الربتج " حالك الاسوداد " الفصل السابع وأربعون 47 - بقلم رهف علي

الحِزن تَيه الوادم وانتِچَه عليّه
اي والله .

التصويت يابه التصويت وينه ؟ طكونا تصويت .

الخوف !!! مُجرد كلمة من عده حُروف بعثرت كُل مشاعري مهما كانت ، تستطيع أن تُبعثر اقوه وأسمى شعور إلى القلب منها ( الحُب ، السعاده ، والبهجة ) تستطيع أن تّطفىء الانسان
وبعدها لا يستطيع أن يتقدم بسبب تلك الحروف القليله
الخوف لديه قوه قد فاقت تحملنا لها
ولكن ع الرغم أن
لم يبَقَ في هذا العالم طمأنينةٌ
أعظَم منِ علمِ العَبد أن ربّه
هو اللـهُ ، الرحَمنُ ، الـرحَيــم
لندع حملنا وخوفنا وكُل امورنا إلى الله ولنتوكل.

- صرخت بأسم شُعاع واني خايفه احس راح يتكرر نفس الشي الي عشته نفسسسسه لا يا الله لا ما اكدر جف ريقي ، انفاسه ثأرت نزلوا همَ وسلاحهم وكفوا يم سياراتهم بس همَ مقاطعين الطريق عنه عيوني بقت متحجرات عليم حتى ما نزلت عيني عنهم وبقيت بنفس حركتي ، لفت نظري شُعاع فتح الباب وراد ينزل اني هنا يلا صحيت من صدمتي بسُرعه درت و لزمت ايده
صحت بي واني اهز راسي بنفي

- نارا :- وووووين نااازل ووووووين
- شُعاع :- اهدئي بابا ماكو شي
- نارا :- مااا والله ما تنزل شُعاع والله ما تنزززززل شوفهم شوفهم
- شُعاع :- صوتج ، هسه ارجع
- نارا :- لزمته اقوه واني أشر عليهم ، ماااااتشوفهم شششكد ماتشوف اسلحتهممممم تريد اخسرررك مثل اهلي مااا اقبل فهمت
- شُعاع :- ماتخسرين احد شبيج بس ابقي هنا بالسياره لا تنزلين
شويه وراجعلج والله كولي يا الله
- نارا :- انتبهت عليه سحبت السلاح مالته وحطه بخصره ضغط ع ايدي بقوه وباوع بعيوني بنظرات تحس شكت كلبي كأن يكول انتبهي النفسج اذا صار بيه شي اني فرفحت روحي شفته نزل وسد الباب ورى ومشى بأتجاهم إلى أن صار كدامهم بس بينه وبينهم مسافه قليله

خليت ايدي ع كلبي صرت اردد آيات قرآنية حافظتها ، يارب لا تفجعني من جديد ما اكدر اتحمل هسه اذا صار شي ما اتحمل وماعندي الصبر حتى اعيش الي عشته قبل مو كاال الوضع أمان مو كال ماكو شي زين هسه هذول من طلعوا ، صرت اردد أكثر من مره
" أعوذ بكلمات الله التامّات من شرِّ ما خلق " يارب اكفينا شرهم يارب اكفينا شرهم لزمت كلبي من شفت شُعاع رفع ايده ودفع الي كدامه صار من كتفه ع كيف هذاك ما تحرك وماعرف شنو جاي يحجون سوه احس صار بينهم جداال بس ما جاي افهم شنو يحجون
شويه وانفتح الباب مال السياره مالتهم ونزل واحد لابس اسود من فوك للجوه وجان وجهة مغطى اني هنا كلت هاهي رحنه بيها مُستحيل
نطلع من هذا المكان سالمين ، صار كدام شُعاع .

ثواني هي ثواااني رفع الثام من ع وجهة وما حسيت الا شُعاع انطى بوكس ع وجهة وصار الدم ينفر من خشمه هذاك الكدامه وكف يضحك بصوت عالي ، ما اكتفى شُعاع ورجع لزمه ضربه مره ثانيه ، اني حطيت ايدي ع حلكي مصدومه شنو ديسوي يريدهم ياخذونه لو ياذونه !!!!
رجع وكف كدام شُعاع وحط ايده ع كتفه وبس يضحك الدم ينزل من خشمه ومامهتم وشُعاع يكفخ بي ، بقيت ما مستوعبه الي جاي يصير ، شنو صار ؟؟؟؟
ماحسيت الا سحب شُعاع وحضنه وشُعاع رفع ايده وحضنه
اني بقيت لحظه صمت وعدم استيعاب ، واني اشوف الشمهد الي كدامي !!!!.

هزيت راسي اريد استوعب الي صار بقوا ماعرف شكد من الوقت الا ان ابتعدوا وبعده يضحك وشُعاع واكف شكله يرزل بي وهذاك شارك الحلك للأذن ورى شويه
ابتعدوا عن بعض ورفع شُعاع ايده للثاني ك كلامه تحذير وتوعيد ورجع بأتجاهي اني بقت عيوني تتبعه الا ان فتح باب السياره وصعد
باوع عليه وضحك

