الربتج " حالك الاسوداد " الفصل الرابع وأربعون 44 - بقلم رهف علي

اضمَك ويَن,مَن يَا عِين؟
هوَ المَثلك شينضَم
يَلـ جَنك بخور هنوَد
مَن سَابع سلف يَنشم .

" كسر العظام ولا كسر الخواطر " دائماً الخاطر شيء مُهم دائماً يكون هوَ بالمقام الأول بالاحساس الأي بشر كائن من يكون ، الانسان عنده أستعداد تنكسر عظامه ، عظمه عظمه كُل وحده ع حدا ولا أن ينكسر
شيء اسمه " خاطر " ‏لا توجد زينة في العالم بامكانها إخفاء هذا الشعور تحس كأن تمسك جمره في يدك لاتقدر تتركها ولا تقدر تمسكها
شيء ثمين وفي نفس الوقت مُهلك بأمكان تحمل السقوط المُرتفع
ع أن يكون الكِسران من شخص كُنت تثق فيه انهُ سند لك عندما لايكون هُنالك سند شيء عظيم وفي نفس الوقت سيء جداً سيء ، لكن اعلم
عندما يخذلك من كُنت مُشتد به تأكد أن هُنالك باب لا يُغلق في وجهك مهما عشت وتذكر السجادة التي نفترشُها للقاء الله
وطنٌ لا يخذُل ساكنيه !.

- نارا :- مصطفى شبيييك وين انروح خبلتني شنو صاير
- مصطفى :- يابه شُعاعنا لعيونج وكف عشاير وهسه صايره دك ملاطم
- نارا :- رجف جسمي من كلامه ، الله عليك مصطفى شنو يعني
- مصطفى :- اهوووو هاي بعدج تسألين لج امشي شُعاع كال روح جيبها وتعال لا تتأخر
- نارا :- هااا وين يعني
- مصطفى :- هو الثول ليش يصيب البشر باللحظه الحاسمه ؟ معقوله الغباء مايجي الا بهذا الوقت
- نارا :- باوع حالتي ما تسمح اتعارك وياك لان اني مصدومه وما مستوعبه كلامك واحس نفسي ما جاي افهم اي شي
- مصطفى :- لج شنو تريدين افهم الي جاي اكوله هسه العشايره منتظره وصولج يامدام شُعاع حتى تاخذين حقج من كل واحد تعدى عليه
وأذاج ورجلج الكفو راح ياخذ حقج مربع من عيون الكل وكدام الكل وهسه متجمعين وصايره هوسه والدنيا كلها موجوده والزلم تسد عين الشمس
- نارا :- كلبي صار يدك بقوه ، يعني اروح وياك
- مصطفى :- اااااييييي يلا استعجلي
- نارا :- تمام هسه جااايه ما اتأخر
- مصطفى :- انتظري
- نارا :- شنو ؟
- مصطفى :- شُعاع ابو الغيره القاتله كال خليها تلبس وماريد يبين منها شعره وحده وكال اذا شفت شعره وحده طالعه العب بيها طوبه
- نارا :- تمام تمام فهمت
- مصطفى :- عفيه وهسه طيري البسي وتعالي
- نارا :- اااي ما اتأخر .

ركضت صعدت فوك بس شنو احس كلبي صار يدك بسُرعه يريد يطلع من حلكي مو من صدري كثر ما يدك بقوه كُل ما اتذكر كلام مصطفى احس عاصفه تعصف بطني وتاخذني العالم ثاني ، وصلت الغرفتي ردت اوكع ع وجهي لزمت الباب بسُرعه ياربي شنو هاي الخفة الي عندي لا خفة شنو ترى حقي الي ديصير مو قليله وهسه عشاير جاي تنتظرني يعني هسه اني جاي ينتظروني شيوخ كبار وينتظرون كلمه مني ااااخ يابه والله يانارا وصارت كلمتج ينتظروها وراح تحدد مصير رجولتهم كدام الناس

شهكت اسحب الهوى لبست الشال وتأكدت ماكو ولا شعره طالعه من راسي اخذت العباه والحذاء ونزلت جوه اركض صار مصطفى بوجهي

- مصطفى :- يلا مدام شُعاع استعجلي
- نارا :- اااي هاي اجيت
- مصطفى :- دخيل الله البسي العباه تريدين شُعاع يحطني ويكتلني ورايه مستقبل خاف يروح يسوي بيه مثل ما سوه بعمج وابن عمج بعد حتى ما يفيد بيه لا علاج ولا دوه
- نارا :- فهمت الي يقصده مارديت عليه حيل خجلت وهذا منطلق
- مصطفى :- لج البسي ياربي شو صاير الثول ابلاش حتى هيج ما تستوعبين
- نارا :- اوووو مصطفى شبيك وياي
- مصطفى :- هسه اني لو انتِ شوفي نفسج
- نارا :- وهاي لبست العباه بعد ؟
- مصطفى :- يلا امشي سكتنا

- نارا :- مشيت جان يصيح
- مصطفى :- اوووكفي
- نارا :- هااا شكو بعد ؟؟؟؟
- مصطفى :- متأكده انتِ عقلج براسج ؟
- نارا :- هزيت راسي مستغربه ، اي ليش
- مصطفى :- اذا عقلج براسج ليش لعد لازمه الحذاء بأيدج وجاي تمشين حافيه ؟؟؟؟؟
- نارا :- باوعت ع ايدي عود صدُك الحذاء بأيدي واني حافيه ، عزززززه نسيت من وراك ، هو ضرب جبينه صاح
- مصطفى :- ربي شمسوي بحياتي حتى ابتلي بهيج ناس
- نارا :- البس بالحذاء واحجي ويا متذمره ، اس عيني وشبيهم هذول الناس
- مصطفى :- أغبياء
- نارا :- بسييييطه مصطفى الا اكول الشُعاع عليك يجلدك
- مصطفى :- اغنياء كلت اغنياء بس انتِ سمعج فاكس
- نارا :- خوش سمعي فاكس بسسيطه
- مصطفى :- بسيطه لو مدام نفيخه
- نارا :- ما تضحك عود تحشش
- مصطفى :- خلصيني هسه وامشي ترى راح نتأخر هسه يحطني ويكتلني وهذا عابد مايصدك يركصلي بجفيه ويحطني ويكتلني ويا
- نارا :- قهرتني يلا امشي ، مشيت وهو ورايه ولأن لابسه العباه والهوى عالي دخل الهوى بيها وصارت مثل الطايره وهو ورايه صاح

