الربتج " حالك الاسوداد " الفصل السادس وثلاثون 36 - بقلم رهف علي

✨الله مُدَبِّرَ الأموُرِ✨
كفيلة تخليك مطمئن وتوقف سلسلة افكارك.

واكفه بصفه اباوع ع الرساله او بالاصح التهديد الي مكتوب احس حيلي باد من الخوف صرخت خايفه
- شُعاااااااع هااااي شنوووو !!! صاح بيه
- ادددخلي جوه سريع
- ماكدرت اتحرك من مكاني ارتخت رجليه وكعدت ع الارضيه ارجف
هو شافني هيج شمر الطلقه والرساله من اديه واجه عليه سريع
شالني بسرعه ضمني الصدره سريع خليت راسي بصدره خايفه
دخل للصاله كعد ع القنفه وحطني بحضنه يحاول يهديني
- اهدئي بابا ماكو شي شو ارفعي راسج حبيبي

- ي...يمه يمه ، اهلوس بصوت بكلمات متقطعه وارجف صرت اتذكر كُل شي صار وياي قبل وشنو من ايام عشتهن بالموصل
من قريت الي مكتوب رجعت الي كُل ذاكرتي السيئه من استشهاد صديقتي اسراء الأبويه الحد هذا اليوم
سحبني شُعاع الصدره وحط راسي ع كلبه حضني بكُل قوته يطبطب ع ظهري بخفه ويمسح ع راسي يحجي وياي واني فاصله بس ابجي باس راسي حيل

- والله ما اخلي احد يتقرب منج لج بابا اني يمج ما اعوفج
- شنو نسوي عفيه شُعاع
- بابا شبيج جبانه همَ هاي اقوه شي عندهم انتِ من صدك تحجين
مايكدرون الي ولا حتى يكدرون يوصلون الج بطلي رجف ترى عليتي كلبي بهذا الرجف مالتج

- اني سكتت اسمع اله طلع الجهاز من جيبه لكه الشذام يتصل فتح
الخط كال اله فد نص ساعه اجي عليك اسمع صوته من الجهاز رد عليه يكول اله " دعوفها خويه لزكت " رد عليه شُعاع بصوت عالي " ها لك مو اجي احصرك " اني من سمعت الكلام مالتهم ضحكت من شافني اضحك هو باوع عليه يضحك ع ضحكتي سد الجهاز بوجه الشذام وباسني بقوه يضحك رفع ايده حطها ع خدي يحجي وياي

- من فدوه رحت الهاي الضحكه الحلوه ياااابه بروحي اضمج لاتخافين شايفه هاي النسمه الهوى ما اخليها تمر بكذلتج لو جانت تأذيج باوعيلي حبيبي
- صفنت بعينه وهو هم صفن بعيوني ، شُعاع تعرف بعيونك النرجسية احس بيها سوالف أهلنا ، ابتسم بتوسع
- اخ يابه سنابيلي الجميلة جنج نبعه الريحان
- مرر ايده ع تفاصيل وجهي بهدوء
- اسمعيني حبيبي اني ما اعوفج خليها بالج اني دوم وياج وضامج بعيوني احبج أكثر من الحب بنفسه
- ساكته استمع اله بس بداخلي كلامه كأن عاصفه ورد مرت ع يُباس روحي ورجعت سقته من جديد ودبت بي الروح من جديد

- اني اتصلت ع مصطفى قبل لا ردت اطلع وهو راح يجي
- نزلت راسي ، ليش ؟؟
- لان اعرف بحبيبه روحي بداخلها شي وتريد تحجي
- بس !! قبل لا اكمل حضني قوي واندك الباب
- احبج اني
- كام وكف نزلني من حضنه
- هذا مصطفى ادخلي استري نفسج حبيبي
- تمام ، راح هوَ يفتح الباب واني دخلت ركض اغير لبسي
كملت وطلعت لكيت مصطفى كدامي احس عيوني انملت بالدموع
اريد اروح اله واكول اله اسفه لان تصرفت وياك هيج واني اعتبره اخويه وعزيز روحي بس ماكدر هوَ من شافني ابتسم بوجهي

- مصطفى :- تعالي تعالي يالحنينه تعالي اكعدي يم اخوج
- نارا :- رحت اتمشيت بخطوات سريعه وكعدت بصفه
- مصطفى :- شبيج ياروح اخوج
- نارا :- ما تحملت كلامه ردت احجي بس ماسيطرت ع نفسي وبجيت ، احجي ويا وابجي ، يعني الشر لاحكنا وين ما نروح !!!
هو صب الي مي بالكلاص وقدمه الي
- مصطفى :- اهدئي هاج اشربي مي
- نارا :- اخذت من عنده الكلاص وشربت المي رجعت احجي ويا
احجي واحجي وهو صافن عليه
- مصطفى :- نارا رغم كل هذا انتِ تريدين تنتقمين من عندنا
خلي بالج ترى شُعاع وامي العلاقه الي بينهم مو قويه مثل ام وابنها الهذا السبب توقعت رده فعله ع الي سويتي بيها تكون بهذا الشكل لان يكول حقها وهذول اهلها
بس مو هيج الي ياخذ حقه مو بهاي الطريقه
- نارا :- اييي !!!

