الربتج " حالك الاسوداد " الفصل الرابع 4 - بقلم رهف علي

دخانً يُخرج منًي ᷂كيف أبرهنً أننًي احْتَرِق ོٓ*.!
نعم أنها أحرف الموت الموقده..

نارا : بقيت صافنه بوجهة شنو ماتت !!
احس نفسي عايشه بوهم او حلم واتمنى اصحى منه
صديقتي واختي معقوله تروح هيج بسهوله !
صرخت بصوتي المتشحرج واني ابجي
بجي يكطع الكَلب رايده اطلع هل حسره من
داخلي رايده اصحى من هذا الموقف الي
اني بي ، لااااااااااا لاتكوووولهاااا الله يخليييك
كول بعدهااا عايشششه مامعقوله تموووووت
انتَ دكتووووور شوووف شغلك اكيد
هي عايشششه

_ الله يرحمها

احس تخبلت ليشش هيج بسهوله
ماتت طلقه وحده وقفت حياتهااا
ماوعيت ع الي سويته بس شفته كدامي هو
ماساعدها تخبلت اول مره اشوف هيج شي
لزمته ودفعته وصحت بوجهة ،
شبييييك انتَ دكتوووور شوف شغلك لا تخليها
تمووووت

_ اختي مو بيدنا الاعمار بيد الله وكُلنا ع هذا الطريق

تهسترت من كال هيج ، انتَ غببببببي
لو شنوووو بيهااا جان بيهااا نفسس
من جبناها بسس انتَ الي ماساعدتهااا اني متأكده

_ شلون تغلطين عليه اني دكتووور احترمي
المكان مو بس هي توفت اكو غيرها يعني
مو بس هيَ اهدي اختي

عافني وراح واني كعدت بالكاع
املخ بنفسي من البجي
اضرب ع وجهي اريد اصدك هي ماتت
ياربي ماتت بين اديه وكدام عيوني
شلون راح اتحمل شلوووون
طلعت الجهاز واتصلت ع اختها
بعدها ما حاجيه واني حجيت بس صوتي
بالكوه يبين ، كلت الها جيبي اهلج
وتعالي للمستشفى، حاولت تعرف بس ماجاوبتها
مابيه حيل انطيتها اسم المستشفى وسديت
الاتصال
كعدت بالكاع وظهري ع الحايط حطيت اديه
ع راسي ابجي ، بجيت بجي ما صاير
روحي فرفحت

ماجاي اتخيل هيَ جوه وعليها جرجف
ابيض ماجاي اتخيل هسه النفس مالتها انقطع
وهي جسد بدون روح
صديقتي واقرب شخص الي ضحكنه سوه
وبجينه سوه هيج تروح بهاي البساطه
طلقه تسكت صوتها للأبد هيج بهاي السهوله !!

ورى فتره حسيت بصوت
جاي من بعيد رفعت راسي لكيت أهلها
كُلهم جايين اختها تركض كدامهم اول
ماشافتني اجتي تركض عليه مخطوف وجها
شافتني بالدم انصدمت

_ ششششكو نارا شنو صاااير أسراء وينهااا
ليش هاي حالتج وشنو هذا الدم

اريد احجي بس ماكدر عيوني تباوع عليهم
كُلهم ، شلون اكول الهم بنتكم ماتت بيدي
والله الموقف حيل صعب عليه
امها ابوها اخوتها كُلهم ينتظروني وكُل شوي
واحد يسألني عليها وينها
بجيت بقله حيله ورديت عليهم ..
" ماتت "
المووووقف صعععب من شفت صدمتهم
وامها اغمى عليها اول ما سمعت
الخبر بقوا يبجون بصراخ وصوت
بحيث من يمي حسيت بالخوف
لزمتني اختها وهزتني تسألني

_ ششششلووووون لاتخبليني شلون مااااتت

سحبت نفس اشهك واحجي وياها، جاي نمشي
صار الرمي ركضنا وأنضربت أسراء
من عرفوا بقوا يصرخون ويدكون ع رأسهم
بنتهم صغيره مو هينه يفقدوها بهاي السهوله
اجه الدكتور نفسه ولزموا يسألوا
_ الله يخلييييك كول بعدها عايشششه
بنتنا كووول
_ اعتذر بس بنتكم توفت

دخلوا يشوفوها واسمع صوت البجي
صار عالي مو بيدي اريد اشوفها
مشيت للمكان الي موجودين بي
ودخلت وراهم بس جسمي يرجف رجف مو
طبيعي اول ما دخلت وكعت عيني عليها
مغطيها بجرجف ابيض
ومابيها روح بس جسد
ماتحملت طلعت ركض من الغرفه تركتهم يبجون
وكعدت برى ابجي
جهازي جان بس يتصل ويفصل
فتحته لكيت ماما وبابا مكالمات منهم هواي
لان تأخرت رجعوا اتصلوا
فتحت الخط اجاني صوت ماما تصيح
_ ووووويييين انتِ وووووين
جاوبتها بالمستشفى وانطيتها الاسم كالت اليمنه
كلت الها اي وسديت
الاتصال مابيه حيل حتى اشرح ليش
وشنو السبب

حسيت الموقف اكبر مني وحيل
صعب
صرخت بكل صوتي وبعد ما حسيت بشي
فتحت عيوني ورى فتره بس احس
راسي موتني مم الالم
شفت ماما فوك راسي تبجي
بالكوه حجيت " ماما ماتت أسراء "
ردت عليه وهي تبجي " أي ماما عرفت "
بجيت ودخل بابا اجاني يركض يحضن بيه ويسألني
شبيج حجيت الهم السالفه وبكل مره
اعيدها احس روحي تطلع
رفعت راسي الماما اول ما سمعت كلامي
خزرت ابويه وطلعت من الغرفه وهو طلع وراها
واكفين بالباب بس اسمع صوتهم لان
امي جانت عصبيه وصوتها واضح ..

