الربتج " حالك الاسوداد " الفصل الأربعون 40 - بقلم رهف علي

ما بچيّتك ..
مَدري منهو بصَدري يبّچي
مَدري منهو يشَگگ بگلبِي كواغِد
مَدري منهو يريّد يرحَل
مَدري منهو يجرنِي بيّدر للمُطر
ما بچيّتك ..
درِت عيّني للبحَر
أبچي المسَافات الهِمتهَا ويّاك
ما بچيّتك ..
أنا جايبلك مِن دمُوعي نهَر

الصدمه !!!

لازمه الجهاز وفاتحه الرسائل وعيوني تقرأ حرف حرف
مكتوب كُل ثانيه اعيد نفس الحرف حتى اتأكد انُ الي
داقرا حقيقي مو خيال اطرافي احسهن بردن كلبي صار
يدُك بقوه حتى عيوني ما اكدر ارمشهن سحبت الجهاز
وقربته أكثر من وجهي ورجعت اقرا الرسائل المكتوبه

- نارا اه يانارا
- عبالج خلصتي مني
- تموتين وماتخلصين مني
- ادمرج واخليج تموتين يوميه من الخوف وما تتهنين بيوم واحد
- هه اتذكري اني منو اني ! اني كابوس الحياتج

مامصدكه عيوني الي اقرا هذا منو شلون هيج يدز الي رسائل
وهو شلون اخذ رقمي يارب دخيلك اني ما ناقصه مشاكل احس اختل توازني كعدت ع السرير خليت ايدي ع كلبي اسحب النفس
اني خايفه لا يسوي شي وشُعاع يفهم الموضوع خطأ بهاي الحاله
ماكدر اسوي اي شي واني ماعندي احد غيره احس الدموع حجرت
بعيوني ماكدر حتى ابجي من صدمه الرسائل هسه لو ما كاتب اسمي اكول يمكن غلطان بالرقم بس المشكله مكتوب اسمي يا الله
شلون مصيبه غمضت عيوني والجهاز بأيدي فزيت ع صوت سريع فتحت عيوني لكيت شُعاع كدامي يباوع عليه بأستغراب .

- شبيج ؟؟؟
- ارتبكت وحسيت نفسي مسويه جريمه حتى الجهاز وكع من ايدي
ع الارضيه ، هااا لا ماكو شي ، نزلت دنكت اخذت الجهاز وخليته
ع الميز وهو بعده واكف يباوع عليه
- شنو ماكو شي شوفي وجهج شلون مخطوف عبالك شايفه جني
- ضحكت بتوتر ، ههههه لا ياجني بس قبل شويه سمعت صوت
برى عبالي اكو احد برى
- هذا اني حبيبي اجه الشذام وانطيته الأوراق
- ها اي مو اكول
- لا تخافين هاج اشربي مي وجهج شاحب

سحبت الكلاص المي اباوع المي يهتز عضيت شفتي بتوتر
وهو يراقبني سريع شربت شويه مي ورجعت الكلاص رفعت راسي شفت نظراته غريبه اتجاهي اي حقه اذا اني عبالك طالعه من النفق المُرعب ابتسمت بوجهة ودخلت جوه الغطه غطيت نفسي وهو
شوي بقى واكف بعدين مشى للجهة الثانيه وصعد ع السرير
اتمدد بصفي واني بس صافنه

- شنو هاي حبيبي
- درت وجهي عليه ، شنو ؟
- شو ما اجيتي بحضني مثل كل مره
- عضيت شفتي وضغطت ع ايدي من جوه الغطه شلون نسيت
هسه من صدُك يحس اكو شي صاير تقربت خليت راسي ع صدره وحضنته بكُل قوتي اريد ادخل بصدره اريد احتمي بي ما اريد احد ياخذني منه اموت والله اموت غمضت عيوني وسحبت نفس
حيل قوي من عطره وهو حاط ايده بفروه راسي يدكله بهدوء حتى حسيت اعصابي كُلها ارتخت قرب شفايفه من راسي وباسني بوسات هوااي ع شعري هواي كُلش هواي ابتعد ورجع يدلك راسي
وبعدها صار يدندن .

كان ودي نلقي في حياتي تشرقي
مثل نجمة تبرقي لكن ظروفك غريبة
انت عارف يالحبيب ان عالمنا غريب
والهوى قسمة ونصيب وهذي الدنيا عجيبة
كان ودي نلتقي في حياتي تشرقي
مثل نجمة تبرقي لكن ظروفك غريبة
خليك احساس وخيال وخليني صورة وخيال
نلتقي هذا محال حتى لو اني قريبة
حسبي الله ع الذي سبب شقاتي
وسقاني المر عقب السلسبيل
وبعد مجراك عن مجرى حياتي
وافرقك عني بعد عمر طويل

صوته حيل حلو والبحه الي بصوته اخذتني العالم ثاني خاصه جان يدندن بهدوء وبس صوته المسموع مقابل صوت انفاسي
صح ماحب الاغاني بس من غنى الاغنيه احسها لامست حياتنا
اني ويا احنه الاثنين التقينا بظروف حيل غريبه وصعبه والحد هذا
الوقت نعاني ويحاولون يفرقونا عن بعض رفعت راسي بسته بسُرعه من شفايفه ورجعت بسُرعه خليت راسي ع صدره وحضنته بقوه
هو ضحك بصوت عالي لزمني من فكي رفع راسي واخذني بقُبله
عميقه وابتعد رجعت راسي المكان قلبه غمضت عيوني واني اهمس
نار الشُعاع للأبد غصب عن كُل واحد .

