رواية الراقصه والسلطان الفصل العاشر 10 - بقلم hour writer 🐆

#الراقصه والسلطان
#حور حيدر
#الانستا:enghour98

حظنت ايدي ودموعي تنزل ،اباوعله يروح ويرجع كدام السياره وهو يدخل ايده بشعره بعصبيه ما اعرف شبي ليش هيج عصب ارد احجي ارد اكله لازم اروح بس خايفه منه ...

باوعت للساعه صارت ب 12 بلليل ...وهو منتجي ع السياره ...
كل ساع ارد انزل بس خايفه ...
فجاا اجه صعد وهو يباوعلي وكال بسرعه وامر بدون نقاش ...
مترحين لمكان الا ورجلي على رجلج ،ما اعوفج ترحين وحدج ...

مسحت دموعي بحركه سريعه وكلت باعتراض واني اريد افتح الباب بسرعه وقلبي يدك بسرعه وخوف من منظره الي يخوف ويجذب بنفس اللحظه عيونه حمره وخصله شعره نازله ع جبينه ويتنفس بسرعه واديه من كد ملازم الستيرن بقوه بارزه الاورده  ...

لهنا وكاافي كولش شكرا الك ساعدتني ومراح انسى فضلك هذه ...
بس مو من حقك تقرر اي شي عني وين ما اريد اروح شي ميخصك وهذه اتفاقنه من البدايه ...
درت وجهي ردت انزل ...
بلحظه انقفلت الباب وانجرت ايدي بايده قربني منه ويحجي بهمس خله عضامي ترجف وانفاسه الحاره  تضرب وجهي وعيونه احسها راح يموتني من نظراته ...
دحجي هين وين موليه ...شايفه حركتج هايه اذا تكررت نوبه لاخ  وحك الخلكج ادفنج هين موو عامر يتجاهل كلامو  ...
نخوتي ورجولتي كاضبتني موو عامر ليهد بنيه حديثه وحدها بنصاص الليالي ...

يحجي ودموعي تصب واني اشاهك كلت راح يموتني اخلص من بلوه واوكع بمصيبه اكبر يربي ساعدني ماا اريد اموت قبل لا اشوف امي ...

كتله واني كوه احجي وشفايفي ترجف اريد تطلع الكلمه ما اكدر اصابعه احسها انطبعت بايدي وروحي تريد تطلع اول مره احد يحاجيني بهل طريقه ويتقرب مني هيج واني مو طبعي اسكت عن حقي بس هذه مجرد نظراته خرستني ما عندي الجرائه ارد...

ع..عا..ععامر ..عووفني ..
زاد ضغط على ايدي عطت بوجع وروحي شاغت ..

اااه ...ايدي ..ااي عاامر ايدي فدوه عوفها واني اباوع على عيونه بترجي وعيوني كلها دموع...
فجأ باوع الايدي وكانو صحه وهد ايدي نترهه من ايده بسرعه ...
كاال وهو يضرب الستيرن بقوه ...
تره مبقيج اني مو لسواد عيونج ...دحكي يول غاد ودحكي عدل اتركج الهم ... يله انزلي ما الي دخل بيج
درب السلامه ...
وهو ياشر للشارع مقابيلنه ماكو بينه مسافه قليله الي مملي سيارات نزلو منها زلم مسلحه اول مشفتهم لا ارادي ...لزمت ايده عرفتهم ذؤله ولد عمي
همست اله ...لاااا عاامر
كال وهو يبتسم بشر ...هاا بويه شكلتي مو مالي خص بيج ...هذه الكراج ووصلتج اله ما علي عتب بعد  وذؤلاك الجماعه جنهم يدورون عن طيره شارده منهم ...

