رواية الرعناء والأشيب الفصل السابع عشر 17 - بقلم زهراء العراقيه

مبارك علينا المركز الاول لقصة الرعناء والاشيب
بارت هدية

رائد
أومن  اني بمقولة ؛؛ كن صبورا فالاشياء الجميلة تحتاج لوقت،، لكن مو كل الي نؤمن  بيه نسويه مرات تجري الامور على ما تشتهي الرغبات ، اذا احجيها لأي عاقل ما يصدكها رجل اعزب وبحضنه بنت هو رايدها  ما يتقرب الها ! ، الصبح ما راح يجي ابسرعة ولا راح يشرق مدامي منتظرة ، اباوع الها نايمة وغاطة بالنوم براحة، وجهه هادئ ومطمن بالله هذي تدعي انها ما ماخذة علية زين اشلون نامت بحضني لعد ! كلشي  بيج متناقض يا نوفة وشكلي راح اتعب اهواي وياج ، غمضت عيني متاخذ نوم وايدي خدرت او نملت حاولت ابعدها عنها هي اتحركت عبالي صحت لكنها اضاهر نايمه درات نفسها موليتني وجهه و الخطر كدامي صار قفاهه و ما يحمل من فتنه نزلت من السرير خلعت الفانيلة وخل يحترك الوعد بالجحيم ، ما صحيتها ولا اتقربت من وجهه لا تصحى ، غدرتها بنومها خليتها اتحس هي تحلم بلمسات تنعش اي انثى  ،

**
نيوفر
على الرغم من نومي الثكيل اذا تعبانه ما اصحى  بسهولة بس حسيت بلمسات ، اعيوني اثاقلت اريد افتحها مبيه ، هذا هو حسيت وصحيت من اتمادى بحركاته لكن مكدرت افتح اللمسات كانت جديده عليه ومشاعري بصراحه راغبة الها سوة اشياء بعمري  ما عرفت هي تصير بين المزوجين ، كل الي اعرفه عن العلاقة الزوجيه هو الرجل لازم تغريه وبعدها يتم الامر وخلاص ماكو اغراء للمرأة  من قبل الرجل اليوم الا كتشفت انو المراة هم لازم تداعب !؟ وعدها نقاط ضعف !
لهذا حتى اكتم رغبتي ظليت مغمضة وجسمي غدرني من استجاب اله وصار زوجي !

**
سما
اريد انام ما اكدر تعبت نفسيتي مدري  ليش التفكير الليله ارهقني صديقتي واختي نوفه الي حيل اتعلقت بيها من رجعت النا ارملة راحت الليله واعرفها مو هلكد راغبة بالحياة الجديدة  بس حتى اسكت الحلوك و اتسوي مثل الناس ما يكولون ، واني اهنا امي مو من النوع الي اصادق البنية لا بعيده عني ، واحلام حيل ما متقبلتها واكرهه حتى رضوان مبين لهسة ما صافي باله ولا رايد رجعتها ينام بالاستقبال هو بس بابا ورطه من قبل يرجعها حتى لا يكسر كلمه بابا قبل وسكت  باجر يفك الجبيرة وعنده علاج طبيعي  خطية واني اخر امتحان الي باجر يعني حظ حظي طايح وما نايمه
كمت شفت اطفال  نيوفر اووف يابة والله كسروا خاطري
.
كعدت الصبح لكيت هاشم  جاي يمي ونايم فديته بوسته
وكعد
-ماما اجت؟
وباوع لسريرها الفارغ

- لا حبيبي اليوم اتروحالها انت

**
نيوفر
شمس الصبح بدت خيوطها تزعجني فتحت ما لكيته يمي اني حسيت بيه من كام سبح وقت الصلاة ورجع نام بعد ما صلاة و من كعد قبل اشوية وطلع همين اصلا بعد الي صار ما اجاني نوم هو باسني من خدي ورجع حضني ونام واني دموعي على خدي وبالكوة كاتمه العبرات لا يسمعني بالليل ،
كمت للحمام و لبست ثوب  الصباحية ابيض قريب للحليبي و حليت شعري واصل لجوة خصري بس خفيف مو ذاك الشعر الثخين . حطيت مكياج  خفيف حتى لا ينفتح عليه السان تمارة البارحه شبعت منها نصايح ع العناية بالشكل والهندام ، بعدني ممكملة هو دخل
يمكن دخلت وجهي بالمرايه من الخجل الي صابني من شافني بعد الصار

