رواية الراقصه والسلطان الفصل التاسع عشر 19 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا

~كورنيش الاعظميه 12:00 ليلأ

گاعدين يتعشون ويضحكون ...مسويلهم كعده عربيه

سلطان ما كله شي باله بعيد خايف لا يصير عليها شي

حس عليه ابو حرب كله وهو يحاول يطمنه ...ابو شاهين لتخاف هيه ليله وكل شي يخلص

سلطان بنبره قلق ...ابو حرب خايف يسوولها شي ذوله وحوش،مشفتهم صارلنه شهر يله كدرنه ندخل بينهم

ابو حرب ...لتخاف عليها مبينه بت عمك ذيبه وقويه متشوف مگدرو يمشوها بطريقهم، وبعدين هل سنين كلها هيه عايشه هناك بنصهم اجت على هل ليله

سلطان بعصبيه...لو جنت ادري ثانيه ما اخليها والله بس اااخ لو اكضب ذاك السربوت

ابو حرب ... الحجي ميفيد بعد، وباجر كل شي يخلص وذولاك دواهم عندي ...

كملو عشه ونزلو جوه و كعدو گبال دجله يشربون ارگيله وجايات...

قيس گال  ...ابو شاهين بروح الاعزاز غنيلنه على هل گعده الحلوه والهوه ليرد الروح ميحله بدون صوتك ...

سلطان وهو يسحب نفس من الارگيله وينفخه گال بصوت خشن ...بويه منا الوادم خلينه نريح راسنا ونروح ورانا كعده هيه مال غنه

ابو حرب بخنگه وهو يجر نفس قوي وهو يباوع لدجله  ...سلطان غني يا ريل

سلطان باوعله شلون يدخن بحرگه وهو يعرف البي وگلبه مكسور على صديق عمره والصار بي شلون الدنيا كسرته ،يشوفه كاعد يدمر نفسه شويه شويه حياته عباره عن شغل واي مهمه خطره يذب روحه بيها،وبلليل يشرب لحد ما ينام ... 

شكد يحجي عليه،يگله ليش تسوي بروحك هيج ليش تذب نفسك على الموت،  ماكو فايده يضحك ويگله
اني ميت من زمان هيه روح وحده واخذتها وياها ...عليمن بعد اخاف

جر نفس وگام يغني بصوته المبحوح ...
وصل المقطع ...

يا ريل طلعو دغش والعشگ جذابي
دگ بيه طول العمر ما يطفه عطابي
نتوالف ويه الدرب وترابك ترابي
هودر هواهم ولك وحدر السنابل گطه

همس ابو حرب وهو يبتسم بوجع وينفخ الدخان ...
اي والله طلعو دغش

عافهم وكأم راح للسياره ورجع وگف كدام النهر ...

سلطان اشر للولد يرحون وكام لحگه عرفه راح يشرب ...

منطي ضهره خله ايده على جتفه وكله بعتاب

أي مو يزي بعد لشوكت تبقى هيج تبقى تشرب هل سم، عمرك 35 لا زواج لا مره لا طفل دافن نفسك بالشغل،

ابو حرب وهو مخنوگ وهو يحس بگلبه مذبوح شررب البطل البيده مره وحده ونار كلبه متطفه يريد ينساها يريد يمحي صورتها من باله متروح  گله بوجع ...شسوي بيهم ،ما ريد المره اذا مو هيه وما ريد الولد اذا مو ابنها ما ريد بنيه اذا متطله تشبها، ولك سلطاان صار سنين معلعل گسرتني تعرف شنو كسرتني ...
وهذه وهو يشمر البطل الوحيد لينومني الليل تدري شكم مره ردت اعوفه، بس يجي الليل اتخبل بدي اشگ صدري واطلع گلبي وارتاح ...

