رواية الراقصه والسلطان الفصل الرابع والعشرون 24 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

يحتاج الرجل الي دقيقه واحده ليعشق المرأه، ويحتاج الى عصور لنسيانها !!

الجمله هاي تجي ابألي كل ما اذكرها، محتاجيت لدقيقه ثانيه بعيونها ودعت عگلي وروحي وكياني ودعت حتى كرامتي لان العاشگ گدام محبوبته يفقد كل شي ،

وودعت الراحه عيونها سبت عگلي وگلبي، متوقعت بيوم احني راسي لو تنزل دمعتي بس هيه اووف منها احس الله خلقها بس حتى توجعني وتدمرني اكثر واكثر ...

كمت اضحك بصووت عالي من كل وجع گلبي ودمعتي نزلت ...همست بضعف وقهر وصورتها باديه
هم عبرت الساعه اثنعش ،هم اجه الليل بدونج
اتمنه الله يبليج ابلوتي ...

اووف يا عشگج ذلني، نحرني ، هدمتيني نمارق ،
الناس يگولون ماضي انسااه، شلون انتي ماضي اذا انتي ويه كل لحظه بحاظري وبمستقبلي ويايه احسج قطعه من روحي لا انتي اقرب من روحي اليه ...

يگلولي العافك عوفه ،زين فهمو گلبي شلون يعوفها ،ضلمه دنياي بعدها
زين هيه جرحي ادري، تعالي وزيدي جروحي بس المهم تعالي اريد احس بيج بين اديه اريد اشمج اريد احضنج اريد اشم نحرج ...

جرر حسره من كل گلبه
مشتاگلج، مشتاگ لايمنا، مشتاگ العطرج، مشتاگك الانفاسج، مشتاگ الكعدتنا بالسطح، مشتاگ الليالينا
مشتاگ لاسمي بين شفافج ...مشتاگ لابسط شي بيج
اتنهد وهمس بغصه بصدره من سنين مكدر يجتازها شنو الشي البي انتي وما مشتاگله ...

لج وحگ ذيج ايامنه، حياتي سوده وراج
گاعد بلصاله مخلي كدامه مگدر الا يطلب كيكه بالكاكو الي تحبها. مكدر يخلي هل يوم يعبر مثل اي يوم عادي مكتوب عليها ويمها عدد جبير من بطاله الشرب الاغلب مشمور باهمال بعد ما فرغت...نصيبي الراح

مو يگولون لكل انسان نصيب ياخذه ...زين شلون اذا نصيبي راح الغيري، شلون اذا حقي مبيوگ
اني اخذت نصيبي من حبيبتي جرح قاسي، مراح انسى لاخر عمري،

انتي نصيبي الي انتظرته من الدنيا، بس تالي الدنيا منصفتني مدري اني الضلمت روحي بيج !!
رغم كل الي يمر بي بس ما يوم بين لبشر ضعفه او احتاجه الها عدا سلطان،

حتى اهله من يوم صارت لغيره اسمها منطقه گدام احد اتخذ وجه الجمود والقسوه ويه الكل واولهم نفسه حسس الكل انو هيه ولا شي مجرد شخص عادي مر بحياته ،

شكد حاول ينساها مو يگولون الانثى نسيانها بانثى
حاول يتقرب من غيرها باول لمسه تصير گدامه كره روحه وضعفه وعشگه وهوسه الها ...

كره الوحده لان بس من يكون وحده كل شي بي ينهار هذه الجبروت هذه الكيان يرجع طفل يتيم ينطي عمره مقابل لحظه بحظن امه ...

يباوعلها ويحجي ويه صورتها وهو شبه واعي وشبه فاقد الوعي وشبه يحلم، شبه عايش وشبه ميت هو كل شي وهو لا شي هذه هو حر !!

رجع راسه لوره وعيونه ع السگف وصورتها خلاها على گلبه ...اتذكر ثاني لقاء اله وياها

بعد اول لقاء عيونها مفاركتني بقت ابالي حاولت ما فكر بيها بس الگه نفسي احجي ويه الناس وفجأ بدون انذار تغزي صوره عيونها باله ...كملت اليوم وحاولت اكون طبيعي ...

راد يروح يگعد بفندق بين متكمل الفاتحه ويروح، كمل العشى وتقريبا الكل راح ...

