الربتج " حالك الاسوداد " الفصل الثامن وثلاثون 38 - بقلم رهف علي

و أشتاگلك و أرجع طِفل
مَا يقتَنع هوَ بعِذر
مَا يعرُف فراگ و هَجر
كُل إلي يشوفه يريدة
حاجاتَه كُلهن بس إله
و مَمنوع واحد يقترب
حَاضنهن بچَف إيدة .

وماذا لو اختارنا الله الأصعب الاختبارات الصعبه !
هل تَظن ان الله لا يَحُبك ! ع العكس
عليك ان تعلم ياعزيزي القارئ
ان الله اذا أحب عبد ابتلاه
.

-نارا :- دخلنا للبيت بقيت فاتحه حلكي مصدومه اباوع اقاربهم
كُلهم موجودين والكُل جان خايف ونظراتهم تخوف أكثر صرت ادور بعيوني ع شُعاع وينه ليش هو ماكو وياهم همست برجفه من بين شفايفي ، شُعاع !!!!
صارت عيوني بعيون مصطفى همست ، شُعاع وينه ؟؟؟

- مصطفى :- اهدئوااا
- نارا :- مصطفى شُعاع وينننه لاتخبلني
- مصطفى :- سحب نفس وزفره بقله حيله ، اندور عليه هو والشذام ماكو فص ملح وذاب اتصلنا ع لؤي هو هم جاي يدور عليهم ومن المحتمل ...
- نارا :- شنو اااحجي ؟؟؟
- مصطفى :- من المحتمل انخطفوا

- نارا :- اني من صدمتي ما سويت اي شي بقيت صافنه
بوحه مصطفى ماحسيت الا عنقاء بصفي وكعت مغمى عليها
ركضت احاول اصحي بيها بس اني ريقي ناشف وارجف بس بدون
ما اسوي اي شي ، خليت عنقاء يحضني اصحي بيها كعدت بس تصرخ وتبجي اني حيلي باد ومابيه حتى اكوم او ابجي مثلها
واطلع الحركه الي بداخلي

رفعت راسي اباوع بالوجوه كُلهم مقهورين انتبهت ع مصطفى
جهازه اتصل أخذه ع جهة وفتح الاتصال شويه وبينت الفرحه ع ملامح وجهة اني بقيت بمكاني اجه تقرب من يمنه يحجي ويانه
بفرحه

- مصطفى :- اهدئوا واطمئنوا
- هااا بشرناااا
- مصطفى :- اشش صوتكم يابه هذا لؤي اتصل عليه هسه
وكال يمكن لكوهم
- نارا :- خليت ايدي ع كلبي احاول اخفف دكات كلبي السريعه
كل هذا واحنه برى كاعدين مرت تقريبا ربع ساعه جان ينك الباب
مال البيت كُل ظني واحد من اقاربهم بقيت ع نفس حطتي ما تحركت بالي يم شُعاع

انفتح باب البيت رفعت راسي رجف كلبي من شفت شُعاع
دخل للبيت هو والشذام جانوا لابسين اسود وكُلهم تراب
مخربطين واكو آثار دم ع وجهم ومبين ع وجهم التعب عنقاء
ركضت الحضن الشذام وحضنته تبجي وحاضنته بكُل قوتها كدام
الكُل اني بقيت بمكاني تقرب الي شُعاع بخطوات هادئه ،
ماذا يحصل معي هل انا لعنه ام ماذا ؟؟؟

في يومآ ما !!!

لفت نظري كتاب موجود ع الميز لونه جوزي تقرب اله سحبته
وشلته بأيدي صرت اقلب بي استغربت شنو هذا كعدت ع السرير
وفتحته اول ورقه مكتوب بي

يشبه قلب الحجر ، لا يعلم متى يموت ، يذهب ولا يعلم الى أين
ثم يأتي ومع العديد من الروؤس والدماء الُتناثره ع ملامح الجسد .

ثم ماذا ؟؟؟
ثم أصبح رجل غريب الأطوار
ذات ملابس سوداء
حامل حُب كبير إلى العراق

هل أحببت فتاة وأصبحت بهذا التغيّر ام لان انا أدرك ما تفعله
التغيرات أصبحت ذات تفكير مُخيف إلى حد ما
هل انا أحببت من صميم قلبي ام شده الدماء ارغمت قلبي
ع أن ما افعله خطأ !!!

نعم انهُ انا هوَ الليله الحكاله السواد " حالك الاسوداد "

::- دائما ما يعود المُجرم إلى مسرح الجريمه .

- نارا :- فتحت عيني مصدومه شنو هذا الي داقرا
قلبت الورقه الثانيه وبدأت اقرا بيها

رَجُل ذات لون بُني يَحمل علم ذات لون أسود
خُطف وذُبح وسبا
وثم أننا نظرنا إلى دوله عميقه تتغذى بالكراهيه
وترتكب الجرائم
بعد احيائي نظرت نظره مُجلجله في حب العراق العظيم
قصه مليئه في الإرهاق والتعب ثم أصبحت بحُب العراق
و .....

- نارا :- و ؟؟؟ شنو " و " ؟؟؟ وين التكملة قلبت بالورقه
البعدها بيها خطوط سود !!! بقيت صافنه شنو يعني هذا
الكلام شُعاع شبي شنو هذا الشي وين التكملة !!!

