رواية الريم بين احضان الاسد الفصل السابع عشر 17 - بقلم شيـخـة ✍️🖤

منو مثلي
نجم مفطور
ويلالي نفس
كسرات البشعري
كسراتك يدلالي
.
.
.
.
البنات ...

بقوا البنات يركصون وشموسة تصور بجهاز نيران
نوب تعبن وكعدن
ترف: يممه راح اموتت
اصيل :حكج تعبين صارلج ساعتين تهزين
ملاك: ههههه لج شوفي وجهج صار طماطه
نجمه:خايبه خلي يشوفج همام اويلي يبا اله ماتخلصين من ايدة
ريم: ايي وربي ههههه
ترف (بخجل) :كافي اسكتن
البنات: ههههههههههه
نيران: اني اكوم اسبح
ضي الگمر: اني انزل بحمام الجوة اسبح
نازك: جا واني وين اسبح
نيران: روحي بحمام غرفه جود
نازك: هلو هلو والله ماعليه
نيران: شبيج ولج ولا واحد بالبيت كلهم بالديوان مايرجعون هسه
نازك: خاف يجون ولج والله عيب
ضي الگمر: خايبه كومي اسبحي ونجبي كنالج مايجون هسه
ريم: جا اني اريد اسبح اسبح وراج نارو
ملاك: والله ماعليه اني اسبح وراها انتي شوفيلج غير حمام
ديمه :واني اسبح ورا ضيوش بحمام الجوة
ريم وشمس واصيل وترف ونجمه  :جا واحنه وين نسبح
نيران: يبوووه ريم اسبحي بحمام ااسد
ريم: لالا عيني بطلت ماسبح اضل بوصخاتي ولا ادخل غرفته
نيران: ليش يمه يعضج مثلا وبعدين هو مو هنا اصلا راح السليمانية اليوم الصبح
ريم: هااا خوووش
نيران: ترف انتي اسبحي وراها
ترف: تمام
نيران: شمس اسبحي بحمام غرفه ذو الفقار
شمس: خاف يدخل ولج والله عيب
نيران: يبو شلون سالفه هاي عمي ماموجودين بالديوان يتأخرون يلا يجون فهمتن لو اعيد
شمس: ماشي
نيران: نجمه انتي اسبحي وراها
نجمه: هاي هيه
اصيل : جا واني
نيران: انتي اسبحي بالحمام الخارجي (هو مو خارج البيت بس قريب لديوان)
اصيل: خاف يطلعون الولد
نيران: اي يطلعون ويشوفونج بالحمام ويكتلونج ويذبونج للجلاب ونقرة عليج الفاتحه واني رايحه اسبح بايو
راحت نيران تسبح توجهت ريم لغرفه اسد و وشمس لغرفه ذو الفقار و ونازك بحمام جود والبنات الباقيات ضلن بالغرفه يجهزن ملابس من يسبحن يلبسنهن ......

السليمانية....
الساعه ب11:00 مساءً
حور: حسيت اكوم الم براسي فتحت عيوني احس بيهن مغوشات بقيت افتحهن واسدهن لحد ما توضحت الرؤية كدامي رفعت راسي اباوع هذول ثنين زلم واحد نايم علئ الجربايه وواحد نايم بالكاع كبل تذكرت ابو فتنه من كالي ابيعج كلت هاي هيه باعني لميت رجليه لصدري وضليت ابجس واشهك اريد اسكت بعد مااكدر فز هذا الرجال الي نايم بالكاع واجه عليه واني زدت بالبجي كالي ....
ايان: نايم وفزيت علئ صوت بجي رفعت راسي شفت حور تبجي ووجها صاير احمر من البجي رحتلها كتلها
ايان: شبيج تبجين
حور:  هئ حح ببابب لا لا تت تتقربل ي الله هئ يخليك
ايان: اهدي والله ماتقربلج شوي هاي بعدت عنج
حور: ضلت تبجي
ايان: لاتبجين كافي وفهميني شبيج علشنو البجي
حور: ادري ابو فتنه باعني الكم بس الله يخليك لاتوسلي شي والله اضل اخدمكم(وهي تبجي)
ايان: ههههه والله ضحكتيني
حور: ليش شحجيت اني وضحكت
ايان: لا يبوية ابو فتنه ماباعج النه اصلا احنه اخذناج من ابو فتنه غصبن عليه لان هو مدري شجان يسويلج وانتي طلعتي من غرفه واجيتي تركضين علينه وتصيحين ساعدوني
حور: من سمعته كال هيج زدت بالبجي لان ذكرت هذا للحقير شراد يسوي بيه الله لايوفقه
ايان: وهسه عليمن تبجين
حور: بقت تبجي
ايان: كافي بجي وكومي غسلي هسه اجيبلج اكل تاكلي و ملابس
حور: هزيت راسي بمعنئ اي
هو عافني وطلع واني كمت دخلت للحمام غسلت وجهي وشفت شلون اكو اثار ضرب علئ وجهي و قمصي متشكك ومفتوح سديت الدكم مال القميص واني ابجي ولميت شعري ورجعت لمكاني باوعت لهذا الرجال الثاني نايم ابد ماتحرك والله كلت يمكن ميتت

