الربتج " حالك الاسوداد " الفصل الثالث عشر 13 - بقلم رهف علي

ورجوتُ عيني أن تكُفَ دُموعها
أغمضُتها كي لا تُفيض فأمطرت.

لاتنسون التصويت والتعليقات الطيفه مَثلُكم بين الفقرات قلبي

أيهما يُبان عليه حزنك ، ملامح وجهك ام
صوتك ؟؟؟

ــــــــــــــــــــــــــ•●•ــــــــــــــــــــــــــ

صرخت بصوت عالي مفزوعه من
المنظر الي كدامي واني اشوفه واكف
كدامي بهذا المنظر احس
عركت ما متعوده ع هذا الشي
كدامي وهو هيج كدامي
صرخت بي
" اااااااااانتَ ششششنو " !!!!!!!!
شششنووو هااااي !!!
جان واكف كدامي بدون ملابس
من فوك وداخل للغرفه وخفت اكثر جان جسمه
كُله دم !!!
هو ما اهتم ابد اصلاً عادي عنده هذا الشي
ولا كأن شكله يثير الريبه والشك

ضحك بصوت عالي ورد عليه
_ ههههه شبيج ؟
_ هوَ ااااني الي شبيييه لو انتَ داخل عليه
للغرفه بدون ملابس ماتستحي انتَ
لو شايل غريزه المستحى عندكك
رد عليه بروده أعصاب
_ اي مخلي غريزتج
صفنت بوجهة ومتفهت شنو يقصده
بي
_ شنو ؟ شبيك انتَ
رد
_ مابيه
بعدها عافني وطلع خلاني بصفنتي
حتى ماعرف ليش هيج دخل فجأة
وليش هذا شكله
حتى خفت اسأله
ويجاوبني بشي أعجز ارد عليه
وقتها صدُك اتخبل عليه واخلي
يحط طلقه براسي
ويموتني

مرن ٤ إيام بالضبط واني ماشفت بيهن
راحه ابد احس كلبي حيل يأذيني
وروحي رايحه ونفسيتي مدمره حرفياً
صرت احس ع اي للحظه اموت بيها
وماكو منفذ كلت هاهي حياتي
خلصت
لان حرفياً حسيت اختنكت روحي لايبه وماعرف شنو
الي بيه اقوه من الالم الجسدي
بحيث رجلي ماحسيت بيها
لان اكو شي اقوه منها بس ماعرف شنو
خليت ايدي ع كلبي دكاته مو منتظمه
فجأه انفتح باب الغرفه
ودخل ابو عاصم بس شكله حيل غريب
ماعرف شنو الي بي
جان عركان وكصته تلمع لم من العرك
بس شكله ماعرف شنو حسيته يختلف
تمشى بتجاهي وكف كدامي
صفن بوجهي واني هم ماحجيت صفنت ردت هو
يحجي
إلى أن حجه

_ نارا
_ ها
سكت شوي رفع ايده يمسح وجهة سحب
هوى ورجع
_ نارا
هزيت راسي
_ شنو ؟ احجي
_ انتِ تؤمنين بالله وعندج ايمان قوي صحيح
رمشت بعيوني ورجعت جاوبته بهدوء
_اي اكيد
هو دنك راسه هزه بعلامه قبول ع كلامي
ورجع رفع راسه ابتسم بهدوء
_ تحبين اهلج ؟
عقدت حاجبي مستغربه سؤاله
_ ليش تسألني هذا السؤال
_ هسه جاوبيني
_ اكيد احبهم همَ روحي من الدنيا ماعندي غيرهم
سكت رجع استرسل بكلامه
_ تدرين الصبر مفتاح الفرج
هزيت راسي اي بس احس بالخنكه صارت
بلعومي حتى احس الهوى شح عندي
خايفة من كلامه
_ اي اعرف ليش هيج تحجي
_ زين تدرين الله اذا حب شخص ياخذه
عنده .
ابتلعت ريقي حسيته جف عندي طبك
رجفت ايدي وبايدي الثانيه ضغطت
عليها حتى اخفي رجفتها هو انتبه عليه وصفن ع اديه
هز راسه بأسف ورد ألي
الحد الان اتذكر الوقت
جان الساعه ٢:٠٣
عرفت اكو خبر سيء ويحاول يمهد الطريق
حتى يكوله الي
ضغطت ع شفايفي اول ما شفت شفايفه تحركن
حتى يحجي
انصعقت من الخبر الي كاله الي
_ نارا " اثنين من اخواتج استشهدن البقيه بحياتج "

كال كلامه الي وهو يترقبني يتابعني
واني صافنه بوجهة حتى رمش ما رمشت بعيوني
رجع كمل كلامه
_ اما اخوانج الاثنين جاي ادور عليهم الحد
هسه ما الكيت الهم اثر
نارا مثل ماذكرتي الامام علي قبل هسه ارجعي
اذكري
بقيت صافنه بوجهة رديت عليه بضحك
_ شنو ؟
لتفت للجهة الثانيه ماعرف شنو كال ورجع
التفت عليه
_ بابا سمعتي الي حجيته الج ؟
هزيت راسي بقوه دلاله ع عدم تصديقي لكلامه
وصرخت بوجهة
_ ااااانتَ اكيد تشاقه وياي شنو اخواتج شنو استشهدهن
انتَ تحجي من كُل عقلك ؟ ههههههه وين صايره
هاي اكيد تريد تلعب بأعصابي
اي صح مو انتَ كلت قبل احب العب
بأعصابج واضوجج وهسه اكول لك
عفية عليك نجحت بس بعد لا تعيدها ترى امووت..
يباوع عليه كأن كدامه وحده مجنونه
يحاول يهديها
رفع اديه الاثنين وهو يحاول يهديني
_ اهدئي نارا اهدئي
صفنت بوجهة احس عقلي طار من راسي
حتى ماعرف شنو اسوي ولا انطي رده فعل
قويه مثل العاده
رجع حجه وياي
_ نارا شبيج
بقيت صافنه جسمي صار يرجف
_ اهدئي بابا تسمعيني انتِ
رديت عليه واني مو واعيه ع نفسي
_ هاا ! شنو اهدئي ؟شصاير
هو بهت وجهة حجه بصوت شوي عالي حتى
يوعيني
_ شبييج انتِ شبيججج جاي تسمعيني اااالو
وياي انتِ
هناااا عيونج خليهن بعيوني وين تباوعين
رجعت عيوني عليه
لكيت ايده كدامي يطك باصبعه السبابه والابهام
مصدر صوت حتى انتبه عليه
رجعت انتبهت عليه بس احس جسمي كُله
مخدر
هو تقرب مني ماعرف شنو يحاول يسوي
جله صوته رجعت حجه وياي
_ بابا نارا شبيج خبلتيني خليج وياي باوعي
عليه لا تصفنين بغير مكان
ترى حالتج ماتعجب
لا توكعين هسه
ساعديني كولي شبيج لا تخبلييييني
همست بصوت خاوي
_ شكلت !

هو يحجي وياي يحاول يوعيني بس اني
مو واعيه احس نفسي بغير
عالم
جسمي كُله خدر وعقلي طار من راسي
يعني مو هين عليه هيج خبر حسيت بأحساس حيل بشع
بس مو كادره استوعبه ولا كادره اصدكه
ارد اي شي ينفي اريد شخص يصحيني من الحلم الي
اني احلم بي
هو شافني صافنه ومو ويا طك ايد بأيد
كال بصوت عالي حتى انتبه عليه
_راح اطلع
وطلع من
الغرفه تركني اساسًا حتى ما اجاوبه
لهذا تركني وراح
اني بقيت صافنه بمكاني حتى ماتحركت ولا كمت
بس هيج صافنه واباوع ع الحايط
دمعه من عيني ما نزلت
نزلت عيوني لاديه صفنت عليهن شلون يرجفن
شديصير ؟ شبيه اني
رفعت عيني ، اني منو شنو جاي يصير وياي ؟
ليش الحد هسه اني ما ميته
عقاب الي كُل هذا الي ديصير لو شنو
عقلي طار من مكانه وصرت اخربط بكُل شي
زين اني ليش هنا !
شنو داسوي هنا الوحدي ليش مايمي احد
ليش الوحدي كاعده هنا
حالتي شبيها جسمي ليش
باد حيله وكلبي ليش هيج جاي يدك بهاي
الطريقه !

