الربتج " حالك الاسوداد " الفصل الثامن وأربعون 48 - بقلم رهف علي

من أنت كيف طلعت في
دنـياي ما أبصرت فيا
فـي مقلتيك أرى الحياة
تـفيض يـنبوعا سخيا
وأرى الـوجـود تـلفتا
سـمحا وإيـماء شـهيا
ألـممت أحـلام الصبا
وخـلعت أكـرمها عليا
مـهلا فـداك الـوهم لا
تـرمي بـمئزرك الثريّا
أنا في جديب العمر أنثر
مـا تـبقى فـي يـديّا
عودي إلى دنياك واجني
زهـرها غـضا زكـيا
يـكفيك مني أن تكوني
فـي فـمي لـحنا شجيّا

أتَبكي من فرط ما فيك !
تَبكي وهُنالك رب يمحي كُل ذكرى تؤذيك ؟
أتدري ما انتَ بقوه عند ربك
أتدري ما انتَ عليه ؟
عندما تبكي أنثى قال الله تعالى لها "ولا تخافي ولا تحزني"
لا تخافي ان الله معك لا تحزني ان الله معك
بل قولي
وجّهتُ وجهي نحوَ بابِك راجيًا
والحالُ لا يخفى وأنتَ عليمُ .

شعور الخوف بهاي اللحظه اتعدى مرحلة الخطر بحد ذاتها
اباوع عليه من ورى الجامة مال السياره جان لابس اسود من فوك للجوة
وحتى وجهة مامبين للحظه وحده اتوقعت هذا مو شُعاع بس من خلال
هيئه جسمة عرفة هذا هوَ جسمي صار يرجف والزاد رجفتي أكثر هو الي بين ايدة !!!!! شهكت وبسُرعه خليت ايدي ع حلكي حتى ما
يحس بيه ولا يسمع صوتي جان شايل بين أدية جسم بشر !!!
يعني الي جان شايل شخص وماعرف اذا هذا الشخص عايش او لا !

نسيت انُ هذا شُعاع نسيت انُ هو هذا الشخص يكون زوجي
كُل الي فكرت بي بهاي الثواني القليله المحدودة هوَ اني راح اكون مثل الي بين ادية وخاصه اذا عرف بيه اني كاعده وشفت هو شنو
ديسوي !!! انخطف لوني وهناااااك وين رجعت بيه الذاكرة
لليوم الي التقيت بي واني ع وشك الموت

- عايششة ، منو انتِ ؟؟
- منو انتَ ؟
- بدون اسألة
- ملثم منو وخر مني
- جججججء بلا حركة
-شبيك وجعتنيييي عوفني وين ماخذني
- اشششششش بدون صوت
- مثلهم انتَ مثلهم
- اي مثلهم
- مرض المرضك
- انجبي لج

حطهم بالسياره جثث هامدة ورجع صعد
- شسووووويت ؟؟؟
- ميخصج تريدين تعيشين ما تسألين ولا سؤال

- شنو أسمج ؟
بقيت صافنه بوجهة رجع سألني
- شنو اسمج ؟
مارديت عليه اباوع مد ايده من جوه
الكرسي مال السياره وطلع من جوه
شي رفعه بوجهي
هذا واير بس الواضح ينتل لان يريد يخوفني بي
رجع حجه بهدوء وعيونه بعيوني
- هاا ؟؟؟
ردت اكول ميخصك بس خلي استر ع نفسي ،
من خوفي والألم الي احس بي ينهش بلحمي نهش رصيت ع اسناني وعقدت حواجبي بألم
جاوبته
- قندرة
ضحك بصوت عالي ورد عليه .
- عاشت الاسامي قندرتي
- وين ماخذني !!!
- الجهنم

صحيت من موجة أفكاري العاتية الهزيلة واني اشوفه يمشي باتجاه السياره احس الموقف اتكرر مرة ثانية وياي لا يا الله يعني هسه
هو هم سوه نفس قبل وقتلهم يعني صحيح جان ينطينه منوم وهو الي سوه بهذولاك وقتلهم يعني متخفي باليل شكل وبالنهار شكل ثاني شُعاع " جاسوس " ؟ " قاتل متسلل " ؟ " عميل " ؟
شنو راح اتخبل !!!! يارب شنو ساعدني

من وصل للسياره اني سريع رجعت سويت نفسي نايمة بنفس الحركة الي جنت عليها حتى ما يحس بيه اني كعدت ولا تحركت
حسيت انفتح الباب مال السياره الورى شويه وحسيت بحركة السياره اثر هذا الشخص يدُل انُ حطة بالسياره رجع سد الباب
فتحت شويه من عيوني شفته اجه صعد اني رجعت غمضت عيوني
هو شغل السياره وحركها اني حتى خفت منه وهو بهاي الحاله
كلبي يريد يطلع وماكدر امثل أكثر بس بنفس الوقت ما اريد
يعرف اني كاعده مشت السياره مسافه ماعرف شكد حتى احس عركت وتكركب وضعي النفس بالموت صرت أسحبة
ورى فتره اتوقفت السياره ونزل فتح الباب الورى وسحب هذا الشخص الي جان موجود وماعرف وين آخذة

فتحت عيوني اباوع بس ما لكيت الهم اثر همَ الاثنين والمكان
الي احنه بي ما أعرف وين بالضبط صرت ادور براسي يعني لو ما العقل الي براسي جان هسه فتحت الباب السياره وانهزمت بس اعرف بي مخبل يلكاني لو جنت بسابع ارض ويلعب بيه دعبل مو طوبه

ورى فتره رجع صعد للسياره ومشى بسُرعه بس ماكو ويا اي واحد ماعرف وين شمره !!! اني بقيت ساكته إلى أن وصلنا للبيت
طفى السياره وتقرب مني يهزني ويردد اسمي ع كيف شكلة يريد يصحيني اني سويت نفسي بالكوه افتح عيني واسدها هو نزلني كال وصلنا بس اني عود فد مره منتهية من النعاس حتى ما يشك بيه
، بقى ساكت وسندني دخلني للبيت اول مادخلت للغرفه بوجهي للفراش حتى ما حجيت ويا اي شي ولا فتحت الموضوع ويا
ما اريد احجي بي شُعاع صار يخوفني بهذا تصرفه كُلش بقيت هواي افكر افكار تراودني هو يمي نايم هاااادئ ماعرف ليش حسيت بي كاعد ، بقيت هيج الا ان دخت ونمت .

