الربتج " حالك الاسوداد " الفصل الخامس وأربعون 45 - بقلم رهف علي

أدوساً ع الجرح والجم الملجوم
واخلي الساكنات الربهن يشوغن .

الفكره التي تجعل الانسان يخاف من ذات نفسه ومن كُل شيء مُحيط بع هيَ الخوف انُ يفقد شخصاً كان قد اعتبره شي مُهم في حياته ، شخص كان في يوم من الايام قوي ، مُحب ، مُساعد ، طيب ، مُقاتل ، الخ ...
نحنُ كـــ بشر أو انا كــ أنسان اخاف أن اخسر شخص إلى الابد حتى وان ساهم في حياتي لشيء بسيط
فكره الخساره شيء مُرهب في النفوس ، هُنالك شخص انتَ تعرفه حق المعرفه وفجأة يُقال عنه " كان " هُنا سوف يَسكُت اللسان عن النُطق وتعجز الحروف عن التعبير ، يخفق العقل في الاستيعاب ، ولا يُصدق
القلب هذا الخبر
يقشعر الجسم عند عَلم ان هُنالك من استشهد وقُتل في سبيل الوطن
احقاً قتد قُتل !!!
عندما يَحّين موعد الوداع تسكُن العبرات وتَكتم الأهات ، تنخطف الأنفاس
ولا يَسع قول " سامحناك ارقد في سلام "
ايُتها الروح الطاهره ارقدي في سلام .

- نارا :- احس جسمي صار يرجف ودموعي الوحدهن صارن ينزلن
فكره انُ افقد شخص عليه عزيز معتبرته من اهلي هنا ماكدر اتحملها
يكفي الي انطيته ما مستعده ولا جاهزه اخسر أكثر رجليه بادن واني اشوف نظرات شُعاع حسيت قطعه من روحي صارت بأيدي
من صاح بصوت عالي منووو استشهد بيهم كُل فكري راح المصطفى والشذام وعابد لان ماصار الهم ساعه من طلعوا ياربي لاتفجعني بيهم
لا تفجعني بأحد منهم اباوع ع شُعاع جمد بمكانه هو غير لو اكدر اوكف ع طولي ، هو غير لو اكدر اروح اله واسأله منو الي استشهد بيهم
ماحسيت بي الا سد الجهاز وركض اني فتحت عيوني وصرخت ،
ششششششششُعاع منوو الي استشهد الله يخليك احجي ؟؟؟؟

صاح من يمه وهو يطلع برى .

- شُعاع :- صويحبي واااخوي لؤي

- نارا :- شهكت مرعوبه لؤي استشهد !!!!! لا يا الله دخيلك لااااا
لطمت ع وجهي ابجي ما مستوعبه كلامه مامستوعبه الي كاله هسه
يعني لؤي الي نعرفه !!! وكفت ع طولي ارجف وركضت ورى شُعاع
اريد الحك بي بس مالحكت لكيته مشغل السياره وطالع كعدت ع الارضيه مهدود حيلي فرفحت روحي واني ابجي ، شنو انسى منه ؟ انسان بمعنى الكلمه ع طول واكف ويا شُعاع بكُل شي حتى بيوم الي طلعنا من الموصل هو جان ويانه ما تركنا صار النا سنين نعرفه حتى هو الي جان يدور ع اهلي ويا شُعاع خلص كلبي بعد شنو اتحمل اكثر ششششنو !!!
بقيت كاعده بالكراج انفتح الباب مال البيت رفعت راسي اباوع واني عيوني مليانه دموع ، دخلت عنقاء هي هم مفرفحه تبجي حالها من حالي

- عنقاء :- وووووولج ناااااارا شفتي لؤي استشهد !!
- نارا :- هزيت راسي ورجعت ابجي ، هي كعدت كدامي تبجي
اذا اني اعرفه من طلعت من الموصل ف عنقاء تعرفه قبلي هو ويا ولدنا
معتبري واحد من الولد مو غريب مو شرط تكون صله القرابه هي الدم !
المشاعر الي تربط الناس ببعضها ، عنقااااء شلون فهميني ؟؟؟
- عنقاء :- نارا سمعت الشذام يكول متصاوب وبعدها كال استشهد
- نارا :- يارب دخيلك ياااارب الطف بينا

ورى شويه الباب اندك مال البيت حتى ما دخلت وشفت منو
بالكاميرات رحت سريع فتحت الباب واني امسح بدموعي كُلي امل
بشوفه شُعاع انُ يرجع وهذا الشي كُله وهم ، لكيت مصطفى كدامي
صحت

- نارا :- هاااااا مصطفى احجي؟؟ هو احسه مخنوك ويريد يبجي
- مصطفى :- امشي اخذج البيتنا
- نارا :- الله يخليك احجي لؤي وينه ؟؟؟؟؟ دنك راسه متحسر
- مصطفى :- استشهد لؤي
- نارا :- رجفت شفايفي واني اسأله وصوت عنقاء اجتي ورايه تبجي ، شلون ؟
- مصطفى :- انضرب بالمظاهرات واستشهد
- نارا :- خليت ايدي ع راسي ، وين وينه شُعاع؟؟
- مصطفى :- اهدئي نارا والله شُعاع هسه مامتحمل خسارته
- نارا :- اي اي وينهم
- مصطفى :- بالمستشفى والدنيا كلها مكلوبه هناك وماكدر اخليج الوحدج هنا وشُعاع ماعرف شوكت يرجع ف اجيت حتى اخذج البيتنا
- نارا :- مسحت وجهي اتنفس بقوه ، لا عنقاء يمي انتَ روح هناك وخابرني الله عليك
- مصطفى :- ان شاء الله
- نارا :- راح طلع وهو حاني ظهره والحزن لاعب بحاله اذا مصطفى هيج هسه حال شُعاع شلون ؟؟ سديت الباب ورى ورجعت دخلت .

