الربتج " حالك الاسوداد " الفصل التاسع والعشرون 29 - بقلم رهف علي

معاذَ اللَّه؛ ما أنهيتُ وُدًّا بَدأتُه،
إلاَّ بعدمَا رأيتُ أنَّه قَد هانَ وُدِّي

ماذا لو قُلت لكَ انا احبك ؟

^^^^^^^^^^

- نارا :- بهت وجهي واحس كلبي صار يدك
وكفت ع السريع شُعاع بصفي مستغرب شلون وكفت
بهاي الطريقه رفع عيونه عليه يسألني
- شُعاع :- شبيج حبيبي اكعدي
- نارا :- شُعاع
- شُعاع :- ها حبيبي
- نارا :- رجفت شفايفي ، كوم الزمني راح اوكع ماكدر اوكف بعد ، هو سريع وكف ع طوله لزمني وحطني جوه
جناحه
- شُعاع :- اهدئي شبيج بابا
- نارا :- رفعت عيني ع الكدامي اباوع وهنَ يباوعن عليه
مستغربات مني ومن حركتي بس اني اريد ابجي
مو متحمله احس جسمي كُله صار يرجف رجف مو طبيعي سندت نفسي ع شُعاع وتقربت منهن وهو يحجي وياي يحاول يفهم مني شنو الي بيه بس اني ما احجي
استمريت امشي إلى أن صرت كدامهن

همست واني شفايفي ترجف وكلبي احسه
يريد يطلع من مكانه اديه ضاغطه عليهن حتى ما تبين
رجفه ايدي وينتبهون عليها ، جليت صوتي وسألتها بتوتر

- نارا :- انتِ شهد مو !
هي عقد حاجبها بأستغراب وسألتني
- منو انتِ صوتج مو غريب عليه ؟
- شُعاع :- شبيج حبيبي ياشهد ؟؟
- نارا :- بدون ما اجاوب عليه أو عليها سريع دفعت ايد شُعاع من كتفي وبخفه ارتميت وحضنتها بكُل قوتي صرخت واحس طلعت من كُل كلبي
ييييااااااا ييييييييمه
ابجي ودموعي تنزل مامصدكه هاي شهد وبصفها زهراء واكفه تباوع عليه مصدومه وكدامها الأطفال يبجون تباوع عليهم ومره ترجع تباوع عليه شلون حاضنه اختها اني ماكدر احس فقدت فد مره وبس ابجي جسمي احسه يرجف احس بأيد شُعاع يحاول يسحبني واسمع صوت زلم بصفهن يصيحون ( شكو منو انتِ ) واني بس ابجي سحبني شُعاع ابتعدت عنها ابجي هن يحاولن يفهمن مني لان صوتي مو غريب عليهن وهنَ هم ما مستوعبات وخايفات مني
- شهد :- منو انتِ ؟؟؟
- نارا :- شهد شهد هاي اني نااارااا اختجن.

نقربت زهراء مني مصدومه

- زهراء :- شنوووو كُلتي ؟؟؟
- نارا :- هزيت راسي ارجف وابجي ، اي اي اني نااارا ،
نزلت دموعها مصدومه
- زهراء :- لا تجذبين علينا
- نارا :- وداعه علي هاي اني نااراا ، انتبهت ع شهد بقت جامده بمكانها ركض عليها واحد حضنها اما زهراء تقربت مني ارتمت بحضني كعدنا ع الارضيه بنص المطار نبجي بجي ما صاير اني اشهك بالبجي واصيح وهي هم تبجي حاضنتها الكلبي ابجي واحس كلبي احترك بنارا
ما مصدكه مصدومه مامصدكه هاي شهد بحضني وزهران كدامي احس روحي فرفحت من البجي ما اهتمينا للناس الي تباوع علينا ما اهتمينا حتى إذا صوروا او لا كُل الي بالي اخواتي من بعد سنين طويله لكيتهن كدامي ما ميتات تقربت من عندنا شهد وكعدت ويانه حضنتهن اثنينهن ع كلبي نبجي ونشهك بالبجي احس ودي ادخلهن بكلبي واسد عليهن ما مصدكه ابتعد عنهن امسح بوجهن وابوس بيهن وهنَ يبوسن بيه ويبجن

رفعت راسي الشُعاع صافن علينا عرف هذن اخواتي
هز الي راسه وابتسم بوجهي رجعت رفعت راسي ع الاثنين الي واكفين كدامي ماعرفهم مستغربين ويباوعون عليه بريبه مايعرفوني اني منو ولا اني اعرفهم منو هذول
حتى الأطفال الي بصفهم ما اعرفهم فوك الساعه احنه بس حاضنين بعض ونبجي ونحجي بعشوائيه مانعرف اذا نسأل عن صحه بعض لو عن شوق بعض لو شنو بالضبط
ورى ساعه صاحوا بخصوص موعد الطياره اني رفعت راسي اباوع

- نارا :- شنو راح تعوفني
- زهراء :- لا لا ما نعوفج وياج احنه
- نارا :- الصدفه بنفس الطياره احنه سوه احس كلبي يريد يطلع من مكانه مشيت وياهن وهن وحده منا حاضنتني والثانيه من الجهة الثانيه نسيت كل شي حتى شُعاع والجنط وكُل شي همي بس اخواتي صعدنا بالطياره واني بس ابجي شُعاع كعد بصفي
- شُعاع :- اهدئي حبيبي كافي بجي شنو تريدين اسوي الج اذا تريدين اخليج وياهن
- نارا :- ما اسيطر ع نفسي شُعاع احس جسمي جاي يرجف بقوه ، هز راسه الي ولزمني من اديه بقوه يحاول يخليني أهدأ
- شُعاع :- اهدئي بابا هسه بس نوصل وننزل من الطياره اشوف وين يروحون وأخذج الهم
- نارا :- والله !!
- شُعاع :- وداعه عيونج الحلوه الا اخذج الهن بس بطلي بجي مو كلبي خلص ويا دموعج
- نارا :- فتح البطل مال المي وغسل وجهي بي وشربني مي رجع طلع لبن واخذ ملح من المضيفه وحط بالبن علمود ضغطي وجسمي الي بس يرجف صار يرفعه الشفايفي يشربني وينزل البطل يمسح شفايفي ويرجع يشربني واني الدموع متعلقه برموشي
خلصته تقرب باسني من راسي ويحجي وياي بحنيه
- شُعاع :- اششش اهدئي حبيبي