ايان: طلعت من الغرفه ورحت للموضف وصيته علئ اكل ل 3 نفرات كالي ربع ساعه ويدزونه للغرفه كتله تمام نوب طلعت اكو مول قريب مال ملابس اشتريتلها ثوب طويل وحجاب و ملابس داخليه كلت خاف تحتاجهن ولكيت قراصه هم جبتلها ونوب رحت لصيدليه جبت معقم مال جروح وكطن وبلاستر ولزكه مال جروح كلت اضمدلها هاي الجروح الي بوجها ورجعت للفندق ورحت للغرفه لكيتها كاعدة علئ الجربايه و صافنه ومغطيه نفسها بالشرشف واسد نايم بسابع نومه ولايحس خرب يومه هههههه

ايان: حور هاج هذني الغراض الج
حور: دخل هذا الرجال وصاح ب سمي وانطاني علاكه كال هذني الج
حور: شنو هذني
ايان: هذني ملابس وشغلات الج تحتاجيهن روحي للحنام اسبحي وبدلي هذني الملابس لان مشككات وتعالي اعقملج جروحج
حور: شكرا ورحت للحمام دخلت نزعت قميصي والبنطرون و ملابسي الداخليه وسبحت احس المي ينزل علئ جروحي يأذيني حيل الله لاينطك ابو فتنه ولايوفقك ...كملت ونشفت وطلعت الملابس من العلاكه جايبلي ثوب طويل وشال و ملابس داخليه يبوو شكد استحيت من لبستهن اجن فيت علئ قياسي حييل استغربت شلون هيج جاب قياسي فيت المهم مشطت شعري وضفرته و لبست الشال وكعدت غسلت ملابسي و اكو غساله بالحمام خليتهن بيها و علمود تجففهن
وطلعت لكيت هذا الرجال الي جابلي ملابس كاعد علئ الطبله مال الاكل وكدامه اكل والثاني كاعد علئ الجربايه ولازم بيدة جهازة اني سويت
حور: احم
ثنيهنم رفعوا روسهم
ايان: تعاي حور اكلي يلا
حور: اي اجيت
وتقدمت لطبله مال الاكل كعدت علئ الكرسي بديت اكل لكيت الرجال الي كاعد وياي صافن بوجهي انوب اني انثولت بعد ماعرف اكل لحد ما غصيت بالاكل وكمت اكح ....
ايان: طلعت حور من الحمام الثوب يجنن طالع عليها وهي بيضه طالعه ملاك والحجاب كلش طالع حلو عليها كتلها تعاي اكلي كعدت تاكل واني صافن بوجها هي انتبهتلي بعد ماتعرف تاكل غصت بالاكل انطيتها كلاص مي وكمت كعدت علئ الجربايه خطيه خلي تاكل اباوع ل اسد يضحك ويغمزلي بدت رحمه الله شلون يفكني هذا هسه يجلب بالسالفه. المهم خلصت حور اكلها لمت الاكل و عافته علئ الطبله وراحت للحمام مدري شتسوي المهم طلعت ملابسها الي جانت لابستهن شرتهن علئ باب الحمام و اجت كعدت علئ الكرسي ف اسد كاللها ...
الشيخ اسد: طبعا اني منتبه علئ ايان من جبنه البنيه لحد هسه هو بس صافن بيها واذري بي عجبته بس مايحجي المهم وهي تاكل صفن عليها الاثول لحد ماشافته ركامت ماتعرف تاكل لحد ماغصت انطاها مي وكام كعد علئ الجربايه اني باوعلته وضحكت وغمزتله اني اعلمك ايوني هههههه المهم هي كملت الاكل وراحت للحمام شرت ملابسها واجت كعدت علئ الكرسي اني سألتها....
الشيخ اسد : اي حور سولفيلي سالفتج
حور: يا سالفه عمو
ايان: متتت من الضحك من كالتله عمووو
الشيخ اسد: تكلي عمووو ههههه يلا مقبولة منج حورية سولفيلي انتي شلون دخلتي بالميتم من اول يوم الج لحد هذا اليوم
حور: وليش اسولفلك انتوا منو لاتفهم قصدي غلط بس اني ماعرفكم
الشيخ اسد: حكج بوية شوفي اني شيخ اسد ابن الشيخ رضا الي صديقتج سجئ قبل فترة اجت مهزومه ودخلت عدنه اشو اني بس ذكرت سجئ هاي طفرت من مكان
حور: عمووو فدوة وينها سجئ اخذني الها الله يخليك والله ماعندي غيرها اخذني الها الله يوفقك
الشيخ اسد: ميخالف اخذج بس اكعدي وسولفيلي حتئ اكدر اساعدج
حور: ماشي اسولفلك كلشي بس اخذني ل سجئ حباب عمو حباب
الشيخ اسد: ماشي يلا احجي