بقيت اني وعنقاء بالبيت ومرت ساعات طويله واني كُل ما اتذكر شي مقتطفات براسي اله ازيد بالبجي ، هواي ساعات مرت الا ان سمعنا
صوت الباب الخارجي انفتح كمت اني وعنقاء وركضت اباوع دخلوا شُعاع، الشذام وعابد للبيت بس شنو حالتهم حاله واحس فجأة انطفت الدنيا بعينهم شلون هيج البشر يكدر ينطفي بهاي السرعه شلون وفاة شخص
هيج تأثر بالانسان بهاي القوه ، جانوا يمشون واحس روحهم مسلوبه
احنه من شفناهم هيج بجينه، اخوهم هذا اخوهم
دخلوا جوه احس وأحد ساند نفسه ع الثاني بس يوكع واحد يوكعون كُلهم

صعد شُعاع فوك واني رحت ورى كُل خطوه اخطيها ارجع خطوه للورى
احس ما اكدر اسنده واني بهاي الحاله راح تسوء نفسيته
سحبت نفس وصعدت الباب مال الغرفه جان مفتوح شويه فتحته ودخلت
لكيته بالحمام يغسل وجهي بقيت واكفه ماحجيت بس اراقبه كمل وطلع من الحمام اتخطاني وراح فتح الكنتور طلع دشداشه سوده وغتره
حطهن ع السرير نزع ملابسه ولبسهن لف الغتره ع راسه وطلع من الغرفه كُل هذا واني بس صافنه بي صح هو ساكت وما سوه اي شي
بس هذا مو نفسه شُعاع من قبل ساعات جان يضحك ويتشاقى هسه انخطفت الابتسامه من روحه الحلوه
نزل واني نزلت ورى جانوا الشذام وعابد هم لابسين مثله
مابقوا هواي بس غيروا لبسهم ورجعوا طلعوا عرفت من عنقاء الشذام كال الها راح يشيعوا

ورى شويه اجه مصطفى حتى ياخذنه بالكوه يلا قبل لان الدنيا مكَلوبه هناك وماكو مكان بي محط رجل لفينه ع وجهنا ولبسنه وطلعنا وياا
رحنه المكان التشيع اني شفت لو احس روحي رادت تطلع هواي ناس يشيعوا الناس الي مشت ورى الجنازه مالته ماكدر انساهم من كثرتهم
بقى المشهد مطبوع براسي، صوت الزلم وهمَ يشيعوا احسه زرف كلبي
الموقف بحد ذاته فاجعه ومُرعب بصوره مُخيفه
بقينه نباوع من بعيد ونبجي والنسوان ورى يبجن ويتصارخن اهله ، ااااخ يا اهله الله يساعدهم الف مره ويصبرهم
سحبت نفس قوي ورجعنا للبيت مصطفى رجعنه للبيت وراح الهم

دخلت مهدود حيلي هاي احنه مو اهله وهيج صار بحالنه الباقين شلون
بقيت كاعده بمكاني مقهوره اجتي عنقاء يمي كعدت واطفالها يمها
اتمددت وخليت راسي بحضنها ماحسيت ع نفسي من غفيت
فزيت ع صوت ابن عنقاء يبجي وعنقاء جانت نايمه كعدتها الابنها هي كعدت واني احس حلكي ناشف كمت اخذت الجهاز واتصلت ع شُعاع اتصل ويطلع مُغلق رجعت كررّت أكثر من مره وهم يطلع مُغلق
كلبي صار يوجعني وخايفه ع شُعاع رحت ع عنقاء خليتها تتصل الشذام
هو هم جان جهازه مُغلق ، خليت واتصلت ع مصطفى هو فتح الخط
يمه هوسه وأصوات الزلم عاليه سألته شُعاع وينه ؟ هو بس رد عليه
" شُعاع يم الزلم بس تعبان " وغلق الاتصال شكله هوَ هم مايكدر يحجي بس يعرفني اتخبل اذا ماعرف شُعاع وينه ، شمرت الجهاز وكعدت
المهم عرفت هو وينه ع الاقل ما اخاف ها صاير بي شي لو ماعرف مكانه .

مرت ساعات الا ان انفتح الباب ودخل شُعاع وكفت ركضت اله وجهة صاير اصفر وجوه عيونه سواد قاتم ااخ ياشُعاع اااااخ رفع راسه شافني كدامه ماحجه بس كال الي جهزيلي الحمام ومشى جهاز عنقاء دك فتحت خط بس سمعتها كالت اجيت ، سلمت عليه وأخذت الأطفال وراحت لان الشذام ينتظرها برى طلعت وراها سلمت ع الشذام وسديت الباب وراهم
،رجعت ركض جهزت الحمام الشُعاع ورحت اله صحته ، دخل يسبح بدون ما يحجي وياي