سلطان وهو يريد يصحي كله بانفعال... والله لو ما اتزوجت جان جبتها الك من حلگ السبع وزوجتها الك غصبا عن كل شارب بس افتهم يخوي اتزوجت من سبع سنين، وحرام الگاعد تسوي بروحك والله كفر تضيع روحك ...انساها يخوي مو كافي السويته بروحك من وراها

ابو حرب وهو يگعد على طرف النهر  ...لك سلطان افهمني لك تمشي ويه دمي وهو يرفع ايده وياشر على اوردته ...حاربت كل الدنيا على مودها وجنت مستعد احارب لموتي لحد ما احصلها ...

مو اكلك بس هذه السم ليخليني انام ليلي اتخبل تعرف شنو اتخبل واني اتخيلها نايمه هسه بحضنه هسه باسها هسه جاسها  ...

تدري العدوي ما اتمنى ربع الگاعد يصير بيه ،شسوي بحياتي بعد وهيه عاافتني واتزوجت غيري كتلها صبري لخاطري اتحملي بس شنو تاليها ...

كام يصيح بقهر ...لك شنو ذنبي اذا اني سني وهيه علوويه اي كفررت من حبيتها ...من انعل ابوها الما انطاها اليه

سلطان ...بعد ميفيد الحجي بويه راحت ها هيه وصارت الغيرك، الدنيا متوگف علي،احد

ابو حرب همس بوجع وعيونه دمعت...لا توگف جذابين الگلبه مو بيده ماله دنيا بعد بيدها يصير الهوا التتنفسا اذا مو يمك هيه تموت ...هياني گدامك وهو يرفع اديه الاثنين مالي حياه بعدها ...

صرت عميد عندي املاك عندي فلوس ومنصب والكل يخاف مني ...بس شنو الفايده جبت عمري متلوع الراحه مفاركتني بفراگها

تدري شنتظر، انتظر اشوف الندم بعيونها لان ادري الخذاها ما يحبها ربع حبي، بس الكارثه تدري وين انه طول عمري ما خفت من احد ذاب روحي بلنار انتظر ربي شوكت ياخذها...

بس هيه اخاف ملكاها صار سبع سنين من شفتها اخر مره بيوم زفتها واني ادري

الراحتلة جسد يتركها تاليها
الذبت روحها بحظنه يذبها رماد
يحفر ساسها ويدفن معانيها
گالوا ما تجي 💔!
بس هيه راح تعود
تجي ادنگ الراس وحيل مجروحه
الماخذها يعرف يجرح الميته احساس
ورأحت مني بيها أثار مفضوحه
گتلها تره تروحين وتردين
وروحج بالاشواگ تصير مرجوحه
لا تنطين روحج لليعزب بيج
رادج بس جسد ما رادتج روحة
شما هانت جروحج يختلف ملگاج
قبل جانت اعثوگج تنگط ملوحه
هسه اتغيرن كظ العثوگ رخاص
المالحته قبل ياهو اليجي يلوحه

سلطان وگلبه محروك على صاحبه وهو يسب العشگ ليخلي الزلمه هيج ينذل، لعد شگد شايل گلبك  ...كافي لخاطر محمد، امك شنو ذنبها محروگ كلبها عليك تشوفك بلسنه مره اخوتك كلهم اتزوجو وعايشين حياتهم الا انته لا تدري باحد ولا داري بروحك ...

ابو حرب بوجع...ذنبها خلتني اشوفها ذنبها هيه بت اخوها ذنبها راحت زفتها بيدها، سلطان ما اگدر ادخل ذاك البيت اختنگ كل شبر بي يذكرني بيها، اروح دقايق من الباب احس سجاجين تحفر بگلبي ...عوفني سلطان بهمي، امشي نروح للبيت ورانه شغل الصبح ...

*******

قمر كعدت بلليل على صوت رگع الباب وصوت عدنان يعيط ويدفر بلباب باوعت لروحي متخربطه بلحمام گمت بسرعه واحس جسمي مكسر لا يفتح الباب هذه الحيوان واني بهل حاله ركضت للكنتور بدلت واديه ترجف من البرد ومن الخوف

واني اتخيل روحي هل سنين كلها عايشه ويه وحوش ويطلعون مو اهلي يعني نظرات عدنان وكلامه كل شي بده يوضح اليه بس خوفي زاد لان اتخيل عدنان يسوي بيه مثل ما يسوي بكل البنات شلون گدوت اكمل وياهم ما اعرف ..!

