الربتج " حالك الاسوداد " الفصل الحادي والعشرون 21 - بقلم رهف علي

گــولوله !!
الفـــرحة عبرتنة ومشــت
شــبينه مانستاهل
من يمي غمــضت شيگعد حضنه المايل

تعويض الكم بارت طويل ..
لاتنسون التصويت والتعليقات الطيفه مَثلُكم قلبي

اكتبوا تاريخ ميلادكم هنا " ..

شهكت مصدومه رفعت راسي اباوع عليه
مامستوعبه الي كاله
شنو يحبني شنو يعني هسه هو اعترف
الي !!!
لزمت ايدي بأيدي الثانية وضغطت عليهن بقوه
ارتبكت خاصه
الوضع الي احنه بي هسه ما يسمح
وحيل خايفه
رديت عليه
نارا :- شنو تحجي انتَ ؟؟
شُعاع :- شنو شبي
نارا :- انتَ مقتنع بالتحجي وياي هسه ؟
شُعاع :- اي مقتنع وشبي كلامي وياج !
نارا :- شُعاع شنو تحبني انتَ
شُعاع :- اي يابه احبج
نارا :- شلون حبيتني شُعاع تدري ورانه مسيره حيل
جبيره ، كُلش مو وقت الحُب بهذا
الوقت
شُعاع :- نارا احبج مو بيدي وشنو اجرمت من حبيتج
بهذا الوقت وشنو يعني
شنو صار احتركت الدنيا لو شنو
نارا :- تمام تحبني تمام خلينا نرجع للبيت هسه
بعد ورانه هواي شغلات نسويها
وهواي شغلات نواجها
ما مستعده الهذا الحُب ..
اباوع عليه صفن بوجهي بس فعلا اني ما مستعده
حتى لو اكو مشاعر بداخلي اله بس
ماكدر احس ما مستعده
الهاي الخطوه
شُعاع :- نارا تتزوجيني ؟؟؟ ..

بقيت مصدومه ما مستوعبه الي يكوله
يا الله احس نفسي بغير
عالم خوفي الي يمنعني وعدم تقبل المجتمع
الي يمنعني من هواي أمور
اولهاا الزواج
نارا :- لا
عقد حاجبه باستغراب
شُعاع :- ليش لا ؟؟
نارا :- شُعاع عائلتك موجوده تروح الهم سالم غانم
شُعاع :- وانتِ ؟
سحبت نفس باوعت بعيونه همست بهدوء
نارا :- يم الله وحيدر الكرار ..معليك بيه
عصب عليه ونتر بوجهي
شُعاع :- ناااارا هذا الحجي بعد ما اريد اسمعه
منج مره ثانيه مفهوووم
نارا :- لاا راح تسمعه مره ومرتين وعشره
وبكل يوم وبكل فرصه راح تسمعه من عندي
لان اني ماعندي غير بسه هذا الكلام
شُعاع :- اشششش
نارا :- لااا خلي احجي بعدين اني طمست بالغلط
وطلعت منه شلون تحجي انتَ هيج
شُعاع :- شنو تحجين انتِ ياغلط
نارا :- معليك ..

شفته حيل ضاج وانقلبت ملامح وجهة
التفتت اباوع الكدامي
شفت واحد يبيع شعر بنات كتفت اديه الصدري
وبقيت اباوع عليه
نزلت دموعي وصرت ابجي مو بيدي
احس الي صار والي يصير وياي اكبر مني ماكدر اتحمله
اتذكرت اخواني واخواتي امي وابويه
كلهم اتذكرتهم
صرت اشهك بالبجي
ليش هيج انقتلوا ظلم ليش ماكو احد اجه
وساعدهم
زين ع الاقل لو علي الصغير وياي
ليش هو هم استشهد بأخر للحظه ،
اباوع الأطفال تقربوا يم الي يبيع شعر البنات وصاروا
يشترون اني من شفتهم
فد مره اختنكت
العبره صارت ببلعومي
وكفت ع طولي دنكت راسي ومشيت
شُعاع مصدوم من تصرفي
وحقه اذا اني احس نفسي انسانه ثانيه وكل الي ديصير
هسه بسبب الكتم الي عشته
بالفتره الي راحت
خليت اديه ع وجهي وفقدت صرت اشهك
بالبجي
اجه شُعاع ورايه اني انطيته ظهري ومستمره ابجي

شُعاع :- اسم الله نارا شبيج ليش تبجين
يابه اذا ع كلامي وياج
والله اعتذر وبعد ما اعيدها ابد
بس بطلي بجي ولا تبجين
نارا :- امسح بدموعي ويرجعن ينزلن من بين
شهكاتي رديت عليه .. شُعاع اني هسه اجي عوفني .
شُعاع :- شنو اعوفج شبيج تنتِ مخبله
مستحيل اعوفج اني ..
نارا :- رفعت راسي اله ابجي ، شُعاع الله يخليك
عوفني شويه ،
هو سحب نفس بقوه عرف اريد اختلي شويه
بنفسي
شُعاع :- ماشي اني هنا كاعد بنفس المكان
وراج
نارا :- هزيت راسي وهو راح كعد بنفس المكان
واني بقيت ابجي احس
روحي تطلع ويا كل شهكه تطلع مني
امسح بدموعي ويرجعن ينزلن
مر الوقت إلى أن أدركت اني شنو الي داسوي
كل هذا مكتوب الج يا نينا كل هذا اختبار من الله اتجاهج
ليش دتبجين
مالازم اعترض ع حكم الله سبحانه وتعالى
لازم اكون قويه
لازم اكون صبوره
ما لازم أضعف
متأكده من بعد هذا الضيق هناك اكو فرج قريب
سريع اجتي هاي الايه براسي
"يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللّهَ لَعَلَّكُمْ تُفْلِحُونَ‎ "‎
كل شي بهاي الدنيا اله حل
وحتى المصائب والله سبحانه راح يربط
ع قلبنا بالصبر مثلي اني راح يربط ع قلبي
بالصبر
مو بس الصبر حتى الذنوب
الله غفور الرحيم وراح يرحمنا وذنوبنا راح تنغفر
الها اذا تُبنا إلى الله
الله أقرب النا من حبل الوريد وهذا الي صار
قويه اني لان الله وياي واكف ..

صفنت من حسيت اكو أقدام صارت كدامي
رفعت راسي بقيت صافنه بوجهة
هذا شنو الي جابه هنا
سريع اجه شُعاع وكف بصفي لان جان ورايه
يباوع عليه
شُعاع :- هاا شنو صار
الضابط :- ها شلونك
شُعاع :- زين ، شنو الي صار ؟
الضابط :- عرفنا عائلتك وين كاعدين
شُعاع :- حلو يعني نرجع
الضابط :- اي يلا نرجع
نارا :- التفت عليه يباوع بعيوني ابتسم بوجهي ونظراته
كلها امل و اهتمام اتجاهي
حجه وياي بهدوء
شُعاع :- يلا بابا امشي نرجع للبيت
نارا :- تمام ..
مسحت وجهي لان صار هوسه من ورى دموعي
انوب عيوني صارن يحركن ورمن
هم مشوا كدامي واني امشي وراهم صافنه
مدنكه راسي حسيت
بالعبان نفس حيل قوي دخت فد مره
حسيت روحي حيل مختنكه شنو الي ديصير ماعرف
وكفت صافنه ماعرف شنو
الي بيه
شُعاع والضابط كدامي يمشون واني
بقيت واكفه بنفس مكاني مامنتبهين عليه .
راسي صار ياذيني فد مره والغثيان فول عندي
وحتى عيوني ماصرت اشوف بيهن
دخيلك ياعلي شبيه اني ياربي شبيه ليش هاي حالتي
ماسيطرت ع نفسي وكعت ع الارض
حتى توازن ما صار عندي ورجليه ما سيطرت عليهن
رفعت راسي اريد اصيح ع شُعاع بس ماكدر
صوتي ما يطلع
شكد عجزززت بهاي اللحظه اصيح عليه
بس ماااااكدرررررت
هو التفت عليه وشافني واكعه اجه يركض يصيح
شُعاع :- الله الله شبيييييج نااااراااا بابا شبيج
نارا :- كعد كدامي ورفع راسي بأديه يريد يعرف
شبيه بس اني ماكدر احجي
شُعاع :- لا يا الله لااا نارا شبيج اششش ، بسررررعه ماااااي جيب ماااااي
نارا :- اني اشوف كل شي كدامي بس ماكدر
احس نفسي حيل مخنوكه
ركض الرجال يدور ع المي واني صرت فد مره
رجع يركض بيده بطل مال المي
وكف كدامي سحبه شُعاع من ايده وصار يغسل
بوجهي