بقيت واكفه انتظره سمعت صوته من ورى الباب اتنهد بصوت مخنوك وحجه " ااااخ يابويه " اني من سمعته هيج احس الغصه ترست صدري تركته ونزلت ماتحملت وماريد ابجي كدامه يطلع ويشوفني اكيد ينقهر
ورى شويه طلع من الحمام ونزل سحب السجاده فرشها وصار يصلي بس طووول هواي بالصلاه اخر شي سجد وبقى فتره ساجد حتى خفت عليه
لا يكون صار بي شي قبل لا اتقرب منه هو رفع نفسه من السجاده
كام لفها ورجعهاا المكانها وراح للغرفه الثانيه اني بقيت كاعده ع القنفه شويه وسمعت صوته

- شُعاع :- ناار
- نارا :- صفنت ، ناار ؟؟! كمت ورحت الها وكفت بالباب مال الغرفه ، ها حبيبي ؟؟ اباوع عليه فتح الي اديه اني من شفته هيج رحت ركض ارتميت بحضنه وحضنته بقوه دموعي صارت تنزل بهدوء وهو جان حاضني وساكت رفعت راسي شفته يباوع بالسقف رجعت خليت راسي ع صدره ساكته فجأة طلع من سكوته وحجه بهدوء
- شُعاع :- تهون ماطول الله راده شهيد هاهيَ
- نارا :- سحبت نفس همست اله ، شكت تحملت انتَ ! قوه حضنته الي راد عليه
- شُعاع :- ليش انتِ قليل الي مريتي بي
- نارا :- مرينه بهواي اشياء صعبه
- شُعاع :- اي بس تعديناهن وعشنه وياهن
- نارا :- بس باقيات ويانه شُعاع مانسيناهن
- شُعاع :- الحمدلله ع كل حال

سكتت شويه بعدها سألته ماريد اسأله وافتح جرحه بس اريد اعرف
شلون
- نارا :- احجيلي عنه شلون استشهد ؟؟ سحب نفس قوي وزفره
سكت طول تقريبا ٥د اني اتوقعت ماراح يحجي ولا يرد عليه
اني هم بقيت ساكته واتندمت لان سألته وهو الهسه جرحه ينزف وجديد
حسيت عليه من صعد ايده لامس كتفي وشد حضنه الي ماعرف ليش حسيت بوقتها يريد يستمد القوه مني خليت ايدي ع صدره امسحه بهدوء فجأة صار يحجي واني بقيت استمع اله .

- شُعاع :- تدرين بي متزوج وعنده عائلة دائماً يكول اني ما اخاف من الموت بس خايف ع عائلتي لان اعرفهم راح يتأذون بيه هواي
متزوج وعنده أطفال حلوين
من أبطال الجيش بمره أعتقل على ايد القوات الأمريكية أثناء تنفيذه
لعملية نوعية ضدهم
بقى عندهم بالسجن لسنين تقريباً اهله تأذوا من بعده وبعد خروجه ماطول وإلتحق إشترك بأاغلب عمليات التحرير من إنطلقت ثورة عاشوراء ماكدر ما يشارك ولا أنُ يمنع نفسه من الإشتراك بيها وعاشها بكل جوارحها
شاء القدر بيوم 8/29 الي هوَ اليوم بالضبط جان اكو مُصابين بالثورة و المطالبين بالإصلاح تفاجأوا بعدها بالإعتداء الفاد على المتظاهرين بهذا الوقت جان لؤي ينقذ المصابين بسيارته الشخصية وبهذا الوقت أصيب وأرتقى إلى ربه شهيدا صابراً محتسبا
الملفت بالموضوع شنو ؟؟؟ انُ لؤي عند إصابته الإبتسامة ما فارقت ثغره وكأن يكول ما أجمل الموت شهيداً .

- نارا :- هو يحجي واني ابجي بدون صوت بس استمع اله .

- شُعاع :- واحد من المسعفين اله بقى ويا الحد ما استشهد وحتى اجه ويا للمستشفى تدرين شنو كال ؟
- نارا :- شنو ؟
- شُعاع :- يكَول بعد اصابة
لؤي جنت قريب منه رغم انا ما تربطني بي اي علاقة سابقة به عدا كوننا ثوار الحق ضد الباطل
جانت الاصابة قريبة ع الجهة اليسرى اسفل البطن (قريب المثانة) وبعد إصابته تم حمله ويا مجموعة من الثوار وانا منهم وهو برغم اصابته وحالته الخطره جان يضحك ويكول (ع كيفكم مابيه شي)
وصلنا الى سيارة اسعاف تابعة الى الجيش العراقي وبعد ان صعدنا الشهيد طلب منا سائق الاسعاف الجندي انُ يرافق المصاب
شخص واحد وهو ما يسمح به المكان
فأختارني الله انُ ارافق الشهيد وبعد معاناة
الوصول الى المستشفى بذل الاخوة الكادر الصحي كل الجهود لإنقاذه لكن النزيف جان حاد واخذ من الشهيد مأخذه بوقتها الشهيد لزم ايدي كال الي اوصيك انُ لا تتركني بعد موتي إلى ان يوصلون اهلي واذا ما وصلوا قبل وفاتي ارجو منك انُ توصل سلامي لأولادي واهلي وارجو منهم بدأت الذمة واصى ببعض الامور الخاصة العائلية ، حالته صارت خطره فجأة ردد الشهاده وكأن يعرف هوَ ما راح يكدر ينتظر أكثر وتوفى ،
جان الموقف يفوق قدرتي فأنهاركياني وانفجرت باكيا وانا اردد اللہ اکبر اللہ اکبر
هذا جان كلام واحد من الي اسعفوا الي ويا وجان يحجي وهوَ منهار .