ثاني يوم الصبح جان بوقتها يوم السبت يعني عندي جان عطله
مو دوام بس اني بقيت افتر اريد اداوم حتى اتأكد من شغله
اذا الي بالي صحيح اخلي كُل شي كدام شُعاع وهو الي يتصرف حتى لو زعل مني المهم ارتاح واتأكد بيومها اني ماكعدت احاول اشغل نفسي بأي شي ماكو شغله ماطلعتها بس حتى الهي نفسي وما افكر بس المشكله عقلي يبقى يفكر قبل لا يجي شُعاع جنت الوحدي خلصت الصلاه اسمع صوت جهازي يتصل فوك من الغرفه
صعدت ركض ردت اوكع بس حتى الحك ع الاتصال اعرف هسه
شُعاع الي يتصل وصلت اله وخلص الاتصال لزمته ورجع الاتصال مره ثانيه بس الي وكفني ومافتحت الاتصال هذا نفسه صاحب الرسائل
جمدت بمكاني !!! شلون يتصل شنو هاي الجرأة الي عنده تخلي يتصل عليه !!!!!

الأجواء هادئه والمكان اذا شمرت بي الابره ينسمع صوتها صوت الساعه وصداها الي وترني اكثر تيك توك ابتلعت ريقي بصعوبه
الجهاز بعده مستمر يتصل قويت نفسي وفتحت الاتصال وخليته
ع اذني بقيت ساكته بس صوت انفاسي المسموع فجأة اجاني صوت بهت وجهي صوت ضحكه رجال قويه وفوراً انغلق الاتصال

نزلت الجهاز من اذني بقت الضحكه ترن براسي شنو صار هسه هذا شنو يحاول يسوي يريد يخوفني لو شنو رجع جهازي اتصل ثواني ورجع جهازي دك كُل ظني هو رجع اتصل بس شفته شُعاع زفرت نفسي وحاولت اعيد صوتي حمحمت وفتحت الاتصال

- شُعاع :- جهازج جان مشغول ويا منو جنتي تحجين ؟
- نارا :- ها جنت احجي ويا ساره
- شُعاع :- تمام حبيبي اتصلت اطمئن عليج
- نارا :- شوكت تجي ، ردت بس يجي حتى اختل تحت جناحه لان يمه احس بالأمان
- شُعاع :- اليوم اتأخر لان من اطلع من الدوام امر للشركه عندي تدقيق
- نارا :- حباب مو تتأخر
- شُعاع :- شبي صوتج نارا !!
- نارا :- مابي شي بس مشتاقه لك
- شُعاع :- يخسى الشغل الي يبعدني عنج جايج حبيبي مسافه
الطريق
- نارا :- ما تركني احجي سد الاتصال اعرف بي يخاف عليه من
نسمه الهوى حذفت المكالمه مال المجهول تركت الجهاز ونزلت جوه

بقيت افتر اروح وارجع سمعت صوت السياره برى باوع بالكاميرا صدُك اجه شُعاع مُجرد ما شفته حسيت شفت الامان رف كلبي ورحت ركض للباب انتظره اول مادخل السياره ونزل منها شفته نازت الستره مالته ، لابس قميص ابيض رافع اكمامه وبنطرون قماش اسود ، فتح اديه الي اني ركضت تعلقت برقبته وحضنته قوي دفنت راسي برقبته هو لف اديه حول خصري ورفعني صارت مسافه بيني وبين الارضيه رفعت رجليه وطوقت خصره برجليه هو يضحك واني مغمضه عيوني اريد احس بالأمان واني بين اديه وانسى الي صار قبل شويه

- ااخ بويه تعال ع ابنك شوف شسوت بي هاي الماشه
ماشتي
حبيبي
شو خليني اشوف وجهج
لج بويه راح تختنكين
- يحجي واني احضنه اقوه ضحك بصوت أعلى
- شلون تجيب الأفكار المنحرفه الراسي بهاي اللحظه استري علينا
حبيبي
- حجيت بصوت خامل ، شُعاعي
- كولي ابوي انتِ
- تعرف بيه احبك وماعندي غيرك
- شعندج غير وانا شعندي غيرج
- وتدري اني احبك
- حبي الج يفوق حبج الي
- فركت خشمي برقبته هو احتضني أكثر وزفر نفسه بثقل
- شلون بيج يولي دمرتيني
- ماسويت شي
- ياماسويتي لج لعبتي بيه طوبه وحتى الطوبه عبرت من الحدود
- شُعاااعي
- عيونه
- هيج بس احب احجي اسمك احسك قريب مني واحس بالأمان
- لج بويه جايه تتنعوصين فوك راسي واني ابو ابويه اشتعل شو دتعاي خلينا نوحد الأمم ونصنع اتفاقيه بينها
- هههههههه أفكارك منحرفه نزلني
- وين وين تنزلين انجبي حبيبي
- ههههههه يااااا
- وجعا بكَلب عابد
- خطيه ليش هيج
- والله اني الخطيه هسه ابجي ع حالتي

نزلت من بين اديه بالكوه ركضت وهو يمشي ورايه ويصيح
وين انهزمتي الجبانه ، صدُك تغير مزاجي برجعته بقى يمي وماراح للشركه اتصل عليهم يدزون التدقيق للبيت واشتغل بالبيت اني جهازي سويته صامت وخليته بالمجر اخاف لا يتصل

ثاني يوم الصبح وصلني شُعاع للكُليه وراح اني سريع ركض
رحت الساره شفتها واكفه ويا وحده بسُرعه رحت سحبتها من ايدها ومشيت هي تمشي ورايه وتصيح شبيج ماحجيت وياها ردت مكان
مابي احد إلى أن وصلت المكان بي طُلاب قليل وكفتها و وكفت كدامها