- مصطفى :- نارا تدرين امي هسه مدمره ، شُعاع تركها والبنات من جهة مدمره نفسيتهن واني كل شي ولا البنات وامي هسه بالفراش
- نارا :- رفعت كتفي بهدوء ، احسن
- مصطفى :- انتِ مو نارا الي اعرفها
- نارا :- لا هاي اني لو انتَ بمكاني شنو تسوي ؟
- مصطفى :- ما اشمر الحق ع غير شخص وياج اعاقب الشخص الي غلط بس مو اي واحد ما اله ذنب
- نارا :- تمام
- مصطفى :- الحق ع ابويه مو ع احد ثاني
- نارا :- تغشم نفسك ؟
- مصطفى :- كل الي صار صدفه ماعرف شلون صار كل هذا
- نارا :- دنكت راسي زفرت بقهر ، اااااخ

رفعت راسي باوعت ع الكاميرات شفت الباب انفتح ودخل شُعاع
صار كدامي
- شُعاع :- ناري ادخلي جوه شويه
- نارا :- هزيت راسي بقبول ، تمام

طلعت من يمهم بس سديت الباب بقيت واكفه حاولت اسمع
شي بس ماسمعت اي شي
حسيت بحركه صارت قريبه من المطبخ بسرعه تحركت وسويت نفسي ارتب بالاغراض دخل شُعاع

- شُعاع :- ها حبيبي
- نارا :- ابتسمت ، ها !
- شُعاع :- شلون صرتي هسه
- نارا :- زينه ، هو بقى صافن بوجهي احس نظراته شكد هو خايفه عليه خايف لا يفقدني واضيع من بين اديه هذا الي عرفته من نظراته
وحتى احس الي يريد يحجي اليه خايف منه ومن رده فعلي
وطلع احساسي بمكانه
- شُعاع :- حبيبي بابا نروح يم اهلي ؟؟؟
- نارا :- رفعت ايدي العب بكم ملابسي رديت بهدوء ، لا
- شُعاع :- هاهي مثل ما تريدين ، البنات يسلمن عليج
- نارا :- اي !!!!
- شُعاع :- نارا شبيج ؟
- نارا :- شبيه ؟ سكت مارد عليه شنو منتظر مني مثلا !!

رحت صعدت للغرفه اعرف بي ضاج من تصرفي بقيت افتر افكر
شنو الي لازم اسوي إلى أن طخت براسي اذا اشوفهم مرتاحين
بهاي السهوله ادمر واتعذب أكثر ضربت السرير وطلعت ركض نزلت الشُعاع ، مصطفى راح من زمان للبيت ، قبل لا يشوفني شُعاع وكفت سحبت نفس بقوه ودخلت اله

- شُعاع حبيبي خلي نروح البيت اهلك عادي ، هو بقى صافن بوجهي مصدوم احسه
- هااا متأكده !!
- اي اكيد
- جيد ، روحي جهزي نفسج
- تركته ورحت البس ، لبست سريع وطلعت ويا

هو يسوق بس احس بي شنو الي بداخله هو حيل متخوف مني
يخاف لا اتصرف وياهم شي تصرف او انتقم منهم من امه لو اخواته
ماعنده أدنى شك انُ ما اسوي شي بيهم لان واثق اني جايه انتقم
واخذ بثار اهلي وخايف بشنو انفذ هذا الشي
وصلنا للبيت ومصطفى هو الي طلع النا بقى مصدوم اول ما شافني كدامه وهو هذا الثاني يعرف وما واثق بيه بهذا الخصوص
سلمت عادي ودخلت سلمت ع البنات كأن شي ما صاير

شفت ام شُعاع كدامي رحت ركض ركضت عليها حضنتها كدامهم
وخليت شفايفي يم أذنها همست الها
" لا سرج مثل يوسف واكدر اشُمره بّبير ولا اكدر اضُم اليحترك بيه "
بعدت عنها ابتسم بوجها وهي تباوع عليه بخوف

ابتعدت كعدت و وفاء جابت العصير شربت منه واني احجي كأن ماصاير اي شي ، رحت اني و وفاء للمطبخ انسوي بالحلاوة وبداخلي اردد
ها بويه اسولف ويا كتالك!
هاي يابعد الدمك الي نزف حار كدامي ،
ها يابعد الجثتك الي وكعد مهدومه واني بدون حركه
ها يابه هاا اضحك ويا ويضحك وياي واني نار بكلبي !
اخذ بثارك لو روحي تطلع .

طلعني من صفنتي صوت مصطفى يكول الي عاشت ايدج
الحلاوه طيبه هزيت راسي اله مبتسمه
دخل شُعاع يضحك رفعت راسي اله اشوفه مبتسم بتوسع ويباوع عليه متلهف بأيده أوراق رفعهن كدامي
- شُعاع :- لج ام النون عندي الج خبر
- نارا :- شنو !!!!
- شُعاع :- راح ترجعين للجامعه وهاي اوراقج بأيدي
- نارا :- كمت فرحانه ركضت اله اخذت الأوراق من بين اديه
اقلب بيهن أوراق قبولي بالجامعه ابتسمت بتوسع واحس الفرحه
ترست كلبي هاي اول خطوه اخطيها تخص حياتي وان شاء الله القادم أجمل .

كُلهم تقربوا باركوا الي واني برجليه رحت العمتي وكفت كدامها
باوستها وحجيت وياها بهمس
- صدكيني مايهون دم بني آدم عند الله .
عفتها ومشيت هستوني طلعت وما اسمع الا صوت صريخ عالي
، رجعت اركض اباوع شُعاع شال امه لاحس ولا نفس ويركض بيها ومصطفى ورى والبنات يصرخن خلوها بالسياره واني صعدت وياهم وطاروا بيها مصطفى يصيح يمه لا تعوفينا وشُعاع صاير ناااار كبره يسوق سريح ويتحسر بقوه ، إلى أن وصلنا للمستشفى
نزل شُعاع يركض شاله امه ودخل بيها يركض ويصيح إلى أن اخذوها من بين اديه دخلوها للطوارئ ، بقينا برى ننتظر شُعاع وجهة صار احمررر دم ومصطفى واكف يمه بسرعه بين التعب ع وجهة
بقينا هواي ننتظر اني ماتهمني هيَ بس ولدها بسرعه هلكوا وخايفين من خسارتها ورى فتره طلع الدكتور من شافوا ركضوا عليه
يتسابقون منو الي يسأل اول إلى أن كال الهم الدكتور الخبر
الي نزل عليهم مثل الصاعقه خلاهم ينشلون بأرضهم
الدكتور :- صابتها جلطه قلبيه و للأسف والدتكم بيها كانسر ومنشر بجسمها .

