الربتج " حالك الاسوداد " الفصل التاسع 9 - بقلم رهف علي

عندما يقع المحظور وقتها
لايُفيد الندمُ ، خاطر
ربُما تكونْ فرصة لكَ من جديد.

ماذا عن شعوركم الان اخبروني؟؟؟

ــــــــــــــــــــــــــــــ•●•ـــــــــــــــــــــــــــــــ

انكتمت انفاسي واني اشوفه شلون
سكت وعيونه غمضهن
رجفت ايدي وبعده المقص والملقط بداخله
الدم صار ينزف بغزاره
واني عيوني عليه ماحركتهن
صح ردت اقتله بس مو السلاح موجه براسي
اكيد راح يقتلني ورى
بس من صارت الشغله صدُك حسيت
بالخطر والخوف
اجاني صوته العصبي من ورايه
يسألني ..

ابو نوح : لماذذذذذااااا اغمض عيناه ؟؟؟؟؟؟؟
نارا : شنو اكول اله ياربي
ابتلعت ريقي ورفعت راسي اجاوبه
فقد دم هواي الهذا السبب أغمى عليه ، يعني
فقد الوعي ،
شكله ما اقتنع بكلامي ورجع عاط بوجهي
ابو نوح : اااانتِ تضحكين عليه انااا قُلت لكِ
لماذا لا يصدر صوت وعيناه مغلقه ؟؟
هل فعلتي لهُ شيء ؟...
ياحبيبي هذا شنو راح يفهمة هسه
اساساً الرجال بيدي مات شلون بهاي الحاله
قابل اكول اله والله شنو للأسف مات
غير يشويني ع الفحم وياكلني
حمحمت حتى صوتي يكون طبيعي واخفي
الرجفه الي بي
نارا : ترى الشغله طبيعيه احنا مو كاعدين
بمستشفى ولا بقسم
خاص بالعمليات دشوف بعينك ماكو اي
بنج ولا حتى مغذي او دم متصل بجسمه
انتَ تعرف لازم من تصير العمليه
لازم وضروري تتفر هاي الأدوات والأشياء
حتى أتم العمليه بخير وسلام ويكون
المريض بصحه زينه بغض النظر عن اذا كانت
العملية صعبه او سهله ع الاقل لازم تتوفر
هاي الأشياء لسلامه المريض
مو جايبني هنا بمكان قذر بدون تعقيم وبدون
كُل هاي الأشياء
وتريد مني اسوي العمليه بكُل سهولة
ويطلع بدون مضاعفات
او بدون خطر
اني احجي وهوَ صافن مصدوم بيه
لان احجي ويا بهاي الطريقه

ابو نوح : لماااا انتِ ثرثاره بهذه الطريقه؟؟؟؟
نارا : غير انتَ السبب
اذا صار ع المريض شي فتكون انتَ السبب
لان بسببك راح يصير اله مضاعفات
من البدايه كلت لك اني بعدني طالبه وما مسويه
اي شي عملي ولا داخله
العملية من قبل وانتَ اجيت وسلمتني ،
حياه حي...ردت اكول حيوان بس بلعتها ورجعت اكمل ، حياه انسان بيدي بدون
خوف وتريد يطلع بسلامه !
كلت لك أخذه للمستشفى افضل ،
فتح عيونه ع وسعهن وعاط بيه
ابو نوح : يكككفي لقد اكتفيت من عند ثرثرتكِ
واعملي عملك والا قتلتك ..

هزيت راسي بدون جدوى ورجعت نزلت
راسي الهذا الكدامي ماعرف
شلون راح ادبرها وابين اله هو ما ميت ولا بي
شي او قطعت الوريد مالته
سحبت قطع شاش وصرت امتص الدم
اريد اخيطه حتى لو هو مات المهم ما ابين
اله هو فعلا مات
سحبت الابره والخيط وايدي ترجف اخذت
نفس بقوه وصرت اخيط المكان
بالكوه ادخل الابره بالجلد
زين عندي خلفيه عن الخياط الهذا صح مو
مضبوط بالحرف الواحد بس
ع الاقل احسن من ماكو
هو بعده حاط السلاح فوك راسي وكُل شويه
يضرب فوحه السلاح براسي
حتى اكمل شغل وما اتأخر كُل ما يضربني اشهك
لان الابره تروح بغير مكان
عبالك هو عايش ويحس ولا كأن هو جثه هامده
كدامي ، ماعرف يمكن اغمى عليه وماميت
واني عبالي ميت
خلصت الخياط وبعدت اديه عنه

فتحت عيوني ع وسعهن نسيت اقيس
النبض مالته اني شلون فاتتني
بسبب الخوف مالتي انُ مات بيدي وهذا السلاح
براسي نسيت اقيس النبض واشوفه
عايش لو لا
خليت ايدي ع رقبته اقيس ماعرف بس حسيت
اكو نبض ضعيف يمكن اني هذا احس بي
من الخوف او اوهم نفسي هذا
النبض يخصه رجعت رفعت ايدي عنه بسرعه
والشك مالي عقلي يعني هسه
هذا النبض اله لو شنو بالضبط
ياربي والله اني ما مسويه عملية من قبل
شنو هذا الاختبار
الصعب