- شُعاع :- راح تموتين ول يابه
- نارا :- فهمني لان مافهمت شنو صار هسه وهذا منو ؟؟؟؟
- شُعاع :- هذا من جماعتي ال**** كلت اله راح اجي للموصل البارحه رد عليه هلا بيك واستقبلك احلى استقبال بس السربوت ما اتوقعت منه هذا الاستقبال يكول ماعبالي اي ويا زوجتك متوقعين اجيت ويا للشذام وعابد
- نارا :- بهت وجهي ، تحجي صدُك شعاع ؟؟؟
- شُعاع :- هههههه اي وعلي شبيج ماكو شي
- نارا :- ياااا ماكو شيييي ؟؟؟؟ لا تخليني هسه انزل واطيح حظهم تعرف شنو صار بيه هااا
- شُعاع :- والله اني اطيح حظهم الج بس اهدئي
- نارا :- ماتحملت وبجيت ، خفت تعرف شنو خفت كلت راح ارجع للصخام ضيم كلبي راح ارجع وهل مره والله والي اسمه الله ما اخليهم يلمسون شعره واحط طلقه بنص راسي واكتل روحي
- شُعاع :- لج كافي شوي شوي ع كلبج

انهاريت هو سحبني من ايدي ضمني الحضنه لزمته بقوه وبجيت
ماجنت متوقعه هذا الي صار هو يسكت بيه بالكوه سكتت
ابتعد عني يمسح بدموعي باسني من راسي يحجي وياي بهدوء حتى ما ارجع ابجي ، سحبت نفسي ورجعت كعدت عدل هم بعدهم مارايحين شُعاع فتح الجامه وحجه ويا

- شُعاع :- اصبررررلي لك **** اذا ما ارجعها لك
- ههههههه منتظرك كبد
- شُعاع :- عفتك فتره لكيتك صاير سربوت
- غير انتَ عفتني مشكلتك
- ***
- ااااخ الله احلى من كلمة احبك

شُعاع يفشر عليه وهذا بس يضحك ويرد عليه عادي ولا كأن يغلط عليه شغل السياره شُعاع وطلعنا وهم راحوا استغفر الله اجوي بس يرعبوني اني وراحوا اما شُعاع ولا مهتم شكله متعود مشيته وبس صوت انفاسنه تنسمع طُرف الموصل كُلها تذكرني بأهلي حرفياً احس ادمرت نفسيتي ، سحبت نفس وحجيت ويا،

- نارا :- شُعاع
- شُعاع :- عيونه
- نارا :- اريد اروح البيت اهلي ، هو التفت عليه
- شُعاع :- ليش ؟
- نارا :- قوست شفايفي بالموت لازمه نفسي ، اريد اشوفه
- شُعاع :- لا بابا
- نارا :- ليش حباب
- شُعاع :- تريدين تموتين انتِ ؟
- نارا :- بس اريد اشوفه
- شُعاع :- شنو تشوفين
- نارا :- سكتت شويه قويت نفسي همست ، شُعاع عظم ابويه وأخويه باقي مو ؟
- شُعاع :- هز راسه بأسف رد ، ابوج واخوج بالجنه واذا ع الدنيا فيبقى بيها مجرد جسد وأعظام

احس الخنكه وصلت حدها كتمت ع نفسي وبقيت عيوني مفتوحه بس حتى ما ابجي لان اعرف بنفسي بس ابجي راح انهار والكلام ما راح يأثر عليه مهما هون عليه بالمواساه ، وكف السياره و رفع ايده وأشر الي ع البيت

- شُعاع :- هذا البيت الي راح نبقى بي
- نارا :- ليش اجينه هنا
- شُعاع :- تبقين هنا ما اخليت بفندق او مكان ما معلوم شنو
إلى أن اكمل شغلي الي هنا
- نارا :- تمام

نزلت اني ويا وهو لزم ايدي جانت ظلمه رغم الوضع أمان بس اني متخوفه وحقي والله وصلنا للباب وشُعاع دكه انفتح الباب وطلع رجال جبير بالعمر صار يهلي ويرحب بينا واني بس ساكته احسهم مثل هذول الي جانوا قبل من دخلت يمهم وبعدين سلموني للانذال
دخلنا وطلعن النا نسوان سلمن وياهم وحده جبيره بالعمر كل هذا واني ما تركت ايد شُعاع دخلنا جوه وكعدنا واني لازمه ايده

- نارا :- شُعاع متأكد هذول مو من داعـــ/ــش ؟؟
- شُعاع :- اششش صوتج عيب من الناس لا يسمعون
- نارا :- والله خايفه لا تنعاد السالفه
- شُعاع :- واثقه مني مو
- نارا :- بس انتَ واثقه بيك
- شُعاع :- هاهي كلت الج كلمه ، اطمئني

- نارا :- سكتت وهو سحب ايدي بين اديه وفركها رجع فتح ايدي
وصار يرسم دوائر وهميه داخل كف ايدي اني ماعرف شلون صار تركيزي كُله ع الرسم الي يرسمه واحس تفكيري اتشتتّ ماعدت مثل اول يعني اول ما دخلت لهذا البيت حجه الجبير اسمه ابو احمد

- ابو احمد :- ابني متعشين نسوي الكم عشه
- شُعاع :- لا يابه تسلم متعشين احنه
- ابو احمد :- والله ما ننسى فضلك علينا جميلك يبقى ويانه للموت
- شُعاع :- ماسويت شي هذا واجبي
- نارا :- بقيت اباوع عليهم اريد اعرف شنو مسوي شُعاع الهم
- ابو احمد :- شلون ما سويت شي وانتَ طلعتنا من المخيمات
- شُعاع :- انتوا هم بحسبه اهلي
- ابو احمد :- شكرا كثيغ لك ابني