- مصطفى :- باااات مااااااان بااات مااااان
الحارس الذي لا يهادن الشر
من كهفه انطلق مثل بارق مر
عبر الطريق نحو الحقيقة فلا مكان للسر
لبطلنا روح امينة تكتشف اليقينا
ضوء لمع وسط المدينة رسم ندائاً لمنادينا
حينا يبدو ويختفي حينا تلك اشارة بات مان

- نارا :- هو كال هيج لو اني بقيت اكركر من الضحك اريد اسكت ماكدر جان يغنيها مثل الاغنيه بالضبط هز ايده وراح صعد بالسياره واني ع وكفتي اكركر بالضحك هو وبالسياره صاح عليه
- مصطفى :- امشششي يمعوده راح ننعلس من وراج
- نارا :- ركضت صعدت بالسياره بعد ما قفلنا الباب وهو شغل السياره وانطلق .

الشعور الي احس بي بهذا الوقت ماكدر اوصفه ماعرف بالضبط شنو الي راح يصير ولا منو موجود ولا شنو بالضبط الي يريدوا مني بس الاحساس ماينوصف اتمنى اكدر اوصفه بطريقه أدق حتى أبين مدى تأثير العميق الي ملامس قلبي الهاي الدرجه العظيمه احس بشعور هاي الايه
﴿قَدْ جَعَلَهَا رَبِّي حقًا﴾ احس نفسي فعلاً ودي اكولها بصوت عالي
احس الله جبر بخاطري بإنسان غير عن الكُل عوضني بأكثر من مُجرد عوض يكفي الي ديسوي علمودي ويكفي البرهان الي يبرهنه الي ويبين شكد اني مُهمه اله والكَلبه الحنين الماكو مثل حنيته لو الف الدنيا كُلها
من بعد أهلي ماكو احد احن عليه غير شُعاع .

- الشذام :- شُعاع شنو ناوي تسوي انتَ
- شُعاع :- كل الخير يُبا
- الشذام :- اي غير افهم
- شُعاع :- سويت الي كلت لك عليه ؟
- الشذام :- تقصد جمع كل شي يخص عائله ابو مُهيمن
- شُعاع :- مو بس همَ اني ردت عمامها وخوالها
- الشذام :- اطمئن كل شي جاهز ومرتب والملفات كلها موجوده
- شُعاع :- ومُهيمن ؟؟
- الشذام :- بالوقت الي تريده يصير كدامك
- شُعاع :- اني نبهتك حتى لو ميت اتجيبه كدامي بنفس الوقت الي اطلبه بي
- الشذام :- اي اي مثل ما كلت والله اسحله لك حتى لو بالانعاش
- شُعاع :- جيد جداً
- الشذام :- والعشاير شيوخها الي حجيت عنهم ؟
- شُعاع :- وبخصوص العشاير اني رحت الهم كلهم وبذات نفسي و تعنيت لكل عشيره ومحافظتها وجمعتهم راح يتواجدون كلهم بنفس المكان والديوان جاهز
- الشذام :- الموضوع جدي صار
- شُعاع :- اكثر من ما متخيل

- الشذام :- تعرف الي جاي تسوي شنو عواقبه
- شُعاع :- اريد زلمه يطلع راسه الا ادحسه جوه حذائي
- الشذام :- خويه يأذوك بيها
- شُعاع :- ماكو واحد يكدر يتقرب منها واني اشم الهوى
- الشذام :- ما خايف ع نفسك هيج راح تكسب أعداء اكثر
- شُعاع :- عدوي وصديقي من زمان معتبرهم واحد الا اخوتي وانتوا اعرف بيهم منو همَ بالضبط
- الشذام :- اعرف خويه اعرف
- شُعاع :- هاهي بعد شكو !
- الشذام :- اني وياك بكل شي وبكل خطوه تخطيها
- شُعاع :- اعرفك كفو منك

- الشذام :- طلعت من بعد ما التقيت بي برى البيت وهاي صار فوك الاسبوع وهو يتنقل من مكان المكان يطلع من فجر الله يروح ماعرف وين يغط ويرجع من يرجع اسأله وين جنت يكول بفلان محافظه ومن اسأله ليش رايح يكول شغل اسكت وما احجي وهو مكلفني بجمع المعلومات عن عمام وخوال نارا حتى اي معلومه دقيقه ممكن يستغلها الصالحه
اسبوع يجر اسبوع إلى أن صارن اسبوعين ، مُهيمن بعده بالمستشفى لان كلش متأذي وخاصه شُعاع مايتركه بحاله وصدك سواها كال كلمه
( كل ما يطيب ارجع اشوه وجهة ) وفعلا من يشوفه مستعيد شويه من نشاطه يرجع ينومه بالفراش اول مره اشوف انسان مُهلك الهاي الدرجه مثل شُعاع مخبل إلى أبعد درجه، مخبل رسمي والي يندك ويا ياويله ، وااااااخ ياويل الي يندك بشخص يحبه الا يشوفه نجوم اليل بعز الظهر

طلعت ما تركت مكان الا ما جمعت بي ولكيت مصايب عليهم مو بس تفشل لا تنزل روسهم اكيد شُعاع راح يركص بجفيه عليهن وهو شلون يحبهم ويدور الهم الخير إذا مُهيمن ماتركه صاحي وهو بين ادينا ماكول غير الله يجيب العواقب سليمه بعد هاي الايام ، خلصن الأسبوعين
واجه ثالث اسبوع وشُعاع انطى وقت محدد وجهز كل شي بس ما انطى خبر العشيره نارا يعني عمامها وخوالها بس انطى خبر الشيخ العشيره مالتهم حتى يجهز نفسه ويكون موجود بهاي السالفه

مصطفى يركض من جهة وعابد يركض من جهة خطيه فحطانين طول هاي الثلاث اسابيع بين شغلهم وبين الشغل الي شمره شُعاع براسهم
مو بس هيج غصب عنهم يسووا واذا ما نفذوا يلعب العوده ع ظهرهم
انتبهت جهازي يتصل رفعت الخط .

