رواية الراقصه والسلطان الفصل الثالث والأربعون 43 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

ول بويه شتسوين بيه گولي ...

قمر خافت من قربه وعيونه نظراتهم ترعبها...
بيه شي يخوفها مع انو بعمرها مخافت من شخص عدنان شكد جان يأذيها بس ولا يوم خافت منه تردله الكلمه بعشره واذا ظربها ترجعها اله بنفس اللحظه قمر طول عمرها تموت ولا تنام ومماخذه حقها...

بس قوت نفسها غمضت لثواني وفتحتهم وهيه رافعه حاجبها ورفعت طرف شفتها الممليه بضحكه استهزاء وهيه تربع اديها على صدرها...

حجت بنبره ناعمه وهادئه وكلها تحدي...

ارجعها الك بالمثل گدام كان من كان... الكلمه بألكلمه والاهانه بالاهانه مو قمر التسكت عن حقها
وصدگني اذا سككتلك كم مره
فبمزاجي...

يباوعلها بهدوء وملامحه متغيرة وكانو مجانت تحجي وياه كلام اليعرف سلطان زين يدري بيها متطلع سليمه من ايده بعد كلامها...
مسحها بنظره من فوگ لجوه وهيه تعرف شنو معنى النظره هاي ...
وهو يمسح طرف شفته بابهامه الي بي السبحه...

عرف شلون يضربها بالصميم من شاف وجهها صار احمر من العصبيه...
گاللها ببرود...

بويه تعرفين من شنهو چنت خايف گبل لا اجيبج من بيت لميعه...

هيه سمعت هل اسم گلبها انقبض وتحس بركان گايد بيها وتريد تذب كل ناره عليه...

كمل بنفس النبره وعيونه تأكل ملامح وجهها...
الگاج نسخه مصغره عنها او وحده من السرابيت لهناك... رفع حاجبه الها

وهل شي تعرفين مايعجبني... وانه المايل حالو  والما يعجبني اكسرلو راسو وادگو لحد مينعدل...
گتلج اسلوب لميعه تركي...

اتقدمت خطوه منه وانفاسه تظرب جبهتها وخلت اصبعها على صدره وكالت بنبره تحذير وعيونها تدمع باوعت بعيونه  وشفايفها ترجف ...

لا غلطان ابن العم... هذه مو اسلوب لميعه
هذه اسلوبي اني قمر وعاجبني...

ولي ميعجبنه شايف كم حايط هنا هوايه... يروح يرگع راسه بيهن واحد واحد... حتى يعدل راسه المايل

بقه يباوعلها بنظرات مفهمتها ولا جان همها تفهمهن جانت تريد تجرحه ترجعله طعناته الي طعنها بكلماته...

وهاا صدك قبل لا أنسى اذا اني من السرابيت... فإني بت عمك محسوبه عليك فلي يشملني يشملك...
كمل طريقك درب السلامه...

تباوعله وتحجي وهيه تبتسم رغم عيونها لمدمعه بس تسيطر على نفسها زادت ابتسامتها الشمتانه وگلبها برد وهيه تشوف عيونه البارده أظلمت من العصبيه وملامحه صارت ترعب...

خافت من رده فعله فرجعت خطوه لوره تحظر نفسها تشرد... بس محست الا واديه محاصرتها...

رادت تحجي بسرعه وتبرر وهيه تشوف شلون صار يخوف جنه وحش صدك خافت منه.. سسلطا

بعدها ممكمله صاح... هششش حسج اكتمي

جاوب تليفونه الي رن وهو يباوعلها...
فجأ نترها من ايدها بدون ميديرلها بال...

لزمت ايدها من الوجع وهيه تهمس بقهر... انشالله كسر بيدك يا سافل يا حقير...

سمعته يحجي بنبره خوف وبعدين كام يصيح بعصبيه واستغربت منو الحاجه وگلب حاله هيج هل جلمود...

لك بويه غير تگولولي...
شنو متخوفوني شايفيني حرمه وظمون عليه بالقرآن لاكسرك انته وذاك السربوت الاخر...
كافي اسكت... هسع هو شلونو
جايكم هسع اني...

سد التليفون ومشا باستعجال وانطاها ظهره خلت ايدها على گلبها واخذت نفس وهيه تتلمس اديها وتدردم عليه...

دحجيلي هين يمعثوره...

مندمجه تحجي عليه محست اله صوته يصيحها فزت بخوف عبالها يمها رفعت راسها شافته بعيد عنها بمكانه...

