رواية الرعناء والأشيب الفصل الثامن عشر 18 - بقلم زهراء العراقيه

نيوفر

كاعد يمي  على السرير ومربع و اني حاطة راسي  على حضنه و اصابعة متخللة بين خصلات شعري ، وكل شوي يدنك ياخذ بوسة مني
حسيت احد يصيح عليه  نيوفر
ولج اصحي
الصوت يبجي فتحت اعيوني
بس كفشة كدامي اشوف
فتحت  ضوة التبلام
-ها شكو؟
سما ليش تبجين فركت اعيوني وكعدت مطلعه رجليه من السرير ع الارض
كعدت يمي و مستمره تبجي   واني توني استوعب جنت احلم وسما صحتني

-گلبي حيوكف شكو ولج

- علي والجايفة احلام

تضاربت دكات گلبي مثل الهاون من ينضرب ويطلع صدى من سمعت سيرتهم
- شنو شفتي اشبيهم

-سوو سوة بنص الليل كاعده يمه و وضعها متكهرب
بالكوة فهمت كلامها اتقطعه نواحيها و بجيها
-اش اش لا يكعدون الجهال
اسكتي كافي .

انطيتها كلنس
- باجر من الصبح بلغي امج تتصرف وياها  و ويه اخوج الشفية
تنهدت والحسرات كمت اجرها جر على اخوية رضوان
**
سما
مشيت بشور نيوفر كعدت الصبح ولو اني يمكن نمت ساعة لو اثنين . غسلت و انتظرت امي تصحى من النوم هالمرة معزمه اكول الها شفتها دخلت اخذت مجانه اتريد تعجن ما اصبح امي
- كولي لأخوج ايمن يكوم يجيب صمون الخبز كضى

-يوم تعالي اريدج بسالفه
وكفت وراها و لزمتها مز زندها توكف التفت عليه وابسرعه لاحظت اعيوني الذبلانه
-اشبيج يوم
اخذتها من ايدها كعدتها ع الميز
- اشبيج ولج واشعندج كاعده من الصبح مو عادتج
جريت نفسي والبلغم نايم بزردومي
- يوم البارحة شفت احلام وية علي بالغرفة
اخذتلها صفنه الا استوعب
ومن استوعبت كالت عيدي عيدي سردت الها الي جنت شاكه بيه وحتى من نوفة لاكفتها اتباوع اله بالحمام لحد ليلة البارحة امي طلبت مني وصف دقيق لحالتهم حتى تفهم
-ما ادري يوم جان ضوة نوم مو ضوة قوي
-يعني منازعه شي احجي ولج
- ما ادري بس يمكن حجابها واصل لنص راسها
-اهاا ، الكلبة هاي والله جنت ملاحظتها بس اجذب نفسي اكول زعطوطة ما تعرف الاصول من تجفت عليه لو من تتلوك اله الحقيره لايفه على اخوج اني اعلمها ،

اخذتني امي وجفتنا على غرفة علي
لكيناه كاعد ويدخن
-ايا كلب اتريد اتموتني ناقصة عمر . فوك ضيمك ادخن

فز من مكانه وطفى الجكارة الغرفة ريحتها تخنك من الدخان
- يوم

كالها واعيونه تتلصلص بينا
سألني
-شنو كلتي الها
-كلت الها كلشي .
- يوم والله العظيم ماكو شي بينا
سدت الباب امي وكالت احجي ولك
- اني اعاملها مثل سما عادي اشاقيها جنت و اضحك وياها والله ، ما بنيتي سوء والا مباوع الها نظرة دونية
-لعد ؟
اني اهز برجلي ومتوترة يارب يطلع كلامه صدك ، كلبي مصدكه مبين يحجي صدك وبحركة ويباوع بعيونه من يحجي دليل هو صادق ما يتهرب
- بفترة كامت تشكي الي اهمال رضوان الها واني اكول الها شي طبيعي كلنا هيج وعادي . شفتها اهواي تحجي اسرارهم حاولت انبها حتى لا تطلع زايد حتى وصيت رضوان عليها والله جانت نيتي خير ووالكاظم ما مباوع عليها ولا بالي