باوع ع الجهة اليمنه شفت المخده يمي
سحبتها وخليت راسي عليها
صرت اشهك بالهوى
اتنفس بقوه كل هذا واحس الهوى قليل
رجعت احاول اتذكر كلامه
رجعن الكلمات يرنن بأذني ضحكت بصوت عالي
" شنو منو مات "
رجعت اضحك احجي ويا نفسي " اني ميته لو شنو شو مجاي احس بنفسي "
غمضت عيوني وبعدها ماحسيت بأي شي
حتى ما أعرف شلون نمت بهاي السهوله
صحيت ثاني يوم واني
احس نفسي جنت داخله بغيبوبة
مو نايمه جسمي متكسر
فتحت عيوني وصفنت ع الحايط اباوع عليه
تذكرت كلام ابو عصام البارحه
وضحكت بصوت عالي
_ ههههههههه اكيد هذا تخبل حتى يحجي
هيج حجي مامعقوله كلامه اي اكيد
اني اعرفه هذا أنسان مريض
ويريد يموتني والهذا يحجي حجي طالع نازل

مر يوم ورى يوم واني ع نفس الحاله
كُل الي صار توقعته حلم او اني اكول هذا حلم
يوم ورى يوم إلى أن صارن ٦ ايام بالضبط
واني بنفس وضعي
حتى هوَ اختفى ماعرف وين راح
٦ ايام واني ما اعرف عنه اي شي كُل يوم اكول
هسه يرجع هسه يجي
بس ماكو فص ملح وذاب
كاعده واسمع صوت طلق حيل بعيد اني من اسمع
هيج اختل بالزاوية مال السرير واحط راسي
جوه المخده حتى ما اسمع اي شي
حتى الاكل لو اكل لو ما اكل ابقى يوم واكثر
بدون اكل بحيث ضعفت هواي
نفسيتي مدمره كاعده الوحدي بهذا البيت
احس صارت بيه حاله نفسيه
وماجاي اتحملها محبوسه بين أربع حيطان بدون
كلام ويا اي مخلوق بدون اي
شي يسلي بدون شي
فقط دعاء والصلاه بيدي
رغم كُل الي جانت صلاتي المنفذ الوحيد
صرت احس عاجزه حتى عن الصلاه
عاجزه اصلي عاجزه حتى ادعي صرت احس بنفسي
عايشه بعالم ثاني غير عن الي
عايشين بي الناس

٦ ايام واني عايشه بدوامه افتر واضغط
حتى ع رجلي الي مو راضيه أطيب اريد اتخلص
حتى من روحي
جنت كاعده ع السرير سحبت روحي للارضيه ونزلت
كعدت اباوع الارضيه
وصخه ومليانه تراب نزلت كعدت
بأصبعي السبابه صرت
اكتب بالتراب
" أين أنا ؟ هل انا في بحر الجور والظُلمات ؟
ماذا يفعل بي البشر ؟ انا اعُبد الله لماذا
يجبرونا ع فعل شيء من لا شيء ؟ "
رفعت ايدي اباوع ع الي كتبته صفنت بي
بقيت ارمش حتى ما مستوعبه الي كتبته
رجعت شخبطت بكف ايدي ع الكتابه
وبعثرت حروفها دفنتها بترابها اهز براسي
ورى وين رجعت الي كلماته من يكول الي
" اخواتج استشهدن واخوانج مفقودين ادور عليهم "
الكلمات صارن خنجر بنص كلبي
هنا عيوني حسيت بيهن يحركني
ثواني و نزلن دموعي ويا كُل كلمه يكولها دموعي تنزل
اكثر عن قبل إلى أن صرت اشهك
بصوت عالي بدون ما احجي بس ابجي
كلبي صار جمررر يشتعل شعل
مديت ايدي ع الارضيه وخليت راسي عليها
واني ابجي دموعي تصب
واني اشهك غفيت ع نفسي بدون ما احس

صحيت ورى فتره ع ريحه زفرررره
تلعب النفس حتى حسيت نفسي راح تقلب
منا عيوني يأذني من البجي
ومنا نفسي صارت تقلب
رفعت راسي اريد اشوف مصدر الريحه شنو
التفتت للورى وشفت ابو عصام
نايم ورايه ملابسه بيهن دم وريحته كُلها دم زفررررر إلى أبعد درجه
فزيت فزه حسيت كلبي راد يطلع
من مكانه
اباوع عليه شلون حالته حاله ويلاعب النفس
ونايمه
صرخت بصوت عالي
_ ششششششنو هاي
شبيييك ااااايع شنو هذا الدددددم
شنووو هاي الرررريحه الزفرررره
لك ااااانتَ اككعد اككككعد شكو ناااايم هنا بهاي
الحاله
سكتت اباوع شو هذا فتح تك عين
يباوع عليه رد بهدوء
_ يعني الوحد يجي البيته يريد يرتاح
اني اجي البيتي ما ارتاح بي !!
صحت بي متنرفزه
_ يابيييت تحجي عليه كوووم شووو كوم منا
ريحتك عبالك طلي اييييع لعبت نفسي
صاح بيه
_ هييي اكل *** لا اكوم اوكلج
_ اااكل تبن
_ مووو اكوم
رجعت صحت ماعرف شبيه
_ ااكل تبن وووين جنت عايفني الوحدي
صفن بوجهي واني رجعت كملت خليت
ايدي ع خشمي قرفانه من الريحه
_ كوووم منا اطلع الريحه قلبت معدتي
ريحتك تكشششش
سحبت نفسي للسرير صعدت وكعدت مخليه
ايدي ع خشمي
لعبانه من العطر
_ لو تغسسسل بيوووود راح تبقى ريحتك
هيج عفنه

كام وكف ع طوله تقرب مني
اباوع ع جسمه شكله ضخم يعني لو يحطني ويجعصني اموت بيده
وجهة كله دم وملابسه واضح بيهن
الدم صح لابس اسود
بس واضح الدم من العطر
حجه وهو ع وجهة ملامح استهزاء
_تحجين عليه ؟ منو هاي الي صارلها فتره تخرخر
دم من كل مكان شو ما كلنا ايع لو بس انتِ ؟

نفيت كلامه ومارديت عليه
سألته
_ منين هذا الدم شنو جنت تسوي ؟
شنو ذبحت طليان هواي شكلك ؟
رفع شفته بمكر وبعدها رد عليه وعيونه بعيوني
_ ذبحت في سبيل الله
عافني ومشى يريد يطلع اني مافهمت كلامه
ورى ثواني يلا انتبهت ع الي حجه
اجتني لحظه ادراك
صحت بي
_ شششششنو تقصد
ضحك ومشى رجع وكف التفت عليه شافني
بعدني مصدومه واباوع عليه
حجه
_ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ"
بهت وجهي سألته مصدومه
_ وانتَ تقرا قرآن ؟ بعد كُل القتل الي تقتله !!
وتريد تنقبل منك !
هز ايده بأعتراض
_ جيره بفركج
_ وبكصتكككك الفكررر الي من يوم الي شفتك ماشفت
الخير
سكت رجع تقرب مني اني بعدت نفسي
حتى مايصير قريب اكثر
سكت بعدها سألني
_ صدك شلونج ؟
صحت
_ اااطلع اطللع مناااا روح اطلع
هو راح طلع واني بقيت وحدي
ماريد اشوفه ولا اريد يسألني احس ع لحظه انهار
ومن تقرب لعبت نفسي من ريحته
وشكله الي كله دم
_ ايييع شهل الخيسه
سمعت صوته صاح
_ ترى سمعتج
رجعت صحت اجاوبه
_ واذا سمعت ، اسسسمع بكيفك