يحجون ويا بالمصلاوي وحتى بناتهم هم كاعدات يعني عادي كأن شُعاع واحد منهم واثقين بي ثقه عمياء إلى درجه بعيده ، ضحكهم وشقةهم ويا حتى ابو احمد كُله يصيح الشُعاه ابني واني بنصهم لو احجي شويه لو لا بعدني ما ماخذه عليهم ومتوتره منهم لان اول مره اشوفهم

وراها جابوا النا فراش فرشوا النا لان الوقت تأخر وغرفه الوحدنا اتمددت بصف شُعاع وهو سريع نام لان تعبان واني ماككدرت عيني ما أخذت النوم كُل شويه اتخيل ينفتح الباب ويدخلون يداهمونا عشت اليل بطوله بس اكشن ويا خيالي تعب كُلش تعبت إلى أن غفيت واني ما حاسه بنفسي فزيت بنص اليل ماعرف شكد الوقت
تتخيلت أخذوا شُعاع مني بحيث كعدت اباوع عليه سحبت الجهاز فتحته الوقت حيل متأخر وشُعاع يمي نايم سميت بأسم الله ورجعت خليت راسي ع المخده نمت وراها هم ماعرف بشكد فزيت اباوع شُعاع يمي لو لا الا شفته يمي تأكدت يلا ارجع انام بقيت هيج طول اليل بهذا التخيل تعبت هواي تعبت إلى أن طلع الصبح

فتحت عيوني لكيت شُعاع موجود بالغرفه بس كاعد مشغل الحاسبه مالته وماعرف شنو يسوي شافني كعدت ابتسم بوجهي

- شُعاع :- صباح الخير ياحلو
- نارا :- ههههه صباح النور
- شُعاع :- يلا كومي غسلي بس حبيبي لمي الفراش وراج
- نارا :- صار

كمت مديت اديه احس نفسي متكسره لان مانايمه عدل
لميت الفراش وعدلته وطلعت غسلت وطلعت سمعت صوت بالمطبخ حسيت عصافير بطني صارت اتزقزق شفت شُعاع كدامي رحت يمه تقربت
- نارا :- شُعاع اني جوعانه
- شُعاع :- هسه يجيبون الريوك شبع بطنك الصغيرون
- نارا :- ههههههه بس استحي
- شُعاع :- والله يا ابني بالأكل ماكو مستحى اذا ماشبعتي خلي المستحى يفيدج
- نارا :- صح ههههههه ، هو رفع ايدي وباسني من باطن ايدي اني احس فراشات صارت ادور بطني
- شُعاع :- احبج
- نارا :- واني احبك

ورى شويه جابوا الريوك كعدنا كُلنا ناكل سوه واني كعدت بصف شُعاع صح جوعانه بس حيل خجلانه منهم واستحي شُعاع عادي عنده ياكل طبيعي ويسولف ويا ابو احمد بس ما نساني كُل شويه يخلي شي كدامي حتى اكل لان يعرفني استحي لو هوَ يسوي الي لفه وينطيني كدامهم يخليني اطب بهدومي وهمَ عادي عندهم بس يبتسمون وهو ولا يهمه انتبهت ع حجيهم جانوا يحجون ماعرف شلون .

- ابو احمد :- شُعاع
- شُعاع :- ها يابه
- ابو احمد :- شفت هذا جوارينا ابن الق*** جان يشتغل ويا الي هججونه من بيوتنا وماعرف اليوم يا ابن اصل كاتله وهسه صايره هوسه وعالك الجو هنا
- نارا :- اني جنت اكل بس سمعت كلامه رفعت راسي مصدومه
درت وجهي الشُعاع جان طبيعي كُلششش
- شُعاع :- هاي شوكت ؟
- ابو احمد :- اليوم الصبح ماعرف باليل
- نارا :- احس ذاكرتي رجعت وماعرف شبيه صرت بس اباوع ع شُعاع ياربي شنو ديصير خلصنا ريوك وكمنا وشُعاع حجه وياي

- شُعاع :- نطلع نفتر ؟
- نارا :- هاااا !!
- شُعاع :- هههههه شبيج خايفه
- نارا :- لا مو شسمه
- شُعاع :- والله وداعه عيونج هذن الحلوات ما اخلي شعره شايفه شنو شعره !! ماخليها توصل الج
- نارا :- ابتسمت بوجهة كلامه يخلي الهدوء يدب بجسمي هزيت راسي ورديت عليه ، تمام بس البس واجي

هوو حجه وياهم كال لاتسون اكل اني اجيب وياي من ارجع
ابو احمد حاول ويا وكال اسوي ع الغداء سمج شوي بس شُعاع ما قبل اصر من نرجع نجيب الاكل ويانه واكيد محد يكدر يفوز ع شُعاع لابد هوَ كلامه الي يمشي اخر شي ، لبسنا وطلعنا شُعاع جان هادئ وكأن ما صاير شي ولا ابو احمد كال هذا الكلام الصبح
ومشغل صفكات حيل عاليه ومنطرف وانطلق للجو التفت الي لزم ايدي وهو يضحك ويدندن ويا الصفكات

جانت وحده منهن مشغلها :-

صديقي الينصر الله
نظيفه نيتي ويا
يأمن بيه مكفاه
عكس خوه رفيجه
انا الكلي عدل دوم
انا الناصر المظلوم
ع الظالم الزقوم
انا السم ع ريجك

هزيت راسي واني مبتسمه شلون منطرب وياها ويدندن هو قلل من الصوت وحجه وياي "

