رواية الراقصه والسلطان الفصل الثالث والثلاثون 33 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

سمر جانت معصبه تريد تستوعب الصار متگدر من سيطرته التامه عليها ...

مشاعر جديده عليها الخجل والصدمه سيطرو عليها اديها على صدره تحاول تدفعه وهيه تصيح  ...

وخر فيصل شگاعد تسوي عزا وهيه تلزم فستانها وتحاول تبعد اديه..كاافي عيب، هسه يدخل احد علينه

وفيصل وهو يحاول ينزل كتف فستانها ...
صااحت بخوف وخجل ...رااح اعيط والله فيصل فدوه وخر شبيك گاعد تخوفني

فيصل وهو يرفع راسه وهو يلهث ونظراته اتغيرت همس بخشونه ...
واديه تتلمس وجناتها، يمرر اصابيعه عليها بحنيه ...
ممصدگ ...

سمر باوعتله باستفهام ...

كمل وعيونه متفارگ عيونها واصابعه تتلمس وجهها بحنيه  ...يولي جنتي اليه حلم،كل ليله انام واتخيلج بحظني واشم بيج وامد بشعرج على مخدتي ممصدگ اتحقق وصرتي،بين اديه ...

ونزل راسه لرگبتها يشم بيها مثل واحد سكران ...همس
اووف يا نحرج ...

كل بوسة غفو تطرز حياتي نجوم وكل شمّة نحر جبرة خليل الــ خل

سمر تباوعله وتحس بداخلها بفررحه جبيره همست وعيونها ادمع ...هلگد تحبني
فيصل بثقه...لا
ماا حبج، ولا ميت بيج يول اني مخبول بيج لو يمر علينه سنين اتحدا تلگين شخص يحبج گدي امج ابوج كل هلج ...مييجون ربعو لحبي الج

سكتو وبس صوت انفاسهم هو المسموع بلغرفه ...
باوعتله ورفعت راسه من نحرها وهيه تحاوط وجناته ...فيصل فدوه خل نطلع لا ييجي احد والله خايفه
رجع فيصل همس بعصبيه وهو گوه مسيطر علي نفسه من لمسه اديها عليه ...
ول سمر هسع محد الو عندي شي ،هسع انتي مريتي

سمر وهيه تحاول تهدي وبنفس الوقت تجاري ... صح مرتك بس هسه لازم تروح ونبقى نحجي الليل كلو على التليفون
غمض عيونه وگام منها وهو يسحبها اله ...گام يعدل بفستانها دارها وهيه تحس نفسها لعبه بيده صار ضهرها اله حضنها وهو يضم وجها بشعرهاا ...طبع بوسه على شعرها وطلع بسرعه بدون ميحجي شي ...

سمر التفتت وتباوع للمكان الطلع منه ايدها على گلبها وهيه تتنفس بسرعه،تحس فقدت شي، تحس اخذ وياه شي منها اخذ جزء،منها  تحس بموجه عواصف ضربتها
همست وهيه ممستوعبه ...يربي صرت مجنونه بي مثله

دز عليه سلطان، بدلت ونزلت اتعشيت واني احس بروحي مسويه شي،الخجل كاتلني ...گاعده والتليفون يضوي باسمه ...
صعدت وقفلت الباب ...
لا اراديا ضحكت وگلبي احس نبضاته زادت ويااه وكلي لهفه حتى اسمع صوته ...
سمر وهيه تحاول تسيطر على اضطراب انفاسها ...شلونك

فيصل بلهفه ونبره غريبه ...مثل طير مذبوح حالي من عفتج

سمر بلهفه وخوف ...ليش هيج تحجي

فيصل بحرگه گلب  ...وتگلي ليش، يول شسوي اكثر وتفتهميني بويه اريدج، رايد گرباج

سمر بخجل من جرائه كلماته معرفت شترد...