كاللها بتحذير... اعتذري عن كلامج

قمر بعناد... شايف السما لو تلگها بلسانك هم ما اعتذر منك

سلطان ببرود... بويه انطيتج فرصه وانه ما سويها

من ارجع حسبي حسابج ان ما خليتج تتندمين وتجين لعندي تعتذرين ما كون انه سلطان يبت لميعه... اودعناكم

قمر الخوف سيطر على گلبها من كلامه والأفكار الخبيثه توديها وتجيبها... گامت تحجي ويه نفسها

اني بت لميعه والله لو ما امك ميته
شيريد يسوي يعني... اوووه ضربت رجلها بلگاع
طبه مرض هسه ليش افكر بي...

اتذكرت سمر عافتها وحدها وحالتها مبينه مو زينه...
دخلت البيت دورت جوا ملكتها...
صعدتلها لغرفتها... فتحت الباب وهيه تگلها

وج ليش مگتيل...

وگفت عن الكلام من الصدمه وهيه تشوف سمر ذابحه نفسها من البجي وتلطم على وجهها وتدك...

قمر سدت الباب بسرعه وركضتلها وهيه تلزم اديها...
ولج شبيج كاافي ليش دا تسوين هيج بنفسج

سمر فحطت من البجي ووجها صار احمر وگوه تاخذ نفس... عوفيني قمر عوفيني استاهل بعد أكثر... وهيه توخر اديها

لزمتها قمر بقوه وهيه تصيح عليها... كاافي اتخبلتي دفهميني شصار

سمر واديها رخت ودموعها تصب... ولج نزلت راس اهلي وسلطان خذلته خذلته...

اني ثوله بس كله من گلبي وج والله مو بيدي من شفت المسدس بيده واني اعرفه مخبل ويسويها روحي رادت تموت قبله... لساني نطق وحده والله غصبا عني رجعت اله واني اعرف بسلطان مقابل...

قمر شافتها هدت شويه عافت اديها ركضت جابتها مي واجت گعدت يمها...

اخذي اشربي وهدي نفسج... وخلينا نحجي شويه شويه

بعد ما شربت وهدت حجت سمر الصار...

قمر بهدوء وبرود... يعني هاي المسرحيه المسويتها والفلم الهندي صارلج ساعه على هاي...باعيلي باعيلي  امداج

سمر بصدمه... وسم شبيج

قمر بنفس البرود... مدام اختاريتي يعني گلبج بعده يحبه وتموتين عليه هم عوبه ما منج چاره

سمر باعتراض وهيه تكابر... قممممر اللصمي عمتج واكبر منج احترمي بعدين لا ما احبه بس انقهرت عليه

قمر بلا مبالاه... عمه العماج هو منو معتبرج عمته ومحترمج
واسكتي لا تقاطعيني... لا تحبي وصح غلطان وياج من ساسه لراسه...

بس تصرف هذه الحقير سلطان خوش تصرف مدري شعجب طلع يعرف يتصرف...

سمر ضربتها على ايدها... اياا حقيره لتحجين على سلطان قميره والله ازعل منج كله ولا سلطان خط أحمر

قمر غمضت عينها بألم نفس ايدها الضربها عليها سلطان... اااخخ ايدي، كسر بيدك ان شاء الله سلطان

رادت تحجي سمر بس مگردت دخلت سميه عليهن...

سميه بقلق وهيه تشوف حاله سمر كعدت يمها وسحبتها لحظنها...
شبيج يمه ليش كل هل بجي ابو عامر گلي شوفيها وين اختفت

سمر وعيونها حمر من البجي وأثر الدموع على خدودها...

يمه شلون اشوفهم وجهي بعد و سلطان زعل مني ادري بي  والله
، ما أريده فيصل بس مدري شلون حجيت امداني وامده حظي واللساني الي حجاهه...

سميه بضحكه... كافي ولج لا تحجين على نفسج، يمه سمره مهما صار هذه رجلج وربج زارع حبه بگلبج بعدين كل زوجين تصير بينهم انواع المشاكل، صح غلطته چبيره بس رد واعتذر واترجا وانظرب وانطرد وانهان وترا هاي مو سهله للرجال يسوي كل هل شي على مود مرا ...

خلي هل شي أبالج فيصل شاريج
وترا سلطان ما سوا كل هل شي الا من قهره مني لا عبالج يكرهه ابدا... بس سلطان زعله ثگيل وهل مرا الشغله تمسچ يعني سلطان راح يندمه على الحليب الرضعه...