صاح شُعاع مفجوع بصوت عالي

- شُعاع :- شششششششنو !!!!
- نارا :- اباوع وجهة انقلب ومصطفى وكع ع الارض من قوه الصدمه شكد اني انسانه وعندي رحمه وخوف من الفقدان بس بداخلي بقيت اردد " ربي اخذت بحق اهلي منها ماقصرت "
رجعت لوعيي ع صوت شُعاع المهزوز
- شُعاع :- دكتور شنو تحجي كول غيرها
- والله هذا الي شخصنا لحكتوا عليها ع اخر لحظه
- شُعاع :- وشنو لازم انسوي هسه
- لازم تتعالج وتأخذ جرعات بس حالتها حرجه وهي هسه وكعت بسبب الجلطه
- شُعاع :- دكتورررر !!!
- نارا :- درت وجهي اباوع مصطفى مايحرك باقي ساكن بمكانه
رحت ركضت عليه حاولت اخلي يصحى ماكو ، شُعاع من شاف اخو بهاي الحاله اجي يركض عليه هزه بقوه من كتفه يلا أدرك نفسه هو وين
- شُعاع :- ااااااصحى خويه مو وقتكككك
- مصطفى :- هاا شبيه اني ؟
- نارا :- كل شي ولا مصطفى خلي امه يصير بيها شي ولا هوَ
سندنا وكعدنا ع الكرسي جبت اله مي شربته وشُعاع ويا ويا ماتركه
احسه ضاع بين الاثنين من جهة اخو ومن جهة ثانيه امه
- شُعاع :- امشي للبيت يم البنات

- نارا :- طلع جهازه واتصل ع الشذام بلغه يجي بسرعه للمستشفى باوع عليه واشر الي اصعد للسياره اني طلعت امشي رافعه راسي واردد بكلبي ، ماقصرت ياربي اخذت حق اهلي منها
اشكرك ربي هذا العقاب الي تستاهله هيَ يكفي راح تخسر حياتها وراح الله ياخذ كل الي سوته بينا من بين عيونها يكفي هذا الشي الي صار بدون ما اسوي اي شي كأن الله كال الي اصبري واني اخذ حقج ، وفعلا طلع الحق بسرعه بدون حتى ما اكافح اله يتيمه وعند ربي وكافل الأيتام .

اجه شُعاع صعد عصبي نااار اني ما حجيت ولا كلمه وصلني للبيت
دخلت شفت البنات شصاير بحالهن بلغتهن بالصار وهن كعدت يبجن اخذتهن الحضني أهدأ بيهن طبطبت عليهن احجي وياهن اقويهن " كُل الي اريده منجن تكومن هسه تصلن الها وتدعن الله يساعدها " بدون مايحجن كامن انقهرت عليهن اني حاسه بشعور الفقدان واكيد هنَ خايفات اني هم كمت اتوضيت وصليت
سجدت اشُكر ربي ع كُل الي صار صح حسيت نفسي متناقضه
بس يكفي الاحساس الي احسه بهذا الوقت كأن الله اخذ حقي بكُل سهوله .

دك الجهاز مالته سحبته شفت المتصل عنقاء ابتسمت
رفعت الجهاز وخليته ع اذني

- ها عنقاء شلونج
- هلا حبيبتي هلا نارا شنو الي صاير ليش طلع الشذام يركض ؟
- ماضميت عليها وحجيت الها كُل شي هي صاحت
- يييييبو ! صدُك تحجين ؟
- اي والله
- خطيه ، وين انتِ شنو راح تسوين
- ما ادري ، انتظر شُعاع اشوف شنو يسوي يمكن يطلعوها اليوم لو اي لو لا
- اهااا تمام حبيبتي اخذي راحتج هسه لو ردتي شي اتصلي بيه
- ان شاء الله، سديت الاتصال منها
وكعدت اقرا قرآن إلى أن صار الليل .

سمعت صوت سيارات طبكن يم البيت وكفت ركض اباوع دخلو للبيت و شُعاع شايل امه حيل تعبانه وصفره ركضن البنات الها
يشمن بيها ويبوسن واني واكفه ساكته حطوا بمكانها وكُلهم واكفين يمها لفت انتباهي صوت شُعاع من صاحني

- شُعاع :- نارا امشي البيتنا
- نارا :- لا خلينا هنا ، هو خزرني ، تقرب مني
- شُعاع :- امي تعبانه ومن تشوفج تتعب أكثر لان تنقهر
- نارا :- تمام ، رحت عليها سلمت وتحمدت الها بالسلامه هي تباوع عليها صافنه وتعبانه رفعت نفسي منها باوعت عليها اخر شي وطلعت ما اهتميت الها صعدت بالسياره ورجعنا للبيت
جان شُعاع طول الطريق ما يحجي شي باله مو يمي اصلاً
اول ما وصلنا للبيت رحت بسرعه الغرفتي دخلت سحبت نفس بكُل قوتي كأن الله ما تركني واخذ حوبه اهلي منها بدون جهد مني
صدُك لو كالوا " الحوبه تبطي بس ما تخطي "

دخل شُعاع للغرفه تعبان شمر نفسه ع السرير وشمر حسره جبيره
كأن ماكو اي حل للمصيبه الي وكعت عليهم
رحت تقربت منه

- حبيبي ، راح تصير زينه لا يبقى بالك ، حضنته اطبطب ع كتفه
هو حضني بقوه متحسره
- يعني انتِ تحبيها هيج حتى تكولين هيج
- سكتت ماعرف شنو اكول اله ، هو مسح ع شعري
- احبج اني اعرف بيج حنينه
- هم بقيت ساكته إلى أن غفه من التعب وهو ما حاس ع نفسه