كمل وهو مثل الواحد يتگلب على جمر حجه بجديه
...سمر زواجنا الاسبوع الجاي

سمر بشهگه وتفاجئ كالت بسرعه ...شنو شنو الاسبوع الجاي فيصل اليوم عقدنه بعدين اني عندي امتحانات وع

قاطعها بحده وهيه تسمع شي انضرب يمه ... عجل ترديني اموت انتي،
سمر ابخوف ...اسم الله عليك، شبيك فيصل تحجي بغرابه هيج

فيصل وهو يشعل جگاره ويحجي وهيه بطرف شفته ...ولج شگلج، اليوم گوه عفتج من لزمتج بويه اريدج يمي بحضني الانتظرته كافي وانه مو نبي واصبر انه بشر ضعيف تعرفين شنو ضعيف ...
ارحمي بحالي وخلي نتزوج وكمل امتحاناتج يمي ...

سمر وهيه متگدر ترد على كلامه جرئي كلش ومحترف بالتعبير عن مشاعره تحس روحها كدامه طفله متعرف كل شي وهو معلمها المحترف ...بكلمه منه تقتنع برايه واذا معصبه، بكلمه منه يهديها ...

گلتله بدون وعي ...موافقه بس اخاف سلطان ميقبل
سمعته يحجي بعصبيه بصوت ناصي بس مفتهمت منه شي ...هو شطيحو لحضي غير سلطان، بس هسع ما الو دخل انتي مالتي والعرس الاسبوع الجاي وخلاص ...

بقو للصبح يحجون ومقبل تسده لحد ما ينام على صوتها ...

كعدت على صوت سميه تگعدها تروح للمدرسه ...گوه شالت راسها من المخده باوعت للساعه سبعه وثلث 
طفرت رگض للحمام وهيه تحجي على فيصل الي خلاها تسهر للفجر ...
بدلت واني الم الكتب بعشوائيه بلجنطه ونزلت ركض ...
شفت بس الشيخه كاعده وسميه ...
صبحت عليهم وبست راسها واني اگلها ...يمه ابو محمد بره مو لا متاخره كلش ...

الشيخه وهيه تضحك ... ول يا ابو محمد ،فيصل هين من السبعه گاعد غاد بلربعه ويمو سلطان،

سمر باستغراب وهيه تنزل جنطتها ...يمه فيصل شجابه من الصبح
سميه وهيه تضيگ عيونها وتحجي بضحك ...گليبه الجابه، يريد يوديج للمدرسه ومن السبعه اگعد بيج وانتي بسابع نومه ...

سمر بسرعه ...وسلطان وافق
الشيخه ...لو عليه ميخلي يلمحج ليوم العرس، بس فيصل طلبج مني امس وانه گلت لسلطان لخاطري تركو يوصلها ...

سمر بخوف ...لا يمه اذا سلطان ميقبل ما اروح
سميه ...دطلعي يمه سلطان الشيخه گلتله لا تكسرين بخاطر الوليد ...

طلعت واني اقدم رجل وأئاخر رجل ...شفت سياره فيصل بلحوش وهو واگف يمها وسلطان يمه ملتهين يسولفون اول مشافني فيصل ضحك بخباثه وگال وهو يباوع لسلطان...
الله حي هل صباح الحلو ،گربي بنيتي گربي اتاخرنا
تعالي حدري بلسياره وهو يتقدم يفتح باب السياره اليه ...

ياشرلي واني واگفه بمكاني
باوعت لسلطان بخوف شفته يباوعله ابرود اشرلي بايده اجي يمه...
ركضت اله واني اهمس ...صباح الخير
حضني وهو يبوس راسي ويگلي ...صبحج الله بلنور بنيتي ...

همست اله ...تقبل اروح وياه
سلطان وهو يبتسم بطرف شفته ويرفع حاجبه ل
فيصل ...روحي بويه وديري بالج من دراستج لا تلتهين بغير امور ...
هزيت واسي باي واني بعدني بحضنه ...

مشاني للسياره صار گدام فيصل گلي ...صعدي بنيتي
صعدت وسد الباب ...

سلطان اندار لفيصل الي يغلي بمكانه وغمزله وهو يشاوره ...تربيتي وبنيتي لو تصير بنص بيتك، ما تعصى كلمتي ...

فيصل بنفس النبره ...عود اذا شفتها دخل تصير ابحضني ،تحلم تشوف طيفها ...اودعناكم

صعد سيارته بدون ميحجي وشخطها ...