فزيت ع الواقع من شفت شُعاع جاي بأتجاهي سحبني
كدامهم وحضني الصدره حاضني بقوه وكأن يريد يدخلني
جوه قفصه الصدري اسمع الكُل يبجي فرحانين برجعتهم بالسلامه
يبوسون بي وهو باقي حضاني ، الشذام اخذ زوجته وطلعوا
واني ابتعدت عن حضنه اباوع ع الدم سألته

- نارا :- هذا الدم المنو ؟؟؟؟ هو ماجاوب
- شُعاع :- تعالي نروح البيتنا
- ام شُعاع :- يمه ابقى هنا والله كلبي عليك نار شصار بحالنا
- شُعاع :- يمه والله مابيه حيل وكلش تعبان بس ارتاح امر عليكم
- نارا :- باسها براسها واشر الي حتى نطلع
- شُعاع :- يلا حبيبي امشي
- نارا :- تمام ، سلمت ع البنات وطلعت صعدت وهو حجه ويا إخوانه واجه صعد شغل السياره ومشه مايحجي بس صوت انفاسه
واضحه اني هم ما فتحت حلكي من الهبطه إلى أن وصلنا للبيت
ودخلنا هو راح قبلي صعد للغرفه وقفل الباب عليه اني بقيت صافنه ع تصرفاته شبي !!!! تركته ونزلت سويت اكل وجهزته
ورحت سبحت اشمر التعب عن جسمي ورجعت طلعت
لكيته واكف بالباب مال المطبخ عيونه ع رجليه ما اهتميت سألته

- جوعان ؟ رد عليه بهدوء
- اي
- جهزت الاكل وخليته هو كعد ياكل بهدوء بس مو نفسه شُعاع الي متعوده عليه ماعرف شنو الي بي احس بي كأن هو انسان ثاني
هو بس خلص الاكل راح صعد فوك اني بقيت صافنه ورى ليش هيج متغير ؟ غسلت المواعين وصعدت ورى شفته متمدد ع السرير اني كعدت كدام المرايا اسشور بشعري وعيني عليه هو صافن
سرحت شعري ورحت كعدت ع السرير يمه اضفر بشعري هو من
حس بيه اني قريبه منه حط راسه بحضني وحضني حيل حسيت بشهكه سحبه نفس قويه اني جمدت شبيييي !!!!
- شُعاع شبيييك ؟ رفع راسه
- محتاجج بس احضنيني
- اني سكتت حضنته بقوه بقيت ع نفس مكاني ما تحركت حسيت بي نام اني بقيت العب بشعره اريد اعرف شنو الي صار!!

بقى نايم إلحد ثاني يوم هو ع نفس نومته اني توقعت من يكعد
راح يرجع طبيعي بس صدمني أكثر بتصرفاته صرت اشك بي مُجرم
لو مسوي شي والصدمني أكثر من وصلت اله رساله للجهاز
هو بسرعه فز ملهوف اني بس اباوع عليه الضحكه وصلت الاذانه
سد الجهاز وسجد ع الارض وصار يحجي مره بالانكليزي ومره خليجي واني مثل الأطرش بالزفه اني هنا الشك صار بكلبي
لازم ادور ورى واشوف شنو الي غيره بهاي الطريقه ياترى هو شغل لو شي ثاني ؟؟

بيوم الفجر قرب الساعه ٤:٣٠ تقريباً جنت نايمه وفزيت ع رنه المُنبه كعدت مستغربه ردت اطفي واحجي بهمس منو حط ؟
كعد شُعاع رد عليه
- شُعاع :- اني الي خليت المنبه
- نارا :- عندك دوام ؟
- شُعاع :- لا بس عندي شغله
- نارا :- زين اسوي لك ريوك ؟
- شُعاع :- لا ما اريد اي شي
- نارا :- تمام ، هو دخل يسبح وطلع اني اباوع عليه غير
ملابسه ولبس من فوك للجوه اسود وكف يعدل بشعره حط عطر
لبس الحذاء مالته انتبهت عليه سحب الي ينلبس بالكتف وينحط بي السلاح لبسه قبل لا يلبس الستره وحط السلاح بي رجع لبس الستره مالته وفوكاها الكوت سحب الكفوف السود الجلد لبسهن
واخذ الكِمامه السوده لبسها وكاسكيته سوده كُل هذا واني صافنه
اباوع عليه شلون لبسهن ، العطر خنكني كثر ما حط منه وحيل ق ي
تقرب مني باسني براسي وخدي وطلع .