- الشذام :- ها عابد ؟
- عابد :- بعد لا اعرفك ولا تعرفني
- الشذام :- خير ياطير شبيك تصيح وليش ماتعرفني شنو هذا الحجي
- عابد :- لك ابو الأخلاق انتَ وهذاك الثاني العطابه بعد فلا اعرفكم
- الشذام :- هسه غير يحجي ويخلصني
- عابد :- وكعتوا رجليه ادري شنو شايفيني سوبر مان لو بباي ؟؟ تعبت تعبتتتتتتت اصيح اكثر لو شنو السالفه يعني حرام عليكم اريد اناااااااام نعسااان يوميه ساحليني من الفجر هم كولوا هذا رجال عنده التزامات ضروريه حياته تعتمد عليها وينجلط اذا ما .... وانتَ تعرف الي اقصده
- الشذام :- عابد راح انطيك شُعاع تحجي ويا تريده وهو يفهمك
- عابد :- لاااااااااااا بروح المهلس لااااااا
- الشذام :- اي طبعاً ماتريد تحجي ويا حتى ما يسويك مهلس مثله
- عابد :- شنو جايز من نفسي اني يابه حتى اتهلس
- الشذام :- لعد كمل شغلك وعوفني اكمل شغلي
- عابد :- طاحظك ابو الأخلاق
- الشذام :- احسن منك يالمسربت

غلقت الخط منه واني اضحك عليه شكد يتذمر واذا انطيته الشُعاع يخنس يصير مثل الفاره لان يعرف شُعاع شنو مايتعامل ويا بلطف وهو عاد شلونه يحب يكتل وما ينكتل ابو درب خلص اليوم وجهزنا كل شي وبقينا ننتظر
اليوم الي يتم بي كل شي

واجه اليوم الموعود .

- الشذام :- كعدت من الصبح اتصل عليه شُعاع بس سبحت وغيرت ملابسي وطلعت بوجهي اله من وصلت اله بالمكان المحدد نزلت من السياره اباوع عليه عاقد حواجبه والدنيا كلها مكلوبه من الشباب كلها موجوده لان حراسه راح يجون هواي ناس وضروري موجودين شباب مسلحه ومحزمه حذر لكل شي ممكن يصير
مشى الوقت وبلشوا الزلم المعكله تجي والشيوخ الي وصى شُعاع بجيتهم وهو يرحب بيهم بالديوان كعدوا كلهم سوه اباوع بس عمام وخوال نارا ماكو بس شنت الديوان شكد جبير وكلها انترس بالزلم الكبار اما الشباب كلها بقت برى همَ واسلحتهم بس كم أشخاص بقوه بنص الديوان منهم ، رحت الشُعاع اسأله

- الشذام :- خويه
- شُعاع :- ها خويه
- الشذام :- شنو شو ما وصلوا جماعتنا ، هو باوع عليه بهدوء وابتسم بطرف شفته
- شُعاع :- اتصلت عليهم هسه
- الشذام :- ومتأكد راح يجون
- شُعاع :- وهمَ الممنونين
- الشذام :- زين انتَ انطيتهم خبر قبل ؟
- شُعاع :- خليتهم كدام الأمر الواقع حتى ما يلعبون بذيلهم وينهزمون
- الشذام :- عليك الله
- شُعاع :- اغشك اني زحمه
- الشذام :- بقيت ساكت وهو رجع يحجي ويا الشيخ الي يمه

شويه وصار الصوت عالي رفعت راسي انتبهت دخلوا عمامها الشفيه
وخوالها بس وجهم جان شاحب ومبين عليه القلق والتوتر رجعت نظري ع شُعاع جان كاعد بكل هدوء وبرود وعيونه مشكله عليهم و ع وجهة ابتسامه انتصار كأنها ابتسامه خبيثه ضحكت بداخلي والله ياشُعاع مو هين انتَ ولا سهل دخلوا من بعد السلام والحجي وهنا بدأ وقت الحد وصار الصياح ما اله والي .

- نارا :- مصطفى المكان وين ليش هلكد طول ؟؟
- مصطفى :- اي لان المكان بـــــ××××
- نارا :- هاا ليش ؟
- مصطفى :- شُعاع هو الي راد هناك
- نارا :- زين منو موجود هناك
- مصطفى :- كلهم
- نارا :- يعني نعرفهم لو شنو
- مصطفى :- اكو تعرفيهم واكو لا
- نارا :- شو انتَ جاي تنقط عليه بالاخبار
- مصطفى :- اي غير انتِ جاي تسأليني واني اجاوبج
- نارا :- اي اي فهمت ولا تتحاجه
- مصطفى :- لان تاركها سبرايز الج
- نارا :- الله يستر من هذا السبرايز

هو ضحك واني بقيت ساكته متوتره إلى أن وصلنا بعدنا ما داخلين للمكان
وما اشوف الا سيااارات هووووواي بمعنى الكلمه كُلش هوووواي بقيت فاتحه حلكي هاي شنو شكو معقوله صايره ازمه مال سيارات بالعراق
واني ما اعرف ! اتقرب مصطفى وعيني ما تشوف الا الروس كلها شباب
بس اريد اركز اعرف واحد بيهم بس ماكدرت اعرف ولا واحد بيهم
تقرب مصطفى ركن السياره بمسافة منهم ورفع الجهاز اتصل بشُعاع ماعرف شحجه ويا

- نارا :- هاا ؟

- مصطفى :- شُعاع كال انتظر ولا تخليها تنزل هسه اني جاي

- نارا :- يعني هوَ الي راح يطلع هسه

- مصطفى :- اي

بقيت كاعده بالسياره تقريبا كم دقيقه رفعت راسي ولمحت شُعاع جاي من مسافه اني شفته لو الابتسامه وصلت الاذاني من الفرحه
هو وصل للسياره وفتح الباب صار هو برى واني بداخل السياره باوع عليه
وابتسم جان عاقد حواجبه بس من شافني فك عقده حاجبه

- شُعاع :- ها بابا شبيج
- نارا :- رديت عليه واني مبتسمه بوجهة ، ماعرف انتَ كول ؟ هو قرب راسه وهمس الي بس اني اسمعه
- شُعاع :- اروح فدوه الهاي الابتسامه
- نارا :- باوعت بعيونه والفرحه تارسه كلبي ، حبيبي
- شُعاع :- عيون حبيبج
- نارا :- ليش اجينه هنا ؟
- شُعاع :- هسه تعرفين