- شُعاع :- جنت احب الموصل وحبيتها بالزايد لان عرفتني عليج وخلتني اصادف انقى وأطيب بنت بالدنيا ولو يرجع بيه الوقت من جديد مستعد اعيش الي عشته من البدايه بس حتى تصيرين الي وانجمع بيج

كلامه خلاني اطير بالسماء ارفرف للبعيد سحبت نفس هو رفع ايدي وباسها قوي وعيونه عليه سحبت ايدي خجلانه من نظراته وهو ضحك بصوت عالي ورجع يسوق
- نارا :- وكف السياره هنا
- شُعاع :- هسه شوي ونوصل
- نارا :- تمام ، ورى شويه وكف السياره يم حديقه كُلش حلوه سألته ، شوكت نرجع؟
- شُعاع :- بعد ٤ ايام

- نارا :- شُعاع
- شُعاع :- روحه
- نارا :- اريد احجيلك الصراحه لان اني حالفه ما اضم شي عليك
هو هز راسه مبتسم
- شُعاع :- اي ياروحي احجيلي
- نارا :- فركت اديه ببعض ورفعت راسي صارت عيني بعينه. شُعاع ليش احس سالفه الصُبح انتَ وراها ؟؟ ضحك ورد
- شُعاع :- واني شعرفني بهذا الداعــ/ـشي هنا مو شفتيني نيام يمج والصبح شفتيني كدامج من كعدتي
- نارا :- بس اني حسيت بيك باليل مو يمي
- شُعاع :- لا بنيتي طردي هاي الأفكار من راسج
- نارا :- سحبت نفس بقوه ما مقتنعه ، شُعاع كلبي ناغزني احس راح يصير شي مو زين ، عقد حاجبه
- شُعاع :- يعني شلون ويا هذا التفكير اني طلعتج وياي لان ماكدر اعوفج الوحدج واعرفج شنو تستحين ع شنو هذا التفكير
- نارا :- هاهي تمام .

افترينا شويه بعدها مرينه ع المطعم واخذنه غداء ويانه ورجعنا للبيت
من دخلنا الفرع ليكنه ناس هواي وصايره هوسه للستار واحد يسأل بالثاني شكلهم ديتناقشون ع الي انقتل سويت نفسي ما اسمع ولا اشوف ودخلت للبيت ركض ما اريد افكر ولا اريد اشوف اي شي
حتى ما ابقى اتخيل تخيلات وكأن عايشه بشي حرب لا سامح الله

شُعاع دخل الاكل ويا وهمَ هم جانوا مسوين اكل خطيه كعدنا ناكل
ومنطلقين ونسولف بس اني احس بالغصه من اشوف هاي اللمه الحلوه امهم وابوهم وهمَ كاعدين شنو صار لو احنه بس اتهجرنا وما انقتلنا ! شنو صار والله لو اتهجرنا واخذوا من عندنا كُل شي ولا قاتلين اهلي اهون بهواي من الي جاي اعيشه هسه والي عشته
قبل اداركت دمعتي ونزلت راسي ما اريد احد يشوف دمعتي خلصنه والبنات لمن السفره واني وياهن اساعدهن

صار العصر تقريباً وشُعاع طلب نطلع احنه كُلنا ابو احمد ما اعترض
بس راحن البنات يتجهزن ورى ماخلصنا كُلنا طلعنا سوه اباوع ع شُعاع شلون يحجي وياهم صفنت بي من صدُك احس نفسي داحبه أكثر وأكثر مره اصفن ع جمال الموصل ومره ع جمال شُعاع
فرنا عده اماكن بس شُعاع حافظ الموصل حفظ لان عاش بيها كم سنه

من رجعنا اشترى عصير ع عددنا كُلهم دخلوا بس اني ويا بقينا برى
ردت اخذ العصير حتى ادخله بس هو رفض انُ ادخله استغربت
من اصراره ليش ما قبل اني ادخله !!! عفته ودخلت اتوقعت ورايه راح يدخل بس تأخر وراها دخل وبيده العصير كال اعتذر اجاني اتصال
بس اني ماعرف شبيه الشعور الي بداخلي احسه غريب

المهم كعدنا كُلنا وانطى العصير للكُل وكُلهم صاروا يشربون بالعصير
اني شربت العصير حسيت بي خيط مروره شويه وكاموا كالوا نعسنه نريد انام اباوع عليهم كاموا بس شكلهم دايخين واني صرت اشوف الواحد اثنين غوشن عيوني وافترت بيه الكاع التفتت ع شُعاع، كتله نعست هو هز راسه الي ورد عليه " لان افتريتي اليوم من الصبح "
ماكو بس اني ويا بالصاله لزم وشالني دخلني للغرفه ونومني ع الفراش وحضني اني بس خليت راسي سريع نمت

فزيت الساعه 11 اباوع ع نفسي اني شلون نمت هيج نومه وماحاسه بنفسي !!! ياربي شنو ديصير اباوع شُعاع يمي نايم
هزيته حتى يكعد هو كعد متململ
- شُعاع :- عوفيني يابه نعسان
- نارا :- حبيبي كوم ترى عيب تأخرنا شوف الساعه 11
- شُعاع :- كايم
- نارا :- هو كام واني كمت طلعت برى غسلت اباوع شو البيت هدوء ماكو احد كاعد استغربت ردت ارجع وصار شُعاع كدامي
- شُعاع :- شبيج ؟
- نارا :- شعجب ماكو احد كاعد
- شُعاع :- اي يمكن همَ تعبانين من الفره مال البارحه
- نارا :- اي صح يمكن ، اشو تقرب مني وباسني من شفايفي ابتعدت بسُرعه خايفه لا احد يشوفه ، عززززه شُعاع
- شُعاع :- شكو شسويت
- نارا :- عيب لا احد يجي يشوفنا
- شُعاع :- نايمين هسه حبيبي شو تعالي
- نارا :- تقرب رجع باسني واني طفرت طفره قويه من سمعت طكه مال الباب شويه وطلعت الحجيه وهو يضحك عليه