ابتسام : علييييي شفففففت شنوو صااار
لووو جااايه الطلقه ببنتككك هااا كم مره
كلت لك خليناااا نرجع البغداد وانتَ ميبسس
راااسك
علي : اششش ابتسام مو هنااا لاتسمع بنتج
ابتسام : هذا الهممممك والله لو صار شي
ع واحد من جهالك صدكني ما تشوفني بعد
والله اكتل نفسي الا جهااااالي علي
علي : ابتسام اسسسكتي دخيل الله ما تشوفين
الوضع ونارا حيل تعبانه خلي نشوفها هذا
الدكتور اجه..

نارا : اسمع كلامهم وابجي دخل الدكتور ودخلوا
ورى فهمهم هذا انهيار عصبي
وبسبب الي عشته ولازم الي راحه
وتكدرون اطلعوها
تشكروا منه وطلع
احنه هم مابقينا وخاصه ماما كُل شوي تكول يلا
ن

طلع حيل خايفه هيَ واني ما الي نفس حتى
امشي طلعنا من المستشفى وما تركوني اروح
يم أسراء رجعنا وطول الطريق اني ابجي
ما سكتت وماما تبجي وياي
ابويه يجر حسرات واضح كلام ماما الهسه براسه
وما يروح
اول ما وصلنا للبيت نزلت ركض
دخلت همَ ورايه نزلوا يحاجوني صعدت فوك
بغرفتي وقفلت الباب
كعدت ملخت نفسي بالبجي ماخليت لا شعر كطعته
لا وجه تخرمش ب اظافري
انهاااريت
والتعب احسه ينهش بيه نهش
إلى أن تعبت نمت ع الكاع ودموعي تنزل
احس تخبلت كل شوي ينعاد الموقف
كدامي وشلون ماتت كدامي هاي
اول مره اشوف واحد يموت والكارثه بحضني
وبين اديه
انتهيت من التعب
اسمع الباب يندك

ابتسام : ولججج ماما افتحححي البااااب
راح تخبلييييني حتى ماتجاوبيييني ناااار افتحي الباب ، عليييي تعال شوف بنتك راح تموتني
ما تفتح الباب
علي : شو بعدي ، ناااري بابا افتحي الباب
لاتخلين بالنا يمج فدوه الج افتحي ..
ابتسام : راااح يصير شي ببنتي علي اكسرر
الباب خايفه لا سوت شي
بنفسهاااا

نارا : مافتحت الباب شكد حاولوا حتى صوتي
ما يطلع ماحسيت الا الباب أنكسر
دخلوا اثنينهم للغرفه خايفين

ابتسام : انتِ شبيييييج تريدين تموتيني ناقصه عمر
مووو اندك بالباب ليش ماتفتحححي
علي : ابتسام مووو هيج ما تشوفين حالتها
شلون صايره لا تزيديها عليهاا
ابتسام : شووف لك حل شلون تبقى بهذا
الووووضع
علي بنيتي ناارا

نارا : همست بالكوه صوتي طلع من البجي ، اطلعوا ، غمضت عيوني

ابتسام : شنووو نطلع تخبلتي شوفي حالتج
علي : بنيتي لاتسوين هيج بنفسج هذا
الموت حق وهيَ مكتوب الها تموت
مو بيدنا هذا يومها هيَ اليوم الباجر احنه
مانعرف شوكت نموت ليش هيج ضعيفه
انتِ

نارا : مايحسون بيه وبالنار الي تاكل
بجسمي غمضت عيوني قوي ، اطلعووووا

علي : تعالي ابتسام خلي نتركها شويه
ترتاح هيَ تعبت اليوم هوايه
ابتسام : اطلع اني وراك بس اريد احاجيها واجي
وراك
علي : لاتضغطين عليها
ابتسام : اي علي ما تعرفني
علي : تمام

فتحت عيوني طلع بابا وهو مهموم وضايج
واضح عليه هموم الدنيا فوك راسه
صارت عيني بعين امي كعدت يمي
عدلت كعدتي واديه بحضني ترجف رجف مو طبيعي ..

ابتسام : ماشفتي منو الي رمى عليكم
نارا : نزلت راسي ،لا
ابتسام : شلون وصلتيها للمستشفى
نارا : من صار الرمي واحد اجه شالها وياي
ودخلها لأسواق مالته وبعدين اخذنه
بسيارته للمستشفى
ابتسام : زين من يا جهة صار الرمي ؟
نارا : من ورانه من جهة الجامعه ،
اني جنت مدنكه راسي وابجي واجاوبها بخنكه
ماحسيت الا شهكت بصوت عالي رفعت راسي
لكيته وجهة مقلوب سريع جاوبتني بنتره