بعدني اريد ارد عليه ومصطفى صاح من مكانه وهو ينزل من السياره
- مصطفى :- لك الله يا الفقيررررر السنكل المسنكل
- شُعاع :- انجب لك وانطم
- مصطفى :- هو اني منطم متشوفني نزلت غير سويتو بيه صحراء الانبار الله وكيلك
- شُعاع :- سد بوزك وانزل روح يم عابد جاي ينتظرك
- مصطفى :- هو اني شمطيح حظي غير هذا الفكر الي عام عليه اربعه وعشرين ساعه يبجي بوجهي إلى أن فكرني
- شُعاع :- رووح عاااد
- مصطفى :- رايح رايح أمري ال الله

- نارا :- راح وهو مزعوج اني اضحك عليهم رجع التفت عليه
- شُعاع :- اسمعيني حبيبي هسه راح ندخل واني يمج ما اريد لا خوف ولا توتر ولا تنسين اني موجود بظهرج وحكج اطلع من عيون شكو واحد موجود جوه كاعد لا تخافين لا من نظراتهم ولا من وجودهم ، ابن امه وابو الي يسترجي يتقرب منج وهذا الله امحي هو والي ويا عن بكره ابيهم كل الي اريده منج تصيرين قويه مثل ماعرفتج وتوكفين بوجهم من بعد الي راح يصير وقتها اني الي اخذ حقج من بين عيونهم تكولين لا واخاف مايتغير شي بس ماتكون حبيبي القوي الي عرفته من اول يوم بس بكل الاحوال انتَ انتَ ياحلو ماكو قوي بعيوني غيرك .
- نارا :- هو يحجي واني صافنه بي شكد جان اكو خوف بداخلي بس كلامه واسلوبه الهادئ الحلو وياي خلاني اكون اقوه اكثر ليش اخاف واني بظهري رجال يسوه الدنيا كلها ويأخذ حقي من بين كل الموجودين
المفروض اكون اقوه واسنده، هزيت راسي واني ابتسم بوجهة وعيوني انملت بالدموع بس مو دموع الحزن لا هل مره دموع الفخر

- شُعاع :- ليش هاي الدموع
- نارا :- الفرح ، فخوره اني بيك هواي
- شُعاع :- غمز ، شوي واخليج تفتخرين بيه اكثر يلا شو انزلي
- نارا :- نزلت من السياره وهو رفع ايده يعدل بشالي والعباه الي اني لابستها ابتسم الي وحط ايدي بأيده انتبهت ع الفارق الي بين ادينه احنه الاثنين ايدي ناعمه مقارنه بأيده وضاعت بيها
- شُعاع :- لاترفعين راسج وامشي بسدي هذول كلهم شباب موجودين هنا
- نارا :- تمام
- شُعاع :- ناري
- نارا :- ها
- شُعاع : مستعده ؟
- نارا :- سكتت ثواني غمضت عيوني وسحبت نفس قوي رجعت
فتحت عيوني لكيته يباوع عليه بنظرات حيل حلوه ضحكت بوجهة
وهزيت راسي بأيجابيه ، اي مستعده
- شُعاع :- فدوه الهذا الوجه يلا بابا امشي .

مشيت اني ويا هو لازم ايدي بقوه واني لازمتها بقوه اكبر بس جان حاطني ورى ولا ولازكني بي لزك من وصلنا المكان بي شباب هواي سحب ايده من ايدي ورفعها الكتفي سحبني اله وصرت مثل الي بحضنه حتى اكون قريبه منه حجه ويا الموجودين بس كلمه وحده وهمَ سوو مجال
وابتعدوا عن الطريق وعبرنا وصلت الباب دخلت واكو جوه مساحه حيل جبيره بعدها يجي باب جبير هو هذا باب الديوان حسيت كلبي صار يدك
بقوه يعني هسه معقوله راح أواجه كل هاي الناس واني البنت الوحيده الي هنا موجوده ياربي ساعدني بس لا يغمى عليه من التوتر واخرب كُل شي هو لزم ايدي وسحبني ورى سميت بأسم الله وخليت رجلي اليمنه ودخلت
شُعاع صاح بصوت مسموع وكلها ردت عليه اني بهت وجهي اول ما شفت الناس الكاعده ماجنت متوقعه هلكد أشخاص موجودين
اخذت لمحه سريعه زلم كبار وكلها معكله من التوتر ماركزت بوجه واحد بيهم رجعت نزلت راسي ضاغطه ع ايد شُعاع

- شُعاع :- الله بالخير
- نارا :- كلها ردت عليه رجع استرسل بكلامه وهو يحجي بطلاقه وهدوء بس الكُل ساكت الا هو الي يحجي
- شُعاع :- زلمنا الخيره انتوا تعرفون شنو سبب وجودكم هنا وتعرفون اني السبب شنو رحت وتعنيت الكم اني شخصياً بنفسي واصريت عليكم تجون من محافظتكم وانتوا ما قصرتوا واجيتوا
صح اني ما حجيت السبب الرئيسي الهذا الشي بس اكيد راح تعرفون هسه وكل شي وحده وحده
- نارا :- وأحد من الشيوخ الكاعدين حجه
- احجي بويه احنه نسمعك
- نارا :- بدأ يحجي ويا كل كلمه احس كلبي يريد يطلع من مكانه

- شُعاع :- يا أهل الخير انا جايبكم هنا بسالفه وأريد انتوا تكونون الشهود بيها ويصير كل شي كدام عيونكم انا اخذ الحك وادوس ع الباطل
شيوخ هذا الوكت ما ينحرزون والعيبه الي مجلبه بذيالهم ماتتسولف ، واني قاصد بكلامي شيوخ عشيره ال ×××× الي همَ يصيرون عمام وخوال زوجتي وهذول هم كدامكم مثل ما تشوفوهم
- نارا :- رفعت راسي مصدومه ع المكان الي أشر عليه شُعاع انصدمت من شفتهم موجودين ماجنت متوقعه ولا منتبهة هم هنا احس وجهم. مخطوف رغم همَ يخزرون بس احسهم قلقين
- شُعاع :- انا جان اكدر اخذ حك زوجتي من بين عيونهم وبعيد عن كل هاي الناس الخيره بس انا ردت اوفي بكلمتي الي انطيتها وارد اعتبار
بوقت الي لازم همَ يسترون فضحوا ، جايين يطلبون ثار خطفوا زوجتي
واجو الحد المستشفى الي هي موجوده بيها رادوا ياخذوها بحجه غسل عار ويقتلوها ع اي اساس ؟؟؟ ع اساس هي ماتشرفهم من بعد ما نكروها ونفوا نسبها وتبروا منها !!!!!
- نارا :- صرت ارجف من كلامه وعيوني انملت دموع صدمتي اكبر بكلامه ااي ماعرف عنه أي شي وهسه يلا عرفته