حور: اني حور سالار جان. عمري 17سنه ما درست ابد عمري اسبوع و دخلوني للميتم حسب كلام المديرة كالت جابج رجال يكول لكيتها علئ الطريق خلصت عمري اني بالميتم تعرفت علئ سجئ وصارت صديقتي وبعدني اجت ريم الي هسه مادري وينها وبجت وبقينه سوية لحد مايوم سجئ انهزمت ورا فترة خابرتنه كالت هيج وهيج صار وياي (ماكو داعي اعيد الي صار وي سجئ لان ذكرته بالبارتات الي قبله) وطبعا جنت اني وريم دائما سوية مانتفارك ابد ابد هي علمتني اكتب واقرة جانت ترجع من الدوام وتكعد تعلمني الي تعلمته بالمدرسة يعني كلشي اعرف لحد مابطلت من المدرسة وهم ورا فترة انهزمت ريم حسب ماكالتلي المديرة وبعد ماادري با اخبارها او وين هي هسه الله يعلم او يمكن المديرة وابو فتنه اخذوها مثل مااخذو البنات قبلها وبعد ماندري بيهن وين صارن ...
الشيخ اسد: زين مو اليوم اكو سفرة بالميتم؟
حور: اي صح اكو سفرة اليوم
ايان: جا ليش مارحتي وياهم
حور: اني علساس اروح وبدلت ملابسي وحضرت نفسي حالي حال البنات ورحت اجيب حذائي من غرفه الاحذية ونقفل عليه الباب ضليت ادك محد سمعني لحد ما مرت ساعه اجه الحارس ابو فتنه كتله عمو عفيه انقفل عليه الباب اشو هذا ضل يضحك وبدة يتقربلي وبجتتت
ايان: عيونه صارن دم من العصبيه
الشيخ اسد: انتبهت ل ايان شلون صار عصبي وضاج حيل
زين وبعدين شصار
حور(وهي تبجي) : بدة يتقرب عليه ويجر بملابس ويضربني ويكلي محد يخلصج مني اليوم وضل يجر بيه لحد ما نشك قميصي من جتفي وضل يضربني حتئ اسكت لان كمت اعيط  بلكي احد يساعدني. ويكلي لاتخافين بس اكمل منج مااكتلج مثل البنات الي ماتن لا انتي حلوة وتجيبين فلوس هواي راح ابيعج. اني من سمعت هيج كمت اعيط بالزايد بعدين جر قميصي من كدام كطع الدكم مال القميص دفعته كل قوتي وفتحت الباب وطلعت اركض وشفتكم كدامي ورحت اركض عليكم وبعد انتو تعرفون الي صار ...
الشيخ اسد: تمام حور شوفي اني جبت مستمسكاتج ومستمسكات ريم علمود ماتبين احنه خاطفيجن
حور: ليش انت تندل مكان ريم موو
ايان: اي ريم بيت الشيخ اسد
حور(بفرحه) :عليك الله صدك تحجي
الشيخ اسد: اي والله
ايان: المهم هسه انتي راح اخذج وياي لبغداد
حور: لالا ماروح وياك اخذوني ل ريم وسجئ حبابين
الشيخ اسد: مااكدر اخذج الهن
حور: ليش
ايان: لان ريم وسجئ بالسن القانوني ومو قاصرات ف اذا رادو يرجعوهن للميتم ميكدرون لان هن بالغات السن القانوني الي يستحق بي ان يطلع من الميتم اما انتي فلا انتي بعدج قاصر مادخلتي السن القانوني ف الميتم راح يرفع دعوة علئ ان الشيخ اسد خاطف قاصر ومعتدي علئ ممتلكات الدولة ومعتدي علئ الحدود الشخصيه
الشيخ اسد : ها حور فهمتي
حور: اي فهمت
ايان: زين حور هم اكو كامرات بالميتم
حور :اي اكو بس كلهن مامشتغلات لان علمود ابو فتنه ياخذ البنات براحته واذا اجت لجنه الرقابه يشغلون الكمرات طبيعيه واذا سئلوا علئ البنات الي ماموجودات المديرة تشوفهم تقارير جذب ب ان البناتاكو ناس جاي يتبنوهم
الشيخ اسد: والله ولاعبين لعبتهم عدل
ايان: اي طبعا مايتركون عليهم دليل
حور: زين الله يخليك عمو حلي اشوف ريم وسجئ
الشيخ اسد: هسه مااكدرلان هن بالبصرة وانتي راح تروحين لبغداد ان شاء الله بس نحل هاي السالفه اخليج تكعدين يمهن وياهن وتشبعين منهن
حور: وعد موو
الشيخ اسد: ووعد رجال هم بعد شتردين
حور: شكرا عمو
ايان: اخذله صفنه علئ حورر و.......

هنا خلص هذا البارت اتمنئ يعجبكم واسفه ع الاخطاء الاملائية ....

عدد الكلمات 1682 كلمه

في امان الله وحفظة
الكاتبة #زينب الساعدي