- ام احمد :- ها يمه كعدتوا ، صباح الخير
- شُعاع :- اي يمه صباح النور
- ام احمد :- والله ما اعرف شلون نمنا كل هذا الوقت
- شُعاع :- ما متعودين اطلعون الهذا نمتوا
- ام احمد :- اي والله يمه كلامك صحيح
- شُعاع :- راح نطلع اني ونارا
- ام احمد :- انتظر يمه اسوي ريوك ونتريك سوه
- شُعاع :- لا يابه أخذوا راحتكم احنه طالعين
- ام احمد :- براحتكم ابني

هم طلعنا نفتر وهو وياي بس احس احساس غريب ماعرف شلونه
احس ديصير شي بس شنو هو ماعرف وكُل الي ديصير هسه ورى سبب !

- شُعاع :- تعرفين انا شكد احبج
- نارا :- امممم لا
- شُعاع :- جذابه
- نارا :- ههههههه زين شنو تعرف عني مثلا شنو أكثر كلمه اكولها من اعصب؟
- شُعاع :- اكلي تبن
- نارا :- صفنت رفعت ايدي وضربته ، شنو اكل تبن اني .؟؟
- شُعاع :- ههههههههه لا بابا انتِ تكوليها
- نارا :- ها شكول
- شُعاع :- اكلي تبن هههههههههه
- نارا :- انتَ فد واحد استغلالي تكول توكلني تبن بحجه كلمتي رجعني رجعني ماريد طلعتك
- شُعاع :- ماشي ماشي بس لا تضربين
- نارا :- سكتت شويه بقينا نفتر

وراها رجعنا للبيت دخلنا كعدنا نسولف صار اليل وهم شُعاع كال اروح اجيب عصير وحبشكلات الكم اصريت اني اروح ويا بس هو ماقبل كال ابقي هنا واني اجيب واجي ، بقيت كاعده وهو راح ورجع
جايب ويا عصير والحبشكلات كذلك انعادت نفس سالفه البارحه والمشكله اني هم شربت لان شفت شُعاع شرب كدامي
هم همَ راحوا ينامون واني هم دخت شالني ونموني وهو نام وياي وحضني بقوه ماحسيت بنفسي الا واني نايمه ماعرف شبيه مثل الدايخه واحس الدنيا تفتر بيه

كعدت فزيت فزه اباوع شُعاع يمي نايم ركزت عليه اباوع البؤبؤ مال عينه يتحرك يعني ما نايم !!! ضربته ع كتفه وصحت بي
- نارا :- اككككككعد ، هو كعد
- شُعاع :- شبيج حبيبي
- نارا :- انتَ مانايم جذاب !!!!
- شُعاع :- نايم يابه نايم شنو جذاب
- نارا :- شُعاع دتجذب عليه اني شفتك ما نايم
- شُعاع :- يتخيل الج حبيبي اني نايم وهسه كعدت ع صوتج
- نارا :- تمام أسألك ليش اني صار الي يومين ادوخ وانام ؟
- شُعاع :- يمكن من التعب او ما متعوده
- نارا :- لا شعليه التعب اني احس تغوش عيوني
- شُعاع :- اي ياروحي من التعب

سكتت ماحجيت ورى شويه طلعنا برى وهم موجودين وشكلهم هم مثل البارحه استغربت واحس راح اتخبل والله راح اتخبل
ورجع ابو احمد حجه نفس الحجي

- ابو احمد :- ابني سمعت الي صار
- نارا :- اني التفتت اسمعه ومركزه ويا وعيني ع شُعاع وعيني عليه
- ابو احمد :- اكو شخص انقتل بمنطقه الـــــ×××
- شُعاع :- هااا صدك هذا الحجي
- ابو احمد :- اي يابه حتى اسأل برى جيرانه جاي يموتون هواي ناس وحتى بالخيم ٢ انقتلوا مو بس بهذا المكان
- نارا :- اني سريع حجيت ، عمو انتوا هم سامعين هيج شي قبل لو هاي اول مره ؟؟
- ابو احمد :- والله يا بابا اول مره يعني ماصايره قبل
- نارا :- اني بقيت صافنه صارت تجي براسي الأحداث الي صارت البارحه الدوخه وشُعاع وكُل شي ياربي معقوله الي ديصير !!!
احس عقلي افتر وشُعاع اباوع عليه عادي عنده ومسوي نفسه كأن مايعرف اي شي والوضع عادي

طول اليوم بقيت بس افكر شنو جاي يصير معقوله ياربي لا ما اريد يكون هذا الشي ولا اريد افكر انُ هذا الشي حقيقي

كعدت اني والبنات سوه وهنَ صارن يحجن شنو الي عاشنه قبل
ومن الأحداث الي صارت بيهن اني بقيت اسمع شنو الي صار بيهن
وحده من البنات اسمها ميامين اباوع عليه شلون رفعت راسها كأن تريد تحبس الدمعه الي بعيونها وماتخليها تنزل سحبت نفس عميق
كُلش عميق وزفرته وباوعت عليه وحجت .