ثاني يوم الصبح كعدت من النوم شفته كدامي اجه تقرب مني راد يبوسني اني دفعته من كتفه

- شُعاع :- شبيج ياروحي ؟
- نارا :- بس شويه ما الي خُلك ، هو ما اهتم رجع تقرب مني ويريد يبوسني دفعته هل مره اقوه ، وووخر
- شُعاع :- ها خير شكو
- نارا :- هاا لا ماكو شي بس مو كلت لك ما الي خُلك شويه

ابتعد مسافه عني افتر بالغرفه ورجع كعد كدامي مسح ع ذقنه
وعيونه عليه يباوع بعدها ضحك وهو يهز براسه اني ماعرف احس انضرب بعقلي خفت منه عض شفته وحجه وياي بهدوء وهو الابتسامه مزينه ثغره

- شُعاع :- ترى اعرف بيج
- نارا :- شنو تعرف مافهمت ؟
- شُعاع :- حبيبي اعرف بيج البارحه بالسياره انتِ ما نايمه وشفتي كل شي
- نارا :- فتحت عيوني مصدومه ، ششنو شتحجي انتَ متوهم اني البارحه نمت بالسياره ،
اتقرب مني سحب الخصله الي واكعه ع عيوني ورجعها ورى اذني
- شُعاع :- ماتمشي عليه هاي السوالف انتِ مرتي وحافظج حفظ حتى ملامح وجهج حافظها كل واحد يدل ع شنو
- نارا :- شُعاع شبيك ، احجي واني مرتبكه ودكات كلبي صرت اسمعها
- شُعاع :- انا اكول الج شلون
- نارا :- ش..شلون !
- شُعاع :- الحبه الي انطيتها الج شامرتهة ع الدواسه يم رجليلج وهذا غباء منج انُ تشمريها بهذا المكان اضاف الهذا الشي من بعيد تبين ملامح وجهج وحتى جنتي عركانه ، رموش عيونج جانت مو ثابته
وكأن تحاولين تتماسكين وما تفتحين عيونج ، حافظج انا بابا حافظج

اجه كلبي يوكف يعني جان يعرف بيه اني كاعده بس بنفس الوقت
ما بين انُ هو يعرف ابتلعت ريقي بخوف صحت بي من التوتر

- نارا :- شلوووون تسوي هيج شششلون اني شفتك ، حط ايده ع حلكي وعاط بيه بصوت مكتوم وهو كاز ع اسنانه
- شُعاع :- اششششش صوووتج
- نارا :- هزيت راسي و هو بعده مخلي ايده عيوني أنملت بالدموع
- شُعاع :- هذول وحوش مو بشر وحوش
- نارا :- ما ابتعد عني عيونه بعيوني وهو يحجي
- شُعاع :- هذول نفسهم الي دمرونا نفسهم ماطلعوا نارا همَ هذول الوحوش الي يريدون يستعمرون ويدخلون من جديد نفسهم الي يريدون يرجعون هذا البلد خراب نفسهم الي قتلوا شبابنا وهجروا عوائلنا وسبوا بناتنا واغتصبوهن يستحقون هذا الشي يستحقون هذا جزاء الاعمالهم السيئه ماسويت شي غلط الي سويته هو الصح

سحبت ايده مني وهو ابتعد عني دموعي الوحدهن نزلن ما اتحملت
هوَ انطاني ظهره وصار يفتر بالغرفه يروح ويرجع بس ليش ابجي اني ؟؟؟ مو هوَ هذا الي يستاهلوا اي اكيد يستاهلوا بس اني ما ابجي عليهم ابجي من شنو ماعرف من خوفي لو شنو بالضبط !

بغداد ، الموصل ، اهلي ، اسراء ، ابو نوح ، ابو عصام ، السبايا ، الأطفال ، النساء ، الكبار في السن ، الضحايا ، الأسرى، القتله ، الانفجارات، الطلق ، الهروب ، الحرمان ، الخوف ، القلق ، البيع ،الشراء ، الرحمة ، الحرية ، التحرير ، الانتصار .
كُلهن مرن مثل الشريط أمام عيوني من لحظه دخولي للموصل الي لحظه اعلان بيان الانتصار كُل هذول مرن ع بالي واني اطالع بالمنظر من الشباك سرحت بمُخيلتي وذكرياتي السيئه الي ما يتعالجن لو مر دهر مستمرات وياي وما ينمحن

فزت ع صوت شُعاع وهو واكف ورايه ومكتف اديه

- شُعاع :- ثَمن عمري بعَطايا الروح

مسحت الدموع الي نازله ع خدودي واني ما اعرف شوكت نزلن
هزيت راسي اله بمعنى مافهمت
- نارا :- شنو ؟
- شُعاع :- الساعه ٧ الصبح وانتِ مو نايمة
- نارا :- همهمت كــ رد اله
- شُعاع :- لازم نطلع للبصره
- نارا :- سحبت شعري للجهة الثانية ورديت عليه ، شوكت كعدت ؟
- شُعاع :- بالوقت الي جنتي تفكرين بي انُ اني مجرم
- نارا :- نزلت راسي هو كمل
- شُعاع :- بالوقت الي شكيتي بولفج
- نارا :- رفعت راسي اباوع عليه هزيت بنفي ، ماتفهمني ماشكيت ، هو ابتسم رد

- شُعاع :-
بعد عُكَبيش ؟
بعد ما مرمرت روحي
بعد ما كثرن جروحي !