- نارا :- بقى لازمني من أديه ويفرك بيهن ع كيف حتى يحاول يشتت بالي بس اني بقيت بس صافنه الي صار شي يعجز العقل انُ يستوعبه أشخاص جنت متوقعه استشهدوا اخر شي طلعوا عايشين وبالصدفه شفتهم لا هذا الشي ما ينوصف ابد ، حتى ما حسيت بالطياره ولا الساعات الي بقينا بيها ولا المده رغم هاي اول مره اسافر حتى رهبه الطياره ما حسيت بيها ولا بالي يمها
مر الوقت غفيت من التعب والبجي إلى أن وصلنا التركيا
نزلنا من الطياره ورحت عليهن ركض حضنتهن ودموعي نزلن وهن هم بس يبجن ما مصدكات انتبهت الهذول الاثنين وياهن والأطفال هم بعدها عرفت هذول ازواجهن والأطفال اطفال اخواتي حتى بقيت ما مستوعبه يمتى
اتزوجن وهن صغار يمتى صار عندهن اطفال معقوله هيج السنين مرت بهاي السرعه وهيج كُل شي تغير بهاي السهوله شلون وليش وشوكت كُل هاي ادور براسي

اتقرب شُعاع سلم عليهم وسألهم

- شُعاع :- أي فندق راح تنزلون بي
- والله فندق اسمه ^^^^
- شُعاع :- سهله لعد خلي احجز بهذا الفندق وياكم علمود نارا تكون قريبه من اخواتها
- نارا :- الفرحه ترست كلبي وحتى هنَ فرحن وياي
اتوجهنا للفندق وصلنا ودخلنا هن ويا ازواجهن يتهامسن
اني رفعت راسي الشُعاع سألته ، شُعاع عادي تتركني ويا اخواتي ؟ هو باوع عليهم ورجع عليه
- شُعاع :- بابا خاف يريدون يرتاحون
- نارا :- قوست شفايفي بزعل اريد وياهن
- شُعاع :- اصبري

- نارا :- واحد منهم صاح ع شُعاع
- شُعاع تعال خلي البنات بغرفه واحنه بغرفه
- شُعاع :- اهااا صار
- نارا :- ضحكت بفرحه وهن يضحكن وياي حجزنا الغرف ودخلنا للغرفه نضحك فرحانات حاضنتهن بقوه وابوس بيهن واشم بيهن هذن من ريحه اهلي وهن يبوسن بيه
رفعت اديهن ابوس بأديهن وهن عيونهم مدمعه كعدت ع السرير وهن حطن روسهن بحضني صرت اسألهن وهنَ يجاوبني بقهر .

- نارا :- وين اخذوكم وشنو صار وياكم ؟
- اول ما اشتروني اني واحد عقد عليه بقى يعذب بيه ويجبرني اسوي شغلات واني بس ابجي اتمنيت يقتلني بس هو ما قتلني استمر يعذب بيه إلى أن اعتدى عليه واغتصـــــ**
- نارا :- فتحت عيني مصدومه همست برجفه ، شنو ؟؟
وهن بس يبجن ويحجن الي كأن يشكن من كل حياتهن
- اي نارا اذاني هواي ودمرني واني لاحول ولا قوه صغيره وما اكدر اله وهو اكبر مني
- نارا :- بقيت مصدومه رجعت الثانيه حجت وهي تبجي
- اني اخذوني ويا ماما
- نارا :- ماما ؟؟؟
- اي ماما اخذوني وياها المكان وخلوا ماما تشتغل واحد منهم راد يتزوجها بس هي ماقبلت وبقت تصيح شلون واحد يريد يتزوجها وبوقتها طفرت وما نعرف بيها اذا انقتلت او لا لان هي ما رادت تزوج وبوقتها صارت تصيح عليهم بهاي الكلمه ( مُستحيل ع مووووتي )
- نارا :- احس كلبي انزرف ويا كلامها بقيت ارجف رجعت
سألتها بغصه ، ومينا وينها ؟؟ هن سكتن يبجن رجعت سألتهن ، مييناااا وينهاااا ؟؟؟

احس حطن سجينه بكلبي من نطقن بكلمات اشبه بالخنجر ونبت بنص كلبي
- مينا ماتت وهو يغتصب بيها مااتت وهو يعتدي عليها

- نارا :- شهكت بصوت عالي واحس روحي طلعت صرخت ، ششششششنوووو ؟؟؟؟؟ هنَ يبجن واني ابجي واشهك احس كلبي راد يطلع من مكانه بجيت بجي ماصاير كل ما اتخيل مينا الصغيره شلون ماتت اموت اني الف موته رجعت سألهن واني اشهك
اخواني وينهم ؟؟ ما تعرفن عنهم شي ؟؟
- زهراء :- نارا ما نعرف عنهم اي شي
- نارا :- بقيت ابجي واشهك اكيد همَ هم ماتوا مو بعيده اذا كُل اهلي ماتوا وهم صغار جانوا اكيد ما يتحملون
اااااخ كلبي شششلون بينه بقينا نبجي إلى أن صوتنا راح
وماحسينا بالوقت شكد مر ع البجي

مسحت دموعي احاول اعرف شلون صارت حياتهن
من بعد كُل الي صار

- نارا :- شلون اتزوجتن ؟
- زهراء :- من صار التحرير الموصل احنه طلعنا كدرنا نطلع صادف واحد بوجهنا من الحشد أخذنا اني واختي
البيتهم بقينا هناك سنه كامله يمه ما اتقرب من عندنا بالعكس جان زين ويانه واهتم بينه ورى هاي السنه
عرض عليه الزواج واني قبلت وأما صديقه اتزوج اختي
- نارا :- اني بس استمع الها واهز براسي هي ابتسمت بوجهي ، زين اطفالج شنو اسمهم هي ضحكت
- زهراء :- نارا وعلي
- نارا :- ابتسمت بفرحه وحضنتها ابوس بيها رجعت سألت شهد ، وانتِ ؟؟
- شهد :- مينا ومجتبى
- نارا :- باللحظة وحده حسيت كُل عائلتي وياي حضنتهن الكلبي ابجي ابتعدت عنهن امسح بوجهي

- زهراء :- وانتِ نارا شنو صار وياج
- نارا :- سحبت نفس وزفرته ، اني صار وياي هواي شغلات واولهن رادوا يستخدموني ضد الحشد بحجه اني قويه
- شهد :- عزه وشنو صار
- نارا :- اكيد ما سويتها وماخليت احد يتقرب مني
- زهراء :- شلون كدرتي وهمَ اقوياء احنه شكد حاولنا اندافع عن نفسنا بس ماكدرنا
-