ابتسام : بعددددد ماكو دوام ما أداومين

نارا : اني مابيه حيل حتى اناقشها رديت عليها بتعب ، ماما من رخصتج اطعلي من الغرفه

ابتسام : نارا اسمعيني راح اخذجن
ونرجع البغداد

نارا : رفعت عيوني الها شنوو ؟؟
ابتسام : مثل ما سمعتي
نارا : وابويه ؟؟؟؟
ابتسام : هو من يشوفنه مصرين ع قرارنا راح
يرضى لاامر الواقع ويجي ويانه
احنه كاعدين هنا مانعرف منو ويانه ومنو علينا
والوضع صاير يخوف
حتى ماعندي ثقه ولو شوي بالجيران الي بصفنه
ع الاقل نروح هنا البغداد يم عمامج وخوالج
أحسن من هنا الغريب ما ينحرز
نارا : من شوكت هذا الكلام
ابتسام : اليوم الفجر قبل لا اطلعين للدوام
اني جنت مفكره بس بعد الي صار وياج
هسه اني مُصره نرجع لان هنااااا
خطططططر علينننااااا
نارا : مسحت دموعي وترجع تنزل ، ماما هذا
الحجي جان المفروض من زمان تفكرون بي مو هسه
من اول ما صارت هاي الأحداث
وشكينه بشي مو زين راح يصير
جان رجعنا مو هسه بعد ما فات الوقت
ابتسام : بعده ما فات الوقت كولي يا الله
اريدج تعينيني وتكونين وياي حتى
نقنع ابوج اذا يشوفنه هيج مصرين مايحجي
نارا : هزيت راسي ب اي واني مقهوره
رفعت راسي الها كلت الها ، اريد احجي
الج شي
ابتسام : احجي

نارا : شهكت ورديت عليها ، ماما
كرار حبيب أسراء استشهد

اباوع بهت وجها ودكت ع صدرها
واني ابجي صاحت ، شششلون عرفتي

نارا : اليوم ، من اجتني أسراء تبجي تكول
كرار ما يجاوبها ودكينه عليه ما حصلنا
راحت شوي للمغاسل وبقيت انتظرها
اجه صديق كرار عيونه حمر دم
-كال الي لكينه كرار
- ووينه ليشش ما يجاوب مايعرف أسراء شلون
خايفه عليه
- خويه نارا ترى كرار استشهد لاتكولين الإسراء
لان ماتتحمل الخبر هيَ هسه
ومنتهية خويه انتبهي عليها

ابتسام : صخخخاااام الصخمني رااحح
الشبااااب بعمر الورد بيوم واحد دخيلك يااااربي
الله يرحمه ويصبر اهله
الله يجمعهم بالجنه

نارا : اكو شغله ثانيه
ابتسام : شنوووو هيَ
نارا : اكو شخص يفتر بالكُلية قبل 5 ايام
جان شكله غريب وحتى لبسه
غريب من شافني توتر وصار يمشي سريع
ابتسام : منو هذا اسم الله
نارا : ماما طلع هذا داع١١ي ، هو اني كلت هيج
فتحت عيونها ع وسعها مصدومه حقها ،
رجعت كملت ، مو بس هيج من شافني
مشى واني
مشيت ورى ردت اشوفه وين يروح
وصل الباب الكليه وطلع ردت اطلع ورى واسراء
لزمتني لو ما لازمتني جان شفته وين راح ،
بعدني احجي وعاطت بيه

ابتسام : تمشششششين ورى نااااااااااااارر
تممشششين ورى مجررررررررم
نارا : ماما الله يخليج اهدئي
ابتسام : لج شلوووون اسكت وهمَ دخلوا
حتى الجاااااامعه قررريبين
نارا : سحبت نفس ، تدرين اني
سمعت طُلاب بالجامعه يسولوفن يكولون
انُ الدخوليه والخروج مال الموصل لازميها
سيطرات داع١١ يعني محد يكدر
يطلع من الموصل واي شخص يحاول
يطلع يذبحوا
ابتسام : شششششنوو من شوكت !!!!!
نارا : والله ياماما يعني ماكو اي مفر
محد يكدر يطلع من الموصل يعني اذا طلعنا ننذبح
متشوفين كلت الج بعد وقت ع هذا كلامج
لان الوضع صار أخطر من ما نتصور
وترى بابا يدري بس مايحجي الج
يخاف عليج
متشوفين يكول الج مانكدر نطلع لان ماكو
اي مفر ولا حتى منفذ نطلع منه
خارج هاي المحافظه

واصلاً همَ وصلوا النص
المناطق الي بالموصل
متشوفين من سووا هذا كُله يعني يدكولون
النا احنه هنا وصلنا وهاي صارت الأرض
النا
من رموا حتى يخوفون الناس ويخلونهم يتبعوهم
بالطيب بالغصب ، اني احجي
وهي صافنه بوجهي مبهوت وجها ، استرسلت
بكلامي وكملت ،
حسب الي سمعته همَ ما يرحمون احد
خاصه الرافضي
_ شنو يعني ؟؟
_ماما يعني موالي الحُب الامام علي ينتمي للامام علي " عليه السلام " وأهل البيت
واي شخص بدون استثناء اذا ما اتبعهم يذبحوا
الا اذا ترك وصار وياهم
_ دخيلك يااااااعلي شلون بينه هسه ، شنو نسوووي احنه هسسه.