ماحسيت الا ع شعري ينجر بقوه
شهكت من الصدمه حتى ما انطاني مجال استوعب
حط راسه يم راسي
ابو نوح : لماااااذذذذا لا يتكلللم ؟؟؟؟
هذا شنو شبي حتى يحجي هل حجي
نارا : شنووو غير اغمى عليه
ابو نوح: هل انتِ متأكده انهُ لن يموووت
نارا : بسسسسس عوف شعري حتى اكدر احجي
شبيييك عوفه
هو ترك شعري بدفعه قويه رجعت سحبت نفس
وكملت كلامي ،
ترى هو فقد دم هواي شي طبيعي راح يفقد
الوعي ف هذا الي دتشوفه هسه شي
عادي ماكو اي خطوره ع حياته
حتى هو عايش مو ميت اطمئن
شكله ما صدك كلامي اييي وجع صدكني شنو
راح يصير اذا صدكتني
نزلت راسي بالكوه كاتمه الضحكه مالتي
صح خايفه بس بهذا الموقف
خانتني ضحكتي واحاول اضمها حتى مايرجع
يطلع خباله عليه
ويخليني نايمه بصفه بطلقه براسي
سحبت نفس حتى اخفي الضحكه ورفعت راسي
شفته
هو عاقد حواجبه وخازرني بقوه
رجعت نزلت راسي اخفي الابتسامه الي
ع وجهي

ابو نوح : ووووولماذا لا يتكلللم ؟؟؟
نارا : عود انتَ من عقلك تحجي خااب هوَ غير نااايم
شلون تريده يحجي ؟؟؟؟؟؟
شلون تسأل لماذا لا يتكلم ماعرف شنو ترطن براسي
شبيييك هاااا شبيك
باوع عليه بنظرات ماعاجبه وكام من يمي
يفتر واني عيوني تفتر ورى
ليش هيج هو مرتبك الهاي الدرجه
واذا مات اشو همَ القتل عندهم عادي
ليش هذا اختلف وشايل همه الهاي
الدرجه
ماكدرت اخفي فضولي الهذا سألته

نارا : أسألك سؤال
لتفت عليه ورفع حاجبه
ابو نوح : ماذا ؟
رجعت نظراتي الهذا النايم بعدين عليه
نارا : هذا الشخص ليش انتَ مهتم بي الهاي
الدرجه
عقد حاجبه ونتر بوجهي
ابو نوح : ليس من شأنك
نارا : هسه جاوبني وأرضي فضولي شبيك
ماحسيت الا ابتسم بطرف شفته
وصار يتقرب مني بخطوات هادئه ونظراته
الماكره بأتجاهي
ماعرف ليش توترت من يمي
وصل يمي سحبني من ايدي وصار وجهة بوجهي
همس الي
ابو نوح : استطيع ان اُرضيك في شيء آخر
رجفت اديه ماعرف ليش حسيت كلامه
يخوف
نارا : شنو تقصد ؟؟
ابو نوح : دعيني اشرح لكِ ذلك
احس عقلي فصل عني جان حيل قريب مني
بحيث حتى انفاسي قطعتهن
خايفة وجسمي باد حتى ما اكدر ادفعه
قرب راسه اكثر ماصار يفصلنه
اي شي عنه تقرب راد يوصل الي ماعرف
شلون رجعت الي القوه
رفعت اديه ودفعته من صدره بقوه هو جان ثاني ركباته ف شريع اختل التوازن مالته
و وكع للورى ع ظهره
هو شافني سويت بي هيج
وكف يرجف رجف من الأعصاب شلون سويت
بي هيج اجه ضربني ع وجهي
بكف احس طير عقلي من راسي
صار يهد ويرعد يريد يفترسني
يحير شنو يسوي بس
حتى يبرد كلبه بيه شلون سويت ويا هذا الشي
و وكعته
صاح بيه بصوت عالي

ابو نوح : قووومي لنذذذهب من هناااا
ماحجيت اي شي الهذا كمت بهدوء
هو سحبني وطلعني من هذا البيت حتى ما سألته
اذا راح يعوفه هنا لو ياخذه
المكان او يجيب يمه واحد يبقى ويا
فضلت السكوت ماريد
احصل شي ثاني يكفي اليوم الي صار
ماريد مغامرات اكثر ولا ضرب اكثر
اكتفي بالصار نشوف غير يوم نسوي
مغامرات جديده .

رجعنه للبيت وهم رجع قفل الباب
عليه يخاف لا انهزم منه مره ثانيه وهل مره
اذا اسويها يا اموت يا اموت ماكو
اي احتمال ثاني واذا لزمني ف معناها
الموت أهون الي والكاتبه الله يصير
بقت الأفكار
تجيبني منا وتوديني منا الحيره الي اني
بيها كعدت افكر زين همَ ليش هيج
ديسسون بينا اني من دخلت سوق السبايا
لكيت من كُل الطوائف يعني
ما محتصره فقط ع طائفة مُعينة النساء يبيعوهن
وبيهن للجهاد والأطفال والشباب والشياب
ياخذوهم الميدان الجهاد مثل ما يكولون
لكن اي شخص يتمرد عليهم تكون
نهايته مثل ابويه
وكفت ع طولي وبقيت افتر بالغرفه
حايرة زين هسه اخواتي وينهن هسه ؟؟؟؟
من اشتروهن هم مثل حالتي
لو سوو وياهن شي وتأذن ؟!
زين اخواني وين هسه بعدهم بالميدان لو اخذوهم
المكان ثاني
هاي اني صارلي أشهر طويله هنا
وماعرف عنهم اي شي
ماعرف إذا هم عايشين لو لا
زين ابويه وأخويه وامي دفنوهم لو لا!؟
معقوله تركوهم بدون شي
من تراودني هيج افكار احس روحي تصعد
للسماء وترجع الجسمي
انهاريت احس انجنيت