- راح اسألج سؤال وأريد تجاوبيني بصراحه
- شبيج نارا شنو هذا التصرف بعدين يا سؤال ويايوم اني مجذبه عليج
- عوفج من الكلام اريد الصراحه
- اسألي لنشوف شنو هذا السؤال الي خلاج تسحليني مثل الطلي كدام الطُلاب
- عضيت شفتي بقهر ، انتِ انطيتي رقمي لشخص وماعرف بي ؟
- شنو !!!
- سألتج جاوبيني
- نارا ماعرف شنو الي مضوجج ولا صاير وياج بس اني ما انطيت رقمج لأي واحد حتى البنات ما انطي الهن الا اكول الج ماعرف ليش هيج تحجين وياي بعصبيه واني ما مسويه شي الج
- متأكده ؟؟
- اي طبعآ
- تمام ، ردت اروح بس لزمتني
- تعالي وين رايحه قبل لاتحجين شي شنو صاير وياج فهميني
- ساره مو وقتها بعدين افهمج
- اي غير افهم هسه شبيج
- سسساره !!
- هاهي سكتت امشي نروح هسه يدخل الدكتور
- اي احسن

دخلت للمحاضرة الدكتور يشرح وبالي مو يمه خلص وطلع اني
سريع طلعت وساره ورايه بقيت افتر بالكُليه اريد ادور عليه اريد
اشوف تصرفات اي شي يخليني اكون متأكده هذا هو نفسه
الشخص الي يتصل بيه
شكد دورت عليه مالكيته زفرت بتعب شلون وياي ياربي بقيت
ع هذا الحال إلى أن انتهى الدوام اتصل شُعاع دينتظرني برى
لميت الكُتب مالتي خليتهن بالجنطه والجهاز بأيدي وطلعت
الشُعاع المسافه بيني وبينه كم متر بس اني اشوفه مشيت متوجهة اله جان تجيني رساله وكفت بنص الطريق اريد اشوف منو

فتحت الجهاز طلعت الرساله من نفس هذا الرقم المجهول
اتنفست الصعداء وفتحت الرساله انهزيت من شفت الرساله
بيها صورتي واني بالكُليه وبنفس ملابسي مال اليوم والي لابستهن هسه يعني هذا قريب مني الهاي الدرجه حتى الصوره ماخذيها من كدامي واني مثل الغبيه ما منتبهة بس الصوره ماخذيها بالخفيه لان مال واحد ماخذها سريع رفعت راسي وبقيت اتلفت

وهناااااك جان المح الي يراقبني بالكُليه واكف وبيده الجهاز بس
مديلعب بي وعينه عليه وما كسرها ولا تحرك بقى واكف بمكانه
الشعور الي حسيت بي اني بوقتها مُرعب شُعاع كدامي والي يراقبني قريب من سياره شُعاع جمدت رجليه اريد اتحرك ماكدر
شفت شُعاع نزل من السياره وهذاك من شاف شُعاع هو هم مشى باتجاهي يعني بنفس الوقت اثنينهم اجوي بأتجاهي الحقير يعرف هذا زوجي بس ماعرف شنو الي يحاول يثبته من وصل شُعاع وصار كدامي هذاك الثاني مر من يمنه اثنينه وسوه نفسه يدخل للكُليه
اني هنا قطره دم ما بقت بجسمي يبست

- شُعاع : ليش وكفتي وما اجيتي صعدتي بالسياره مو شفتيني
- نارا :- هاا مو ما انتبهت عليك
- شُعاع :- زين شبي وجهج
- نارا :- خليت ايدي ع وجهي ، شبي ؟؟؟
- شُعاع :- ماعرف اني الي جاي اسألج
- نارا :- اي هاي من التعب لان اليوم ع طول محاضرات وتعبت
- شُعاع :- امشي نرجع للبيت وبالطريق اجيب غده من المطعم
اتغدي ونامي شويه وبعدين ادرسي
- نارا :- تمام

رحت ويا وصعدت للسياره وهو مشى للمطعم نزل طلب غده سفري ورجع صعدت رحنا للبيت هو يسألني عن يومي بالدوام
واني اجاوب عليه ع كد السؤال هو حس بيه اني تعبانه الهذا
مسألني بعد سحب ايدي باسها وشبكها بأيده حسيت بالدفو
والمعه صارت بعيوني ماترك ايدي الا من يحتاجها إلى أن وصلنا للبيت دخل السياره ردت افتح الباب بس هو وكفني بقيت مستغربه
هو نزل وسد الباب من جهتة وتقرب من الباب مالتي مبتسم
فتح الباب الي وأشر الي مثل الي بالافلام ضحكت ع تصرفه
وهو يكول الي " اتفضلي مدام شُعاع " ماد ايده الي لزمتها ونزلت
من السياره اضحك بسته ودخلنا للبيت

صفنت بيني وبين نفسي كُل الادله ادل انُ هو الي يراقبني ويدز
الي هاي الرسائل بس الشغله الوحيده الي لفتت نظري هو هذا الشخص بيومها شكد دورت عليه بالكُليه ما شفته معقوله منطي خبر
الصديقه يصورني بداله !! اني هنا احس عقلي يريد ينفجر اني وافكر وصلتني رساله سريع فتحتها فتحت عيني من المكتوب

- قريب منج وقريباً تكونين أقرب .