_ ماما والله اذا تتركين الامام علي لا امي ولا اعرفج اليوم الدين ، ماحسيت الا اجتني ضربه ع راسي
وصاحت بيه
_ هييي ادبسسزز شنو اتركه شتحجين
انتِ اكول الج شنسوي مو نتركه
_ لعد شنو قصدج من كلتي شنسوي
_ اقصد نشوف النا حل نطلع منا ب اي طريقه
تهريب اي شي اذا نبقى هنا يكتلونا
كُلنا ويمحون اثرنا من الوجود
_ ابتسمت بتعب ، تحجين من كُل عقلج ماما
اني منا كلبي خلصان اوووف ،
ترى وين ما ترحين وين ما تطفرين يلزموج
ويشوفوج نجوم اليل بعز الظهر
يحيرون شلون يتفننون بيج من التعذيب

ابتسام : زين نارا الجيش العراقي شنو دوره غير
يحمي البلد وينهم عن كُل الي ديصير هسه
نارا : صفنت بوجها وهزيت ايدي ،
اكول يمه شنو شايفتني اني كدامج اعلاميه
وجايه تسأليني هاي الأسأله كُلها
اني حالي من حالج ماعرف اي شي
ابتسام : اووو شبيج مو داسألج ، انتِ شلون
عرفتي كُل هذا الكلام
نارا : من الدوام ماما ترى الكُلية كُل شي بيها
يعني يحجون كُل شي واني اسمع بس
اسكت لان ماعرف شنو اسوي
ابتسام : دخخخيلك ربي دخخخيلك احمينااا

نارا : يمه حبابه اطلعي اريد ارتاح حيل
تعبانه اني
ابتسام : نارا شبيج تأدبي اني امج
نارا : ذبيت حسره ونزلت دموعي وبجيت
ماما أسراء حسره بكلبي ماكدر انسى الموضوع
اريد انام ، هي شافتني ابجي عيونها دمعت ويايه .
ابتسام : اووف يابعد بيتي ما توقعت هيج صاير
وياج الله لا يوفقهم

سحبت راسي الحضنها وخلته بحضنها
همست الي ، نامي بحضني يمه نامي
وارتاحي ، اني دفنت راسي بحضنها
عطرها يجنن ريحه البخور ماليها
حسيت تعب الدنيا والحزن صار بيه
بجيت وحضنتها من خصرها
هي تمسح ع راسي وتخلي شعري ورى اذني
كُل شوي تمد ايدها تمسح أدموعي وتذب
حسره شكبرها
شوي وصارت ادندن بصوتها العذب ..

ابتسام : دللول يانارا دللول عدوج عليل
وساكن الجول " بجت " دللول يايمه
دللول يبنيتي دللول نامي رغد ياتعب رحمي
نامي يايمه ارتاحي

نارا : حضنتها قوي ، ماما هلكد تحبيني ردت
عليه وهيَ تبجي
ابتسام : شلون ما احبج
يايمه شلونانتِ قطعه من روحي
يايمه من حبلت بيج شكد شعلت نار بكَلوب الحاقدين تدرين من ولدتج
اول ما طلعتي من رحمي وانتِ تبجين
حطوج ع صدري بدمج ومن حضنتج الصدري
شكد حسيت بيج حسيت بلحظتها بالامومه
كأن ملكت الدنيا كُله بين اديه
نارا : حضنتها بقوه وشهكت ، ماما لاتعوفيناا

سمعنا صوت انفاس مثل
الواحد الي يبجي ورى الباب
فتحت عيوني
والله شكيت اكو احد يسمع علينا
من الخوف سألت ، منو !!!!؟
جان تدخل اختي زهراء هي وتبجي
وعيونها حمر شمرت نفسها بحضن ماما
وهي تشهك بالبجي

زهراء : ماما واني هم لاتعوفيني اخاف لا
ياخذوني هذولي

ردت عليها ماما بخوف زهراء صغيره
مو مال هيج حجي شكلها سامعه كُل
كلامنا يادوب عمرها بالاعشار بدايتها

ابتسام : لا يمه صلي ع النبي لاتحجين هيج
ولا تخافين الله موجود ويانه وأهل البيت كلهم
ويانه كولي يا الله

سكتت شوي ودخل ابويه
لان طولنا وهو باله يمنه

علي : اي بعد انصبوها مناحه بعد ابوكم
لاتقصرون بابا
ابتسام : علي شبيك والله غير خايفين '
كعد ابويه وجر نفس
علي : والله يايابه اني خايف عليكم اكثر
من روحي سمعت بيهم ما يرحمون احد خاصه
الشيعه
ابتسام : هزت راسها بقهر وردت ، اعرف
علي : شعرفج ، شلون عرفتي ابتسام
ابتسام : نارا كالت الي سامعه من الدوام
مالتها وحجت الي كُل شي
علي : هاا
نارا : أي اني بابا بس
الجيش العراقي مستحيل يعوفنه
وحسب الي سمعته همَ متقدمين اكثر منهم
علي : صحيح مستحيل يعوفونا هيج
ابتسام : الله يسمع منك ويفكونه
من هذول الانذال ونخلص منهم

الكُل : امين يارب

علي : شنو ماكو اكل ترى جعنه
ابتسام : يلا هسه انزل اسوي

نارا : طلعوا من الغرفه واني رجع خيم
الحزن عليه
ورجع تفكيري ب أسراء وكرار
مر الوقت إلى أن سمعت صوت ماما تصيح
من جوه تعالي تغدي
وبابا يصيح " بعد ابوج تعاي اكلي واسندي
نفسج "
واني مو يمهم انفتح الباب ودخلت زهراء
للغرفه

زهراء : تعالي نزلي جوه اكلي الخاطري
نارا : رديت عليها بتعب ، ماريد اكل شي زهره
روحي اكلي انتِ ، كعدت يمي وسحبتني
االكتفها ردت عليه