ماحسيت الا رجع دخل للغرفه اجه سريع
وكعد بصفي
اباوع عليه شبي هذا فجأة سألني
_ شلون كدرتي ؟
_ شنو مافهمت
_ نارا شلون اتخطيتي بهاي السرعه
_ انتَ وين عفتني وين رحت
رفع حاجبه
_ شنو لازم اشتاقيتيلي حتى تسأليني هل سؤال
عقدت حواجبي متنرفزه
_ اكيد لا ايييع شلون اشتاق الواحد مثلك
فوك كُل هذا ريحته مو طيبه وكله دم
قذرررر
_ شكو تسألين ؟؟
_ لا بس هيج اسأل لان مو من عوايدك
تتركني طول هاي الايام ماخفت اطلع انهزم هيج شي
وانتَ عايفني طول هل ٦ ايام الوحدي.
ضحك وهو يهز براسه
_ وانتِ شايفتني الهل درجه غبي ؟
ماخفت ولا فكرت انتِ راح تطلعين
_ ليش ؟
_ لان لو طلعتي من هذا الباب راح تموتين
بقيت صافنه بوجهة ارمش
رجع كمل كلامه
_ طبيعتنا مانخلي مره تمشي الوحدها الا اذا
وياها رجال اما اذا الوحدها نتخذ غير
إجراءات وانتِ ماشاء الله عليج سمعه
يعرفون اكو وحده هاربه خاصه
الأمير جنتِ بباله
الهذا سريع توصل الاخبار وتروحين بيها
ف هذا المكان او البيت أأمن الج
من البرى
اسمع كلامه واني مصدومه
شنو معقوله اكو هيج شي
_ شنوو تحجي
_ مثل ماسمعتي جنتِ ورقه رابحه الهم وخسروها ،
مامستوعبه كلامه
معقوله اكو هيج فلم لو يريد يخوفني
ويخليني اخاف أكثر حتى ما اهرب
معقوله اكو هيج شي
شو ماصدك
_ انتَ منين جبت هاي الكلاوات وين اكو هيج
فلم يريدني حتى اكون
جاسوسه الهم لو تريد بس تخوفني
_ ليش اخوفج ترى اكو هيج شي وهذا مو قلم
يدخلوج بين الجيش وانتِ ك مره راح تكدرين
بسهوله تكسبين تعاطفهم وتستغليهم
الصالحج وتاخذين منهم الي
تريدي
ضحكت ع كلامه ورديت
_ ترى الجيش مو غبي
_ منو كال الج غبي ؟ بس الكائن الطيف ينضعف كدامه واكو بيهم ضعفاء
_ طيب وليش هيج يضعفون
_ مو الكل يضعف
_ انتَ ليش ما تعترف انتَ من وين ؟
_ مو كتلج اني من الموصل شبيج
ضحكت
_ انتَ جذاب
_ وليش اجذب عليج اني من الموصل
_ والله جذاب عيونك تحجي وجاي احس بيهن حجي
اكثر مبين كل شي من عيونك

صفن بوجهي رجع سألني
_ شلون تخطيتي
_ بفضل الله
فتح عيونه ع وسعهن
_ فهميني شلون كولي
_ عندك شي تريد تتخطى ؟
هز راسه ب اي ورد
_ اي عندي
_ قتلك للناس الأبرياء!!! هااا ، تقصد
قتلك وتعذيبك الهم
لو بيعك البلدك وبنات بلدك وسلب ونهب
واغتصاب هاي الارض ؟ الدم الي انهدر ؟
النساء الي انسبت ؟ شرفهم الي انأخذ
بيوتهم الي انقصفت ونهدمت
عوائلهم الي تشردت شنو تريد
تتخطى هااااا فهممممني
تقرب مني سريع رفع ايده وحط أصبعه
السبابه ع حلكي وصاح بوجهي
_ اااااششششششششش

ضحك واني اهز راسي حجه
وياي
_I don't want to talk to you about private matters speak , perhaps you will have yourself on mercy
ابتسم بوجهي
خزرته وحجيت من بين اسناني رديت اله
_Lots of things and even you killed my family
هو باوع عليه مصدوم من كلامي
صفن بوجهي وعاط بيه
_ ششششششنو تحجين انتِ
رديت عليه
_ اي مثل ما سمعت ومثل ما فهمت

حسيت توتر الجو وهو بقى يباوع بوجهي
تقرب يباوع بعيوني
_ شنو تحجين شنو قتلتهم اني ؟
ابتسمت واني عيوني مليانه دموع
الخنكه صارت ابلعومي
رديت عليه
_ الوقت الي اجيتني بي وبيك ريحه دم
_ اي كملي ؟
_ اني شميت بيك ريحه اهلي ريحتهم
يمكن دمهم همَ
سكت يباوع بعيوني بعدها ضحك
رد عليه وهو يرفع حواجبه
_ ويمكن العكس ، يمكن دفنتهم ؟
بهت وجهي
_ شنو ؟
_ اي شبيج اصفريتي
_ شلون لك كلب هيج بارد تسوي شي بهاي
البشاعه
_ مو قصه كلب بارد قصه تعلوم، متعلم اني
نملت عيوني بالدموع رديت عليه بغصه
_ تقصد تعلمت ع القتل والتمرد بهاي الطريقه
صرت ابجي بطريقه
هستريه ابجي واشهك بس ماعرف ع شنو
ابجي بالضبط احس
روحي فرفحت من البجي احاول اسكت ماكدر
هو جان كاعد ع الارضيه
ساند ظهره ع الحايط وماد رجله ورجل الثانيه
ساحبه اله وحاط
ايده عليها وساند ايده عليها
يباوع عليه شلون ابجي وماحرك ساكن
واني بقيت اشهك بالبجي
صحت بي
_ ليشششش فهمني ليششش
بقى ساكت بعدها رد الي بهدوء عكس الانهيار التام
الي اني عليه
_ ما قتلتهم
كأن ما سمعت جوابه رجعت اصرخ بوجهة
وابجي
_ لككككك ليشششش تقتلهم عبالك
اصدك بييييييييك ليش قتلت ااااهلي لك تعرف شنو
يعني اهلي هذول بس
همَ الي عندي
ماعندي غيرررررهم

سكتت اشهك بعدين رجعت كملت
كلامي
_ تعرف بمصيبة مولاتي زينب ( عليها السلام ) !! اني حسيت
بيها اذا ماتعرفها ف اااااني حسيت بيهاااااا
صفن بوجهي يسمع الكلامي
وماعرف شنو الي يجي باله وشنو بداخله
رد سألني بسؤال اسخف منه ماكو
_ ليش ، شبيها ؟
صرت امسح دموعي بأيدي واحجي ويا
_ هو انتَ حتى تاج راسك ماتعرفها ، ذبحوااا
اخوهااا
هو دنك راسه واني كملت
واحنه نتمرض نتعنف ننجرح وكُل شي يصير
بينه ما نتحمله ويصعب علينا
هي سبوهااا للشام حافية الاقدام
عذبوها عطشوها سبوا كُل ناسها وقتلوا عائلتها
وكُل أهلها
ويا كُل هاي المصيبه كالت الرب
العالمين ( اللهي قدمت لك هذا القربان )
بقى يباوع بعيوني هادئ
_ منين تعلمتي كل هاي الشغلات
سحبت نفس كلبي رجف ويا ذكرها
_ مولاتي مو تعلوم هيَ حب بالفطره والتعلوم
هز راسه بهدوء ورجع سألني
_ منين تعلمتي ؟
عضيت شفتي وسحبتها الداخل ثغري اسحب
نفس بقوه
بعدها رديت عليه واني اتذكر
_ سامع بهاي
( يامن سهر جفني وتعب كلبي ؟ وفنيت الروح
سامع بهاي
أم الــحــزن زيــنــب ...يــم الــجِــتَــل مــرحـب
و تــنـاشـده و تـنـحـب ...و تـقـلـه يـا حـامـي الـجـار
جــم لــوعــة جــم جــمـره ...)

صفن يباوع بوجهي كأن مستغرب
وكدامه كائن غريب
_ منين تعرفين كل هذا الشي
_ جان يطلعن بالتلفزيون واحنه نحبهم ف نسمع
الهن
بعدين وصيت ابويه يجيب الي
كُتب دينيه ومن جاب الي اني صرت اقرا
بيهن وصرت اخذ المعلومات واخزن
براسي
ابتسم بوجهي
_ انتِ انسانه حيل مثقفه و واعيه
_ اي بفضل الله وأهل البيت وحبي الهم بالفطره
سحب ظهره ورجعه للحايط مره
ثانيه من بعد ما عدل نفسه
_ اي بس انتِ ماتوصلين الزينب ولا الصبرها
كزيت ع اسناني
_ ليش تكول زينب ؟
_ شكول ...
_ كول مولاتي ، سيدتي (عليها السلام )
عقد حاجبه وسألني
_ ليش ؟
_ شنو ماتعرف حتى تسألني ليش
_ لا ماعرف كولي انتِ
_ لان هي مولاتي وسيدتي العقيله زينب ( عليها السلام ) بنت الامام علي ( عليه السلام )
وسيده نساء العالمين فاطمه الزهراء ( عليها السلام )
وحفيده نبي الله الرسول محمد ( صل الله عليه وآله وسلم )