اباوع عليهم وارجع اباوعله ياا ربي شسوي ذؤله همه ...ما صدكت كدرت اخلص منهم
كتله واني انزل راسي شفتهم قربو  ...واكفين يفتشون بلسيارت وينزلون الناس ...والشر مبين بوجهم

عاامر اطلع بسرعه هذه قاسم وولد عمي راح يموتونه ...اذا مخايف عليه خاف على نفسك ذؤله مجرمين يموتونه والله بغمضه عين

عاامر ابرود وهو يرجع راسه ع الكشن ويحجي ابرود ولا انهز منه شعره ولا كانو بينه وبين الموت شعره ...
بويه الروح وحده وبيد ربج ...ومو عامر الي ينهزم من مخانيث وبعدو ابو موالدتو اليكدر يكرب العامر البو نمر
...خطوه مراح اخطي اذا متحجيلي كل شي وبدون جذب منو هذؤله وشيردون منج ...

فيان اني قلبي يوجعني ومعدتي مغصتني من الخوف والهبطه ...اباوعلهم خطوات وراح يوصلون النه وهذه بارد ممهتم كتله والله احجيلك كل شي بس اطلع بسرعه ...

اشو هذه خله ايده وره راسه والثانيه يلعب بشورابه ويحجي بهدوء موتني  ...
اعتذري اول ...كوولي اسفه وهو يباوعلي بنص ضحكه ويغمزلي بشماته ...

فتحت عيوني من صدك يحجي اني كلبي ناار وهذه  ...
عاامر صدووك تحجي ...احنه بيا حال ولك وصلو النه دا يدورن بالسيارات

ع نفس وضعه كال وهو يباوع لعيوني ابرود ... ميهمني
مراح احرك الا تكولين اسفه ...

رفعت راسي شفت قاسم ابوجهي دا يدور السياره الكدامنه صحت و دموعي تجري
...عززه عاامر فدوه والله اسفه بس امشي اريد اشوف ماما واذا شافني قاسم راح يموتني قبل ما اشوفها  ...
عيونه بسرعه تحولت من البرود ورجع يخوف ..
كال بحده ...رفعي راسج
كتله بخوف واني بعدني منزله راسي ...راح يشوفني
عاامر بحده بدون مناقشه وهو يأخذ مسدسه  ...رفعي راسج ومسحي دموعي ...منو منهم قاسم
اشرتله وايدي ترجف ...
نزل بدون ميباوعلي ...
كمت ادك ع وجهي يربي مخبل هذه شراح  يسوي كمت ادعي وايدي على قلبي ادعي ربي يحفظه اليه لان هذه املي الوحيد ...
عززه العزاج فيان ...هذه اكيد اتخبل راح يموتو
ارد افتح الباب قافلهاا ...
  ...اباوعله راح لقاسم وكف كباله مدري شحجه ويااه وبلحظه قاسم واكع بلكاع التمو كلهم على عامر قاسم كام راد يضربه رجع عاامر ضربه ووكعه مره لاخ ...
يحجي وياهم بكل ثقه وهو يرفع سلاحه ...وعافهم واجه يمشي ...

صعد ابرود وشغل السياره وحرك ...
اني الصدمه شاله لساني ...

فيان ...اا ...ان ..انته شسويت

عامر ...مو هذه الخايفه منه ...مو هذه الترجفين من صعدتي لهسه ...مو هذه النزلت دموعج بسببه انتي نخيتي عامر البو نمر واجاج الجواب ...

فيان ... انته رسمي مخبل ،بس فهمني شكتله وشصار
عامر بحده وهو يعض شفته الجوه ...لساانج يولي ليش تخليني اكصه الج ...وشكتله ميخصج

فيان بعصبيه وهيه ترفع اصبعها بتهديد وتحجي بسرعه ويدون وعي ...وشبيك تحجي بعصبيه ويايه مو كافي الهبطه الصارتلي من وراك ... مو عبالك تصيح عليه قبل شويه وسكتت الك عبالك خايفه منك ...لاا

عاامر يربي شهل مصكوعه منين وكعت على راسي ...اباوعلها تحجي ومنفعله واني حاصرتني الضحكه  ولا جنها قبل شويه جنها كتكوت مبلل خاتله من الخوف وهيه كاامت تخرمش مثل البزونه ...
كتلها واني اسوي نفسي معصب خزرتها وكتلها بعصبيه ...
لاا شنو احجي ...شتسوين
فيان بتردد ...هاا لا ازعل عليك وبعد ما احاجيك
عامر هنا مكدرت الزم نفسي طكيتها بضحكه يربي جنها طفله صغيره بسرعه تخاف وبسرعه تعصب وتتوتر اذا خافت ...
فيان اباوعله شلون يضحك واحس قلبي كاام يدك ويه ضحكته .. كتله واني صافنه عليه
...انته شلون هيج ...