- نارا :- شهكت ابجي وهو يحجي متحسر طبطب ع كتفي بهدوء وسحب نفس
- شُعاع :- هذا مكتوب اله يكون شهيد والكل يتمنى الشهاده وهوَ واحد منهم
- نارا :- وعائلته ؟ شلون شُعاع مدا اتخيل
- شُعاع :- بالعكس ابنهم شهيد لازم يفتخرون بهذا الشي هم السابقون ونحن اللاحقون
- نارا :- سكتت ماريد اأذي أكثر بكلامي هو رجع صفن ومر هدوء قاتل بينه احنه الاثنين جسده موجود بس روحه مو يمي

بكيتُ وهل بكاءُ القلبِ يجدي؟
‏فِراق أحبّتي وحنينُ وجدي
‏فما معنى الحياةَ إذا افترقنا؟
‏وهل يُجدي النحيب فلستُ أدري
‏فلا التّذكار يرحمني فأنسى
‏ولا الأشواقُ تتركني لنومي
‏فراقُ أحبّتي كم هزّ وجدي
‏وحتى لقائهم سأظلُ أبكي .

- نارا :- شُعاع تذكر هذا الي قبل خطفني ؟
- شُعاع :- شنو جابه ع بالج هسه
- نارا :- اي ليش تنرفزت مُجرد سؤال ، زفر نفسه بقوه متعصب
- شُعاع :- شبي ؟
- نارا :- قبلها بيوم انتَ شلون جنت حاس هذا الشي ليكون تعرف بيهم مخططين يخطفوني !!!
- شُعاع :- شلج بهاي السالفه من وين اطلعيها الله اكبر عليج
- نارا :- يااااا
- شُعاع :- وجعااا بكَلب المهلس
- نارا :- منو هذا ؟
- شُعاع :- هيج فد واحد طايح حظ
- نارا :- هااا زين كول شلون عرفت
- شُعاع :- بويه انتِ ادورين ع النغل منو ابو !!
- نارا :- يوووو غير لو يحجي
- شُعاع :- جانوا مراقبيني فشي طبيعي اكون شاك بهذا الشي
- نارا :- هااااا
- شُعاع :- اااي وهسه نامي شلون عليج سوالف بتالي اليل
- نارا :- حضنته وغمضت عيوني وهو اعرفه مانايم واني نمت اما هو شوكت نام او اذا نام او لا ماعرف لان سريع نمت نعسانه .

مرن ايام الفاتحه بصعوبه واني وعنقاء رحنه توجعنا ونقهرنه وتأذينه ع اهله شلون يبجون حيل مقهورين عليه الله يرحمه ويسكنه فسيح جناته ويلهم الصبر ، بعد مرور ايام شُعاع جان يغير لبسه وكفت كدامه

- نارا :- وين راح تروح ؟
- شُعاع :- ابو لؤي كلفني ارتب اله الأمور
- نارا :- يا امور ؟
- شُعاع :- مال لؤي يعني الراتب علمود أطفاله ومنو من بعده وهيج
- نارا :- هاا فهمت
- شُعاع :- طالع انا محتاجه شي ؟
- نارا :- لا حبيبي درب السلامه ، تقرب باسني من راسي وطلع
هل ايام صح هوَ وياي بس روحه طافيه شكد ما يحاول ما يحسسني بشي بس اني احس بي واعرف هذا الشي يأذي ، الحمدلله ع كل حال

طلع واني التهيت انظف بالبيت خلصت وكعدت ماعندي شي واني الوحدي بالبيت بقيت اتصفن أفكاري تروح للبعيد وترجع
نزلت نظري وخليت ايدي ع بطني ليش اني الحد هسه مو حامل ؟
هاي راح اتخرج بعد سنه وزواجي صار اله كم سنه والهسه ماعندي طفل
معقوله ماراح يكون عندي طفل ولا بعُمري راح اكون ام ؟
خايفه لا ما اكدر اجيب الطفل الشُعاع و وقتها يلجأ الغير شي والله وقتها اموت ، شكد اتمنى هذا الطفل يارب لا تحرمني من الذريه الصالحه
طلعت بالشمس وكعدت الشمس اجت بعيوني هناك ورجعت بيه السنين

جنت كاعده العب اني واخواتي وماما راحت هي وبابا للأمام الكاظم
واصواتنه عاليه ساده الباب وكاعدين الوحدنا ورى كم ساعه الباب اندك
بما انُ اني الجبيره كمت ركض فتحت الباب دخلوا ماما وبابا هي معبسه وهو يضحك عليها اني من شفتهم الابتسامه انرسمت ع وجهي
دخلوا وياهم علاليك صاحتنه ماما ، تعالن شوفن شنو جبت الجن
اجينه ركض جانت جايبه حامض حلو هذا الوردي وحلاوه احنه ناكل وابويه صافن ع امي
- علي :- ها مدام حيل تعبتيني الطريق كله تنكدين عليه ها البنات وهسه شنو سون
- نارا :- ماما رفعت راسها خزرته بزعل وردت عليه
- ابتسام :- اي غير بناتي واخاف عليهن يعني مو من حقي
- علي :- ضحك ، من حقج ياحيلي
- ابتسام :- ردت بدلال ، عليّ اسكُت عيب منا البنات
- علي :- ههههه ليش العيب ياحلو
- ابتسام :- عيب عيب عليّ البنات يسمعن