شنو يعني قريباً تكونين أقرب هذا شنو ديحجي مخبل هذا رسمي
اتصلت ع عنقاء وحجيت وياها ارد شخص ينطيني الحل حتى ارتاح

- عنقاء :- ياهلا هاي منو الي سمعنه صوتها
- نارا :- غير الدراسه ماخذه وقتي
- عنقاء :- حقج حبيبتي انتِ هم الله يساعدج
- نارا :- عنقاء
- عنقاء :- عيونها
- نارا :- اسألج سؤال وأريدج تنطين جواب بدون ماتعرفين شنو
- عنقاء :- مافهمت شنو تقصدين
- نارا :- حبيبتي مو وقت غباء افتحي عقلج شويه واسمعيني
- عنقاء :- وهاي فتحت حتى عيوني يلا احجي
- نارا :- اي عفيه ، اسمعيني ، مثلا لو انتِ صاير وياج شغله تخوف وهاي الشغله ممكن تهجم بيتج انتِ لان راح يصير بيها سوء فهم وممكن الطرف الثاني راح يفكر بيج غير تفكير يمكن سيء ويمكن إيجابي مامعلوم بهاي الحاله شنو تسوين راح تحجين لو لا ؟
- عنقاء :- نينا شو خوفتيني ليش هذا السؤال
- نارا :- هسه دجاوبيني
- عنقاء :- اذا هذا الشي يهجم بيتي اكيد ما احجي
- نارا :- يعني ما تحجين
- عنقاء :- لا ، احجي شنو صاير
- نارا :- ها لا ماكو اي شي
- عنقاء :- وشنو سبب هذا السؤال
- نارا :- هيج مجرد سؤال
- عنقاء :- طاحظج انتِ وسؤالج وكعتي كلبي عبالي صاير وياج شي
- نارا :- لا ولج ماكو شي يلا اني اكمل دراستي وانتِ اخذي راحتج
- عنقاء :- نارا اني اختج اي شي يصير وياج تعالي الي مو تنسين
- نارا :- ابتسمت ، اي اكيد
- عنقاء :- احبج باي
- نارا :- احبج اني باي .

غلقت المكالمه وبقيت حايره يعني من كلامها ما اكول شي وما لازم
اكول شي لان يرجع عليه حسيت الحبل افتر ع رقبتي وصار يخنكني
بالزايد وماعرف شنو لازم اسوي
ثاني يوم داومت طبيعي وهذاك ماشفته ارتاحيت وحسيت براحه
ع الاقل ما يتعكر يومي بسببه بطريق الرجعه اتصل جهاز شُعاع باوعت لكيته مصطفى هو فتح الخط اول ماحجه ويا لزم بريك
قوي ردت اطلع من الشباك لما ايده الي صار كدامي باوعت عليه
خايفه

شكو شُعاع شبيك ؟؟؟؟ هو ماجاوبني بس عاط بمصطفى
- شُعاع :- لا مو يمي ، ووووووين راحت لا تخبلنننني
- نارا :- منوو منووو !!! مايجاوبني ويصيح ع مصطفى
- شُعاع :- ال**** الي يعتمد عليكم بنت بطول زري ماتعرفوهااا وين راحت جايكم اليوم أشعل الغالي مالكم ****
- نارا :- خليت ايدي ع حلكي ديغلط ع مصطفى وما فاهمه اي شي غلق الجهاز بوجه مصطفى وشمره بعصبيه حتى خفت اسأله
لا يحركني بالنار ويطبكني ويا الغوالي مالتهم واني ما اعرفهم
بس هو عصبي ناااار يلا خلي اسأله لو بالهدف لو بالنجف ، شنو صاير حبيبي ؟؟ هو اني سألته لو انفجر
- شُعاع :- الاغبيااء مايعرفووون اختهم وييين راحت طالعه وفاء من البيت ومحد يعرف وينهاااا وهذا متصل حتى يسألني اذا هي يمي لو لا
- نارا :- شهكت وضربت صدري ، عزززززه وفاااء وين راحت !!!
هو باوع عليه بعصبيه وعاط
- شُعاع :- جاااايه تسأليني شششدراني مو كدامج عرفت ، بالحرام مو مال اعتمد عليهم بس اعوف الحبل منهم كلهم يسيبون
مثل البهايم اني الكم .

الطريق طويل سوه خطوتين يمشي سريع كُلش سريع عبالك
عنده سباق لا أهتم السيطره ولاشي هم من يشوفون هويته يضربوله تحيه ويمشي منهم إلى أن وصلنا البيت اهل شُعاع لكينه سيارات هواي يمهم اكيد اخوانها جايين هم طبك السياره ونزل منها يمشي
عبالك يركض كلت هسه يدخل ويحط بوكس بيهم ويكسرهم شُعاع كُل شي ولا اخواته يصير بيهن شي يقلب الدنيا فوك روس الكُل
اني اركض ورى ركض دخل للبيت مثل المجنون ضرب الباب ودخل جانوا كُلهم موجودين وخايفين ع وفاء صاح بيهم صيحها خلاهم كُلهم يوكفون استعداد اله

- شُعاع :- ووووفاء وينههااااا !!!!
- شيت :- أهدأ ياخويه احنه هم مثلك ما نعرف وينها
- شُعاع :- شنو ماتعرفون وينهااا اختكم هاي لو مو اختكم !!!
فهموني وين اختفت وهاي انتوا تكولون صاير الها بالساعات وهي مختفيه حتى الجهاز مالتها مغلق
- شيت :- دورنا عليها ومالكيناها
- شُعاع :- هي لعبه حتى ادورون عليها شطلعهاااا بدون واحد
منكم وينكم عنها شلون تخلوها تطلع الوحدها اني يايوم تركت وحده من البنات تطلع الوحدها وانتوا تعرفون الوضع شلون صاير وكله
مظاهرات وقتل وانتَ مصطفى ووووينك عنهاااا مو اني مأمنها عندك هاااا
- مصطفى :- والله ياخويه بس طلعت اني وهي طالعه حتى ما كالوا الي الا من ماحصلوها يلا كالوا الي اني هم ماعرف بيها جنت متوقعها بالبيت لان اليوم هي ما مداومه
- شُعاع :- بالله راح تخبلوني الزم وأحد يطلع الي الثاني عججيب
بسيطه اني الكم منا ورايح الا اخليكم تترحمون ع شُعاع قبل

