحه
-خاله هذا فيصل واخيرا

رديت مفجوعه حيل وما بيه اسمع صوت واحد غريب يكولي رجلج مات بحيث فتحته وممخليته ع اذني متخيلة الموقف
عمتي ولج ردي ياا
بصوت مليان خوف وحذر وكاني اذا نصيت صوتي الخبر الي اخاف اسمعه ما يوصلني

-الو
وينج فاتحه خط ساعه ما اتردين
-انت فيصل
- ههههه اشبيج فرفورة گلبي اني فيصل
-الله ياخذك موتتني هبطه
-شنو ولج
كمت ابجي وعمتي غمتني جرت التليفون مني
-ما عليك منها هاي ثولة اشلونك .
اصيح بصوت عالي حتى يسمعها عبالها مثلها ما يسمع
سلمت عليه واسمعه أساله اشوكت يجي

-يمه ترة هاي خابصتنا اليوم خبيصه عليك من العصرية لهسة مكابلة باب الحوش تعال ابسرعه لا أتتأخر
انتطني التلفون وراحت فرحانه
-الوو حبيبي والله مقصدي . بس تلفت اعصابي .عليك ليش تأخرت
- اتاخرنا الا وصلنا بغداد ورحنا ع السرية و بالكوة انطونا النموذج و جبت الراتب وسلمت سلاحي أتأخرت الا طلعت  هسة ميت من التعب اتعرفين شنو يعني ميت

-ها الله يساعدك ححضر الك حمام تسبح واتنام ولو جهالك مشتاقين الك

كلتها متعمده حتى اسمع منه كلمة مشتاقلج

- لج يا نوم اني ميت اتعرفين شنو ميت على ريحتج حضري نفسج وهم حضري الحمام ههههههههه

سده وطرت اطيور اني من اسبوع حافة
دخلت للحمام اربع مرات ليفت حتى بس جسمي اصير بيه ريحة صابونه
من طلعت ترست نفسي عطور و لبخت وجهي ولبست ثوب نوم بصلي و لبست روب فوكه
دخل عليه هاشم
- ماما اليد من هذا
اشر ع شفتي
-هم ناقص يا شريكتي تتحمر
ولي روح يم بيبي

طلعت جيس نفاخ ضامته عن البلوة هاشم و نفخته و حطيته ع الجرباية الي كاسر مراية عرشها هاشم بيك . و علكت النشره    .
من سمعت
- اجه بابا اجه بابا
هاشم انطى ايعاز النا بصياحه
طلعت اني همين مشتاقه
شفته دخل و هاشم لازك بيه وامه اتبوس بمتنه

وهو باس راسها وايدها  ونزل هاشم حضنها . 
هاشم يدفع ببيبته و حاضن رجلين ابوه اني يم باب الهول انتظر دوري .

شال الصغير باسه

واني بالاخير
باسني من راسي
وهمس التالي ربة عالي

بس اني ما اكتفيت وذبيت نفسي عليه حضنته لازمته من خصره واصل راسي لصدرة لأن حانية نفسي
.ودي ابوس كل شبر بيه
ايده، راسه ، وجه ،صدرة .
وخرني وهمس
مسابح رفرف
طبعا حيييل مشتاقه اله يحتار اشلون يحور اسمي ممقتنع بنيوفر كلساع دلع شكل بس ما يصيحني نوفة يدري اكرهه
دخل وراه اني وجهاله هم
بس امه مدخلت

-ملابسي كلها وصخه طلعيها من الجنطه
باوع ع النفاخ وضحك
وهاشم مقصر هجم عليه
-و حضري الي عشا ميت جوع
اسبح واتعشى

راح يسبح
واني و عمه نحضر  بالصينية كانها ليلة عيد وهلالنا فيصل بعد روحي
اتعشى وسوالف  وضحك ع مواقفه
- ولكم اني ابد ما شايف شخص ميت
رحت اهناك شفت العجب

اهنا اني وعمتي غيمت وجوهنا من سمعنا اكو اموات . وكلت بكلبي شنو شعور اهلهم هالشباب خطية