اني رجعت نمت ماكعدت الا العصر فزيت راحت عليه نومه
وحتى ما مسويه الاكل وشُعاع هسه يجي ركض ركض سويت الغده وخليته ع النار وكعدت اشرب مي من الركض وراها صعدت غيرت ملابسي وبقيت كاعده ع السرير افكر دام هو مو بالبيت ليش ما اشوف الغرفه مالته بيها كُتب هواي والحاسبه مالته هم عادي ادخل بس مرات اذا هو بيها ويشتغل ما يقبل ادخل الها ، فتحت الباب ودخلت بيها هواي هواي كُتب سحبت اول كتاب جان مكتوب
" فقه الـــــ** " وفوك مكتوب " الـــــ**الـــــ**" عقدت حاجبي شجاب هذول هنا ؟؟؟ فتحت الكتاب وبدأت اقرا كُل ما اقرا كلمه افتح حلكي بزايد
جان الكتاب بداخله اسأله وأجوبه كُل سؤال اله جواب بس الجواب مالته شي من الخيال ما موجود حتى بالتاريخ البشريه رجف كلبي
ومر عليه الشريط الي عشته خلال فتره داعـــ/ــش رجعت الكتاب بسرعه وكعدت ع القنفه حلكي يابس ليش هذا الكتاب عند شُعاع شنو يسوي بي

رجعت وكفت ادور بالكُتب لفت نظري كتاب مكتوب زمن الغيبه فتحته وكعدت اقرا بي لكيت مكتوب بي " زمن الغيبه "
سحبت الورقه وبدأت اقرا

من قريت المكتوب حسيت نفسي صرت بغير عالم مو نفسه
الي احنه عايشين بي ومتعلمين بي كُل شي جان مكتوب عن الغيبه
انُ هيَ بدأت من ٢٦٠ هــ بعد شهاده الإمام الحسن واستمرت إلى سنه ٣٢٩ المُدى ٦٩ سنه والكلام كثير والمعلومات الموجوده كثيررره
رجعت اقلب بالاوراق لكيت مكتوب ( ومن ثُم يأتون ناس بأعلام سود
يحملون الدين غطاء) صفنت مصدومه هذا الكتاب من سنين طويله وبي هذا الكلام اي يعني قبل لا يدخلون داعــــ/ـش وقبل وجودهم اصلاً ( يسلبون ويقتلون ويحكمون ناس لا يعرفون الحق من الباطل ولا ينهون عن المنكر ولا الفحشاء )

مستمره اقرا واندمج بالكتاب ماحسيت الا خيال صار فوك راسي
رفعت عيني من الكتاب لكيته واكف كدامي حاط اديه بجيوبه ويصوفر
من انتبهت عليه هو رفع حاجبه
- شُعاع :- شنو تسوين ؟
- نارا :- كمزت من الخوف سديت الكتاب ، ها شنو ؟
- شُعاع :- شنو تسوين هنا ؟
- نارا :- هيج شنو مايصير ؟ هو طك رقبته وعيونه عليه
- شُعاع :- لا عادي يصير بس اول مره تدخلين للغرفه
- نارا :- اي لان عايفني الوحدي وين اروح
- شُعاع :- هاا
- نارا :- ااي

هو سحب الكتاب من ايدي ورجعه بمكانه تقرب مني وشالني بخفه
طلعنا من الغرفه وبرجله سد الباب مال الغرفه الي جنت بيها
اني صافنه بوجهة
- نزلني شُعاع شبيك
هو مارد عليه مستمر يمشي جان بنفس ملابسه الي طلع بيهن
مارد عليه وصلنا للغرفه مالتنا حطني ع السرير و وكف ينزع بملابسه عيونه عليه ماعرف حسيت بشعور غريب هزيت راسي حجيت ويا
- شُعاع احس تصرفاتك صايره حيل غريبه ومو حلوه بيك شي ؟ تقرب حط أصبعه ع شفايفي همس
- اشششش
- تقرب مني وحتى بهاي اللحظه احسه غريب
تقرب باسني بقوه دفعته متألمه صحت بي، شبييييك شُعاع وخر ، هو سحبني بقوه
- شبيج ؟؟؟
- انتَ الي شبيك شوف اسلوبك
- مابيه شي يتخيل الج
- رجع سحبني مره ثانيه يشم بشري بشكل غريب ويتميم بكلمات
غزل الي صفني من حط شفايفه ع اذني همس
- اريد طفل
- سكتت بس احس شُعاع مو هو شُعاع الي اعرفه !

كعدت الصبح اول مافتحت عيوني لكيته كاعد قبلي وبشفايقه الجكاره يباوع عليه بتركيز والغرفه مليانه ريحه دخان مال الجكاير سحبت نفسي وكعدت

- اريد أسألك ، هو ما رد عليه بس سحب نفس قوي من الجكاره وزفره رجعت كملت ، انتَ شنو الي بيك ليش هيج متغير ؟ بعدين وين اختفيت طول هاي الثلاث ايام ورجعت حالتك حاله ؟؟؟
هم ما رد عليه شمر الجكاره بالطفايه وتقرب مني رجع باسني بقوه
دفعته صحت بي ، وخخخر شبيك ابتعد عني مزعوج
- شبيج متخبله عليه
- شبيه اني لو انتَ ؟؟
- انتِ شبيك
- شُعاع لاتخبلني
- مو كلت الج مابيه
- ابتعد عني سبح وراح نزل صاحني من جوه رحت وكفت ع الدرج
هاا ؟
- تعالي انزلي نسوي ريوك اني وياج
- تمام ، سبحت بسرعه ونزلت اجه تقرب مني