صاحت بيه امي
-كمل لا تسكت
- قبل لا تزعل شفتها طوختها جانت بس تسال  عني اذا اتاخر لا  انوب كامت اتحاسبني و تزعل اجاهلتها زادت واعترفت الي هي ما اتريد رضوان وتحب واحد غيره . عرفتها تراهق بس ما اهتميت ، بعدين اعترفت الي هي ابوها جبرها تقريبا و وافقت على رضوان ما اتريده جبير.
هذا الحجي مرة سما شافتنا سوة بغرفتي هم بنص الليل
-اي اذكر وكالت افرمت مدري شنو وما عبرت عليه
امي تضرب على صدرها واتكله كمل يمعزة ليش ما حجيت الي ؟
- خفت لا تكبر واتجاهلتها والله استحيت من رضوان اكبرها واوصلها الج
-كمل
كعد على السرير ومدنك ويحجي

- من رجعت النا بعد الزعلة اني ما طايقها ولا احجي وياها وانتم تدرون ،البارحة بالليل ندك بابي فتحته لكيتها بوجهي دفعتني ودخلت
تتوسل و تبجي ما اتريد رضوان واعترفت الي اتريدني الي
جنت شاك الي تقصده اني بس احاول اجنبها .

طردتها كعدت تبجي وفتحت الباب كله حتى تحس وتطلع زهكتني ودخلت سما
مو جانت الباب مفتوحه سما لو لا  ؟
هزيت راسي باي
-سمعتي يوم لو عدي وياها شي اخليه مفتوح وافضح نفسي ؟

امي حمت حيل عليها وعرفتها خطر جبير علينا هاي تنذرنا بمصيبة افعالها ولازم نطلعها منا
كالت انت تسكت و كأنو ما صاير شي وانتي هم
وراحت هي تعجن بغضب صبته كله بالعجين ،
**
نيوفر
صبح نحس حاير اشلون راح تتصرف تمارة ويه احلام وضايجه من نفسي بنفس الوقت احلامي كلها صارت اتخص رائد لا وبعد انتظر اتصاله بفارغ الصبر لهدرجه اني ناقصة ابسرعه انسى الي راح واتقبل بكل سهولة الي جاي عادي هيج
باوعت لنفسي بمرايتي شنو هالتناقضات الي بيه داخلي يريده ويريد يتعود عليه حبيت  العيشة الترفة مالته طلعات وصرف من غير حسبان و كلشي راقي و من احسنه لأولادي ولو همه مو بعازته تقاعد والدهم ندار الهم  ولجدتهم بلا كذب اني عندي ميول اله بعد الزواج طبعا وهذا الي موجعني فيصل دحاول انساه بسرعة .

انتظرت تمارة خروج الرجال من البيت على ورضوان وبابا حتى تنفرد بأحلام

صعدنا اتلاثتنا الها وحده اشد ازرها بالثانية متحلفات  بيها
الباب  مقفول دكته حيل تمارة
فتحته  احلام
- شكو

تستفسر وجوهنا
صبحتها تمارة بالسباب والشتم
- يا ساق... يا داي...... يا بت ال.....

-شكو شكو اتغلطين على امي اشرف من ترباتج واشرت عليه بكل وقاحه
تمارة
-ترباتي ما تسوين نعالها يا بت الك .....بات
غلط وقذف عليها و واجهتها تمارة بنذالتها ويه علي الي اعتبرها اخت وهمين احسن مني جان يعاملها مثل سما
ضعفت و دخلت انياب وكحاتها من واجهتها وسكتت
تمارة
-اطلعين منا قبل لا يجون الولد تلمين كشج والله وياج
واذا  ما رحتي  اسولف كلشي لعمج يسحلج سحل هو وابوج فاهمه
طلعنا من عدها واني غليلي ما مشفي منها
هالملعونه بس اتعير بيه هي وامها اووف فتحت عليه جروح .
باوعت للتليفون  بقهر وهذا شو مادك مو كال اجي اليوم !
سمعت اصياح تمارة
طلعت ركض شفتها بالهول ويه سما واحلام
اريد افهم شي
شو هاي مو جانت توها تبجي
شو مخوصرة لتمارة وتعدد
-والله وانتم معروف عن شرفكم اشلونه اذا ما اسكتين والله لكطع اهدومي العصر وابلي ابنج واخلي الدم بين الاخوة  للركب
قبل اشوية جانت خايفة شنو غيرها هسة اضاهر مخابرة امها
فورت دم تمارة لزمتها وضربتها على ضهرها حيل و احلام ادفع بيها و سما وخرت امها عنها
-وخري يوم لا تبليج هاي وحده ناقصة