رجعت ع الواقع الي عايشه بي واني الابتسامه ماراحت مني بالعكس فرحانه نسمه طيفهم ترسم الي واقع سعيد مسحت الدمعه واني كُلي امل الهذا الوقت انُ ماما عايشه من حقي احس بهذا الشي لان ماشايفه لا جثه الها ولا شي

اشتاقيت الاخواتي وكلت خلي اتصل عليهن صار الي فتره ما سامعه صوتهن من بعد الأحداث الي صارت وياي اتصلت عليهن ولا وحده رفعت الخطو وجاوبتني حسيت روحي منبوذه معقوله مايريدني ليش هيج تغيرن
معقوله الغربه هيج تغير الشخص لو هنَ مايريدني ومكتفيات ببعض !!!
انتبهت ع نفسي اشهك بالبجي بسببهن مسحت دموعي من وجهي بقوه واني اردد ، يكفي الي عندي الحمدلله شُعاع معوضني و واكف وياي

رجع شُعاع كعدنا جان هو يحجي .

- شُعاع :- اكو واحد أتقدم الوفاء
- نارا :- اني ابتسمت ، اي منو هذا ؟
- شُعاع :- من جماعه ابوي بس عمره ٣٠ سنه جبير عليها
- نارا :- صدُك تحجي ؟ هو ضحك
- شُعاع :- قابل اتشاقه
- نارا :- ردت اسأله أكثر بس هو ما انطاني فرصه حتى احجي حضني وحط راسه ونام

اجاني مسج من مصطفى فتحت الرساله لكيت داز الي
- مصطفى :- نارا وين شُعاع
- نارا :- رجعت دزيت اله رساله، نايم ليش
- مصطفى :- نارا اكو واحد اخترق الفيس بوك مال وفاء وبي الصور مالتها وصار يهدد
- نارا :- فزيت مخترعه دزيتله ، شنووو وهسه شصار شنو سويت
- مصطفى :- اني حجيت ويا بس هو واحد **** باعي خاف يصير مايصير احجي الشُعاع بس لا تخلي يعصب
- نارا :- ماشي ماشي ، سديت الجهاز وبقيت حايره

يلا خلي اكعده واكول اله بس اخاف اني انهف بمكان مصطفى
لا لا اني شكو خلي اكعده والي يصير يصير
سحبت نفس وخليت ايدي ع خده اهمس اله بهدوء لان نايم أنوب يفز

- نارا :- حبيبي شو اكعد ، رد عليه متذمر
- شُعاع :- عوفيني نايم
- نارا :- اكعُد عندي شي وياك اريد احجي
- شُعاع :- ع باجر حبيبي مو هسه مو تشوفيني منطمر
- نارا :- يحجي وهو مغمض عيونه حتى ما كلف نفسه يفتح عين وحده ، ضربته ع كيف ، ششششششششُعاع
- شُعاع :- شتعل المهلس
- نارا :- ههههه اكعُد الوضع خطر
- شُعاع :- شنو هوَ ؟
- نارا :- اكو واحد مخترق الفيس بوك مال وفاء ومهددها بصورها
هوو اني كلت هيج فتح عيونه وطفر طفره من مكانه حسيت كلبي طلع من صدري صاح
- شُعاع :- شششكلتي ؟؟؟
- نارا :- بلعت ريقي هو عاقد حواجبه ، اي والله هسه مصطفى دز رساله ، يمه احس رجليه ماتن صار عصبي نار يغلط ويسب ماخلى واحد ما سبه حتى نفسه هم سبها راح ع جهازه سريع اتصل ع مصطفى ماعرف شنو حجه ويا بس اسمع شُعاع يصيح عليه اخر شي كال اله
- شُعاع :- جايكم جااايكم اذا ما العب بيكم لعب وحق الحُسين

- نارا :- صاح بيه امشي بسرعه البسي اني رحت ركض سحبت العباه والشال لبستهن وطلعت اركض ورى مثل البات مان وعباتي تهف ورايه الي يشوف شكلي يفطس من الضحك حتى ردت اضحك بس بالموت
يلا لزمت نفسي اذا شافني اضحك يحطني بمكان هذاك المكموع ويكتلني صعدت بالسياره وهو ماكو كلمه سخيفه اذا ما كالها خليت ايدي ع حلكي مصدومه شكد ما يكون هادئ بس اذا احد اتقرب من شخص يخصه هنا يطير العقل ويتحول الزومبي
فزيت ع صوته يصيح هيج هيج منكم

- شُعاع :- توصلون العرضي الا اشكم وحق هذا الله .

- نارا :- دخلنا الفرع مال بايتهم وصل للباب وشخط السياره ردت اطلع من الجامه نزل من السياره يركض ركض نزلت ورى اركض
والعباه تهف ورايه فتح الباب ركعه باالحايط يصيح ويييينكم لك مصطفى ووووينك
طلع مصطفى يركض لو ما الموقف جان طكيتها بضحكه اخليهم يصفنون عليه اباوع طلع يركض لابس تك نعال مالته والثاني مال امه اريد الزم نفسي بالموت يلا سيطرت ع ضحكتي ، ووووجع نارا مو وقت ضحك
الموقف جدي ، ااااخ جدي لو عمي يبببببو انلصمي
وكفت ابااوع عليهم الا شويه شُعاع ينطحة بكله .