ركضت للباب وخليت الكرسي علي اليده ودفعت الكرويته هم عليها واني اسمعه يعيط  ...

شردتيها يا ساق###  لج اذا ما شربت من دمج يا ادبسز ...ما اطلع عدنان

حمدت ربي كدرت اهزمها لان اعرف بيهم ما الهم امان ...ما كدرت اتحمل اكثر واني اسمعه يسب ويفشر وكتله واني اعيط ...

الساقط يعرف روحه زين، وااي شردتها وغصبا عليك بعد شتريد...

عاط وهو يدفر الباب ...لج والله اله اطلع روحج بايدي يا كح###

قمر ...تمشي منا لا اخابر على ابو شاهين اخلي يعلمك الكح### شتگدو تسوي بيك،

سمعته گال وصوته يبتعد...سهله، سهله

خليت ايدي على گلبي وحمدت ربي ...

باوعت للساعه 3 الفجر ...

خايفه من باجر ومن المستقبل ما اعرف شراح يصير بيه، اريد احدد افضض اله همومي  اريد احس بامان اريد احد يساندني ...ما عندي احد التجا اله احسن من ربي...

رحت توضيت ...
انشالله ربي يشوفني ويتقبل صلاتي وسط هل قذارات، 
كعدت على السجاده صليت وسجدت بخشوع  ودموعي گامت تجري ...

ربي تعبت من الهموم حيلي خلص، اريد ارتاح ،الهي اذا بيها صالح اليه يسرها اليه ودليني على طريق الصواب،
لحد مغفيت على لمصلايه ...كعدت شفت الساعه ب 6 او نص ...

گمت حضرت جنطتي مال مدرسه خليت بيها كم هدم اليه وفلوسي والذهب ماا اريد اخذ شي منهم بس مجبوره ما اعرف شراح يصير اليه، منو يگول هذه ابو شاهين صادق يجوز يطلع مثل عدنان ...

لبست بنطرون اسود وبدي اسود وفوكاها صدريتي ضفرت شعري باوعت للمرايه لرگبتي ...همست بحقد حقير الله يكسر سنونك، هسه شيوخرهن

خليت خافي عيوب وحاولت اكثر بقه اثر خفيف  ولبست جنطتي بظهري ...

باوعت للغرفه واني اتذكر شريط حياتي ايمر عليه بهل غرفه والذكريات السيئه بكل ركن منها معقوله هاي اخر مره ادخلها ...

دفعت الوره الباب وفتحته على كيف حاولت ما اطلع صوت ...

طلعت من البيت واني ممصدگه بعد ما ارجع اله، بحياتي محصلت شي بسرعه، وحتى لو احصل فاخسر مقابيله شي اكبر ...

مشيت للمدرسه وبگلبي شي واحد بس اريد اشوف حسام ...حتى لو اخر مره بس المهم المحه

قبل لا ادخل فرع المدرسه وگفت سياره سوده مضلله ضخمه مديل حديث  بصفي ...نزلت الجامه شفته نفسه
اول مشفته رجف گلبي بقوه واحس خوفه لزمتني ...

گال بصوت حاد...اصعدي واني اسمع قفل الباب ينفتح

كتله بعناد وحده واني اباوعله من الجامه ...ما اتحرك خطوه منا اذا ما افتهم وين موديني وانته منو

سلطان بنفس النبره گال وهو يباوعلها بخزره
...صعدي وبعدين تفتهمين كل شي

قمر بنفس العناد وهيه اجتف اديها ...