صعدت لغرفتها ركض خايفه  من هيجان تمارة فقدت اصيح و اشتعلت شعل حتى شرگ بلعومها وكامت اتكح  ،
احتاريت شنو الصرفة وياها هاي ام اللاعيب
صعدت الها ما رضت تفتح الباب
من ورة الباب  حاجيتها
- ادري انت مو ما رايده رضوان دطلعي منا و فكينا شرايده منا
- ياريت اكدر اخلص منكم ، ردت اطلك  و ابوي جبرني جبر ، مثل الكلبة سحلني وجابني اتوسل لأخوج كامت تبجي وتحجي  ، اكره اتعرفين  شنو وحده تكره واحد يعاشرها اموت منه لأخوج واكره ريحته واكره كلامه واكره نفسي كل يوم لأني عايشه وياه بنفس البيت
-من جرما هو هاجرج من رجعتي لهسة ينام جوة . اتاريه حاس بكرهج ، وهو شنو ذنبة جان قنعتي اهلج وخلصتينا منج لو بس اتعرفين اشيشهم على ابن عمهم يكتلوه
نزلت لجوة  ومحتارة بهاي  العائلة اشلون تفض قصتهم 
لكيت سما هي الثانية ميته غل منها اتروح وتجي بالغرفة وجهالي يلعبون و توتو ياكل بسكت ومبحرث وخابص الجو
حطت ايدها على حنكها وسالت
-اشلون نتخلص منها
-مدري مدري اني العقل الظال براسي طار
-اي اي خل يطير بلكت اتروحين اكتليها ومحد يحاسبج مخبلة رسمي و نخلص منها للأبد الله الله وربي ودي اشوفها شابعه كتل
- كافي حميتي زايد ترة و مردغتي ابو ابوية بالقصف شنو ولج اني من اشوكت جنت خبلة رسمي
ضحكت وشر البلية ما يضحك
-لو ادري ليش من هديتي عليها بالسجين ما كتلتيها
-انجبي كافي عاد
تردين اترجعين ذيج الايام عليه اسم الله ايام وعدت
- ههههههه اشاقه ولج ما اشوفيني طاكه روحي
-انت ما عليج خليهم الكبار يصرفون وهي تصفى

اجه رضوان من الدوام دخل سبح بالحمام الجوة  واخذ ملابس بيتيه من تعلاكه والدي مخليهم بغرفته وما يصعد و مطنكر  اصلا يريد والدي يخلصه منها ،
تمارة كالت بس يجي ابوكم اكولة على هاي الصلفة ،رجع علي من الشغل صار  يشتغل بالعطلة بمحل تصليح الإلكترونيات اني اترقب سما كبل راحت سولفت اله المقتل بالمطبخ   جانت الساعه ب ٢ ونص  ، خاف لا تبليه وداخ اشلون يطلع نفسه من هذا الموضوع جنت منتكأة على الكاونتر واباوع اله وبالي شي بس من يكول يوافقون عليه ومنو يكول هو منطقي
كلت اله
- اكلك امك اذا كالت لأبوك و طردها هاي اذا صدكنا ، اهلها ما يصدكون و راح تتبلى علينا ابوها رافض الطلاق ما يرضى ترجع اله مطلكه بهذا العمر
علي
-وشنو الحل اشلون اخلص اني تعبت والله اليوم  بس افكر بالي صار البارحه
جاوبته
-الحل  يمي بس كون ما اتكولون مو منطقي وما يسوة
سما
- شنو قررتي اسوين انت ام العريف
جاوبتها
-انجبي
سما
- اوك
علي لازم راسه دايخ ويباوع النا بطرف عينه
كلت اله
- ولو انت ما تستاهل واحد يساعدك غبي و عكرة
-انبجي نوفة
- لا تكول نوفه ولك
سما
- يوووه انتم ارويسيه اسكتوا كافي عرايك وكولي انت شعندج
- تستدرجها بالكلام ، هسة تدز الها مسج
تجيك للمطبخ فارغ او توكف كبال غرفتها وتدز المسج تطلع الك و وحده منا اتصور واتخليها تحجي الصدك وهي الي لازكه الك