زهراء : اني هم احب أسراء الله يرحمه
برحمته الواسعة هي بنت
حبابه ومحبوبه وخوش بنيه
نارا : دمعن عيوني ، ليش راحت لعد
زهراء : زين مو تكولين كرار استشهد
نارا : رفعت راسي ، شلون عرفتي
زهراء : غير سمعتج تحجين الماما
نارا : أي
زهراء : صدكي هوَ كثر ما يحبها أخذها
ويا علمود هناك بالجنه يلتقون
لان اثنينهم ماتوا مظلومين وشهداء
ويكولون الي مات دفاع عن وطنه لو في سبيل
الله شهداء مثل ما ذكر بالقرآن
" ولا تحسبنَّ الذين قتلوا في سبيل اللّه أمواتاً بل أحياءٌ عند ربِّهم يرزقون"

نارا : استغربت من اختي صغيره ويطلع
منها هذا الكلام حسيت اختي
عقلها اكبر من عمرها سألتها
منين عرفتي كُل هذا ؟
زهراء : اني اسمع هيج واحفظ
نارا : حسيت الحديث
وياها راحه استرست وياها وتجاوبت
، معقوله هسه هيَ ارتاحت ؟
زهراء : حبيبتي اكيد ، هسه شافت
كرارها هناك اكيد ارتاحت
نارا: شلون شافته ، يمكن ماتشوفه هناك
زهراء : تشوفه ، هيَ ماتت مظلومه وهو همَ
اثنينهم شهداء ماتوا مقتولين
يعني اثنينهم بنفس المرتبه
نارا : ماعرف الله اعلم بهذا كُله
زهراء : اذا تحبينهم اقري الهم قرآن صلي
الهم لا تبجين عليهم ماراح تقدمين الهم اي
شي بالدموع
وهسه كومي اكلي وارتاحي لاتبقين هيج

نارا : رفعت عيوني عليها هي صفنت
بعيوني ثواني
زهراء : نارا عيونج
نارا : شبيهن ؟
زهراء : بيهن سالفه كُلش جبيره
بيهن لغز بيهن حُب عميق مامعروف
نارا : هزيت راسي ، اسُكتي من وين متعلمه هذا الكلام وجايه اطبقي عليه
زهراء : لج والله احجي كلامي صحيح
عيونج حيل حلوات
ومن بجيتي صارن احلى ورموشج احلى
نارا : عقدت حاجبي زهراء شبيج حبيبتي
تمشين من يمي لا اسطرج مالي خلك هذا الكلام

زهراء : هسه مو زين اتغزل بيج مو صوجج
صوجي اني كومي يلا نزلي ماما شلون مسويه
دولمه تجننن الا تش**
نارا : ضربتها ، وثول شنو هاي الألفاظ ، ضحكت
وتقربت حضنتني
زهراء : رويحتي انتِ يلا نزلي ورايه
نارا : الله كريم
نزلي واني وراج

هي نزلت واني بقيت
افكر افكار تروح وتجي شلون اذا راح واحد من
عائلتي شلون بيه اني والله اموت
استغفرت الله ونزلت
لكيتهم كُلهم كاعدين ينتظروني
كعدت يمهم
وعيوني عليهم اباوع شلون ماما حاطه
علي بحضنها وتصيح ع اخواني
ومن جهة اخواني يتعاركن ع المكان الي
بصف بابا كُلهم يريدن يكعدن بصف
بابا وهو يضحك عليهن
ويصيح عليهن " بكُل وجبه يكعدن اثنين يمي "
احنه بينه كُلنا متعودين ع الاحترام والحُب
يعني ابسط شي بابا اقوه كلمه يكولها
بحقنه من يعصب يكول انجبي
مامد يوم ايده علينه ولا ضربنه
بالعكس من يريد يعاقبنه جان بأسلوبه
يخلي ضميرنا يأنبنه إلى أن نجي
احنه نعتذر منه ونطلب يسامحنه
مايدخل بقرار احد بينه بس لو واحد منه
قراره خطأ يكُعد يتناقش بي إلى أن
يشوفنه هذا الشي خطأ ويخلينه نقتنع
هذا خطأ وقتها يتركنا
يحترم ماما ويحبها وما يوم شفنا تعارك وياها
كدامنه الا من دخلوا داع١١ وهذا من خوفهم
علينه كثرت مشاكلهم كدامنه
وبنفس الوقت زعلهم ما يطول هواي
متفاهمين وجانوا هواي يحسدوهم
ع هيج علاقه مليانه تفاهم

خلصنا اكل بس طول ما
اني كاعده ماحطيت شي
بحلكي بس اصفن وأجر حسرات وعيوني
مليانه دموع وهم من
يشوفوني هيج يسكتون يعرفون
شنو بيه غسلنا المواعين واني بالي مو يمي
المشاهد تنعاد براسي
لزمت وصعدت فوك الهنا خلصت طاقتي
بالتمثيل
شمرت نفسي ع السرير وبجيت
صرت افكر شنو راح يسون وهمَ ماعندهم
رحمه اذا صرنا بأيدهم معقوله
يسوون مثل ما كالوا يقتلون ويعذبون بدم بارد !!!

وكفت ع طولي ونزلت البابا
وصلت الغرفته ردت افتح الباب
اجاني صوته يقرا " وصلنا الموصل اه ياالموصل
ماينحمل طاريها " بقيت واكفه بالباب
اسمعه وابجي حس عليه سكت سأل منو !
مارديت عفته وصعدت فوك للغرفه
انهاريت بالبجي .