نارا :- ماعرف والله بالرغم شفت منهم أشكال التعنيف والضرب والقتل بس جنت ع طول استنجد بربي وأهل البيت ماشافوا من ياي نتيجه ترضيهم اخر شي أخذني وضربني طلقه وشمرني عباله اني متت بس الله كتب الي عمر جديد ولكاني شُعاع بهذاك اليوم واني بأااخر انفاسي وعشت عنده فتره
- شهد :- شوكت طلعتي
- نارا :- من صار التحرير
- شهد :- تدرين احنه تقريبا قبلج بسنه طلعنا من الموصل من لكونا الحشد سريع طفرنا قبل لا يصير التحرير يعني هاي مجرد شكليات نكول من تحرر الموصل
- نارا :- ما حاولتوا ادورون ع امي
- زهراء :- والله حاولنا بس ماكو نتيجه
- نارا :- نزلت راسي بخذلان والدمعه بطرف عيني

- زهراء :- نارا احنه راح نستقر بتركيا مانرجع للعراق
- نارا :- شششششنو !!! يعني ما ترجعون
- زهراء :- لا والله بعد ما نرجع حيل تأذينا من جنه بالعراق انريد نرتاح راح نستقر كُلنا هنا
- نارا :- دمعن عيوني ، زين واني ؟؟؟ ماكدرن يحجن سريع حضنني وصارن يبجن عرفت بيهن حيل متأذيات واني ماكدر اساعدهن حتى يطلعن من الي هنَ بي اذا اني بنفسي ما اتخطيت شلون هنَ وجانن حيل صغار ماكدرت اسوي شي ، تبادلنا الارقام وبقينا نحجي إلى أن غفينا

ثاني يوم اندك الباب لكيناهم كُلهم برى
واكفين شُعاع ومُلهم وسائب ، سائب عيونه ملونه خضر صحت للبنات اجني وكفن يمي
جانوا واكفين يباوعون علينا احنه حصرتنا الضحكه ع شكلهم هزيت راسي سألتهم

- نارا :- محتاجين شي ؟ ردوا عليه " لا يعني ملابس اذا سمحتوا " جان شكلهم يضحك ماعرف ليش ضحكنا وهمَ هم ضحكوا ع شكلنا تقرب شُعاع مني يحجي وياي بهمس
- شُعاع :- بويه اريدج
- نارا :- ما
- شُعاع :- منا منا
- نارا :- ما
همَ يباوعون ويضحكون نطق سائب وهو يضحك علينا
- سائب :- شهدي ممكن اشوفج
- شهد :- لا شُكرأ
- مُلهم :- زهرتي
- زهراء :- قبل لا تكمل اششش ولا حرف يعني لا
- نارا :- الضحكه بالكوه لازمتها هزيت راسي الهم ، ماكو اي نتيجه عيني ارجعوا
- شُعاع :- زين نطلع ؟
- نارا :- بنفس الوقت صحنه ، اااااي
- سائب :- ها هاي لان طلعه كيفتن
- شهد :- اي عيني شعبالك يلا اطلعوا خلي انبدل
- نارا :- اني ملابسي يم شُعاع
- شُعاع :- اي صح ملابسها عندي
- نارا :- انتبهت البنات طلعن وياهم اتوقعت حاجزين كُل واحد غرفه الوحده مو سوه

اول ما طلعوا اني ويا شُعاع دخلت اريد البس وهو اجه عليه يعض بأيده واني اضحك لزمني من أيدي
- شُعاع :- اااخ منج ااااخ شلون تعوفيني الوحدي
- نارا :- ههههه وين عايفتك هي بالغرفه الي يمنه
- شُعاع :- لجج اخخخخ منج اشتاقيتلج
- نارا :- اششش ولا حرف خلي ابدل ، احجي ويا واضحك
غيرت لبسي واجيت اخلي مكياج كملت ورتبت نفسي وهو صافن عليه
- شُعاع :- اريد بوسه
- نارا :- رفعت كتفي ، ماكو خليت حمره ، تقرب مني مدخن
- شُعاع :- شوفي ولج هسه اشمرج منا
- نارا :- اي يلا اشمرني
- شُعاع :- تعالي اشمرج بحضني
- نارا :- هههههه لا
تقرب مني غصب عني وباسني من شفايفي هي الحمره بعدها ما ناشفه باوعت ع وجهة وضحكت بصوت عالي صحت ، شششوف شصار بيك هو شاف نفسه وصاح
- شُعاع :- اشششتعلواا انتِ من وين هذن حمرج
- نارا :- صار يمسح بوجهة واني خربانه ضحك عليه
غسل وغير ملابسه وطلعنا .

اول ما طلعنا اخواتي اجن يمي سريع لزمني من ايدي
كأنهن صغار هم يباوعون علينا مستغربين ابتسمت لزمت اديهن
- سائب :- يلا امشن
- نارا :- صاروا كدامنه بيدهم الأطفال واحنه وراهم نمشي واندردش سوه و وحده لازمه ايد الثانيه
التفت شُعاع يحجي ويانه
- شُعاع :- شكد تكركرن
نارا :- ضحكوا همَ
- مُلهم :- غير الخيل تلاكت ويا الخيل وصاحت طربك طربك
- نارا :- ع مثل مُلهم ما تحملنا وضحكنا صاحوا صوووتجن واحنه بالكوه لزمنا نفسنه ، طلعنا غيرنا جوه واتريكنه برى بالمطعم الجو جان حلو والنفسيه انفتحت اكلت عن طيب خاطر احس نفسيتي اتعدلت بهاي السفره لان اخواتي يمي ورى ما كملنا رجعنا للفندق حجيت ويا اخواتي يروحن يم ازواجهن لان عيب تاركاتهم واني يم شُعاع واذا رادن شي مني يتصلن عليه هن ما اعترضن بالعكس حضنني حيل وباسني و راحن واني رحت الشُعاع

رحت الشُعاع اول ما شفته حضنته بكُل قوتي فرحانه
صحت بصوت عالي
- نارا :- ااااااحبك اااااحبك ، هو ضحك
- شُعاع :- واني احبج
- نارا :- احلى صدفه بحياتي صارت
- شُعاع :- واني ؟
- نارا :- انتَ حياتي كُلها
رجع حضني بقوه يبوس بوجهي مامصدك خاصه اني هسه
انفتحت نفسيتي وغير عن قبل وما تركني ابد كُل شويه ساحبني ويحضن بيه واني ويا ما تركته ابد ارجع مثل ما يسوي اني اسوي ويا وابقى ابوس بوجهة وهو يضحك يصيح
- شُعاع :- لججج وين جنتي وووووين
- نارا :- اني اكزكز عليه وهو عليه احس هسه اعيش الحُب ويا ع اصوله وحيل ارتاحيت إلى أقصى درجه

بقينا بتركيا اسبوع كامل واحنه سوه نطلع نتونس ونرجع
وبقيت وياهن هواي وبعدين ارجع يم شُعاع وهنَ هم نفس الشي بحيث حيل حبيت الوقت بتركيا وما ردت يخلص ابد
بيومها رجعت للفندق اني وشُعاع وهو حجه وياي