عبالي راح يغلط عليه ع هاي الفكرة بس شو هو و سما  واحد  يباوع للثاني
علي
-يم غرفتها ما اكدرون اصورون الا اهنا حتى من يم الباب ما اشوفكم

سما
-هاي ثعلبة ماكرة ترة هسة تحس بيك جاي تقررها و ماتحجي

على
- هم صدك

جاوبتهم
-لا والله ثولة واثول منها ماكو والدليل كل اشوية وحده منا لاكفتها ما دارسة حركاتها و خربت بيتها تمشي وره خبالها . وتحبك تجي تركض وكولوا نيوفر كالت
صفنوا ، استرسلت بالكلام محاولة اقنعهم
-هسة انتم شنو خسرانين هاا كشفتنا ننجب وانعوف الكبار تتصرف ما كشفتنا نسهل الامر بطردتها  نراوي لبابا و هو يعوف رضوان بحالة ويخليه يطلكها ،
و بدينا بخطتنا هو فك حضرها ورسللها اعتذار ع تصرف امه و ابسرعه خابرته بس جانت حذرة كال الها اريد اشوفج ما طول امي نايمه وخواتي هم .
كالت اله اخاف يجي ابود
- قابل راح نسوي شي غلط مجرد نسولف بالمطبخ عادي ترة . ورضوان شفته تغده ونام تعبان  تعالي بالمطبخ
سد الخط واني وسما اذنا بيه
وخر عنه وكال حضرن نفسجن مو ما اصورن ،
رحنا بغرفتنا نتظر رساله من علي
و دز ركضت اني و سما ظلت تراقب الوضع  
طبعا تمارة  هاجت عليها الشقيقة ما تحملت وكاحه احلام واخذت علاج ومنوم ونامت ورة الغده من ال١

،
شفتها بالمطبخ و مطيه ضهرها الي  و وجه علي عليه
- اعتذر امي اليوم اجاوزت  عليج مو ؟
-اي شسوت بيه ، واني والله ما اريد شي اني رايده طلاك بس ابوي مثل ابوك قافلين ، 
-لهلدرجة  رضوان متعبج
- ما احبه وهو هم
كامت تبجي انطاها كلنس
اني فتحت الكامرة و مديت تليفوني يصور
- وهسة شنو ناوية اسوين

-اريد اطلك منه وها هي
- حقج ، بس اني ماخذ بخاطري عليج
- ليش ؟؟

- تردين تتبلين عليه واتكولين معتدي مدري شنو هو هذا احترامج الي

-شنو احترامي اني احبك وكلت الك لا تتجاهلني واتكول الي مرت اخوية انت اني مو مرته ما اريده . ودري انت مستحيل ترتبط بيه بس شسوي كولي  شسوي

سكتت من كثر البجي وكل هذا واني اصورها واضحه هي كاعده .

- صدك تتبلين عليه لو بس هيج تردين اسكتين امي

- لا علي ما اتبلى عليك صدك تحجي مستحيل اذيك اني احبك حيل واتمنى لو انت الي ازوجتني مو اخوك

-بس اني اعتبرج مثل اختي

- واني مو اختك ، اني اتمناك الك

علي مدنك خجلان مدري مني مدري من نفسة كلامها  اشلون اجتها جرأ وحجته ما اعرف تحجي لواحد حماها هيج اني زوجي والله استحي اصارحه اني اشتاق اله وعايفته لأن مخابر ع راحته

اتقربت يمها وكلت
- يعني تعترفين  تركضين وراه
دارت وجه وبين بالكامرة اخترعت اني وكفت التصوير وافلت وهي ركضت ورايه دخلت للغرفة وبس نظرة اعيونها الخايفة اصورت ببالي ،

**
سما
صعدت الها وكلت اتحضر نفسها اتروح وبعد لا ترد مجاوبت  و راحت لكنتورها اتلم بغراضها شو ضجت عليها هزيت راسي اتخلص من العطف ورحت لجوة كلت لعلي واحنه فرحانين راح تطلع
اكيد  خابرت هسة اهلها يجون ياخذوها

