رواية الراقصه والسلطان الفصل الثاني والسبعون 72 - بقلم hour writer 🐆

‏الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

#يحلوه مشاركه للبارت ♥️

يكاسر ضهري چن كسره جناح بطير
مذلول بدونك رد اليه بساع 💔
حرگت گلبي... مطفيها سبع بحور
انزف دم عليك وانته جوا الگاع !!

بعد كم يوم...
اتصل حر...

عمي ابشرك لزمو حامد بقه اخو الثاني ولميعه معترفه عليه هو چان رئيس هل شبكه...

بس عدنان السگط ن ناكر كل شي وناكر معرفته بحامد من الاصل وجاي اسم قمر بلقضيه ولازم تروح تشهد عليهم وتتعرف على صورهم بحكم هيه شافت اغلب الاجو هناك..

ابو عامر... بويه مو گلنه قمر ما ينجاب طاريها

حر باسف... عمي الشغله مو بيدي بس لتخاف انه وياكم خطوه بخطوه واخليها تجي بيوم المحكمه بس يسالها القاضي كم سوال وينتهي الموضوع....

.......
هيه سلطان يعيشون احلى ايامهم رغم مناگرهم بس اغلب الوقت سواا من ترجع من المدرسه اذا مو هو يوديها ويجيبها...
يبقى يدرسها حتى واجباتها اليوميه صار يحل وياها...
فجاا راح البغداد بدون حتى ميگللها ولا اتصل عليها وهو ميتحمل ساعه بدون ميسمع صوتها...

تخابر ميجاوب انقهرت منه... وقررت تحاجي من يرجع

صارله اسبوع يدخل ويطلع ولا كلمه يحجي وياها... حتى اتصال ميتصل...
قررت تنتظره گدام غرفته...
شافته اجه اتجتفت گدامه راد يعبرها...

لزمت ايده وگفته وگلتله بحده... شبيك ويايه

سلطان باوعلها ابرود... ما بيه شي

قمر گالت بقهر ... اذا ندمان على حبيبه القلب روحلها

سلطان بعصبيه ... يا صخام اني بحالها

قمر بعصبيه... لعد شبيك متغير عليه حتى لوجهي متباوع

سلطان مدلها الورقه... ابن القنادر اجاني وانطاني

كالتله قمر بخفوت... حسام

لزمها من زنودها والغيره عاميه عيونه...

لتكولين اسموو لا اموتج

قمر اخذت نفس ورجعت باوعتله وهيه تشك الورقه.... هاي ماضي وميعنيلي شي

سلطان لزم اديها وگللها وعيونه تجدح من العصبيه والغيره...

لچ الغيره تنهش بيه نهش ليش تكتبيلو هيج ... صاار اسبوع ما گدرت

قمر خلت ايدها على صدره وهيه تحاول تهدي ... صدگني كتبتها من تانيب الضمير ومن تعلقه بيه اتوهمت انو اني حبيته...
سلطان مجان احد اليه بحياتي غيره... متعرف شچنت امر بذيچ الايام...
شافت ملامحه اضلمت...
بس الكلام هذه خلي ابالك اني نظره ما اخذ مني... وغلات عيونك جنت اصده...

خزرته وهيه تگله... بس من شفتك عرفت چنت غلطانه ولي چنت احسه تجاهه تانيب ضمير وما حبيت احد غيرك

سحبها الحظنه وهو يگلها بحرگه گلب... ناااار نااار گايده جواي

قمر ضربته بصدره...

لعد ليش گالب وجهك عليه

غير من ورا ذاك العار
حظن وجهها وهو يگلها بلهفه...
قمر خلي نعقد ما اتحمل بعد

قمر وهيه تلعب بدگم دشداشته كالت وهيه تتعاير عليه... افكر عود

سلطان صبع بوسه على شفتها... نخلص شغله المحكنه ونعقد غصبا على خشمچ اليابس...

قمر عصبت وضربته وهيه خجلانه... وخر وخر شكم مره كتلك هل سوالف لتسويها....
عافته وراحت لغرفتها... وسلطان يضحك وراها

....
بعد كم يوم... وصار لازم يروحون لبغداد سلطان وابو عامر قبل المحكمه...

ابو عامر گاعد على الجربايه وسميه تحظر جنطته...