- شُعاع :- انتَ يالتسمه الشيخ مو انا ورى ما دزيت الضابط حتى يدور عليكم وانتوا نكرتوها وراها اني بنفسي اجيتكم اجيييت لو ما اجيت ؟؟؟ اكيد ماراح تحجي المهم اني الي اكمل ، اجيت البابك وجمعت اخوتك
وكعدت كدامكم وحجيت وياكم كلت الكم يابه بنتكم طلعت من حلك الموت واني بيدي نقذتها بيدي وصلتها واني شاهد ع كل شي صار وياها بنت بريئه مابيها كل عيب ولا ذنب ، الي صار وياها كسرها صيروا انتوا سند الها بعد اهلها لان خسرتهم وماعندها احد ثاني واذا بنت وحيده بين كل هاي الناس ياكلوها لان الناس وحوش انتوا شنو سويتوا وقتها ؟؟؟
اتبريتوا منها كدامي مره ثانيه وكلتوا ماعندنا بنت بهذا الاسم ما تشرفنه هيج بنت بين بناتنا ، اني وقتها من كمت و وكفت شنو حجيت وياكم ؟؟؟؟ كمت كلت الكم اذا بيوم اجيتوا وكلتوا نريد بتنا لو بحجه غسل عار لو بغير حجه اخلي رجلي بحلك كل واحد يحجي واطلع مو ابن ابوي اذا ما خليتكم تزينون هذا الشارب الي متفاخرين بي وهو بس كــــ شكل بوجهكم وانتوا كل رجوله ماعندكم ، وقبل لا اطلع بلغتكم بنتكم عندي والي يوصل الها خلي اهله يحفرون اله كبر ويطموا بي لان مايرجع الهم سليم وطلعت !!!! كلت لو ماكلت ؟؟؟ اكيد ماعندكم العين
والجرأة الي تخليكم توكفون هسه ع طولكم وتكولون اي كلامكم صحيح لان انتوا الغلط واصل الراسكم وغاطين بالحرام والسوالف التعبانة
وتخافون لا تنفتح الدفاتر القديمه وتطلعون ايد ورى وايد كدام .

- نارا :- الديوان صار هدوووء الابره اذا وكعت ينسمع صوتها اطرافي ثلجت هذا الحجي شوكت صاير وليش اني ماعندي خبر عنه ياربي

- شُعاع :- كلت وحجيت وهددت ما انكر وولا انا خايف من شي وانا عند كلمتي لكن الي مسوي نفسه رجال ويضم راسه ورى النسوان ويخلف بكلمته وياي لا عاد هنا أنا مو هذاك الي بس انطي كلمه وقتها اخلي الأفعال هي الي تحجي ، جمعتكم يا أهل الخير حتى اخلي الكل شي واله حد واكشف الأوراق
- نارا :- عمي وكف عصبي يرجف صاح
- ابو مُهيمن :- ااااانتَ شنووووو جاي تحجي
- شُعاع :- ها شيخ شبيك ؟ لو كل الشيوخ مثلك جان العشاير راحت بهل زلك وماتبقى آلها لا هيبه ولا اسم
- ابو مُهيمن :- اااااحترررررم نفسسسسسك لك انتَ جاي تحجي ويا الشيخ
- شُعاع :- لا تخليني اضحك واني ما الي نفس اضحك بوجهك نطلع الأوراق لو يصير اليصير ؟؟؟
- ابو مُهيمن :- ماتهززني وكلامه كله ما اله اي صحه جيب شاهد ع كلامك وخلينه نقرر
- شُعاع :- شاهد ؟؟ كول شهود شنو شاهد
- نارا :- اشر شُعاع الولد جان واكف ورى وهذاك طلع شويه ودخلوا
الشذام وعابد واكو غير ناس ماعرفهم وكفوا بصف شُعاع

- نارا :- عج الديوان بالحجي وكلها صارت تحجي وتسأل بشُعاع وهو يرد عليهم بهدوء
- شُعاع :- ها يابه هذول الاثنين عابد والشذام شهود الي صار بالمستشفى، اما الشهود الباقين فهذول شهود عن كل فعل انتَ ضام راسك ورى وانتَ اعرف شنو هذن وشنو يكدرون يكولون وقتها مو بس شاربك يتزين يابه
- نارا :- هنا من صدُك حسيت عمامي كُلهم راح ينجلطون وبين الخوف بيهم
- شُعاع :- وبعد اكو مو بس الشاهد لا هو السبب بوجودكم هنا
- نارا :- كلها سألت منو ! التفت شُعاع الي ورد عليهم وهو عينه عليه
- شُعاع :- زوجتي ، وهي الي راح تحجي الكم واني منطيها مطلق الحريه
- نارا :- فتحت عيوني ع وسعها والانظار كلها توجهت الي رجعت عيني ع شُعاع ماريد يحطني بهذا الموقف هو نزل راسه وهمس الي
بس اني اسمعه

- شُعاع :- واثق بيج احجي وانا بظهرج اشك حلك الي يحجي يلا حبيبي زلمتج بظهرج لا تخافين .