الضابط :- شبيهااا ليش خشمها ينزف دم ؟؟؟؟؟
شُعاع :- لاااا نارا شبيججج تسمعيني دخيلك يا الله
شبيج شبيج
نارا :- بقى يرش ع وجهي مي ويغسل بي
فزيت شهكت احس وصلت عندي فد مره دفعته بضعف
وصرت اتقيء بس اتقيء دم
بقيت اصرخ من الخوف واني اشوف الدم هاي اول مره
يصير هيج بيه
انرعبت طلع صوتي وصرت اصرخ
ششششنووو هذااااا شنوووو شُعاع شبييييه اني
رااااح امووووت
هو هم خاف عليه صار يدك ع ظهري ع كيف
ويحاول يهديني
شُعاع :- ماكو شي اششش لا تخافين نارا شو
باوعي عليه ..
نارا :- اني مستمره اتقيء احس حيل اختنكت
اخر شي وكعت شي مثل اللحمه هو شافها لو تخبل
واني متت من الخوف والرعب
بقيت صافنه اباوع عليها
ماحسيت الا شُعاع صاح بصوت عالي
شُعاع :- السسسسياره بسررررعه شغلهاااا
خلي ناخذهااا للمستشفى بسسسسرعه
نارا :- ركض الرجال يرد ع شُعاع
الضابط :- يلاا امشي هاااي سيارتي موجوددده
بسرعه ..
شُعاع :- بابا تسمعيني تكدرين تمشين لو اشيلج
نارا :- هزيت براسي ، بس اسندني
سندني وكفني ومشى بيه للسياره
صعدني وهو صعد طول الطريق يصيح ع الي يسوق
حتى يسرع اكثر واني ماعرف شبيه
حتى ماعرف شنو الي احسه من الخوف
إلى أن وصلنا للمستشفى نزلني بسرعه ودخلني جوه
يركض بيه ركض

دخلوني واجه الدكتور سألني
- متزوجه ؟
نارا :- اثنثنهم صفنوا ع سؤاله اني جاوبه ، لا ما متزوجه
صفن عليه الدكتور بتعجب وماعرف شنو
الي بيهم حتى خوفني
رد عليه
- تمام لازم الدكتوره تفحصج
نارا :- استغربت من كلامه واحس ورى شي
بقيت صافنه بوجهة بتعجب
نظراتي تنتقل بينه وبين شُعاع
صاح ع الدكتوره واجتي طلعوا بقيت وياها وفحصتني
ماعرف شبيها
حسيت كلبي راد يوكف
حتى نظراتها الي تخوف ماعرف اني اشوفها تخوف
الدكتوره :- هذا الي وياج اخوج ؟
نارا :- ماعرفت شنو ارد عليها جاوبتها ، اي يعني هو هيج .
ردت عليه
الدكتوره :- ماما انتِ شنو مسويه بنفسج ؟؟؟
انتِ متزوجه موو ؟ ليش هيج ؟؟
نارا :- جمد الدم بجسمي وصفر وجهي من كلامها
شبيها هاي شنو هيج تسألني
شمسويه اني بنفسي
اباوع عليها بهلع هزيت راسي ورديت عليها ، لا
الدكتوره :- بنتِ انتِ متزوجه شنو شبيج ..
نارا :- انهبطت من كلامها صاعقه ونزلت ع راسي
بقيت صافنه بوجهة ما ارد بس ارمش
بعيوني
هي ضربتني ع خدي ع كيف حتى اصحى لان
فصلت تسألني واني ما اجاوبها
من حسيت ع نفسي رديت عليها بخوف
نارا :- شنو تحجين انتِ ؟؟؟ شنو تقصدين بكلامج ؟
والاكثر من هيج جوابها احس
الي كسر ظهري نصين ...

الدكتوره :- ماما انتِ مو عذراء عدت الفحص مرتين
انتِ مو بنت ، سألتج اذا متزوجه وكلتي لا ..

نارا :- بقيت صافنه بوجها احس فصلت
عن العالم شنو مو عذراء !!! شلون !!!
صحيت ع نفسي عطت بوجها ، ششششششنو
تحجين انتَ ؟؟؟؟؟؟ هاااا ؟؟؟
صوتي جان حيل عالي بحيث شُعاع برى
سمعني وراد يدخل بس ما قبلوا يدخل
رجعت عليه تهدي بيه
الدكتوره :- والله هاي اني هسه سويت الفحص
الج وبين يمي انتِ مو عذراء
هاي كدامج هسه ارجع اعيده للمره الثالثه
نارا :- هزيت راسي مأيده كلامها
حتى الخجل راح مني بس اريد اعرف اذا هذا
الشي صح لو لا
اني متأكده من نفسي محد متقرب الي شلون هيج صار
دخيلك ربي
رجعت نمت وهي عادت الفحص مره ثانيه
سألتها بقلق هاا ؟؟؟
هزت راسها بأسف
الدكتوره :- نفس الشي ..
احس راح اتخبل شششلون هيج والله ماكو احد
تقرب مني ولا خليت احد يتقرب
حميت نفسي وما سمحت المخلوق
يتقرب مني
سألتها هايفه
نارا :- وهاي العبان النفس شنو ؟
الدكتوره :- مجرد اعراض ، من قوه الاغتصاب
الي متعرضه اله رحمج حيل متأذي
وحتى صاير عندج أكياس ع المبايض ويحتاج الهن
عمليه لان يسببن الج عقم
لا سامح الله انتِ تتأذين ..

بهت وجهي وبقيت صافنه بوجهة حتى ماكدر
اتحرك
الدكتوره :- ماما لو تخليني اساعدج لو تطلعين تواجهين
اهلج الي برى واكفين
نارا :- فتحت عيوني ع وسعن مرعوبه
احس عقلي انضرب
صرت اصرخ بكل صوتي ، تعاااااالوووووا تعااااالوووووا ،
ماحسيت الا الباب اندفر بقوه ودخل
شُعاع يركض خايف من صوتي
بسرعه اجه يمي لزمني واني احس بنفسي متسهرته
لزمني يدلك باديه وبكتفي ويصيح
ع الدكتوره
شُعاع :- شبيييييهااااا ليش هاي حالتهااااا
نارا :- احس فقدت فد مره ما استوعب الي صار
حتى ماعرف شنو اسوي بس اتحرك مثل
المتكهربه واصرخ
الدكتوره :- بسسرعه جيبوووا ابره مهدئه بسسسسرعه
شُعاع :- بسسس فهميني شبيهااا ليش
هاي حالتها ولللج شبيهههاااا
نارا :- هي ماردت عليه حايره بيه
نوموني ضربوني ابره وهو شُعاع يفرك بخشمي ع كيف
استمر هذا الشي ربع ساعه
إلى أن حسيت بنفسي خويت من التعب
وسكتت بعدني بصدمتي
الي ما صحيت منها