سميه بعصبيه... وين ماخذين بنيتي

ابو عامر... بويه خاطفينها كم يوم وترجع

وين رايحين يعني

حبيبتي ام عامر بنيتج عدها بعد اجرائات ابغداد نكملهن ونرجع

لعد ذيج الفتره مو رحتو وكملتوهن

لا ما كملنه طلعت شغله زواج عامر وحر ورجعنا على النص

سميه... ما مرتاحه لهل روحه اجلها ساهين

ابو عامر گام وهو يحظنها... ميصير حبيبتي غير إجراءات دوله

راحو سلطان وابو عامر لبغداد واول مرة سلطان ميريد يروح لوما اصر عليه عمه...
ما هاين عليه يعوفها...

بيوم المحكمه... ابو عامر گال لذياب يجيب قمر لبغداد
قمر وهيه تريد تطلع...

شبگن امها سميه... ارجعيلي بسرعه

قمر حظنت امها حيل وكانو هذه اخر حظن الها... تدرين شكد فرحانه لان طلعتي انتي امي وعرفتج...

سميه عيونها دمعت متريد بتها تروح... ولچ يمه عوفي هل روحه وابقي يمي...

قمر ضحكت... ميصير ابويه يعلكني اني وياچ

الشيخه... ردي بساع حتى نفرح بيج انتي و سليطين

ضحكت وهيه تغمز الشيخه...
بوسيلي جدوو عود

طلعو قمر وذياب للبغداد ...بالطريق خابر سلطان على قمر

جاوبت وهيه منحرجه من ذياب...

الو
اجاها صوت سلطان يگلها بشوگ...

يااا هلا بلصوت وراعتيتو

قمر وهيه خجلانه تجاوب گدام ذياب...

شلونك

سلطان ... حالي ما يسر لا عدو ولا حبيب

قمر بخوف... ليش

سلطان بلهفه... مشتاگ يولي كاتلني الشوگ

قمر... سلامتك

سلطان بزعل... شنو شو بخيله اليوم لا حبيبي ولا قلبي لا بوسه لا صخام

قمر ضحكت وهمست... ذياب بصفي اتادب

سلطان... شتادب اكثر من هيج يا الله

قمر وهيه تدري مراح يرضى الي يسوي ليريده همست... حبيبي وروحي ارتاحيت هسه
سلطان... افيييش يگلبي مي بارد ونزل

يله شوكت توصلين يول واضمچ هيچ لصدري واضل ابوس بيج
قمر عصت شفتها بخجل وسدته بوجهه...

بعد كم ساعه...

وصل سلطان گدام المحكمه وهو متعصب يتصل بيها متجاوبه حتى ذياب يدك وميجاوب ... ينتظرهم وهو مشتاگلها

شويه واجاه حر استغرب سلطان شعنده حر او وجهها مگلوب ...

سلطان امشي للمستشفى

سلطان كال باستغراب... يا مستشفى ليش

حر ما يگدر ينطقها گله... امشي وهناك تعرف

سلطان... دروح هسه وكت مستشفى منتظرهم جايبن

حر گاله بصراحه...

قمر ماتت...

سلطان باوعله ... حر كافي مو وكت شقاق انه منتظرهم هسع يوصلون

حر گال بحزن وهو ميدري شيسوي ... كتلوها

سلطان وهو لحد هسه عباله يشاقه... حر

حر فقد اعصابه ... سلطان استوعب كتلو قمر بلطريق وذياب هسه بين الحياه والموت

سلطان فقد كل شعور واحساس... گلبه عصره بقووه يحس جن واحد خلعه من مكانه...

واگف بمكانه جامد صورتها وهيه تبوس خده وتدلع عليه تمر اباله...

چذاب...

رايح اشوفها هسع بعدها ما واصله

ركض لسيارته... حر لزمه قبل لا يطلع

حر صاح... سلطان سلطان اوگف

سلطان عاااط بي وهو يحس گلبه انخلع من مكانه...
وخررر هسع جايه حجت وياي سمعت حسها

هستوها چانت تشاقه وياي
كلتلي حبيبي، گلتلي روحي ولك حرر ما بيها شي والله

حر... ولك خويه ماتت اندعمو بالطريق وهيه سكت
ورجع كمل وهو يشوف سلطان جامد بمكانه...
ضاربينها طلقه براسها...

سلطان يحس انهد حيله واختنگ... فقد توازنه حر ركض لزمه
سلطان دفعه منه وهو يصيح... چذاااب چذاب ما بيها شي هسع اخابرها...
لزم تليفونه طلع رقمها... دگ عليها
طلع مغلق...

باوع لحر واديه گامت ترجف ... ذياب اخابر
اتصل عليه يرن ومااكو جواب...
ركع على ركبه دموعه نزلت... وگلبه يحس النفس ميطلع
كسرت ظهري... ليش هيچ يا الله
صااح يااالله... ولچ قمر وينچ منتظرچ
اااخ جرر نفس وهو كل ما اله يختنگ اكثر
قمر...
وگع بلگاع وفقد وعيه...