اجه بابا رحت كولت اله
-اصب الك غد
- اكلت لفات بالدائرة  وين  امج
-نايمه

رحت لنيوفر لكيت علي هو دا يدخل الها
علي
-نوفة وين التصوير
ساكته وحاضنه تليفونها بأيدها
- ارسلي الي يلا نوفة
طلع علي تليفونه
-يلا
- شسوي بيه
-اراويه لأبويا شسوي بيه ،كعدت امي  من شفته اجه اتكله واجيت أخذه،  يلا يمعوده شو دجيبي جر منها تليفونها
جرته منه وكالت
- علي اني سويت شغله
دخلت أمي
-وين التصوير علي من يطلع ابوك من الحمام اشوفه اله ونسولف اله كلنا سوة احسن

علي
-خوش ، بس رجائا لحد يصحي رضوان
ما اريده يعرف منا من تطلع احلام من البيت

نيوفر
- اني سويت شي ،
كلنا التفتنا عليها

علي كال
-اشبيج انت وليش ما تنطيني تليفونج ها بس لا ما دبرتيها وطلعتي ما مصورة

كلت الها
-صدك نيوفر صدك

- لا صورت بس بس . دزيت التصوير لاهلها
علي اخترع
-شنو شنو
- اي وكلت الهم تعالو اخذو  بتكم الشريفة خلصونا منها
لزمها علي من زندها كومها من مكانها
تمارة
-ولج شنو صخمتي
علي
-المن رسلتيه
- لاخوانها اثنينهم عماد وعدنان
هزها علي
- رعنه رعنه والله انت رعنه منو كال الج هيج تاصرفين
بدت نظراتها تخزر بعلي وعينها اليسرة مبينه ترف لأن تغمز بيها اعرفها من تعصب وتحمى هيج يصير شكلها
امي كالت
- هسة يجونه ذوله عراكه  راح يبلونا
ليش فضحتيها كدام اخوتها جان خلصنا منها ولج راح يكتلوها  ويبلونا بدمها
وخرت عن علي وصارت كدام تمارة
- ليش فضحتها ، وليش لعد اني انفضحت هاااااا اشمعنا اني  شبعت كتل من اخوتي
غلطت تاخذ جزاتها

امي
- اشجاي تحجين انت شدخلج ،موضوعج انتهى و راح
عصبت بالزايد وعلي طلع
نيوفر
- لا ما انتهى مو هي هاي وامها دومهن يذبن عليه حجي هااا  انت نفسج بعدتني عن الگرايب الحياية حتى اسلم من تهايمهم  الباطلة  حتى انت زرعن بداخلج فكرة مصدكتها بعدج  عبالج اني جنت امشي لشقة ذاك واسوي وياه الغلط من الدبر اني اعرف ترة ، وادري شنو طش عني بذيج الفترة
انهارت على الارض 
خوفتنا عليها اعصابها مشنجة و ثورتها فجرتها و خرت قوتها ، لهسة بعدها متأثرة بالماضي  و تارك بنفسها اثر

،

كلها نص ساعة زمن واجت ام احلام وابوها اخذوها من البيت هي وجنطها وكلمة مكالو غير خل رضوان يطلك
بابا جنا مشوفينه التصوير ومحتار كالعاده ما يعرف ياخذ موقف ضد اخوته ، اخذو بتهم من غير شوشره من صارت السالفة تعم على سمعتهم واحنه رضوان ما عرف يلم سمعتنا الي صات صيتها بضربه اخته بالشارع ،
نيوفر عزلت نفسها و حيل تعبانه نفسيا،
خابرت ام احلام امي تعد وتصف  وامي اتكول صايره هوسة يمهم اسمع اضاهر اخوة احلام جاي يربوها يعن يصار الي رادته نوفة ،

رضوان كلشي ما فاهم امي كالت اله ملت من الوضع احلام واهلها اخذوها يردوك اطلك صدك وما اهتم على العكس كال بعد احسن .

طبعا من اجوي امها وابوها هو اهنا بس ما طلع الهم وسألنا من طلعوا وراح للكافتريا ما مهتم ،
بس علي طلع من البيت كانه خايف من غدر اولاد عمه لا تفتر السالفة عليه غلطت نيوفر من هيج سوت لا يرحون يهدرون دمها ذولة ماعدهم رحمه .