مصطفى سحب شُعاع دخله جوه مشيت وراهم لكيت وفاء كاعده تبجي وأم شُعاع هم تبجي وكاعده يمها صار شُعاع بالنص صاح بيهم

- شُعاع :- ااااااحجووولي لا العب بيكم لعب
- نارا :- سريع طفرت وفاء تحجي وتبجي
- وفاء :- وحق الحُسين ماا اعرفه، شُعاع والله ما اعرفه الهذا الشخص الي اخترق حسابي
- نارا :- اباوع عليها شلون مفرفحه ركضت لزمت ايد شُعاع تبوس بيها وتبجي شافها هيج تسوي تخيل لزمها من اكتافها وسندها
- شُعاع :- اشش اهدئي احجولي بالحرف الواحد شنو صار
- نارا :- وفاء سكتت ومصطفى هو الي حجه
- مصطفى :- هذا الي مخترق حسابها مسوي محادثات مفبركه
وجاي يكول اختكم عندها علاقه وداز صور المحادثات
- شُعاع :- وصورها شنو وصلهن اله ؟
- مصطفى :- من المحادثه بينها وبين صديقاتها ساحبهن مو مخترق حسابها وساحب شكو صوره بي
- نارا :- شُعاع تخبل طك مصطفى خزره من هاي التمام وسحب الجهاز وطلع

أنوب احنه بقينا بقلق مانعرف شنو الي صاير فرفحنه عليه نتصل وما يرد علينه تأخر واحنه بالنه بقى مشدوه بيه ياصار شي ويا يا لكه الولد
ومصطفى راح طلع يدور عليه بس ما لكه اله اثر راح البيت الشذام
وعرف هو ويا من رجع مصطفى كال رايح ويا الشذام اني بسُرعه سحبت جهازي وطلعت برى حتى اتصل بعنقاء تغرد الي الصار هيج ماكدر انتظر لان مر وقت طويل وهمَ مختفين

- نارا :- لج سمعتي الي صار مو
- عنقاء :- اي اي ولج سمعت عزززه
- نارا :- احجيلي كالوا شُعاع طلع ويا زوجج عرفتي منه شي ؟
- عنقاء :- اي قبل شويه اجوي شُعاع وصل الشذام وراح واني استلمت الشذام وعصرته عصر الا حجه الي يلا تركته هستوني ردت اتصل عليج
- نارا :- عليج الله احجي كلبي وكع برجليه طلع مشتعل نار
- عنقاء :- لعد اسمعي المصيبه
- نارا :- يا ستار احجي
- عنقاء :- جنه نايمين باليل واتصل شُعاع ع الشذام اسمع صوته من الجهاز يصيح عليه كال اله اطلع برى منتظرك الشذام طلع وهو بالفانيله يركض شويه ورجع دخل لبس ملابسه واخذ سلاحه وطلع بقيت لازمه كلبي خايفه وهسه من رجعوا عصرته وكال الي الشذام ..

- الشذام :- طلعت ركض اله لكيته واكف بالباب عصبي نار ، شششكو شبيك ؟؟؟؟ رد عليه يغلط ويسب
- شُعاع :- هذا النغل ابن الـــــ **** المنحط الـــــ****
اليوم اسوي بي **** ابن ***
- الشذام :- سترك ربي غير افهم منووو شسووه شبيك ؟؟؟
- شُعاع :- من جماعه ابوي اسمه ـــــ جاي يندك بعرررضي مخترق جهاز وفاء وساحب الصور ومفبرك الها محادثات ع اساس هي مسويه علاقه ومو بس هيج لكيت الســـــ*** ناشر صورها
- الشذام :- لاااا كوب غيرها انتظرني بس البس واجيك
- شُعاع :- بسرعه
- الشذام :- دخلت بسرعه لبست سحبت سلاحي وطلع ويا

ماعرف شلون عرفه بهاي السرعه بس بعد ذكاء شُعاع يفوق رحنه البيته
نزل من السياره وحط السلاح بخصره اني هم سحبت سلاحي خليته بخصري ونزلت وصل للباب مادكه لا انطه دفره قويه للباب وركعه بقوته بالحايط صار صوت حيل عالي وهي منا دنيا اليل والجوء هدوووء دخلنا جوه لكينه باب المطبخ مفتوح بسرعه رجع تنطى دفره للباب ودخل مثل المداهمه لكينه الرجال كاعد ع القنفه لابس فانيله داخليه وشورت لازم جهازه وكاعده هو من شاف شُعاع اخترع بعده ما ملحك حتى يكون يطفر بريشاته وشُعاع زنكه من فانيلته رفعه رفع وحط بوكس ترس بنص وجهة
خله الدم ينفر من حلكه وخشمه رجع انطه اله بوكس ثاني وكل هذا
ونزل بي دوسه ونص ما خله شي ما حجه اله نومه بالكاع وخلص عليه بالوكسيات شُعاع ايده ثكيله يعني الضربه مالته حيل تأذي
مره ضربني وحسيت الفك مالتي انعوج مو عاد هسه بقوته يضرب

حسيت الرجال فطس جوه ايده رحت رحت سحبته بالموت يلا كدرت ابعده عنه وما اشوف الا مد ايده ع خصره وسحب السلاح ويريد يرمي عليه سريع لزمت ايده اصيح عليه حتى ما يتهور ويكتله بس هو جان نار مايتحاجه بس يريد يضرب بالكوه يلا غير فوحه المسدس ورمى طلقه بصف رجله وهذاك يرجف رجف مو طبيعي شُعاع صاح بيه
الصوووووور وين ، عاد الولد طلع جهازه وانطه الجهاز الشُعاع فتح الجهاز وصار يكَلب بي ماعرف شنو سوه واخر شي شمر الجهاز بالحايط سوه قطع صغيره وراد يتقرب منه ويرجع يضربه هذاك سريع اعترف