_صح ما اوصل الها بس صبرها نال الجنه ..
رجع ابتسم بوجهي
_ بما انُ انتِ تكولين الي صبرها نال الجنه
يعني انتِ صبرني وتنالين الجنه هم؟
سحبت نفس ورمشت بعيوني رديت
عليه
_"وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ".
ضحك
_ يعني اني بالجنه ؟
هزيت ايدي معاجبني كلامه
_ عيني ياجنه الي انتَ تحجي عنها ؟؟
هو انتَ وغيرك الي من نفس القطيع مالتك
ما تدخلون الجنه ولا تشتمون ريحه الجنه
يقتلون ويسبون ويريدون
يدخلون الجنة وين عقلكم بعدين هاي
جهرتك الزفره مو مال الجنه عيني
_ هااا هيج تكولين انتِ
_ ااااي هيج اكول قابل اتشاقه وياك
_ خوش اني راح اطلع
_ ااااي اطلع اطلع وخلصني منك
كام وكف ع طوله وطلع ماعرف وين
وكالعاده الا يقفل الباب عليه يلا يروح

بقيت صافنه شديصير ليش هوَ هيج مختلف
عنهم يعني لو يريد جان قتلني من البدايه
لو مايريدني او عنده فكره براسه جان
سلمني الهم زين ليش هو ديسألني ويستجوبني
بهاي الطريقه احس نفسي
كاعده بتحقيق ومركز شرطه
يدونون ويسجلون اقوالي بس هنا المشكله هو
مو منهم هو إنسان حقير وظالم
بقى عقلي يروح منا ويرجع منا شنو الي جاي يصير
برى وليش كل هذا الي يصير
الي فهمته خلال فتره وجودي ويا داع١١
وخلال أخذهم الي فهمت هواي شغلات
هواي طوائف معاديه وهواي
طوائف حاربوها يعني مو
بس احنه لا غيرهم وغيرهم هواي
والي فهمته منهم
ممنوع للبعض يتزوجون من طائفة يكرهونها
ويحسوها كافره
مفهومهم عنه هو مفهوم حيل سلبي
يفكرون احنه ناس كافرين
مجرد انُ نكون نحب أمام او شخص ينتمي اله
ومن عائلته
يحسون بهذا الشي كُلش مو صح
حتى لو حبنا الهم بالفطره
اذا شافوا شخص يستعين ويكول ياعلي
هذا نهايته معروفه يطبقون عليه أقسى العقوبات
والضرب والاهانه والشتم
واضافه الهذا الشي عندهم كتاب خاص بيهم
همَ الي سوو
هذا الكتاب يتضمن هواي أمور
يمشون وراها
ومن ضمنهن عنه احنه وعن الامام وغيرهن هواي
كلام يعلمون بهذا الكتاب
الناس ويخلوهم يقرون هذا الشي
ويتبعونهم بحيث الي جان ع الصح غصب
عنه يمشي وراهم يحاولون يدخلون بعقلهم شي ما صاير
ولا راح يصير
البعض منهم ياخذون النساء مصدر فقط للأطفال
وهذول البعض بعدين يقتلوهن
يعني بس ع حسب حاجتهم
والبنت الي ما تنطيهم حقهم او حقوقهم الزوجيه
ياخذوها بالاغتصاب والأخبار
غصب عنهن وبعدها يعذبوهن أشد العذاب
خلال عيشتي ويا ابو نوح
ويا ابو عصام هواي أمور اكتشفتهن
امو ما تخطر ع البال من هول الصدمه نحسها
مو معقوله و وهميه وكذب
بس هي فعلاً موجوده
الي فهمته كذلك حتى النساء بيهن
النساء الي تابعه الهم شرسات وحتى قلب
ماعندهن
حقودات ويكدرن يقتلن ويلبس نفسهن
ثوب البراءة
ويطلعن هنَ المظلومات
مثل ما فهمت ابو عصام من صار يتعامل وياي
بهاي الطريقه ويكول اله كلام فهمت معنى مالته
بسبب بعض النساء
الي تابعه للداع١١ جانن يدخلن بين
الجيش وغيرهم يتلبسن ثوب البراءة
وبعدها يحاولن وياهم إلى أن يضعفون كدامهم
وقتها يقع المحظور
وياخذن المعلومات منهم
ويبلغن عليهم وهمَ بطبيعتهم يجون
ياخذون هذا الشخص
ويحققون ويا ويقتلوا بأبشع الطرق
ما ممكن تخطر ع البال
طريق عنيفه و قويه
همَ يحبون شي اسمه عُنف
بحيث النساء والرجال يعذبوهم
يقلعون اظافرهم يقرصون جسمهم يعذبوهم
بالمي الحار والنار و كُل شي
حتى مايستعطفون البنات
يمارسون عليهن العنف حتى بالعلاقه الزوجيه
بيهم إلى أن يموتن وهم يمارسون
عليهن العنف وبيهن
تنتهي حياتها وما يكون عندها اطفال بالمستقبل
يدمرون الجسد بما حمل
من روح ومشاعر
همَ جانوا عندهم هدف هم يستولون ع هواي
من البشريه
وهواي من المحافظات
يحبون يكونون دوله خاصه بيهم تكون قويه
محد يكدر يوكف بوجهم
يهدمون المقدسات وغيرها
وصار شي ببطن شي ثاني
والفكره الي براسهم كذلك يستولون ع الجيش
والحشد
اني الي عشته يمهم شي اشبه
بالخيال تعذبت تعذب جسدي ونفسي
خاصه من جنت يم ابو نوح
ولا يوم نمت مثل الناس جنت انام من ورى الإغماء
واذا كعدني لازم يضرب بيه إلى
ان افز ويبقى يضرب
اشياء ماكدر احجي بيهن لان تتعب نفسيتي واني
كل مره اذكرهن
الأشياء البسيطه الي عشتها
هي ياخذ خصله من شعري يفرها ع ايده
ويسحبها بكل قوه إلى
ان تنقطع من شعري وتصير بأيده يحب
يشوفني اتعذب بهاي الطريقه يتونس
بس ماقتلني لان مثل ما كال ابو عصام يريدون يستغلوني
مثل الباقيات القويات حتى اكون
جاسوسه الهم
شاع بينهم عده أمراض لان من جسم الجسم
ثاني من بينهن الإيدز

الشغله الي بقت براسي هو أبو عاصم
ليش مختلف الهاي الدرجه
حتى ولا مره سمعته سب او شتم الامام
ولا مره فكر بهيج تفكير
بالعكس من احجي عنه يبقى ساكت ويستمع
الي
كأن يحب يسمع عنه ويحاول يسألني
حتى يخليني استمر واحجي اشياء ومعلومات عنه
حتى هو اجه وحجه الي عن اهلي
زين ليش
ويقفل الباب عليه زين وين يريد يوصل
بس اريد افتهم وين يريد
بيه شنو يريد يسوي
رجعت افكر بكلامه عن اهلي اكيد هو يتشاقه
ما معقوله ماتوا او اني اتخيل كلامه
وعقلي يسوي دراما من كيفه
ضرب رجلي وصحت
اووووووف يممممممه
وين عقلي شلون افكر بهاي الطريقه
اسم الله يحفظهم الرحمن
رجعت افكر اني اغلب الأوقات الي
عشت بيهن اني بين أربع
حيطان من تعب نفسي وقلق وخوف
وعدم امان وارتبك واخاف من اسمع اي صوت
حتى صوت المي والساعه
وغيرهن أصوات متتاليه اخاف منه
ألجأ ايه الكرسي
هي الوحيده الي جانت تريحني
تخليني أهدأ وتمسح كُل خوفني وتعبي من الي
اعيشه ومن كل شي
هي جانت تبث الروح بيه
وتخلصني من عذابي

﷽
﴿ اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ ﴾
صدق الله العظيم
( اقروا قلبي )

جنت كاعده رفعت ايدي ادعي
يارب لو جان هذا امتحان منك خليني قويه ولا تخليني
اخسر بي وارسب ولو جانت هاي الحياة الواقعيه
اوكف الي اني من عبادك المسلمين يارب
رجعت ردتت ٣ مرات يا الله يا الله يا الله
لا تخيب ظني ولا تضعف قوتي
واجبرني بين الكل بحق مصيبه
الحُسين
ماعندي احد ولا عندي عائله اوكف وياي اني وحيده
انتَ كل شي عندي ماعندي غيرك
وحدك لا شريك لك ، لك الحمد ياربي
انتَ الي تساعد بأشد الحالات
سندي واني ما الي سند بهاي الدينا غيرك
نزلت ايدي استغفر ربي
حسيت اجتني قوه ماعرف ليش هيج
مشاعر ضربت كلبي كأن عاصفه قويه حتى جلد جسمي كزبر صابته قشعريرة
وفعلاً ربي مايترك احد الوحده صح تأذينا بس
يبقى ويانه