- نارا :- الأجواء صارت مشحونه والمشكله وفاء ما بينت ولا حتى
جهازها انفتح نتصل ع صديقاتها الي نعرفهن ولا وحده تعرف عنها وين أنوب من صدُك خفنا عليها كلنا بس لا صار بيها شي وحد يعرف عنها او انخطفت لو انقتلت واساساً الوضع صاير الزم اخوك لا ينقتل لو تلحك عليه لو ما تلحك محد كعد وكلها شايله اجهزتها ومنتظره خبر اما شُعاع اخ ياشُعاع احسه مضيع بنته حرك الدنيا وطلع دوريه ادور عليها ما ترك احد الا ما اتصل عليه وكلها طلعت ادور
حتى الشذام وعابد اجوي يدورون البيت صار جهنم ام شُعاع بس تبجي وحالتها حالها صوجها لان ضمت الها شُعاع ما تقرب الامه لان بس يتقرب راح يصيح بيها ومايريد يأذيها ف حتى البيت مادخل اله بقى برى واني هم ما دخلت بقيت برى اباوع عليهم وننتظر خبر

مر الظُهر وصار العصر وهي من الصبح طالعه ومالكوها شُعاع يروح بعيد من يجي اتصال يلا يفتحه حتى ما يسمعون لان خاف تكون الاخبار مو زينه مرت الوقت وهي ماكو ومصطفى حالته حاله خطيه
يحس بتأنيب الضمير لان يحس هو المسؤول عنها بوقت عدم وجود
شُعاع يمهم

انتبهت ع شُعاع من اجه اخر اتصال هدأ وبطل عصبيه
كأن اجه اله خبر يطمن بس ما نطق ولا حرف عاقد حاجبه وراح كدام الباب مال الشارع جان اكو كراسي سحب واحد وكعد سند ظهره ع
الكرسي وبقى يحرك برجله طلع الجكاره وصار يدخن وعينه ع الباب
رغم هو هادئ بس بنفس الوقت تصرفاته تخوف كأن منتظر شي
اني عيني بقت بس عليه ما تحركت من مكاني هم يحجون ويا بس مامنطيهم وجه خلصت الجكاره الأولى طلع الثانيه خلصت الثانيه
طلع الثالثه بعدها ماخلصانه وما نشوف الا الباب الشارع يريد ينفتح
قبل لا ينفتح شمر الجكاره وكف ع طوله ودعس عليها برجله ايد بجيبه وايد الثانيه ع ذقنه يفرك بي

انفتح الباب ودخلت وفاء !!!! جان وجها مخطوف ومبينه خايفه
شكلها واصل الها خبر شنو صاير بقت واكفه بمكانها بس الباب سدته بينها وبين شُعاع مسافه تقريبا ٣ أمتار هو ع نفس وكفته
بعد ايده عن ذقنه واشر بأصبعه الها بمعنى تعالي اني من يمي حسيت بالخوف كلبي صار برجليه طلعت ام شُعاع تصيح بنتي
شُعاع اشر الها بمعنى اوكفي بمكانج هي وكفت خايفه منه
نظرات شُعاع تقتل بالمكان ، وفاء ما تحركت بقت جامده بمكانها
رجع خزرها هي تقربت بأتجاها تمشي ورجل اطك برجل اعرفها هاي المشيه لان اني ماشيتها قبل واعرف حتى احساسها

صارت تقريباً كدامه مانحس الا سحبها من ايدها بقوه هي شهكت
بصوت عالي وخلت ايدها ع وجها خايفه لا يضربها وبجت
- وفاء :- اسفه والله اسفه
- نارا :- عاط بيها عيطه خلانه احنه من مكانه نرجف
- شُعاع :- شنو اسفه !!!!! ماكلتي اكو حيواناااات راح تخاف عليه
مارفعتي ال*** وكلتي اني وويييين ، لج حيوانه من شوكت تطلعين
بدون مااكو احد ويااااااج هااااا
- وفاء :- مو... موو ..
- شُعاع :- موووو شنو ؟ هسه اذا لزمتج وطلعت جلد الج ثاني احد يلومني حيوووانه
- وفاء :- شُعاع... والله....
- نارا :- تبجي وبااكوه اطلع الكلمه وهو يجبها منا ويرجعها منا ماضربها بس كلامه اقوه من الضرب
- شُعاع :- تطلعيييين الوحدج ويا وحده ماصار الج تعرفيها اسبوع
وتروحين للمظاهرات !!!!!
- نارا :- كلنا انصدمنا من كلامه يعني هي جانت بالمظاهرات ويا بنت ماتعرفها عزه لو طلعت وحده من المندسين اسم الله اذا عرفوها هي اخت شُعاع جان اخذوها شكد غبيه هاي البنت
- شُعاع :- اااااحجي
- وفاء :- مووو هي كالت الي خلي ما نداوم ونروح واني رحت وياها والله ما سويت شي
- شُعاع :- لا تخبلييييني شنو ما سويتي لو جايه الي لو حاجيه
اني الزمج من ايدج واخذج للمظاهرات اذا انتِ تريدين بس مو من ورانه ااذذذا صاير بيج شي ورحتي شيفيييييدج بعد كلمه ما سويت شي

تقرب شيت وسحب وفاء من ايد شُعاع حطها ورى ظهره يحاول
يهدأ شُعاع هذا يصيح وهي كلبها راح يوكف من البجي