صرت افتر وحتى مدا احس بنفسي افتر
بسرعه جبيره
بحيث صارت خطواتي بيهن صوت
وكفت كدام الحايط وباالي شارد
رفعت ايدي وبأظافري صرت احفر بالحايط
ما منتبهة النفسي
بالي كُله يفكر بيهم
انتبهت ع الحايط صارت بي آثار اظافري
وكفت اباوع ع اديه مكسرات الاظافر
وبيهن مثلمات
صفنت صار صوت الساعه يدك براسي
تك تك تك تك تك تك
اتنرفزت حسيت ماراح اتحمل التفتت الصوت
الساعه وحاولت اوصل
الها بس هي بمسافة أعلى مني
صرت ادور ع شي حتى انزلها
ماكو مالكيت اي شي
باوعت ع نفسي لابسه نعال شلته
ب ايدي وحيل شمرته ع الساعه اول مره
ما وكعت ثاني مره يلا وكعت بس
ما نكسرت

راح من بالي اشيل البطاريه من الساعه
بالي كُله شلون أوقف الصوت التك تك تك مالتها
اخذتها وطلعت من الغرفه
ادور ع شي
رحت للمطبخ ادور ادور الا ان لكيت سجينه
اعتقد ماال الحم خليت الساعه
ع الارضيه وبقوه ايدي بالسجينه
صرت اضرب بيها تكسرت الجامه مالتها واني
اصيح ويا كُل ضربه
اضربها بالساعه صوتي يعلى اكثر ،
بسسسسسسس اسسسسسكتي
لا اااطلعييين صوووووت كاااافي
اشششششش قطعي صووووتج
مووووتيني صوتجج ديصير بأذني اششششش
مووووتي كككافي ،
صرت اتنفس بقوه واني تكسر بيها
اخر شي شلتها وشمرتها بقوه ايدي
بالحايط صارت طشار بكُل مكان
كعدت واني مهدود حيلي
اتنفس بقوه خليت راسي ع الحايط وصرت ابجي
ابجي بصوت
ماعرف شكد بجيت الا ان تعبت
يلا سكتت

بقيت صافنه اباوع بس بالي
مو يم الحاجه الي اباوع عليها
إلى أن جسمي خدر من التعب سحبت نفس
وكمت اغسل بوجهي
حتى تروح الهواجس الي تحيط بيه
طشيت مي ع وجهي
استعاديت نشاطي شويه وكعدت اسبح
التسبيحات الي علمهن الي بابا

مرن ٣ ايام بالضبط بيومها الساعه
الفجر الساعه ٤:٠٥ دقايق بالضبط
ماجنت نايمه
ماحسيت الا باب الغرفه انفتح ودخل عليه
عدلت كعدتي واني مترقبته
ومترقبه حركاته
ابو نوح : كيف حالك أيتها ال****
نارا : ماجاوبته بقيت ساكته صار
كدامي كعد ونظراته ماحبهن ابد اتقزز من اشوفه
يباوع عليه بهاي الطريقه
ابو نوح : أسألك لماذا لا تردين !
هم بقيت ساكته مارديت رجع استغل الوضع
وراد ينرفزني بسؤاله لان يعرفني اني
اجاوب وما اسكت اذا تقرب بالكلام بهاي الطريقه
ابو نوح : لماذا تحبون علي ؟
نارا : رفعت حاجبي اله ، لان هو أمير المؤمنين
أميرنا سكت صافن بوجهي
رجعت استرسلت بكلامي
انتَ بكُل عمرك وحياتك شايف جن وشخص قاتله ؟؟؟ اكيد لا
الامام علي وهو بعمر صغير حارب الجن
وقالع باب خيبر
وابو اليتامى وغيرها وغيرها
انتَ شنو تعرف ! شنو شايف وشنو عندك
اقل شي يكون انجاز لك اقوه شي عندك
هو تسحبني من شعري بس لان اني
ضعيفة البنية و على كد ايدك
تاخذني منا وترجعني منا ليش لان انتَ اقوه مني
بس بالبنيه الجسديه والا اني اقوه منك
بكُل شي افوقك بخطوووات اكبر منك ومن
امثالك

هز راسه الي بعدم اقتناع
ابو نوح : لماذا انتم تتكلمون كثيراً هكذا ! مثلكِ انتِ
ابتسمت واني ارد عليه
نارا : اذا الحق ويانا نبقى نحجي ومانسكت
وكُلنا مانسكت هذا طبعنا تعرف ليش ؟
،رد بسخريه
ابو نوح : لماذا !
نارا : لان الساكت عن الحق شيطان اخرس
ابو نوح : ومن أين تعلمين كُل هذا ؟
نارا : شديت ع فكي ماريد يبين صوتي خاوي وضعيف ، من ابويه الي قتلتوا بدم
بارد وتركتوا جثه الله لا يوفقكم ولا يوفق اي واحد بيكم ، جان يعلمنا كُل شي من احنه
وصغار مو مثلكم انتوا تعلمون الاطفال مالتك
بأشياء كذب وما صايره وتخلوهم
يمشون ع شي اسمه قتل وسبي
وتضيعون حياتهم بالدينا واخرتهم بدون لا ذمه
ولا ضمير
ابو نوح : ااااه ههههههههه
ضحكت بصوت عالي وهو يباوع عليه
كأن احجي شي مو صحيح ويضحك
ع عقلي بقيت صافنه
اريد اعرف شلون غسلوا عقلهم بهاي
الطريقه شلون صار كُل هذا
من شوكت وهمَ يغسلون بعقول الناس ويشوفونا
احنه وكُل الي ويانه ناس كافرين!!!
ماتحملت عطت بيه
نارا: ومرررررض شبيييك تضحك مثل
المخبل شنو قابل اني حجيت وياك نكته
حتى تضحك هيج !!