شُعاع يباوع عليه ويرجع يباوع ع الدكتوره
مصدوم من الي صار
التفت عليه سحب نفس وزفره بتعب
شُعاع :- تعبتيني نااري شبيج
نارا :- دفعت ايده بتعب حجيت
ويا، اريد اطلع من هذا المكان
ماريد ابقى هنا ، رجعوني للبيت هسسه مابقى هنا .
بقى صافن بوجهي مصدوم من
تصرفاتي وحقه هذا الشي
رجعت صحت ، رررررجعووووني ما ابقى هناااااا رجعوني للبيت اريد اطلع
شُعاع :- اششش اهدئي هسه نطلع مانبغى هنا والله
نارا :- الدكتوره هزت راسها وهي مقهوره
عليه حجت ويا شُعاع
الدكتوره :- اتركوني شويه ويا نارا اريد احجي وياها
شُعاع :- انتبهي عليها واليسلمج
الدكتوره :- بعيوني
نارا :- طلع شُعاع بس بقى يباوع عليه خايف يتركني
الوحدي وهي راحت سدت الباب وراى
ورجعت عليه
كعدت كدامي
الدكتوره :- ماما كولي الي حتى اكدر اساعدج
اكو احد معتدي عليج ؟؟؟
نارا :- اختنكككت لان اني بنفسي ماعرف
نزلت راسي رديت عليها وعيوني مدمعه ، ما ادري ..
احس بالخوف والرعب مجرد ما افكر
بالموضوع سألتها
الدكتوره :- اي والله ، زين كولي اكو شخص
معتدي عليج لا تخافين احجي
نشتكي عليهم ونساعدج
نارا :- بس حجت هيج رجعت صرخت ، ارررريد
ارررررجع للبيت ررررجعوووووني
هي تباوع عليه مكسور خاطرها ع حالتي
رجع دخل شُعاع اخذني وطلع بس ابقى هنا
اموت وحالتي ما تسمح اله يعاند وياي او يجبرني ابقى

طول الطريق واني مو بوعيي صافنه
ودموعي ينزلن عشره عشره
ساكته وما فتحت حلكي بكلمه وحده رفعت راسي للسماء
شنو الي صار ياربي
ليش هيج صار اني شلون طلعت هيج مو عذراء
واني ماكو احد متقرب مني ؟؟؟؟
زين منو الي سوه بيه هيج نزلت عيوني اباوع ع شُعاع
معقوله هو ؟؟؟؟ زين شوكت وشلون ؟.
بس ما معقوله يسويها بيه وهو يحميني زين منو
معقوله ابو نوح !!!!!
يمكن صح ابو نوح لان اني اغمى عليه يمه مرتين
ومره من المرات اغمى عليه وبقيت نايمه ٦ ساعات
معقوله هو بهاي الساعات استغلني
واعتدى عليه !!!
دخيلك ياااربي بعد منو اني ماذكرته !! ياربي شنوو
هاي المغاره والدوامه الي صرت بيها
ليش ادخل بهذا الاختبار الصعب الي يهد
الحيل
الحمدلله ع نعمتك ياربي

وصلت للبيت بدون ما احجي ويا ولا انتظره
يستجوبني ركضت للحمام دخلت وسديت الباب قفلته
فتحت الدوش واني بملابسي
دخلت جوه المي مغمضه عيوني واتذكر كل كلامها
وياي هسه شنو
الي راح يصير وياي !!! شلون راح اكدر
أواجه هذا كله والوحدي منو راح يوكف وياي ويصدكني
منو راح يكول مو بارادتي ومجبوره ع الشي الي صار
وياي
بقيت صافنه الا ان فزيت ع دك الباب
وصوت شُعاع يصيح عليه
شُعاع :- نااارا صدك تحججين اتخبلتي انتِ اطلعي
بس احجيلي شنو كالت الج
الدكتوره لا تخافين اني وياج ما اعوفج والله بس
احجي حتى اكدر اساعدج
نارا :- بقيت الوب ماعرف شنو اسوي احجي اله لو ما احجي
اذا احجي اله هسه ينفر مني
ب

قيت صافنه ع نفسي هو حجه واختفى صوته
تركني الوحدي
اباوع ع ايدي وارجع اباوع ع المي شلون ينزل
عليها
مرت فتره طويلة واني بداخل الحمام
اخر شي طلعت
اتوضيت ودخلت الغرفه قفلت الباب عليه
سجدت ابجي " ياربي ماعندي غيرك ولا عندي غير شُعاع
بهاي الدنيا ساعدني اذا عرف اكيد راح ينفر مني
ويتخلى عندي مو بعيده عليه يصير يكرهني
مجرد ما يعرف الي صار يكرهني "
رفعت راسي سحبت القرآن وكعدت اقرا
بالكوه اشوف الكلمات امسح بدموعي ويرجعن ينزلن
إلى أن خويت من التعب
سديته ورجعته المكانه
بقيت كاعده بمكاني صار اليل طلعت من الغرفه
مشيت لكيت شُعاع كدامي يباوع عليه...
بس نظراته كلها غضب
من تصرفاتي اليوم حقه اذا اني مصدومه من
نفسي هو شلون

نزلت عيوني ع رجله يهز بيها
غمضت عيوني وبلعت ريقي بخوف تمشيت كعدت يمه
ناويه اخطي هاي الخطوه حتى
اتأكد من نفسي اذا صح
كلام الدكتوره او لا ..
ضغطت ع ايدي واني احجي ويا
بخجل ..
نارا :- شُعاع
شُعاع :- ها
نارا :- الباجر أريدك تاخذني الدكتوره نسائيه ، استغرب من
كلامي
شُعاع :- ها ؟؟؟
نارا :- اي شبيج
شُعاع :- نارا عيوني فهميني بيج شي اكو شي يوجعج
مو راح تخبليني فهميني
نارا :- بالأول اروح لدكتوره وبعدها احجي ، حاجي
هذا الولد حتى يأخذنا
شُعاع :- هاهي سهله الباجر اخذج للدكتوره بعيوني
نارا :- شكرا ، تركته ورحت للغرفه
احس نفسي داخيه ومابيه حيل حتى
النفسي وخااايفة من كلام
الدكتوره الباجر بس لا يطلع مثل
كلام الأولى
يارب ساعددددني يارب التشخيص مالتها خطأ ..

كعدت ثاني يوم ولكيت شُعاع حاجز الي عند
الدكتوره
صار الموعد واني ما ماكله اي شي ولا حاطه بحلكي
شي ولا حتى نايمه النوم ما شفته
بقيت طول اليل ادعي وابجي
نوب اصلي
صار العصر واخذني طول الطريق ادعي
يارب مو مثل ما كالت يارب خطأ التشخيص
إلى أن صاحت اسمي ودخلت الها
حجيت الها كل شي وفهمتها بالبدايه ماقبلت واعترضت
لان ماتسمح بهذا الشي والا تقرير من الشرطه
وسوتها عليه هوسه
بجيت وتوسلت بيها يلا قبلت
تفحصني
كالعاده مثل ما صار البارحه فحصتني واني
متابعه ملامح وجها ولازمه كلبي
ارجف
باوعت عليه وهزت راسها سألتها ارجف
نارا :- هاا !!!
الدكتوره :- كلامها صحيح انتِ مو عذراء
نارا :- احس الجبل كله وكع فوك راسي هزيت راسي ارجف ، متأكده من كلامج دكتوره ؟؟؟
الدكتوره :- صدكيني مثل ما بلغتج
نارا :- الله يخليج تأكدي والله راح اموت ، رجعت فحصتني
ونفس الكلام ما تغير اي شي
تهسترت وكلبي طار من صدري
رجعت عادت عليه نفس الموضوع
الدكتوره :- لازم تسوين عمليه ضروري لأن الرحم مالتج
متأذي وعندج أكياس كبار كلش ع المبايض
ويأذنج
نارا :- ماشي ..