سمر بضحكه... يستاهل وابو زايد بي

سميه وأخذت نفس من شافت ضحكت سمر اندارت لقمر... شتگولين يمه قمر

قمر وهيه تگوم... شغله بيها سلطان غاسله ايدي منها للعكس

عافتهم وطلعت وهيه تسمع سمر تغلط عليها وهيه تبتسم نزلت جوا من باب المطبخ طلعت للحديقه گعدت على المرجوحه رجعت راسها لوره وغمضت عيونها ...

تريد تبقى لوحدها تبتعد عن الكل... كلام سلطان يرن بأذنها وهيه تحاجي نفسهة معقوله الكل اذا يعرف وين جنت راح تتغير معاملتهم اليه ويصيرون يعاملوني مثل سلطان... ما راح اتحمل سلطان واحد كلش كافي كلامه سم يضرب بلعظم يوم الأسود الشفتك بي

طلعت حسره من گلبها... ااووف يا ربي والله تعبت

همست بشوگ وتعب وهيه تباوع للسما...حسام وينك
طلعت تليفونها الجابه الها ابو عامر فتحت الفيس بحثت على صفحته ابتست بحزن اول مشافت صورته همست وعيونها تدمع لا إرادي ويه ابتسامته بالصوره...

بس انته چنت تحبني صدگ محد راح يحبني مثلك... اشتاقيتلك، اشتاقيت لصوتك ولكلامك

تدري شگد اتمنى هسه اسمع صوتك وعزلك...
شكد مجنت كارهه ايام بيت لميعه بس انته الشي الحلو البيها
الله عليك لتنساني...

وره شويه سمعت خطوات تتقرب منها رفعت راسها شافت ابوها يتقدم عليها والابتسامه مزينه ثغره وگفت بارتباك وهيه تمسح دموعها قبل ليشوفها وضمت تليفونها بجيبها...

ابوعامر وهو يحاوط وجهها باسها من جبينها وهمس بهدوء ورزانه... مساج الله بالخير بويه شلونها بنيتي

قمر وهيه بعدها مشايله الحاجز بينهم شكد متحاول متگدر... مساء النور الحمدلله
ابو عامر گعد وسحبها لحظنه وهو يدخلها بحظنه ويشم شعرها كل يوم أول ميگعد يروح لغرفتها يخاف لا تنخطف صار بي خوفه يفگدها...

ول بويه الحگولي گمره ابوها ليش گاعده هين لوحدچ

قمر بهدوء وابتسامه وهيه ترخي راسها على صدره ...
حبيت اگعد لوحدي شويه

ابو عامر... گمره بويه احد مكدر خاطرج

قمر تتمنى تحجي وتشكي وتگله ابن اخوك هو الكدر خاطري وهاني بس ما اگدر احچيلك اعرف شنو هو بلنسبه الك هم راح تغلطني گدامه وتطلعه الفارس المنقذ...

قمر اختنگت من اتذكره وهيه تحس ما الها احد تشكيله وتستند عليه... گامت فجأ من حظن ابوها وگالت بسرعه...

تصبح على خير نعسانه ارد انام...
عافته وصعدت لغرفتها...

نزلت سميه الشيخه وبيدها سمر طلبت منها تجيبها...
اول مدخلن لغرفه الشيخه وضحه...

انهدت الشيخه بسمر

وله سمره يوله عجل مو گلتي ما ريدو كارهتو انجعلج ب البين اليصگعج...
اول مشفتي غنيتيلو

يوليفي عگبك فلا گلبي انسعد

سمر وجهها صار احمر من الاحراج وگامت تبجي...

سميه وهيه تضحك... شيخه ليش هيج مو صارلي ساعه اسكت بيها وما صدگت ضحكت
الشيخه وضحه وهيه تباوع لسمر ... جعل ما ضحكن ضروسج گولي امين

سمر زاد بچيها رادت تطلع ...

الشيخه صاحت بيها وهيه ترفع عصاتها... اگفي يمعثوره وتعالي هين لا اللعبها على جنبج...
........

عامر  مگدر ميبين صدمته بالخبر معقوله مخطوبه وتحبه مگدر بتخيل انجن...

اعصابه گامت تغلي همس بقهر
والله اموته ولا اخلي ياخذها هل خنثه محس بنفسه الا وهو يگول بعصبيه...

لعد وينه الشفيه وهيه بهيج وضع،

جنيد باستغراب من حاله عامر ... مسافر يدرس بأمريكا ميدري بالموضوع كله

عامر بعصبيه وهو يروح وييجي ويعض شفته بقهر... شلون لعد هسه ننتظر الشفيه لحد ما يكمل وييجي والخاتون الله يعلم وين تصير لحد ما يحن ويرجع...