مشت بالغرفه اباوع ع الغرفه والبيت البيت
حيل وصخ اااايع لعبها النفسي يحتاج اله غسله
من هاي التمام
وصلت يم الباب
احجي ويا نفسي
_ بس اريد اعرف هذا ابو الوصخ وين راح
شلون يعوفني الوحدي
وين راح الخاطر علي يفتر مثل ابو الزمير
شبي جنه بكاية يفتر ويفتر إلى أن يدوخ
ويرجع الي ريحته تكتل كتل تلعب النفس
وكله قذارة اييييع ويلعب نفسي
جاي احجي ماحسيت الا اجاني صوته
_ اي خاتون كملي كملي
صفنت بوجهة
_ شنو انتَ سمعت ؟
_ اي خاتون اجيت افتح الباب وسمعتج تغردين
عليه كملي ليش وكفتي
اخذي راحتج اعتبريني ماموجود
صدك جذب
شنو تفكرين بصوت عالي
اني سكتت درت وجهي اريد امشي
وكفتي صوته

_ نارا
التفتت عليه اباوع مستغربه
_ شكو ؟ خير
_ لا تنطين لأي بشر ظهرج وتمشين
عقدت حاجبي من كلامه
_ ليش ؟
_ بابا الي احجي طبقي وخلص
_ اي غير افهم ليش
اجه تقرب مني صرت حيل قريبه منه
بحيث مايفصلنه الا القليل ردت ابتعد بس هو
لزمني من ايدي وسحبني اله
ردت انضرب بي سريع رفعت ايدي وخليتهن ع
صدره حتى ما انلزك بي
او اطخ
نزل راسه الي وعيونه بعيوني
_ لاتنطين ظهري لأي كائن مهما تثقين بي
ترى ع اي لحظه يغدرج
ويطعنج بظهرج
هزيت راسي بلا سحبت نفسي
منه بالقوه خليت ايدي ع ظهري وهمست اله
_ لا الله وأمامي واكفين وياي
ابتعد عني ومشى خطوه
_ مثل ما كلت الج لا تخلين احد ورى ظهرج
لاتمشين وتنطين احد ظهرج
باي وقت تنغدرين
هزيت اله رأي بأي
_ يعني حتى منك ؟
_ حتى مني اي
_ الله كريم

صفن بوجهي حجه
_ ناررا احسج جوهره نادره الله حطها بين
زمره معفنه
ردت اضحك بس سكتت قاومت رديت عليه
_ قصدك انتَ ؟
هز ايده
_ جيره بكصتج وبكصه الي يحاجيج
_ عفية عليك يعني شملت حتى نفسك
بس تعال هنا اريد اسألك
_ خيرج ؟
سحبت نفس قريب منه
_ شعجب اليوم مابيك ريحه زفره ومابيك دم
غير بس بيك ريحه التراب
مو من عوايدك
ضحك بوجهي واهتزت اكتافه صفك
ايد بأيدي ورد ع سؤالي
_ دمشي امشي جوه احسن الج العرجه
ضربته ع ايده وصحت بي
_ والله وكت انتَ المعفن هيج تحجي وياي
ضحك بصوت حيل عالي
_ معفن بس مو مثلج اخرخر دم من كل مكان
فتحت عيوني ع وسعهن مصدومه
من كلامه والاستهتار مالته
رفعت اصبعي السبابه
_ باااااوع ولك
_ ولكلاكه بسسنج
_ شبييك هاي لزمتها عليه فد لزمه قابل بأيدي
كل شوي وكايل الي تخرخرين دم
شبييك راسك اسطواني ابو راس الاسطواني
_ شنوووو شبي راسي ولج
_ اسطواني
ضحك بصوت عالي غمز الي
_ وانتِ زاويه منفرده

سديت ايده طبكتهن ورجعت فتحتهن بوجهة
غميته
_ امداك حتى تحشيشك معفن مثلك
هو ضحك عليه عافني ودخل الحمام
بقيت كاعده اشو هذا مرت ساعه كامله وهو ماكو
ماطلع من الحمام كلت
خلي انتظر بعد شويه اذا ما طلع اكوم اشوفه وين
راح يمكن مات جوه لو غرك بالمجرى
هم مر الوقت وماطلع كمت بالكوه
امشي اكمز تكمز وصلت للحمام
ردت اسأله بس بعدين تذكرت كلامه من يصيحني
واني ادخل الحمام كلت الا ارجعها اله
_ ههههييي انتَ وينك شنو غركت بالمجرى
لو تزحلكت بالصابونه جوه ؟ شو ما الحك حس ولا خبر
شو ماكو صوت
االوو تسمعني
سريع اجاني صوته
_ اسمعك حول ، ارسل
صفنت هذا شيحجي
_ شنو ارسل شبيك انتَ
_ صخمان دزيلي الملابس
_ ياملابس هذن
_ ملابسي هيووو
_ ها وينهن
_ يمج ع الدرج حاطهن
صفنت اريد استوعب هذا يادرج هو وين
اكو درج بالبيت
_ شبيك انتَ وين أكو درج بالبيت
_ لا اكو درج
_ وينه ؟
_ بالغرفه
رحت للغرفه ادور ع الدرج بس مالكيته
وين راح هذا يمكن يضحك عليه
رجعت عليه
_ شنو انتَ تضحك عليه وين اكو درج
بالغرفه
صاح بيه
_ شلون راح اجرج بزي** هسه
_ وثول السسسانك شبك تحجي حجي مو حلو
خلي السانك بحلكك احسن
_ شبيج انتِ وووثول انتِ ثوله اريد اعرف
_ انتَ الاثووول مو اني وين اكو درج
_ روحي بابا بالغرفه اكو افتحي الكنتور وتلكين
درج
صفنت هذا شبي يضحك عليه
_ انتَ شبيك وين اكو درج بالكنتور
يعني اكو درج بالكنتور
صاح بيه بصوت عالي
_ ييييم كبر ابوي الدرج
_ يااااا ابوك ميت ؟
_ اي
_ شوكت مات ؟
حسيت بحركته
_ ممكن ملابس ؟ ترى اني بالحمام
ضحكت وحسيت صار بأيدي
_ كول الي ابوك شلون مات وشوكت واني انطيك
الملابس
_ اصدمج بشغله؟
تحمست كلت اكيد راح يحجي الي شغله مهمه
ويصدمني
_ اي شنو هيَ ؟
_ اطلع الج بدون ملابس مصلخ واصدمج شكلج
تحبين اطلع بهذا الشكل من بعد ما شفتيني
قبل بدون ملابس
احس وجهي دخن ناااار صارت تطلع منه
حيل خجلت
بدون ماا ارد عليه رحت للغرفه
رحت للغرفه لكيت الملابس واني ما منتبهة عليهن
اخذتهن ورجعت انطيتهن اله
_ خااااب ايييييع لك
_ وين صايره هاي ايع الي ؟
_ ممكن تسكت
عفته ورحت للغرفه ادردم عليه بيني وبين نفسي

ورى شوي طلع اجه يمي ينشف
براسه
اباوع هذا بيده خاولي منين جابه
_ مبروووك صار عندنا خاولي
_ اي يتربى بعزج ان شاء الله
_ وين تعرف الله انتَ
_ اعرف
_ واضح
ورى ما كمل طلع هم ماعرف وين راح بالضبط
ولا اعرف شنو يسوي بالضبط

استغليت الوضع هو ماكو طلعت برى الغرفه
تمشيت فتحت الباب الأول
وطلعت برى بالكراج
اباوع الحيطان حيل عاليه حتى ماكدر اطفر منهن
ولا اكو شي يخليني اصعد واعبر منهن
تقربت من الباب سحبته حاولت افتحه ماكدرت
لان مقفول
التفتت للبيت ماعرف شنو اسوي
احس نفسي حيل فارغه
صرت اباوع ع البيت حيل وصخ
رفعت ايدي ع فكي افكر شنو اشوي شنو حتى اشغل وقتي
إلى أن طكت برسي اوخر هذا التراب
من الارضيه احس نفسيتي ادمرت واني اشوفه
رحت اكمز للمطبخ شفد جدر
صرت اترس بي مي واشمر ع الارضيه
والتراب يمشي ويا المي
صار طين
صرت اجيب مي وأشمر
اجتني نسمه هوى بارده رفعت راسي للسماء
اباوع
حجيت ويا نفسي
هسه هذا مايفكر بيه الوحدي يمكن اجوع
شنو مايحس حابس بشر بالبيت
صدك مايستحي
رجعت دخلت جوه اريد شي امسح بي المي
والتراب بس مالكيت شي
بس لكيت فانيلة ع الارضيه مشموره
اخذتها وطلعت برى امسح بيها
رجعت للمطبخ اباوع عليه خيسسه ويلعب النفس
طلعت الأغراض كلهن
هنَ لكيتهن شي بطن شي ثاني وريحتهن
تكتل
سديت خشمي قرفانه من الوضع
فتحتهن وصرت اشيل مي واشمر عليهن
بعدها قلبتهن ع الجهة الثانيه
حتى ينشفن من المي