ابو نوح : اتعلمين ؟
نارا : شنوووو بعد ؟؟؟؟
ضحك بخفه وسكت رد بجديه
ابو نوح : المجاهد لقد ذهب في سبيل الله
صفنت بوجهة عرفته يقصد
الي سويت اله العملية بقيت صافنه
رديت عليه بخوف
نارا : هاااا شنو !
ابو نوح : أنا اعلم انكِ قطعتي الشريان
للمجاهد وقد نلتِ منه بهذا الفعل
نارا : بقيت صافنه عليه وخايفة
يعني عرف زين شلون عرف اني الي قطعته ومات
بأيدي خفت وحسيت كلبي صار يدك
بقوه
هو رفع اديه وضرب وحده بالثانيه وصفك
ايد بأيد
ابو نوح : ذكية جداً
نارا : هزيت راسي معترضه كلامه واني أشر اله
لا لا شنو ليش هيج تحجي اني شعليه
شلون تتهمني هيج اتهام باطل
وتسمح النفسك تحجي وياي هيج من بعد
ما ساعدته وطلعت الطلقه منه وسويت
اله العملية
المفروض منك تحترمني ع الاقل لان أديت
واجبي ع اكمل وجه
ردت الزكها من كُل الطرق حتى اثبت
اله اني ماسويت اي شي وهو الغلطان بس
شكلي اني الي غلطانه بتفكيري هذا
ابو نوح : هل تعتقدين انا احمق لكِ أصدق
هذا الكلام منكِ انتِ ؟
لقد أرسلته إلى المستشفى لكِ اتأكد من حالته
ومن بعد الفحوصات التي أجريت عليه
قد تبين انهُ مقصوص ع اثره قد توفي المجاهد
قد وجدوا مقطوع وذلك القطع مُتعمد

سحبت نفس احاول اخلص نفسي
من المأزق الي اني بي
وأثبت العكس
نارا : وشنو الدليل الي يثبت اني الي قطعت
الشريان مو الطلقه ؟ لاتنسى ترى هو مُصاب
بهذا المكان يعني مو شرط اني السبب
يمكن الطلقه اخترقت هذا الشريان وقطعته
ابو نوح : أنا كذلك اعتقدت ذلك ولكن !!!
نارا: شنووو ؟
ابو نوح : قطع المقص يختلف عن قطع
الطلقه أيتها الذكية وقد تبين مقطوع في المقص
ولا ذنب إلى الطلقه اذاً انتِ
القاتلة
رجفت انفاسي مجرد كلمه انتِ قاتله
قشعرت جسمي مو قصدي اقتل روح
حتى لو كان كافر
نزلت راسي سألته بذنب
نارا : وعادي عندك صديقك يموت ؟
رفع اكتافه بعدم مبالاة راد
ابو نوح : لا يهم لقد نال الجنه هنيئاً لهُ الجنه

عقد حاجبه هذا شنو جاي يرطن
براسي هزيت ايدي كدامه واني اضرب رجليه
بكف ايدي صارد صوت اعتراض
نارا : خااب شجاااي ترطن انتَ فوك راسي
شجاااي تحجي ولك والله ريحه الجنه ما يحصلها
لا هوَ ولا واحد بيكم شايف حرف واحد
ماراح تحصلون منها هوَ انتوا
شكول الجنه ، متبريه منك
حتى رحمه الكم ماستتاهلوها
والله من عقلة يدور الجنه ويطلبها رجعت كملت
كلامي
لا وفوكاها واثق من نفسك وتكول
ذهب إلى الجنه ؟؟؟ ضحكت بصوت
عالي ، ولك ماكو ماتدخلوها انتوا بس فهمني
منو حطها براسكم هههههه
اريد اعرف منو الي قنعكم ؟
يعني تقتلون الناس بدم بارد وابرياء وتسبون البنات
وتاعمل بأقذر القذاره عندكم وفوك
هذا تطلبون الجنه ومتأكدين انتوا تدخلون
الها عفييييية شنو من عقلك عندكم
لحظه خليني اضحك ع عقلكم العفن لان ما اتحمل
كميه هذا الجهل الي تمتلكوا
صرت اضرب ع رجلي واني اضحك
وهو يباوع عليه كأن
اني كائن غريب كدامه وهو الي ع حق
ويشوف العكس بيه

ابو نوح : لماذا انتِ تتنازعي بهذا الشكل
لماذا لا تكفين عن قول هذه التفاهات والتراهات
لماذا لا تملين من قول
هذه الأحاديث لما عقلكِ بهذا الشكل
لماذااااا
سكتت غمضت عيوني رجعت فتحتهن
بدون ما اجاوبه ع سؤاله سألته
نارا : ليش ما تقتلني ؟
ارتفع خده بمكر وتقرب هامس
ابو نوح : حلاوة عشق القويه لاتعرفينهُ بعد
نارا : شنو تقصد ؟ المعنى شنو ؟
ابو نوح : المعنى أنني لا استطيع قتلكِ لان انا اعشقكِ
واعشق قوتكِ لقد عشقتكِ كثيراً أيتها الفتاة