**
نيوفر
اعصابي رجعت انهارت ،خابرت اميرة ما ردت ،دكيت على لينا اتوسلت الها من غير مقدمات 
-الله يخليح اريد اي مهدأ اكتبي اي شي حبابه دزيه بمسج
-الو شنو ......الو نيوفر شنو مهدأ اشبيج
- حبابة اني راح راسي ينفجر اعصابي تلفانه حيل  انطيني اي شي انت مو معالجة نفسية
- يا عمري اشبيج ؟
تتغالب الشهگات  وية  صوتي مبحوح
-كل ما اظن اني نسيت الماضي اطلع بعدني عايشه بيه ، مجاي انسى الصار ولا ذاك اليوم الي انسحلت بيه من شقة مختار ،
اشكي و انوح وهي سكتت
- زواجي من فيصل مسكن وراح ،

- صاير بينج وبين رائد شي

- اصلا نسيت اني مزوجة! ، لا مصاير اني يم اهلي
- اشوية و  اجيج
- لا لا
-ليش
- صايرة امور عائلية والوقت مو مناسب حبابة بس اريد شي يهديني
- ما اكدر اصلا محد ينطيج علاج مهدأ من غير  وصفة طبيب يا روحي أ
هدي نفسج كومي اغسلي وجهج بماي دافي وباوعي بالمرايه وكولي اني قوية ما احتاج علاج اني راح اجتاز الي بيه اني ما بيه شي ، نيوفر لا تخلين الاحباط والضغوط تنكسج انت قوية انت صامده . محد ما يغلط محد معصوم ، محد يفيدج من الناس لتخلين احد ينتصر عليج  كومي يلا غسلي وجهج ،سديت الخط وركضت للمغسلة غسلت مكدرت اكول شي ولا اباوع لنفسي بالمراية،ما اتعشيت واجاني صوفي وطردته و سما اتولتهم .

تمارة
- كومي يمة اكلي شي اشبيج ما تكولين الي اشبيج اني عايزه

-ما اريد عوفيني بحالي

- ادري هسة شنو جد ، سالفة قديمة وراحت وخلصنا منها وهاي عندج رجال وبيت ومستورة والحمدلله

محجيت و انطيتها ضهري
-الناس المستور تشكك اثيابة عليه بكلامها وما يخلص الله وكليج ومحد يركع لأحد ، احمدي ربج عوضج خير واكبردليل الناس نست من اخذج النقيب رائد اكيد سال عنا وكل خير كالو اله
كومي يلا

ما كمت وملت وراحت
بس لفتت نظري لشي رائد صدوك سأل عني قبل الزواج لو معتمد على صداقة اخته النا ؟

**
رائد
طلعت اللجنة التفتيشية  المفاجئة من السرية واني صاير نار عدت على خير اكيد واحد نادس علينا لازم اعرفه منو هذا ، ونوفة ليش حركت تليفونها وما ردت ، فتحت التلفيون  ما متصله اني العصر دكيت وماردت دكيت المغرب و الحيت هم ما ردت ؟
دكت عليه لينا
- هلا و مية مرحبا
- مراحب بيك حبيبي اشلونك شخبارك
- تمام ماشي الحال
-اكولك رائد ،
-امري
- حبيبي قبل اشوية اتصلت نيوفر
-اتصلت بيج ؟!
-اي
- اها
- رائد حبيبي ولو ادري بنفسي راح اخذلها للمرة الثانية من امنت بيه ، بس هسة على مودها والله ،
- لينا اشبيها نيوفر ترة قلقت عليها
-انت شلونك وياها ، اقصد اموركم
- زينة!
-يعني ماشيه الامور عادية
ليش خابرتج
كنت حيل مستغرب وما فاهم شي ليش ما ترد عليه وتتصل باختي
- من جديد حست بنفسها محتاجه الي بس هالمرة طلبت مني اكتب الها مهدأت
-ليش ؟ شكت مني ، اساسا اني بعيد عنها ومشغول  مع هذا ما يفوت يوم الا ما اخابرها
- رائد  ما اعرف شنو السبب بس هسة هي منهارة نفسيا و حاولت اروح الها رفضت اضاهر عد اهله مشكله ذكرتها بماضيها مثل مكالت هي لعد مدام انت مالك دخل ولا تعرف عنها شي
عضيت شفتي متألم
-  اتمنى اتحاول تتقرب منها واشوف انت بنفسك اشبيها ،
سديت الخط حاير بيها ما ترد وتتصل بلينا ومنهارة اشبيها ؟