سمر تباوعله لابس دشداشه جوزي وشماغ اسود طالع شكله هيبه وكشخه، من طلعو لهسه ما حجه ولا حرف مبين من ملامحه عصبي ضاغط بايده على الگير والثانيه على الستيرن ...

تريد تحاجي بس خايفه مع انو متعرف ليش معصب ما اتوقعت يعصب من موقف سلطان...
همست بتردد ...فيصل
لا رد وزاد ضغطه على الستيرن
رجعت خلت ايدها على ايدها الي مخليها على الگير ...وهمست فيصل مو احاجيك شبيك ضايج

فجأ وگف السياره وباوعلها وجهها ميتفسر من العصبيه صااح وهو يبعد ايدها عنه ...

بعد وكت مدام، ليش،كلفتي نفسج وسالتي عليه

سمر باوعتله باستغراب وخوف من عصبيته وصياحه گالت ...شبيك فيصل، هو هستوني صعدت وياك ما اله داعي هذه الحجي

فيصل بعصبيه اكبر ...اي صحيح ما اله داعي احجي اكل نعل وانجب لازم ليش احجي

سمر وهيه حاصرتها الضحكه من عصبيته وكلامه الغير مبرره گالت بهدوء وهيه تلزم ايده بعد ايده رجعت لزمتها مره ثانيه ...فيصل حشأگ ما اقبل تحجي على نفسك هيج، غير افتهم ليش تتعصب بسرعه گلي شنو الضوجك مني ...

فيصل وهو يباوع من الجامه ويعض باصبعه تحس يريد ياكل نفسه من العصبيه ...
عجل ليش تخلين سلطان يحضنج، ول ليش،تخلينو يبوسج ويگلج بنيتي...

سمر باوعتله بصدمه كلتله ...لا مو من كل عقلك تحجي اكيد ،سلطان ابن اخويه 

عاط فيصل بعصبيه ...واذا ابن اخوج انه اغار عليج من روحج ...محد مسموح اله يتقرب منج الا انه انتي مالتي بنيتي انه ومرتي انه وحدي ...افتهمتي
هزت راسها باي
يحجي وهو يصعد الجامات ...سحبها لصدره واخذ شفايفها بقوه يفرغ عصبيته بيهن ...

بقو على هل حال بين غيره وعصبيه ورومانسيه فيصل وخباثه سلطان الا ان اجه يوم الحنه ...

سمر مخبوصه بين الفستان والصالون واتصالات فيصل الي كل ساع يحذرها ديري بالج يطلع منج شي،
الف مره حذرها ...اخر شي طلعت من الصالون هيه وسميه واريج استقبلهم ذياب ...وصلهم للبيت الطريق كله فيصل حرگ التليفون عليها استحت تجاوبه گدام عامر ...
دخلت لگت البيت متروس ناس استقبلوها بالهلاهل ...
گعدوها على كوشتها هستوها گعدت
دگ فيصل ...
جاوبت بعصبيه قبل لا يتعصب هو ...هستوني دخلت للبيت وغطيت نفسي من فوگ لجوه ومحد لمح اضفري ارتاحيت هسع ...

فيصل ...يول غير اخاف عليج، مو گتلج من البدايه خلي اوصلج انه مقبلتي

سمر وهيه تشوف عيون الكل عليها همست ...اي توصلني حتى النفس تمنعه عني من تحكمك

فيصل بشوگ ...اي امنعه شلون يلمس شفايفج واني متحسر هناا على طعمهن اووف لو هسااع اضوگ

سمر بخجل ...فيصل يربي كاافي كلام منحرف

فيصل بضوجه ...ول يابه يا انحراف هيه بوسه، وج لو هسع انتي يمي

سمر والوجه صار احمر اريج تباوعلها من بعيد وتضحك عليها ...
فيييصل
راح اسده والله، اسكت
فيصل ...انتي بس على فيصل گادره وهو يقلدها كاافي فيصل، منحرف فيصل، وسلطان عايفته يحضن ويبوس براحته ...