باوعت عليه بتعجب شنو يحبني شنو يعشقني
هذا شبي
تخبل مارديت ع كلامه هم رجعت سألته
نارا : اذا انتَ تكول هيج زين ليش الحد
هسه ما متزوجني ولا عاقد عليه ؟ وتريد تقنعني ؟
تقرب من وجهي ونفخ نفس بوجهي
ابو نوح : اتريدين الزواج مني
من نفخ بوجهي اشتميت ريحه حيل مو طيبه
لعبت نفسي توقعت هذا خمر
وريحته هيج مو طيبه
قلبت معدتي وركضت للحمام وهو
يمشي ورايه ويضحك صرت اتقيء
وهو مستمر يضحك
حسيت روحي طلعت ويا ما اتقيء
غسلت وطلعت وهو بعده واكف
يضحك شبي هذا تخبل رسمي باوع عليه سألته
نارا : وفوك هذا تشرب خمر ؟؟؟؟؟
شلون تشرب وهو حرام اعتقد حتى انتوا
ما تشربوا ؟؟
اجه تقرب مني وضربني بكف ع خدي قوي
ابو نوح : ماذااا تتكلمين
نارا : هزيت ايدي انتَ سامع هذا المثل
يقتل القتيل ويمشي بجنازته هذا انتَ
تعرف ليش لان اني اعرف انتَ
الي ضربت هذا الي سويت اله العملية
وماتريد احد يعرف بيك انتَ ورى هاي
السالفه الهذا أخذته للبيت مو للمستشفى لان تعرف
لو همَ عرفوا او المسؤول عنكم راح يقتلك
مثل ما قتلته
كلامي صحيح واضح من ملامح وجهك
مو ؟؟؟؟
او حتى بدون ما تجاوب اني عرفت كلامي صحيح
والله اعلم شنو كلت الهم هسه وهمَ
صدكوا الهذا بعدك الهذا الوقت
عايش ومابيك شي

نرفزته بكلامي وهو تخبل
سحبني من شعري وجرني ورى خفت لان
هو شارب لا يأذيني
بس الحمدلله شمرني بالغرفه وطلع متعصب
من كلامي
الوضح بس اني الكشفته
لان ماكو احد تعرض اله او سبب اله مشاكل

بيوم جنت هستوني داشرب مي
جان يجي يسألني أسألة ماتدخل
العقل
ابو نوح : لماذا لا تتبعون " فلان "
نارا :وليش نتبع شخص هو ع غلط تريد
ندخل بالحرام لو مثل ماا انتوا تتبعوا احنا نتبعه؟
ابو نوح : ذلك هو الصح ان تتبعوا لما انتم هكذا
نارا : كُل واحد يتبع الي يريده ما لك علاقه
بالموضوع اطلع منها
خلي اكول لك شي ، الشخص الي تتبعوا
اي ان كان بدون ما احدد اسم
يشرب الخمر ويأمر بالفاحشه عكسنا عكس
الي احنا نؤمن بي ونتبعه دينا يكول
الامر بالمعروف والنهي عن المنكر
انتوا شنو دطبقون بهذا تصرفكم ؟ كُل شي الدين
حرمه انتوا حللتوا بكيفكم وهسه
جاي تكول ليش ما نتبعكم هو انتوا شنو
حتى نتبعكم
سكت انوب رجع سألني سؤال اغبه منه
خلاني انسطر بحيث
عطت بي
لك بس فهمنننني منو ديعلمكم هذا
الكلام ؟؟؟ شلون تحجي هيج و بأي حق
تدري هذا كفر ؟؟؟؟؟؟
انتَ جنت كاعد يمهم حتى تكول هيج
منو الي ديبلغكم بهاي التفاهات
ابو نوح : ذلك ما ذُكر في الكتاب
نارا : هنا اني استوعبت انُ عندهم كتاب خاص
بيهم من ذكر الكتاب عرفت كُل شي مذكور
بالكتاب بهذا الخصوص ع انُ الي مذكور بي
هو الصح عكس ما فهمنا بكُل حياتنا ويريدون
يخربون العقول بي
هزيت ايدي ورجعت رديت عليه
نارا : كُل شي يذكروا الكم بالكتاب ما اله صحه
وكُلة كذب بكذب
صفنت بعدين حجيت ويا هو هم صافن بوجهي
خاف صدكت انُ صديقك مات بسالفه
الجهاد وهوَ راح للجنه ترى اعرف بيك انتَ الي
قتلته ،
ضحك بصوت عالي ورد عليه
ابو نوح : ذكية جداً
هزيت ايدي ماعاجبني كُل كلام
نارا : بس مو اغبى منك

::- ( اذا كدرت انشر الكم صوره الكتاب
مالتهم بس مو هنا انزلها ع القناة التلكرام واقفل القناة حتى بس تشوفها لان ما اريد الصوره تنشر
يعني بس تطلعون عليها وبس واشوف اذا كدرت سكرينات من داخل الكتاب هم انزل
انتظروني بالقناة قلبي ).

مرن كم يوم العصر اني جنت غافية
لان الوحدي وشكد حاولت افتح الباب
ماينفتح لان قافله بأكثر من قفل
سمعت صوت ضجه حيل كبيره وصوت طلقه
فزيت خايفه لزمت كلبي خايفة ومرعوبه
ماعرف شنو هذا
الطلق ركضت اريد اطلع اشوف شكو
بس ماكدر الباب مقفول
بس اسمع الطلق حيل قوي
والهتافات مالتهم هم قويه بصوتهم
العالي بس ما افهم شنو يهتفون
او يهوسون
بس اسمع كلمتين واضحات يهتفون
بيها
" امسكنا المندسس "
منو يقصدون شنو يعني لزموا الخاين
الي بينهم لو شنو
بقيت افتر اريد اشوف اتمنيت اطلع
برى حتى اعرف منو يقصدون
مر الوقت إلى أن صار هدوء قاتل

شوي وانفتح الباب مال الشارع
انصدمت من دخل ابو نوح ويا واحد
بس انصدمت اكثر من شفت هذا
الشخص لازم وحده لابسه نقاب ويجر بيها
من اديها وهي مفرفحه من البجي
سريع تذكرت حالنا هم هيج صار
بينا شكلها هاي هسه مبيوعه وهذا الي اشتراها
يدخل بيها للبيت ويصيح عليها حتى تمشي
وهي بندت من البجي
اني من شفت حالتها صرت ابجي
ويا بجيها اتمنيت اخلصها من بين اديهم
واخلص نفسي وكُل البنات السبايا
الي اخذوهن
خليت اديه ع الجامعه الصغيره واني اراقبهم

