رواية الراقصه والسلطان الفصل الثامن 8 - بقلم hour writer 🐆

#رجاء التصويت ع البارت

#حور حيدر
#الراقصه والسلطان
#الانستا:enghour98

سمر ...
نايمه ع الجربايه وايدي ع كلبي واني اتذكر كلماته من فتت منه ووصلت يم السياره اتقدم بلحظه وكفت جني صنم وكلبي يدك ليكول داخله حرب ...

احس صوته الحاد الخشن وهو يهمس بعصبيه من بين سنونه لسه باذني وعيونه بعيوني بكل جرائه ...

يول دحكيلي وسمعيني زين ،وحك الله اذا لبستي هل صدريه نوبه لاخ ،،لاحسب الله ما خلقك

عافني وراح لسيارته بكل برود ولا كانو جان يهددني وعطرو احسه اتغلغل بيه ...

اني ليش كدامه اصير مثل الثوله وواكف جني طفله واحس روحي مسويه غلط و منتظره العقاب من ابوها،
رجعت باوعتله راكب سيارته ولابس نظارته واشرلي بيده لسياره ابو محمد بمعنى صعدي ...

يربي شكد مغرور وشايف نفسه بعدين هو باي حق يحاجيني هيج ،اكيد مخبل من كل عقله عباله اسمع كلامه...

رجعت للبيت والطريق كله نضراته ابالي ابن الاوادم عيونه تخوف بس تخبل نظراته تسحر احسها من ودي ابقى اباوع لعيونه من الصبح لليل واعرف سر الغضب الي بيهن من يشوفني احسه يعرفني من زمان مو مال واحد يشوف وحده اول مره ويصير بهل جرئه والثقه...

كمت من الجربايه شمرت المخده وعطت بقهر ...اوووف
اطلع من راسي صارلك يومين لازك بيه ...

اجت عيني ع الساعه كمزت بسرعه ب 3 ...
عطت بتفاجئ وايدي ع صدري ...عززه بعد ساعتين ع حفله عيد ميلاد المهى واني لا مجهزه نفسي ولا كايله لامي اروح ...

كلت بقهر واني اتذكر فيصل الي شاغل بالي ومخليني ناسيه الاول والتالي ...كله من وره هذه المغرور ،شدعي عليك ...
هسه جيب اليقنع ماما وضحه ،،

نزلت بعد ما رسمت التكتيكه الي تخلي امي وضحه تخليني اروح واني ادعي كون مموجود احد من الثلاثي العصبي لان اذا واحد موجود وخصوصا سلطان من سابع المستحيلات يخليني أروح ...وماما وضحه اضرب منهم محد يكدر يقنعها الاا ..

رحت للمطبخ اطلب المسانده من ماما سميه ...
لكيتها دا تطبخ وملتهيه تلف كبه ...

حضنتها وبست خدهاا ...شلونها امي ام عامر الحلوه
(اني اصيح لمرت اخويه عامر مرات عمه ومرات يمه هيه دائمآ تكلي صيحيلي يمه من كد ما تحبني و اذكرها ابنتها الماتت )

عدنه هوايه يشتغلون بالبيت بس الاكل متقبل الا بايدها تسوي ابو عامر محذر محد غيرها يطبخ اله او حتى يدوس غراضه غيرها يموت على اكلها عدها نفس بالكل ...ليضوك اكلها يصير عنده ادمان

حقه ابو عامر يموت عليها سميه نادره ...ورغم كل شي معتنيه بينه كلنا ومعتنيه بنفسها ...
كم مره لمحت ابو عامر يتغزل بيها ...من اسمع حجيه الها احسدها على حبه الهاا ...

سميه بتعب وهيه تضحك ...هله يمه بسمره جوعانه اصبلج اكل ...

سمر وهيه تكعد كبالها ..لا يمه ما ريد مسويه دايت
سميه باعتراض...خايبه انتي مال دايت شباقي بيج وج الياخذج شيلزم منج ...

سمر بغرور وهيه ترجع شعرها الي يوصل لبعد خصرها لوره اكتافها...
هنياله حاصله ياخذ سمر بت الشيخ نمر ...