تؤؤ وهيه تمط شفايفها ما اتحرك منا لحد متگلي كل شي ليش ائمن بيك يجوز تطلع مثل عدنان اذا مطلعت الباشا مالتهم

سلطان مسح وجهه بقله صبر راح يفقد اعصابه من عنادها وهو اكثر شي يكرها احد يعانده ويعلي صوته عليه عظ شفته بقهر وعصبيه وبثانيه نزل من السياره
اتقدم الها بخطوات واثقه ...

قمر من شافته اجه لا اراديا رجعت خطوه لوره رغم هيه تحاول تبين قوتها

لزمها من ايدها وسحبها اله وهيه تصيح ...
عووفني ياا حق

عاط بيها ما خلاها تكمل بخشونه وعيونه حمر...حسج ما اسمعه لا والله السانج اكصه

فتح الباب ودخلها بقوه وقفل الباب صعد بالسياره يباوع لگدام وهو يتنفس بسرعه ويحجي بعصبيه ...
انه ابن عمج سلطان ال نمر ،

باوعت اله قمر بصدمه ...اا
ما خلاها تكمل ...

ابوج عمي الشيخ شاهين وجدج الشيخ نمر انخطفتي من وانتي بللفه بسبب عداوه ما عرفنه منو  ...گلبنه المدينه كلها عليج لحد ملكينه ملابسج عليهن دم الكل گال ماتت ...

قبل شهر عرفت بيج انتي عايشه وطلعو الجانو خاطفيج عمام امج سميه، والباشا هو واحد منهم و انطاج اللميعه وعدنان ...

وهسه صوتج ما اسمعه الردتي تعرفي كتلج عليه لازم نطلع هسه من بغداد ماكو وقت ...

حجه وهو يحرك السياره...
قمر ساكنه امكانها محجت شي ممستوعبه كلامه ...حست بالسياره تتحرك لا اراديا خلت ايدها على ايده اللازم بيها الگير
گالت بسرعه بصوت ضعيف ...انطيني عشر دقايق اسلم على صديقتي وارجع

سلطان عينه على ايدها اللازمه ايده بسرعه سحبتها من استوعبت السوته ...گللها وحاول يخلي صوته طبيعي... احم ماكو وكت لازم نطلع هسه ولا كل شي يخرب ...

باوعتله وعيونها مدمعه وبنبره توسل ...فدوه بس عشر دقايق ...

صفن بعيونها ثواني ودار وجهه وهو يغمض عيونه ويگلها بصوت هادئ ...روحي بس لتتاخرين

نزلت بسرعه من السياره راحت تركض للمدرسه باوعت للباب مشافته جانت تتمنى تشوفه ...دخلت للمدرسه بقت ادور على زينب اول مشافتها راحتلها بسرعه ...

وكفت گبالها ...وهيه اطلع شي من جنطتها

زينب باوعتلها وگالت ...جنت انتظرج ليش اتاخرتي مو ع

مخلتها تكمل حظنتها قمر بقوه وهيه تهمس ...شكرا على كل شي جنتي اكثر من اخت اليه واسفه اذا بيوم اذيتج لو جرحتج راح اشتاقلج ...

زينب تريد تفتهم الدا يصير ومكدرت تستوعب من سرعه قمر ...بعدتها قمر ولزمت ايدها وخلت بي ضرف ابيض ...
كالتلها هذه امانه لحسام،

عافتها وراحت بسرعه وزينب تصيح وراها بس قمر كملت طريقها وهيه تبجي، ودعت اجمل شخصين جانو بحياتها ...

صعدت للسياره وهيه تمسح دموعها ...وگالت بهمس تگدر تمشي هسه

باوعلها سلطان بنظرات غريبه ...وخر نظره منها بسرعه رفع تليفونه ...
سمعته يحجي بامر ...ابو حرب نفذ

حجه وشخط السياره ...

الراقصه والسلطان
#حور حيدر
#الانستغرام: enghour98
الواتباد: eng_hour

❤️❤️❤️

ابو حرب 👆👀

صباحكم سكر 😍
صوتو للبارتات السابقه 👍
نلتقي عگب باجر بنفس الموعد ❤️اتمنى عجبكم البارت

#يفدوه