سمر بضحكه ...خووب انته ميت غيره من سلطان،المهم گلي شوكت تجي ،
حجت بتحذير ...باوع اذا ما دخلت من الكل موجود وخصوصا بت خالتك العوبه

فيصل بلهفه ...تروحلج فدوه كل النساوين ما يوصلن لضفرج ... يولو لو عليه اجيج هسه اخطفج منهم واضمج بحضني ...

سمر بضحكه وخجل ...مخبل وتسويها اعرفك
فيصل بقهر ...سمر منو موجود يمكم
سمر ...البيت مملي ناس
فيصل بقهر ...بويه سمر غطي نفسج وخلي شي على زنودج حتى على شعرج خلي شال

سمر بعصبيه ...شغطي فيصل كلهن نسوان شبيك مو لهل درجه

فيصل بغيره ...واذا نسوان مراح ياكلنج بعيونهن مراح يفصلن مفاتنج يم رجولتهن ويتخيلوج،حجه بهدوء سموره، گليبي لتخليني اتخبل واجي اطردهن كلهن وانهبج غطي روحج ...
سمر وهيه كل يوم يزيد حبها الها اكثر واكثر صار الها ادمان متگدر تنام الليل بدون متسمع صوته عداها بجنونه علمها على حبه علمها على ادق تفاصيله صارت تحفظه قبل لا يحجي تعرفه شنو يريد ...
همست اله بحب ...اموت عليك
وسدته وهيه تعرف بي راح يتخبل ...ومجانت تعرف انو هذي حتكون اخر كلمه بينهم، مجانت تعرف هاي اخر مره تسمع صوته ...
بقت تنتضره ...وتنتضره ...وتنتضره ادگ عليه ميجاوب الى ان انغلق تليفونه ....واجه الليل انفتح الباب واخر شخص بلعالم جانت متعوقعه ومتمنيه تشوفه هسه ...دخلت ساره وبعيونها نضره شماته وابتسامه انتصار استغربت شجابها هايه زين وين ام فيصل ليش،جايه هيه وامها بس ...
سميه وخالتي نجوى استقبلنها وهنه يرحبن بيها
اتقدمت امها وبكل جساره وحقاره گالت للشيخه ...
ام ناصر ابنه ميريد بتكم وطلگها غيابي، او ورقتها كم يوم وتوصل ...

الشيخه بعصبيه ضربت عصاتها بلگاع وصاحت ...انتي شنو تحجين، شنهي خرفتي شنهي ميريدها بنواتنا مو لعبه يريدها وميريدها
صاير مصايح بين الشيخه وام ساره وسميه
اباوعلهم واني ساكته وعيوني تفتر على الوجوه واني اشوف الكل يتهامس ويباوع عليه، وحده تباوعلي بشفقه وحده تباوعلي بشماته ...

دموعي نزلت واني ابتسم ممصدكه واني اگول اكيد اكو شي غلط ...فيصل يحبني ميسوي بيه هيج ...
وگفت وفجاه كل شي صار اسود گدامي ...

endflashback

******

حضنتني قمر مسحت دموعي واني اشهگ واگلها ...لج قمر عاافني كسرني متدرين شصار بيه من صحيت لگيت نفسي بلمستشفى ،عبالي كل شي جان حلم الى ان دخل سلطان شكله مو مرتب وشماغه على جتفه ...شفت نظرات بعيونه اول مره بحياتي اشوفه منكسر هيج اول مره اشوفه منزل عيونه عني ...
عرفت كل شي جان حقيقه وخيانته وغدره كل شي واقع مو حلم ...
سافر وانتهى كل شي ...

بليلتها بجيت بحضن سلطان طلعت كل قهري بحظنه ...ومن بعدها صرت جامده بارده اتغيرت هل ليله جانت نقطه تحول بحياتي ...
وهسه بعد ما گدرت اوگف على رجلي و اكمل حياتي جايني يريدني ارجعله بكل سهوله ...
وراجع ولا كانو هو الكسرني ولا كانو مسوي شي ...

قمر وهيه تمسح دموعها ...بس لتغهميني غلط مو دفاعا عنه بس افكر بصوت عالي ...الي مدا افهمه اذا جان يحبج هلگد اذا جان هيج مجنون بيج ليش،سوه هيج متتوقعين اكو شي غلط ...