مرن يومين وثلاثه واني الكُليه مارحت الها
العالم اعتزلته وعائلتي نادراً ما اكون
متواجده وياهم
احس شبح الخوف خيم عليه

سمعت صوت ماما تصيح جوه حسيت
كلبي صار برجليه من الخوف
طفرت بسرعه وطلعت من الغرفه اركض
نزلت جوه لكيتها كاعده بنص
الصاله وتملخ بشعرها
كلبي راد يوكف من الخوف
بابا واكف كدامها يريد
يهديها بس كُل ما يتقرب تدفعه
تقدمت كعدت كدامها احاول الزم
اديها بس هيهات من قوه عصبيتها ما تنلزم
صحت ، شكووووووو شبيجججج شنو صاير

ابتسام : وووووولج راااااح نموووووت
احنه انتهينننننااااا مانكدر نطلع من المووووصل
راح تضيععععن من بين ادييييييه
ولج ياااخذذذذون بناااات يااخذووون شرفههههن
ولج حتتتى ما يرغبون متزوجاااات
أكثرهم يتنافسسسون ع البنااااات يبيعوووهن
راحححح ترحن مم بين اددديه

نارا : كعدت مصدومه شنو هذا الكلام
اول مره اسمعه ما توقعت هيج يصير
بهت وجهي والخوف دب بجسمي
حسيت نفسي قلبت واريد اتقيء
اباوع بابا كاعد وحاط ايده ع راسه
وكدامه امي ملخت نفسها ماتحملت الي
سمعته نفسي قلبت ركض للحمام
صرت اتقيء روحي احسها طلعت
فرفحت روحي صرت اشمر مي ع وجهي
اريد اطفي النار الي تطلع مني
كعدت ع الارض بالحمام اجر النفس بالكوه
وصوت ماما بعده الهسه يرن بأذني
تبجي وتصيح
ارتاحيت دقيقتين وطلعت من الحمام
رحت يمها اهدي بيها بس شنو
يهدي بالي

ابتسام : اليووووم تحاول اطلعنا من الموصل
اليوووم سمعت

ابويه هز راسه بقله حيله و وكف ع رجليه
علي : طالع اني اشوف حل بلكت
اكو منفذ نطلع منا
ابتسام : اااااي روووح شوف حل سريع
واحنه راح نجهز نفسنه هسه
علي : تمام

بعده ابويه ما طالع وما سمعنا الا صوت
طلق رج البيت رج
كُلنا صرخنا مفزوعين يعني وصلوا هناااا !!
اخواتي واخواني حاشرين نفسهم بين الحايط
ويبجون والبنات وحده حاضنه الثانيه وتبجي
ركضنا اني وامي اخذناهم كُلهم دخلناهم
للغرفه الاخيره والطلق بعده عالي يرمون ماعرف
ع منو ابويه اجه دخلنا ووسد الباب قفله
حط ايده ع راسه شكلها السالفه صارت
اكبر
اباوع الخوف بالوجوه ماكو اي أمل نطلع
منا شكد حاولت التمس لأمل واحد وأشوف
شي بعيون واحد بيهم بس للأسف ماكو

بقينا كاعدين ننتظر الطلق يخف والاوضاع
ترجع طبيعيه بس ادموعنا تنزل
ونبجي ورى عشر دقايق يلا خف الطلق وصار
الوضع هدوووووء الابره اذا شمرناها
بالشارع تنسمع ماكو اي احد طالع برى كُلها
خافت وكعدت ببيوتها تحتمي وتحافظ
ع عائلتها

بقينا كاعدين ع هذا الحال ساعه كامله الا ان
ورى ساعه وكف ابويه احنه وكفنه ويا
طلع من الغرفه يمشي سريع
اخواني كُلهم نايمين بس اني وماما كاعدات
طلعنا ورى نركض
لكينا طالع واصل الباب المطبخ يريد يطلع
ولزمنا
ابتسام : وووووين رايح
علي : مستحيل نبقى هنا خلي اطلع هسه
ادور ع احد بلكت الكه ونطلع منا اليوم
باليل مانريد انطول
ابتسام : ماشفت شنو صار هسه والرمي وووين تطلع بهذا الوقت الي يخوف بلكت شااافوك
نارا : بابا كلامها صحيح فدوه لك وين تطلع
علي : شووو وخرن تريدن ابقى كاعد وساكت
شبيه تخبلت الا اذا مارايدكم ابقى هيج
كاعد بدون ما اسوي شي

بدون مايسمع النا شكد حاولنا نلزمه
حتى امي لزمته وحلفته بس ما سمع الها
عافنه وطلع كعدنا نبجي
خايفين لا يصير عليه شي وهو برى
مر الوقت ساعه ساعتين وهوَ مارجع
حسيت كلبي راد يوكف ليش هيج طول
بقينا نفتر أنريده يرجع
اختفى صاار المغرب وهو ماكو واحنه حتى اكل
ماحاطين بحلكنا
ابويه اختفى كلنا أخذوا ماكو اي امل
الرجوعه كعدنا نبجي وندعي يرجع
النا سالم مانكدر نطلع

ورى ساعه من المغرب انفتح الباب
طلعنا نركض ليكنا هوَ رحنه ركض
حضنا ونبجي وهو تعبااان حيل
بس جان يحجي ويانه بهمس
دخلنا جوه جان يتلفت
كعدنا كدامه ويحجي بصوت ناصي

علي : اشش نصن صوتجن ترى الحيطان تسمع
باعن جهزن بس الشغلات الي تحتاجنها
يعني لا تاخذن وياجن شي ثقيل
اشياء خفيفه وأهم شي ذهب والفلوس اخذنها
وهاي ملابس جبت وياي نقاب البسنهن
ولبي بناتج هم نقاب
اليوم ع الساعه 1:00 باليل نطلع منا
اتفقت ويا واحد هوَ هم راح يطلع ويا عائلته
بس عنده طفله وزوجته وعنده سياره
ف كُلنا نروح ويا
ماريد اي حجي بسرعه جهزن نفسجن ترى الوقت
مو من صالحنا ع للحظه يدخلون
علينا

ردت ماما مصدومه
ابتسام : شتحجي علي !!!!