- ميامين :- بيوم من الايام ، بليله مُظلمه والهدوء قاتل انفتح الباب بقوه وانضرب بالحايط فجأة دخل انسان ضعيف والريحه قاتله ميزتها اي هاي ريحه الدم " كعد يمي واني لا حول ولا قوه جنت ارجف وبس ابجي وماعندي حتى القُدره حتى اهرب واني محبوسه بين اديه ، رفع ايده الي يلعب بشعري تقرب مني حجه بطريقه مُقرفه الي ابعد درجه
- مراتي الجميله
- اني من نطق هاي الكلمه
ماعرف شنو صار بيه سريع عطت بوجهة ، ااانجب ادبسززززز
اني موووو مرتك رجعوني الاهلي ، هو ضحك بقرف ورد عليه
- اررجعج بس بشرط
- شنو هوَ
- انا* وياج واجاهد وياج
- فتحت عيوني ع وسعها بهت لوني ، صرخت بصوت عالي وكفت ع طولي وصرت اضرب بي واني منهاره واصرخ بوجهة اضرب وارجع اضرب بكُل قوتي واني ماعندي قوه وقتها هو وكف
عصبي من تصرفي لزمني من شعري وضربني بقسوه وبكُل قوه
ع وجهي ما اكتفى بهذا الشي رجع ضربني بالحايط افترت بيه الدنيا والنزيف اخذ من حيلي ما كدرت اقاوم أكثر خارت قوتي
وروحي بادت شمرني ع الارضيه القذره واعتلاني بدون رحمه وبدون
اي تردد اغتصب** هشم جسمي وسواني اشلاء وقتها حسيت الرحم انشال من مكانه من قوه الالم الي حسيت بي طلعت روحي
للسماء ورجعت انزرعت بجسمي كأن رجعت حتى اعيش هذا الشعور المُقرف حتى اعيش شعور البنت المغصوبه حقوقها وابسط ماعندها ، بائسه يائسه ماعندها اي حظ بالدنيا إلى درجه تُغتصب ع ايد انذل خُلق الله

- نارا :- هي تحجي ومنهاره بس تبجي وأخواتها هم يبجن اني كمت سريع رحت حضنتها وبجيت نزلت دموعي
- ميامين :- تعرفين طلعت مسكوره!!بوقتها طلعني الوالدي وفى بكلامه وطلعني اله بس طلعني مكسوره ياريت اني ميته ولا صاير وياي هذا الشي ماتعرفين شنو صار بيه من حجيت الاهلي هم شافوا حالتي وعرفوا بس اني حجيت الهم كل شي وقتها شفت بعيون والدي انُ انتهت حياتي هاهي اني بنت بس كسروني
اااااااااه يا نارا ماتعرفين من هذاك اليوم الهذا اليوم واني كل يوم اعيش بنفس الشعور والاحساس يوميه ينعاد عليه هذاك اليوم
لا اكدر اعيش ولا اكدر اموت هواي يتقدمون الي بس من نحجي وياهم بالموضوع يبتعدون كأن اني مرض مُعدي محد يتقبلني واني بهذا العيب محد نارا اني صرت نكره اتجاهم أني ما اريد اتزوج بس من اشوف كسره ابوي وامي اموت الف موته كأن من يباوعون عليه يكولون وانتِ ؟؟؟
- نارا :- لاتحجين هيج حبابه والله الله راح ياخذ حقج منهم كلهم وراح يعوضج بعوض ينسيج الي عشتي بحياتج مثلي اني مثلي
انتظري وشوفي وكولي كلامي صحيح يجي يوم وتكولين صحيح كلام نارا والله عوضني

هي اتمددت حطت راسها ع رجلي منهاره رفعت ايدي العب بشعرها امسح بدموعي وامسح بشعرها
حجت اختها

- دره :- نارا تعرفين هم بعدهم موجودين
- نارا :- شلون يعني ؟
- دره :- بعدهم نارا بعدهم اصلاً تعايشوا ويانه بس محد يعرفهم صح انتصرنا عليهم و ولدنا ماقصروا وانطينا شهداء هواي بس منو يكول هاهي خلصنا !!! نارا ترى بعدهم والله بحجه همَ ناس عاددين حالهم من حالنا بس بالأصل همَ منهم وبعدهم بس انهزموا وتعايشوا بس الله اعلم شنو منتظرين
- نارا :- وشنو محد لزمهم ؟
- دره :- محد يكدر يحجي يخافون اتمنى نخلص منهم
- نارا :- صدُك تحجين ؟
- دره :- اي والله واكو هواي انغسلت عقولهم وصاروا وياهم ضدنا
- نارا :- عززززه
- دره :- اتخيلي هسه هذا الي انقتل جوارينه نعرف بي منهم بس نخاف نتقرب منه ونخاف نبلغ عليه لان يقتلونا لو يسون بينه مثل قبل
وهمَ من جوه الجوه
- نارا :- يعني مانخلص منهم
- دره :- ابد ولاا راح نخلص منهم

غيرت الموضوع وكومتهن ويا ام احمد حتى نلتهي احسن ما نبقى
نحجي بالموضوع ونفتح جروح قديمه ماراح تنسي ولا يوم
كمت وكومتهن حتى مايبقن ويبجن طلعنا ويا ام احمد نفتر وهي انسانه فد طيبه وحبابه تضحك حتى للهوى بس انتبهت عليها كُل ما تباوع ع ميامين احس بيها شويه وتنهار مكسوره ع بنتها هواي الله يساعدها