طلعت منها واني بالكوه لازمه ادموعي حتى
ما ابجي ولا أفضح نفسي كدام شُعاع
لكيته واكف كدامي ينتظرني بعيد عن البنات
تقدمت اله وهو سألني بلهفة وخايف عليه
شُعاع :- ها بشري شنو الي صار ؟
سحبت نفس ورديت عليه
نارا :- ها ماكو بس جنت شاكه بشي وهسه تأكدت
شُعاع :- خير ؟؟
نارا :- اني طلع عندي أكياس وضروري اسوي الهن
العمليه الدكتوره كالت الي
شُعاع :- سهله سهله شوكت تسوين العمليه ما كالت
شوكت نروح هسه نسوي التحاليل لو شوكت
بالضبط حتى نلحك ونسويها الج من وقت ..
نارا :- بقيت صافنه ع خوفه عليه والهفة الي يكنها
اتجاهي ماتحملت بجيت ورايه جان اكو كرسي
كعدت عليه وصرت ابجي
هو كعد يهدي بيه
شُعاع :- ولج بابا ليش تبجين لاتخافين ماكو شي
يخوف سهله
وبعدين اني وياج ما اعوفج ابد ..
نارا :- رفعت عيوني اباوع عليه وبكلبي اكول ( ياتري
لو تعرف شنو الي بيه راح تبقى وياي هيج
لو تتغير وتتركني ؟ ..)
هزيت راسي اله واني امسح بدموعي
رجعنا للبيت بس اني احس حيل انطفيت
مو نارا القديمه صرت اتعس وكُلش تأذيت وانتهيت
٣ إيام واني الاكل ما حاطته بحلكي
وهو انتبه عليه وصار يصيح ويجبرني حتى اكل
واني مسدوده الشهيه عندي
ونفسي تقلب خايفة من كل شي بحيث صار
البيت جحيم عليه
هو يصيح واني نفسيتي صارت بالنازل مايعرف
شنو الي بيه عباله خايفة من العمليه

نارا :- شُعاع انتَ لازم ترجع العائلتك ..
هز راسه وجاوبني
شُعاع :- اي بس لازم اطلع الهويه بالبدايه حتى ارجع
الاهلي وارجع وانتِ زوجتي ..
نارا :- نزلت دموعي من كلامه رجع الموضوع براسي
هزيت راسي بنفي شُعاع مو ضروري اكون زوجتك
يعني مو ضروري تتزوجني
صفن بوجهي مصدوم
شُعاع :- شنو هذا الكلام ؟؟؟ شبيج انتِ ما تكولين ششبيج ؟؟؟؟
نارا :- اي والله شبيك الله يخليك افهمني ..
هو صار عصبي وعاط بوجهي رفع أصبعه
يصيح
شُعاع :- ناااااراااا كل شي تريدي جاي اوفره
الج حتى من حلفتيني ما اوصل الج
ولا اطخج وهاي اني وفيت بوعدي الج
بعد شنو الي ترييييدي ليش هذاااا تصررفج الخاطر الكائنات شبيج خبلتيني
نارا :- بجيت حجيت ويا واني اشهك ..
شُعاع اريدك تحلف الي انتَ لا هسه ولا قبل طاخني
ولا واصل الي ولا متقرب مني سواء فاقده
الوعي او ما فاقدته هنا أو من جنه بالموصل ..
من كلت هيج هو فتح
عيونه هنَ منا يخوفن انوب فتحهن ع وسعهن
خفت بالزايد هو حيل انصدم
من الطلب مالتي
شُعاع :- شششششنو ؟؟؟؟؟؟
نارا :- الله يخليك شُعاع ،هز راسه
شُعاع :- مثل ما تريدين هسه احلف الج بسيطه نارا ..
نارا :- اباوع عليه راح اتوضأ واجه
شايل بيده قرآن حط بداخله فلوس وسده رجع حط ايده عليه يحلف
شُعاع :- وحق هذا كتاب الله اني لا طاخج ولا وصلت
الج ...
تمام هيج ؟؟
نارا :- شهكت بالبجي من حلف الي هزيت راسي ، تمام

يباوع عليه وحاير مايعرف شنو يسوي الي
شُعاع :- بس فهميني هسه ليش
هذا البجي صارحيني بيج شي خايفة من شي
لو خايفة بسبب العمليه .
نارا :- أي أي خايفة بسبب العمليه
شُعاع :- لا بابا ع شنو هذا الخوف اني وياج لا تخافين
نارا :- هزيت راسي واني امسح ادموعي .
رحت للغرفه واني التفكير موتني شلون راح يتزوجني
شلون زين واني شنو يصير بيه
يمكن ما راح يتقبلني مثل ما اني يمكن تكش
روحه مني من يعرف اكو شخص تقرب مني
زين هو يعرفني اني حيل قويه واني صارعتهم وما خليتهم
يتقربون مني
هسه شلون راح اواجهة بهذا الموضوع
الحساس
الله لا ينططططتي الحقيرررر الله ياااخذذذه
شلون سوه بيه هيج شششلون اني ما حسيييت
بأي شيي راح اتخخخخبل
شلون صار هذا الموضوع
،،رجعت بذاكرتي واني احاول الكه حل او اتذكر
اي شي هو ضربني واذاني واغمى عليه ٦ ساعات تقريبا
لو أكثر زين معقوله انطاني منوم او شي
ثاني زين شلون
احس عقلي راد يوكف من التفكر حتى
الوقت ما حسيت بي
الا ان اندك الباب ..

نارا :- ادخل .. دخل شُعاع
شُعاع :- نارا تعرفيني اني شنو مو ؟ زين اني والله اوكف
وياج بكل شي اوكف وياج بس احجيلي
ليش هيج ذبلانه وينها نارا القديمه
الي جانت تحاربني وما تتركني الا وهي تتناكر وياي ،
اذا خوفج من العمليه
صدكيني راخ تصيرين زينه وترجعين مثل قبل
شوفي عيونج شلون صايره جواهن سواد
تدرين بنفسج صارلج يومين ما ماكله و وجهج صاير
اصفر ...
نارا :- ابتسمت بوجهة بألم، شُعاع اذا صار
الي شي بالعمليه انتبه النفسك
هز راسه بنفي خازرني بعتب
شُعاع :- اششش لاتحجين هيج كلام سلبي
صيري ايجابيه لا تصيرين سلبيه
نارا :- ضحكت بخفه ، تمام ..

صار وقت العمليه وتحدد اليوم وصار لازم
ادخل شكد كلت
ما اخاف بس بهذا الوقت حيل احتاجيت امي وياي
حتى لو اختي او ابويه
حيل احتاجيت استند عليهم ويطمنوني مايصير
الا الشي الزين الي
لبست لبس العمليه وشُعاع ماتركني ولا خطوه
ابد ولا لحظه كل خطوه هوَ وياي
يبتسم الي ويضحك بوجهي
حتى يبعد عني التوتر
إلى أن خلوني ع الستديه ومشوا بيه
و شُعاع يمشي وياي ويحجي يحاول يطمني
شُعاع :- نااري سبعه راح تدخل وتطلع من هاي الباب
واكفه ع حيلها قويه
وما تخوفها هيج عمليه بسيطه مو صحيح ها شتكولين ..
نارا :- ابتسمت بوجهة ، اطلع اسود عيشتك هااا
ضحك بصوت ورجع باوع عليه
وكفوا وهو تقرب مني ابتسم بهدوء
شُعاع :- سوديها يُبا اني اريدج تسوديها ، لا تعوفيني
اني منتظرج هناا تطلعين وترجعين
الي بالسلامه تمام ..
نارا :- تمام شعشوع ..
ضحك واني ضحكت ودخلوني للعمليات ..

لأول مره بحياتي ادخل العمليه وادعي بيها
ما اطلع منها صرت ادعي يارب ما اطلع منها يارب
اموت ما اريد اعيش
يارب ما اطلع من هاي العمليه الا واني ميته ..
اجه المخدر حتى يبدي يخدرني سألني ..
- شنو اسمج ؟
نارا :- نارا ..
بلش المخدر بيه
- شنو اسم والدج ؟
نارا :- نارا
- اعرف انتِ نارا ، ابوج شنو اسمه
نارا :- احس صرت ما اسيطر ع نفسي صرت اخربط ،
رديت عليه اخر شي نارا علي شُعاع
- يعني هذا اسمج الثُلاثي
نارا :- امممم .. بعدها ماحسيت بنفسي ...