- نارا :- كلامه انطاني طاقه وحافز قوي خاصه اني اشوف عمامي شلون خايفين قويت نفسي رفعت راسي اباوع ع الموجودين جانوا كُلهم عيونهم عليه ينتظروني احجي حمحمت بهدوء وحجيت ،
اني نارا علي من جنت عايشه بغداد قبل سنين ويا عائلتي جانوا ع طول عمامي وخوالي يجون البيتنا يحاولون ويا ابويه حتى اترك الدراسه واتزوج واحد من الولد وطبعاً جانوا مخيريني بين اثنين يا ابن عمي مُهيمن يا ابن خالي سالم وهذا الشي إجبار الي ابويه رفض رفض قاطع واني كذلك
رادني ادرس واحقق حلمي وحلمه واصير دكتوره بس همَ أصروا وهذول همَ كدامي من عجز ابويه أخذنا ورحنه للموصل هم شغل وهم نستقر هناك
بس شاء الله انُ تنقلب الامور بدخول داعـــ/ــش ، حاولنا نطلع بس ماكدرنا وبيوم الي ابويه فقد الأمل بالنجاه صرنا باليوم نتشاهد الف مره لان مانعرف شنو مُمكن راح يصير و ع ايد منو راح ننقتل كُل يوم صرنا نسمع فلان أخذوا بناته ، فلان قتلوا لان دافع عن شرفه ، فلان قتلوا لان ما قبل ينطي بناته ، واكو شخص جان قريب منه قتل بناته وزوجته وبعدها انتحر بس حتى ما ياخذوهن، بيومها ابويه تعب ورجع يصيح
كعد يحجي ويانه يحاول يستندنا واحنه بأسم الحاجه الكلمه أطيب من خاطرنا وتقوينا بيومها دخلوا البيتنا وقتلوا ابويه كدام عيوني وهو يحاول يدافع عن شرفه عن بناته عن عائلته ماكدر يقتلنا مثل هذاك الرجال ماكدر بس دافع عنه اخويه بساعتها مات وبعدها اخذونا اخواني الباقين كن هذاك اليوم الهذا اليوم ماشفتهم وماعرف وينهم ، قتلوا امي ، اخواتي تهجرنا تبهذلنا وعشنا ايام صعبه صفيت الوحدي ماعرف احد اذوني هواي
عذبوني وماكو احد ساعدني بس الله موجود ماتركني تدرون منو الي تركه بطريقي من بعد ما تصوبت وفقدت الأمل بالحياة ؟؟؟

هو نفسه زوجي الي هسه واكف كدامكم سندي وكل حياتي شُعاع
طلعني من الموصل وبوقت الي هذول تخلوا عني هو الي احتواني خاف الله بيه وما خلاني اخاف منه بالعكس صار الي السند الي احتمي بي ويا كُل شي يصير الي الكه شُعاع واكف وراي مايوم تعاجز مني مو مثل هذول الي اسمهم عمامي وخوالي الي نكروني بلمح البصر واني من دمهم ابنهم الي هو ابن عمي صار يتصل ويدز رسائل من رقم الجهازي واني ما اعرف منو خطفني من جامعتي واذاني بالضرب وحتى بكلامه الي يسم البدن مو بس هنا وخلص لا الي اسمهم اهلي ع اساس وحزام ظهري اجوي للمستشفى يسحبون بيه حتى ياخذوني ويقتلوني ليش ؟ بحجه غسل العار واني ما مأذيه بشر حتى مبتعده عنهم كُل الي ردته هو السلام بس مو راضين يتركوني بحالي اني انسانه مرتاحه ويا زوجي وهو شايلني وما مقصر وياي وصار الي السند والأهل قبل الزوج بس همَ شنو سووا ؟ هددوني واصروا يرجعون مره ثانيه بس حتى يأذوني ليش ؟؟؟
اني هسه اريد اسألهم كدامكم كُلكم ليششش ؟ بشنو أذيتكم حتى هيج تسوون بيه حرام عليكم اني يتيمه ناسين كلام الله
( فَأَمَّا الْيَتِيمَ فَلَا تَقْهَرْ) انتوا شنو سويتوا عكس كلام الله بهذلتوني وهنتوني ورميتوا بالمحصنات وحتى شرفي اتهمتوا كُل هذا الي حجيته قطره بحر من الي عشته سواء من المجرمين او منهم همَ كذلك مجرمين حالهم من حال الي غدروا بينه .

جنت احجي وما منتبهة النفسي ابجي وجسمي يرجف كلها ساكته والهدوء قاتل بيهم مقهور عليه من الشيوخ الي كاعده وبيهم الي حاقد ويريد يفترسني الي هم عمامي وخوالي مسح دموعي من وجناتي واني اتنفس بقوه ، رفعت وجهي الشُعاع شفته هز راسه وابتسم الي كأن يقويني ماحسيت الا واحد من الشيوخ وكف وصاح بصوت عالي

- مااانرضاها هذا الشي الي صار باطل واحنه كــ شيوخ مانسمح بهاي العيبه بينه ولا الي صار يصير بأي بنت من بناتنه الشيخ أبو مُهيمن ارتكب اكبر جريمه بحق بنت اخو والأكبر من هاي انُ الكل جان معتبرها متوفيه وهي عايشه طلع ناكرها ونافيها بدون ما احد يعرف وهذا الشي ما نرضى عليه

- نارا :- الديوان ضج بالزلم وكلها صارت تحجي وماكو ولا واحد وكف ويا عمامي بالعكس كلها صارت وياي ناس تحجي وناس تهدي بيهم
وعمامي صار وجهم اصصفرررر رجع حجه واحد من الشيوخ الكبار
- حق البنت يرجع وما نطلع من هذا الديوان الا وهي راضيه

- نارا :- عمي اعترض ورجعت صارت هوسه وشُعاع عاط بي وخرسه
صار مايندل حلكه وين
- شُعاع :- اني هاي كدامكم راح اسألها
- نارا :- التفت الي وأشر كلامه اطمئنان
- شُعاع :- راضيه عنهم ؟؟؟
- نارا :- باوعت عليهم شلون نظراتهم تخزرني ما اهتميت بيهم ورجعت نظري الشُعاع ، هزيت راسي بنفي ورديت ، لاا
- شُعاع :- اذاً هاهي يصير الي المفروض يصير من البدايه
- نارا :- صفنت عليه شنو يقصد !!

- شُعاع :- كتلج ارجع الج حكج مربع وهاي انا كدامج وكدام كل هاي الشيوخ ارجع اكولها ازين الشوارب الخاطرج والخاطر حكج شارب شارب .