- اليوم باقي وياج ما اطلع
- هااا !!!!
- اي شبيج وياج باقي
- تقرب مني وحط رجله بين رجليه صار حيل قريب مني نظراته
حيل خجلتني وخلتني اتوتر نزل قرب وجهة صار بوجهي دنكت من الخجل هو رفع راسي بأصابعه
- احبج اني لاتفكرين بشي ثاني اعرف هسه عقلج مصور الج اني اخونج ومسويه افلام براسج وحركات ودراما بس اني جاي اكول الج
لا تفكرين بهاي الطريقه لان اني احبج وعيوني ماتروح الغيرج

- هو يحجي واني صافنه عليه اندك الباب باوعنا من الكاميرا
شفنا مصطفى
- روحي غيري لبسج حبيبي ونزلي
- تمام ، رحت سريع غيرت لبسي سرحت شعري خليت ع راسي
شال ونزلت لكيتهم بالمطبخ يسوون اثنينهم الريوك سلمت ع مصطفى شو هذا هز ايده

- مصطفى :- نسوان اخر وقت يكعدن متأخر والزلم تسوي ريوك
- نارا :- فتحت عيني وشُعاع صاح بي وهو يكفخه ع راسه
- شُعاع :- انجب لك ما تشوفها كاعده من زمان
- مصطفى :- ااااخ راسي هسه شنو مايصير اتشاقه ، شو روحي جيبي ٥ طماطيات
- نارا :- انطيتهم طماطه وتركتهم يسوون الريوك واني رحت اعزل بالصاله وهم صوتهم الوين واصل ماحسيت الا صوت الجدوره وهن يوكعن بس شفت الطفره ما مصطفى وصياح شُعاع يصيح ويغلط ع مصطفى وهذاك خربان من الضحك يصيح شعليه هنَ وكعن الوحدهن
اني رحت ركض للمطبخ

- نارا :- هاااااي شنوووو ؟ شُعاع رفع ايده بأستسلام
- شُعاع :- والله هذا مصيفي مو اني
- مصطفى :- شحجي عليك هذا عود انتَ اخويه
- شُعاع :- دطير غير هسه تلبسهن براسي اكول لحقيقه شعندي
- مصطفى :- أمري ال الله ، عمي اني الوكعتهن وهسه اعزلهن والله
- نارا :- يلا عزل ، كعد يعزل وهو خربان ضحك ، طفر شُعاع يركض شاف الطاوه احتركت شُعاع طفى الطاوه واجه ضرب مصطفى ع ظهره صاح بي
- شُعاع :- حيوان كله بسببك حركت الي الطاوه
- مصطفى :- شعليه اني تجيك التهايم وانتَ نايم
- شُعاع :- عقوبه لك كوم اثرم البصل سريع لك
- نارا :- كام مصطفى مغلوب عليه يثرم البصل وعيوني ادمع
وشُعاع ينعي اله وهذاك من البصل يبجي ويصيح
- مصطفى :- اااااخ ياااابويه
- نارا :- خلص البصل مصطفى وصار يصيح
- مصطفى :- يمه جنني العشك تدريني واني مجنون وعشكت حسيني
- شُعاع :- الله الله

- نارا :- واكفه اباوع عليهم واني خربانه ضحك إلى أن كملوا الريوك وكعدنا نتريك
خلصنا ريوك وكام شُعاع يسبح مره ثانيه لان ريحه الطبخ علكت بي
وكفت اعزل بالمواعيين ومصطفى وياي سألته، شعجب
لك خلك بالمواعين ؟
- مصطفى :- احب اساعد
- نارا :- تمام
- مصطفى :- شلون صرتي
- نارا :- زينه
- مصطفى :- بعدج تعبانه من الماضي ؟
- نارا :- يعني .
- مصطفى :- نارا اي شي يصير بحياتج حاولي لا تذكرين الماضي
- نارا :- شلون يعني ؟
- مصطفى :- يعني اذا تعاركتي ويا شُعاع راح تذكرين الماضي صح ؟
- نارا :- اي صح
- مصطفى :- وهذا الشي خطأ بهاي الحاله المشكله راح تزيد
ويصير الحمل حملين حاولي تحلين المشكله بدون ما تدخلين
الماضي حتى ما يعكس عليك بشي سيء

- زين الاوهام ممكن تودي الانسان الغير طريق مثل شنو ؟
- مثل يترك حتى الله
- انتَ هم جنت قاطع الصلاه ؟
- اي ورجعت الها
- شلون ؟ هو ضحك
- شنو قاطعتها انتِ
- لا
- لعد ليش تسألين
- هيج مجرد فضول ، سكت ثواني بعدها رد
- قطعت صلاتي ورجعت الها لان شفت ماكو احد يبقى وياي
حتى اهلي مايبقى احد وياي بهل حاله منو الي يسعدني منو الي
يسندني ومنو الي اتوكل عليه ويبقى وياي طول حياتي وحتى بعد
ما اتوفى ؟ فقط الله هو الي يبقى وياي من دون كُل هاي الناس
ف ليش اقاطعه واقطع كل صلتي بيه والصلاه الي هي
اساس التواصل ويا ربي ؟
سواء اذا مخنوك ومتضايق المنو افضفض غير الربي ألجأ اله
وحشى يرد عبد اله
- يعني طمع؟
- شلون
- يعني انتَ تطمع بحُب رب العالمين
- لا لذه الوصول اله مو طمع تسمى رحله عشق وتكدرين تكولين
ممكن طمع بحبه لان احب حب ربي العبده
- ابتسمت ، رحله عشق ؟
- اي شبيج اجاوبج ليش مايكون طمع لان اني مارحت اله بس مجرد اشكره لان انطاني حاجه لا اني ألجأ اله بكل وقت سواء
بحاجه اله او ماعندي شغله مايكون طمع لان هو ربي
- حلوو زين شنو الشي الي يلتمس قلبك
- زياره عاشوراء .