شُعاع :-

اول ما دخلت للغرفه العمليات واني برى
منتظرها خايف عليها كلشش وروحي بيها صارت
القلق الي عشته خلال فتره
وجودها داخل العمليات سبب الي توتر قوي
خاصه كلامها وذبولها طول هاي الايام
سببت الي حاله من التوتر باتجاها اني مو غبي اكيد هي
بيها شي بس شنو هذا ماعرفه
اكو شي اني متأكد لان اصفرار وجها وخوفها
وبجيها كلهن يدل ع أنُ هي بيها شي بس
ماتقبل تحجي الي
لازم اروح للدكتوره الي راحت الها حتى اتأكد
شنو الي بيها اذا تبقى عليها ما تكول الي بيها
بس خلي تطلع من العمليه بالسلامه وقتها يصير خير
واروح اسوي الهويات مالتنا
بقى بالي ابويه اني كل ظني هو بخير وكل هاي
الفتره هم يكذبون عليه
ان شاء الله هو بخير اروح واشوفه

طلعت الدكتوره ورحت الها سريع اسألتها
شُعاع :- بشري شلونها ؟؟؟
الدكتوره :- الحمد لله زوجتك بخير
شُعاع :- الحمد لله زين اكدر اشوفها
الدكتوره :- هي بعدها بالبنج حالياً
شُعاع :- اريد ادخل اشوفها
الدكتوره :- تمام هي ترتاح شويه وبعدين انطلعها للغرفه
ترتاح بيها
شُعاع :- لا اريد هسه ادخل اشوفها ،
ماعرف ليش عاندت الا اشوفها هسه يمكن لان خفت عليها انُ صاير بيها شي
عاد هي اقتنعت
لبست الملابس الي يدخلون بيها لان المكان
معقمي ودخلت

دخلت واني كلبي ملهوف عليها يا الله
شكد احبها اول مره بحياتي احب هيج وبهاي الطريقه
وصلت آلها وشفتها كدامي
جانت مبتسمه ابتسمت ع ابتسامتها
شكد وجها بي نور وشكد حلوه حتى وهيَ
باتعس حالاتها
يمكن لان احبها واشوفها بهاي الطريقه
اباوع ع رموشها واني مستمتع بيهن
ضحكت من صارت تحشش وهي مو حاسه بنفسها..

نارا :- اممممم شُعاع ويينك انتَ
شُعاع :- تقربت ، هاي اني يمج ياعيون شُعاع
نارا :- وينك شو ما اشوفك تجذب عليه انتَ
شُعاع :- غير انتِ مغمضه عيونج ادري تشوفيني بالخيال
افتحي عيونج وتلكيني كدامج
نارا :- اوووف لا تصيح عليه
شُعاع :- هههههه ما مصيح جاي احجي وياج بهدوء
نارا :- تدري انتَ حلو
شُعاع :- هههههه اي ادري
نارا :- اي انتَ حيل حلو وشايف نفسك عبالك بس
انتَ حلو ، اكو هواي شباب حلوين
شُعاع :- اشش لاتخربطين لا اخربط وجهج
نارا :- اي وعندهم عضلات و ..
شُعاع :- سديت حلكها ، كافي بابا شبيج انطلق السانج
بعدت ايدي عنها ورجعت تحجي
نارا :- شوو تعال خلي ابوسك ليش هيج حلو انتَ
حتى غمازتك احبها اني
شُعاع :- ههههههههه لو انتِ وصاحيه جان سويتها
مو هسه غير تكعدين تذبحيني
نارا :- امممم حلو ...شنو اني متت
شُعاع :- اي انتِ متي

شُعاع :- استمرت تذمر واخر شي صدمني
كلامها
بقيت صافن عليها
نارا :- وين أمي اريد امي شو ما اشوفها
شُعاع :- تقربت منها حجيت بهدوء ، اششش
صيري زينه حتى نتزوج
نارا :- شُعاع اني ما اريد أطفال
شُعاع :- ليش ما تريدين ؟
نارا :- يمكن انتَ ما تتزوجني
شُعاع :- ليش ؟
نارا :- انتَ ما تدري اني شنو بيه .. اني بيه ...
شُعاع :- بقيت صافن عليها ، شنو الي بيج ناارا ؟؟؟
احجيي نارا شنو بيج ، اباوع عليها رجعت نامت
وما كملت كلامها
اني بقيت صافن عقلي صار يضرب اخماس بأسداس
شنو جانت تريد تحجي وشنو الي تقصده
شنو الي رادت تحجي
معقوله عندها شي سر خطير ؟؟
بقيت صافن انتظرتها إلى أن رجعت صحت
تبجي وتون من الالم
وتصيح بأسمي ..
نارا :- شُعاع اريد شُعاع ..
شُعاع :- يمج اني ياروح شُعاع احجي وياها
بس اني فكري بغير مكان
شلونج هسه ؟
نارا :- الحمدلله
شُعاع :- بقيت يمها الا ان صحت فد مره

نارا :- اول ما فتحت عيوني لكيت شُعاع كدامي
ابتسمت يعني ما تركني ولا شويه
معقوله " بس تفاجأت من شفت ملامح وجهة
حسيته مو ع بعضه
صدمني من سألني
شُعاع :- شبيج ؟
نارا :- شبيه ..
شُعاع :- ترى عرفت اني بكل شي
نارا :- فزيت بهلع شلون عرف ياربي دخيلك ما معقوله
اني حجيت شلون هو عرف ، رجع كمل
شُعاع :- ليش ضميتي عليه ؟؟؟
نارا :- احس عقلي افتر ، معقوله يريد يسحب الساني
مع ذلك ما انطي بنفسي الحد اخر لحظه رديت عليه ،
شنو الي صاير شُعاع شنو الي دريت بي ؟شنو صاير
شُعاع :- لا ماصاير بس انتِ الي احجي
واذا ما حجيتي اني راح أأذيج
نارا :- انصدمت صدمه عمري بكلامه ليش هيج اتغير
ليش هيج شُعاع صار
يارب دخيلك شبي
بلعت ريقي ورديت عليه .. ترى ما تخوفني بهذا كلامك .
شُعاع :- نارا احجي شنو ضامه عليه
نارا :- ولا شي
هو هز راسه وطلع
اني منا صارت الأفكار تضرب براسي
ومنا عمليتي مأذيتني نمت ورى ساعتين يلا رجع
بس حيل وترني عصبي ويهز برجله وساكت
بس نظراته اتجاهي اتغيرت
بقيت يومين بهاي الحاله إلى أن طلعت ..

رجعت للبيت تعبانه بس احسن من اول يوم
هو بقى يهتم بيه بس بنفس الوقت
بعيد عني حيل اني قريت قرآن و اني حيل ندمانه
وبنفس الوقت خايفة
لازم اسأل شخص ديني شنو الي يصير الي
واستشيره لازم ..

شُعاع :- طلعت اني من يمها بس كلش متردد
من وجودي يمها
الي ضامته عليه هو الي مخوفها هو الي مسبب
الها هذا الرعب
واني اعرف هي بيها شي بسبب الي ضامته
عني
رحت بوجهي للدكتوره مالتها
سألتها ونكرت ما كالت اي شي هددتها ورفضت تحجي
رفض قاطع مامسموح اعرف الا بإذن منها
احس اعصابي تلفت
ليش ما اعرف شنو الي بيها
طلعت بوجهي حتى اكمل هوياتنا بس نارا
ماكدرت اسوي آلها آله بحضورها
صور وإجراءات كامله
كملت ورجعت للبيت فتحت الباب ولكيتها كدامي تقرأ
قرآن بس مامنتبهة الي

تقربت منها وهمست باذنها
شنوو تسووين ؟؟؟؟
هي فزت وصرخت بوجهي
نارا :- مندمجه بالقرآن وما احس الا صوت اجه بأذني
فزيت خايفة
التفتت لكيته شُعاع بوجهي ، شبيييك راحت
روحي من الخووووف مو هييييج عابت لك والصووووتك
والجابني يمكككك
ضحك واهتزت اكتافه
بعدها صفن بوجهي سألني
شُعاع :- منو جابج يمي ؟؟؟
استغربت من سؤاله
نارا :- شنو تحجي انتَ ؟
شُعاع :- احجي يمكن اكدر اساعدج
نارا :- شبيك انتَ شنو دتمسلت ؟؟؟
تقرب مني وكرصني من ايدي بقوه وجعني بيها
رد عليه بهدوء مخيف ..
شُعاع :- اخر واحد يكول شنو تمسلت فهمتي ..
نارا :- خفت منه شبي هذا ليش هيج تغير
وياي معقوله سمع مني وهيج صاير مختلف وياي
لو راح للدكتوره وبلغته بكل شي
وكعن دموعي بدون ما ارمش ..
شبيك شُعاع؟
شُعاع :- ساعديني واساعدج كولي منو انتِ
نارا :- شنو شبيك معقوله ماتعرفني انتَ
شُعاع :- لا اريد اتعرف عليج