سمر بكره ...ميهمني كل شي يخصى ...فيصل انتهى من حياتي

قمر وهيه مقهوره على حالها لان واضح بعدها تحبه بس مجروحه منه ...زين اليوم شنو ردج

سمر وهيه مفكره بهل قرار من زمان بس جانت متردده وهسه اصرت عليه ...راح اوافق

قمر بتحذير ...بس انتي متحبي والولد كتلي يحبج ليش تضلمين الولد وتضلمين نفسج وياه

سمر بوجع ...اخذت الي احبه ويحبني شنو النتيجه كسر گليي وجع روحي وبس، خلي اخد الي يحبني بدون وجع بدون خيانه

قمر ...بس خلي ابالج هذه قرار جبير فكري قبل ما توافقين وبعد ماكو رجعه ...

قاطعتهم سميه وهيه تدخل ...قمر نزلت راسها اول مدخلت...
يله بناتي گومن اتغدن قبل لا تحضرت نفسجن  ...

سمر ...انشالله عمه
سميه وهيه تتقدم من قمر وتحضنها ...ليش الحلو زعلان
قمر وهيه معبسه ...مزعلانه

سميه بضحكه ...لعد هاي البراطم شنو

لا تزعلين مني بنيتي ... سلطان قلبو ابيض واذا حجه عليج من خوفو لا تتوقعين يكرهج زين حبيبتي

نزلن للغده قمر باوعت للسفره ما شافت سلطان ارتاحت ...ونزلت تضحك

كملو غده وكل واحد راح لغرفته ...
قمر اشتهت گهوه ...راحت للمطبخ
بلشت تسويها وشغلت بلتلفونها اغتيه وهيه ادندن وياها ...هل اغنيه تذكرها بحسام مره جان صاعد وطولت صعدته شهر ...
بيوم الرجع لگته واگف ينتظرها وهو مشغل الها

يا هوى روح وقلو
قلو كتير اشتقتلوا
لو بدو عمري كلو
بعطيه

اغني ودموعي گامت تنزل ...واحس بگلبي يعصرني
مشتاقتله حتى لايامنه الجنت اتعارك وياه والغزله والنظراته ...
عيوني غوشت من الدموع ...
محسيت الا الگهوه فارت على ايدي ...
عطت بوجع ...وگمت اشهگ اكثر

حسيت بواحد لزم ايدي بسرعه وهو يمشي بيه للمغسله من عطره عرفته هو ...
خله ايدي جوه المي البارد ...
باوعلي بنظرات غريبه مسح دموعي وهو يحجي بخوف وقلق وحاضن وجناتي بين اديه ...اكو شي،يأذيج، احجي
ما اگدر احجي من دموعي ولا استوعبت الگاعد يصير  ...هزيت راسي بلا
سد المي گعدني على الكرسي اول مره اشوف من اجيت لهسه اشوف سلطان هيج مرتبك قلق بدون غرور بدون برود ...راح بسرعه ورجع بيده عصاره وشاش ...
رگع گبالي على ركبته ...
لزم ايدي على كيف حسيته لازم گزاز ويخاف يتكسر قربها من شفايفه وگام ينفخ عليها ...
رفع نظره اليه وگال ...هسع گاعد توجعج بويه
هزيت راسي باي ...
رجع ينفخ عليها ...فتح العصاره خله عليها شويه وگام يدلگها بايده ...
عطت بوجع لا اراديا...ااي على كيفك سلطان توجعني

رفع عيونه لعيوني بنظرات ما عرفت افسرها وشفته يهمس بعصبيه بس ما فهمت كلامه ...
رجع نزل راسه وگام يلفها بشاش كمل وگام بسرعه گال وهو يمدلي العصاره ...
العصاره هايه تدهنين ايدج منها وتغيرين الشاش مرتين بليوم ...
ذبها على الميز ومشاا ...ردت اشكره

قبل لا يطلع ...
كتله ...شكرا
گال بنبره مكدرت اعرفها عصبيه و برود بنفس الوقت واستهزاء ولا كانو نفس الشخص الجان خايف عليه قبل كم دقيقه...
انتبهي مره ثانيه وقللي الصفنات ...