- والله والله مو بس اني اكو شخص ثاني مشاركني
- شُعاع :- منوووووو
- اسمه ـــــ والعنوان مالته ـــــ
- شُعاع :- عندك نسخ ثانيه لك ك***
- لا لا والله ماكو
- شُعاع :- خوش اني اعلمك عبالك هيج ونفذت بنفسك لك سربوت
كووووووم كدامي
- الشذام :- كام كدامنه طلع يمشي شُعاع شمره بالسياره وراح للمكان الشخص الثاني

وصلنا للولد الثاني جان مبرمج حاسبات دخلنا للمحل مالته هو شكله ما يعرف شُعاع الهذا وكف عادي عباله يريد منه شُعاع جانت الحاسبه مالته كدامه وما شاف الا شُعاع لازمه ونوم بي بوكس شوه ملامح وجهة
غلط سب وخلص عليه وراح فتح الحاسبه مالته هو شاف صور وفاء ردت اشوف بس شُعاع عاط بيه طلع لاعب بالصور ومفبركهن بصوره غير لائقه
شُعاع ما تحمل هل مره من صدك سحبه سلاحه ورمى طلقه برجله صار يتصارخ وسحب ايده الي جان يشتغل بالصوره بيها وكسرها فرفح الولد
جوه ايده ما اكتفى بس هيج من بعد ما عالجوا اثنينهم شمرهن بالسجن بتهمه ابتزاز وياها عقوبه تكسر الظهر

بعدها رجعنا للبيت وصلني وهو راح .

- نارا :- هي تحجي واني مصدومه دخيلك ربي دخيلك
- عنقاء :- واجاكم هسه بالطريق يمكن يسويكم طشار
- نارا :- اكلج اني مو اختج تعالي اخذيني
- عنقاء :- اختي جيس حب حبيبتي غير يحطني وياج ويكتلني خليني ساتره ع نفسي
- نارا :- شوف شوف شكد حقيره
- عنقاء :- كل واحد يكول ياروحي امشي لج
- نارا :- ولي لج ، غلقت الجهاز منها واني اطكطك هو هذا شُعاع اصلاً ما استغرب اني شفته بعيوني شنو سوه بمهيمن

رجعت دخلت تقريباً ورى نص ساعه دخل شُعاع للصاله احنه جنه كُلنا
كاعدين ننتظره وفاء من شافته وكفت استعداد هو تقرب منها
عبالها راح يضربها سحبها وحضنها هي لزمته بقوه وصارت تشهك وتبجي هو يسكت بيها اني واكفه بعيد ابجي ع المنظر كدامي

- شُعاع :- اعتذر بابا اعتذر
- وفاء :- والله اني معليه والله
- شُعاع :- هسه سويتلج شي ليش هيج تبجين
- وفاء :- لا تأخذ عني نظره مو حلوه حباب
- شُعاع :- انتِ ضحيه حالج حال اي بنت تأذن بالابتزاز بسبب اشباه الرجال هوَ واحد سافل وتافه بابا اني الي اعتذر الج ع الشي الصار بيج

- نارا :- شكد حبيت حنيته عليها احسه مو بس اخ الها لا ابوها
للحظه اتمنيت اني بمكانها وعندي هيج أخ يحميني ويخاف عليه
كـــ اخت اجاني صوت مصطفى
- مصطفى :- هسه هيَ فهمناها تبجي بسبب منو زين انتِ شكو تبجين لو ع الواهس ؟؟
- نارا :- ضحكت ع كلامه ، لا بس اتمنيت اني بمكانها وعندي هيج أخ مثل شُعاع ، شو هذا هز ايده وعقج وجهة

- مصطفى :- تحجين صدك انتِ ؟؟؟؟ مو شفتي شنو سوه الج
زين شوارب علمود وكسر أدين ورجلين وعطل ناس يابو ناس
هسه يحلمون يصير عندهم خلفه بعد وكف عشاير الج كل هذا وتكولين اتمنى اصير بمكانها لج هذا رجلج انتِ أقرب من اخته اله ٢٤ ساعه ويا
والله شلون نسوان عقلهن بكد الحمصايه

- نارا :- بقيت اكركر عليه وهو يحجي هز ايده عافني وراح يمهم يحجي وياهم
- شُعاع :- انتبهي بعد منا ورايح هاي البرامج خطره اي شي تشوفي وتستغربي حاجيني لا تحاجين هذا السطل
- مصطفى :- افااا عليك خويه اني سطل ؟
- شُعاع :- وتروح فدوه للسطل
- مصطفى :- مشكور رحم الله والديك
- شُعاع :- وغصب عليك ورجليك فوك راسك
- مصطفى :- كل شي منك عسل
- شُعاع :- ااانطم
- مصطفى :- انطميت .