- شُعاع :- حبيبي لازم نرجع عندي شغل
- نارا :- اني بقيت صافنه بوجهة
- شُعاع :- والله مو بيدي لو بيدي جان بقيتج يمهم اكثر من هيج بس عندي شغل
- نارا :- سحبت نفس همست اله ، تمام
بس اني حيل اختنكت صح اسبوع بقيت وياهن بس مو بيدي اريدهن العمر كُله يمي اول موعد للطياره واني بقيت وياهن من الصبح الى ان كال يلا نروح بالكوه طلعت منهن خلصناها بس بجي لان خلاص هنَ راح يستقرن هنا بتركيا وما يرجعن وياي يعني ما اشوفهن بعد الا كُل فتره طويله ، سحبني شُعاع وطلعنا للمطار
اول ما صعدت بالطياره بجيت بقله حيله مو بيدي والله
مسحت وجهي وشُعاع يحجي وياي
- شُعاع :- حبيبي همَ يريديون يقيمون بتركيا يعني مو بأيدي شنو اعوفج وارجع واني ما فكرتي بيه
- نارا :- لا مو تعوفني
- شُعاع :- صدكيني كل ما تشتاقين الهن اني اجيبج بأيدي ، ياعمري كافي تدرين من تضوجين هيج تقهريني
- نارا :- شُعاع اني احبك احس بس انتَ البقيت الي ،حضني قوي وباسني من راسي
- شُعاع :- الله يقويني واسوي كل الي تريدي والبخاطرج

رجعنا للعراق أخذنا سياره ورجعنا للبيت دخلنا استقبلونا
كُلهم سلمت عليهم وصعدت فوك شُعاع ورايه يمشي

- شُعاع :- افرديها شوي
- نارا :- رفعت راسي ابتسمت بوجهة
- شُعاع :- مو عندج ارقامهن اتصلي عليهن كل يوميه
- نارا :- ان شاء الله، تقرب أخذني بحضنه
- شُعاع :- مشتاقلك ولك
- نارا :- مو يمك اني
- شُعاع :- اني كل ساعه اشتاقلك ياحلو
- نارا :- ههههه حتى اني
- شُعاع :- باعي الأغراض لا تفتحيهن وترجعيهن المكانهن ولمي الباقيات حتى يومين ان شاء الله ونروح البيتنا
- نارا :- صدُك !!!!
- شُعاع :- اي وعيونج
- نارا :- زين وأهلك كلت الهم
- شُعاع :- هم رجعت الاهلي ما الج علاقه ياروحي هم يدرون
- نارا :- تمام يعني البيت كامل
- شُعاع :- اي كامل بس ترتبين بي الملابس
- نارا :- تمام .

رحت سبحت وطلعت وهو نزل جوه مالكيته اتمددت ع السرير واتصلت ع اخواتي كامرا حتى اطمئن عليهن وابلغهن احنه وصلنا بعدها سديت الاتصال وبقيت متمدده افكر بعدها اتصلت ع عنقاء
- نارا :- هلوو
- عنقاء :- هلا بالراح ونسانه
- نارا :- حبيبتي ع طول انتِ ع بالي
- عنقاء :- فدوه الج
- نارا :- راح ننتقل البيتنا
- عنقاء :- اي احسن حتى اكدر اجيج لان انتِ وهنا ماكدر
استحي أمر عليج
- نارا :- اي اني هم كلت هيج بس باعي ارد اروح اني وياج حتى نشتري اشياء محتاجتها ،
بعدني داحجي وياها ولعبت نفسي خليت ايدي ع حلكي ورحت للحمام اركض اتقيء وهي وياي ع الخط ناسيته
تصيح الو واني احس روحي طلعت اني انتهيت فد مره
ماحسيت الا مصطفى فوك راسي يسألني
- مصطفى :- شبيججج
- نارا :- ماعرف، رديت عليه بالكوه ع صوته كلهم صعدوا ، رجعت كملت ، ماعرف بس لعبت نفسي حيل، اشو هذول واحد يباوع للثاني ويضحكون الحمدلله ع وعدك ياربي
- مصطفى :- تعالي بالغرفه ارتاحي
- نارا :- سحبتني وفاء من ايدي ودخلتني للغرفه ، راحت روحي
- وفاء :- اهدئي نارا

شغلوا المروحه ع قوتها واني احس نفسي اختنكت فد مره
- نارا :- وين شُعاع صيحوا الي شُعاع اريده
- مصطفى :- اهدئي خويه هسه اتصل عليه يجي
- نارا :- سحب جهازه واتصل ع شُعاع واني منتهيه
اسمه يحجي ويا كال اله " تعال نارا تريدك "
من يمي سمعت صوت شُعاع الخايف يصيح عليه "شششبيها " سد الجهاز وما طول سريع اجه يركض
ماعرف وين جان بس اجه فحطان حتى صوت الدرج مال الصعده مالته سمعتها دخل للغرفه شافني متمدده تعبانه
- شُعاع :- شكووو شبيج
- نارا :- ماعرف بس حيل تعبت ، اجه تقرب مني كعد ع السرير بصفي حط ايده ع كصتي بعدها رفع ايده وسحبني
الحضنه رفع راسه الهم
- شُعاع :- اطلعوا اتركونا الوحدنا
- نارا :- ضحك مصطفى وطلع وطلعهم ويا بقيت بس اني وشُعاع بالغرفه التفت عليه
- شُعاع :- احجيلي حبيبي شبيج
- نارا :- ماعرف والله جنت احجي ويا عنقاء بعدني داحجي ويا جان يدك جهازه باوع ع الجهاز شافه شذام فتح السبيكر يحجي ويا

- الشذام :- ها ولك
- شُعاع :- انتَ آلها شكو
- الشذام :- ولك مرتي اتصلت عليه هسه تكول جنت احجي وويا زوجتك وماعرف شنو صار بيها وهي جاي تتصل عليها ما ترد بقى بالها خاف صاير شي بيها
- شُعاع :- لا الحمدلله صارت زينه هسه بس شويه تخربطت معدتها
- نارا :- حجه ويا وبعدين سد الاتصال التفت عليه
- شُعاع :- كملي شنو صار
- نارا :- اي هو بعدها لعبت نفسي وهاي حالتي هسه ، هو بقى صافن بوجهي كام وكف جاب بطل مال المي ورجع سحبني الحضنه بلل ايده مي ومسح بيها وجهي رجع سحب شعري للورى وجمعه باسني براسي احس كُل تصرفاته نابعه من قلبه وحيل حنين وياي يخاف حتى لا يأذيني بعدها صار يدلك برجليه وبأديه حتى ارتاح
- شُعاع :- مشتهيه شي تريدين اجيب شي تاكلي
- نارا :- لا بس نفسي لعبانه ومابيه حيل ، هو هز راسه ورجع يدلك بأديه ويقرا ع راسي ورى ساعتين يلا ارتاحيت .