- صباح الخيرات

دنكت وجاوبت -صباح النور

وكف خلفي وحط اديه على امتوني
- صباحية مباركة عروستي
حاطه كف ع الثاني و وجهي يرتعش حسيته دا يذكرني بالصار
- هاي شنو على المراية
خلاني ارفع نظري عليها لكيته يباوع الي منها ومبتسم
باس قحفة راسي وكال
- حلو خجلج بس لا يزود اكثر
كومي وياي ، شنو راح نتريك لو اتحبين نطلع ناكل برة ؟
- اهلي
بعدني ممكلمة دك الجرس
-اهلي عادتهم الصبح يجون ويريكون العرسان
تركني كاعده بالصالة  وراح من غير ما يكول شي بالفعل طلعوا همه رحب بيهم وباركوا النا ، بابا وتمارة و احلام ،من شفت وجهه اتفألت بيوم  نحس  ،
اتريكنا سوة  وتمارة  بس اتباوع الي وتبتسم مدري اشبيها ،  واحلام  خزتني عينها ع كل شبر بالبيت وتمارة طبعا متحجي وياها حتى اتعجبت من اجت  واحنه لا اني ولا تمارة نحجي وياها بس بعد حكم بابا يريد يرجع العلاقات

بين ما بابا و رائد يتبادلون الحديث
احلام
-نيوفر هاي ليش المطبخ ع الصاله ريحه الطبخ تخنك

صوتها قاطع حديث بابا المزعجة و بس اتريد اتخليني احجي وياها
جاوبها رائد
- هذا المطبخ ما حاط بيه الطباخ ، قريب ع المنور حاطه المطبخ الحار  ورجع كمل بابا حديثه وياه

تمارة
-كومي يمه وياي نكف المطبخ
ادخلت احلام
- عروس واني المن جاية
كعدتها تمارة بخزره و رحت وياها
اتشاور بيه
اشصار
- كلشي صار خاله

-اها يعني ما استثولتي

- استثولت بس هذا ما فاد وياه  اشرت بعيوني عليه واحنه يم الكاونتر ونبسبس
وهو عينه ع بابا
ضحكت تمارة وكالت مبين حمش راح يشكمج
عزلنا المطبخ
- خاله اشوكت اجيبون جهالي الي
-خليهم باجر
-لا فدوة والله  روحي ذابت عليهم
- اخوج علي العصر يجي يبارك الج هو وخواتج وحاتم ادزهم بيدهم .
راحوا اهلي ما اتاخروا واني عفته يزتت بيهم ورحت للغرفه الي كال الي مخصصها للأطفال كدام اهلي  . دخلت لكيتها تخبل سرير بلون الازرق بيه فرشة سبايدرمان و الثاني اخضر بيه سلحفاة اضاهر لصوفي و سرير خشبي شبه الكاروك مبين لتوتو الصغير ليش حاطه اهنا توتو ما انيمه بعيد عني ، فتحت كنتور هاشم لكيت  ملابسه بيه بعد روحي جايبين غراضهم ويه غراضي ومبقين الهم بس كم غيار يم اهلي . اشمشم بيهم وابوس واتخيلهم من لابسيهن انفتح الباب وبس راسه شفته مده
- شسوين اهنا ؟

مباوع بوجه ابد بداخلي ثورة ضده كلت
بصوت باكي
- رايد شي

- ليش البجي ،
حضنت اوفر توتو
- ها هيج القصة . راح اطلع  اجيبهم واجي

- العصر يجون  لا ماكو داعي

-زين غيري ملابسج راح نطلع

من غير ما أسال واعترض رحت للغرفة وقفلتها وبدلت

دكها وفتحتها كنت مكلمة لبس بنطلون و قميص سمائي
- ليش قافلتها
رحت البس حجابي مجاوبته

اخذ ملابسه ومدري شنو حجى وطلع يغير برة!