سميه وهيه تضحك على حركات سمر...حكج يمه وين يلكه مثل هل جمال والاخلاق ...

سمر بخجل وما صدكت تمدحها كمزت باستها من خدها وراسها ...يمه رحتلج فدوه ،صدك ماما اني مو بنتج حبيبتج

سميه بطيبه ...ونظر عيني شرايده حبيبه
سمر ...بس كليلي اول الثلاثي اكو احد منهم بالبيت

سميه باستغراب ...اذا قصدج سلطان فما رجع وذياب بعده بالشغل وياه وعامر بالطريق وخابرنه يمكن يبات من واحد صديقه ومييجي اليوم ...

سمر بارتياح ونبره بتوسل...المهى صديقتي اليوم عيد ميلادها وتعرفين هيه صديقتي المقربه وعيب ما اروح فدوه فدوه قنعي ماما وضحه تخليني اروح ...

سميه بخوف كعادتها ..بس يمه تدرين لو عرف واحد من الولد يكلب الدنيا علينه بعدين يخافون عليج وسلطان محذر متطلعين الا وياه او ويه واحد من الولد لغير المدرسه ...

سمر وشويه وتبجي...يمه حبابه كل صديقاتي راح يرحون بعدين والله ما اطول ساعتين وارجع قبل ما يرجعون رحتلج فدوه ...يله حبيبه حياتي

سميه بعد ملحت سمر مكدرت الا توافق ...
اوكفي ولج خلي اغسل اديه ونروح للشيخه ،الله اليستر منج ومن ملحتج لا نترزل من الشيخه ...

سمر ...يمه الشيخه تحبج ومتردلج طلب ومستحيل تحجي عليج يله حبابه

راحت ام عامر لغرفه بيبي واني وكفت بالباب اسمع حجيهم وادعي توافق ماما وضحه انصدمت واني اسمع صوت ابو عامر ...

همست ...خرب حظج سمر شكد فكر ما اجه الا هسه

كربي بويه سمر شعندج واكفه بالباب ...سمعت صوت ابو عامر بصيحني ...

كلبي وكف ...دخلت واني منزله راسي واعض بشفتي بإحراج ...
رفعت راسي كلها تباوع عليه ...بقيت اوزع ابتسامات مثل المخبله ...

الشيخه وضحه ...كربي يمخبوله شمالج داخله شاكه الحلك ...

كتلها بفشله ...شنو مخبوله يمه اي داخله الكم ومتفائله واضحك بشوفتكم ...

الشيخه وضحه ...يمه اليضحك لحالو يكلولو مخبول وكليل عقل ...

ابو عامر وسميه شبعو ضحك عليه واني ...
اريد الكاع تنشك وتبلعني بهل لحظه ،وجهي كام ينطي اللوان من الفشله ...

ابو عامر وهو يعدل شماغه ...يمه ع كيفج ويه سموره

وباوعلي بحنيته المعهوده واشرلي بيده اكعد بصفه حاوطني بايده وباس راسي ... صح ابو عامر شيخ والكل يحسبله الف حساب بس كلش حنين وعادل ولا يوم اذكر عاط بيه او قهرني...

اباوعله ليشوفه ولا يكول عنده ولد كبار ممبين عليه ليشوف شكله وهيبه والشيب بين خصلات شعره ولحيته مزيده جمال يكول اخوهم مو ابوهم ...
بويه سمر روحي لصديقتج ...بس لا تبطين وهلله هلله بالادب ...

ما صدكت وافق بسته بخده وبراسه ...فدوه لاحلى شيخ رحت ...

الشيخه وضحه ...وانه ما الي حبه ولج لو على كد المصلحه

رحت بستها واني اكلها بعياره...افه عليج شيخه اني مصلحجيه مع الاسف ...

بعدين اناقشج ومستحيل اعوفج ...بس هسه اروح احضر نفسي ...
طلعت بسرعه واني ادز بوسه بالهواء لماما سميه واكلها ...

ما بستج بخدج لان بعض الناس يغارون وميقبلون احد يطخ املاكهم ...

ابو عامر كام يضحك وهو يسحب سميه لحظنه ويكول وهو يبوس خدها ...