جان هو يشرف على كل شي بلفاتحه وينطي الاوامر على الشباب وتقرييا كل شي نظمه بنجاح يشوف الرضا بعيون خاله صادق بس غروره وعقده اكبر من اعترافه بالشكر،

حر شخصيه قياديه من هو صغير جان حلمه يصير ضابط،الى ان اتخرج من السادس بمعدل يأهله يدخل كليه طب وحاولو اهله يجبرو يدخل طب، بس هو مو اي شخص هو حر ;

"حر يعني طليق مالك حق التصرف باموره ، شجاع لا يخشى احد هو خيل اصيل لا يمكن جموحه او ترويضه"

، حر مو شخصيه تنجبر على شي، مهتم لكلام اي احد خلاهم يحجون ويحجون وهو ساكت اتخذ الصمت رد مناسب لكل سوال واستفسار واعتراض حتى !!

وبكل ثقه راح ثاني يوم قدم كليه عسكريه محد گدر يسوي شي لان الكلام وياه مثل ما تحجي ويه حجر اذا مجان مقتنع بالشي ميسوي اي قوه متگدر تجبره ...

طبعا انقبل ودوام ولي ساعده بنيته القويه والضخمه وبفضل ذكائه وقوته الجسديه وحتى اصراره وحبه للحياه العسكريه گدر بوقت قياسي يثبت جدارته مقارنه باقرانه ميخاف من شي دائما ...

بده يحفر اسمه بكل معركه وبكل حرب الى ان گامو الكل يعرفو بأسم "ابو حرب" ...

كمل اليوم وراد يصعد سيارته وهو يأشر لابو واخوانه بانه رايح ...
وگفه صوت مجتبى ...
ع الخير ابو حرب وين رايح...

حر التفت وهو وبعده لازم باب السياره ...ابو مصطفى الصبح يمكم انشالله

مجتبى بعتب ...ادري خويه مطرود تره هاي عيبه بحقنه ونته ولد عشاير وتعرف هاي اهانه ابن خالتنه وجاي بنص بيتنه ورايح ينام بلفنادق

حر بحرج ...محشومين ابو مصطفى وما بينه هل امور، ونته كلتها ابن خالتك يعني مو غريب وعدكم خطار ولازم تفرغ الهم مكان ...

مجتبي باصرار وهو يلزم شاربه ...ازعل والله منك انام بلشارع وتنام بمكاني يله امشي خويه منتظريك ع العشه
حر برفض ...ل
قاطعه مجتبى وهو ...تفشلني ابو حرب
حر وهو يقفل باب السياره ويبتسم لاصراره ...ما عاش ليفشلك ابو مصطفى يله امشينا

مجتبى وهو يضحك ...دفوت يله خلصو الاكل بين حجينا ...

بقيت ابيت سيد صادق، خلو البيت للشباب كلهم نامو بلاستقبال والهول بس اني بغرفه مجتبى فوگ اصر الا انام بيها واني هم ردت مكان هادئ حتى الصبح ما اكعد ع الهوسه واني تعبان وماخذ اجازه من الدوام ...

حيلي مهدود جنت بس ارد اخلي راسي ع المخده اول مغمضت عيوني ...عيونها، نظراتها، خوفها، كل شي بيها اجه ابالي ...

بقيت اتگلب ع الجربايه اريد انااام، اريد اشليها من بالي
اعصابي انشدت اكثر كمت كعدت وانتجيت ع الجربايه واني اهمس بعصبيه ...
استغفر الله، شجلبت هاي ابالي

باوعت بصفي ع الكومدي اخذت جكايري والتليفون ردت انزل خاف يصير صوت ويكعدون زحمه نص ليل وراهم كعده ...

صعدت فوگ للسطح ...كفخني الهوا اخذت نفس واني اورث جكاره ...

انتجيت ع الستاره ،انفخ الدخان واني احاول اصفي ذهني بس هيهات وين اكدر اطلع عيونها من بالي،،
عضيت شفتي بقهر واني اسحب نفس طويل من الجگاره ...شجاك حر، طلعها من بالك، لا اول ولا احر مره تشوف وحده حلوه شجرالك هلمصكوعه جلبت براسك ...

قطع تفكيره صوت حركه التفت ملگه شي يمه ...مشه بفضول وحذر لمصدر الصوت رجليه ودنه للحايط اليفصل بين بيت السيد صادق وبيت جدهم المات ...

استغرب الساعه عدت 12 منو گاعد هسه باوع لسطح بيت جده اظلم ...اكيد حرامي ماكو غيرها
الستاره ناصيه توصل لنص صدره هذه علو الحايط بين السطحين...

سلاحه تاركه جوه بلغرفه، وماكو وكت يجيبه ...
طفر بخفه ومشه بحذر بخطوات سريعه وحذره ...
من قرب سمع همس وشهگات قريب عليه يسمع صوت انثوي يبجي ويهمس باشياء مو واضحه ...