طلعنا . افتريت وياه بالاسواق و اخذني سينما و ختمنه الطلعه بغدة ورجعنا بصراحه تناسيت شوقي للاطفال و حزني والنكد كله طلع بالطلعه ، رجعنا وكت الصلاة  هلكانين
شفته يصلي دخلت اسبح و اريد اتحضر من هسة للعصر واكشخ باحد الاثياب الجديدة اجاني واهس رهيب ان اعيش هاي التفاصيل من جديد ،
طلعت من الحمام لابسة ثوب سمائي متكلف اشوية بالشغل
لكيته على السرير كاعد يخابر وكله سيدي وامرك سيدي ،
من خلص
شافني انشف بشعري
- وكف يمي واخذ الخاولي
- ليش ملابسج كلها هيج ؟
-شنو محلوة قصدك ؟
- ثكيلة حيل بالشغل واني افضل لو ما اتلبسيها بأوقات الراحه
-اي راحه هاي ؟
ابتعد عنه واشرتله بايدي
- انت خلفت بوعدك وهاي ما توقتعها من انام هيج اسوي ما ترجيتها منك ،
جنت حاده و احجي من بين اسناني
على الرغم من ان الوضع عجبني بس ما اريد ابين اله اني راضيه و يمشي افعاله عليه 
ما حجى و ظال مبتسم كرصني من خدي
- مجنون  ومخبول الي كدامة عسل مصفى وما يضوكه يا عسل غمز الي وشالني

-لا لا راح اوووكع ...يمممة
بصراحه كلامي جلفي حيل
وخوافه
نزلني على الاريكه و ما تركني بحالي مثل الساني يطلب منه و جسمي  العكس !

العصر اجوني اميرة و سما خطية اليوم الصبح ما اجت جانت تمتحن و علي
واطفالي  فلذة الكبد بحضني وتوتو ما ترك صدري بس يرضع رغم هو ياكل بس يبقى بعده رضيع فارق يوم كامل حصن امه وهاشم  مغلس عني يدعفس بالبيت
وصوفي لزك بية شو مستحي اليوم من رائد ،
بالليل  عود ردت انيمهم بالغرفه مالتهم لل١٢ ما يقبلون ينامون بس توتو نام
ورائد لعب وياهم ببداية الليل وراح لغرفته ورة العشة كال نيمهم من وكت وهاي صارت ١٢
،
الصبح كعدت ع منادات رائد الهادئة
اشرلي اسكت و كلي كومي
همست
-بيش الساعه ؟
- ب ٣ الفجر

اضاهر نمت ويه اطفالي اجاني رائد ب ٣ طلعني من الغرفة

الصبح كعدت لكيت هاشم حاضني و توتو يم رائد وصوفو جوة رجلية يا ذولة اشجابهم ، رائد مركون ع حافة السرير و رجل توتو على خصرة ، ابتسمت على منظرة هاي مشكلته منو كال هالاشيب ياخذني ، اسحبت من يمهم سويت ريوك ورة اشويه حسيت بواحد طلع من الغرفة . غسل وكعد كدام الميز
-اشجاب الاطفال يمنا ليش احنه نسينا نقفل الباب ؟، ع العموم اسفة بس ترة مكد......
سكتني من كال اني جبتهم الصبح
-ها ؟
-خطية نامو وهمه مطمنين انت يمهم
لا اتحطين اهواي زيت للبيض يأذيني .
شنهاي ابسرعة غير الموضوع
طلع تليفونه يكلب بيه رجعت للمطبخ الحار كملت و جبت البيض اله
صفن عليه وما حجى شي
بس لاحظته ما اكل منه خبز و كيمر فقط
-ما اتحب البيض ؟
-ما احبه بالبصل ،
- ما اعرفك شنو تحب وشنو لا
- بمرور الوقت اتعرفيني .
كالها من غير اهتمام ، وهو عينه مركزه ع التليفون ، كعد هاشم و صحت وياه ضوضاء اولها ما يحب يغسل وجه وبالمصايح الا اغسله و الريوك  يظل ينعثل وبعدين ما ياكل وصوفي من الصبح كعد يريد موطه وهذا اليوم الثالث من الزواج قضيته ويه هذا وذاك و رائد هادئ بطبعة حتى من يلاعب هاشم بنزاكه معقولة هذا بالجيش؟
اهلة اجونا بيومنا الثالث وبدت الناس من صفحته تتوافد علينا  ، لينا حسيتها اتريد ترجع العلاقات مثل قبل و كانت حيل متأسفة ع سوء الفهم الي صار كالت عدها مشاكل خاصه بيها اثرت عليها بالخطبة
مر على زواجنا وقت و حياتي صارت عبارة عن اولادي ورجل جديد دا اتعرف عليه بالتدريج واتعود ع طباعه هو الثاني  ،احنه النساء العراقيات مهما اختلفنا بشخصياتنا نتأقلم مع كل تقلبات ادم يعني المرحوم عصبي و واضح  اتعودت عليه ، وهذا هادئة وغامض هم دا اتعود عليه بصراحه حبيت اهتمامه بأولادي من حيث الترتيبات الي يسويه الهم بس احسه ضوضائهم تزعجه بحيث يبتعد عن الاصوات ويختلي بنفسه بالغرفة وحيل نازك وكمت اخاف لا قرودتي تكسر تحفيه او يبقعون السجاد بالمختصر ما حسيته بيتنا ابد ومتحنطه بيه بس بالليل اشوية يطلع عن حبسته ومرات يطلعنا . هو حباب وذوق ويانه ما انكر لكن اكو امور دصير احسه بعيد عني واني بعيده عنه ، خلصت اجازته و عنده انذار وصلني لهلي ابات يمهم ما يجي هو للبيت ،
واتلكوني بسرد خباثات احلام عليهم ..
وتمارة مكيفه اتكول لحد الان رضوان ما يلفي غرفتها ويسمعها كلام هو ما يريدها