**
نيوفر
كاعده كدامي سما ومصرة اكل من الصينية الجابتها

- نوفة الوردة اكلي هاي مني
-كافي ولج اتعامليني كطفلة
رن تليفوني
- يوه هذا رائد والله نسيته ،

-ردي
-شكول اله ولج كومه داك عليه العصر بس اني جنت مكدر احجي ويه احد
-ردي هسة و طلعي اي عذر
اشوية حسيت نفسي احسن من غسلت وبعد مسمعت كلام لينا ،
رديت عليه بصوت متلعثم
- اشلونك رائد
- اشلوني ؟  ليش ما اتردين علية
- ها مو جنت مشغولة
-اشبيه صوتج مبحوح
هو صوتي مبحوح يبووه فضحني
- لا مبيه
- بشنو جنتي مشغولة عن زوجج وهو يدك  عليج ساعات وما اتردين هااا
يوه بده تحقيقة
-مو جانت عدنا مشكلة عائلية
-خير
-هيج شغلة خاصة اشوية
-اها ،
تمام دربالج على نفسج ، تصبحين على خير ، وبوسي الي هاشم ، ؟

سد الخط
و سما هزت ايدها
- نيوفر اشلون اتكولين اله شغله خاصة ولج هذا زوجج حسستيه هو غريب
- لعد بالله شكول اله احلام عرتنا
-لا بس من سألج جاوبي عادي كولي مشكلة تخص مرت اخويه و واصلة للطلاك مو تكولين خاصة  وبعدين شجاج جافه
- سما اني هسة طالعه روحي وربي اريد حجة ابجي عليها اسكتي
كلام سما صح وضوجني على رائد حيل حتى ما سمع ردي ابسرعه انصرف ،
اكرهج نيوفر حيل حيل
جابت الي توتو انيمه و اجوي اخوته نامو يمي
واني فكري متفنن بالمواضيع كل ساعه يذكرني بسالفه تنغز گلبي وبتصرف اني سويته ودمعتي بطرف عيني  ، دك تليفوني .
جان رائد
-ها رائد

- حضري نفسج دقايق واجيج وصلت حيكم
فرحت بتصال حيل كمت ركض لبست و عفت الجهال نيام وو صيت سما عليهم

رحت كلت لأبوية الي كاعد بالهول ويه رضوان يتفاهم وياه ع موضوع الطلاك
-بابا اجه رائد من الدوام بالطريق راح يجي ياخذني
-خوش بوية حضري نفسج وروحي ويه رجلج
جانت الساعه ب ١٠ ونص
لبست عباتي و ندك الجرس ابسرعه طلعت   لكيت رضوان مدخلة جان جاي بلبسة العسكري بس نازع البيرية ما احب هذا الزي ولو هو بارز رجولته و وسامته لكن ما احبه ابد ،
ما رضى يكعد مستعجل
- يلا جبيبي الجهال انروح
-نيام . خليهم يم خالتهم باجرتعال اخذهم
هذا الكلام واكفه ابصفه واهمس اله

ورضوان مصر يخليه يكعد لكن رائد تعذر تعبان من الدوام   ،
-روحي جيبهم عادي واذا نيام
-هاا
-اي لعد يصبحون انت ماكو خطية ، عجلي
رحت جبت هاشم اول شي شايلته وهو فاقد راح رائد فتح الي السيارة و نيمه على المقعد وجبت توته ورضوان جاب صوفي حطيت توتو بحضني و كعدت يم رائد
وانطلقنا
- اشلونج زينه
- اي الحمدلله ، بس اشوية اليوم صارت مشكلة و احلام راح يطلكها رضوان

-يا ستار
-اي

كولت اله حتى أصلح موقفي مال ذيجسه
ما سال بعد وعينه ع الطريق نزلنا

وهو اخذ صوفي وحطيناهم بأسرتهم وراح جاب هاشم واني رحت للغرفة نزعت عباتي ولبست منامه  ولزمت راسي المصدع ،
دخل هو
كعد يمي ورفع راسي
- اشبيج ، ليش حزينة وتعبانه دوم ، ليش