اندك الباب مال البيت طلع شُعاع من البلكونه يشوف منو
لان الغرفه مالتنا من نطلع للبلكونه نكدر انشوف منو يدك الباب اول ما طلع سمعت صوته

- شُعاع :- اهووووو هاي خالاتي وبناتهن
- نارا :- بقيت اباوع عليه دخل من البلكونه واجه اتقرب كعد يمي وحضني يحجي وياي كأن طفله كدامه
- شُعاع :- باعي حبيبي اي شي يسونه او يحجنه لا تهتمين هنَ من حركتهن يحجن بكيفهن واذا سون الج شي تعالي اني اخذ حقج من عيونهن
- نارا :- شنووو ؟ بقيت فاتحه حلكي
- شُعاع :- اهدئي حبيبي واذا حتى لو ردتي لا تنزلين الهن اني اكول الهن انتِ مريضه
- نارا :- هاا اي احسن ما اريد اشوفهن ولا انتَ تنزل يمهن
- شُعاع :- صار حبيبي
- نارا :- ورى تقريبا ساعه امه صاحت
- ام شُعاع :- ها حبيبي ما تنزلون
- شُعاع :- يمه ماكدر بعدها تعبانه
- ام شُعاع :- هاهيَ يوم
- نارا :- ورى شويه ما حسينا الا باب الغرفه مالتنا تندك
ورى الدكه انفتح الباب جان يدخلن خالاته وبناتهن اني بقيت صافنه شُعاع جان حاطني بحضنه ويلعب بشعري
وهنَ دخلن شافنه بهذا المنظر سلمن عليه
يضحكن بوجهنه ويحجن ويا شُعاع وهو عناد بيهن ما تركني

- شنو خاله عوفها شكو لازك بيها هيج
- نارا :- انتبهت عليه شلون رفع حاجبه الها ورد عليها
- شُعاع :- اذا بيها ما االزك لعد بيمن الزك ؟؟
- نارا :- ضحكت هي ماردت عليه رجعت الثانيه حجت
- شبيج هاي لان بعدهم جدد هيج لازك بيها
- شُعاع :- لو بعد الف سنه ابقى هيج وياها اساسًا كل يوم يكبر حبها بكلبي
- نارا :- سريع سكتن من رد عليهن بهذا الرد وبعدها كالن اخذوا راحتكم ونزلن ، اني بس صافنه ما فتحت حلكي مستغربه من تصرفاتهن ومن كلامهن

التفتت ع شُعاع احجي ويا .

- نارا :- شبيهن هذن ؟؟؟؟
- شُعاع :- شكلت الج اني مو كلت لا تهتمين الهن، شو كومي
- نارا :- وين اكوم
- شُعاع :- غيري لبسج وترتيبي
- نارا :- شنو نطلع ؟؟
- شُعاع :- لا بس البسي لبس مرتب مال البيت
- نارا :- كمت بدون ما احجي غيرت لبسي ورتبت نفسي وخليت عطر سبحت بي ونزلنا سوه هو يباوع عليه ويبتسم
دخلنا يمهن كعدت وهو كعد يمي وهن صافنات علينا
شُعاع اجه اله اتصال اخذ جهازه وطلع واني بقيت يمهن
استلمني دك اسأله
- شنو عشيرتج انتِ ؟
- نارا :- عشيرتي ال ××××
- هااا انتِ من هل عشيره زين زين
- نارا :- اي
- شنو دارسه ؟
- نارا :- ردت احجي بس وفاء سبقتني وحجت بفخر
- وفاء :- خالتي نارا طب عام
- نارا :- البنات فتحن عيونهن بس حجن وياي من ورى خشمهن
- اي زين احسن من كاعده وساكته
- وفاء :- لا بالعكس نارا مرتبه
- ااييي بس بالبدايه
- نارا :- عقدت حاجبي هاي شبيها كمت وكفت سألتها ، شنو قصدج ؟
- شنو شبيج وكفتي ما تكعدين
- نارا :- لا ما اريد لعبت روحي ، ويا كلمتي دخل مصطفى
- مصطفى :- ها شلون صرتي
- نارا :- جنت زينه بس هسه لعبت نفسي ، هو افتهم شنو السالفه تضحك
تركتهن وردت اصعد نُبل صارت بوجهي ابتسمت بوجها وحجيت وياها ، نُبل سويلي كهوه هي هزت راسها وراحت تسوي

اسمع وحده من بنات خالاته حجت بصوت عالي حتى اني اسمع
- " ماشايف وشاف "
اني ماكدرت اسكت رجعت دخلت الهن
- نارا :- لا تباوعين الي بعين طبعج لا هسه اني اسحلج سحل هنا ، هي بقت صافنه بوجهي واني اباوع عليها
صاحت امها بيه
- ااامشي لج شششنو تسحلين
- نارا :- سريع اجانه صوت مصطفى
- مصطفى :- هااا شكو خيرررر
- نارا :- رديت عليها ، ولجلاجججه لا تكولين ووولج ، كامت وكفت ع حيله تصيح وتغلط عليه
- شششبيج لج هو انتِ وحده **** اني بكبر امج شلون تحجين وياي هيج
- نارا :- فتحت عيوني من فشرت عليه ، تقربت منها
منو تقصدين ال **** ؟؟؟ وووحق علي هسه ارفسج الا اخلي كلبج يوكف لا عبالج اني اسكت
- مصطفى :- دخيلك ربي اسسسكتن ، وانتِ نارا اصعدي الغرفتج
- لاااا ليش تصعد عوفها هي مبينه تربات شوارع هي غير جانت عند الدواع١١ خلف الله ع ابنا هو الي اخذج وستر عليج

- نارا :- احس جسمي صار يرجف من القهر هاي تحجي عليه هيج ماتحملت ركضت عليها نمت فوكاها وخنكتها وهي تفر جوايه مصطفى لازمني يحاول يوخرني منها واني بقوه اديه اخنك بيها اصيح عليها واصرخ ، منوووووو ترباااات شووووارع منوووووو الي عند الداع١١ هاااااا ؟
رفعت ايدي وضربتها بقوه ع وجها حسيته وحده اجتني من ورى وضربتني ع ظهري بقوه تركت الي بأيدي وكمت عليها سحلتها من شعرها وهن بس يتصارخن بيهن خافن مني وابتعدن وبين لا السالنهن بي يغلط وبيهن يضربني واني ارجف رجف واضرب من حركه كلبي
صحت بصوت عالي واني اضرب بيهن " الله ياااااخذجن "
دفرتهن برجلي وارجع ادفر وادفر بيهن وهن مثل الحيوانات
اجر بهاي وارجع اجر بالثانيه بيهن مايعات وبيهن لا ضربتهن قويه من القوه الي اجتني مصطفى عافني