نزلت راسي ماعرف شلون أفهمه واحس بنفسي اتسرعت وحكمت عليه احس طعنته بظهره، هو تقرب مني رفع راسي بأصبعه قشعريرة صابت جسمي ورجفت

- شُعاع :- لا ادنكين راسج وانتِ مرة شُعاع
- نارا :- صفنت بعيونه الشمس عاكسه ع لون عيونه النرجسية ودائر البؤبؤ مثل البُن القهوة ، ارموشه الكثيفه وحجابه المطبور شوي أثر ضربه عقد حاجبه لان شافني صافنه وما رديت عليه
- شُعاع :- شبيج ؟ صفنتي! بيه شي اني ؟
- نارا :- بدون ما ارد عليه ارتميت بحضنه وطوقت رقبته بأدية
ودفنت راسي بي سحبت نفس وهمست اله ، اني مو قليله كرامة اكدر اتركك بأي لحظه وأكدر حتى اعيش الوحدي وما اعتمد ع اي احد حتى عليك ، بيوم الي عرفت بأبوك شنو سوه بأهلي وبيوم زواجنا الي متوقع احد متقرب مني وهواي اجتي ايام اكدر اتركك بيهن لان عندي السبب القوي الي يخليني اتركك بسس !!
- شُعاع :- بس شنو ؟
- نارا :- بس محد يعرف لوعة الوحده شنو محد يعرف لوعة الحُب شنو بس الي مجرب هذا الاحساس راح يحس بيه وبكلامي هذا
صح لحم بني آدم ثكَيل بس بنفس الوقت ما اكدر افارقك، هو ضحك وحضني الداخل صدره بكُل قوته

- شُعاع :- كل شي صار مو بأرادتي لا ابويه الي صار صار ولا بيوم العرس مع العلم انا ماسويت اي شي الج وحتى الطفل الي ع اساس ابني وهو مو ابني وهاي القصه طويله تتوقعين اخون الامانه واخون روحي الي هيَ انتِ ؟ شبيه تخبلت الا اذا انضرب بعقلي وهم ما اسويها وسالفه العرس ارجع اكول الج مو الي بالج بس احنه طلعنا من مكان تعرفين شنو بي وبوقتهاا ما اثق حتى بخيالي احسه راح يغدر بيه شلون تريديني افكر رغم كل هذا اني بقيت وعذرتج وكلت يمكن اأذوها وردت اخذ حقج يلا ارجع الج معقوله تفكرين بيه السوء ، شبيج بابا راسج مدوحس

- نارا :- ابتعدت عنه ، اني راسي مدوحس ؟؟؟
- شُعاع :- اكبر راس مدوحس هو راسج
- نارا :- ضربته بقوه ع كتفه هو صاح بس شنو اني طنكرت
- شُعاع :- طنكرت يا امه الإسلام طنكر بعد شيفكة
- نارا :- شقصدك اني حيوان واطنكررررر !!!
- شُعاع :- حشاج حبيبي منه
- نارا :- شقصدك هااا احجي شقصدك
- شُعاع :- لزمي نفسك ولا تنكدين عليه بروح غاليج
- نارا :- يعني اني صرت انكد عليك شُعاع؟؟
- شُعاع :- شدوووو روسكم ياكرعاااان
- نارا :- ششششششششُعاع
- شُعاع :- ههههههه ياروحه
- نارا :- اني اطنكر ونكديه
- شُعاع :- منو كال هيج ؟
- نارا :- انتَ
- شُعاع :- اني ؟
- نارا :- ااااااااي شبيك
- شُعاع :- شوكت
- نارا :- هسسه
- شُعاع :- جاية تتبلين عليه شوكت كلت
- نارا :- ششششششششُعاع والله راح اضربك
- شُعاع :- يابه دروحي

وكف عني وابتعد واني صرت خبله وصدُك طنكرت افتر ورى وادغه بخصره وهو يتخبل ولا اسوي هاي الحركه يضوج منها لان ازرفه زرف بيها اخر شي ما تحملت ودغيته بقوه هوَ عاط وطفر النهاية الغرفه لازم خاصرته يصيح عليه

- شُعاع :- خبلة ومحمد اكو وحده هيج تسوي
- نارا :- رفعت ايدي ، ليش هيج وياي انتَ
- شُعاع :- دخيلك ربي شسويت
- نارا :- صاير ولا تحبني ، ضرب جبينه
- شُعاع :- لا يا الله مو وقت النكد
- نارا :- نترت بزعل ، ششششُعاع
- شُعاع :- انعل ابو النكد عمي انا رجال نكدي شجابج ع النكد
- نارا :- وتحاول تاخذني ع كد عقلي ؟؟ فتح عينه مصدوم
- شُعاع :- كولي والله جاي تشاقين
- نارا :- هااااا شبيك هيج مفتح عيونك شايف كدامك وحده مخبله ؟

- شُعاع :- وين نارا ليش متحوله هيج شني انا انطيتج منوم
لو حبوب تحويل
- نارا :- اااااااي فوكاها يعترف منطيني منوووم
- شُعاع :- يارب استرنااااا يارب استرناااا
- نارا :- الـــ تنستر وانتَ ما تنستر