_ هذهِ الفتاة امانه لديك ابو نوح إلى أن أعود
ابو نوح : حسنًا ادخلها لدي في الداخل غرفه
خاصه أغلق عليها بالقفل
_ حسنًا

نارا : شفتهم تقربوا ويسحبها اني
انهزمت رحت الغير مكان دخلت جوه الدرج
واباوع عليهم شلون دخلها هذا الي
لازمها ويسحب بيها سحب وهي تتوسل
يي حتى يعوفها الواضح هي صغيره
لان جسمها ناعم مو مال وحده جبيره بالعمر
اني ابجي ويا بجيها
شفت ابو نوح فتح اله وحده من الغرف وهذا الحقير سحبها دخلها بيها بالغرفه يدفع
بيها دفع يغلط ويسبها وهي ماتريد
تدخل لازمه ايده تتوسل بي وتحجي ويا
" الله يخليك الله يخليك عوفني والله اني مو منا
والله اني مو من الموصل عوفني اريد
ارجع لأهلي خايفة اني خايفه صغير بعدني
اريد ماما "
خليت ايدي ع حلكي امنع صوتي
يطلع ودموعي اتكت هذا حال بناتنا شلون هيج
بهاي السهوله يسوون بيهن
ماعندهم لا ذمه ولا ضمير
حسبي الله ونعم الوكيل عليهم
دخلوها وقفلوا عليها الباب اباوع انطى المفتاح
لابو نوح وكال اله " سوف أعود لاخذها معي "
هو ربت ع كتبه وهز راسه بقبول
وطلعوا اثنينهم سوه

وكفت رجليه ترجف اسمع صوتها
شلون تصرخ وادك ع الباب بأثنين اديها
اتمشيت الها واني ابجي
وصلت الباب سحبت انفاسي حتى اكدر احجي
وياها دكيت ع الباب خفيف
نارا : تسمعيني ؟
هي ردت بفزع
_ منوووو منوووو انتِ
نارا : اني نارا
_ الله يخليييج نارا طلعيني منا ساعديني
والله خايفة راح اموت من الخوف
ساعديني احس بطني توجعني ودارجف من الخوف
نارا : امسح دموعي ويرجعن ينزلن ، والله اني
هم هنا مثلج محبوسه صار الي قرب السنه
وما كدرت اطلع من هذا المكان
_ شلووون لعد الله يخليج والله راح يموتني
اليوم اشتراني وكال الي صرتي ملكي
شنو والله خايفة احس راح يموتني
ساعديني نارا ساعديني راح اموت خلصيني منا
نارا : جانت بالكوه تحجي من البجي واني
ابجي ع بجيها حيل ادمرت من سمعتها

اريد ارد عليها ماحسيت الا ع ايد صارت
ع كتفي فزيت خايفه التفتت لكيت ابو نوح
ورايه اكف وهو خازرني
ابو نوح : ماذااا تفعلين هُنااا ؟
نارا : اجيت اجيت لان سمعت صوتها تبجي
رفع حاجبه ورد بحزم
ابو نوح : اُتركيها وعودي إلى مكانكِ
نارا : بس خطيه اا..
ابو نوح : انا ماذا قُلت لكِ !!!! عودي الان
نارا : من بين اسناني حجيت عليه حقيرر
بس ما مشى وراي وسحلني
رجعت للغرفه كعدت اسمع صوتها ولا بطلت
بجي وبس تتوسل وترجع ادك
بالباب وتصيح حسيت كلبي اتكطع واني اسمعها

مر الوقت وصار هدوءءء لاصوتها ولا صوته
طلعت اتمشى
ع اطراف اصابعي هستوني فتحت الباب قليل
انتبهت ع ابو نوح
شلون اتمشى وراح لغرفه البنت
خليت ايدي ع كلبي بس لا يسوي الها
شي فتحت الباب وطلع اضم نفسي
حتى ما يشوفني
هو فتح باب الغرفه مالتها سمعت صوتها
صاحت
_ شنوووو تريد مني اااااطلع
ابو نوح : لا اريد ان اسمع صوتك .
نارا : انصدمت من كلامه هذا شنو يريد
يسوي اسمع صوت البنت اتصيح
تريده يطلع برى الغرفه بس هو مايقبل يطلع
تتوسل ومايسمع اله
بقيت واكفه بمكاني كلت اذا يسوي الها
اي شي اني ادخل وشنو يصير
خلي يصير

ثواني وسمعت صوت صراخها العالي
وكع كلبي من الخوف
مديت راسي لكيته لازمها ويجرب بيها عليه
وايده الثانيه لازم بيها خصرها هي
البنت صغيره وناعمه وهو عكسها
ادفع بيه وتبجي وهو يحاول
يتقرب منها
هستوني ردت اركض ادخل الغرفه وسمعتها
اتصيح بأسمي
_ ناااااارااا ساعددددديني
اتذكرت اختي ركضت للغرفه ودخلت
لزمته من ظهره احاول اسحبه منها
بس ماينسحب اصيح عليه
لككككك حقيييييرررر عوفهاااااااا الله ياااخذذذذك
شكد احاول بس عبالك علج وملزوك
مايوخر انوب لازمها ب أديه الاثنين
صاح بيه بصوت عالي
ابو نوح : ايتهااااا ال**** ابتعدي
نارا : احتررررركوااا اهلك لك عوفهاااا يانذذذل
بعمر بنتك ماتششششوفها شلون
صغيره عوفهااااا
مايسمع الي يريد يعتدي عليها وما همه إذا كدامي
او لا
لككككككك ابوووو الووووصخ عووووفها لا اموتك
دفعني ب ايده ورجع لزمها
اني نزلت ع ايده الي لازم بيها البنت
وعضيتها بكُل قوتي بحيث صاح صيحه
كلت هذا راح يولد الدم حسيت
بي بحيث اللحمه مال ايده شلعتها
عاف البنت من ايده هي انهزمت النهاية الغرفه
التفت عليه