دخل شُعاع يصيح ششششكو شصاااير ؟ شافني اني ساحلتهن بقى صافن بوجهي مصدوم ومصطفى بالكوه حاصر الضحكه يريد ينفجر من الضحك واني من شفته
حصرتني الضحكه مصطفى عاف المكان وطلع ما اتحمل يريد يضحك شُعاع سحبني من ايدي حتى ما حجه شي وصعدني للغرفه اول مادخلت حجيت

- نارا :- شُعاع يكولن عليه تربات شوارع وتربات داع١١
- شُعاع :- اششش اوكفي هنا هسه اجي
- نارا :- ماحسيت الا تركني ونزل يركض الهن ركضت اباوع ماكدر لان فوك بس اسمع صوته رج البيت وهو يصيح
عليهن
- شُعاع :- وووووحق هذا الله الي تتقرب من مرررتي ما تلوم الا نفسسسها لو مو خاااالاتي فهمتتتن وهاي الي تحجن عليييها تاااج راسجن هاي لتكولن عليها تربات داع١١ هاي تااااج راسسجن
- ام شُعاع :- اصعد فوك شُعاع كافي
- هاااا لحكت تسوي لك سحررر مووو
- شُعاع :- ااااي مو هي مثلجججن حتى تسوي سحر الي
خليييي اسمع حسسس وحده اكلب الدنيا عليجن
انتن تدخلن هنا تحترمن الي بالبيت مو تجن تسون مشاكل شنو هاي الصلافه .

- نارا :- اسمع صوته حيل عالي ويصيح عليهن وهن
يردن بالبدايه بعدين سكتن عتفهن واجه صعد صرت بوجهة
صاح بيه
- شُعاع :- امشي لمي ملابسج والاغراض بسررررعه
- نارا :- بدون ما احجي رحت لميت كل الأغراض وخليت الملابس بالجنط ونزلهن مصطفى يحجي ويا
- مصطفى :- شنووو السالفه ياخويه عود صدك من وراهن تطلع
- شُعاع :- لا ياخوي اني من زمان ناوي اطلع وردت بعد يومين اطلع واستقر بس بعد ما يحتاج يومين هسه اطلع احسن ليش امي تضوج وعود هن هم خالاتي
- مصطفى :- زين واني اريدكم هنا
- شُعاع :- اي لم ملابسك وتعال ويانه
- مصطفى :- ههههههه وضل البيت المطيره

- نارا :- ضحك بصوت عالي واني كملت لم الأغراض
حطهن كُلهن بالسياره ردت اطلع صار بوجهي مصطفى
يباوع عليه وينزل راسه كاتم ضحكته ، شبيك ؟
- مصطفى :- لك جون سينا انتَ
- نارا :- عابت شبيك ههههه
- مصطفى :- لج غير سحلتيهن اني رجال ولا مره سحلت واحد هيج الا انتِ شسويتي بيهن فلك اسود
- نارا :- اي غير بسببهن
- مصطفى :- والله عمي كفو بعد اذا صارت عندنا مشكله انجيبج انتِ تحليها بكفخه وحده تحلين كل المشاكل
- نارا :- ياااا هاي اني
- مصطفى :- غير ما شفتي نفسج هديتي عليها ونمتي فوكاها تصيحين وتضربين بيها من يمي خفت ع نفسي كلت بس احجي تلتفت عليه وتسحلني وياها وتضربني واحصل كفخه خلي اسكت واستر ع نفسي احسن
- نارا :- ضحكت وشُعاع لزمني من كتفي
- شُعاع :- اسكت لك لا اكفخك اني
- مصطفى :- عمي انتَ ومرتك تخوفون الي مايريد نفسه يجي يمكم الا تنوموا بالجمله العصبيه
- نارا :- بالكوه سكته شُعاع بس يحجي ويلغي براسنه
عاد صعدنا بالسياره وطلعنا وهو ويانه .

وصلنا للبيت ودخلنا اباوع عليه حيل جبير ويجنن
نظيف وكُل شي بي مجهز ومرتب سألت شُعاع
هذا البيت إيجار لو مشتري ؟
- شُعاع :- شنو إيجار اكيد اشتريته
- نارا :- سكتت اباوع ع البيت مصطفى دخل الأغراض ، شنو اني ارتبهن وحدي ماكدر
- شُعاع :- اتصلي ع البنات يجن وياج
- نارا :- تمام ، اتصلت ع البنات وشُعاع تركني اجني وما قصرن وياي صرنا انرتب بالبيت واني حيل فرحانه
هذا البيت صار النا اني ويا الوحدنا وراح نستقر بعيد عن كل شي خلصنا الترتيب ونزلنا نسوي اكل وناكل ونسولف سوه حجت الي ع بنات خالاته وكالت من زمان يفترن ع شُعاع والشذام بس ما انطوهن وجه
واني بقيت صافن شلون بنات معقوله ينزلن نفسهن الهاي الدرجه عجيب ، وراها كتبت الأغراض الي احتاجهن وهن راحن واني بخرت البيت ورتبته ودخلت سبحت ورتبت نفسي واجه شُعاع .

دخل يباوع للبيت والعطر الي بيه حيل طيب بقى صافن عليه واني رتبت نفسي

- شُعاع :- فدوه للترتيب وللنادره
- نارا :- حضنته بقوه ، احبك اني واحب حبك اليه
- شُعاع :- احبج بحُب عميق
- نارا :- ابتسمت ع كلامه لان يحجي ويعبر عنه بوجهة
- شُعاع :- حبيبي الباجر عندي روحه الكربلاء وللامام علي
- نارا :- واني ؟
- شُعاع :- اي حبيبي اخذج وياي اصلاً عندي شغل هناك اني والولد وهمَ هم حيجيبون زوجاتهم وياهم
للعلم همَ من غير طائفه بس عادي يزورون ويحبون الزياره مثلنا يعني ماكو اي فرق
- نارا :- الله شكد حلو لعد اجهز نفسي مو
- شُعاع :- اي حبيبي جهزي نفسج

ثاني يوم جهزت نفسي ولبست العباه وطلعت اني ويا
وهو يتصل ع جماعته يحجي وياهم لان عندهم شغل هناك بالنجف بعدين يروحون لكربلاء رحنا للنجف بس اني احس كلبي يدك احس الإمام علي حيل قريب من قلبي ودائما اذكره ويصير اسمه ع الساني وكُل ما تصير روحه او زياره اله افرح واحس كلبي يطير من الحماس بقيت متشوقه إلى أن وصلنا للنجف نزلنا وشُعاع يمي لازمني من ايدي
صاروا كدامنا جماعته هم وزوجاتهم تقربوا سلموا ومشينا
دخلنا هم راحوا من جهة الرجال واحنه من جهة النساء
دخلنا .