- شيت :- أهدأ ياخويه المهم هي رجعت الحمدلله مابيها شي ومستحيل تعيد الي سوته مره ثانيه
- شُعاع :- ررررراح تعيده لان اعرف طينتها شنو
- مصطفى :- اذا عادتها تعالي عليه وكسر راسي هم
- شُعاع :- انتَ حسابك بعدين
- مصطفى :- ميخالف خويه بس أهدأ ضغطك هسه ارتفع
- شُعاع :- هو انتوا خليتوا ضغطك خليتوا صخامك اركض وراكم جهال انتوا خما جهااال والله تروحون فدوه للجهال ع الاقل يسمعون
الكمله احسن منكم
- مصطفى :- رحم الله والديك
- شُعاع :- ااااانجب لك
- مصطفى :- انجبيت
- شُعاع :- مصطففففى
- مصطفى :- هسه شكلت اني وانتَ بارود ما تتحاجه
- شُعاع :- والله حسابي وياكم ماخلص اصبرولي الا اخليكم تصيحون التوبه
- مصطفى :- ميخالف بس أهدأ

سحبوا من ايده ودخلوا جوه بالكوه يدفعون بي بس حتى يدخل
وهو مايقبل يريد يروح دخلوا كُلهم للصاله وكعدوا هو حط راسه بين
اديه زفر انفاسه بتعب باوعت ع الباب الفاصل بين الصاله شفت
وفاء واكفه تباوع ع شُعاع وتبجي هو رفع راسه شافها غمض عيونه
بتعب رجع فتحهن يباوع عليها ابتسم بوجها وفتح الها حضنه هي من شافت فتح الها حضنه راح ركض ارتمت بحضنه وصارت ابجي
بصوت عالي وهو يمسح ع راسها ويحجي وياها بهدوء ولا كأن هذا نفسه الي جان يصيح وقلب الدنيا فوك راسنا

- شُعاع :- كافي بابا لاتبجين
- وفاء :- اسفه والله اسفه
- شُعاع :- كافي بجي غير اني خايف عليج ماتعرفين شنو الأفكار الي اجت براسي لو ما اتصلوا بيه شايفيج هناك ما جان هدأ الي بال
طيرتي عقلي من راسي تعرفين اني شكثر احبجن انتن مو بس اخواتي لا انتن بناتي الي يأذيجن يأذيني اني اخاف عليجن من الهوى الي تمر منجن منطيجن مطلق الحريه بس مو هيج يابابا مو هيج
- نارا :- يحجي مو بس الها احس يحجي للكُل وكُلهم ساكتين ولا واحد فتح حلكه البيت هدوووء وبس صوت شُعاع المسموع وصوت وفاء وهي تبجي وعدته ماتعيد هذا الشي الي سوته باسها من راسها وهي راحت الغرفتها بقينا احنه كُلنا كاعدين

- مصطفى :- خويه
- شُعاع :- ها ؟
- مصطفى :- شوكت تحاسبنه كلنا
- نارا :- هو كال هيج وكلها صارت تكركر شُعاع رفع حاجبه خافي ضحكته
- شُعاع :- ها لك لازم تريد احاسبك
- مصطفى :- والله ليش اجذب عليك أنوب ابقى افكر شوكت تحاسبني فخلي اعرف حتى اخذ حذر ومن هسه احسن ما بالي يبقى مشغول بعقابك
- شُعاع :- عود مو هسه
- مصطفى :- لا خويه بروح ابوك
- شُعاع :- مو هسه
- مصطفى :- اوكف خليني ابوس ايدك
- نارا :- راح ركض انسدح كدام شُعاع ولازم ايده يجر بيها يريد
يبوسها وشُعاع يسحبها ومصطفى يجر منا
- مصطفى :- اهوووو ذليتني خويه
- نارا :- شُعاع سحب مصطفى بسرعه وحطه جوه ايده وجعصه
هو منا ضخم كلت راح الولد انجعص جوه هذاك يفرفح ويصيح
وشُعاع يصيح عليه
- شُعاع :- ها لك بعد تعيدها
- مصطفى :- بصوت مخنوك ، التوبه خويه التوبه بس كوم مني

ابتعد شُعاع ومصطفى يسحب النفس بالكوه
- مصطفى :- اعترف لك بشغله
- شُعاع :- شنو هيَ
- مصطفى :- الله يساعد نارا عليك فطستني
- نارا :- هو كال هيج وطفر وشُعاع يصيح ورى والباقين يضحكون
اني حيل خجلت الله يطيح حظك يامصطفى ع هاي الطلعه

رجعنا للبيت ومن ورى الهبطه الي اكلناها حتى أطفال لو رادوا يصيرون هسه انقطع الامل بس والله وكف كلبنا دخل شُعاع يسبح
واني خليت الجنطه ع السرير ادور ع جهازي وينه ماكو خرب وينه بس لا وكع بيت اهل شُعاع صخاااام هو بي رمز بس الاشعارات تبين وبس لا هذاك يدز رسائل يااربي احس صخنت طلع شُعاع من
الحمام شافني مهوسه جنطتي

- شُعاع :- شصاير هنا
- نارا :- جهازي ماعرف وينه يمكن وكعته بيت اهلك
- شُعاع :- هسه اتصل ع الجهاز واشوفه وين
- نارا :- اني بقيت قلقه أنوب اني سويته صامت ياربي وكفت كدامه وهو اتصل ع جهازي مره مرتين اتصل الا ان انفتح الاتصال
وطلع صوت ولد راد ع الجهاز هنا حسيت كلبي وكف من الخوف
- شُعاع :- مصطفى هذا انتَ ملعون جيب الجهاز واكع من نارا ، اي هسه عندها دروس ، خوش الله وياك
- نارا :- زفرت بتعب همزين ، هاا ؟
- شُعاع :- هسه يجي مصطفى يجيب الجهاز ويا
- نارا :- تمام .