كمل وكال .
اسولف الكم موقف
سمعنا صوت رمي قريب علينا وهذا جان اول يوم النا اني وصاحبي
تدرين يمه شنو سويت
كالت بهتمام بالغ
-اي يمه ادريك سبع
- عفت سلاحي وركضت للهمر احتمي بيه.
شارد بطرك روحي
وكومني نايب الضابط بدفرة  الرمي مو علينا هههههه

متنا ضحك عليه
ما سولف النا عن الضحايا ولا راد يحبطنا ويخوفنا يحجي بشكل كوميدي يريد يطمنا

كمل عشى وهاشم لازك بأبوه لزك
اني شلتها اغسل المواعين
واسمعلك اصياح فيصل
- نيوفر ولج تعاااي

رحت اله صوته خشن يخوف من يصيح
دخلت

هاج ذوله حطيهم يم امي
كامو يتباجون شال مصطفى واني هاشم

حطهم يمها اتباوع اخبار

-على كيفك ويه فروخك يمه مشتاقيلك خليهم يمك

-تحجين صدك يمه ذولة قرودة لل١١ ما ينامون و اني شهر مستلك
حطهم وهمه يبجون ورانه بس يخافون يجون من ابوهم اخذني من ايدي ودخلنا غرفتنا

-الجهال فيصل خطية

نزع فانيلته
-اني خطية حسي بيه .
شالني واني ما هون بيه تعبان من السفر
كانت ليلة مميزة الفراق و الغياب واللقاء بعدهن يشعل جمرة الگلب والجسد ما يكتفي ولا يهون يترك حضن الحبيب
توحد عطر اجسامنا ورجعنا واحد
.
ورة نص ساعه نايم على ايدي يأن سودة عليه
ويتحلم . ممرتاح بنومته حطيت راسه على المخده وصفنت بيه
همست واني اصابعي اداعب وجناته
-طلعت احبك اكثر من روحي . انت اماني و حياتي وياك هي حياة خلافك ممات حتمي ،بسته
يخليك الي   .
نزلت من السرير سبحت وجبت جهالي يمنا صوفي نايم . بس هاشم كاعد  .

اسبوع واحد وهمين لازم يلتحق بعضي ويتركني و يرجع واحدنا ينشطر عن الثاني. اني عيني ع اولادي اهنا وهوو عينه ع سلاحه اهناك  .

.
النسوان ب ٥ الفجر تكعد اصلي واتنام الا زوجات العسكريين يكعدن يشوفن  خاف نسن يحطن كل غراض ازواجهم خاصة الي يداوم بغير محافظة .

سحبني من ايدي

واخذني لحضنه ولزم راسي .

بوسني

-اي ليش دتبجين

- تتأخر اهواي . مو مثل قبل اظل عايشه بقلق نفسي ها  وين نام ها شو اتاخر ما اتصل ها ليش جهازة طافي .. ها خاف بيه شي .شكو فكرة سودة تجيني
رجع حضني .
حسينا بحوسة
بابا
هاشم فز من فراشه .

بوسه ابوه وراح للهول امه تقرة قران
وكفتله من شافته لازم جنطته

حسيت باب غرفتي انفتح .  هشومي طلع وركض لأبوه
دنك اله فيصل و كعد ع ركبه

-اليد سلالة و ماتور(سيارة لعبة وماطور لعبة دراجة )

-ميخالف .
حضنه و هاشم حاوط ركبه ابوه
-ولك خنكتني
اني متحملت بجيت
اشوف ابني لازك بابوه
وخره وراح للحديقة
ودعناه .  وظلينا انباوع وراه وهو يمشي
دخلت للحديقة و  باوعت للسما لونها حبري بادي الصبح يشقشق علينا دعيت الباري
-يارب احفظه من كل سوء .

رجعت لحياتي من بعده خياط و جهال   . رحت لهلي يومين ورجعت للبيت ما هون اترك عمتي وحدها . وهمين اهناك ما اتحمل أشوف  تفرقه تمارة بين اطفالي واطفال اميرة .