رديت عليه واني عيوني بعيونه
نارا :- أي ميخالف اتعرف عليه بس مو هسه
من اني اطلع من هذا البيت وقتها اكول
لك اني شنو ، وشنو ضامه عليك ..
هز راسه برود ..
شُعاع :- اذا تريدين هذاك الباب يوسع جمل
نارا :- ماشي شُعاع، احس الدموع تجمعت بعيوني
ليش هيج متغير عليه
كمت ألم بهدومي واني الغصه واصله الحد الاخير
واريد ابجي
ردت اطلع حجه وياي ..
شُعاع :- احجي نارا
رديت عليه بقهر
نارا :- تخسه
شُعاع :- اهااا لعد ارجعي ماكو طلعه منا
نارا :- موووو بكيفك ، عفته ردت امشي صار كدامي
دفعته من صدره بقوه واني مقهوره منه
اجه سحبني من ايدي بقوه وماحسيت الا انضربت
ونشخطت طلع الدم منها
صرخت متألمه رجعت دفعته ولزمت مكان العمليه
حيل تأذيت
صحت بي ..ششششبييييك انتَ وخر مني
شُعاع :- احجي وخلصي
نارا :- ششششنو احجي
شُعاع :- منوو انتِ
نارا :- وخررررر من يمي ع اساس انتَ ماتعرررفني
وخر لا اسويك عبره لمن لا يعتبر
شُعاع :- اني اسويج ليش انتِ تسوين
نارا :- لااااا انتَ موووو معقول
شُعاع :- احجي ..
نارا :- تمام راح احجي ..

عفته ورجعت كعدت هو واكف كدامي
سحبت نفس وحجيت
نارا :- هذاك اليوم من جنن انتَ مصخن اني اتصلت
بالضابط نفسه وهو اجه هنا للبيت
واني ضميت عليك ما كلت لك اني اتصلت بي
هو بقى صافن بوجهي
شُعاع :- نارا اني مو طفل
نارا :- والله شبيك اذا ما اتصدك بيه روح اتصل بي واسأله
شُعاع :- لا مو هاي الي اقصدها ترى اني اعرف بيج
انتِ اتصلتي بي
نارا :- شبيييك صدكني ، حاولت شكد ويا
بس ما اقتنع بكلامي
استحقرني فد مره طول هاي الفتره
مليت وطلعت روحي اتغير فد مره عليه
ومو مثل قبل تعبني ويا هووواي تعبني ...

شُعاع :- يلا امشي وياي حتى انطلع الهويات
نارا :- مشيت ويا ورحت كملنا كل الإجراءات
أخذنا صور وكل شي
إلى أن طلعنا باوعت عليه بخوف سألته ، شُعاع..
شُعاع :- ها ؟
نارا :- من يطلعن الهويات اني وين اروح ؟
باوع عليه بهدوء رد
شُعاع :- يمي وين يعني تروحين
نارا :- شنو ما ترجع العائلتك ؟
شُعاع :- ارجع بس مو هسه، يلا اصعدي اوصلج واطلع عندي كم
شغله اسويها وارجع
نارا :- شنو هيَ ؟
شُعاع :- لا تدخلين
نارا :- انهاريت فد مره من اسلوبه وياي رفعت راسي
وصحت بي
كااااافي كااااافي تعبتتتتت شبيك ويايييي
اصلاً والله بس تطلع الهوووويه مالتي ما ابقى ويييياك
والله اعوففففك وامشي حتى لو محددد
يلفيني ييييمه اروح الدار الأيتام او اي دااار
يستقبلني وماااا اريد منيه احددددد عليه
خووووووش ...اني احجي وهو صافن عليه
شُعاع :- اششش اهدئي امشي اصعدي بالسياره
نارا :- عفته ومشيت صعدت للسياره
ابجي وابجي وهو ساكت ويستغفر الله التفتت عليه
اااااااي استغفر بلكت الله يغفرررر لك
يا ظااالم ..
هز راسه ورجع يكمل الطريق
واني اشهك حيل تعبت فد مره ماكو احد يحس
بيه
ولا هوَ وياي واكف احسه صار ضدي
وصلنا للبيت نزلني
شُعاع :- اكمل شغلي وارجع
نارا :- تمام ، نزلت وسديت الباب بكل قوتي
شُعاع :- اعصابج بابا
نارا :- دخلت وسديت باب البيت بوجهة
الخبييييث...

شُعاع :- اباوع عليها يمكن قسيت وياها هواي
بس هي ليش خايفة مني
وشنو الي ضامته عني وجايه تنطيني رده فعل تخليني
اتخبل لوو تبجي لو تسكت خايفة ومرعوبه
ومن تبجي تخليني انسى حتى اسمي
من حقي اضغط عليها حتى اعرف شنو همها
اعرف قسيت وياها هي حبيبه كلبي واخاف عليها
لا يصير بيها شي
افكر من ارجع اجيب الها عشه واعتذر منها
ع الي بدر مني
اهتم بيها واحتويها واخليها تحتمي بيه
وتحجي الي يزعجها وخايفة منه

دخلت علمود الفايلات اكملهن وهم علمود
شغلي ودوامي تاركه صارلي كم سنه
ويحتاج إجراءات
وهواي أمور اريد أكملها اليوم
دخلت للمكتب صار بوجهي شخص ..
- اتفضل استاذ منا ادخل
شُعاع :- هزيت راسي ودخلت جان
كاعد واحد ورى المكتب منزل راسه ويدون
بشغله وكفت كباله هو
رفع راسه باتجاهي

وانصدمت بي بقيت صافن بوجهة من الصدمه
وهو يباوع عليه ومصدوم يباوع عليه
وكف ع طوله يأشر عليه ويردد بكلمتين
- اني شايفك ، اني شايفك
شُعاع :- رديت عليه واني مصدوم ، شجابك هنا انتَ !!!
- هذا انتَ مووو انتَ نفسسسك ؟؟؟؟
شُعاع :- اباوع عليه حط ايده ع راسه يهذي
ويردد
- خرررب عقليييييي اني ششششايفك اي انتَ هذذذا
انتَ

رفعت راسي وخليت عيني بعينه
شُعاع :- سمارات
هو رفع راسه وجهة صاااار اصصصفر
رجع حط ايده ع راسه وصاح بصوت عالي
- شُعاااااااااااااع هذذذذذذا انتَ
حط ايده ع كلبه يردد بصعوبه
- يااااارب سسسساعدني ياااااارب دخيلك رررربي
هذااا هوَ نفسه نفسه
شُعاع :- بادن رجليه وكعد بالكاع من صدمته واني فاتح
عيوني اباوع عليه
تقربت منه
صحت بي
شُعاع :- كوووم لك لا تصير رجيج
يريد يكوم يوكف ع حيله بس مايكدر يرجع يكعد
رجع يصيح ودموعه تنزل
مصدوم
- اخخخخخ يا شُعااااع ياااخويييه ياااخووووويه
ولك خوووويه كسررررت ظهرررري من رحت
والله انكسررر ظهري بغيابك ياخوويه شكد تعببببت
شكد انذليت بغياابك ولك شششُعااااع
شُعاع :- نزلت يمه وحضنته بكل قوتي وهو حضني
بكل قوته صارلنا اسنين واحد مفكر الثاني ميت
وهسه يلا االتقينااا كأن الروح ردت
بينا
مخلي راسه بركبتي ويبجي ويصيح
- اخخخخ ياكسررره ظهررري ياخويه اخخخخ ياتعب سنيني
ولك تعبت اخخخ يا العباس دخيلك
شُعاع :- حضنته بقوه الكلام مني ضايع وبس هو الي يحجي
- يااهيبه روحي ياتعب سنيني ياتعب روحيي
ولك خووويه
بعد راسه عني ولزمني من كتفي يباوع
بعيوني ويبجي مثل الطفل
- تدري انتَ شسويت بيه تدري شنو صار بيه من رحتت
تدري بعدك انكسرر ظهري تدري اني من
بعدك ما عشت ابد
رحست للحسين وللعباس دخيلهم احلفهم وانخيهم
بس حتى ترد الي
لو بس يبردون كلبي بيييك اروح من حضره الامام الحُسين وارجع
الحضره الثانيه للأمام العباس
خويه لك لا ليلي ليل ولا نهاري نهااار
شُعاع :- يباوع عليه ويهلوس مايعرف شنو يحجي
كلبي راد يوكف من البجي
كل شوي يرجع يحضني ويبتعد يباوع بوجهي ما مصدك
بشوفتي كدامه
لزم قميصي وشم صدري بكل قوته
اني قوتي كلها اتبخرت هذا شريك عمري هذا
روحي واخوي الي جابته الدنيا الي
هذا احزام ظهري
- تدررري ياخويه اليل كله ما انامه افكر بيك
واكول هسه يجي
لا هسه يجي وماتججججي
شُعاع :- أهدأ ششششذام أهدأ حبيبي خويه
هاي اني يمك ما اعوفك