عافني وطلع واني اغلي ...شمرت العصاره وراه واني اصيح ...حقير ومغرور

للعصر بدلنه لبست اني وساعدتني امي اتخبلت من شافت الحرگ ،لبست فستان اسود من سمر مثل القفطان مخصر اجه على جسمي والصدر صاير دائره فتحته جبيره كل ساع ارفعه لان يطلع صدري منه گلت اخلي شال قبل ما يجون وعفت شعري على طوله ...

طلعت من غرفتي صار گدامي سلطان لابس دشداشه سوده  ليشوفنه يگول مطقمين سوه باوعلي من فوگ لجوه رفعت حاجبي وفتت من يمه واني متجاهلته ...
بعدني ما عبرته حسيته لزم ايدي وقربني لصدره ...
باوعتله بعصبيه وكتله ...وخر عوفني

اتقرب يم اذاني وهمس ابرود... صوتج، ترجعين لغرفتج وتلبسين شي جوا بسرعه

قمر بعناد وهيه تريد تسحب ايدها منه وهو يشدها اله اكثر ...انته اكيد اتخبلت وخر لتلمسني وما الك دخل بلبسي الف مره كتلك

سلطان بنفس البرود وهو يبتسم بطرف شفته باستهزاء...مسويه عرض اغراء بفتحت صدرج ست قمر

قمر وجهه گلب احمر من المستحه باوعت وعيونها فاتحتهم ...انته شكد بلا اخلاق وحقي
محست الا شعرها بايده وهو يجرها للغرفه وسد الباب وراه ...شمرها على الجربايه
وهو يحجي بعصبيه وجهه انگلب صار يخوف...اقسم برب العزه السانج اذا طال اطرو اثنين والله ...گومي بلعجل غيري ملابسج ...اذا نزلتي ولگيتج نفس اللبس حسابج ويايه غير يكون ...
طلع وسد الباب ...
كمت اشيل بلمزهريات وارگعن وراه ...الحقير الجلب والله الا اطلع هيج وحتى شال ما اخلي خل اشوف شتسوي ...
رحت لسمر 
وسمر لبست فستان ذهبي للركبه وشعرها سوته كيرلي على طوله ولمته من جيها وحده ...
قمر وهيه تحاول متبين ضوجه ...ها حبيبتي ننزل
سمر بملل ...ولج خلينا خل يجون يله عمتي نجاه اجت ما الي خلگ اگابل بناتها ...

قمر باستغراب ...منو نجاه

سمر ...اخت ابويه
قمر لعد ليش ضايجه منها
سمر ...بلعكس عمتي نجاه ورده بس بناتها الحيايه اموت منهن سجى ونور
قمر بفضول ...ليش شبيهن
سمر ...لج وحده تموت على سلطان وتلزكله اول متجي والثانيه تحب عامر فد مغثه اثنينهن
قمر بحقد ...بلكت ياخذها سلطان وانخلص منه هيه مغثه وهو حقنه ومغثه ...
سمر بعتب ...قمر بدينا

قمر ..سكتنا سكتنا، امشي خل ننزل صار عندي فضول ارد اشوفهن ...
نزلنه واجو اهل جاسم ...
فتحو الموضوع وامه گالت اذا العروس موافقه نعقد هسه لان بيبي وضحه بلغتها موافقتها من قبل فكل شي صار بس شكلي ...
سمر طول الگعده ساكته وتباوع للگاع ...
وافقو وجان لازم يصير العقد ...
محسينه الا صوت رمي قوي صاار بره ...طلعو الكل يتراكضون ...
الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

الكلمات ...2600 كلمه

صباحكم ورد ❤️
#يفدوه
#تنويه مهم :لكل الكاتبات الي مشاهدات رواياتهم 80k واكثر وحابه تنشرهم على برنامج وموقع dreame وكل روايه يتم التعاقد عليها مقابل مبلغ مالي ...
فلي حابه تراسلني علي الخاص
بنات بلغو وشاركو هل خبر ويه الكاتبات الي تعرفوهم خلي تعم الفائده للجميع