عامر باوعلها وهو عاكد حواجبه ويباوع بتمعن لعيونها ...شلون يعني
فيان وهيه تباوع لكدام وتفرك اديها بتوتر من نظراته الي تربكها...احم اقصد مساعه جنت معصب وتخوف وبثواني صرت بارد مثل الثلج ..وهسه كمت تضحك ولا كانو قبل شويه ردت تموت بسببي والاهم من كل هذه ساعدتني بدون متعرف مني اي شي ...شلون انته هيج

عامر وهو يبتسم ...ول ول ول هذه كله انا وعرفتي بهل كم ساعه ...المهم
لتغيرين الموضوع احجيلي شنو قصتج
فيان يربي شهل بشر معقوله اكو بعد هيج انسان ...
نزلت الجامه والهوا كام يضرب بوجهي سندت راسي ع الكشن واني اباوع ع الظلام ...

اني فيان ادرس طب سنه خامسه ابويه من الانبار وامي من بغداد تصير بت خال بابا حبها من جانو اطفال
وجان يروح لبغداد علمودها ...وهيه هم تحبه

كبرو وقرر بابا يخطب بت خالته الي هيه ماما فاتح اهله والصدمه رفضو رفض قاطع... بحجه انو ماما
مريضه سكر ...
وامه كالتله تريد ولدك يطلعون مرضى مع انو بيبي جانت كلش تحب ماما بس حاربت زواجهم وزعلت على بابا لانو جانت خالته توز ابيبي تكله خل ياخذ بنتي احسله من هااي المريضه  وهيه تحبه لا يجيبلكم بت بغداد وتفر راسه عليكم اكثر من ما هو متعلق بيها وبايعكم بكلمه منها...
وجدو اصر ياخذ بت خاله او بت عمه وعوف بت بغداد متفيدك ...
طبعا عاند بابا واتخبل عليهم وعاف البيت وكلهم شايفين هذه الباب ...
عسى تطلع جنازتي منا ...بيوم الاخذ غير مريم
عافهم وراح لبغداد لبيت خاله وقرر يزوجها بدون اهله
بس الصدمه انو ابو ماما رفض هماتين ...
وكله لو يجون اهلك لو ماكو زواج ...حاول بابا يقنعه ماكو فايده والمصيبه الاكبر كله جدو ابو ماما جايين خطابه لماما وراح يوافق ...هنا بابا ما سيطر على اعصابه وكام يصيح ويكسر ...كلهم والله اكتلكم كلكم ومريم اخذها لو بيها موتي  ...وجدو طرده كله مره ما الك يمي انسدت كل البيبان بوجه بابا واول مطلع سوه حادث ...العصبيه عمته