- لكككك شُعاع لك خووويه
شُعاع :- حط راسه بحضني ويبجي ، شذاام
خويه حبيبي انتَ أهدأ لاتسوي بروحك هيج
- ماااكدر ما مصدك انتَ هنااااا كدامي
حلمت بيك والله حلمت بيك اني السبب بروحتك اني
الي ما ساعدتك بيوم التخطيط من هاجموك
ااااني السبب ليل نهار اون عليييك
لان اني السببب بس والله ياخويه اني تصاوبت وماكدرت
شوف شوف حتى تصدكني
شُعاع :- رفع ملابسه حتى يشوفني موجود اثر
الطلقه الحد هسه ما رايح
هزيت راسي

شلونك شذام ؟ رفع روحه يباوع عليه
الشذام :- شلوني اني هاا شلوني حالي حال الضيم
بدونك
عفت دوامي وتوجهت للحُسين ( عليه السلام )
اشتغل بي كل يوميه اروح هناك
واتوسل وادعي يا تنطيني مره يا ترجع اخوي
شُعاع :- ضحكت بصوت عالي رديت عليه
ها يعني اتزوجت ؟؟
الشذام :- اي والله
شُعاع :- منين من كربلاء ؟
الشذام :- خويه ماتعرفها من بغداد بس أصلها كربلاء
الحمدلله وحاليا مستقر وياها
وعندي عائله
وعندي ولد سميته ع اسمك شُعاع
وعندي بنيه بالطريق جايه
شُعاع :- الله الله هاي شنو
رجع باوع عليه يضحك
الشذام :- ولك شششُعااااع شلون اشبع منك
شُعاع :- ههههههههه خويه كض روحك
راح تخليني احصرك هنا
شبيك كض روحك اني يمك هنا ما اعوفك
ماروح بعد
الشذام :- بس تروح اكتل روحي
شلونك انتَ شنو اخبارك

شُعاع :- شكول لك انخطفت وتعذبت بااقذر الطرق
عندهم ومايرف الهم جفن
عشت هناك هواي اشياء وشفت قتل تعذيب
وكلهم من الحشد والجيش
عساكر الي بأيدي اساعدهم بي والي مابيدي راحوا استشهدوا بيدهم
بقوا يهددوني با ابويه
رفع راسه يباوع عليه مبهوت وجهة
الشذام :- اببوووك!!!
شُعاع :- اي والله ابويه يهددوني بي يقتلوا او يسوون بي
شي
انتبهت عليه نزل راسه مافهمت شبي
وجهة صار احمر وملامحه اختلفت
خير خويه بيك شي ؟ صاير شي ؟؟
الشذام :- ها لا ماكو شي
شُعاع :- خليت ايدي ع كفته ، اي وين ما وين بيتك
انتَ
ابتسم بوجهي
الشذام :- والله ياخويه اخذت عن حُب
شُعاع :- ههههههه حيووو زين امورك ماشيه
الشذام :- اي والله واشتريت بيت الوحدي عشت وياها
مو مال اكعدها ويا اهلي
شُعاع :- خير ياطير ليش ؟
الشذام :- خويه تصير مشاكل ، زين انتَ وين كاعد ؟
شُعاع :- انطونا بيت من طلعنا من الموصل
وهسه اني حاليا كاعد بي
لازم اطلع ادور ع بيت والكه حتى انتقل اله
شو هذا طفر كدامي يصيح
الشذام :- لللللك شُعاع وراس ابني اذا ما اجيت وياي
شُعاع :- رفعت حاجبي ، اي شنو تسوي
حك طرف ذقنه ضحك
الشذام :- ههههههه شبيك خويه يعني اجيبك بنفسي
شُعاع :- فكرت لازم اطلع من هذا البيت لان مال واحد
من الولد وثكلت عليه خلي اكعد يم شذام
بهذا الوقت احسن
إلى أن الكه بيت
زين بيتك انتَ يوسعنا ؟؟؟
الشذام :- ولك خويه طبعا يوسع بيتي ٣ طوابق
تعال بالطابق الي جوه
لان ماخذين الفوك والجوه يبقى فارغ
شُعاع :- زين اكمل اموري ونطلع
الشذام :- تمام خويه

شُعاع :- كملت اموري وهو ورايه ورايه يمشي
عباله راح اطيرر
صعدت السياره وهو لحكني
الشذام :- وياك ما اعوفك
شُعاع :- خويه شغلك يامعود كمل شغلك ع الاقل
الشذام :- ابد والله لا تقنعني رجلي ع رجلك
شُعاع :- هههههه استغفر الله عمي امشي أمرنا الله
رحنه سوه وصلت للبيت نزلت ودكيت الباب
والشذام واكف بصفي لازم تلفوني بأيدي
وادك وهي ما تفتح بقى بالي يمها
خاف صاير وياها شي رجعت دكيت وصلني صوتها
ناصي " منو " رديت ، اني بابا افتحي الباب
التفتت لكيت شذام مصدوم
الشذام :- شُعاع منو هاي ما كتلي
شُعاع :- سالفه طويله بعدين اسولفها لك
دخلت للبيت وهو دخل ورايه ..

نارا :- التفكير اكلني اكل من طلع الحد هسه
التعب اكل راسي اكل
فكرت اكول اله حتى ارتاح واخلص من هذا
الهم والحمل الي شايلته
بس خفت لا يسوي شي خاصه هو أبو معروف يعني
يكدر يسوي كل شي بيه
يبووووو متت الف موته كمت صليت ركعتين
الوجه الله والإم البنين
حتى تنقضني حاجتي تعلمتها من ماما تسويها
وتنقضي حاجتها ماحسيت بنفسي
وغفيت ع السجاده
فزيت ع صوت ما انتبهت عليه رجعت غمضت
عيوني رجع صار صوت قويه طفرت
من مكاني خايفة انتبهت هذا الباب يندك اجه بالي
بيوم الي خطفوني بي من جنت الوحدي
حيل خفت وانرعبت انوب اني الوحدي هنا وشُعاع
ماكو مو يمي
كلت خلي اتقرب واشوف منوو يلا افتحه

تقربت وصحت بصوت ناصي
- منووو ؟
اجاني صوت شُعاع ارتاحيت واطمئن كلبي
فتحت الباب
هو دخل وأشر الي حتى اوخر همزين اني لابسه براسي
ومستوره
اباوع دخل ورى واحد اول مره اشوفه
بقيت صافنه عليه وارمش بعيوني
جان شكله ابيض حيل ابيض واقصر من شُعاع
و وجهة نوراني عكس كل الي شفتهم
ومرو بحياتي كلها
حتى ماعرف ليش ارتاحيت اله
لابس اسود وهو منا ابيض طالع يخبل يعني لو ما عيب
واستحي جان تغزلت بي
بس بقيت صافنه بمكاني منو هذا
شنو جابه شُعاع هنا معقوله يبيعني اله ؟؟؟ غميت
روحي امداج يا نينا شنو
هذا التفكير الزفت

هم دخلوا واني رحت للمطبخ حتى اودي اله
جاي
خليت القوري ع النار
وافكر منو هذا وشنو يسوي هنا اول مره اشوفه
بحيث التفكير اخذني للبعيد
بحيث حتى المشكله الي اني بيها نسيتها
وحتى نسيت الجاي ع النار
سويت جاي ورى شويه حاولت اتسمع
عليهم حتى اشوفهم شنو يحجون بس جانوا يتناقشون
بصوت ناصي ماكدرت اسمع شي
لزكت اذني لزك ع الباب حتى اسمع بس ماكو
فايده عبالك يتهامسون مثل
العشاق ادري شبيكم يحظي علوا صوتكم
مثل الباقين من يحجون عبالك عندهم عركه مو حجي
عادي شو هذول ع حظي
يتهامسون