كعدت الصبح ع صوت شُعاع كمزت من شفته بهذا الشكل عركان واحمر واضح انُ هو يحلم هزيته من كتفه اريده يصحى إلى أن فز
من حلمه رايحه روحه
ركضت جبت اله مي شربته شو هذا حط ايده ع كلبه يتنفس بقوه صاح بصوت ، اااااامي ، وركض للجهاز مالته سريع اتصل ع مصطفى الا ان سمع من مصطفى حالتها مستقره يلا ردت الروح اله ، من كلامه ويا عرفت اليوم راح تبدي بالعلاج لان كال اله اسبح واجيك ، اني نزلت اسوي اله ريوك ع السريع وهو دخل يسبح
كملت اله الريوك وهو طلع شاف الصينيه بأيدي تقرب باسني من راسي

- احبج اني حيل
- ابتسمت ، واني احبك
- تروحين وياي لو اخذج البيت ام شيت تبقين يم البنات
- هاا ، لا أخذني العنقاء ابقى يمها
- براحتج
- زين عادي اروح وياها للسوك
- ليش ؟
- محتاجه كم شغله
- هاهيَ سهله .

كمل الريوك وطلعنا وصلني يم بيت عنقاء من شافني دخلت جوه يلا
راح اني دخلت فرحانه اضحك حضنتها
- الله اخذ حوبتي شفتي
- اسُكتي نارا ترى هذا مرض لا يديره الله بيج حرام الشماته
- هااا تمام سكتت !! يلا نروح للسوك ؟
داحجي جان تطلع اختها جان موجوده يمها هي حجت
- همزين لعد اختي موجوده تبقى يم الجهال واحنه نروح
- تمام يلا نروح
بعد ما انطت خبر الشذام اخذتني ورحنا للسوك ماخليت شي بنفسي ما اشتريته من أقلام الدفاتر الاحذيه الملابس كُل شي جهزت نفسي وما تركت شي ما اشتريتها للجامعه خلصنا ورجعنا
للبيت عنقاء جانت مسويه دوله كعدنا تغدينا واتصل شُعاع
فتح الخط .

- شُعاع :- نارا اذا خلصتي كولي حتى امر عليج لان البنات يمنا بالبيت
- نارا :- عادي تعال اخذني
- شُعاع :- شويه واجي اخذج
- نارا :- تمام

خليت الأغراض بالسياره كال ماكدر امر للبيت واخلي الأغراض كتله عادي بقيهن بالسياره ورحنا البيت اهله دخلت لكيت الكُل موجود
ام شيت وكُل عائلتها دخلت سلمت عليهم وكعدت يم ام شيت
هي دنت راسها مني همست الي
- ام شيت :- شصاير ؟
- نارا :- ابتسمت ، الله ما يرد دمعه يتيم
- ام شيت :- ابتسمت بهدوء ، حوبتج كتاله ، بس خطيه ادعي الها
- نارا :- اي خوش
- ام شيت :- فضحتينا يمه ما يصير شوفي ابتسامتج واضحه ما مقهوره عليها ع الاقل مثلي كدام شُعاع يبقى ابنها
- نارا :- سكتت خاله سكتت .

بقينا كاعدين وهمَ تأخذوا اخذوها للعلاج مالتها مر الوقت وتأخروا
هواي جهازي اتصل رفعته شفته شُعاع يتصل بيه كلها التمت عليه
رفعت الاتصال وفتحت السبيكر حتى يسمعون جان هذا العلاج اول بدايه الها يعني كبدايه الها اكيد صعبه اجانه صوت شُعاع
" الحمد لله عدت ع خير " من سمعوا كلام شُعاع كُلهم هلهلو فرحانين بهذا الخبر وشُعاع بعده ع الخط عاط بصوت عالي
" اسكتن **** فضحتونااااا " وهن من سمعن شلون غلط بقن يضحكن اني ساكته وبس مبتسمه وياهم اني سديت السبيكر
وهو همس الي ع كيف " احبج " رديت عليه كال اليوم ما نكدر انطلعها راح نبقى انبات يمها ، يعني اني اليوم ابات هنا يمهن
وصدُك هم بقوا بالمستشفى يمها واني بيت اهله بقيت إلى أن صار ثاني يوم الصبح .

اندك الباب وكلها فزت تركض جابوها جانت صح تعبانه بس احسن
شويه من البارحه جانوا فرحانين واصواتهم عاليه وشُعاع سكتهم
دخلوا للغرفه فرحانين بيها ويضحكون وياها هي بس تباوع عليه وصافنه اني ما اهتميت ولا حجيت وياها بس ساكته واباوع
شُعاع صاحني يلا نرجع ماكذبت ولا جادلته سريع لبست وطلعت ويا رحنا البيتنا

اول ما وصلنا للبيت هستوني دخلت دانزع بالعباه ماحسيت
الا شُعاع شايلني صرخت خايفه لان فجأة شالني خليت اديه ع رقبته
وهو يمشي بيه الغرفتنا وصلنا وشمرني ع السرير صحت
- شُعاااااااااع عزه شبييييك
اشو هذا يباوع عليه ويفتح بازرار القميص مالته
- مجرم كدامي وأريد اقتله
- يااااا يعني تقصدني اني مجرمه شُعاع ، رديت بدلال هو شمر نفسه عليه قيدني بين اديه باوع بعيوني وهو عيونه تلمع لمس خدي ع كيف احس لمساته رجفت جسمي قرب نفسه مني
- احلى مجرمه تشوفها عيوني
- قرب شفايفه من شفايفي واخذني ببوسه عميقه خلتني افقد حواسي اديه صارت تعبث بتفاصيل حياتي بكُل دقه سيطر عليه وكأن اني بدونه عدم ضعت وتهت ويا حضني قوي كأن بس اني ويا
بهذا الوقت بدون خوف بدون توتر بدون جدال
فقط نارا وشُعاع .