هن يمشن قريبات مني صارن كدامي اني احس روحي
راحت حتى بعد ما اكدر امشي بادن رجليه وكعدت
همست الهن بالكوه " انتظرن شويه " هن شافني هيج جابن مي سريع يشربني ويغسلن وجهي حسيت كلبي صار يدك حيل وحتى مابيه امشي وكفني بالكوه ولزمني دخلني جوه رفعن البرده ورادن يدخلن اني احس الزمن توقف بيه وكُل شي صار كدامي حتى الحادثه ادموعي صارن ينزلن بسرعه وجسمي صار يرجف( استشهاد ابويه ، اخذ اخواني واخواتي ، قل امي واسراء وكل شي صار كدامي حتى اجه الصوت براسي ابنت علي ) كأن شريط ورجع انعاد عليه بعد ما اتحملت وكعد ع الارضيه
صحت بصوت يااااااااعلييييييييي .
صوتي جان عالي ثواني وسمعت صوت شُعاع يريد يدخل بس مايخلوا هو عرفني من صوتي الا ان ماعرف شنو حجه وياهم يلا كدر يدخل

اني احس صارت بيه حاله هستريه تقرب مني شُعاع يحاول يفهم مني شبيه واني بس ابجي واصرخ
وعيني ع مكان واحد هو بسرعه سحبني الصدره وضمني
يصلي ع النبي ويحجي وياي بهمس حتى اسكت
- شُعاع :- اهدئي بابا شبيج ياعيني ، جيبووو النا مي ،
راحوا جابو مي واني بعدني بحضنه البنات الي وياي صارن كدامي يباوع عليه ومقهورات ع حالتي وعيونهن مدمعه
واني فاتحه عيني قوي واصرخ وهو ضامني الصدره حط ايده يحاول يسكتني كعد ع الارضيه مد رجله وجرني اله غسل وجهي
- شُعاع :- اششش بابا اني هنا يمج اهدئي ،يااااعلي دخيلك يااااعلي
- نارا :- باوع عليه وجهة صااار احمر
- شُعاع :- لج بابا نااااراااا كومي شو كومي ع حيلج
- نارا :- ضربني بخفه ع وجهي حتى اصحى واسد عيوني لان بس صافنه
- شُعاع :- لج لة تكسرين ظهررري
- نارا :- شهكت ، بابا اريد بابا
- شُعاع :- يااااااا الله

- نارا :- دنك شالني وطلع رفعوا النا البرده وطلع برى الناس كلها تباوع علينا بس هو ما اهتم شايلني ويمشي
من طلعنا كعد بالكاع وسحبني الحضنه واني حاضنته بقوه
ما اريد اتركه احس روحي صارت بي وحيل خايفه
بعدها حط راسي ع رجليه ولفني بالعباه مالتي وايده فوك راسي يقرأ ع راسي ويمسح بهدوء وعيونه عليه مصبوبه بصفه جان اكو واحد يقرأ قران اخذ القرآن منه وصار يقرأ اليه ويمسح ع راسي بهدوء إلى أن ارتاحيت .

- نارا :- اريد ادخل أزور
- شُعاع :- ادخل وياج
- نارا :- لا اني ادخل لا تخاف صرت زينه
- نارا :- كام وكف وياي راد يدخل وياي بس ماقبلوا
- شُعاع :- ما تشوفها شلون حالتها
- نارا :- واحد من المنتسبين حجه ويا
- شُعاع مرتي يمها جوه لا تخاف عليها
- نارا :- باوع الي بنظره واني هزيت راسي اله اعرفه خايف عليه ومايريدني ابقى الوحدي ، بعدها دخلت هنَ عرفن بيه وسون الي طريق حتى ادخل أزور
دخلت زرت إلى أن ارتاحيت وطلعت لكيت شُعاع بوجهي
جان ينتظرني وباله يمي بالصحن برى
- شُعاع :- يلا نصلي احنه هنا قريبين وانتِ صلي ويا البنات
- نارا :- تمام

اني متوضيه وكفت اصلي والبنات اجن يمي يصلن ما منتبهة عليهن صارن من الجهتين يمي واني صرت بالنص
بحيث حسيت اني واصلي الناس كُلها تباوع علينا حتى بيهن بنات رادن يصورن بس المنتسبين الي بالصحن ماقبلوا شكد خجلت بوقتها حتى ردت بس اهرب من عيون الناس بوقتها جنه واكفين كُل احنه البنات هن من غير طائفه واني من طائفه ثانيه وبس اني المختلفه بيهن وصايره بالنص منزله اديه عكسهن ونصلي والهذا السبب رادوا يصورون هاي اللقطه بس منعوهم واني من الخجل احس اريد بس اختفي من الوجود ومن عيونهم

جان اكو شي اخضر ع كتفي سحبته وشميته احس بي
عطر حيل طيب كملوا صلاه ورحت يم شُعاع رفعت اله العلك
- نارا :- شوف هذا الاخضر شمروا عليه ، باسني براسي وابتسم وصلى ع النبي
- شُعاع :- بقي ع اكتافج
- نارا :- شُعاع غمز الواحد من جماعته وهو فهم اشارته طلعونا برى ماعرف ليش بقونا بالسياره نص ساعه وبعدين رجعوا كُلهم تراب بقيت صافنه
سألته وين رحتوا؟
- شُعاع :- رحنه زرنا
- نارا :- بس ما رحتتوا اتجاه المقبره ؟ همهم وغير الجواب
- شُعاع :- هسه انروح الكربلاء
- نارا :- شُعاع
- شُعاع :- ياعيون شُعاع
- نارا :- بقيت ساكته ماعرف شنو احجي هو باسني وسحب ايدي لزمها بين ايده ومشينا الكربلاء
بقيت ساكته طول الطريق احس روحي هادئه وبس صافنه ع الطريق ماحسيت بالوقت إلى أن وصلنا الكربلاء

اااااخ يا كربلاء اااااخ كالوا انزور ابو الفضل بعدين الإمام الحُسين ف دخلنا للعباس عليه السلام انزور دخلنا جوه واني نسيت الدنيا كُلها
اريد بس اوصل ازدحام رفعت ايدي دخيل حبك للحُسين اريد اوصل والزم شباكك سريع انفتح الي الطريق وتسهل الطريق حتى ادخل كأن ماحسيت حتى بالازدحام وصلت
للشباك لزمته وبسته ادموعي صارت تنزل احجي واشهك
احجي عن اهلي عن امي وابويه عن اخواني وكُل شي صار
بيه قربان الكم ، احبهم احس روحي بروحهم يعنون الي كُلش حسيت الريشه صارت ع راسي رفعت راسي لكيت ام الريشه تباوع عليه
- نارا :- هسه اوخر ، هي ابتسمت الي وردت عليه
" لا بس حبيت حبج لابو فاضل " ابتسمت والدموع بعيوني مسحت عيوني وطلعت لكيت شُعاع كدامي واكف ينتظرني ابتسمت ورحت تقربت منه