بقيت احوس ورى شويه اجاني شُعاع
شُعاع :- نارا
نارا :- هاا
شُعاع :- لمي ملابسج حتى نروح .
بهت وجهي وانصدمت ضربت وجهي بقوه وشهكت
صحت بي
نارا :- عززززززززه العززززززاني شُعاااااااااع بعتني اله ..
حسيت صوتي عالي حتى الولد سمعني
شُعاع :- جيرررره مصخمه بكصتج يعني اكو
واحد يبيع روحه شلون ابيعج انتِ بيج شي
نارا :- لعد شششنو لا تخبلني
شُعاع :- ولج بابا اريد نطلع من هذا البيت لان مو النا
بعدين تذكرين الشذام ؟ الحجيت الج عنه
ناارا :- صفنت ، اي اعرفه
شُعاع :- اي هو هذا الشذام
نارا :- شششششلون !!! شلون لكيته وين لكيته
هز ايده
شُعاع :- والله بالسحبه طلع الي ، يلا خلي نروح
البيتهم
نارا :- وشبي هذا البيت ها ؟
شُعاع :- مو النا هذا البيت مو مالتنا واني ما مرتاح
هنا لازم نطلع ونرجع البيت الصاحبه
ونكعد حالياً يم الشذام إلى أن الكه بيت ونكعد بي
نارا :- هاا وشلون اعيش الوحدي
شُعاع :- يابه امشي هسه معليج اكو نسوان بالبيت
نارا :- بقيت صافنه منو هذن النسوان
احس الموضوع حيل يزعجني وكرهي للموضوع اكبر
خاصه من اتذكر النسوان الي بقيت يمهم
انكتمت روحي مجرد ما جاب سيرتهن
خاصه من سمعت نسوان يعني هوااايه
بديت الملم بالاغراض واني حيل ضايجه ومزعوجه

رجع اجه شُعاع يمي
شُعاع :- ليش تبجين ؟ شبيج خبلتيني شبيج بابا
نارا :- لااااتصيح عليه فهمتت
شُعاع :- شبيج تريدين نبقى هنا بهذا البيت عادي نبقى
نارا :- ومنو اني حتى احكمك
شُعاع :- اهووووو شنو هذا الحجي هذا هسه والتمسلت
مالتج
نارا :- يعني اني امسلت موووو روح انتَ الوحدك
واني ابقى الوحدي اكدر أدبر اموري كلها
واعرف وين اروح
شُعاع :- نارا الله يرضى عليج امشي وهناك
ترتاحين اكثر
نارا :- بجيت بقله حيله وهمست اله من بين شهكاتي ،
شُعاع
اني ما اريد نسوان ما اريد احد يمي
شُعاع :- امشي هسه معليج بابا والله ترتاحين
نارا :- هزيت راسي وطلعت ويا اخذ مني الأغراض
وحطهن بالسياره
فتح الي الباب وصعدت ورى وصديقه يسوق
وهو كعد بصفه ..

مشت السياره واني بس ابجي
احس حياتي مدمره فد مره وحتى بيت ما عندي من
مكان المكان ثاني ما معروف وخايفة منه
لا يصير بيه شي
هناك
الشذام يباوع عليه شلون ابجي بس مايحجي شي
وشُعاع يهز راسه حتى اسكت ويحاول
يطمني
وكل شوي يباوع عليه من المرايا
الي موجوده بالباب الي يمه
التفت شذام الشُعاع يسأله
الشذام :- حبيبي شنو تريدون العشاء
شُعاع :- اي شي خويه المهم اكل البيت مو اكل شارع
الشذام :- صار ..
نارا :- اتصل ع زوجته وبلغها تسوي الاكل
الشذام :- سوي النا مال ٢ نفرات او اوكفي لحظه ،
التفت ع شُعاع يسأله ، اكول ماال اشكد احسب الي ؟
شُعاع :- ههههههه مال ١٥ نفر
الشذام :- يابويه بعيوني ، اي عيني مال ١٥ نفر سوي
احنه بالطريق راح نوصل ..
نارا :- ابتسمت ع كلامهم وشميت العطر
الي بالسياره حيل طيب
عكس السياره الي هناك بالموصل كل ما اصعد
بيها اريد استفرغ
وصلنا للبيت من بعد طريق طويل دخل السياره
ونزلنا اباوع للبيت جبير وحيل مرتب وحلووو
من نزلنا طلع طفل صغير
يركض صاح اله
الشذام :- هااا شُعاعي
نارا :- بقيت صافنه يعني الطفل اسمه شُعاع
بس الطفل حلووو واشكر وعنده شامه بخده
وابيضاني مثل ابو
دخلنا جوه واني لازكه بشُعاع ما مبتعده عنه ...

نزل راسه همس الي
شُعاع :- روحي جوه ..
اني بقيت اكرص بي واهز بكتفي
نارا :- مااا اروح ما اريد ما اريد
شُعاع :- ولج بابا يلا روحي
نارا :- قوست شفايفي بزعل ماريد اروح اخاف
الرجال واكف يباوع علينا
عرف بيه خايفه صاح زوجته
الشذام :- تعالي عيوني ..
نارا :- دخلت زوجته اني بقيت صافنه عليها وفاتحه
حلكي تجننن تجنننن بمعنى الكلمه
عيونها ملونه وبيضضضه
ناعمه وبطنها كبيره مبينه حامل
سلمت علينا وباوعت بوجهي ابتسم وحجت وياي
- تعالي حبيبتي وياي
نارا :- اني حيل استحيت لان كدامهم
رحت وياها وصلت للباب وماكدرت اخطي خطوه
وحده حصرتني البجيه
التفتت الشُعاع وركضت اله وكفت بصفه لززززك
وحجيت وياها
لا خليني هناا ابقى ماريد ادخل جوه "
هي بقت تباوع بوجهي ومبتسمه تقربت
- ياروحي تعالي يمي خلي نجهز الهم الاكل وانتِ
ساعديني
نارا :- حسيت بالخوف بشكل مو طبيعي
واريد انهزم من هذا المكان
لزمت ايد شُعاع بخوف وهو ابتسم بوجهي ورجع
حجه وياهم
شُعاع :- خلوها هسه تجي ..

هم راحوا طلعوا واني بقيت متوتره وحيل خايفه
التفت شُعاع الي
يسألني
شُعاع :- شبيج بابا شبيج بنيتي ليش كل هذا الخوف
نارا :- شُعاع حباب خلينا نطلع اريد وحدي
ماريد ابقى هنا يعني ما اكدر واحس نفسي خايفة واستحي
هو جان واكف يباوع عليه ويتأملني شلون
احجي
عبالك كدامه طفله واحجي ويا شب مايشبه شي ثاني
شُعاع :- زين كومي يمها وشوفي اسلوبها
واذا ما عجبج تعالي يمي واني ارجعج
ترى البنيه زينه وهي من كربلاء انتِ مو تحبين كربلاء
نارا :- هااا اي احبها
شُعاع :- يلا لعد كومي بنيتي كومي حبيبي ساعديها
عيب يعني تريدين يكولون عليج
طفله وانتِ مثل البعير
نارا :- حسيت بروحي من صدُك طفله وجاي يحجي
وياي ويقنعني ، ياااا شُعاع هسه انتَ تذم بيه
لو شنو ضحك بصوت عالي واهتزت
اكتافه صفنت عليه وسرح بالي للبعيد
نزل عيونه يباوع بعيوني
همست اله بدون ادراك ..
نارا :- شُعاع منوو انتَ ؟؟.
قرب راسه من وجهي ابتسم الي ابتسامه سحرتني
غمز الي وهمس ..

شُعاع :- انا ابن الدوله يُبا ..

$$$

احسه يـبوس كلبي من يحـچي..
الله الله '

بسسسسسساع توقعاااتكاااام 🦦💋