جنت واكفه اسرح بشعري هو وكف ورايه
حط اديه ع خصري وسحبني الصدره صار ظهري ع صدره حط فكه ع كتفي وهو يباوع عليه بالمرايا واني اباوع عليه
مبتسمه باسني من كتفي واخذ نفس قوي رفع عينه بعيني من خلال المرايا غمز الي خجلني بنظرات نزل ايده يمررها ع خصري اني سريع رفعت ايدي لزمت ايدها هو ضحك
رفع راسه باسني من رقبتي ومشى بهدوء يبوس بأنحاء وجهي حسيت بقشعريره حلوه صابت كلبي بدل جسمي
قرب شفايفه من اذني همس الي .

- شُعاع :- البسي احلى شي عندج
- نارا :- ملت براسي عليه بسبب انفاسه الي ضربت بشره وجهي وترتني رديت عليه بهمس ، ليش ؟
- شُعاع :- اخذج المكان هناك تعرفين شنو هو
- نارا :- هزيت راسي واني مبتسمه ابتعد عني وراح يلبس بملابسه انتبهت عليه طلعت بدله سوده و وياها رباط سحب المنشفه اني درت وجهي هو ضحك لبس وكملت التفتت اباوع عليه شلون البدله حاضنه اكتافه العريضه
شعره جان واكع ع جبينه رفعه بأيده وغمز الي ضحكت
تقرب وكف كدام المرايا ضربني ع كيف
- شُعاع :- استعجلي حبيبي لا تصفنين بيه هواي اني وياج العمر كله
- نارا :- مغرور
- شُعاع :- بيج كبد
- نارا :- رفعت نفسي اعدل القميص والرباط مالته هو سحب اديه باسهن وعدل شعره ولبس الستره اني واكفه كدامه اباوع شلون الحذاء مالته يلمع لمع سحب العطر
ملى نفسه بالعطر ، اخر شي سحب الساعه مالته السوده
ولبسها

- نارا :- شافني صافنه ع الساعه ضحك
- شُعاع :- شبيج ؟
- نارا :- ساعتك تقلقني
- شُعاع :- احبها
- نارا :- اممممم ، أسألك سؤال
- شُعاع :- اسألي

-نارا :- شوكت حبيتني ؟؟ تقرب مني صار كدامي نزل راسه حتى يصير قريب من طولي نقر ع انفي
- شُعاع :- ليش تسألين
- نارا :- هيج اريد اعرف شوكت حبيتني ، سحبني من خصري ضغط عليه وعيونه بعيوني همس
- شُعاع :- بليله حالكه السواد
- نارا :- شلون مافهمت !!!
- شُعاع :- من اول ما وكعت عيني عليج بهذيج اليله الحالكه السواد وانتِ صرتي بكلبي وكُل حياتي
- نارا :- فتحت عيني مصدومه ، تقصد بيوم الي لكيتني متصوبه !!!!!
- شُعاع :- بالضبط صفاوتي

- نارا :- ماكدرت اسيطر ع نفسي ارتميت بحضنه ابجي
حضنته بقوه وهو ضمني قوي الصدره ابتعدت عنه اضحك مسح دموعي بأيده بكُل هدوء
- شُعاع :- ماريد هاي الدموع تنزل مره ثانيه وانتِ وياي او بدوني
- نارا :- احبك اني شُعاعي
- شُعاع :- اموت عليج ناري

نزل هوَ ينتظرني واني رحت لبست أرقى لبس عندي وخليت مكياج
بسيط ومرتب إلى أقصى درجه عندي خليت عطر وطلعت هو جان منتظرني من شافني ابتسع صار يتغزل بيه بعدها طلعنا
بقينا نمشي وهو شغل الاغنيه " كان ودي نلتقي " ومنطرب وياها ويبوس بأيدي محتضنها بين كفه إلى أن وصلنا للمكان نزلنا

بقيت صافنه اباوع هو سحبني من ايدي وحط ايده بأيدي ومشينا
دخلنا للشركه مالته كُلها اتوجهت انظارها علينا هو يحجي وياي ويشرح الي واني اباوع شلون البنات الي بالشركه شلون اكلنا اكل بالنظرات حسيت بالغيرة لزكت نفسي لزك بي وهو مستمر يشرح الي واني عيني بس ع البنات أخزر بيهن دغيته من بطنه هو انتبه الي
- شُعاع هذن ليش يباوعن عليك هييييج !! قوست شفايفي
- ضحك ، شعليج بيهن بس انتِ الي بعيوني
- كرصته قوي ، وشحدها الي تجي بمكاني الا عيونك اشلعها
- ههههههه يايابه يابويه ع الغيره
- خااااف عبالك داكول لك من هسه والله
- اعرف اعرف واني ما عندي غيرج يلا تعالي نطلع
- طلعنا من الشركه صعدت السياره واني احجي ويا ، شكوو يباوعن عليك هيج بهذا الشكل وهو يضحك عليه صحت بي ، لا تضضضحك
- ههههههه لج شوفي شكلج
- ما معليه ليكون تجي هنا يوميه
- لا والله بس اليوم علمودج اجيت
- باوعت عليه ابتسمت ، احبك اني
- هههههههههه اموت عليج