للحظه وحده اجتي ع بالي لو اهلي عايشين شنو جان شعورهم اتجاهنا يعني اني منا واخواتي من جهة ثانيه واحنه متعرضين المثل هيج موقف معقوله راح يبقون طول حياتهم بهذا القهر يعني من مصلحتهم ما شافونا شنو عشنه ولا شنو شفنه بحياتنه
اي يمكن حتى الموت بي لُغز حتى الموت مرات يكون من صالح الانسان سواء كان مريض او لا

تصرفات شُعاع صارت غريبه او اني الي صرت احسها غريبه
يمكن بس هوَ ماعرف شلون جاي يتصرف ومن يصير شي كدامه
عادي ما يهتم ع الرغم هذا الحدث يكون كُلش مُهم وعليه خطوره
اني وكاعده وياهم رجعت ذاكرتي الذكريات ماكدر اوصفها ولا اوصف شعورها وماعرف ليش اجتي بالي بهاي الدقيقه وهنَ يسولفن عن ايام زمان والحُب قبل وهسه

جان الجو حار بوقتها والهوى سموم قاتله صيف العراق اكيد يكون
حار جنت هستوني طالعه من الحمام بوقتها جنت متأكده شُعاع مو هنا بهذا الوقت بعدنا ما متزوجين جنت متأكده منه طالع الهذا ماخذه راحتي بوقت طلعونا من الموصل البغداد
هستوني خطيت خطوه اريد ادخل للغرفه جان ينفتح الباب ويدخلون شُعاع جان عركان وشعره نازل ع جبينه جان لابس نص ردن جان التيشيرت الاسود محتضن اكتافه العريضه السمره ، سماره الحلو وقطرات العرق الي تنزل عبر مسام وجهة من شافني كدامه انتبهت عليه ابتلع ريقه حتى تفاحه ادم نزلت وصعدت دلاله ع ابتلاع ريقه
ونظراته جانت متركزه عليه حسيت يريد يبعد عيونه عني بس مايكدر
اني اتوترت وماعرف وين انطي وجهي كُلها لحظات بس هاي الحظات اشبه بنسمه الهوى الي دخلت كلبي وكركبته بثواني
كأن عاصفه هبت عليه وتركتني بعدها مبعثره اوراقي سحبت المنشفه اغطي بيها رقبتي واخفي توتري داخلها بسُرعه نزل عيونه عني وهو يمسح القطرات الي نزلت منه بكُثره

- شُعاع :- يا بنت الحلال ماكدر اصبر نفسي واغض البصر أكثر
اذا رايده نفسج وتخافين الله بيه روحي منا بسرعه وقفلي الباب ع روحج لا هسه ابتلي بنفسي واسوي كارثه هنا لا صايره ولا دايره
روحي بابا واستري علينا بهذا اليل

اني بوقتها من سمعت كلامه طفرت طفره احس كلبي راد يطلع مني خفت بوقتها من كلامه وصرت مثل البيب بيب دخلت للغرفه وسديت الباب اسمعه من ورى الباب يستغفر الله بصوت عالي
اني ماعرف شبيه احس اريد اوكع من الخجل قفلت الباب وركضت للمرايا اباوع ع وجهي خدودي وردن من الخجل الموقف جان يخجل
وبنفس الوقت خله الشعور بداخلي يتحرك من بعد حروب طاحنة
عشتها .

فزيت ع صوت ام احمد تسألني ورجعتني الواقعي

- نارا :- ها خاله شنو كلتي ؟
- ام احمد :- اكول يمه سألتج ليش ما صار عندكم أطفال
- نارا :- والله يا خاله لا مني السبب ولا منه بس بعد الله ما كاتب النا
- ام احمد :- رزق يمه رزق كُل هذا رزق من الكريم ماتعرفين ع ساعه يخلي هل طفل ينبت برحمج وينور حياتكم بوجوده وقتها تعرفون االكُل زرق موعد
- نارا :- ماتعرفين شكد اتمنى هذا الطفل

- ام احمد :- اسمعيني يمه الله سبحانه وتعالى ذكر بكتابه العزيز
(وَتِلْكَ الأَيَّامُ نُدَاوِلُهَا بَيْنَ النَّاس)
اي يعني ماكو شي يدوم لا شيء يدوم ، لا الفرح ولا الحزن.
فإن كُنت في فرح فإستشعره بكل جوارحك طالما زارك ، وإن كُنت في حُزن وهمّ فاصبر فلا هم يبقى ولا عسر مع يُسرين
النبي موسى ( عليه السلام ) كأن راعيا لسنوات طويله منو كان متخيل يكون هو كليم الله !!!
النبي محمد ( صلى الله عليه وآله وسلم ) كأن راعي الغنم منو متخيل انُ يكون هو بعد سنين خاتم الأنبياء والمرسلين ؟؟
كُل شي بالحياه يصير الا ما الله بعدين يعوض لكن يحتاج الصبر
خليها بالج ماما أعظم شي بالحياه هو الصبر وانتظار الفرج

- نارا :- كلامها دخل البهجة الكلبي وخلاني اعيش من جديد
نسمات الهوى الي بصحن الإمام نفسها احس هسه عشتها من جديد واستنشقتها روحي صارت ترفرف بكلامها ماتحملت كمت وبستها من راسها وهي مبتسمه الي ابتسامه حيل حلوه
قضيت اليوم وياها ويا البنات جان يوم لطيف وحيل حلو