اخر شي شفت الجد بي مي متروس
صرت اباوع وين اشمر المي
التفتت إلى أن صارت عيوني ع الباب
كلت خلي اشمر المي ع الباب كله تراب
رفعت ايدي وهستوني شمرت المي
ع الباب جان ينفتح الباب ويصير
المي كله بوجه ابو عاصم
هنا ماكدرت اتحمل واني اشوفه بهذا الوضع
اجتني موجه ضحك هستريه
بحيث ضحكت بصوت عالي اريد اسكت
ماكدر اسكت
هو يباوع عليه جان شايل بيده جيس بي خبز
انوب هو والخبز كلهم مي تنكعوا
اني اباوع عليه واضحك

اباوع عليه مد ايده ورى ظهره
وطلع السلاح اني بس اضحك من شفت السلاح
بقيت اضحك
ماحسيت الا سحب اقسام وحطه بوجهي
شوي شوي راحت الابتسامه من وجهي
و صفنت اباوع عليه
_ شنو راح تكتلني ؟ يلا اكتلني ترى ما خايفة
منك
شبيك صافن عليه يلة اكتلني ماطول
نظفت البيت همين
اباوع بقى صافن بوجهي تقربت عليه
و على وجهي ابتسامه
هو عصبي عيونه بعيوني عيونه لونهن
ع نرجسي ماعرفت شلون بحيث ركزت بيهن
اول مره وحاجه بي طبره خفيفه
اثر ضربه وباقي الأثر مالتها
_ يلا شبيك صافن اكتلني
هو بقى يباوع وصافن حتى رمش مارمش
بس عصبي ويخزر
اباوع تحرك السلاح صح خفت وتشاهدت
بكلبي لان ع ساعه يكتلني هذا ما يتأمن
اذا هو إلاخ يقتل اخو
شلون هو هذا مايقتلني
حرك السلاح وسحبه رفعه اني غمضت عيوني
خايفة ماحسيت الا طلعن ٣ طلقات
من السلاح
فتحت عيوني ما نهزيت كدامه
ملامحي جامده بس من داخلي ميته خوف
هو نزل السلاح ودخل جوه
عافني برى بس وهو دخل للغرفه سمعت
صوت المفتاح يعني قفلها عليه
بقيت صافنه شنو
شعجب لزم اعصابه وما سوه الي اي شي
الخايس بس حاير يخوفني
ويرعبني

اباوع ع نفسي شبيهن، جليه شو
ماحس بيهن
حسيت وزني صار ١٦٠ كلبي صار يدك
ماعرف شبيه
صار ثقل جسمي كله ع رجليه
بالبدايه ماحسيت بعدين حسيت وزني صارت
طن وكلها صار ع رجليه
دنكت ولزمت طرف ملابسي ورفعتهن
اريد اشوف شبيهن رجليه
اول ما كشفت ع نفسي فتحت عيوني ع
وشعهن مصدومه
اباوع ع رجليه كلهن طكع زرك !!!
رجف جسمي وكلبي حسيته راح يوكف
كعدت بالكاع بنص المي
ارجف شنو هذا الزراك ليش رجليه هيج
صار لونهن ازك بهاي الطريقه الي تخوف
لطمت ع وجهي ياربي هاي شنوووو
شجاي يصير بيه
معقوله تخثر بالدم اثر جلطه لو شنو
احس صرت ارجف خايفة
شنو راح اموت اني
ششششنو هاي ياربي ساااعدني شبيه اني
رجف فكي واني اصيح عليه
_ وييييينك انتَ تعااااال ساعدني وووووينك

انفتح باب الغرفه وطلع
بهدوء شافني كاعده بالمي
_ شبيج كاعده بالكاع شنو بربشتي بالمي ؟
سحبت نفس ارجف
_ رجليه
_ شبيهن رجليج ؟
_ شبيك رجليه زرك
_ شنووو؟؟؟
نزل كعد كدامي لزم رجليه
_ شو وخري اشوف
لزمت وضربته ع ايده
_ لا تلزمني لاتلزم رجلي
نتر بوجهي
_ هسسه رافعه رجلج حتى اشوف وتصيح لاتحبلني
غير اشوووف رجلج شبيها شبيج انتِ
غير اشوف رجلج ليش زركه مثل ما تكولين
يمكن مضروبه
هزيت راسي اله
_ لا مامضروبه
_ شو خلي اشوفها وخري ايدج
وخرت ايدي وهو رفع ملابسي عن رجلي شافهن
حسيته بلع ريكه بس ماحجه شي
عن رجلي
_ ابقي هنا هسه اجي
ما انتظرني احجي دخل يركض ماعرف شبي
ورى شوي طلع

طلع كعد كدامي اباوع شو هذا بيده ابره
راد يدخلها برجلي انصدمت
لزمت ايده
_ شدسوووي انتَ وخر عوفي
_ عوفي ايدي خليني اشوف شغلي وياج
_ لا عفية شنو تريد تسوي برجلي
وخر بعد عني
_ لج بابا شووو وخري مني ما اسوي
الج شي اني جاي اعالج رجلج
_ اكيد ؟
_ اي
اباوع عليه بس خايفة منه وكلت أمري ال الله وسلمت نفسي اله
هو جك الابره بالزراك الي برجلي وماعرف
شنو بيها
وخر الابره مني وباوع بوجهي
_ ها شتحسين مهبوطه ؟
بلعت ريكي
_ لا
باوع بعيوني يريد يتأكد مني
_ خايفة ؟
_ لا
_ نارا بابا لا تجذبين عليه ترى
الدم مالتج متخثر شنو ماخايفة احجي شي
شبيج ..

سكتت مارديت عليه هو يباوع عليه
مركز وياي حححيل مركز
فجأه صاح وهو يضرب
رجله بحركه
_ عرررفت ماراح تعدي ع خير
_ شنو منيه ؟
باوع عليه هز راسه
_ عرفت الصدمه ماراح تعدي ع خير
_ صدمه شنو ؟
بهت وجهة
_ صدمه اهلج شبيج
_ منو اهلي ؟ شبيهم اهلي
فتح عيونه ع وسعهن وتقرب مني
لزم خدودي بأديه وكور وجهي داخل ايده
وجهة قريب من وجهي يحجي بهمس
_ بابا نارا انتِ بخير ؟
مارديت عليه سألته مافاهمه شي
_ شبيهم اهلي ؟
انتفض من يمه سحب ايده
من خدي وضربني ع خدي ع كيف
_ لج خبلتيني ااااصحي شبيك
ضحكت رديت
_ اني صاحيه
عض شفته بقوه كاتم ع نفسه
_ ناراااا اصحي شبيج ، يابه والكريم عرفتج
فاقده الحد هسه من هذا اليوم
الهذا اليوم من تصرفاتج هاااي
_ شنو فاقده من شنو شبيه اني ، انتَ شبيك
صاح بصوت حيل عالي
_ عرررررفتج ، استغفر الله