صار الليل و احس بوحشة كل يوم هيج وقت يطلع رائد من انعزالة عنا و يجيني يدلع و يسهر وياي اليوم نايمه وبوجهي سما اشوخر
ابتسمت على شكلها . قررت اكوم اكلي شي عسى ما ب ٢ جعت بعد واني متعشيت . جانت الساعه ب ١٢ ونص ،
رحت للمطبخ ع ضوة الثلاجه طلعت جزرة وكرطتها ، سديتها واتلمس وامشي طلعت من المطبخ اكو ضوة ضئيل من فوك الدرج حاطينه كدام غرفة رضوان هو يدك ع الممر اليم الدرج بطلت اتلمس وشفت احلام دتنزل
من شافتني عوجت حلكها ورجعت صعدت هاي اشبيها هاي ؟

مر يوم ولكفتها واكفه يم غرفة علي

- شسوين
نزت
- اجيت ادك الباب اخذ ملابسه للغسل
- وأنت  شعليج  هااا ؟؟

ما حجت وراحت يبوو بس لا هاي العوجه راح ترجع لسوالفها المكسرة وربي لو ما مراهقة وبنفس المرحلة  الي غلطت بيها اني جان كلت عليها كلشي لأبوي واخلص منها ..
خابرتي بيبية الجهال وفد مستحية منها اكيد درت من تمارة ما جابت طاري الموضوع بس سلمت على الاولاد وطلبت مني من اتروح هي لحماها ابو تمارة اجيبهم الها من هي اتحدد  كالعاده ،  رائد يتصل بالليل يطمن عليه

اتصل بيوم وجنت بالمطبخ

- هلا رائد
- اشلونها النسمة
-هههههه اني نسمة
- نسمة عواصف ورعد
ضحكت
-ههههههههههه اشلونك اليوم رايق.
- اي اشوية الي خفت المهمام تعبت منها ، اكلج احتمال انزل باجر ، اذا انزل انطيج علم اجيج اخذج

-اوك
-مشتاق الج ..
سكتت

**
رائد اشتاقيت الها من صدك وكلت الها كالعاده ماكو رد مبادرة من طرف واحد فقط هذا الشي الي محيرني احسها ارتاحت وياي بس  بافعالها  اشوف العكس ، حتى حيل تحسس واخاف ابدي رأي بشي يخص اطفالها وصارت فجوة وهاجز خوف لا ابادر بفعل تحسس منه لهذا جنت بالأيام الفاتت تاركها على راحتها ، لكن بالجايات لازم احط نظام لحياتنا واشلون الشراكه اصير بيها ،
**
سما
كعدت من النوم محتاجه حمام ضروري

رحت اهرول مسرعه اله كملت وطلعت مريت من غرفة علي مفتوحه

ردت اسدها اله ادري بيه يحبها مغلقه عليه بس من باب الفضول اريد اشوفه كاعد اشعجب تاركها مفتوحه ،

وانصدم بشي ما توقعت اشوفه
احلام دتبجي وكاعده على الارضيه و مقرفصة نفسها و هو واكف كدامها حاط ايده على حلكة .
علكت الضوة حتى افهم اكثر ولو هي متحتاج فهم ، باوعت الهم مشمئزة وعلي اجحظت اعيونه ابسرعه طلعت وهو وراية
-انتظري . انتظري
عفته ودخلت لغرفتي
ما حاول يجي وراية لا ينفضح كدام نيوفر .

حطيت اديه على حلكي اكتم صوتي وابجي شسوي ياربي . بس صور رضوان المغدور كدامي لازم هاي ما اظل يمنا ولا بيتنا وحتى علي كرهته .

يتبع
تصويت بنواتات ع هذا و 16