ابو نوح : ماااااذا فعلتي أيتها ال*****
نارا : والله ماكو واحد **** هنا غيرك انتَ
ابو نوح : سوووف اقتلكِ
نارا : جان حاط ايده ع العضيتها ويفتر متألم
تقرب مني وصار يضرب بيه
اسمع صوت صراخ البنت تصرخ خايفة
واني شكد ما حاولت اخلص نفسي
ماكدر
عهد ع نفسي بس يطلع الا انهزم اني والبنت
حتى لو خطر ع حياتنا
يكفي الي صار بينا من يمهم يكفي
حتى لو اضطر اقتل واصير مجرمه هم عادي
اصير مجرمه في سبيل حريتي ،
صرت احس بالدوخه لان ضرباته صارت
حيل قويه واغلبها يضرب
ع بطني ومعدتي
اما وجهي ف صارت حصه ايده الكفخات الي
حسيت بيهم ماينعدن
دمرني بالضرب
من شافني ما اصيح اتخبل
طلع برى يركض ماعرف شنو يريد
امدده ع الارض اباوع للبنت فرفحت من البجي
حجيت وياها بالكوه
نارا : عهد عليه اذا طلعت منها الا نطلع من هذا المكان سوه
اتحملي
هيَ بعدها رادت تحجي وهو رجع دخل للغرفه
ماردت اشوف
شنو شايل بأيده
بس صرت ادعي بكلبي هاهي يانارا
اذا تخطيتي هذا الي ديصير انهزمي انتِ قويه
وراح تتخطين راح تطلعين
الله واكف وياج راح يساعدج ..
ثواني وانهال عليه بالضربات ماعرف منين
تجيني
ع راسي ع اديه ، رجليه ، وجهي حتى وجهي
ما كدرت احمي
صرت احس
بالحروره تطلع من خشمي
وجهي صار يحركني
تعبت وبعدها ماحسيت عليه
فقدت ..

بعد فتره صحيت المكان أظلم ماكو اي ضوه
خفت هذا وين ماخذني
ردت اتحرك صرخت متألمه
اني وين ليش هيج المكان صرت اني ونايمه
اتلمس المكان خفت لا مسوي
بيه شي
بس ماحسيت اكو شي يمي اطمنت
بس اريد اتحرك ماكدر احس سياره
ماشيه
فوكايه ومكسره
كل شي بيه بحيث اعضامي تصيح
من الالم
سندت اديه ع الأرضية ورفعت جسمي
وجهي من الجروح الي بي
بس عقدت حاجبي صار يوجهي
لانُ كُلة مجرح
وكفت واني تلمس الحايط امشي
اريد اوصل للباب مال المكان الي اني بي
آو اوصل النقطه حتى اشغل الضوه
بس ما لكيت اي شي
كأن الغرفه فارغه
ارتعد كلبي اني وين ؟؟؟؟؟
وصلت الباب ودكيته
منوووو هناااا !!!! افتحوا ااالبااااب الي
افتحوووووا ،
ماكو ما انفتح اصلاً حتى ماكو اي صوت

انشغل بالي بالبنت الصغيره وين
راحت من فقدت بس لا سوه
الها شي او اعتده عليها او قتلها لو سلمها
لهذاك الحيوان الثاني
خليت ايدي ع راسي يااااااربي شجااي يصير
ليش كل هذا والله ما اتحمل بعد
اكثر من هيج شي
احس صبري بلش ينفذ
شكد حاولت افتح الباب عجزت الهذا كعدت
بمكاني انتظر الفرج
الغرفه ظلمه حيل خفت بس بقيت اقرا
بكلبي حتى اطمن نفسي ماكو اي شي

ماعرف شكد مر من الوقت حسيت
ع قفل الباب يتحرك وكفت
استعد سريع انفتح الباب واندفع بقوه
انلزك بالحايط وصار صوت
قوي
دخل الضوه للغرفه بحيث صرت
اشوف بس خيال الشخص والضوه
كُله بوجهي
خليت ايدي ع راسي حتى اشوف منو هذا
بس قوه الضوه واني جنت بالظلمه
حسيت عيوني يأذني
تقرب مني من حجه عرفنه ابو نوح
سألته
نارا : وين ووووديت البنت شنووو سويتوا
الهااااا ياظالمين؟؟
صوته جان مو طبيعي وحتى بالبداية عبالي
مو هو بس من تقرب يلا شفته
زين ليش هذا صوته هيج
ابو نوح : هههههه هل انتِ خائفه
نارا : لااااا وين وديت البنت ياحقيرررر ليش
مداسمع صوتها وين اخذتوهااا
ابو نوح : أخذها الذي اشتراها انها مُلك لهُ
كما انتِ مُلك لي انا وحدي
نارا : امداااااك وامداني اذا اني ملك لك
انتَ مخبل من كُل عقلك تحجي هذا الحجي حيوانات انتوا شلون أخذها هسسه يسوي بيها شي