كام حط ايده جوه ظهري وايد الثانيه جوه
رجليه وشالني
اني احس ماعرف شنو حتى مابيه حيل
وجسمي ثقيل
خليت راسي ع كتفه
هو دخل للغرفه نزلني ع السرير
وطلع دقيقه ورجع ماعرف شنو
بيده ، ثواني وماحسيت الا صب المي البارد ع
راسي فزيت صرخت وضربته
اصيح
_ عوووفني وخرر ،اششششااا بارده
_ اصحي بس اصحي
_ وخررر شبيه حتى اصحى وخر مني بارد المي
_ نارا اششش جاوبيني اهلج وين ؟
_ وين اهلي !
_ لج نارا خبلتيني اهلج وين اني مو كلت
الج اهلج وين ليش ما تذكرين
هز راسه بقله حيلة تقرب لزمني من اديه
وسحبني عليه
_ ناري اصحي استوعبي الي اكوله الج
_ لاتكول نااري لا اهفك وخر مني
_ ججججء مو السان رشاش صحيح بعدج بالصدمه
بس السانج ماينضب بعده فالت
وتردين كل كلمه بعشره
_ شنو تحجي شبييك هاي ياصدمه الي تحجي
عنها
_ ابقي كاعده ع السرير هسه اجيج لاتتحركين
اباوع عليه طلع من الغرفه
ماعرف وين راح واني احس بنفسي ماعرف شبيه
بالضبط كأن تايهة بصحراء
ورى تقريباً ربع ساعه رجع دخل للغرفه وبيده
جدر
تقرب مني سريع خليت ايدي ع وجهي
_ شبيج ؟
_ ها عبالي راح تشمره بوجهي
_ جججء ما اشمره لاتتحركين
صفنت بي شنو يريد يسوي
حط الجدر بالكاع صار صوت الجدر سريع اجه صوت
الطلقه براسي سريع حطيت ايدي ع
راسي احس الصوت زرف
اذني زرق
هو حجه وياي
_ بس اهدئي ، اصبري
شال رجلي وحطها بالمي الرجل الي متصوبه
سريع فزيت وصرخت
_ ااااااااااااخخخخخ
لان المي الي بيها اجه ع عمليتي الي بالرجل
شلت رجلي سريع من الجدر
بس هو سحب رجلي ورجع دخلها بالجدر
،رجعت صرخت بي
_ وووووخرررر توووجعني
_ بس اصبري شووووي اصبري

اني بقيت اضرب وجهي واكرص
بأيدي كل شوي اكرص ايدي اقوه من قبلها
وبعدين ارفعها اضرب وجهي
هو شافني هيج
اجه جر ايدي وصاح بوجهي
_ شسوووويتي ، شبيج ناااارااا
هزيت راسي بقوه
_ مامسوويه والله مامسويه شي
_ لج نارا شبييج بس اصبري اوكفي بابا
_ مابيه اني مابيه شي مابيه
اني ماعرف شنو صار بيه تخبلت
خليت ايدي ع راسي وهو يصيح شبيج
اخر شي كال
_ اصبري هسه اجيج
طلع ركض من الغرفه واني كطعت شعري بأيدي
الزمه من الجذر واشلع بي
بحيث ملابسي انترست شعر
اخر شي ماحسيت بنفسي الا شلعت خصله
كامله من راسي
صارت بأيدي
ويا ما شلعتها هو دخل للغرفه
اني حاطه ايدي بحضني اباوع ع الخصله الي بأيدي
ما احس الا اجاني صوته العالي
_ هااااااي ششششسويتي
رفعت راسي يباوع عليه عصبي ناار كبره
يباوع بعيوني وينزل عيونه ع ايدي
اجه يمشي الي بخطوات سريعه
وكف كدامي رفع ايده وضربني بكف ع وجهي
بس كف حيل قوي
_ شششششبييييييج الخاطر الله شبيج اصحي
رديت عليه
_ شسويت !
رجع حجه وهو يتنفس قوي
_ بس انطيني مجال هو اني شنو سووويت
الج قابل
_ وخر عوفني
_ خااب دتعااااي

ماحسيت الا دفعني ونومني ع السرير
دفعته وكمت صحت بي
_ ماا اريد انام
_ اشششش
رجع دفعني من كتفي ونومني ع السرير مره ثانيه
من صرت نايمه سريع كعد ع السرير
وحط رجله فوك رجلي حتى ما اكوم
لزمني بقوه من شافني ادفع بي حتى اكوم
هو لزمني اقوه
صارت رجله ع رجلي المتصوبه الالم صار براسي
_ اااخ وخر رجلي هاي
بدون ما يحجي بعد رجله شوي عن رجلي
حتى ما يتقرب منها واطخ بيها
لزم ايدي وهمس بأذني
_ ناامي
_ وخر
_ اشش نامي تعبتي اليوم نامي
ماعرف شبيه فجأه اجتني نوبه من الضحك بشكل
هستري صرت اضحك
وهو صافن بوجهي رجعت اضحك واضحك
وماتعبت
مستمره اضحك وهو لزم شعري كله لمه
ورجعه ورى حتى ما يضوجني
دنك عليه رفع ايده ولزمني من خدي
همس قريب مني
_ شبيج ؟
اني سكتت حتى ما حجيت بقيت صافنه
بعيونه رموشه حيل طوال
قرب وجهة من وجهي هم رجع همس الي مره
ثانيه
_ نارا شبيج ؟
مارديت عليه نفخ بوجهي اجتني ريحه جكاير
بالنعناع
اني ما احب الجكاير سريع لميت حلكي
ودفعته من كتفه
_ وخخر مني شو وخر
هو بعد عني وترك بيني وبينه مسافه قليله
باوع بوجهي
_ يلا نامي تعبانه انتِ
باوعت عليه احس نفسي خدرت جسمي صار
ثكيل
قرب شفايفه من اذني وصار يهمس بهدوء
_ اششش يلا نامي ، اششش اني يمج
ماعوفج، نامي لاتفكرين بشي
احس عيوني صارت تقفل وافتحهن كُل ما ينزلن
وهو مستمر ماعرف بشنو يدندن
ويهمس الي كلام
واني بعدني واعيه

ورى شويه حسيته يدندن يقرأ شي
بالبدايه ماعرفته ردت افتح عيوني حتى اسأله
بشنو دتقرا بعدين وضحت عندي
انصدمت وحسيت اطراف رجليه ثلجت
واني اسمع كلمات الي يرددهن بأذني
كل كلمه يكولها تختل بنص كلبي وتحتل الها زاويه
منه
مقرب شفايفه من اذني ويهمس الي
بدعاء
" اللهم إنا نسألك بأسمائك الحسنى وبصفاتك
العُلى وبرحمتك التي وسعت كُل شيء
ان تمن علينا بالشفاء العاجل ، وأن لل تدع فينا
جرحاً الا داويته ، ولا الماً الا سكنته ،
ولا مرضًا الا شفيته ، والبسنا ثوب الصحه والعافية ،
عاجلاً غير اجلً ، وشافنا وعافنا واعفوا عنا ،
وأشملنا بعطفك و مغفرتك ، و تولنا برحمتك
يا أرحم الراحمين "

هو يقرأ بأذني بصوت ناصي واني احس
الساني ثكل حتى ماكدر ارد عليه
صوته جان حيل هادئ وبحته حيل حلوه حسيت
بالأمان واني اسمع اله
اجاني اطمئنان ماعرف من وين
بحيث شوي شوي إلى أن غفيت وماحسيت بنفسي
الا واني نايمه وضامنه نفسي
اني بين ايد امينه .

نمت من الساعه تقريباً المغرب ماكعدت
الا ثاني يوم الساعه 7 المغرب
مو حاسه بنفسي وكأن اول مره انام من بعد هاي
الفتره الي عشتها
فتحت عيوني احس جسمي متكسر
ويوجعني ،شلون نمت كل هذا الوقت !
ماعرف وحتى مو حاسه بنفسي
ابد
اباوع بالغرفه عيوني تفتر بس الغرفه فارغه
مابيها اي احد عزه وينه شنو الي صار
سريع اجه ببالي انُ هو انطاني منوم وخلاني
انام طول هاي الساعات
ضربت ع راسي
صخام الصخمج يانارررا شنو صار
سريع رفعت ملابسي اخاف لا معتدي عليه
باوعت ماكو شي الحمد لله لعد شنو
الي صار !!
لميت نفسي وبقيت كاعده ع السرير
افكر شنو الي صار
إلى أن طخ براسي صوته هو يقرأ
الدعاء
شنو دعاء مناجاه رب العالمين ؟؟
شنو يمن الي بالدعاء والشفاء العاجل !!!
ليش اني شبيه !!!
تذكرت رجلي رجعت رفعت ملابسي
اباوع الزراك مالتها خف مو مثل
الأول يعني صحيح طلع
عندي تخثر بالدم
زين هو وين راح ليش ماكو
احس بالخوف سيطر عليه ليش هو هيج
بهذا الشكل احس كل شوي
مختلف برأي ثاني
وما يثبت ع شي ويخليني لا اني بالسماء
ولا اني الي بالأرض
بقيت كاعده بمكاني واني الأفكار تتراطم براسي ..