فيصل محجوز مانزل بالعيد وما  نعرف اشوكت يجي

واني اذب حركتي ع هاشم وهو ممقصر حيل وكح .

ندكت بابنا الساعة ٩ بالليل
واحنه بس نسوان . ماعدنا رجل .
طلعت من غرفتي من الدك صار قوي حتى نفتح
عمة منو جاينا هسه ؟
عمتي تلبس بشيلتها
-انت لا اطلعين ظلي يم جهالج

وراحت تفتح الباب سمعت كلامها

حسيت بدفرة . اااه هاي شنو النونو اتحرك واخيرا

حسيت بحركه ثانية .. ظليت اتلمس بطني ومبتسمة الطفل هاي اول حركات اله  حبيبي . توني اكلت نص الخامس .

عمتي نادت  ادخلي يمه اجو عمام فيصل

دخلت لغرفتي وهي دخلتهم  واني بداخلي نغزة

سمعت صوت عمتي

-يبووووو يبووو
هذا صوت نسوان قبل ينذرك بمصيبة حتميه يخليك تجمد بمكانك من تسمعه وتسمع حدته و رفعه وهو يصيح يسمعه سابع جار و يطلع للانذار .
الصوت اكرر بس ضعف تيارة و انخمد فجأ واني نفس وضعي جامده بمكاني مكدر اتحرك . وجهالي ختلو وراية
ذبيت بس عباية عليه و فتحت باب  غرفتي  بس عتبت الباب
سمعت عمتي بصوت ضعيف
- فيصل راح ... اوليدي مات .  اوليدي راح
تنعى بصوت كلش ضعيف دخلت . 

-منو
مات
عمامة وطوا راسهم
صحت
-ردوا عليه منو مات  منو مات منو مات
ويه كل كلمه اكولها اضرب خدي بأثنين اديه و صحت من غير وعي مني . 

عم فيصل ابو تمارة كال
- استشهد اليوم  الضهر هو وجماعته بقناص  وقبل ساعه اتصلوا بينا بلغونا

خبر مثل هذا كلش قوي على مرة عجوز و مرة حامل بعدها ما مخلصة  ٢٢ 

احجي وياهم اصياح و بجي ممصدكه الخبر .  .
ورة فترة معرفها اشكد مرت دقايق لو ساعات ببيتنا  نسوان و جارات .. 

اني فقدت الشعور بالعالم كلة
اني بغرفتي وهم ما اعرف منو حطتني بسريري وغطتني وهم نايمه لو كاعده ما اعرف بس اتخيل بوجه فيصل كدامي .  طلعته من البيت ضمه ابنه اله .
ابوية فجأة شفته يمي اشوكت اجه ما ادري كاعد يمي .
ويباوع لعيوني .  شفته تتحرك يمكن يحجي يمكن جمعت الكلمات ونطقت

-بابا يكولون مات

- بوية وحدي الله

سكتت ورجعت للاوعي من هم أكد الي موته
ضربني بخدي ضربات خفيفه
- انت زينه .. 
عبالة اعاني من شي
-  هو انتم متأكدين .  بلكت يطلع خاتل جوة الهمر
-بوية رجلج رايح لحرب وراح شهيد هنيالة ع الشهاده

هم سكتت
مكدر اوصف اي شعور اكون كذابة اذا اكول الكم اني اشعر بهذا اليوم فقدت شي اسمه شعور اتجردت منه

ثاني يوم صحيت .. من النوم .لكيت نفسي بغرفتي

اي بلكت حلم . دنزل من سريري و اشوفلك خالته  نايمه جوة سريري بالفراش يم هاشم .

رجعت غمضت اعيوني جزعه
طلعت شفت عماته و امه كاعدات مهدود حيلهم ..

بس شافتني امه صاحت

-ولك عفتلك مرة حامل ورحت المن يا يمه ابنك ما شفته راح يطلع للدنية يتيم .
اتوالت الاصوات تعلى واني وياهم
حتى كمت الطم من غير شعور بخدي
الفاتحه كلها اني مأخذوة من الصدمه بس الطم واصيح منا من صوتي انبح .