ماما اول مسمعت ملخت روحه وركضتله للمستشفى  واول مشافت حالته وشلون مكسر ...
اتخربطت و دخلت بغيبوبه سكر ...بقت اسبوعين بغيبوبه ..مصحت منها الا ع صوت بابا
جان يتوسل بيها حتى تصحى ومتعوفه لوحده ...
ووره هل هوسه كلها والأحداث ...
جدو ابو ماما وافق على زواجهم بعد مشاف حالتهم وشلون معاندين ومتعلقين ابعض ... دز خبر لابو بابا وكله حنخسرهم اذا مزوجناهم ...
جان رد جدو ابو بابا كولش قاسي كله خل يزوج يمك وبعد ما اريد اشوف وجه بالانبار ...
بابا انكسر من موقف اهله وبقى يكتم ابقلبه ...
اول مطلعو من المستشفى ازوجو ... وحاله بابا الماديه جانت زينه لانو جان محامي وفتحو مكتب هو وماما
بعد الزواج ...
وحياتهم جانت كولش حلوه بس رغم هذه جان بابا قلبه يحن لاهله ومقهور بس يحاول ميبن الهم ...وره سنه من زواجهم سمع بجدو ضاربته جلطه اخذ ماما وراح للانبار وره مصارت هوسه وحجي بين بابا واخوته وولد عمه لان ذبو الصار بجدو براس بابا ...المهم جدو مقبل يصالح بابا الا يجي يعيش يمه بالانبار ماما محبت تزعل قبلت برغم تدري همه ميردوهه وحتعاني وياهم...نقل بابا شغله وسكنه للانبار ...ومثل متوقعت امي كولش اتعذبت منهم ...ومجانت تشكي لبابا وتحملت كل شي عموده ....بس للاسف مرت سنين ومصار عدهم اطفال ....
وبيبي وجدو بقو يزنون على بابا يزوج طلوله مرتك م بيها خلفه وطبعا مقبل كلهم هذه رزق من الله شوكت مييجي هله بي ...
راحت بيبي خطبتله من غير علمه وخلو كدام الامر الواقع وكلوله اليوم عرسك...
كام بابا بنفس اللحظه اخذ ماما وكلهم راح ارجع لبغداد
صارت مشاده بين اهل العروسه لان عاف بتهم بيوم عرسها وهو يكللهم ما عندي علم بلعرس كله ، فصار رمي بينهم وكتلو بابا ...
رجعت امي لبغداد مكسوره ومتحملت خبر موته وكام يصير عدها هبوط بلسكري ويوميه دكتور الى ان عرفت بلصدفه هيه حامل وجنت اني طوق النجاه الماما بعد موت بابا ...
المهم بعد هاي السنين امي رافضه اروح لبيت جدي برغم اصرارهم ورفعو قضيه والمحكمه قررت يشوفوني يوم بالشهر ...
الى ان كبرت وقبل شهر خابرني عمي كلي بيبيتج تريد تشوفج قبل لا تموت كلت لماما مقبلت بس اني اصريت اروح ...ويا ريتني سامعه كلامها ومرايحه اول موصلت منعوني ارجع وحبسوني ابيتهم وكالو بعد شهر عرسج على ابن عمج قاسم ...شكد حاولت اشرد منهم بس ماكو فايده ...الى ان اليوم الي هو موعد عرسي ساعدتني عمتي الوحيده البيهم زينه وخلتني اشرد بوكت الهوسه ...وهذي هيه قصتي تريد احجيلك بعد

عامر بخشونه رفع حاجب كللها وهو يحاول يخليها تنسى ومتفكر من شافها دمعت ...بويه وريتي راسي ور  كتلج عرفيتي بالصار وياج ما كتلج تحجيلي مقتل العشيره ...

فيان برطمت وكالت بعصبيه من الفشله وهيه تمسح دموعها... عابتلك ليش تفشل بيه ...مو كتلك من البدايه قصتي طويله وانته جلبت الا تعرف ...واني احب احجي التفاصيل مع انو اختسرتها الك هوايه

عامر وهو يعض شفته ويضغط باصبعه ع جبهته ...وج بويه انتي فاهيه وتخرطين الاول والتالي مو خوش

فيان بنفس النبره وهيه تجتف اديها الصدرها ...هاا وهسه صرت مو خوش لعد قبل شويه مو ردت تموتني حتى تعرف قصتي بس انته وا...

قاطعتها عيطته وهو يفرك جبهته بقوه ...اااش حسج ما سمعه ...الله يلعن ذيج الساعه

فيان بفضول ...زين سوال هلكدوته وبعد اسكت ولا تسمع صوتي ابداا... وهيه تاشر باديها

عامر اول مشافها وهيه تاأشر مثل الطفل اخذ نفس وكلها : سئلي امري لله
فيان بسرعه ...شكلت لقاسم وليش ضربته وليش مكدرو يضربوك همه

عامر وهو يضغط على الستيرن ... مالج خص وبلهجه امر نامي بسرعه
فيان بزعل ...بس ما نعسانه
عامر عاط بيها ...كلت ناامي
غمضت عيونها بسرعه وهو شبعان ضحك على حركاتها وخبالها ....

♡ آني الثكيل الما يهزني
بس جمال عـيونها !..

#الراقصه والسلطان
#حور حيدر
#الانستا:enghour98