جنيد ويحاول يهدي لان يعرف عامر اذا صار عصبي ميشوف گدامه   عامر شبيك خويه...

اكلك الولد ميدري مقبلت فيان نگله
عامر وهو يأكل بروحه يحاول يهدي روحه ميگدر اختنگ من طاريها معقوله اهل درجه تحبه  صاح بقهر...

لعد المن حاسبته خطيب صوره جرجربه متگلي

جنيد وهو يلزم ايده... اهده عامر صوتك ترا وضعك مو طبيعي  كتلك فيان مقبلت نگله وابويه گال بس تصير زينه نسفرها اله بعد ما يعقدون حتى نخلص من عمامها... وميكدرون يوصلولها بس ما اتوقع لهنا يوصلون بهل سرعه ...

عامر نتر ايد جنيد باوع لبابهم شافهم بعدهم واگفين ... جنيد لتلغي زايد الگلتو راح يصير وبس...

اليوم أعقد عليها روح صيحلي ابوك ولتخلي احد ينتبه عليك فيان بامانتي افتهمت وابن عمها الچلب وصل للمستشفى هسع يأخذها ويروح وما تعرفولها مكان وتالي خلي يفيدها ابن هذاك السربوت ابو امريكا ...

جنيد ... عامر تحجي صدگ انته عمامها تارسين بابنه واليوم فاتحه امها شتعقد عليها

عامر وهو يعض بشفته من العصبيه صاح وهو يضربه مرحبا على جتفه ... هي سربوت گتلك روح انگلع صيحو لابوك لا انعلو لابوك على هل برود

جنيد وهو لازم ايده رغم كل الظروف بس حصرته الضحكه يعرف عامر ولسانه... ولك مو ابويه الراح يزوجها الك ليس تسبه

بعدين يا اخي اني ابن خالها ومقابل بيك گوه هيه

عامر وصل حده مد ايده لحزامه يسحب مسدسه...
جنيد شافه رفع ايديه بمعنى استسلمت... ولك المخبل رايح اصيحه

عامر شافهم ركبو سياراتهم وراحو  صاح جنيد... اگف اگف جاي وياك انه

جنيد وهو يمشي همس ويصفگ ايد بايد ... خبل رسمي بالعباس

عامر وهو يعدل ياخته... انه الخبل لو انته يمصگوك عجل اكو واحد فاتح حلگه جنه شريعه يتمضحك بفاتحه خالته

جنيد وهو يضحك رفع راسه ... استغفر الله، الله يرحمج خالتي والله مالي شغل هو يضحكني بحجيه المصلبخ

دخلو لبيت جنيد الزلم ملتمه وصاير هوسه عامر شاف ابو جنيد وشاف شلون الهم مبين على وجهه عرف... أتقدم اله بثقه وعاف جنيد وراه...
الي انصدم وهو يشوف ابوه وعامر طلعو  من الغرفه الي دخلولها من نص ساعه...
اتعدو وعامر يغمزله وصعدو سياره عامر...

...

نمارق نزلت من غرفتها وهيه صارلها كم يوم حابسه نفسها بغرفتها حتى المستشفى متروح اخوها وزوجته حاولو يحاجوها رفضت...
تگلهم اريد ابقى لوحدي...

حتى ابن اخوها الصغير الي ربته على ايدها ومينام الا يمها ومياكل الا من ايدها ما سئلت عليه ولا نزلت وهيه تسمعه يبجي...
بس هسه قررت تنهي كل شي...

راحت للاستقبال شافت اخوها مجتبى گاعد هو ومروه مرته الي ابتسمو اول مشافوها ...
كالتلهم بدون مقدمات...
رجع خبر لدكتور قتيبة وافقت عليه...

_______💕

صباح الخير جميعا...

بنات نبلش اليوم بلدعم وان شاء الله الكل يستفاد منه... والبنات الي دازيلي تم ارجعو دزولي حتى تصعد رسالتكم حتى حقكم ميضيع...
وراح اسوي قائمه قراءه روايات بصفحتي أضيف بيها الروايات الي راح انشرهم للكاتبات الي يستحقون الدعم

ومثل مكتلكم يا ريت الكل يدعم ويشجع الثاني بهل حاله الكل يستفاد فلي انشر حسابها تابعوها عمود من ينشر حسابكم يتابعوكم ولي ميرد المتابعه الغو متابعته متفقين 👍😂... ونبلش ويه اول كاتبتين

rwhalhyatاذكر المستخدم

zahraa_Rkاذكر المستخدم