علي : ترى ديفترون ماكو مكان ما ماخذي
امددين نفسهم بكُل مكان يلااا كومن جهزن نفسجن
وكلي جهالج احتمال نبقى وقت طويل بلا أكل
بالطريق

وكفنا اني وماما وصرنا نركض منا ومنا
امي راحت تجهز بالاغراض واني رحت للمطبخ
سويت اكل النا بس جسمي يرجف رجف
كعدنا اكلنا سريع وكمنا نجهز نفسنه
مر الوقت الا أن لبسنا ملابسنا
ابويه تقدم حضنا كُلنه سوه بعيونه دموع تشرح
الي ما ينحجي وماما تبجي وتمسح بدموعها
كأن هذا اخر امل النا
نزلنا النقاب ع وجهنا صارت الساعه بال 1 باليل
طلعنا نمشي ع اطراف اصابعنا
والخوف مالي جسمنه
ما أخذنا ويانه اي ملابس مانريدهم يشكون
بس اخذنه جنطه وحده خلينه بيها
الذهب والفلوس واني لبستها
لان همَ ما يفتشون البنات بس الزلم
هاي اذا ماكو بنات يشتغلن وياهم ويجن
يفتشنه

وصلنا للرجال لكينا ينتظرنا ويا زوجته
وبنته صغيره

_ ها ابو نارا يلا جنت انتظرج
_ يلا يابه خلينا نطلع الوقت مو بصالحنا
_ اي صحيح ، يلا اصعدوا
_ يا الله

صعدنا بالسياره صلينا ع النبي ومشينا
حاطين ادينه ع كلبنا خايفين لا ياخذونا او
يرجعونا او يسوون بينا شي مو زين مثل
ما سمعنا
السياره هدوووووء بس صوت انفاسنا
المضطربه تنسمع
لازمه القرآن واقرا بي
إلى أن صار ضوه كدامنا
بابا حجه بهمس
علي : لا اطلعون نفس واحد ولا تحجون
اي شي هاي سيطره الهم مو للجيش .
هو بابا حجه هيج وتنفسنا زاد
احس دكات كلبي صارت تنسمع
ادك ب أذني واحس حراره تطلع من وجهي
صارت السيطره قريبه من يمنه شفنا
سياره جانت كدامنا
واحنه وراهم وكفنا السياره
وخايفين

ماعرف شلون صار الوضع فجأة السياره
الي كدامنه السياره مالتها داس بانزين
وتخطاهم يمشي
سريع هم من شافوا هيج سوه
حتى ما تعبوا نفسهم
ماعرف شنو السلاح الي جان بيدهم
بس طلقوا ع السياره انقلبت واحتركت هيَ
والبيها ماكو اي احد طلع من السياره عايش
هذا كُله صار كدامنه
احنه جامدين يعني قتلوا عائله كامله بلمح
البصر
صرنا نشهك من البجي مانبين لابسين نقاب
بس أصوات بجينا واضح
عاط بينا ابويه " اسسسسكتن "
سكتنا بس واضح علينا دنبجي

اجوي تقربوا ع سيارتنا ولا كأن قبل ثواني
قتلوا بشر
جان لبسهم وشكلهم يخووووف
احسهم مو مثلنا
سألوا
_ أين ذاهبون ؟
_ ر...رايحين رايحين
_ تكلللم ؟؟
_ رايحين للمستشفى
_ انتَ والجميع !!!
_ أ..أي أي
_ ارجعوا من حيث ما أتيتم ..

نارا : واضح ما صدكوانا راد يحجي ابويه ويقنعه
انُ ضروري نروح للمستشفى بس الحقير
صاح بوجهة " ارجعووووا "
ماكدرنا نسوي اي شي ورجعنا ، خلصنا
الطريق بس نبجي ماكدرنا نطلع من الموصل
ماكدرناااااا
رجعنا للبيت نبجي دخلنا مهزومين
مستحيل نكدر نطلع مستحيل
شلون قتلوا الناس كدامنا هيج ابساطه شلون
نزعنا النقاب وكعدنا نبجي
كُل واحد اخذ اله ركن مهموم وهمومه ماتنحل

بقينا للفجر كاعدين بحيث طلعت الشمس
والنوم ما مر ع عيونه
مر اليوم واحنه مخلصيها بس صلاه
حتى اكل خلص بحيث صرنا نسوي اي
شي موجود بس حتى
نسند نفسنا
ونوكف ع رجلينا
ابويه يطلع شوي للجيران يطقس الوضع ويرجع
عرف منهم موجودين بالشارع الي ورانه
بحيث طول اليوم جانوا يفترون
بهذا الشارع الي ورانه ماعرفنا
ليش بقينا بقلق

صار اليل ماعرف شكد الوقت هيج
بحدود ال 11 باليل تقريبا
مانسمع الا صوت طلق وصوت صراخ
عالي نسوان وراها صار هدووء
بقينا خايفين بس لا دخلوا للبيوت واخذوهم تحت
التهديد
ابويه لمنه كُلنه بالغرفه وسد علينا
كال " الي يطلع اكسر رجله اني شويه وارجع رايح لابو قاسم وراجع "
هزينا راسنه ب اي وبقينا كاعدين
احس روحي فرفحت يعني الخوف
الي عشنا يرهب مايتحمله البشر
ماعرف شلون بقينا عايشين طول هذا
الوقت واحنه شفنه كُل هذا الي ديصير
كدامنا .