هو اني حجيت هيج وجفصتها كدامه لو هو الي تحول بمكاني
صار مثل الكنغر طفر عليه طفر بثانيه ماحسيت بي الا صار كدامي
شهكت بصدمه رجعت للورى وهو سحبني بقوه اله شكله مصدوم من كلامي لزم أذني وسحبها بقوه عليه يبوووو روحي فرفحت
لزمت وضربته بقوه ع رجله بس ماتركني صرت مثل القرد انكز بين
ادية وأهمش بس اريد يتركني وماكو ايده مثل السم يسحب بيها اذني ونزل عليه فد نزله ماتستحين وماعندج خجل ويجر بأذني مثل الاطفال يعاقبني واني بس اريد اندل طريقي حتى انهزم منه
اخر شي ما تحملت وماعرف شلون طلع مني هذا التصرف
رفعت رجلي وبقوه رجلي ضربته ع المنطقة الحساسه اني ردت اضربه ع رجله بس تصويبي مو عدل صوبت المكان الغلط وما اشوف الا ابتعد عني مفرفحه روحه اني جمدت بمكاني وهو يفرفحه مثل الطير المذبوح

خليت ايدي ع حلكي مصدومه من فعلتي ماعرف شنو اسوي اله
حتى يخف الألم او اساعده يفتر مثل المصراع بالغرفه واني افتر
ورى ، المشكله افتر ورى اي غير انهزم منه لان هسه يسويني وصل بس اني بقيت ويا وافتر ورى احاول اساعده

- نارا :- عزززززززه بعيني عززززززه شو شُعاع شصار ،
رد عليه بعصبيه وهو روحه رايحه
- شُعاع :- وووووخر من وجههههي
- نارا :- صخام الصخمني يبووووو راح الرجال شو خلي اشوف
- شُعاع :- شتشووووفين شششنووووو ، ووووخري
- نارا :- لك بس خليني اساعدك ، هو حار بألمة وبكلامي
- شُعاع :- تكوووولين لك الي ؟؟؟ الي أشعل الغالي ع الغالي
اليوم احرك شيب الخلفوهم
- نارا :- افتر ورى واسأله مثل الهبله ، منو همَ ، رد بنتر
- شُعاع :- ششششيب الخلفوج
- نارا :- ياااا عززززه ما اسمح لك
- شُعاع :- لج بسيطه اذا ما امسح بيج الكاع اصبريلي
- نارا :- ياااا شايفني وصله مسح روح روح صوجي اساعدك
- شُعاع :- ياااااا أمة الاسلاااااام طيري من وجججهي لا ابتلي بيج
- نارا :- ضربته بخفة ع كتفه ، صوجي قلقانه عليك والله يا الله

ابتعدت عنه وهو بقى هيج إلى أن هدأت روحه بس شنو من صدُك احس الضربه اجت بي بقوه اووي خطية سحب نفس بقوه ورفع راسه خزرني واني رديت عليه بنظرات زعلانه احاول اطلع من الموضوع وانفذ بريشاتي احس ما يهلسهن الي عاط بيه

- شُعاع :- فووووووك هذا هي الي مو راضيييية
- نارا :- اي شأسوي لك اريد اساعدك وما تقبل
- شُعاع :- اي مدام شلون ناويه تساعديني
- نارا :- اي غير بالأول اشوف حتى اقدر مدى الأضرار
- شُعاع :- بأستنكار ، شنو تشوفين
- نارا :- رديت بعدم فهم وناسيه نفسي والمكان ، مكان الاصابه
- شُعاع :- وانتِ تعرفين وين ضربتيني
- نارا :- عقدت حاجبي ، اي قابل وين ، هناااا يلا ركزت بكلامي وتصرفي الغبيه وكلامي الاغبه بلعت الساني وسكتت هو نتر بيه
- شُعاع :- بشيييب الخلفوج
- نارا :- ااااااي شبيك تصيح يعني عادي واذا
- شُعاع :- شنو واذا لج غبيه انتِ شلون راح تصيرين دكتوره ماعرف
- نارا :- اوووف شعليه ، مسح ع وجهة ونتر
- شُعاع :- جان روحتي مستقبلنا بتصرفج الغبي

- نارا :- شلون ؟؟؟؟ صفن بوجهي يباوع بعيوني كأن يكول والج عين تسألين صفنت اني وبهاي الصفنه أدركت فداحه فعلتي
شهكت وهو هز ايده
- شُعاع :- استغفر الله ويكلك الزواج سفردح خلي يجي يشوفون كضيته بس استغفار راح ادخل الجنه بسبب هذا الزواج رغم افعالي الطايح حظها الي ما تشفع الي
- نارا :- اي ع الاقل استفاديت مني ، وتستغفر
- شُعاع :- اي بويه من حسن حظي صرتي من نصيبي
- نارا :- لازم ما عاجبك
- شُعاع :- عاجبني ونص
- نارا :- عبالي
- شُعاع :- لا تبلبلين احسن

- نارا :- تعال أسألك شنو هاي الأفعال الطايح حظهن الي مسويهن بحياتك وماتشفع لك اعترف
- شُعاع :- ليش ما تدرين ياهنَ ؟
- نارا :- لا شنو هنَ احجيلي
- شُعاع :- من لكيتج حبيبي كلت تشفع الي بس طلعت اضرب
- نارا :- فتحت عيني ، شقصدك
- شُعاع :- وجودج حبيبي هو أكبر بلوه
- نارا :- زعلت والله زعلت روح بعد ما احجي وياك اني صرت هيج

مشيت ردت اطلع وهو ضحك بصوت عالي حضني من ورى يبوس بيه ويضحك واني قفلت قفله ما قفلتها من قبل وهو يريد يبوس يتوسل ويتشاقه وياي وماكو معنده وقافله