وراها مشينا واحسه حيل مرتاح اليوم ومستمع واني ويا هم فرحانه
ورى تقريبا نص ساعه وكفنا كدام معرض مال السيارات
كُلش جبير وبيها سيارات تفتح النفس بحيث بقيت صافنه عليهن
يلمعن لمع نزلنا من السياره وهو لزمني اباوع المعرض لي زلم هو قربني منه رفعت راسي شفت بنت جاي تشتري سياره من شافت
شُعاع وشلون الزلم تسلم عليه هي بقت صافنه عليه يمه حسيت
بالغيرة وصلت الراسي اكلته اكل بنظرانها
شُعاع من شاف نظراتي تقرب مني وهمس الي
- احبج بس انتِ
بقيت ساكته وهو شوفني المعرض كُله وبقى يشرح الي كُل شي
هواي فترينا وشفت السيارات بعدها طلعنا

رحنا المطعم بحيث صفنت عليه المطعم كُلش راقي وفخم جان شُعاع حاجز النا طاوله
شُعاع سحب االي الكُرسي واني كعدت حسيت نفسي اميره ويا
الطاوله عليها ورد شويه وجابوا النا عصير طيب طيب إلى أبعد درجه
جنت حاطه ايدي ع الطاوله شُعاع مد ايده لزم ايدي يباوع عليه
بنظرات حيل حلوه
- شكرا لان انتِ بحياتي شكرا ع كل شي
- احبك شُعاع
- احبج نرجسيتي

شويه وجابوا النا الاكل اكلنا بأجواء رومانسيه بحيث حسيتها
من الخيال حيل حبيت هذا اليوم وحبيت نفسي وحتى شُعاع حبيته أكثر جنت محتاجه هذا التغير يطرء ع حياتي حتى يخليني اغير من نفسيتي وهو غيرها الي بمهاره مجرد لو مشينا ع الجسر اني ويا ايد بأيد راح احس بالسعاده مُجرد ما يكول الي كلمه حلوه أطيب من خاطري راح احس بالسعاده البنت تركيبه عجيبه بأبسط كلمه مُمكن تهدم اجبال من التعب والهموم .

وراها طلب مني نروح البيت اهله واني قبلت وخاصه بهذا شكلنا الي يجذب النظر من وصلنا اول ما شافونا بقوا يباوعون علينا مصدومين من شكلنا
راح شُعاع سلم ع امه واخذ مصطفى يحجي ويا برى

- نارا :- شكو شبيكم ؟
- مصطفى :- هيج مبتسمين للحياه مثلج
- نارا :- مو طبيعي انتَ
- مصطفى :- هز ايده ، ليش هو منو طبيعي بهاي الدنيا
كلها شاخطه
- شيت :- ع كولت شُعاع جيره بكصتج مصيفي
- نارا :- هو كال هيج لو فطست من الضحك وهم صاروا يضحكون مصطفى عقد حاجبه يهز بأيده ماعاجبه
- مصطفى :- تسكت لو اكوم لك
- شيت :- شو كوم كوم
- مصطفى :- اريد اكوم بس متعاجز خليها بعدين
- نارا :- رجعنا ضحكنا بصوت عالي وهو يمثل بتعابير وجهة
- مصطفى :- والله انتوا فد بيكم تصنيف منا للصبح
- شيت :- اي مو احنه تايهين الحلكك ابو حلك
- مصطفى :- اهووو احنه شلون ويا هذول الناس
- شيت :- يسون راسك لك
- مصطفى :- اي جاي احاول اصدك كلامك
- نارا :- احنه نضحك وهم يتناكرون دخل شُعاع يباوع علينا كُلنا مبتسمين

- شُعاع :- شبيكم ؟
- نارا :- احنه بقينا مبتسمين ماردينا عليه
- شُعاع :- والله مخابيل انتوا
- مصطفى :- ليش هسه يلا دريت
- نارا :- حطوا الاكل وكعدوا شُعاع جاوبه
- شُعاع :- هو انتوا الله ساطركم من زمان
- نارا :- هنا ماكدرت الزم نفسي فطست من الضحك وهم كُلهم اختنكوا يضحكون

رجعنا للبيت اباوع الملابس بعدني ما معزلتهن رفعت راسي الشُعاع
- تدري الملابس الي اشتريتهن اليوم بعدني ما معزلتهن !!!
- عادي كلبي اني وياج نعزلهن هسه
- اي والله ياريت ، صار يقلب بيهن ويباوع عليهن شوي و رفع راسه يباوع عليه اشر عليهن
- شنو حبيبتي راح اداومين بيهن
- ابتسمت بوجهة ابتسامه مثل الهبله وهزيت راسي ، اي ، عفس وجهة
- ترى اني اغار شني هاي
- شُعاع ترى راح البس عباه فوكاهن
- وشنو ما تطلع من العباه مثلاً
- بقيت فاتحه حلكي صحت ، شششُعاااع شبيك
- يلا سكتت
- بقينا نرتب بالاغراض إلى أن كملنا ونمنا .

الساعه ٧ صباحاً

فزيت من نومي واني اشتم ريحه الجاي المهيل وصوت المي
وحركه كركبه أغراض من جوه رفعت جسمي اباوع ع الساعه
ال ٧ الصبح فتحت عيوني يااااا اني متأخره !!! صرخت من فوك
شُعاااااااع تأخررررت !! اجاني صوته من جوه
- جاي اسوي ريوك غسلي وانزلي بابا
- كمت متوهدنه ومثوله ادور ع البنطرون وين خليته دورت عليه ماكو
رجعت صحت من فوك ، شُعااااااع البنطرون ويينه ؟ رد عليه
- حبيبي تعالي جوه اني كويته وخليته
- رحت اريد اغسل ما انتبهت ادور ع الصابونه هم ما لكيتها
طلعت من الحمام هم رجعت صحته ، شُعاع الصابونه وين مخليها
عاط من جوه
- ب ****** وين يعني غير يمج انتبهي عليها
- متت ضحك هو كمل كلامه
- لج بابا بعدج ما تأخرتي ع كيفج
- خليت الفرجه الاسنان ع سنوني ونزلت اركض ع الملابس وافرج اسناني شُعاع صار كدامي شايل بيده التيشيرت
- ارفعي اديج اني البسج
- رفعت اديه والفرجه بأيدي لبسني التيشيريت صاح
- هذااا ضيك لججج
- اي شُعاع مايبين، نزل التيشيرت وعدله ومشيت صحت ، شششُعاااع الجاي حباب
- ولج خبلتيني امشي بابا
- رحت ركض غسلت ولبست باقي ملابسي لبست العباه
ونزلت ركض هو خطيه ع الواكف وياي شرب الجاي وغير ملابسه
لان هو الي يوصلني كملنا وطلعنا بالسياره