رحنا ثالث يوم للقبر الرمزي الي سوه اله ما حصلنا جثته اقل حق النا . الدولة مكدرت اتسوية الجثث اخذتها داعش وما نعرف مصيرها 

رحت وياهم

اباوع للقبر الي مسويه . ولأسمه لو القهر حاطين ببوستر صورته اشطولها ..
كعدت يم القبر يا الله هاي صورته بيوم عرسنا . لابس قاطه ما لكيتوا غيرها .
ابجي واملخ بنفسي والنسوان توخر   بيه هذا الحجي الغروب رحنا اله بعد ما خلصت الختمه

الطم واصيح ..

منا من سيطروا عليه واحد بس كدر يلزمني و اهدأ بين اديه الي تترجاني اكف .

كان والدي جاي ويانه اني واميرة وتمارة وامه وعماته وخالته . و عمه والد تمارة

مثل الجثة لا حول ولا قوة الي بس اعيوني اتباوع للمكان ..

-بابا بلكت مميت ليش هيج اسون بيه هذا القبر مو اله بابا

ساكت ما يحجي و ضمني لصدره .

باوعت لوجه بابا  بلكت الكه الامان الي يكلي يرجع . لن هو الثاني دموعه غاسلة وجه مثلي .
سكتت وغمضت بآلم كبير
كالوا خل انروح  . وادعوله بالرحمة  قبل لاترحون اقروة الفاتحه على روحه

ابوي
-يلا بوية انروح ...
ثبتت رجليه بالارض ما اريد اروح .
زاحني وادرني لكدام غصبا عني .التفتت
عليه على صورته  أتخيلة هو واكف بطولة وناجيته يطلع منها ويجي وياي   .

و رجوت عيني أن تكف دموعها

يوم الوداع نشدتها لا تدمعي

أغمضتها كي لا تفيض فأمطرت

أيقنت أني لست أملك مدمعي

ورأيت حلما أني ودعتهم

فبكيت من آلم الحنين وهم معي

مر علية ان أودع زائرا

كيف الذين حملتهم في اضلعي ؟

راسي ملتفت للخلف واباوع لصورته وهي تبتعد عني بين القبور وابوية يمشني وهو تمارة عنوة ..  وغادرنا مقابر النجف ..

اول ايام جنت بأثر الصدمه متبنجة بعد اسبوع البنج راح  .. مثل المسوي عملية توني حسيت بالألم  من استوعبت رحيله
.
واول عشرة ايام اهلي يمي

بس بعدين هاجت المواجع يا فيصل
فكري بيك . كلساع اقنع نفسي اليموت ما يرجع ولا اشوفك بعدهذا الحزن ثقب نحري ثقب من الوريد للوريد وخلاني انزف من غير مداوي . دومك انت الي جنت البلسم الي داوة الي جروحي ونساني ايام سودة مرت عليه . بس اشوفك كدامي اكول انت تعويض من الله
ليش الله صرف تعويضه عني ..شنو خطيت هالمرة ..

جزعت والجزع مر

ايام اسود من الليل . العتمه اظوى منها

كرهت شي اسمه استشهاد  لا ارتاحيت من انولدت يتيمه و من ازوجت اترمل ليش يارب هيج . يتمتني من جديد
مرن ايام
واني حيل جزعه وحتى الكفرة ع لساني اذا عصبت اساسا من اصلي معصبة
وتلفانه حيل

فتحت الكنتور اجيت اقلع اليده بأيدي
دورت ع ثوب اسود هوست الكنتور الا لكيت ..عيني صارت ع خانه ملابس النوم

طلعت روبي الابيض الي لبسته بليلة العرس
اخذته بين ادية و زارتني طيف ذيج الليلة

مطفين الضوة . القبل اخذتني لعالم ثاني ناعم بنعومتها وبرقتها الي كان يبادر بيها خايف عليه من هلع اول ليلة

شكهت من رفع الثوب
لا عفية
رجع يقبلني بعنقي ينسيني خوفي .