ورى ربع ساعه اجه بابا يدك ع راسه
والدموع بعيونه
وكفنا مصدومين سألنا شكووووو
علي : كاااارثه كااااارثه
ابتسام : علييييي لاتخوفناااا كول ششششكو
مو كلبنا راح يخلصصص

علي : ابتسسام ، كاااارررثه صارت جانوا يفترون
بالشارع الورانه وهسه عرفت ليش
طلعوا يفترون ع البيوت ياخذون بناتهم
واحد من البيوت عنده 6 بناااات
رادوا ياخذون بناته منه هو شال السلاح
وحاط بكُل وحده من بنات طلقه براسهن
وكاتلهن موت
وراجع ع زوجته حاط براسها طلقه وكاتلها
واخر شي حاط براسه طلقه ومنتحر
ورااااهن
لان رادوا ياخذون بناته ومرته منه كاتلهن
قبل لا ياخذوهن..

سمعنا كلام بابا وصرخنا مفجوعين
شنووووووووو دخيلك ربي شنووووو تحجي
كعدنا نرجف اذا هاي ورانه بالشارع الورانه
وهيج صااااار معناهاااا وصلوا النااااا
ابتسام : علي يعني وصلوا النااااا اجونه
يعني راح ياخذون بناتي مني عليييي
شنو نسوووووي
علي : والله لو اعرف اموت ما انطي وحده
من بناتي والله ع جثتي
اششش اهدئي كولي يا الله بلكت
الجيش يدخلون
ابتسام : واذا ما اجوي ونقذونااا شلون بينه
راح نموووت

بقينا كاعدين بالبيت والخوف
مالينا صار ثاني يوم
ابويه كعد كدامنا يحاجينه وهو يبجي
حسيت هاهي انتهت حياتنا
اول مره اشوف ابويه بهذا الحال
وهذا الشكل

علي : بكُل للحظه تمر تشاهدوا وادعوا
هاهي دخلوا احتلوا الموصل
ع للحظه يدخلون البيتنا بس لا تصدكون يدخلون
هيج اني اخذت سلاح وياي يعني
مستحيل اخليهم يعبرون الكم واني اشم
الهوى ابتسام اذا صار عليه شي
ديربالج ع بناتج امانه بركبتج
اني مستعد انطي نفسي مقابل يتركوكم
الهذا استعدن لأي شي يصير
خليجن قويات انتن رفعه راسي
ويارب دومه راسي مرفوع بيجن
التفت عليه ابتسم بهدوء

نارا نارتي بابا انتِ بنتي اريدج قويه
تبقين ع طول لاتخلين اي شي يهزمج
انتِ شفتي الاقوه خلي كلبج قوي
وديري بالج ع اخوتج

نارا : هو يحجي واحنه نبجي حضنا يسكت بينا
ودخلنا للغرفه حسينا ع حركه صارت بالشارع
مالتنا كلنا هاهي اجه أجلنا
ابويه كعد بالحوش يدعي
واحنه بالغرفه بس كل شوي نطلع نفتر
ونرجع ندخل

السااعه صارت بال 4 صارت حركه
حيل قويه برى وأصوات الناس
عاليه الي بيهم يصرخون والي بيهم
يستنجدون وتوسلون وصوت طلق
عالي
من سمعنا صوت عالي طلعنا من الغرفه نركض
واخواني واخواتي طلعوا ورانا
حتى ما انتبهنا الهم
مانشوف الا بابا دخل يركض من الحوش و
باب الحوش انفتح بقوه
ودخلوا اثنين زلم لابسين اسود
واللحيه مالتهم طويله وشكلهم مرررعب
ومابي نور النبي
ابويه دخل للبيت يركض ويصيح
علينا ادخلن بس احنه بقينا جامدين بمكانه
رجع طلع ابويه وهو شايل بيده سلاح
بدون ما يسألهم وقبل لا يحجون
سحب أقسام سريع
وحط بكُل واحد طلقه وكعوا كدامنه ينزفون
دم بغزاره
والجهال يصرخووون صراخخ ماصاير لان
كُل هذا صار كدامهم شفنا كُل شي
كُل شي كدامنا صار ..

كُل شي صار مثل الحلم
كُل شي كأن كابوس مرعب جاي نعيشه
حتى ما استوعبنا الي يصير
كدامنه ولا انطونا فرصه نستوعب الي
ديصير
امي بقت تصيح ع ابويه حتى يدخل جوه
ونسد الباب لان سمعوا صوت الطلق يعني
راح يجون عليناااا ..
عللللللللليييييي تعااااال ادخل جوووووه ..

ابويه بعده بمكانه واكف صاح بينا ادخلللللن
جوووووه ، بكُل حسه
بعدنا ما متحركين
جان يدخلون علينا حسيت جسمي
انشل من الرعب
شافوا ابويه بيده
السلاح واثنين منهم واكعين ع الارض ميتين
واحد منهم من الي
دخلوا رفع سلاحه بوجه
ابويه وسحب أقسام وحط طلقه براس
ابويه وكتله بالمكان ..

ــــــــــــــــــــــــــــــ•●•ـــــــــــــــــــــــــــــــ

يتبع ..

تعبت نفسيتي واني اكتب البارت
طمننوني عنكم ؟

مُتابعه للحساب لُطفاً akyta_98