مرت نص ساعه والباب اندك شفت الكاميرات هذا مصطفى شُعاع جان يصلي اني رحت افتح الباب اله اول ما فتحت الباب هو مد ايده انطاني الجهاز بس الي صدمني نظرات مصطفى الي غريبه
واول مره اشوفه هيج يباوع عليه
- مصطفى :- اخذي هذا الجهاز مالتج
- نارا :- اي رحم الله والديك همزين جبته لان عندي دروس
- مصطفى :- اي واضح مهمه
- نارا :- جان يحجي بس عيونه ونبره كلامه تختلف جذرياً حتى ما قبل يدخل بس انطاني الجهاز وراح خلاني صافنه عليه اول مره مصطفى يتعامل وياي بهاي الطريقه حسيت بأحساس بشع .

سديت الباب ودخلت فتحت الجهاز اول ما شفت الاشعارات غمضت عيوني بقله حيله يعني شايف الاشعارات من برى
من رقم غريب اكيد فهم الموضوع غلط اووووف ياربي
جانت الرسائل هواااي وكُلها بيها تهديد وبيها كلام ماعرف شنو
يعني الي صدمني حتى يعرف بيتي وين !!! تعبت ادمرت من ورى
هذا المجهول لا يكول شنو يريد مني ولا يحجي حتى اتأكد إذا هو
نفسه الطالب او لا

باليل شُعاع نام لان ورى اجتماع من الصُبح واني عيني ما أخذت النوم كلبي احسه يوجعني واحس راح يصير شي مو زين بس ماعرف شنو هوَ
تركت شُعاع نايم ونزلت جوه واني بيدي الجهاز اتصفح بي
اريد إلهي نفسي حتى القرايه طارت من راسي هاي عود قريت

جنت صافنه بالفرغ وحتى ماعرف ع شنو صافنه فزيت ع صوت
اتصال اول ماشفت هذا نفسه الرقم الغريب اخذت الجهاز وركضت برى حتى صوتي مايسمعه شُعاع طلعت بالحديقه اتنفس بسُرعه من الركض والتوتر بنفس الوقت فتحت الجهاز اول ما خليته ع اذني
صرخت بي صرخه
- منوووووو انتَ و شنوووو تريد مني ااااحجي ليش تسوي كُل هذا
عبالك خايفه منك اني تخسى اخاف منك واحد حقيررررر والله اشتكي عليك واخليك تخيس بالسجون وما تطلع منه طول حياتك احجي شنو تريد منننني ومن وين تعرفني وأخذت رقمي ؟؟؟؟
اني مستمره احجي ماحسيت الا غلق الجهاز بوجهي فار دمي
رجعت اني اتصلت بي طلع مغلق الحقيررر ماجان متوقع مني افتح خط واحجي عباله راح اتوسل بي وابجي حتى يتركني مايعرف اني ويا مني وشنو عشت قبل وشصار بي لعبت بيه الدنيا لعب بقت عليه

بقيت افتر والهوى بارد يضرب وجهي اريد ابرد نار كلبي كعدت بالحديقه من التعب الي اني بي بجيت بقهر مو خوف لا بس من التعب احس كُل ما اكول هاهي راح تمشي حياتي مثل ما اني أريدها يطلع شي يعكرها وينغص عليه الفرحه الي افرحها اني بشر عندي قدره تحمل بس مو قويه الهاي الدرجه اني بشر احس وانقهر
وابجي اني مو حجر يارب مو حجر تعبت ريح كلبي وساعدني

طلعت كُل الكبت الي بداخلي إلى أن حسيت بالراحه دخلت للبيت قفلت الباب ورحت صعدت فوك دخلت بحضن شُعاع اريد احس بالأمان هو من حس بيه ضمني خليت راسي ع صدره ونمت .

ثاني يوم داومت واني ناويه اتحرك ما ابقى هيج لازم اسوي شي
مُستحيل اخلي الموضوع يبقى مثل ما هوَ

بالطريق اباوع ع الشارع
وكفنا بالازدحام اكو بالتقاطع دائما أطفال بيهم يبيعون كلينس وبيهم مي ف جان بيومها واحد يبيع ورد شُعاع فتح الجامه وصاح الطفل جان بيده ورد اجه يركض وهو فرحان وكف يم الباب مال شُعاع

- عمو راح تأخذ مني ورد
- شُعاع :- اي عمو انطيني
- عمو تاخذ الورد الهاي الحلوه الكاعده يمك
- نارا :- اني ضحكت
- شُعاع :- ها تتغزل بزوجتي كدامي
- ههههه لا بس هي حلوه
- نارا :- حبيبي انتَ الحلو
- شُعاع :- هاك بابا اخذ
- شكراً عمو بس هذا هواي
- شُعاع :- ميخالف اخذهن لك
- نارا :- راح يركض وهو فرحان واني اضحك ع ضحكته الحلوه

- شُعاع :- هاج ياحلوه
- نارا :- قدم الي الورد وهو مبتسم أخذته، شكراً ياحلو كُلك ذوق
- شُعاع :- تدرين عيونج اطك بالكاع شنو هذا الجمال ولج
- نارا :- ههههههه هنَ عيوني نفسهن
- شُعاع :- فلك طرج موش عيون
- نارا :- ضحكت بصوت عالي وبقيت اكركر وهو يصيح
- شُعاع :- ضمي الج ضحكه كافي تضحكين لج راح اشمرج فضحتينا
- نارا :- هسه شسويت
- شُعاع :- سلامتج همزين السياره مضلله جان شافوج شلون تضحكين واني ما اقبل يشوفوج
- نارا :- ليش عيني استاذ شُعاع
- شُعاع :- لان اني اغرمت بيج وبضحكتج ماريد غيري عيونه تصير عليج لان وقتها اشلع عيونه واحطهن بيده
- نارا :- اووووي استاذ شُعاع صاير عنيف
- شُعاع :- بس وياك اني غير ياحلو