::- أعلم عزيزي القارئ
" ‏عندما نُصــــــــلح علاقتنا مع اللّٰه
سيُــــــــــــصلح اللّٰه لنا كل شيء "

احنه ودنحجي نزل شُعاع سألنا شنو تسوون جاوبنا هيج حوارات هو افتهم شنو الي اقصده شنو عاد راحوا للصاله واني طلعت الدجاج حتى يموع واسوي غده جهزت المواد ورحت يمهم لكيتهم يحجون
بامور دينيه اني عندي خلفيه عن هاي الأمور من بابا علمني عليهن
الهذا شُعاع سأل سؤال

- شُعاع :- كم من غلط حتى توصل إلى شديد العقاب وغضب الله ؟
- نارا :- الي فهمته من السؤال المعصيه شنو الي تأدي للعقاب الشديد ، هزيت راسي كتله سهله
- شُعاع :- اي شنو هوَ ؟
- نارا :- الذي اغتاب المؤمن وكأن اكل لحم أخيه وهو حي
الشُرك في الله والتكشيك في وجوده
- مصطفى :- القتل ، السحر
- نارا :- اكل مال اليتيم ، الربا ، رمي المحصنات
- شُعاع :- لكن الله يسامح
- نارا :- اكيد الله غفور الرحيم
- شُعاع :- شلون نعرف الله رضى عنا
- نارا :- اختبارات من بعد التوبه
- شُعاع :- شلون ؟
- نارا :- يعني توبه النصوحه من بعد التوبه راح تدخل بأختبارات
- مصطفى :- تعرفين شنو هنَ ؟
- نارا :- يعني مثل وسواس الشيطان ، الشكوك ، المرض ، تدمير النفوس ، يضيق صدرك واذا تلجأ الربك او لا ، الغيبه والنميمة تكون كدامك وهل تنجرف ام لا ، قريب تحبه ويشوفك تصبر ام لا
الذين إذا اصابتهم مصيبه قالوا ان الله وانا اليه راجعون

ضحك شُعاع سند ظهره ع القنفه يباوع عليه بفخر

- شُعاع :- والدج جان يعلمج
- نارا :- اي
- شُعاع :- زين من المحتمل الله ما يغفر
- نارا :- لا غلط يغفر الأكبر الذنوب لكن من بعد التوبه وعدم تكرار هذا الذنب
- شُعاع :- اذا غلطت ورجعت ؟
- نارا :- ارجع توب مره ثانيه وثالثه وحاول أكثر وأكثر وصحح
هذا الخطأ لان الله سبحانه وتعالى شكد ما اذنبت ورجعت اله
راح يغفر لك ويسامحك

اعلم عزيزي القارئ
‏::- من علامـــــات حُب الله لك إصرارك
على التـــــوبة بعـــــد كل ذنـــــب "

اثنينهم جانوا يباوعون الي والابتسامه ماليه وجهم
اندك الباب رفعنا راسنه للكاميرا شفنا الشذام شُعاع كال الي كومي
وهو راح فتح الباب اني تركتهم ورحت للمطبخ شوي ودخل الي
سألني

- شنو راح تسوين غده
- دجاج شوي وتمن برياني
- فدوه لهل أدين ، تقرب باسهن، تريدين اجيب شي من برى
- لا حبيبي ، هو طلع اسمعه يسولف ويا مصطفى شوي ومصطفى طلع رحت ركضت الشعاع ، وين راح مو وقت غده
- حبيبي راح يجيب أدوات مال الرسم
- ليش مو عنده
- عنده بس هو طالبين منه لوحه بمتحف الامام الحُسين ( عليه السلام )
- هتفت فرحانه ، صدُك !!!!
- اي والله وراح يرسمها يمنه
- يسسسسسس ، والله اني اساعده ، تقرب مني وكرصني قوي
مبين غيران
- كرصي نفسج لج
- هههههه ااااي وخر ، هو ابتعد يهز براسه وطلع اني رحت اسوي عصاير ورى تقريبا ساعتين اجه مصطفى وجايب
ويا هواي أدوات مال الرسم جهزت الغده واني عيني عليهن اريد بس افتحهن لان شكلهن حيل حلووو