باوع شاف وحده مغطيها الاسود عرف هذي وحده من اهل البيت ...
أنب نفسه شلون يباوع ع عرض غيره مو حر اليسوي هيج ...رجع بخطواته بس الوكفه ووگف گلبه بشعور اول مره يعرفه لمن سمع صوتها عتبها ،،

وهي تهمس بين شهگاتها بصوتها الناعم ...جدو ليش عفتني منو اليه غيرك انته الوحيد الجنت ادافعلي،
جنت سندي جدوو منو الي بعدك،
گامت تشاهگ بصوت اعلى وهيه تصيح بين دموعها ...
جدو حتى بجي ميخليني ابجي عليك،

لگه اجري تمشي وتقرب الها عرفها من نبرتها اللعبت بقلبه الصبح،  يمشي بدون عقل، شافها كاعده والسواد مغطيها من فوگ لجوه مقرفصه ولامه نفسها ووجها بين اديها...

ميدري كلامها ونبرتها ودموعها وتوسلاتها شسوت بي ...ميدري ليش اجه على باله يسحبها لحظنه ويهديها ويگلها اني سندج ميريدها تبجي ...
زاد نوحها وزادت توسلاتها وزاد وياهن دگات گلبه وعصبيته ...

لگه روحه صاح بعصبيه وبصوته العميق الحاد ...لتبجين كافي
بثانيه صوت بجيها وگف ووگفت وياه رفعت راسها بصدمه وخوف ورهبه تشوف مصدر الصوت المتوحش نفس الحركه خلت اديها على شفايفها تكتم شهكاتها وعيونها تدور بخوف ورعب ...

السطح اظلم الا من ضوه الگمره اليضوي وجها بس هو ميبين منه شي بس صوت انفاسه العالي يعلن عن وجوده ...

يفترس ملامحها خشمها الاحمر و شفايفها من البجي عيونها السابياته من الصبح لهسه منفوخات ومورمات من البجي ...خدودها حمر گانو الدم ما لگه مكان يجمع الا بخدودها ...

شكلها مغري، مهلك اله يحاول يسيطر على انفاسه ميگدر ...
شافها تخطو بخطوات سريعه تريد تروح ...

صاح بنفس النبره ...اوگفي
اتجمدت بمكانها بس بدون ما تلتفت لاحظ قبضه ايدها دلاله على خوفها ...
انب نفسه خلاها تخاف هيج
...حاول يلين حده صوته
حدري هين

بقت بمكانها ترجف بمكانها ودموعها تنزل وحدها وتعض شفتها بقوه حتى ليطلع صوت شهكاتها خايف اذا عرف ابوها صاعده وحدها فوك وشافها واحد يذبحها وخايفه اذا عرف خالفته وبجت على جدها وخوفها الاكبر من هذه الوراها ،

مشكلتها خوفها من كل شي مشكلتها ضعف شخصيتها، مشكلتها متگدر ادافع عن نفسها ...
مشكلتها بكل شي عدها مشكله !! هذي بكل بساطه نمارق !!

عصب لمن شافها مسمعت كلامه ونسى اختلاف لهجته وتوجيه كلامه وياها بلانباري ...

طلع جكاره خلاها بين شفايفه جدح النار بالقداحه ...وشاف جفلت جسمها ويه كل صوت سحب نفس طويل من الجكاره ونفخه بعصبيه وهو يحجي بحده وصوت اعلى ...
دحكيلي يبت الناس ...

التفت جسمها لا اراديا مع انو مفهمت معنى كلامه بس خوفها هو المشاها ...

باوعتله بعيونها الي يگدر يشوف داخلها ضعف وخوف
اتقدم خطوات بسيطه منها شافها رجعت لوره برعب همس بنبره حاول شكد ميگدر تكون هاديه ميريد يخوفها منه اكثر كره نضراه الخوف منها اله ...
ليش تبجين ،احد وياج

نمارق وهيه تشوف ملامحه القاسيه عرفته نفسه الشافته ابيتهم يربي هذه شجابه هنا ...همست وهيه تبعد عيونها عنه ...
اريد اروح وخر

حر بحده ...دحكيلي
نمارق باوعتله بعفويه وخوف مع انو متعرف شنو معنى كلامه ...
رجع كمل، جاوبي على سوالي ولتنزلين عيونج ليش تبجين

نمارق بدموع ...ما الك دخل اريد انزل وخر فدوه

حر وهو يعض شفته بعصبيه يريد يمسح دموعها بس ميگدر يفرگ بايده بقهر صاح  ...لتبجين ولج

نمارق ودموعها زادت وگامت تشاهگ ...اريد جدو حباب خل اشوفه اخر مره ، بابا ميقبل ابجي عليه يگول يتعذب بگبره بس اني احبه وما اريده يعوفني ...