- نارا :- الصوت صارت عالي بالديوان من هول الصوت العالي رجف كلبي من بعد جر وعر إلى أن الكباريه سكتوا كأن ما الهم مفر من الي راح يصير اما عمي بقى مُصر الحد اخر لحظه الحد ما شُعاع راح تقرب منه كدام الكُل وماعرف شنو همس اله وهذاك فتح عينه ع وسعها وصار يبلع بريقه بصعوبه كأن شاف ملك الموت كدامه شويه ورجع شُعاع وكف بصفي ، شسويت ؟؟؟
- شُعاع :- كل الخير

- نارا :- اني بقيت ساكته بس اراقب بعيوني شويه وكلها وكفت
انتبهت ع باب الديوان شفت واحد لازم مُهيمن ودخله جان يكزل برجله
و وجهة بعده مشوه ، عمي الصغير دخل ، سجاد وغيرها وغيرها
دخلوا للديوان اني بس فاتحه حلكي مصدومه استطروا وكفوا وعمي ابو مُهيمن وابو سجاد والباقين حتى خوالي ، الشيوخ الباقين الكبار وكفوا
اني احس الأجواء صارت مشحونه إلى درجه مُرعبه احس عمامي ماصار بيدهم اي شي كأن لا حول ولا قوه كان صاروا مسيرين وكلام شُعاع هو الي يمشيهم صح كُرهم وحقدهم هوَ هوَ بس الخوف واضع من عيونهم

- شُعاع :- كلكم تعرفون شنو المطلوب صح ؟؟؟
- نارا :- كلها أيدت كلام شُعاع الا عمامي وخوالي
- شُعاع اذاً لا أحد يجي ويكول لا وما يصير ، انا الي كلت عليه يصير وغصب عن روس هل الناس الي واكفين
- نارا :- شُعاع جان يقصد عشيرتي محد اعترض صاح شُعاع ع عابد

- شُعاع :- عابد
- عابد :- أمر
- شُعاع :- جيب المكينه خلي نزين هل شوارب الي متفاخرين بيها
- نارا :- عابد ما صدك راح ركض جاب المكينه مال حلاقه وحطها بأيد
شُعاع واحد من الشيوخ تقرب يحجي ع كيف ويا شُعاع بس جان الوقار مبين عليه ورجال جبير بالعمر وجهة نوراني

- ابني اعرف ويا كل الي صار من حقك تسوي الي تريد تسوي بس رايد منك شغله
- شُعاع :- كول شيخنا
- الاكباريه والمتسمين شيوخ العشيره لا تتقرب من شاربهم وتهينهم بهاي الطريقه لك مني كلام ويتنفذ بهاي الدقيقه
- شُعاع :- الي هوَ ؟
- العكَال ينزل من راسه وينسحب من حقوقه الي بالشيخه ويكون حاله حال اي شخص من العشيره ما اله كلمه عليها هوَ اساسًا انفضح بين كل هاي الناس ويكفي كل الي صار وهذا العقاب اله كافي ولك حريه التصرف بالباقين شكلت ؟
- نارا :- شُعاع بقى ساكت شويه ورد عليه وهو مبتسم
- شُعاع :- هاهي .

- نارا :- اتخبلوا الباقين بس مابيدهم شي اني ماحركت ساكن بقيت ساكته بس اباوع واشوف الي دمروني شلون دينهانون كدامي والرجولة الي متفاخرين بيها الي عندهم بس اسم شلون دتنهان كدام هاي الشيوخ كلها ، شغل شُعاع المكينه الحلاقه وبدأ بيهم واحد واحد من عمي الصغير لولد عمي واحد واحد لولد خوالي الي اذوني وحلق شاربهم واحد واحد ، واحد ورى واحد وهمَ جوه ايده لا حول ولا قوه مايكدرون يسون اي شي وكدام هاي الناس انهانوا وادمرت سمعتهم وصاروا مضحكه لاصغر نفر بالعشيره لا بقى احد يحترمهم ولا بقى احد يحسب الهم حساب
الي جانوا يتفاخرون بي شُعاع بثواني داس عليه كدام هاي البشريه جوه رجليه واخذ حقي منهم مربع .

- شُعاع :- كد الوعد ؟
- نارا :- كد الوعد رجالي

من بعد الي صار طلعنا واني الفرحه تارسه كلبي اخذ حقي أخذه من بين عيونهم وكدام هاي الناس ماهنت عليه بالعكس ترس كلبي بفرحه لو احجي عنه سنين طويله لاحفادي هم ما امل منها وارجع اعيش هذا الشعور مره ثانيه وكأن هذا الشي صار كدامي من جديد ، تركتهم ورايه مخذولين ، فقدوا كُل شي بعد ما تعهدوا مايتقربون مني مره ثانيه
شُعاع كدامهم لزم ايدي وطلعنا احس روحي صرت مثل الطير الحُر
طليقه ارفرف بأجناحي والدنيا ما سايعتني

كُلها راحت رجعت لبيوتها واحنه وصلنا للبيت اني نزلت قبله ودخلت هو ورايه يقفل السياره نزعت العباه والشال والصار بعده يدور بعقلي
دخلت للصاله افتر شفت شُعاع دخل ماتحملت ركضت بكُل سُرعتي هو جان ملتهي بالجهاز يريد يخلي ع الميز اني شمرت روحي بحضنه
وتعلقت بي طوقت خصره برجليه ورقبته بأديه دفنت راسي برقبته هو خطيه فز من تصرفي بس لزمني اني انتهيت ابجي واشهك هو طوق خصري واحتضني بقوه يمسح ع ظهري ويحجي وياي

- شُعاع :- شبي حبيبي ليس يبجي مو أخذنا حقه
- نارا :- رديت عليه بصوت مخنوك ، ابجي لان فرحانه بيك شُعاعي احبك احبك موت احبك انتَ العوض الي الله عوضني بي انتَ الاهل الي الله دزك الي فرحانه ما ابجي لان زعلانه لاا شُعاع اني فرحانه واحس
الدنيا ما سايعتني
- شُعاع :- لعد بطلي هاي الدموع تحرك بكلبي كل الي اسوي علمودج علمود ما تنزل دموعج وانتِ تبجين كتلج انا اهلج قبل لا أكون زوجج
- نارا :- كلت كلت اشكر الله لان دزك الي واشكر اليله الحالكه الي خلتني التقي بيك بدون اني اضيع ، باسني قوي من رقبتي
- شُعاع :- واني اشكر الله لان دزج الي جوهرتي
- نارا :- بقيت حاضنته وهو مشى بينا للقنفه كعد واني بقيت بحضنه كاعده ما ابتعدت عنه
- شُعاع :- ها ياحلو حلالك الجو يمك
- نارا :- هواي

فجأة بعدني عنه باوع بوجهي وهو عينه بعيني
- شُعاع :- ع سالفه الي صار
- نارا :- شنو ؟
- شُعاع :- شنو يحيلي اذا انتِ نستي انا ما انسى
- نارا :- عقدت حاجبي ، شنو ذكرني ؟
- شُعاع :- غمز ، العقاب ياحلو
- نارا :- فتحت عيني ، من صدُك تحجي
- شُعاع :- والله عاد انا حقوقي أخذها مربع شنو رجعتلج حقج مربع وانا ما الي حق يمج ؟؟ عجيب شلون ناس
- نارا :- بس ...
- شُعاع :- لو تبسبسين منا للباجر اعاقبج يعني اعاقبج حتى ماتعيدين الي صار مره ثانيه والله الا اخليج تصيحين التوبه وانتِ ما ملحكه
- نارا :- لاااا الله يخليك شُعاع هههههههه حباااااب عوووفني والله هسه اصيح والم الناس عليك ، رد بهيام
- شُعاع :- صيحي حبيبي
- نارا :- صدُك بوقتها عاقبني وخلاني اكول التوبه واني ما ملحكه
شُعاع اثبت مو بس للكُل هو قول وفعل لا حتى الي اثبت هذا الشي .