كملنا غده وراح الشذام ومصطفى صار يفتح بالاغراض واني
واكفه فوك راسه اضحك هو باوع عليه وضحك
- مصطفى :- معدي افتحي وياي
- نارا :- شُعاع جان يقلب بجهازه وعينه عليه ويضحك ع فرحتي
اني صرت افتح ويا واضحك اباوع الأدوات شلون حلوه تشهي
الوحد بالرسم مساحات الكترونيه اصباغ اكريلك وفرج ولوحات
مال الرسم كلش جبيره صحت
- نارا :- يااااااي
- مصطفى :- دخيلك ربي هاا
- نارا :- ابقى ارسم يمنه
- مصطفى :- هو باقي هنا إرسم
- نارا :- بقيت ارتب بالاغراض ، شوكت تكمل الرسمه ؟
- مصطفى :- مامحدد وقت
- نارا :- شوكت تبدي بيها
- مصطفى :- اليوم
- نارا :- شُعاع صاح من يمه
- شُعاع :- لا ربحنا اليوم نارا ما تنام بالغرفه راح تنام يم الأغراض
- نارا :- ضحكت خليت ايدي ع خدي ، مصطفى معليك والله ما ازعجك
- مصطفى :- ههههههه خوش

كمت سريع سويت جاي وجبت ويا بقلاوة خليت الصنيه
كدام شُعاع وهو يباوع عليه و ع الحماس مالتي ويضحك همست اله اشششش واباوع ع مصطفى شلون طلع شي من جيبه ورفع بي شعره كعد ع الكرسي وكدامه اللوحه وشُعاع قرب منه الشمس عليهم اثنينهم اباوع اثنينهم حلوين ويتشابهون صدك اخوان مبينين

- مصطفى :- كعدي شكو واكفه فوك راسي
- نارا :- كعدت وشُعاع صار يقلب بالألوان وفتح بيهن ومصطفى عاط بي
- مصطفى :- لا تخربهن خويه
- شُعاع :- انجب لك
- نارا :- بلش مصطفى يرسم اول ما خط عطت ، ياااااااي حلووو
- شُعاع :- يا الله هسه بدأ
- نارا :- صاروا يضحكون واني اضحك وياهم بطلت احجي اخاف اخرب عليه وكل شويه اجيب الهم شي يشربوا إلى أن صار الليل
هو يرسم وشُعاع يقاطعه يسأله وكف
- مصطفى :- يلا اني رايح عوفوا اللوحه هنا تنشف ولا تتقربون عليها ترى تخرب الي يتقرب الها اكسر ايده
- نارا :- ملابسه كلها صبغ تقرب اله شُعاع
- شُعاع ؛- تكسر اي منو لك
- مصطفى :- خويه الباجر اكول لك اكسر ايد منو

- نارا :- ضحك بصوت عالي وراح واني بقيت اباوع ع اللوحه
حيل حلوه والرسم مالته حلو
ماحسيت الا صوت شُعاع فززني صاح بصوت عالي
- شُعاع :- بووووووو
- نارا :- ييمه شبيك خوفتني
- شُعاع :- ههههههه عوفيها لا يصير بيها شي ويجي المخبل
يهلهل علينا
- نارا :- يعني مثلك يهلهل ، جفصت وحطيت ايدي ع حلكي هو تقرب مني
- شُعاع :- منو اليهلهل ولج
- نارا :- مصطفى
- شُعاع :- ماسمعت ؟
- نارا :- اني ومصطفى انتَ شعليك احنه الي نهلهل لان مخبلين
- شُعاع :- اي عبالي صار بأذني خلل وسمعت غلط
- نارا :- اي غير كبرت وصرت اكسباير
- شُعاع :- ياهو الاكسباير لج تريدين اشوفج اذا اني اكسباير لو لا
- نارا :- ههههههه اتشاقه شبيك حبيبي انتَ كاشان ماتخرب ولا اكسباير
- شُعاع :- عفيه بيج حبيبي هيج اريدج

يوم الاثنين الساعه 9:00 بشتاء العراق

كعدت ع صوت العصافير اباوع شُعاع نايم هزيته واني احجي ويا
- كوم حبيبي هسه يجي مصطفى ، كعد متذمر
- اهوووو شبيج متخربطه من هسه
- سحبني عليه وكعت ع صدره ، شششُعاااع راح نتأخر
- هههههه شبيج بابا
- كوم سريع خلي نكمل امورنا، هو ضحك بصوت عالي حضني
- احبج من تتخبلين عليه ولج
- اموت عليك حبيبي يلا كوم

اندك الباب واجه مصطفى دخل سويت ريوك وكعدنا نتريك
مصطفى جهز نفسه واني وشُعاع لبسنا وحيل فرحانين
طايرين بي طير جهز اللوحه وغلقها وطلعنا اني اخذت وياي
حبشكلات للطريق وطلعنا بس حيل فرحانين شغل زياره عاشوراء بالطريق واني عيني ع الجامه صحت ، ياااااي ، مصطفى دار وجهة يضحك وشُعاع وكف السياره ونزل منها عرفني ع شنو صحت
شويه واجه صعد جايب ويا ٣ شعر بنات بقيت اضحك لان فهمني
كعدنا ناكل ونسولف إلى أن وصلنا الكربلاء
كالوا نزور بعدين نطلع للمتحف وصدُك زرنا وطلعنا مصطفى شال اللوحه وشُعاع يمه اثنينهم جانوا لابسين اسود بس شُعاع أطول من
مصطفى
شُعاع لابس دشداشه سوده وغتره ومخلي الخضره الي اخذها مني ع كتافه ومصطفى كالعاده لابس كلاسيكي ودخلنا للمتحف
همَ حيل انعجبوا باللوحه وخلوها بالمتحف يمهم وطلعنا من المتحف حيل فرحانين رجعنا زينا مره ثانيه ورجعنا البغداد

