رواية الشيهانة الفصل الأربعون 40 - بقلم Shaqraa

السلام عليكم

الشيهانة
الجزء السادس والثلاثون

روح اطلع كبل لا تكعد وتشوفك فشلة..
لنعل ابوج لا ابو ابوها ولي كعديها تصعد لغرفتها..
وانا اتانيج برا اذا ماطلعت ادخل ارفس ببطنج..
شيخ شبييك..
ماجاوبها طك الباب وطلع..وبداخله شبعته سب..
تروح فدوة لبابا اصلا الفرق بينك وبين بابا هو الجنة
وانت النار ..
كصيته كص بداخلي ومسوية نفسي نايمة..

ندهتني امينة شوية وحاجيتها..وخرت الغطا
وسويت نفسي اتثاوب..افرك بعيوني..
ها اجه حيادر..
لا حبوبة عذريني اكعدج..بس عمج يريد يدخل
للغرفة..
اجيت اخبث ومااطلع..بس كلت امينة تنصر خطية
مالها ذنب..
كمت لبست حجابي وطلعت وهي تتعذرلي لان
كعدتني من نومتي..

البيت هدوء لان خالتي راحت لبيت خالهم..ومن تطلع
من البيت كلمن يطش لغرفته مو مثل هي موجودة
ماتقبل احد يروح لغرفته..
حتى انا اكثر من مرة ترزلني..بس اكلها انتو تسكتون
من اكعد وبس اكوم تسولفون..كلتلي مو كلشي ينحجي
كدام الغربة..
من وكتها قللت كعدتي وياهم كلش..

صعدت لغرفتي تمددت وخابرت حيادر كال
واصل..
وهم جنت نعسانة انتظرته بس يجي حتى انام..
اجه تعبان وراسه يأذي تمدد بالفراش ويفرك بكصته..
اندرت اله وسألته بقلق..
سلامتك..
الله يسلمج بس راسي اليوم كلش كمت ماشوف بعيوني
من الوجع..
بندول شي مااخذت؟
شربت ثلاثة وماكو..
عزا شدعوة هيج حتى ماتجيب مفعول..
هههه مو كلها سوا شبيج ..عوفج من الحجي تعاي
مسدي راسي اريد اغفى..

بقيت ادلك بكصته وراسه الى ان غفى وانا
غفيت وانا ادلكله ..بحيث فزيت لكيت روحي
نايمة ع وجهه..
وصارت بيه خوفة ع طفلي كل ماتكعد من النوم..
ابقى متصنمة ومااتحرك..يتخيلي اكعد الكى
اكو الم قوي لو الكاه ميت..
خليت ايدي ع بطني وغمضت بارتياح من شفت ماكو شي..

يوم ثاني امينة اعتذرت مني خطية..كالت
ماكدر ارفض شفتي مايتحاجه..كتلها عادي
شنو ذنبج انت معذورة..
بس هو متخبل مدري شبي..انوب يطلب
ملابس نوم مدري منين يعرفها..
يوصفلي جيبي هيج وجيبي هيج..كتله تريد انت
جيبلي..
كال خوش اشوف..
هههه خاف بالفيس يشوف..
اندري يمه ولا يمل..
بداخلي اكلها حقه العنده مثل خالتي محروم يعتبر..
اذا هي بهادر ولابس شيلة وحواجبه خفيفه..

ومشى اليوم وورا يوم..
ومرت الايام والحمدلله وضعي كلش طبيعي..
بس شغلي كثر وخالتي كلش لحت وياي..
لان نهاية حملها مهدد بالاسقاط
وسوت ربط وماتتحرك من فراشها ..
وبناتها هن يخدمنها ..وحنين الشغل التسوي تخريب
مو شغل..بحجة ظهرها ياذيها ومدري منو
مسويلها سحر ولازم ظهرها..وكل يوم ماخذيها
لوحدة تقرالها..