احس روحي تلوب من بعد سنين طويله راح ارجع الحياتي من
بعد الفقدان والعذاب الي شفته راح ارجع من جديد تمشي السياره واني فتحت الجامه نسمات الهوى البارده تضرب بوجهي وراح بالي الهذاك اليوم الي دخلت بي الجامعه اول مره وشلون تعرفت بي ع اسراء وشلون علاقتي بيها راح فكري الايامنه الحلوه والهفتنا ياترى راح تكون حياتي هسه مثل قبل ولهفتها لو اتغير الوضع وماتت الهفة الي بيه !!
وصلنا للكُليه اباوع عليه جبيره شُعاع مكمل كُل شي ومجهز كُل شي يعني بس ااداوم اول ما وصلت الباب الكُليه قبل لاانزل لزمني شُعاع

سحبني من اديه ضمهن بين اديه يحجي وياي
- تعرفيني اني بظهرج ع طول واني واكف وياج بلشين قبل الزين
تعرفيني ما اسمح الجنس مخلوق يتقرب منج حافظي ع نفسج لان روحي بروحج اني بابا لا تخيبين ظني بيج انتِ مهره شُعاع الي ينحلف بيها وبقوتها اريدج دوم هيج حبيبي
- اسمعه يحجي واني مبتسمه بوجهة هزيت اله راسي بأيجابيه
هو رفع أديه وباسهن اثنينهن
- لاتخافين اتصال واحد تلكيني فوك راسج
- ابد ما اخاف وانتَ بظهري
- وابقى بظهرج ساندج طول حياتج ، احبج
- احبك اني

نزلت من السياره وهو وياي نزل لزمني من ايدي من شافوا دخلوا بسرعه ماحجوا ويا وصلني الحد القاعه مالتي وهو لازم ايدي كأن احسه يكول هاي تابعه الي لاتتقربون منها
ماتركني الا شافني كاعده يلا راح
شويه واجت بنت كعدت يمي توترت كُلش وسريع اجت بالي اسراء
اول ما خلصت المحاضره ركض اول ما طلعت صار بوجهي شُعاع صفنت مصدومه عبالي راح مابقى رحت يمه بخطوات سريعه وكفت كدامه

- بعدك هنااا !!! ابتسم بوجهي
- شلون تريديني اعوفج وهذا اول يوم الج
- احس الفرحه ترست كلبي عيوني صارت تلمع ، احببببك
- هاااااا مو هنااا ولج
- ابتسمت ، تدري تذكرت اسراء
- اششش الله يرحمها ، تعالي أفرج بالجامعه حتى تندليها
- سحبني من ايدي ومشى بيه وداني للنادي مال الكُليه اباوع البنات اكلنه اكل بالنظرات غرررت واحس الغيره وصلت الراسي
دخلنا للنادي ضغطت ع ايده سحبته ، ششوف هذن يباوعن عليك
- معليج بيهن
- لزمني من وجهي دارني عليه
- باوعي بعيوني
- اني باوعت بعيونه وهو مركز بعيوني
- لا تخافين من اي شي اني وياج ما اعوفج
- هزيت راسي مبتسمه

شويه واجت بنت تقربت منه سألتني
- انتِ بقاعتنا مو
- اي !
- حبيبتي بدأت المحاضره
- ها بدأت
- اي
- راحت وشُعاع حجه وياي
- يلا كومي حبيبي
- لزمني من ايدي وداني للقاعه مالتي وراح
اني كعدت ونفس البنت اجت كعدت يمي سألتني
- هذا زوجج
- رفعت راسي ، اي زوجي
- اعرفج اني ساره
- واني نارا
- اسمج حلوو عاشت الاسامي
- شُكرا واسمج حلو هم عاشت الاسامي

خلصت المحاضره واني احس بشعور حيل غريب
طلعت لكيت شُعاع بعده ينتظرني تقرب منه حجيت سريع
- اسمها ساره ، هو صفن بوجهي
- شنو ؟
- البنت الي حجت ويانه اسمها ساره
- شبيج بابا
- بقيت صافنه ماعرف ليش حجيت هيج
- تعالي امشي نطلع
- سحبني من ايدي وطلعني نفتر بالكُليه إلى ان كملت كُل المحاضرات وساره انطتني رقمها ورجعنا للبيت
اول ما وصلني راح شُعاع يجيب اكل من برى واني دخلت للبيت صعدت غيرت ملابسي وبقيت كاعده ع السرير
رفعت الجهاز اباوع ع رقم ساره سجلته بالجهاز لكيتها حاطه صوره ايدها وايد ولد وياها ماعرف ليش بس كتبت رساله ودزيتها الها
كتبت " هلو " هي سريع ردت عليه منو يمكن بعدها ما مسجله رقمي دخل شُعاع اني شمرت الجهاز

رحت رتبت الاكل وكعدنا نأكل واني بالي كله يم اسراء صديقتي الي اخذتها مني الحياه وهي بين اديه
شُعاع يحجي وياي ع يومي وشلون جان واني اجاوبه
شويه وسألني
- نروح البيت اهلي ؟
- لا حبيبي خليها غير يوم لان انطونا واجبات هو ضحك
- فدوه للواجبات
- كملنا الاكل كمت شلتهن اعزل بيهن وصار شُعاع يمي
- نارا اني راح اطلع دقايق وارجع
- تمام حبيبي
- هو طلع واني اجيت شفت جهازي بي مكالمتين من ساره
ورساله مكتوب بيها منو انتِ ، رديت عليها اني نارا
هي سريع اتصلت