مر الوقت وشُعاع دخل للبيت تقرب مني يتعذر
- شُعاع :- عذريني حبيبي ماطلعتج بس جنت مشغول
- نارا :- لا عُمري ماصار شي عادي ، عادي طلعني باليل
- شُعاع :- اطلعج اليوم باليل ؟
- نارا :- اي شكو بيها ، اني جنت خايفه صحيح بس ردت اكول هيج حتى اشوف رده فعله وحسيته انصدم بكلامي بس هل مره اريد اشوف شنو الي يصير تعبت واني اتخيل براسي تخيلات لا صارت ولا دارت اريد اشوف شنو الي جاي يصير
- شُعاع :- اي ان شاء الله
- نارا :- يعني نطلع
- شُعاع :- اي بابا

ماحجت حتى ما يغير رأيه رحت سريع لبيت وطلعت ويا جنت بالسياره فجأة طلع الي عصير ومد ايده الي
- شُعاع :- هاج اشربي عصير
- نارا :- صفنت بوجهة ماعرف ليش حسيت اكو بالعصير شي مخدر ، هل مره راح احاول ما انام اذا فعلا بي منوم معناها اكو شي
جاي يصير هزيت راسي بنفي ، لا ما اريد
- شُعاع :- اشربي شبيج كلش طيب هذا من غير مكان وهذا مالتي شربته كلش طيب
- نارا :- بقى يلح ع العصير حتى اشربه كلت خلي اكول اله راسي يوجعني وماكدر اشرب بلكت يقتنع ، حبيبي راسي يأذيني ماكدر اشرب
- شُعاع :- اي ليش ماكلتي اني جايب وياي حبوب
- نارا :- حسيت ريقي نشف ، هاا لا ما اريد يعني عادي بس ارجع وانام اصير زينه
- شُعاع :- لا بابا هاي الحبوب اخذي منها
- نارا :- طلع الي شريط بس يختلف مو مثل الي نشربه والحبه مالته ناعمه وقربها مني حتى أخذها ، شُعاع اشو هاي تختلف
- شُعاع :- اي هي نوعيات وهاي نوعيه جديده
- نارا :- لا ما اريد أخذها
- شُعاع :- اخذيها اشربيها

هزيت راسي وهمست اله واني مشاعري متضاربه
وبداخلي براكين ثائره

- نارا :- شُعاع شبيك ؟؟؟ غريب رده حيل غريب
- شُعاع :- اسمعي هاي
شلون يريد لعبك؟
العب عليهم
سويهم جكـارة اشربهم وارتـاح
وماعلمك !
تعرف شلون تطفيهم .

كلامه دوخني وخلاني بدوامه جبيره أفكاري اتضاربت
وانفاسي انكتمت
جان اصراره حيل قوي ع العصير ومره ع الحبوب هاي الي ع اساس مُسكن قرب بطل المي مني سحب الحبه منه بس شنو احس كلبي صار يدك بقوه وخليت الحبه بحلكي ومن دون ما يحس خليتها جوه
الساني وشربت المي وهو عينه عليه يباوع شلون اشربها وقتها
عرفت هاي منوم وعرفت هاي اليومين جان ينطينا منوم الي والبيت ابو احمد كلبي حسيته راد يطلع من صدري شويه وسويت نفسي تعبانه خليت راسي ع الكشن مال السياره ومثلت النوم
حسيت بي ورى شويه تقرب مني يحجي وياي بس اني مسويه نفسي نايم ماريد يحس بيه اني كاعده شغل السياره ومشى بقى يمشي شوي شوي إلى أن توقفت السياره كل هاي واني احس كلبي راح يوكف كثر ما يدك بقوه الحبه احسها صارت تموع بحلكي
خفت لا تأثر عليه وتخليني فعلا أنام وما اكدر اعرف اي شي توقفت السياره وحسيت حط ايده ع جبيني شويه وبعد ايده عني حركتي ع كيف وهمس بأسمي شافني ماصحيت بعد عني حسيت باب السياره انفتح ورجع انسد دلاله ع انُ هو نزل من السياره
فتحت عيني ع كيفي شفته ماكو سريع فتحت حلكي وتفلت الحبه جوه يم رجليه وغسلت حلكي حتى ما يأثر عليه الي ماع من الحبه

كلبي صار مثل الدمام وينه وين اختفى ياربي لا تفجعني
بي السياره همزين مُظلله يعني ما يشوفني من برى اكدر اني الي اشوف يارب ما اريد اشوف شُعاع بالمنظر الي بالي رجعت غمضت عيوني بسرعه من حسيت فتح الباب الي ورى وسحب ماعرف شنو
صارت حركه استمرت لمده دقايق قليله بعدها سد الباب
اختفت الحركه فتحت عيوني ع كيف ماكو اختفى !!!

فتحت عيني بصدمه واني اشوفه كدامي جان شكله يخوف والي بين اديه يخوف أكثر صرت ارجف بطني صارت تأذيني ، راح يذبحني يمه راح يذبحني ماحسيت الا انفتح الباب السياره جمدت بمكاني
من الخوف ساعدني يا الله ساعدني هذا مو شُعاع !!!!

والجَرح بيه بقى لو بيك ماعّفته بس
هيه رحلّه عَمر وكُلشي انتهى بوكُته
قصَه وطُواها الزمِن رحلّه انتهتَ وبثمنَ
وبينَ چَبير الفرق ويَن انهَ ويَن انتِ؟
يتبع ✨️

اصدموني بسُرعه شنو التوقعااااااااات .

.