إلى أن صار اليل دخل للغرفه
بدون سلام بدون شي سريع دخل بالموضوع
_ ها اكلج هواي تشوخرين انتِ
ماجاوبنه وسألته
_ شنو الي صار ؟وليش هيج صار وياي
كول شنو سويت الي شبيه اني
ابتسم بطرف شفته
_ خدرتي ع صوتي ونمتي ياخاتون
_ شنوو ؟؟؟؟ شنو تحجي انتَ شنو خدرانه بصوتك
_ اي شبيج قابل اجذب عليج
شنو تتذكرين ؟
_ اكول ترى اني اتذكر مو شاربه شي حتى انسى
_ ها كلتي تذكرين ؟
_ اي صح اني نمت بس اتذكر كل شي
حتى اتذكر خاف انتَ ناسي ف اني
مو ناسيه سكتت بعدين حجيت اذكره بالدعاء
" ان تمن علينا ... "
هو سريع فز حط أصبعه ع حلكي
_ اشششششش ، شنو تحجين انتِ شنو أن تمن علينا ؟
_ غير انتَ البارحه قريته بأذني
_ لا متوهمه ماكو هيج شي
_ جذاااب
_ افاااا اني جذاب ؟؟
_ اي لان اني متأكده انتَ حجيت بأذني
الدعاء وطلبت الشفاء الي
_ ماكو هيج حجي هاي انتِ تهلوسين
_ شتحجي انتَ تريد تخربط عليه الأفكار
_ لا يابه بس جاي اكلج الحقيقيه
_ لا هاي مو الحقيقيه
_ هي
_ لا مو هيَ
_ داكول هيَ شبيييك
_ انتِ الي شبيج تخترعين كلام من كيفج
وتتهميني بي
_ اوووووف شبيك سكتت يلا
ساعه كامله اقنع بي هو كال هيج
وهو يرجع يكول ماكو هيج شي
حتى شكيت بنفسي من صدُك انُ هاي اوهام
مو حقيقه

_ اهلج وين ؟
دنكت راسي رديت عليه واني خانكتني العبره
_ عند الحنون
سريع صفك ايد بأيد الثانيه واردف بحماس
_ لك هلاااا هسه رجعت ام النون
صفنت بوجهة
_ ليش اني وين رحت ؟
_ بعالم الموازي ولج
_ شكدد شكلك اااايع
_ ديلا عاد وجهج الحلو
وكف ورجع سألني
_ اني طالع تريدين شي ؟
بعدني ما مجاوبه وبطني صارت تقرقر
يبووو ، ضحك بصوت عالي
_ هاا اسمع بطنج تجاوب قبلج لازم تريد شي
_ لااا ماتررريد
_ ديلا خاتون اني مسوي اكل كومي اكلي
احس فرحت لان صدك ميته جوع
_ شمسوي ؟
_ من جنتي نايمه اخذت من دمج وطبخته
من كل عقلي صدكته صحت
_ شششششنو ؟..ايييع شنو دم
_ كومي لج كومي
عافني وطلع واني بقيت اصيح ورى
اريد يفهمني بس
ماجاوبني
طلعت ورى امشي رحت غسلت اديه
بس لعبانه نفسي افكر
صحيح طبخ بالدم

بقيت اشهك ماعرف مجرد ما تخيلت
الوضع انقرفت
صرت اشهك
طلعت برى بالحوش احس الهوى شح عندي
وصلت للباب بقيت اجر
بي اريد اطلع برى حاولت وحاولت افتحه
بس ما انفتح
ماعرف شبيه اذا من كلامه لو من شي ثاني
هيج صارت حالتي بقيت بمكاني
اجر بالباب اريد يفتح واني ابجي
بصوت واشهك
ماعرف شكو شنو الي صار
بحالتي يمكن حاله نفسيه
اني واكفه ثواني وجان اسمع صوت طبه
حيل قويه بهت وجهي ورجف جسمي
انفججااااار هذاااا يااااربي
انفجاااار
صار صريخ بالشارع وصوت الناس تصرخ
بصوت عالي
اني احس ثلجت من الخوف
جامده بمكاني ما متحركه ورى ثواني صار صوت
ثاني حيل قوي مثل القاذفه
بحيث المكان الي واكفه اني بي اهتز
هزه حيل قويه مثل الزلزال القوي
ورى عده ثواني وهم صار صوت قوي ثالث
صرخت بصوت عالي
يا الله يا علي يا الله
وراها صوت حيل قوي وصراخ ناس
اني رجليه بادت حيلها وكعت بالكاع
ارجف ماحسيت الا الباب
بصفي يندك بصوره قويه
راحت روحي واني اسمع الباب يندك
بقيت جامده مافتحت الباب واساسًا هو
مقفول ماينفتح
ولو هو أبو عصام جان فتح الباب لان عنده
المفتاح
تدنيت يم الباب وهمست
_ منو ؟
ثواني واجاني الرد
_ اني ابا العاصم نارا افتحي الباب
_ شلون افتح الباب ماعندي المفتاح
جنت احجي ويا وارجف
رد عليه
_ كومي تمشي للمطبخ تلكين المفتاح
الثاني بالكاونتر كومي جيبي وافتحي الباب

_ ومنو يكول انتَ ابو عصام ها
_ شبيج نارا يعني ماتعرفين صوتي
_ يمكن تطلع انتَ واحد ثاني مسوي نفس صوتك
ولي مناا يلا روح
_ لج كومي ناااارااا سريع جيبي المفتاح
اني طلع وضاع مني كومي سررريع
مابقى وقت جيبي حتى نطلع
صفنت شنو نطلع
_ شنو شكلت ليش نطلع
اني خايفة لايطلع مو هو ويطلع واحد ثاني يشبه
صوته الهذا سألته
_ البارحه شنو صار ؟؟؟
رد عليه بسرعه
_ جنتِ تشوخررين مثل المطي ، يلا عاد كومي افتحي الباب
هنا تأكدت هو نفسه ابو عصام
رحت للمطبخ دورت ولكيت المفتاح
رجعت فتحت الباب اله
دخل كله تراب من فوك للجوه
_ شبيج
_ ها
باوع ع شكلي شافني صفره عرف بيه
_ ليش هنا طالعه مو كلت الج لا اطلعين
يصير مايصير تبقين جوه
بدون مايسمع ردي راح للمطبخ شاف الاكل بعده
_ هاي ليش بعدج ما ماكله شي ؟
_ ما اشتهي
سكت صفن بوجهي
_ لازم نطلع منا
_ شنوو وين نطلع ، ليش نطلع ؟
_ كلت لازم نطلع شبيج
_ وين ماخذني ها
_ انتظري هسه اجيج
ماعرف وين طلع وماعرف وين راح اصلاً
بس جان شكله متوتر وماعرف شنو
الي بي
مر الوقت حيل تأخر
ورى فتره ماحسيت الا الباب انفتح
بقوه ودخل يصيح

_ نااااااااراااااااا
طلعت امشي بأقصى سرعه عندي
ع تك رجل
_ شكوووو
_ بسسسساع لازم نطلع مناااااا
اباوع عليه مخبوص وكأن راح تصير حرب
بقيت واكفه بالباب وهو يصيح
_ يلاااا بسسسساع تعاي طلعي من البيت
صرت ارجف من الخوف
_ ففههههمني شششكو ليش نطلع شصاير
ماحسيت الا عاط بيه بصوت عالي سحبني
من ايدي
_ كتلج سرررريع تعاااي
سريع جرني وطلعني برى البيت
السياره مالته جانت مركونه ع صفحه
سحبني سحب وبسرعه صعدني بالسياره
وسد الباب التفت عليه
يحجي بسرعه وهو يتنفس بقوه
يحذرني
_ لوووو شنو تسمعييين ما تطلعين من السيااره
لو شنو مايصير ماتتحركين خطوه وحده
تبقين هنا وتضمين نفسج
ماريد اي واحد يشوفججج
مفهووووم
هو يحجي واني بس اهز براسي

قفل باب السياره وعافني رجع
للبيت ركض
اول ما دخل للبيت ما اشوف الا ثواني
وركنت بصف البيت سياره
نزلوا منها زلم محزمه مثل الي دخلوا
علينا للبيت و وياهم مره
دخلوا للبيت الي بي ابو عصام اني ارجف من الخوف
ياربي شنو راح يصير شبيهم
اول ما دخلوا
ماسمعت الا صوت ٤ طلقات وحده ورى
الثانيه
صرخت من مكاني واني ادفر مثل الانازع
" لااااااااا قتلوووووووا لاااااااااا "

ـــــــــــــــــــــــــــ•●•ــــــــــــــــــــــــــــ

توقعاتكم ؟

هذا بارتين سوه تعويض الكم ،
طبعاً كُلش اعتذر لان امس ما نزلت
بس انطيت خبر بالانستا والقناة التلي
سبب تأخر الأحداث ما وصلت الي الهذا
تأخرت بتنزيل البارت

هاي صوره من البيت الي جانوا بي نارا وابا العاصم
طبعاً صوره حقيقيه وبقبول
منهم يلا نزلتها