بعد شهر...
سلطان دخل بيته ليشوفه ميعرفه كبر عمر...
يشوفها گباله بكل مكان يروحه صورتها موجوده بكل ركن يشوفها موجوده...
انهد حيله سلطان بغيابها ...
دخل وصل يم اخر مكان چانو بي سوا...

نزل بركبه گدام الكرويته الچانت گاعده عليها اتلمسها بشوگ

همس بوجع وهو يباوعلها ... گمره حبيبتي بويه ليش عفتيني

خله راسه على الكرويته ودموعه تنزل من خده عليها... مشتاگلچ بلقران طگ گلبي على ريحتچ

نزلت دموعه وهو يمسح باديه على الكرويته على مكانها الچانت گاعده بي...

يااااا الله، يااااا الله ليش اخذتها
ليش رحتي... مخنوگ هوايه
حسج مشتاگلو ما سامعو

حاچبني حبيبتي... احجي عليه سبيني بس احچي

ليش عفتيني... اكرهچ ولچ بس اشوفچ بلقران مشتاگلچ
گمره اريد اشمچ...
زين ليش ما ودعتيني...
كسرتيني...
شوفيني صرت لا حول ولا قوه بعدچ

ارجعي والله ما ضوجج بعد... يروحي ارجعي هديتي حيلي
گام يشاهگ بوچع يحس بضعف وشوگ...

شايفين المدمن من يحس روحه راح تطلع اذا شم مخدرات...
هو يحس هيچ...

بس گليلي هسع شسوي ... عاااط بحرگه گلب
ولچ تعالي راح اموت ليش عفتيني
قمررر... قمرررر

عيونچ الچانت تخزرني وينها...
زين زعلانه مني... ليش ما تجيني بلحلم

يول شوفيني شلون كسرتيني والله ندمت والله شبعت ندم
ول يگمره انتي الفزتي عليه بلقران بس ارجعيلي

والله ضعيف بدونج هذاك القاسي لتگولين عليه مات وياج والله
بس ارجعي ما اگدر اتنفس الهواا بلياچ احسه يخنگني

ولج رجعيلي بس دقيقه اشمج والله ما شبعت من ريحتج
امداني انه الما حافظت عليج...

ليش عفتج ليش ما خذتج ليش ما ضميتج بكليبي
كسر كل شي گدامه....

قمر مرت بحياتهم مثل الحلم... اخذت الفرحه وراحت

لسان حال سلطان... حختصرهم بهل ابيات

جرح !!
شلتك بروحي وما گلت مليت !
اون وياك اكاسر ونتي بونك !
مشتاگ الچمتك حتى احسا بيك...
شوگ الفاگده الملهوف اشبگنك !
غالي ! غالي... غالي
بگد غلات الشوگ للولهان
اخذ عيوني مني وخل يشوفنك 💔
سوله !!
سوله بواهسي مشغول افكر بيك
يمكن هاا اجه... هااا راح ادورنك !!
اتعنى لمچان الي گعدته وياك
ما الگاك 💔... بس رايد اثر منك
بلچن چلمه ضلت ما نگلها الريح
الكاها وتجاوب بنشد عنك
لو دور عطر منك بقى اعلى الگاع
احط نفسي عليه افيييش اشمنك

سر حگوله عن سلطان الحالي... محتفظ بتلفون قمر بجيبه وميفارگه لحظه وحده...
يغني ويدز الها بصمات... هل شي بقى سر بينه وبين قمر
يحسسه بوجودها وياه...

واخير شي اترحمو لقمر...
< تمت >

........... ❤️

صباح الخير...

ابچي واني اكتب هل بارت بس لازم اوصللكم الصوره كامله
طبعا مردت اذكر باقي العائله بمشهد وفاه قمر والي صار وياهم واكتفيت بسلطان...

شي مهم... واحد من الفويزات هو نفسه الي نشرته وهسه عرفتو شنو چان سبب الحزن بصوت سلطان...

عندي كثير فويزات بصوته... واعتبر نفسي شخص مميز لانو جان الي فرصه اسمعهم واشهد عن هل قصه العشق الحلوه...

ومردت اغير النهايه... لان القصه حقيقيه وهل شي امانه لازم توصل كامله...

طبعا هل قصه تفاصيلها وصلتني قليله جداا جدا... فوك متصورون
وصار بيها هوايه ظروف وتاخرت هوايه... لسبب او لاخر بس بلاخير الحمدلله تمت...

حور حيدر ❤️

التقيكم على خير ❤️