بقى طول الطريق يتغزل بيه واني اضحك شكد ضحكت بس احس كلبي بنفس الوقت ناغزني وحاسه راح يصير شي اول ما وصلت ردت انزل بس هو لزمني من ايدي
- شُعاع :- حبيبي إذا صار شي اتصلي عليه
- نارا :- ليش هيج تحجي شنو يصير
- شُعاع :- مايصير بس الحذر واجب
- نارا :- خوفتني شبيك حبيبي
- شُعاع :- ماصاير بس اني احس كلبي ما مطمئن واريدج تنتبهين ع روحج لان اني روحي بروحج
- نارا :- واني روحي بروحك انتبه النفسك بسته بسرعه ونزلت
وهو انتظرني ادخل للكُليه يلا راح

الغريب بالموضوع انُ احساس شُعاع مثل احساسي وهذا الشي
الي خلاني اتأكد راح يصير شي موزين اليوم ياربي الطف بينا واسترنا

خلصت المحاضرات وطلعت اليوم ساره ما مداومه لان مريضه ف بس اني موجوده اريد ينتهي الدوام حتى ارجع لان ماكدر الوحدي كعدت برى بالحديقه وجان المح نفس الشخص كاعد الوحده ويباوع عليه اني وصلت حدها كمت ومشيت بأتجاهة هو شافني اجيت عليه عدل كعدته وكفت كدامه وهو ضحك أنوب خبلني بالزايد

- اريد افهم انتَ ماتستحي ع نفسك ما تكول عيب اسوي هيج بيها
ماعندك حياء ماتخاف من الله ، عقد حاجبه رد عليه
- خير اني شسويت ؟
- ضغطت ع ايدي ، كُل هذا الي سويته وتكول شنو سويت ؟؟؟
- اي فهميني اذا قصدج ع هذاك اليوم الي جنتي تنتظرين زوجج ف هذا صار بدون وعي مني واني اعتذر
- عقدت حاجبي ، شنو انتَ تضحك ع نفسك ترى انتَ سويت الاتعس منه
- شنو سويت يابنت الناس اني توقعت انتِ ما متزوجه وردت أتقدم
الج بس بعدين من عرفت بيج متزوجه ابتعدت عنج ومن حركه كلبي هذاك اليوم ردت اسوي شي بس بعدين تراجعت لان ماردت اخرب حياتج ويا زوجج وبس كل هذا الي اني سويته بعد شنو الي سويته ؟
- والرسائل ؟؟؟؟
- يارسائل !
- الي ترسلهن الي وتهددني بيهن
- بالحرام مو اني مستحيل اسويها اني
- لاتجذب
- والله مو اني ، اني مو نذل الهل درجه حتى ماعندي رقمج
- بس بهذاك اليوم الي وكفت بي برى وصلتني صوره الي بنفس ملابسي وانتَ بوقتها جنت شايل الجهاز وتضحك بوجهي
- اي اعترف بس اني مادزيت الج شي والله
- يعني مو انتَ ؟ الله عليك كول حتى ارتاح
- لا والله مو اني وداعه ابويه

كلامه صدمني صدمه عمري ، امشي واحس اطرافي بردت شنو يعني اذا مو هوَ لعد منو ؟؟ ياربي كعدت اعصر مُخي اذا اكو احد
اشك بي بس مااااكو احس نفسي ضعت اريد شي اتمسك بي اريد
خيط حتى اعرف اني وين بدون ما احس بنفسي وكأن مو اني الي
احرك ايدي طلعت رقم المجهول وكتبت اله رساله " منو انتَ " ودزيتها اله انتظرت الرد مالته عبرت الربع ساعه وهو ماكو مارد عليه
مشت الساعه وماكو ورى ساعه وعشر دقائق يلا وصلت
رساله منه طول هذا الوقت واني حتى المحاضرات ضربتهن
مادخلت سريع فتحت الرساله لكيته داز الي
" اذا تريدين تعرفين اني منو تعالي ورى الكُليه الوحدج وبدون ماتجيبين وياج احد مفهوم " بقيت صافنه يمكن لحظه غباء مني
تصرفت بغباء وهذا الغباء خلاني ادفع الثمن غالي
شلت الكتب وطلعت من الكُليه مشيت الطريق واني كأن عقلي مخدر وكأن اني مُسيره احس واحد يمشيني مو اني وصلت النهاية
الشارع وعبرت توجهت ورى الكُليه جانت هادئه والدنيا ظُهر وماكو
ناس ولا طُلاب حتى السيارات قليله بقيت اتلفت ادور عليه وينه
انتظرت فوك ال ١٠ د وهو ماكو فقدت الامل وتوقعت جذب عليه
ومستحيل يجي وعرفت ديضحك عليه

ردت امشي وارجع ادخل للكُليه ماحسيت الا ايد صارت ع خصري وايد ع حلكي مالحكت اصرخ ولا اهرب اجتني ضربه حيل قويه ع راسي اغمى عليه وفقدت الوعي .

عن حال شُعاع
ياهَو العَلمك وتريـد تمشي بَعيد؟
يسِل الشوگ خايف باچر يسِلك
مِثل ظلك چنت !
بالخُطوه نمشي اثنين
مِشيت إنتَ بظلام وضَيعت ظلك
دَليني عليك، سنين تَايه بيك
امشي وياي ادَورك خاطر اندلك
يتبع ✨️

الأحداث انقلبت والهدوء السابق ماعاد أصبح هدوء✨️

شنو توقعاتكم منو الي سوه كُل هذا وشنو راح
يصير ؟؟؟

.