- شُعاع :- هسه المفروض انتِ الي تراضيني مو انا اراضيج
- نارا :- لاااا انتَ الي لازم تراضيني و تعتذر مني
- شُعاع :- **** احسن هم ينزل وهم يدبج ع السطح اتجاوزتي وضربتي وتريدين مني فوك كل هذا انا الي اعتذر
- نارا :- ضربته ع حلكه ، عييييب تلفظ هيج ألفاظ سوقيه
- شُعاع :- بعد علميني العيب
- نارا :- اي اعلمك شكو بيها
- شُعاع :- أصغر جهالج حتى تعلميني لا تخليني هسه اعلكج بالمروحه
- نارا :- جرب حتى اني ارجعها ، حجه مصدوم
- شُعاع :- شترجعين لج ؟؟؟؟؟؟؟؟؟
- نارا :- هااا ولا شي
- شُعاع :- لاااا احجي احجي
- نارا :- مو اخاف عيب ؟؟
- شُعاع :- لا خاتون احجي ياعيب هذا احجي

- نارا :- تقربت منه وهمست بأذنه Your mother's belly ، هو طكك عيونه ع سوعهن عاط بيه

- شُعاع :- لاااااا ناوووويه اليوم ع سحلتج
- نارا :- شعليييية انتَ اصريت تعرف
- شُعاع :- وتحجيهااا بعد الج عين
- نارا :- غير انتَ اصريت عليه معليه اني معليه ، سحبني ودفعني ع الحايط حسيت ظهري انقسم وهو ضغط بجسمه ع جسمي اتقرب من وجهي واني ماعرف شبيه سنحت مثل الغبيه
باسني بخفة من شفايفي شويه وماحسيت بي الا سحب الساني وعضني بقوه
خلاني افرفح حتى بجيت ودموعي نزلن حسيت اللسان
انقلع من مكانه ابتعد عني يضحك واني ابجي ودموعي ولا وكفن
خليت ايدي ع حلكي وهو مستمر يضحك غمز
- شُعاع :- هذا عقاب بسيط الج المره الجاية الج غير عقاب

بقيت ساكته ماحجيت لان أني هم زودتها وهواي جفصت
واذا بعد احجي راح اجفص أكثر الهذا سكتت
- شُعاع :- جهز نفسك ياحلو حتى نطلع
- نارا :- هزيت اله براسي وهو مستمر يضحك اني اعلمك الا اخليك ما تندل دربك طلعته من الغرفه واني جنت جايبه وياي فستان كُلش حلو ينطلع بي مو مال حفلات ، وكعب بس مو عالي فد مره
خليت مكياج خفيف ولفيت الشال لفه حلوه خليت عطر ترست نفسي ترس بالعطر اباوع ع نفسي كُلش طلعت حلوه والحلقه مالتي تلمع بأيدي لمع ورى شويه انفتح الباب ودخل شُعاع بقى واكف مصدوم يباوع عليه ما جان متوقع مني هيج حتى وجهة فلت اني لزمتني الضحكه بس ما بينت بس ابتسمت بوجهة
هوو دخل وسد الباب يصوفر ع كيف مثل هذول السرسريه

- شُعاع :- شنو ياحلو اليوم ناوي عليه تريد تجلطني
- نارا :- رديت بدلع ، مُشكلتك مو مُشكلتي
- شُعاع :- اوووويلي أنوب تدلع عليه
- نارا :- ههههههههاي
- شُعاع :- اششتعلووووووا
- نارا :- منو همَ حبيبي
- شُعاع :- معليج بيهم خليج وياي ياروحي
- نارا :- ابتعد عنه ، نووو ياحلوا لا يخرب الوك مالتي
- شُعاع :- بسيطه تحتاجيني

- نارا :- بعدت عنه وطلعت وهو راح يبدل شويه وطلع اني جنت واكفه اله انتظره من شفته صار كدامي بقيت فاتحه حلكي الاناقه
والجمال الي هوَ بي والملابس المرتبه ارتب من حياتي وكف كدامي
مبتسم واضح مبين ع شكلي ملامح الإعجاب هز راسه
- شُعاع :- ابوس اعجابك هذا
- نارا :- رديت بغرور ماتوصل الجمالي
- شُعاع :- اي اي اكيد انا وين وانتَ وين ياحلو

اتقرب مني باسني بخطف ولزم ايدي وطلعنا صارت الحجيه كدامنه
رادوا نكعد نتريك سوه بس شُعاع ماقبل وأصر انُ نطلع
البنات واكفات برى حتى يودعنه بس شنو عينهن ع شُعاع وقتها صدُك حسيت بالغيرة والغيره كُلش قاتله بس هو مارفع عينه عليهن
بالعكس محترمهن والأم جابت بخور وبخرتنا واحنه نضحك تقرب منها شُعاع باسها براسها واني رحت سلمت ع البنات سلمنا عليهم وطلعنا من بعد ما كالوا عيدوها مرة ثانيه .