رفع الخط واني ارجف ماعرف شبيه هيج متوتره
- ساره :- هلا بيج حبيبتي ماعرفتج لان بعدني ما مسجله الرقم
- نارا :- عادي ماصار شي
- ساره :- شلونج ؟
- نارا :- ضغطت ع المخده بأيدي ، زينه رجف صوتي وحسيت راح تفضحني العبره
- ساره :- الباجر تجين ؟
- نارا :- اي ، اترخض اني اجه زوجي سديته منها سريع و وكعت دمعتي واني ارجع بذاكرتي

فزيت ع دخول شُعاع يحجي وياي

- ها بابا
- رفعت راسي اباوع عليه ، ها حبيبي
- اشتاقيتلج اني
- تقرب مني حضني قوي وكعدني بحضنه ، واني أكثر
باسني وبعد رأسه ، شُعاع
- عمره
- ماعرف ليش احس بحُب اتجاه هاي البنت
- تقصدين ساره !
- اي
- نارا اسمعيني
- شنو
- ماتعرفين شنو هي ولا شنو بداخلها ديربالج منها دائما تكون البدايات حلوه بس بالاستمرار تبين العكس خلي بالج من الصديق
لان يغدر وهذا اني ابسط مثال الج وشفتي شنو صار بيه بسببه
لاتمشين ورى كلبج اعرفج حنينه وتثقين بسرعه خليها بالج الف عدو ولا صديق واحد ، يشوفج احسن منه يدوس عليج ويمشي وما يهمه سواء هذا صديق أو لا فهمتي الي اريد اوصله الج شنو
- اي حبيبي فهمت
- اروح فدوه للعاقله

مر اليوم ونمنا من التعب ثاني يوم هو كعدني بأيده لان اني بعدني ما متعوده من خلصنا هو وصلني للكُليه وراح اول ما دخلت صارت ساره بوجهي
- نارا :- صباح الخير
- ساره :- صباح النور ، شبيج شو احسج خايفه لاتخافين اني يمج
- ابتسمت بوجها هي لزمتني من ايدي واخذتني للقاعه كملنا المحاضره وطلعنا
- ساره :- تعالي
- نارا :- كعدت اني ويا جان يفوت ولد من كدامنا هي رفعت راسها ابتسمت اله اني دنكت راسي هي حجت
- ساره :- هذا حبيبي
- نارا :- وين تعرفتي عليه
- ساره :- من زمان اعرفه واني ويا دخلنا نفس الجامعه بس كُل واحد بقسم يختلف عن الثاني
- نارا :- صرت بكل شي اقارن اسراء بساره إلى أن طلعت من الجامعه واني بالي مره يكون بالماضي ومره بالحاضر .

رجعت للبيت شُعاع هو الي رجعني كالعاده يطلع من شغله علمودي يوصلني ويروح وبالرجعه هو الي يرجعني اول ما وصلت شمرت روحي ع السرير هلكانه احسن بعدني ما متعوده ع الدوام وهذا يلا اليوم الثاني الي حسيت بي كعد بصف رجليه حط ايده ع رجلي ودلكها

- ها تعبانه
- اي هواااايه
- شو كومي ولج مشتاقلج صاير اشتاق الج هواي
مامتعود ما اشوفج هواي
- حبييييبي راسي يأذيني
- اي تعالي بحضني شو كومي
- رفعت نفسي وشمرت روحي بحضنه هو طوق
خصري بين اديه يبوس بيه واني اضحك بتعب ، شُعاع احسك صاير تحبني هواي
- اي موزين احبج
- زين زين بس ماعرف اخاف من هاي السعاده خاف لا يصير شي مو زين بعدين
- كولي يا الله شبيج بابا افرحي للحياه تفرح الج
- هههههه سبق فرحت وطيحت حظ حظي
- هههههه هاي شلون شغله وتبقين خايفه هيج
- إلى أن الله يفرجها علينا
صار فوك يبوس بيه ويعض بخدودي واني اصيح واعيط
وهو ولا مهتم لصياحي طلع حركه كلبه كلها بيه
وبعد عني يضحك واني ويا سكرنا من الضحك فرحانين

أيام ثقيله مُرعبه تشبه خطوات الاسُرى في الحرب
خطوات ثقيله اعداد وهميه وأوهام جاريه غير قابله لتوقف همسات أرقام وحروف مُلكه .
1
2
3
4
5
6
7
8
9
....
ظلامٌ دامس وحشه القبر وأنين اليل ، خوفً عميق مُتلبسً في أعماق روحي من القادم عندما انظُر الي من هو في جانبي في دمائه يُعتلى الخوف في جسدي
والاشباح في روحي !!!
- الهدوء المكان وترني وحسيت بعاصفه قويه راح تشتاح حياتي خفت من هذا الهدوء وحسيته سبق عاصفه داميه ، رفعت عيني كأن اريد اركز ع شي
فجأة وبدون أي حركه ماحسيت الا بصوت قوي هز البيت هز دخانه سوده وصوت الجام تكسر بصوره مُخيفه خليت اديه خايفه ارجف من هول المنظر الي كدامي والرعب الي دب بجسمي بشكل مُخيف !!!!

حسيت المطر بي نقص هالمرة
مو نفس الشعور القبل هالفترة
اول مرة اعبر من ضباب الجام
لا اسمك كتبته ولا عفت ذكرى.
يتبع 🦋.

التوقعااااااات بسرعه يخووووااااان .

القناة