الساعه 6:00 المساء

- نارا :- اليوم عيد ميلاد مصطفى واحنه مجهزين اله عيد ميلاد بدون ما يدري مسوين اله مفاجأة شُعاع حجز اله ع نهر دجله مكان كُلش حلو ، خليت اخر لمسات الي سحبت العطر وخليت منه اباوع ع نفسي بالمريا حيل طالعه حلوه مكياج بسيط والفستان الي لابسته حيل حلوو وفخم
مستور مال حفلات خارجيه وطويل لفيت الشال ورتبته اني وجهي دائري من عدلت الشال صار حيل حلو ماعرف يمكن لان نفسيتي متحسنه صرت اشوف كُل شي حلو حتى حبيت نفسي اكثر نزلت جوه جان شُعاع ينتظرني من انتبه عليه صفر بأنبهار وتقرب مني ع اخر درجه مال الدرج مد ايده حطيت ايدي بأيده ونزلني صح لابسه كعب بس هم ما اوصل اله
تقرب مني وسحبني من خصري محتضني

- شُعاع :- و أتلگاج كل حيّلي حضن حَاجوز ما أهدَج

- نارا :- ابتسمت من كُل كلبي وحسيت بفراشات صارت ببطني
نزل راسه وباسني من شفايفي ع كيف وابتعد اني ضحكت لان صارت حمره ع شفايفه رفع ايدي مسحت شفايفه ع كيف وهو عيونه عليه واني اتهرب من نظراته لان حيل تحرجني
- شُعاع :- شهل الحلاوه حبيبي صاير كيك
- نارا :- من جمالك حبيبي زادني جمال
- شُعاع :- اروح فدوه الهل حلوه

- نارا :- اندك الباب شفنا مصطفى راد شُعاع يطلع اني وكفته حتى ما يخرب المفاجأة عفته وركضت وهو بقى يضحك ، فتحت الباب المصطفى
هو من شافني مغيره ملابس مال الطلعه عقد حاجبه
- مصطفى :- وين رايحه ؟
- نارا :- هيج شُعاع راد نطلع نتعشى برى احنه وأهلك ، حسيته ضاج
- مصطفى :- عود كلت اذا مو اهلي انتوا ع الاقل
- نارا :- سويت نفسي ما أعرف ، شنو ما فهمت ؟ نتر بوجهي
- مصطفى :- هيج هيج اني راجع للبيت وانتوا طلعو
- نارا :- تمام الله وياك ، راح وهو ضايج خطيه هههههه

رجعت حجيت الشُعاع كال الي شيطانه يلا المهم ماتخرب المفاجأة
صعدنا ورحنه البيت اهله لكيناهم كُلهم موجودين وجاهزين الا مصطفى مبوز الوجه صعدوا بالسياره وحتى بيت الشذام وعابد موجودين
الا مصطفى ماقبل يجي ويانه حجيت ويا شُعاع هم يروحون يكملون التجهيزات واني اقنعه واجي ويا هو ما اعترض راحوا واني كعدت اقنعه
بشلعان الكَلب يلا قبل طول الطريق وهو عاقد حواجبه إلى أن وصلنا
جانت الدنيا ليل والأجواء ع نهر دجله تجنن نزلنا اني ومصطفى ومشيت هم جانوا موجودين كلهم من شافونا من بعيد تجهزوا و وكفوا اول ما وصل مصطفى طكوا النشرات وصاروا يغنون اله عيد ميلاد سعيد هو خطيه بقى واكف مصدوم ما مستوعب الي صار بقى يغلط عليهم ويضحك
شلون سوينه بي هيج بس الأجواء جانت من صدُك حلوه
حتى بالقارب صعدنا ودخت من المي وشُعاع لازمني ويضحك لان دخت
خلص اليوم الحلو ورجعنا للبيت فرحانين .

بيوم جانوا يمنه عابد والشذام ومصطفى سوالف وضحك ماعندهم جان شغل ونازلين من الواجب
واني مخلصتها كل شويه جاي مي كهوه ورى ما خلصت سهرتهم طلعوا واخذوا مصطفى وياهم يوصلوا للبيت
سد شُعاع الباب ورجع تأخر الوقت وردنا انام اني كملت وعزلت المطبخ مرت نص ساعة تقريباً وسمعت جهاز
شُعاع يتصل بالصاله هو نزل جان فوك ناسي جهازه جوه
اني طلعت من المطبخ اريد اصعد فوك بس وكفي صوت شُعاع يصيح بصوت مفجوع اني كلبي وكع وجسمي صار يرجف من كلامه وكعت ع الارضيه ابجي

- شُعاع :- منووووووو الي استشهدددد بيهمممم !!!

صوادعُ الدهرِ ما أبقتْ لنا دُررا
فهلْ تَرُدُ مَرَامِي الموتِ إنْ حَضَرا؟
أَنْكَتْ بِنا فاستباح الحزنُ أَعْيُنَنَا
شَيْخٌ يُدَاري وَأُمٌ تَفْلِقُ الْحَجَرَا
قَدْ فاجأتنا سُنُونٌ تمتطي أجلاً
ليتَ السهام تَعُقُ القوسَ والوترا
إذن رحيل ولاإرهاص يقدمه
والموتُ ياصاحبي أضحى لنا خبرا
‏إنَّ المَنَايَا وإنْ طالتْ مَسَافَتُها
يوماً سَتَنْزِعُ عنْ أحلامِنَا العُمُرَا!
يتبع ✨️

التوقعاااااات شنو 💔 ؟!

.