سحبت نفس وانقلبت ع الجهة الثانيه شُعاع جان نايم
احس بشعور غريب يراودني ماعرف ليش انقبض كلبي سريع خليت ايدي ع صدري وصرت اقرا الانشراح حتى ما احس بهذا الشي وارتاح

رجعت رفعت راسي اباوع ع ملامح وجهة ابتسمت شكد حلو بعيوني
يمكن اشوفه هوَ احلى رجال بالدنيا كُلها هو ونايم كزكزت عليه اريد
اعضه عقلي يكول عضي هو نايم وكلبي يكول لا خطيه عوفي
واني ماعرف شبيه كُلش صار بخاطري اعضه تقربت منه شويه شويه
صرت قريبه منه قربت راسي يم رقبته الا هذا المكان عجبني اعضه بي
هستوني ردت اعضه وما اشوف الا هو صار فوكايه فزيت و صرخت
من الصدمه رفعت ايدي وضربته كف ع وجهة هو فتح عيونه مصدوم
بوجهي واني بقيت مصدومه بوجهة ايدي بقت ع حركتها بس صوت الضربه حيل عالي بحيث طبعت ايدي ع خده طبعه من هاي التمام
ماكدرت اتحمل واني اشوف ملامح وجهة شلون مصدوم وطكيتها
بضحكه صرت اكح بسببها

- شُعاع :- وحق الله فاااااااااهيه
- نارا :- انفجرت بالضحك وهو يصيح
- شُعاع :- تضررربيني لج
- نارا :- رديت عليه واني مختنكه من الضحك ، لك و الله من الصدمه
- شُعاع :- لك .؟؟؟؟؟ تكولين الي لك ؟؟؟
- نارا :- لزمني من اذني وشدها بقوه صرخت اضحك ، ااااااااخ اااذني شُعاع ااااذني
- شُعاع :- ع منو تكولين لك
- نارا :- خطأ مطبعي هههههههه والله بس عوفني ااااه اذني
- شُعاع :- ع منو ؟
- نارا :- عليه ههههههه اووي عليه بس عوف اذني

هو ترك اذني وجعصني طبك عليه بحيث حتى النفس بعد ما اتنفس
انكتم ع صدري صحت بي
- نارا :- عززززززه شُعاع ااابني فطس ببطني
هو اني كلت هيج ماحسيت بي الا صفن بوجهي رد عليه مبهوت
- شُعاع :- حامل ؟
- نارا :- هههههههه يعني مستقبلاً
- شُعاع :- طاح حظج وكعتي كلبي بالـــــ***
- نارا :- هههههههههههههههههههههههه
- شُعاع :- من وين متعلمه هاي الضحكه مال ***
- نارا :- منك حبيبي ، رجع لزمني من اذني بقوه وصاح بيه
- شُعاع :- شجااااي تجفصيييين الخاطر محمد
- نارا :- اووووبس جفصت
- شُعاع :- وصخمتي الدنيا لو ما اعرف بيج السانج مزروف جان علكتج بالبنكه
- نارا :- ماتسويها
- شُعاع :- ليش يالفطنه
- تموت عليه كُلشش تحبني مووووت تحووبنوووي
- شُعاع :- عدلي حلكج لا اعدله الج
- نارا :- وخر مني جعصتني مو شكول اتموع عليك

- نارا :- الله عليك طلب
- شُعاع :- كولي
- نارا :- خليني اعضك من رقبتك حباااب
- شُعاع :- مخبله انتِ
- نارا :- فدووووه لا تكسر بخاطري فدوه
- شُعاع :- أمري ال الله
- نارا :- هو كال هيج واني طفرت فوكه خليت ايدي ع حلكه وهو وخر ايده يصيح
- شُعاع :- شكو حاطه ايدج ع حلكي
- نارا :- مو حبيبي حتى ما تصرخ ويطلع صوتك عيب شنو يكولون علينا
- شُعاع :- تسكتين لا اهفج اسويج صوره بالحايط شنو شايفتني انا مثلج
- نارا :- عود ردت اسويلك خدمه واقدم لك معروف بس صوجك يلا مستعد ؟
- شُعاع :- خلصيني
- نارا :- تتحملني حبيبي
- شُعاع :- هو اني متحمل خبالج بقت ع هاي عمي عضي وخلصيني
- نارا :- ضحكت وتقربت منه ماقبل الزم حلكه واسده تقربت من رقبته
وعضيته من كُل كلبي وجلبت بي هو لزمني من شعري يردني اعوفه
بس ما عفته الا شفت صار أثر وخرت اضحك وهو طفر للمرايا يشوف
صارت ترس بنص رقبته هو شافها لو تخبل حصلت الي كفخه منه
بس المهم ارتاح كلبي .

قبل لا يطلع لعب بيه طوبه لان ماكدر يخفي الأثر الي صار
عاد رحت جبت اله لاصق مال جروح وخليته عليه وهو شافه شكلها وما اقتنع كال هسه عابد والشذام يسوني مزق راد يكتلني بالكوه يلا اقتنع بيها وطلع هو متحلف الي كال ارجع وحسابج بعدين سديت الباب ورى واني اضحك .

ورى ما طلع بساعه تقريبا اندك الباب اني رفعت راسي اباوع بالكاميرا جانت بنت و وياها طفل خليت الشال ع راسي ورحت فتحت الباب
اشو هاي دفعت الباب ودخلت هي والطفل وتباوع ع البيت واطك بعلجها
استغربت سألته منو انتِ ماحسيت الا دفعت الطفل أتجاهي وصاحت بوجهي وهي تعلج

- هااااج اخذي هذا ابن رجلج .

‏أمَا يكفيك يا قلبي صمودًا ؟
إلامَ تظل جبارًا عنيدًا ؟
خُلقتَ لكي تلينَ فكيف تقسو
ولم تُخْلق حجارًا أو حديدًا
ولو أنّ الجبال مكان قلبي
لكادت أن تميل وأن تميدا
ألا ليت القلوب تباع حتى
أبيع وأشتري قلبًا جديدً
يتبع ✨️

شنووووو توقعاتكممممممم اتحفونا .

.