مريتي شخده ليطخها ويبوس خدها غيري ...وهو يبوس بخدها وما مهتم لوجودنا

وسميه ذابت وجهها كلب اللوان من الخجل ...
الشيخه ...ولك يمه مرتك حبها بغرفتك مو كدامي
متت ضحك عفتهم ورحت واني اسمع الشيخه تحجي عليه ...

صعدت لغرفتي مبقه وقت ...فتحت الكنتور
امم هسه شلبس ...

اختاريت قفطان فستان اسود يصير شيفون من الصدر الردانات ومن الخصر يصير نفش يوصل جوه الركبه وحذاء كعب احمر ...

سويت شعري غجري ولميته على شكل كعكه المكياج.. عفته اخلي من اوصل البيت المهى لأن ميقبل سلطان اخلي ..
لبست جبه فوك ملابسي وشال واخذت الهديه الشتريتها الها ونزلت ...
وصلت لبيتهم كلت لعمو ابو محمد ...من اخلص اخابرك

نزلت باوعت لبيتهم دكيت الباب طلعتلي المهى كلش فرحت وعاطت حضنتني اول مشافتني ...
عاا سمور جنت فاقده الامل منج عوبه

سمر ...كافي وسم خل ندخل فضحتينه بالشارع
سدت الباب باوعت للبسها كلش حلوه طالعه بفستانها الوردي الطويل ومخليه مكياج خفيف
...

دخلنه جوه شفت امها ...
ام مهى بفرحه باستني وحضنتني بلهفه...كل الهلا ابت الشيخ شهل جمال يمه ربي يحفظج من العين

سمر بخجل ...مشكوره خاله حبيبتي

المهى وهيه تسحبني ...كافي يمه تره غرت يعني كل هل جمال كبالج وتكولين على سمور العوبه حلوه

ام مهى ...سكتي ولج واخذي سمر جوه للبنات خل تاخذ راحتها وتنزع الجبه ،

المهى بحماس وهيه تمشي للاستقبال ...ااي سمور نزعي خل اشوف شلابسه متحمسه كلش

سمر بخباثه ..مدام متحمسه لعد ما انزع
المهى بقهر وهيه تسحب الجبه...تنزعين لا اشككهن على راسج

سمر وهيه تضحك ..ولج على كيفج راح انزع والله
بعد ما نزعت عاطت المهى باعجاب ...

ياا حقيره طالعه تخبلين كسرتي عليه ...وعود بعدها ممخليه مكياج...
سمر بغرور وهيه تلعب بخصله شعرها الي نازله ع ركبتها وتضحك ...طول عمري كاسره ع الكل حبيبتي

المهى بقهر...ليش تخليني اكسرج واسوي جريمه بعيد ميلادي ..فوتي البنات كلها متحمسه تتعررف عليج

سمر وهيه تضحك ...بلا لغوه اريد اخلي مكياج واعدل نفسي يله ادخل بكامل اناقتي وهيه ترمش بعيونها
المهى ...

روحي فوك شوفيلج اي غرفه كلها فارغه بس استعجلي لان حنكص الكيك ...

سمر وهيه تركض للدرج ...انتظريني ولج والله اطيح حظج اذا كصيتيها بدوني ...

صعدت فوك بيتهم كلش حلو تصميمه حديث تقريبا بكد بيتنا ...

دخلت باول غرفه جانت ضلمه فتحت الضوه واني مامنه انو ماكو احد وسديت الباب ورايه ...

اول مدخلت اجتني ريحه عطر مو غريبه عليه ...رحت للمرايه خليت جبتي وشالي ع القنفه ...

طلعت مكياجي خليته ع المرايه ...بديت اخلي واني ادندن ...باغنيه كل دقيقه ...

ومندمجه واتمايل واغني
داخلي حمره .. سكتت فجا وجمدت بمكاني واني اشوف انعكاسه بالمرايه...

و احس بانفاس دافيه على راكبتي وهو يهمس بس هل مره بنبره مختلفه نظراته مختلفه كل شي متغير ...
همسلي وهو يقرب شفايفه يم اذني وعيونه تباوعلي من فوك لجوه ...