الساعه 6 هل مره دك المنبه وكعدت من وقت لان عندي محاضرات
كعدت شُعاع بالكوه كل ما اكعده يرجع ينام واني هم مابيه
حيل وأريد بس انام من التعب بالكوه غسلنا ولبسنا وطلعنا حتى ما
اكلنا شي
- عفيه شُعاع اني حيل نعسانه
- حبيبي بس كملي المحاضرات وطلعي حتى ترجعين تنامين
- ماشي ، باسني و دخلت للكليه

اول ما دخلت للكُليه حسيت اكو واحد يباوع عليه
غالطت نفسي وكلت لا اكيد ما يباوع عليه بس كل ما انتبه عليه الكه مركز عليه وصافن عقدت حاجبي
شبي هذا والمشكله من يباوع عليه واني اشوفه ماتنكسر عينه ولا يخجل او يلتفت لا يبقى يباوع
بدون مستحى سحبت ساره من ايدها ومشيت بغير
مكان كعدت بس شنو صرت نار هن تصرفه شبي هذا
مايعرف بيه متزوجه مايشوف الحلقه بأيدي
رفعت ايدي انصدمت الحلقه ناسيتها ضربت رجلي
خرب شكو انساها

- ساره :- شبيج
- نارا :- لج ناسيه الحلقه
- ساره :- اي شكو بيها
- نارا :- ميخالف ماشفتي هذا شلون يباوع
- ساره :- اتركي معليج بي هسه يوخر
- نارا :- اي ان شاء الله ماريد تصير الي مشكله بسببه
- ساره :- غير رجلج يعلكه
- نارا :- الله يبعدنا عن المشاكل
- ساره :- لاتحجين اله لا يسوي مشكله
- نارا :- اني ما اضم ع زوجي شي بس اذا شفته هذا سوه شي لازم اكول اله
- ساره :- اي احسن شي تسوي
- نارا :- اي

كل ما اطلع من المحاضره هو يصير بوجهي والأكثر
شي صدمني هو من باوع عليه وغمز عيني عينك
بدون مستحى ما انطيته وجه إلى أن خلصت الدوام

مر اليوم واني صافنه ماعرف شلون راح تخلص هاي السنه وهذا ماعرف شلون ويا ومتخوفه بس لا يسوي شي ويخرب ع حياتي وماعرف شلون تخلص السنه بسرعه
مثل ما خلصت السنه السابقه بتعب والدراسه صعبه
هلكت من المحاضرات ورجعت لكيت شُعاع جايب غده جاهز
يعرف بيه تعبانه وأريد انام فدوه الكلبه
كملنا غده وغسلت المواعين ورحت للسرير كعدت وبيدي ورقه
وقلم
ليش ضايعه وليش تعبانه كتبت كل شي ، لازم اغير من حياتي كافي لازم نعيش ونطوي الماضي لازم نستمر هاي الدنيا وهاي الحياه
كمت بهمه عزلت البيت اريد ادخل الطاقه الايجابيه للبيت
شلت الفرش غسلت البيت غير ديكور البيت بمساعدة شُعاع غير غرفه النوم ورشيت ملح خشن بحواف البيت ومسحته عطرته ،
دخلت للحمام وسويت مقشرات الجسمي ارتاحيت وغيرت من نفسيتي هاهي لازم أسند شُعاع مثل ماهو ساندني

سويت عصير واجيت يمه شفته كاعد خليت العصير كدامه
وارتميت بحضنه حضنته قوي وبسته
- ها ياروحي
- مرتاح شعاعي
- ما طول اشوفج مرتاحه اني من يمي مرتاح
- حبيبي فدوات لك حضني
- ناري
- روحها
- تدرين هيج مِن الله حُبج سّڪن بية .
- حبيبي احبك هواااي ، رجعت حضنته قوي ، شنو شصاير برى ؟
- مظاهرات
- يااااا !!
- اي والدنيا مكلوبه برى
- اني حضنته خايفه من الوضع هو شمني قوي وباسني
- كون العراق امان مثل حضنج الي
- اني خليت راسي ع صدره صرت العب بأزرار ملابسه
انتبهت عليه سكت رفعت راسه لكيته غافي عدلت نومته وكمت

شغلت زياره عاشوراء وسشورت شعري كلت اسوي معكرونا
بالجبن اسرع شي وأسهل ويحبها ، قبل لا اسوي رحت اخذت السجاده فرشتها وخليت عطر حيل طيب خليت القرآن بصفي وصرت اصلي ، ركعتين الصاحب الزمان خلصت وكعدت اقرا قرآن
وصلت الايه قرانيه
【 وَلَقَدْ خَلَقْنَا الإنسان وَنَعْلَمُ مَا تُوَسْوِسُ بِهِ نَفْسُهُ وَنَحْنُ أَقْرَبُ إليه مِنْ حَبْلِ الْوَرِيدِ 】
رفعت راسي بحُب الرب العالمين اردد
يارب انتشلتني من ضياع الدنيا الضياع حُبك شُكرا لك ياربي
سجدت سجده شكر ع السجاده اردد
غداً سيزهُر صبرك ويسكبه الله لك مُطر .