صعدت بالسياره شغل المحرك وسحب نفس باوع عليه وحرك السياره
ومشى سحب ايدي وباسها
- احبج يُبا
- ابتسمت ، احبك اكثر
جان شعوري حلو وقتها وهو فرحان واني فرحانه الفرحته كُل شويه يسحب اديه من السكان ويطك اصبع واني اضحك إلى أن وصلنا يم مكان
- وين اجينا ؟؟
- حتى نتريك
- قبل لا نطلع من الموصل مو ؟
- اي حبيبي
- تمام

نزلنا بس المشكله ما نزلنا يم المطعم لا نزلنا يم بيت صغير اني امشي ويا بس احس تايهة ماعرف وين ماخذني وليش شويه و وكفنا كدام هذا البيت دك الباب طلعت مرأة كبيره بالعمر من شافته صارت تهلي وترحب بي وحيل فرحانه بي واني مثل الأطرش بالزفه
دخلتنا جوه بالاستقبال صح البيت صغير بس حيل حلو
من دخلنا جان اشوف السفره ممدوده وبيها الريوك جان بيها ما الذ وطاب اني بس امشي ويا شُعاع وماعرف منو هذول ومستغربه اريد بس انفرد بي حتى اسأله ، شويه وطلعن بنات هم كذلك سلمن ع شُعاع بس كُلش محترمات وخلوقات وحتى مستحيات منه
كعدنا سوه وصرنا نتريك سوه بس اني ماكدر اكل بالكوه وخجلانه وهو يجيب ويخلي كدامي وعرفني عليهم والأم حيل طيبه عبالك اني بنتها كعدنا يمهم شويه وطمئن شُعاع عليهم بعدين طلعنا من البيت

صعدنا السياره اني سألته

- نارا :- هذول انتَ هم طلعتهم من المخيمات صحيح ؟ هو ابتسم بهدوء
- شُعاع :- صحيح
- نارا :- زين ليش ما كلت الي ؟ غمز وهو مبتسم
- شُعاع :- لا تدع أي شخص يعلم خطوتك التالية
- نارا :- هههههه تمام لعد راح استخدمها
- شُعاع :- اذا وياي اكسرج تكسر
- نارا :- خبيييث
- شُعاع :- بس تموتين عليه
- نارا :- واثق من نفسك
- شُعاع :- ثقه عمياء .

" البصره تُرحب بكم "

من بعد طريق طويل واخيراً دخلنا للبصره اباوع ع شوارعها اول مره ادخل الها واحس دخلت كلبي شكد فرحت من شفتها جنت اسمع عنها بس هاي اول مره اشوفها صاح شُعاع

- شُعاع :- جوعاااان وطاكني الجوع
- نارا :- والله حتى اني
- شُعاع :- شنو رأيج نروح الكُميل الكـــ***
- نارا :- شنو كُميل !
- شُعاع :- يا يابه مطفية مريتي ، كُميل الي اجوي النا هذاك اليوم البيتنا
- نارا :- ليش هوَ وين
- شُعاع :- هو من البصره بس من اجوي البغداد مروا علينا
- نارا :- عليك الله
- شُعاع :- اي والله ، يلا خلي نروح الهم وانخسرهم قابل بس هوَ السربوت يخسرني

ضحكت بصوت عالي ومشى البيت كُميل الا انُ وصلنا جان البيت كُلش حلو من نزلنا استقبلنا بس ما متفاجئ بجيتنا شكله يعرف يعني شُعاع منطي خبر اني باوعت عليه ورجعت دنكت همست بصوت ناصي

- نارا :- حقير تسوي سوالف من ورايه ، ماحسيت الا اجتني كرصه من خصري راد كلبي يوكف كرصني من دون ماينتبهون
- شُعاع :- سمعتج

- نارا :- كتمت ألمي اصابعه عبالك مثل العقرب ، سلمت ع زوجته ودخلت وياها للمطبخ وشُعاع يم كُميل كعدوه ماعرف شنو عندهم بس زوجته فرفوشه وحبيتها من اول ما اجوي يمنه شفت حتى الغده مسويته وكامل سألتها ، شنو تعرفون بينه راح نجي ؟ هي ضحكت
- زوجج كعد زوجي من صُبح الله وكومه من نومه يكُل اله جايك اريد اخسرك اكل وزوجي ما صدك كعدني ويا
- نارا :- ياااا عزززه شكد عيب
- يااا عيني وين العيب غير احنه أهل
- نارا :- فدوه الج حبيبتي
- يلا ايدج وياي حتى نكعد سوه ناكل
- نارا :- تمام حبيبتي

جهزنه الاكل هو كامل بس ودينا وهمَ هم اجوي أخذوا واتغدينا سوه

- كُميل :- لك شفت قاسم شسووا بي أهل الي يحبها
- شُعاع :- ها خير شنو صار وانا ماعرف
- كُميل :- ال ، اقصد الخوش ولد راح متقدم الها بس ابوها ماقبل ورفض رفض قاطع وهذاك بقى يكمز فوك راسي ماناقص الا يبجي
- شُعاع :- افاااا قويسنا يطلع منه هيج شي
- كُميل :- جا ماشفت شي منه مسوي كلبي هلكبره
- شُعاع :- خلي عليه انا أعلمه من جديد شكله صاير فاهي
- كُميل :- تسوي فضل وتخلصني من نوحه اليل كله زارف راسي يولول ويجر مواويل يخليني يطكني الجفاف وانا بعز شغلي

- نارا :- هم يحجون واحنه صافنين عليهم خطيه سوو مزق واحد منا يجر والثاني يجر منا اباوع ع زوجته هي هم مصدومه خطيه اتصلوا عليه وفتحوا السبيكر كدامنه

- شُعاع :- شو دك ع رقمه وافتح الحاكية
- كُميل :- تدلل خلي نلعب عليه يستاهل بس شنو تفكر بي
- شُعاع :- غمز ، اجيب حبيبته بحضنه
- كُميل :- اعرفك قول وفعل هلا والله خلي اتصل بي
- نارا :- عززه بينهم غمزات وهمسات ويضحكون بس ماعرفت شلون يجيب حبيبته الحضنه اتصلوا عليه وهو خطيه من اول طوط فتح الاتصال