تقرب مني وصار يمشي
بأتجاهي
لزمت كلبي هذا شبي
ماحسيت الا لزمني وقربني منه
صرخت خايفه
حتى يعوفني بس هو دفعني بالكاع وصار فوكي
احس روحي متت اختنكت صار
ثقل جسمه فوكاي وانكتمت انفاسي
صار يحاول يعتدي عليه ويبوسني
اجتي ريحته ترس خشمي
مُقرفه إلى أبعد درجه لعبت نفسي واني منا
جسمي ضعيف من الالم والضرب
وفوك هذا هو صار فوكاي
حسيت فقدت السيطره ع نفسي
وماكدر اطلع من يمه
رفعت ايدي وصرت اضرب بيه وهو
يحاول وياي
صرت اصرخ يااااا الله ساااااعدني يااااااعلي
ياااااااربي
لككككك عوووفني حيوان خسيس
كلب عووووفني ، حط ايده
ع حلكي وسد حلكي بأيده فتحت حلكي
وعضيت ايده
صاح متألم واختل توازنه رجعت
دفعته من صدره وضربته
بكف ع وجهة حييييل قوي

حسيت صار مثل الثور حار شنو يسوي
اجه بتجاهي وصار يضرب بيه
ضربه اقوه من الثانيه
صوتي راح من الصريخ وهو يصيح
ابو نوح : سوووووف اقتلكِ أيتها الحقيررررره
وكف ع طوله وسحبني ويا
اني ادفع بي ما اريد يسحبني
بس هو اقوه مني رغم هو مخمور بس
كدر يسحبني
طلعني برى طلع حابسني بنفس البيت
بس بغرفه فارغه
سحبني وصعدني بالسياره
وقفل الباب
واني احاول اطلع
هو صعد وشغل السياره ومشى

نارا : لككككك وين مااااخذذذذني بهذا اليل
وووووووين
ضرب السياره بكُل قوته ع المقود وصاح
ابو نوح : يكفي صُرااااااخ لا اُريد سماااااع صوووتك
نارا : موووووبكيفك مو ع مزااااججججك
اصررررررخ وغصب عنك شنوووووو تريد تسسسوي
عبالك اني حيوانه امشي وراك وشنو تريد
اشوي بأحلااااامك ياحقيررررر
بدون ما يحجي مد ايده وضربني ع حلكي
شفتي نبتت باسناني وانجرحت
ابو نوح : قُلت يككككككفي
صارت تمشي السياره والدنيا
ليل بحيث خفت هذا وين ماخذني
ليش هيج
ديصير
يارب ساعدني
مشت السياره هواي وهو كل شوي يريد
يدعمنه بشي شكله مخمور
ويريد يسوي النا حادث ويقلب السياره
بينه
إلى أن وكف السياره

صرت اتلفت بالمكان مابي اي احد
ظللللمه الدنيا ليل وبس صوت
الكلاب ينسمع بس حيل بعيد
حسيت بالخطر والخوف ياربي هذا شنو
ناوي يسوي وياي
نزل من السياره
واجه بتجاهي
كلت هاهي حياتي انتهت رحتي بيها
يانارا
فتح الباب وسحبني بقوه من ايدي ونزلني
نارا : بسسسسس فهمني وين تريد
تاخذني ليش اجينه هناا
ليش شنو تريد تسوي بيه اترررركني
ماحجه اي شي
صرنا مسافه عن السياره بس الضوه مالتها
مالي المكان
دفعني بقوه ع الكاع ، كلها تراب بحيث
صار التراب بحلكي اختنكت صرت
اكح لتفتت عليه
وانصدمت ..

طلع السلاح وحطه بتجاهي شكله
طافي يروح منا ويرجع منا
بس يصرخ وعصبي
صاح بوجهي
ابو نوح : انطقيي الشهااااده
نارا : هاهي ماكو امل اعيش بعد
انتهت حياتي السلاح بوجهي وهوَ ماواعي
ع الي ديسوي بيه
العضب عمه عيونه
وراح يكتلني
واكف كدامي واني ع الارض
خليت ايدي ع كلبي ابجي خايفة حيل خايفة
صرت اردد وفكي يرجف
وجسمي كُله يرجف
" اشهد ان لا اله الا الله وأشهد أن محمد رسول الله وأشهد أن علي ولي الله "

ماحسيت الا بصوت الطلق وحده ورى
الثانيه طلعت
طلقتين ، صرخت بصوت عاااااالي ،
حسيت روحي فرفحت حسيت
بالالم صار برجلي حيل قوي صرت انازع
وافرفح ع التراب هو عافني يغلط صعد بالسياره
وراح
اني صرت اتشاهد وحسيت حياتي
كُلها صارت كدامي
كُلهم صاروا كدامي شفت الموت بعيوني
إلى أن بعد ماحسيت بأي شي
واغمى عليه
ورى فتره
نايمه فاقده وحسيت بدفره قويه
اجتي بطني فزيت وطلع صوتي بالكوه من التعب والألم الي احس بي
والتراب داخل حلكي كحيت بخفه واني اريد
اشوف عدل لكيت واحد كدامي ، ماكدرت
اكوم ، صاح
_ شنو هاي ميته ! هيييي انتِ ميته!!؟

ــــــــــــــــــــــــــــــ•●•ـــــــــــــــــــــــــــــــ
يتبع ..

تتوقعون منوووو الي لكاهااا ؟
لااااااااتنسسسون التصووويت
والتعليقات احبكم

قلبي البربر طويل ومدا اتأخر بالتنزيل
واذا تأخرت بيوم اسوي طويل من انزله
والتنزيل منتظم مرات بين يوم ويوم ومرات بالسبوع ٣ مرات ف تحسوا قصير
لان تتحمسون للأحداث، الي اكتبه بساعات
تقروا بدقائق قليله هيج حتى ما تحسون
بالتعب الي اتعبه ف تتوقعوا قصير ،♡