حر بنبره حنيه وهو بده يسب ابوها وجدها لان خلو دموعها تنزل...كلام ابوج صح، اذا تحبي روحي صليله رگعتين، بس لتبجين كاافي

كال اخر كلمه بحده لان يحس نفسه فقد السيطره گدام منظرها المغري اله ...
انزلي ولغرفتج گبل ...

صحى من احلامه وياها على صوت المنبه لو بيده يكسره ويرجع لعالم الاحلام الوحيد ليجمعه بيها بس ميگدر ...يغمض عيونه ويفتحهم بصعوبه من اشعه الشمس التضرب على عيونه ...

اخذ ثواني يله استوعب هو نايم بلصاله وتحديدا ع التخم وگدامه نفس الكيكه والبطاله المشموره وصورتها بعدها على گلبه حاظنها وكانو هيه اخر امل اله بلحياه ...

حر وهو يضحك على روحه صارله كم سنه وهو حياته مثل الدائره تدور بي بس بدون هدف فقد كل رغبته بالحياه ...‏

شايفين من يصير سبب حزنك هو نفسه سبب فرحك ...هذه اني كل ما انقهر بسببها ارجع اذكرها وافرح ...گمت ما اعرف روحي

"وتُمر بية طوايف شوگ
واتذكر ضحكتك وأنسى كل حزني "

عاف الصوره على التخم بلحظه شال الكيكه راح للمطبخ شمرها بالزباله ...

يعصر جبهته بقوه من الوجع ...سواله گهوه
اخذ الكوب ومشه للصاله، ورث جگاره وهو يخابر ...
اول ما اجاه الرد ...صباح الخير سيدي
حر بصوت حاد بي بحه نوم وبنبره أمر... شنو وضع لميعه وعدنان والبقيه بلمستشفى

اجاه الرد ...سيدي لميعه عدها كسور بلرجل والساعد وبعض الرضوض وتشوه بلوجه من الضرب، وعدنان حالته اصعب بلعنايه المركزه احد الطلقات اجت بلكبد لحد الان مگدرو يطلعوها ،وحسب توقع الدكتور من تشخيص حالته عنده عاهه مستديمه ب ،، احم يعني مراح يگدر يخلف سيدي

حر بابتسامه تشفي بطرف شفته وهو يتذكر من هجم عليهم بعد ما سلطان اخذ بت عمه،

مخله عظم صاحي،بيهم جان متحلف الهم ياخذ حيف البنات الكسروها واليتموها والخطفوها وحرموها من اهلها لان يعرف بس ياخذهم للمركز ممكن بواسطتهم يطلعون،  لزم لميعه وعدنان گظه بيهم التوبه، مخله احد يدوسهم غيره،

جرهم لغرفه وقفلها اول مضرب عدنان طلقه برجله وميسمعون الجنود بس العياط ...

وره ساعه طلع من الغرفه اديه كلها دم وملابسه ...
گال للجنود بامر ...من دخلنا رمو علينه والكل جان مسلح وعرضو حياه الجنود للخطر، واحنه احذنا وضع الدفاع عن النفس ...هذه مختصر التقرير الي راح يتقدم
والزباله الجوه تنقل للمستشفى، اريدهم عايشين ...
ذب اوامره وشخط سيارته وراح ...

نهاا مكالمته ويه سيف وهو يگول ...اسمع ابني المراقبه عليهم 24 ساعه، اخلص شغلي واذا صار وكت امر عليكم ...