- كُميل :- ها لك وينك
- قاسم :- ووين يعني حال الظيم حالي
- كُميل :- ليش احجيلي
- قاسم :- ع اساس ماتعرف والله انتَ فد واحد ك*** وماكو منك
- كُميل :- هووب يمعود
- قاسم :- رد بقهر ، انتَ شعليك ها الي تحبها يمك خما مثل حالي
- كُميل:- شبي حالك حبي
- قاسم :- بنص القهر وانتَ بنص الدلال هو هذا هم حظي
- شُعاع :- شبي حظك لك سكط
- قاسم :- اااااااااااخ بويه هذا منهو الي يمك
- كُميل :- حبيب كلبك
- قاسم :- اي والله حبيب كلبك لك شعيع
- شُعاع :- ها سكط

- قاسم :- انا بشاربك
- شُعاع :- خير ياطير
- قاسم :- عليك بداعه حبيبه كلبك تجيب الي حبيبه كلبي
- كُميل :- ها راح تدك اليتيمه
- قاسم :- انتَ انجب معليك انا احجي ويا حبيب كلبي
- كُميل :- عار ماتصيرلك جاره
- قاسم :- طالع عليك هسه اسكت انتَ الحجي ويا استاذنا
ذات العقول المدوهن
- شُعاع :- ههههههه احجي اسمعك
- قاسم :- بشاربك انا بعد اخوك وانتَ ابو العقل الجبير الي يخطط ويلطط
- شُعاع :- اختصر لك وبلا صبغ
- قاسم :- ابوس عيونك تفهمني حلها الي بروح ابوك

- شُعاع :- وشنو تنطيني
- قاسم :- مرة
- نارا :- فتحت عيني ع وسعها هو باوع عليه وعاط بي
- شُعاع :- سد حلكك هييي سربوت الارض محظوره
- قاسم :- لا بروح الغالي يعني جفصتها انا
- شُعاع :- مو بس جفصت لا نمت بالجفصه وتلغمطت بيها
- قاسم :- انا اخوووك
- شُعاع :- وجعوووك

- قاسم :- هسه شكلت شعاعنا
- شُعاع :- ابشر
- قاسم :- بروح غاليك تحجي صدك !!
- شُعاع :- هاي مو كلت لك ابشر يعني ابشر من هاي العين
- قاسم :- يعني وتصير الي ؟؟؟
- شُعاع :- ما اتسمى شُعاع اذا ما زوجتك بأيدي
- قاسم :- من نفس البنت الي أريدها ؟
- شُعاع :- والي يحبها كلبك بعد ؟
- قاسم :- خاااااب لو كدامي الا امعطك من شواربك
- شُعاع :- روح بويه روح لا تعلكها
- قاسم :- رايح هههههههه

- نارا :- سد الجهاز بس شنو اني مره احترك بناري ومره اضحك عليهم أنوب يريد ينطي مره يبوووو غير انتحر بي خلصنا الاكل وردنا نروح نبقى بفندق بس كُميل وزوجته ماقبلوا وبقينا يمهم ٤ ايام واحنه بالبصره وما خلونه نروح او نرجع البغداد بس طلعنا وتونسنا بالبصره وشُعاع خلص شغله هو وكُميل بعدها رجعنا البغداد بس ايام كُلش حلوه .

ورى ما رجعنا البغداد اول يوم شُعاع ماراح للشغل بقى بالبيت
وكمل شغله بالبيت جان مخبوص واني كملت تنظيف ماعندي شي
طلع من الغرفه مالته مال شغل واجه عليه اني جنت بالمطبخ

- شُعاع :- اريد اشوفج شي
- نارا :- شنو هوَ ؟
- شُعاع :- البسي حتى نطلع
- نارا :- ليش وين رايحين
- شُعاع :- هسه عوفج من السؤال وامشي خلي نروح
- نارا :- تمام بس البس واجي
- شُعاع :- منتظرج حبيبي

رحت سريع لبست وطلعت لكيته ينتظرني ومشغل السياره صعدت وانطلق بس يحجي بالجهاز ويضحك رجع التفت عليه
- شُعاع :- صديقي اشترا مطعم وراح نروح نبارك اله
- نارا :- اها تمام
بنص الطريق نزل يجيب الي كهوه من المكان الي ردته لان كُلش صارت بخاطري هو نزل بس جان يخابر اباوع اكو سياره واكفه وبيها بنات شويه ونزلت منها وحده وبقت واكفه يم سيارتهن وتباوع ع شُعاع اكلته اكل بنظراتها اني ما اتحملت ونزلت من السياره وحتى بدون عباه رحت يمه ودغيته بقوه هو شافني لو عيونه صارت بكصته
جان بأذنه الجهاز يحجي ماعرف ويا منو عاط بي وسد الجهاز بوجهة
وسحبني رجعني للسياره صعدني حتى الكهوه ما أخذها

- شُعاع :- اششتعلوااااا شنو نزززلج
- نارا :- ااي ماشفتهاااا شلون تباوع عليك ، عاط بيه
- شُعاع :- طاحظج وحظها
- نارا :- معليه معليه غير هي نظراتها لك سززززز

صفن بوجهي سحب نفس بقوه وسكت بقى ماحرك السياره شويه ورفع ايدي وباسها الجامه جانت مفتوحه والبنت بعدها تباوع بكُل عين صلفه شافته من باسني اني احس فراشات صارت ببطني
هيج راضاني وحرك دمها الخفيفه شلون بنات ماعندهن مستحى ولا خجل

بعدها طلعنا للمحل وصلنا ونزلت اني ويا اباوع المحل طافيه الاضواء مالته باوعت عليه

- نارا :- شُعاع عزززه المحل مسدود والباب مغلق ! لزم ايدي وشبكها بأيده
- شُعاع :- كل باب مغلق بحياتج انا افتحه الج