كان حيل حنون وياي..
ضحكت بدمعه من اتذكر مرات تطلع مني من غير قصد صيحه . او صوتي يعلى .
يزعل اشوية و وحده يجي ناسي الزعلة .

يحويني بحبه وما بيوم ياخذ ع تصرفاتي
ولا يزعل صح عصبي و اذا عصب يفقد . بس عمره ما غلط ولا شتم .  حبيبي ونفسي بالدنيا .

رحت لقميصة اشم شم بيه. ما بيه ريحته . ماخذ ريحه الكنتور  .

حرام عليك انت الثاني اتحرمني منه
شمرته ع الارض بعصبية

شهكت
يمه اسم الله
رحت ركضت اله شلته
-اعذرني والله من اعصب افقد . انت تدريني اشكد احب لباسك.

.

طلعت جنسيته وابوس بيها  

صورة فردشتها  و ادور صورة بيها ضاحك

طلعت وحده لازمني من خصري هاي بصباحيتنا

.
صورة لخ شايل صوفي . وهو عمرة يوم . هاي اخذتها بتليفون و نسختها عند المصور حيل حلوة .
عفوية جان يأذن اله

.
نايم ونومه ثكيل
فيصل
فيصل
اكعد
هزيته الا كعد
-حباب كوم جاي اولد ..

صحصح  باوع للساعه بالثنتين الضهر .
كام 
وين امي

- امك كلت الها كالت ما اعيد مأساة هاشم راحت اجيب الجده وتجي لهنا اتولدني .

توكم صحيتوني ولج جان اوصلهاة
بصياح
-ساعه نصحي بيك ما تقبل تكعد
ااااااخ يمة
اشتد عليه الطلوك
وكمت اصيح

-يمة وينج ....تعالي يمة ااااخ
اطلك 
اااخ ااخ 

اااه يوم وينج

-اني يمج كولي شتردين

حضني دفعته
مو وكتك اااخ كله منك اكررررهك ولللي عني

يوم وينج خواصري موتني ضهررري ..

برتباك
-شسوي شسوي  اعتبريني امج يعمري
صوتي كعد هاشم يبجي

شاله واحتار بيه

-خرعتي الولد
حطيت ايدي على حلكي حتى لا اخرع هاشم اكثر
حطه يمي وعاد كلامه
-اعتبريني امج لا تبجين
-رجلية وكف الدم بيها و ضهري الم اااه

كعد يم رجليه و يدلك بيها حسيت اشوية هون عليه الوجع ..

اديه هم دلكها الي ارتاحيت و كمت اكتم الالم حتى لا اقلقه اكثر . 
اجته امه   واخذوني بالهول وسدوا الباب بس اني وامه والجده .

ولدت ابسرعه اني ولادتي طبيعية من غير لا ابر ولا مغذيات صناعي .

انتهت الولاده
و طلعت الجده . 

دخل هو مسرع  بوسني
ويعتذر
الله يساعدج
امه كالت كله بأجر عند الله اجر كبير الها
ولو اتموت وهي اجيب شهيده
- اسم الله يمه شنو هالفال اتكوليه بوجهي . 

ظل حاير بية ونسى الولد ورة ساعه الا شاله جنت ابلغ  اهلي . خلصت مكالمة و وجهت كامرة تلفوني  عليه والتقطتها .

كان اخر أذان يأذنه لطفل . منو يأذن لأطفلك الجديد ؟ 
منو يطهر ولدك مو جنت ناوي اثنينهن سوة حتى اشاقيت وياي وكلت خليه من نعرف جنس الثالث اذا ولد نأجلهم من يجي ونسوي تطهير جماعي ..

أقسى المواقف علاقة سنين تنتهي بلحظة !

يتبع
هذا البارت صراع الأحزان . طويل حتى يختمها ..

بفضلكم وصلت للمرتبة ال٥
شكري الكم🤝 و قبلة مني😘 و برافو👌