لتجمل الوجه وتكحل العيون
بعد لحظات كلشي ايطيح ينزاح

بعد لحظات افصل جسمي الك ثوب
والذرعان الفهن لفة اوشاح

واحتضنك واشمك بالنحر حيل
مثل شمة عجايز يالله ارتاح

بعدني ممستوعبه صدمه الكلمات ...
ختمها بحده ...
وهو يباوعلي بغضب ...تزوجيني

.................
الحاظر :-
اسمي فيان ...وانته
بقيت صافن بعيونها همست بدون وعي ...اشتعلو عشيرتك عامر على هل عيون ...

فيان باستغراب ...شنو شدا تكول

بعدت نظري عنها واني اسب بروحي شمالي اليوم شصابني شني اول مره تشوف وحده حلوه قابل ...
حمحت وكتلها ابرود ...عامر

فيان باعجاب ...واو حلو اسمك مثلك
رفعت حاجبي الها لا هاي صدك غريبه ...
كالت بعفويه ...لويش مستغرب شلون تريد مني اشوف واحد حلوه وشخصيه مثل حضرتك وما اعترف بجماله

كتلها واني صدك عصبت لو فطيره لو بيها شي هايه ...بويه انتي شنو قصتج وشعندج هنا بنص البريه

فيان وهيه تندار للشباك ...امم قصتي طويله ومو مهمه الك حتى تعرفها ، كل الي اريده منك توصلني للكراج واكون ممنونه منك ...

عامر ...شنو مو مهمه يجوز وراج مصيبه جبيره او مسويه شي،شنو الي يخليني اصدك بيج

فيان بزعل ...لا عموري صدوك جزعل منك باوع لعيوني وشوف اذا كذابه لو لا

عامر اباوعلها راح تخبلني تجيب اخرتي هل بت كتلها بحده ...يولي منو عموري
فيان ابرائه ...انته
عامر ..وج بويه زلمه مشورب شطولني وتاليها عموري
فيان بدلع ..اي غير داا دلعك عموري شبيك معقد هيج

عامر فولت منها اذا ما سكتت صدك ما اضمن روحي شراح يصير ...عطا بيها
صوتج ما سمعه الطريق كله ...هشش
رادت تحجي خليت اصبعي ع شفايفها ضغطت عليهم بيدي شفايفها ناعمه وطريه وخرت اصبعي بسرعه ...وحك الله اذا سمعت صوتج اشمرج منا اخلي الذيابه تاكلج ...

اني كتلها هيج خنست بمكانها وعيونها دمعت ...
بقيت اسوق ومتجاهلها وهيه ساكته ...
لحد ما وصلنه للبانزيخانه ...نزلت اعبي بانزين
قفلت السياره ورحت للمحل اخذ مي وحلويات وعصاير ...

رجعت صعدت السياره شمرتهم بحضنها واخذت منهم مي ...
كتلها بجمود واني اشرب مي وعيني عليه مجتفه اديها لصدرها ...اكلي

فيان وهيه ترجع العلاكه وعيونها ع الشبال ...ما ريد

عامر همس الله يصبرني على الجاهله الي ابتليت بيها كتلها بحده ...كتلج اكلي بلا عناد

اندارت عليه وعيونها كلها دموع ..كتلك ما ريد غصب هو ...
ما اعرف حصرتني الضحكه يابه جنها طفل زعلانه ومبرطمه شفايفها ...بويه اكلي ليش تشلعين كلبي وياج
...

فيان بزعل...ليش لعد تصيح عليه ،كلي اسف
عامر ...اسف بويه يله اكلي
فيان وهيه تمسح دموعها وتاخذ العلاكه وتضحك رفعت راسها فجا وبرطمت وكالت ...عموري جيبلي ككو
عامر وهو فاتح عيونه ...شنو
#حور حيدر
#الراقصه والسلطان
#الانستا:enghour98
...........
صباحو ورد ...🤧🤧
البارت الثاني ع باجر طفيت...

طلاب الثالث انشالله الكل ناحجين بشرونا👍😎🤟...والسادس مبروك خلصتو امتحانات