- نارا :- بقيت صافنه بوجهة هو سحبني وفتح الباب ودخل ودخلني ويا فجأة استغلت الاضويه وصار صوت قوي وصوت الطكه وبيها قصاصات مُلونه طكت فوكانه وكُلهم واكفين يصفكون
اني بقيت مصدومه اباوع كُلهم موجودين بيت عيالي وخالتي ام شيت موجودين كُلهم فرحانين بينه التفتت ع شُعاع سألته
هاي شنو ؟؟
- شُعاع :- هذا المحل النا حبيبي
- نارا :- رجعت نظري اباوع اكو شريط احمر كدامي انطاني شُعاع مقص
- شُعاع :- يلا نكص الشريط سوه !
- نارا :- اني ضحكت لزمت ايده الي بيها المقص وكصينا الشريط كُلهم صفكوا وهو باسني من جبيني الموضع جديد عليه واحس الدنيا ماسايعتني اول مره اجرب هذا الشي انُ اقص شريط والمكان مثل هذا المكان الحلو

لزمت ودغيته هو لزم اصبعي كاتم المه بالكوه ويضحك
ضحكت عليه اجوي باركوا النا وكعدنا نحتفل سوه جان المحل مال المعجنات وهيج شي بس كُلش حلو وهذا اليوم انتهى لكن نهاية حلوه بدون اي مشاكل .

مرن يومين كعدت الصبح ع صوت جهاز شُعاع تفاجأت هو معد مستغرب جانت الساعه ٥ الفجر حتى خفت لزمت كلبي
سحب الجهاز وفتح الخط اباوع فتح الحاكية يريد يستوعب واني اسمع ويا

- قاسم :- كعدتك مو ؟؟
- شُعاع :- صاير شي ؟؟
- قاسم :- لا بس يعني انتَ جنت نايم مو ؟
- شُعاع :- لا بس جان نازل حلم جديد ورحت اشوفه
- قاسم :- شنو ؟
- شُعاع :- ابن الخوش ناس مو ابوك رجال فقير ليش تخليني اسبه
- قاسم :- ابوسك وتسكت
- شُعاع :- مو حبيبتك انا حتى اسكت ببوسه
- قاسم :- عوفك من هاي السوالف انا طالع هسه وراح اوصل بغداد
- شُعاع :- اي ؟؟؟
- قاسم :- اليوم اريد نروح الها مو وعدتني وبشاربك تأخذها الي اعرف بيك ما تقصر
- شُعاع :- جاي تشوف الساعه ؟؟؟
- قاسم :- اي اعرف
- شُعاع :- كلتلك العصر ماكتلك الفجر شبيك ملكوف
- قاسم :- وربي انا ملهوف مو ملكوف
- شُعاع :- اصبرلي اشوفك مو ما اشوفك وانعل ساسك
- قاسم :- ميخالف حبيب لعيون الحب كل شي اسوي

- نارا :- شُعاع سد الجهاز بوجهة وشمره يهز بأيده ويدردم عليه
- شُعاع :- اللع بلاني بصحبه خايسه مثلهم
- نارا :- ههههههه خطيه غير انتَ وعدته العصر تروحون البيت العروسه حتى نطلبوها اله
- شُعاع :- اي بس خما هيج من الفجر دخيل الله شيريد انروح من الفجر البيت البنت !
- نارا :- هسه خلي يوصل بالسلامه وروحوا الهم حتى لو من وقت
- شُعاع :- ان شاء الله خلي انام هذا طير ابو النومه

لف راسه ورجع نام بس جهازه ماسكت كل شويه يتصل قاسم
يبووو اخر شي فتح الخط عليه عاط بي وسده بوجهة واني مقهوره بس ع قاسم ميحسون بي روحه لايبه ع الي يحبها وابوها قافل ماينطيها اله وهو ما خله لا شيوخ لا ناس واسطه وحتى طلبها
أكثر من ٤ مرات وابوها معند بس البارحه اتصل بيه شُعاع وكال اله
يجي حتى يروحون يطلبوها العصر ومن الفجر متصل مايكدر يتحمل
خطيه

مر الوقت إلى أن صارت الساعه ٣ الظهر اباوع كُلهم متجمعين
وكاعدين بالاستقبال عابد والشذام وقاسم وكُميل وبعد اكو كم زلمه وياهم كبار بس شنو كُلهم كشخه ولابسين رسمي وملابسهم وهمَ يلمعون لمع خاصه قاسم شمسوي لاعب دقله ع كولتهم
وشُعاع دخل الهم للاستقبال اباوع عليه وعيوني صارن قلوب الحُب
هو طويل ولابس رسمي بدلة سوده والقميص ابيض
البدله محتضنه اكتافه وشعره رافعه مزين جديد عبالك عريس
هو اني شفته ومعت شهل جمال هذا ياربي طالع كشخه ع اخر حبه

كُلهم وكفوا مستعدين حتى يروحون الاهل البنت
اباوع شُعاع مد ايده ع قاسم جان متوتر ربت ع كتفه وابتسم بوجهة
بس ابتسامته حسيتها مليانه ثقه وبنفس الوقت انطى اله أمل

- شُعاع :- ما اطلع رجال وابن أبوي اذا ما اخذتها لك ومن هل شارب اليوم يا انا يا انا وحك الخوه .

الناسُ ناسُ وأنما انتَ كتفُ
الناس ناسُ وأنما أنتَ الصديق المُختلف
يتبع ✨️

بارت واحد يفصلنا عن النهاية شنو توقعاتكم ؟؟
قفله لطيفه اخويه للنهاية
#ملاحظه البارت الاخير راح يتأخر لكن ينزل قبل الامتحانات

.