- نارا :- احبك وحق العباس ، ابتسم وتقرب مني
- شُعاع :- القرنيه مال عيني انتِ وحق ابو فاضل اكتل نفسي عليج
- نارا :- اسم الله عليك حبيبي
- شُعاع :- علويه
- نارا :- شنو ؟
- شُعاع :- هاي الي لابستها انتِ الساده يلبسوها
- نارا :- ردت انزعها
- شُعاع :- لا خليها
- نارا :- امممم ( يقصد ع الخضره الي لابستها )
- شُعاع :- ههههه أخذها منج بس ارجع
- نارا :- ابتسمت ونزلت راسي

كمنا نصلي هل مره هم كدامنا واحنه وراهم
وهم نفس الشي الناس مستغربين اكو بيهم رفعوا جهازهم يريدون يصورون والشذام جان هناك صار كدامهم يمنعهم لان شُعاع أشر اله يمنعهم وهو هم ما قبل
كملنا صلاه وطلعنا شُعاع لازمني من ايدي تقرب الشذام يحجي ويا

- شُعاع :- شذام !!!
- الشذام :- اي هذاك السرداب اذا تريدون
- شُعاع :- شكرا
- نارا :- بقيت صافنه اني همست اله ، تريدون تلزمون واحد ؟؟؟؟؟؟
- شُعاع :- اشششش دنكي راسج واطلعي واني وياج
- نارا :- اباوع عليه طلع كِمامه ولبسها وحط هاي الخضره ع راسه وطلعنا دخلنا المطعم رفعها عن وجهة واتصل يحجي وياهم وانطاهم اسم المطعم واني بس صافنه احس كلبي يدك سريع ٤ دقائق ودخلوا شافهم
هم سريع كالوا هاااا ؟رد عليهم شُعاع
- شُعاع :- ١٩٢٧٨
- نارا :- اول ما نطق الرقم همَ ضحكوا وكعدوا واني وزوجاتهم بس نصفن مانعرف شنو يقصدون بالضبط
وين راحوا بهاي النص ساعه وشنو يعني الرقم وشنو صار بالضبط وقصه السرداب شنو بقيت بس اصفن

طبكوا طاولتين وكعدنا نأكل اني بصف شُعاع كاعده بعيده عنهم من الجهة الثانيه وأساسًا هو ساد وحاجب الرؤيه عندي إلى أن كملنا ورجعنا زرنا الإمام الحُسين( عليه السلام ) زرت ولزمت الشباك ابوس بي وأهمس
اني احبك وحق ابو فاضل احبك رجعت بست الشباك حُبي الاهل البيت يختلف يختلف من اني وصغيره انزرع هذا الحُب داخلي ومن كبرت كبر وياي أعجز عن وصف شعوري واني بين الحرمين أعجز عن فرحتي واني بهذا المكان المُقدس
كملت زياره وطلعت

صعدنا بالسياره وحتى جماعته كُل واحد صعد سيارته وانطلقنا مشت السياره حسيت الطريق هذا مو طريق بغداد عقدت حاجبي مستغربه لان شفت الطريق يختلف
- نارا :- شُعاع وين رايحين ؟
- شُعاع :- خليج ساكته اششش
- نارا :- عقدت حاجبي مستغربه شو هذا فتح الجكمجه وطلع منها السلاح فتحت عيوني مصدومه سحبت المسدس وحط بي الشاجور وحطه بالحزام واني مصدومه
شنو هذا ؟؟
- شُعاع :- ماكو اسكتي
- نارا :- قوست شفايفي ارجف ، شبيك تصيح عليه ؟
شو هذا مد ايده ورى وسحب علاكه طلع منها بطل لبن وحطه بحضني
- شُعاع :- هاج اشربي
- نارا :- ما اريد
- شُعاع :- حطيت بي الج ليمون ونعناع
- نارا :- اقتنعت سحبت البطل وصرت اشرب بي
إلى أن وصلنا المكان مُظلم وكفوا السيارات واني كلبي صار يدك سريع نزل وأشر للولد اسمعهم يحجون

- شُعاع :- ع بعد ٣٥٠ متر عبوه ناسفه ورى السياره بالضبط
- شُعاع خلي انرجع البنات
- نارا :- صاح شُعاع وهو عاقد حاجبه بغضب
- شُعاع :- مااانكدرررر صاروا ورانه تعرف شنو ورانه راح يلزمونه واذا تقدمنا هم كذلك لازم العبوه نفتحها
- القوات الامنيه غير متجهزين
- شُعاع :- همَ وصلوا بس لا يسبقوهم ويتقدمون النا اكثر
- نارا :- اني اسمعهم وارجف خايفه ومرعوبه وحالتي ماتقل عن بقيه البنات
تقربوا كالوا نخلي البنات كلهن بسياره وحده تقربوا من عندنا نزلونا واخذونا بسياره وحده جبيره وجانت مضلله
كل البنات خايفات واني وياهن ارجف حتى صرت احس
الوقت صار يعيد نفسه قبل نفس الحاله وهسه رجعت مره ثانيه

وحده من البنات همست ترجف " بنات اني خايفه "
تقربت منها ولزمتها وحضنتها احجي وياها لاتخافين
والباقيات وحده حضنت الثانيه وكُلنا خايفات ونرجف بس مانكدر نسوي شي نسمع صوتهم برى السياره بس ما بيدنا اي شي نسوي
صار صوت الزلم حيل قوي اني الدموع احسهن صارن بطرف عيني وكلبي صارت دكاته قويه بحيث صرت اسمع
دكات كلبي

اباوع عليهم من كدام صاروا يتحركون يمشون كُلهم
باتجاه واحد شوي شوي صارت الرؤيه تتشوش بين الي نشوفهم وبين الي ما نشوفهم بالضبط مرت ١٠ دقائق بالضبط
وماحسيت الا صار صوت انفجار حيل قوووي هز المكان هزززز الجام مال السياره تفلش والصوت قوي يخوف مُرعب صرخنه مرعوبات السيارات الي كدامنها كلها ادمرت والسياره مال شُعاع كدامي انشالت من مكانها و رجعت انركعت بالكاع صارت حيل قريبه علينااااااا ...

^^^^^^^

" وكنا دائماً نعود إلا هذه المرة"
يتبع ..

.
.