بودي ارتمي بحضنه واشكيله ، جنت حيل متحامية على احضانه الدافية الي فاركتني كم يوم جانت بمثابة لحظات راحة الي او محطة راحه بعد رحلة مدتها مطولة بودي اذب روحي عليه ذب؛  بهاي اللحضة هامت روحي بعيونه الي تبث امان بودي هنه يحسن بيه و يخلن صاحبهن يعطف علية ، وتاخذني ذراعاته وتحويني بأمانه ازيل خوفي، كان صافن بوجهي كانه يقراني وساكت حرفت نظري عنه مخالفه مطالبي ما اريد ابين اله بشي من الي بداخلي ،

- باوعي الي وكولي شنو بيج ؟

- ما بيه

- احد مزعلج
مثل الطفلة  صايرة بجيت لان معرف اشبيه اليوم الاكتئاب نال مني
-وين تعالي
ادنة يمي واخذني من راسي لحظنه ويربت على ضهري ،
لزمته حيل من ضهره عصرته عصر كان بودي اغرك بريحته اكثر و اخذ منه شي يقويني
- ليش هالدموع
- ما اعرف رائد لا تسأل اني مدري اشبيه
فجأة نيمني  وتركني ، خلع بسطالة توه و راح للحمام ،
حاولت انام ما كدرت ، طلع كتر ملابسة و طلع البسطال الي هو مستحيل اصدك داخل بيه لهنا وهو ابو النظافة !

رجعلي
-هسة صفى الج بالي ، اشوف اليوم منو مزعل مرتي

سكتت
انطرح يمي
-ترة اروح اشعل بيت اهلج شعل
- شسوي يعني
-  ابوس ابوج واجي
-ها
-خلف الي هيج وردة زعلانه وتدلع

ابتسمت غصبا عني
- شو هاي شنو
-شنو
اشر على شفتي
- اكو شي صاعد عليها
باوعت اله بعدم تصديق
  باسني وبادلته
قطعها وكال زين متغيرة  ومطورة
كون دومج مكتأبة
ضربته على صدرة
- ليش طالبني
سكت ورجع اخذ شفتي وياه لعالم نساني اني منو و بشنو افكر ، مجرد قبل نستني همي ، 

اخذني بين ذراعته

- اليوم ماكو نزول الي ، طفرت طفرة ، تدرين لو لا
- ليش ؟
- حسيت نفسي اذا ما اشوفج اليوم ما ارتاح ، ريحت گلبي واجيتج راكض

-اها ، يعني انت تشتاق الي مو
شم شعري وكال
-حيييل اهواي ،
طلعت راسي و صار كدام وجهه
- رائد ، انت تحس بيه من غير ماتدري !
-اشلون ؟
رجعت ضميت راسي وكلت اله
- ما اعرف بس اني حيل محتاجه احد يضمني مثل هسة 
- رائد
- ها
كان صوته ذايب
- لا تعلقني بيك واتروح
باسني من راسي ومجاوب
شديت بحضني اله و لزمته بقوة ،
-راح اتنامين
- اي ، حضنك دافي ينعس
- حاضر اتنامين على ايدي اليوم ولو اتكسريها بس بشرط
-عرفته ، واني همين عندي شرط
- شنو
ضحك ضحكه خفيفة
- اغمض ومثل مسويت باول ليلة النا اتعيده جان شي حلو
.ضحكته علت بحيث حسيت الجهال راح يصحون  ؛
يتبع
🌷أسعد الله صباحكم 🌷
حبايب قلبي الحلوين اني مستمرة وياكم حتى لو ماعندي وقت للنشر سواء بين يوم ويوم او كل يوم بارت او اغيب ثلاث ايام مستمرة وياكم ومستحيل اعوف القصة ع النص احر التحيات الكم يا ورود🌹🏵🥀 الواتباد احبكم ❤في الله وهذا البارت جاهز من ليلة البارحة  لكن شبكتنا تصليحها ركيك🤦‍♀️ من مطرت اختفى النت وهاي اني كنكت يومي لخاطركم ، المهم البارت حيل طويل اتمنى يكون نال رضاكم واعجابكم 💝