شكر التليفون وهو يسحب نفس من الجگاره ...

~~~~~'
كعدت من النوم على لمسات على وجهها ...فتحت عيونها بسرعه اتفاجاه بواحد گاعد على الجربايه يمها ويتلمس وجهها لا اراديا خزرته اتحولت لقمر الي ادافع عن نفسها گدام عدنان وهيه تدفع ايده وصاحت بعصبيه وهيه تتنفس بسرعه من الصدمه ...

وخر ايدك يا حقير شلون ،انته منو وشلون تجرأ تلمسني

عامر انقهر من شاف رد فعلها انقهر على وضعهم اخ ميعرف اخته، اول ما دخل للبيت ركضلها راد يگعدها لگه امه نايمه يمها بلاصح حاظنتها وتملي عيونها بيها تحس اي لحظه تبعد عنها ممكن ياخذوها ...
اتقدم راد يگعدها مخلته انجبر ينتضر للصبح واول مگعد اجه عليها ...

حاول يضحك وهو يلزمها من اديها ودخلها بحضنه وكللها بحنيه وسط اعتراضها ...اشش اهدي لتخافين حبيبتي اني اخوج الجبير عامر
اول منطق سكنت بين اديه

عامر همس من شافها هدت وهو يمسح على شعرها ...متصورين شگد فرحت من سمعت بيج موجوده،
بعدها من حضنه وبعده لتزمها ...
گلها بتحذير ...باعي منا وجاي اني اخوج اريدج تطيحين حظي بلطلبات تعوضين مال هاي السنين كلها،
اتفقنا ...

قمر وعيونها مدمعه ضحكت وهزت راسها بلموافقه ...
رحع حضنها وهو يحجي بحسره ... تدرين شكد جنت اتمنى تصير عندي اخت احجيلها اسراري افضفض الها، اذا اجد اذاها تشتكيلي، اذا اتعاركت تتحامه بيه

گطع عليهم كلامهم دخول ذياب ...وهو يصيح باعتراض ...
هاا بديتو بالمساسر والدس والخش،والطلعات من ورايه مو  باعو ولكم من هسه نتفق مدام بعدنا ع البر ...والله اطيح حظه ليتفق من وراي

عامر وهو گوه لازم ضحكته من كلام هذه المخبل رفع حاجبه وسوه نفسه عصبي ...اطيح حظ منو لك سربوت

ذياب وهو يگعد يمهم على الجربايه ...هاا لا ولك انته اخويه الجبير تاج راسي، اقصد على قميره

وهو يسحب قمر لحظنه ...اي دعوفها شويه ندري حلوه بس لا اجلب بيها دبكت يخوي ...

عامر باعتراض ...لتحجي على قمر لا رگبتك افصلها، وجيبها بعدني مشابع منها

قمر تباوع عليهم حااليا بحاله صدمه متريد تفرح، متريد اتأمل نفسها وبلحظه هل اهتمام والحب والعائله والدفؤ ينسحب منها ...

عدها تبقى قمر القديمه تبقى على نفس القسوه ولا تنصدم هيج صدمه تحس روحها مثل واحد جوعان من سنين وفجأ، يتقدم گدامه اشهى الاكل ،ويگلوله اكل واشبع ...

وبعده باول لگمه، يطلع حلم وكل شي يختفي ...
اول مره تجرب هيج شعور اول مره تنام بحظن ام، اول مره كل شي اول مره گاعد تجربه ...
متريد تفرح ...

~~~~~~
بمكان ثاني ...تحديدا المستشفى

تمشي بممرات المستشفى وهيه لابسه البالطو الابيض ...
شريط حياتها يمر ويه كل خطوه تخطيها ...سنين حياتها مرت وهسه هيه دكتوره، شخصيه قويه، انثى واثقه متنكسر ،الرجل عدها لا شي، كل الي يتقدمولها ترفضهم بسبب غرورها وجمالها الطاغي...
ضحكت باستهزاء، هذه المضهر الخارجي هذه ليبين للناس بس اني من الداخل، انسانه محطمه ،مكسوره،وحيده، مخذوله كله بسببه
شكد انظلمت بحياتي ، بس هو  ظلمه وكسره اليه جان ذباحي،

بعده روحي ماتت، بعده ادمرت، عبالي بعده كملت حياتي مثله ضحكت باستهزاء وهيه تدخل لمكتبها وتسد الباب وراها ...
دموعها نزلت تمسحهم بقوه وتهمس بضعف...
ولج كاافي بجي عليه ،ولجن مفرقتن وياه من عافني وراح لحظن غيري وكسرني ليش تنزلن عليه،

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

مساء الورد 🦋 ...

# بنوتات الحمد الله حليت البارحه المشكله، والخلل صاير بلواتباد عموما بسبب التحديث راسلت wattpad support وگدرت احله ،طبعا منشرته ع الانستا لانو حتى اني انمسح مني بعد ما اعدت نشره 3 مرات بس الحمد لله رجع كل شي طبيعي واذا اتكرر ثاني مره حينشر البارت بنفس وقته ع الانستا ...

# عدد كلمات البارت 2500 كلمه حبيت يكون تعويض صح تعبت لانو حاولت استعجل شكد ما اگدر بس تستاهلون 🕊️
وانشالله باجر انزل بارت ❤️

وقبل لا انسى اكو هوايه ينتقدون صور الشخصيات بلضبط شخصيه نمر (ابو ناصر)  الي هيه صوره صدام...بنات اني من اختار الصوره ما الي دخل بالانسان ومنو هو اني اليه انو دا شوف بهاي الصوره الشخصيه الاريدها وخلاص مو مهم منو هو او شنو سوه، تمام

#يفدوه