ع سجاده الصلاه غفيت ماحسيت الا بصوت فزيت
خليت ايدي ع كلبي خايفه صار شُعاع كدامي
- شبيج حبيبي
- هاا
- شبيج
- لا مابيه بس فزيت ، تقرب مني باسني من راسي سمعت صوت الاذان رفعت راسي الشُعاع ، جيب السجاده مالتك خلي نصلي سوه
- تدلل ياحلو
- فرش السجاده مالته وكعدنا نصلي احس مجرد ما شفت نفسنا نصلي سوه غلبتني الفرحه العارمه كملنا الصلاه لمينا السجادات سوه وكعدناا اجه بالي اسم الطفل

- شعاعي
- ها حبيبي
- يعني ليش اسم بولانت بالضبط ؟
- احب هذا الاسم
- اي ليش تحبه
- مره من جنت بالموصل اكو طفل جنت حيل احبه واسمه بولانت
واستشهد وقتها كلش انقهرت عليه وبقى الاسم براسي والطفل
وجان هذا الطفل حيل حنون امه جانت مسجونه وهو ماكدر يشوف امه بدون اكل وكتلوا
- اني شهكت ويا كلامه
- وهذا الطفل رغم صغره بس كلش سبع ماخاف منهم
- اني بقيت صافنه ع كلامه، شُعاع اريد ابني مثله
- ان شاء الله اعرف بخاطرج اسم علي بس ماريد تتأذين
- عادي حبيبي ، زين اذا اجتنا بنت شنو اسمها ابتسم بوجهي
- اسميها ليال
- ليش ؟
- بسبب اليله الي لكيتج وشفتج بيها وحبيتج بيها الهذا اسم بنتنا ع اسمه هذيج اليله " ليال "
- الله حلوووو حبيت هاهي ليال وبولانت
- ان شاء الله حبيبي

- خلي نروح للسوك
- حبيبي اخاف عليج مظاهرات وانفجارات
- شعاعي احنه اثنينا سوه مو الوحدي محتاجه كم شغله
- يلا البسي زين ليش مانروح احنه وبيت الشذام للمول ؟
- ليش
- احسن وهم نشتري كم شغله اني ويا وانتِ ويا زوجته
- تمام اذا هيج
اتصل عليه واتفقنا نطلع سوه اسمعه يكول اله
مختنك من البيت ونمر ع الشركه بطريقنا ، ساعه جهزنا نفسنا وطلعنا سوه ماخلينا شي محتاجي الا ما اشترينا اهم شي البنك
ويانه موجود هو الي يدفع خلصنا طلعنا من المول كالوا نمر للشركه ما اعترضنا

اباوع ع شُعاع حط ايده ع كلبه صاح
- شُعاع :- مخنوك
- نارا :- سريع الشذام وكف السياره
- الشذام :- شكووو
- نارا :- اباوع ع العنقاء وجها صار اصفر اني صحت ، شبيييج
- عنقاء :- ها لا مابيه اريد أطفالي اشوفهم
- نارا :- صلي ع محمد يمعوده شبيج
- الشذام :- خلي نرجع سريع للبيت
- نارا :- صار ازدحام حاول شُعاع يطلع منه بس صار كُلش ازدحام
عنقاء صارت تبجي ماعرف شنو اجاها وتصيح اريد أطفالي
وجها اصفر اباوع ع شُعاع هو الثاني مخنوك و وجهة صار اصفر
اني مصدومه كُلش والشذام تخبل ماعرف هيج شبيهم فجأة
اني بقيت الوب ماعرف شبيهم ياربي دخيلك

شويه وشفنا الشرطه كدامنا مايخلونا نعبر طووقوا المنطقه
حجوا ويانه كالوا حزام ناسف ما تعبرون اني كلبي حسيته راح يوكف
الشذام كال نعبر من هذا الفرع ونطلع منه وشُعاع ايده
مشى الشذام اباوع ع شُعاع نزع الفانيله مالته صحت بي
- نارا :- شبييييك شُعاع
- شُعاع :- مابيه مابيه بس اختنكت
- نارا :- لا هو ولا عنقاء صاحين بيهم شي ياربي الطف بينا

احس الجو صار يخنك فد مره الخوف والتوتر ع لحظه كلبنا
يوكف احس شي من الخيال ضاق النفس والصبر نفذ
خليت ايدي ع كلبي صحت ع الشذام رد عليه يصيح نارا اسكتي لا تربطيني ، ورجع يسوق بسرعه صار يسوق بسرعه حيل
كبيره هي ثواني مجرد ثواني وصارت كدامنه عباره عن لهب قوي
وماعرف شلون هذا الهب شالنه شيله قويه ورمانا
وجانت هاي اخر اصوات من النبض ...

ليّل طويّل وحِزن يشِرب حِزن
يتبع ✨️

اعتذر عن التأخير لكن انطيت الكم خبر بالقناة التلي انُ نارا سوت عمليه ثانيه بسبب ضرر العمليه الأولى التمس منكم العذر أعزائي 🤍

وانتظروني ع حساب الانستا بفيديو جديد انتوا منتظري الى احد الابطال يوزر الحساب akyta_98