كلش بديت اتعب يعني وصلت اربع اشهر بس عبالك
بالتاسع من تعبي وارهاقي..
ام عادل تطبخ الغدا وعمتي حكمت عليه الا اطبخ
التمن..وكمت اطبخه بس بمساعدة ام عادل ..
والتنظيف اكثر من مرة صار باليوم من تمرضت
نهاية لليوم..
كل يوم يجون خوالهم وجهال وركضة ماتصير
حتى بالروضة ..
صدك تعبت نفسيتي وبديت انكد على حيادر..

اقل شي اتعارك ويا واكثر من مرة اعلي صوتي..
ماجنت هيج بس منا هرمونات ومنا ضغوطات..
ومن احجي ويا يكلي تحملي لخاطري..
زعلت وكلت مااحجي ويا لان تعبانة ومحد جاي
يرحمني..
بيومها تزاعلنا وطلع الصبح..
نزلت واشتغلت وصار وقت الغدا..اجو الولد
وهو مااجه..استغربت وماكدر اسألهم..حتى
يلا يسمعن ويكولن ماتدري برجلها وين يروح
ويتشمتن..

قبل لا نكمل صب الغدا صحت لوليد..
عفية وليد مشتهية فاش ماتجيبلي..
كالت ام عادل عدنا حضرن البنات وي الخضرا..
سكتت بيأس..تالي اشرتله بعيوني افتهم..
كمت للمطبخ واجه وراي بسرعة..
هو طبيعته من يحجي مدنك ويحجي بادب كلش..
صح خلفة نهاية وجابر بس تربية حيادر..

ها امريني ام علي..
ها اي..حيادر وين؟مااجه؟
لا مااجه راح وي جماعته عدهم عزيمة على شط
العرب ..
هاا شوكت راح؟
بعد احنا طلعنا سوا..هو راح واحنا اجينا..
زين مشكور ..بس ردت اتطمن..
حگج حگج..تامرين بشي؟
الله يحفظك شكراً..
خادم الج..حجاها ودخل جوا بسرعة..

بقيت بالمطبخ بس صعدت خبالاتي وانقهرت..
منا مزعلني منا يروح يتونس وحتى مايكلي
من يروح ما يكول ينشغل بالها..
شوية واجتلي تبارك تركض ..ها جا ات واكفة
والغدا تفرهد..تعاي تغدي تكول عمتي ام عادل..
اي جاية..

جريت نفس وحاولت ماابين شي ع وجهي..دخلت
جوا وهم كلهم جاي ياكلون عدا نهاية..
حنين وبهادر جانو يبسبسون ويباوعون..
كعدت ولزمت الخاشوكة كوا اجبر نفسي ع الاكل..
حجت خالتي..جا شبيج رحتي مارديتي راح نخلص..
ها خالة شهيتي مسدودة ومعدتي مااكدر اكل..حجيت
وعفت الخاشوكة..

اخذيلج بستي(بستج_علج مر) علجي وشربي مايه ..
اي هسه اعلج..
يلا دامج خلصتي زهبي الجاي خوش يكعد ورا
المحمر والزبيدي..
اي اوكي..
كمت رحت للمطبخ ..ارتاحيت من نظراتهم
ولازم امثل الهدوء ..
حضرت الاستكاين والصينية خليتها والجاي
جان مخدر ومخلي ع جهة..

ورا شوية خلصو وانطيت الجاي لام عادل
لان اضوج اصبه كلش..
لميت المواعين انا وسارة..والبقية كلهم كاعدين
يسولفون..حيادر ماموجود ياخذون راحتهم..
بالذات بهادر وحنين..
انا الم وي سارة وعيني الهم..كاعدين واحد يم
الثاني..
وحلكهم وايدهم دسمة وزفرة ويسولفون..
كلت اذا ركزت بيهم اكثر يجوز اذب معدتي
كلها بحضنهم..

رحت للمطبخ وسارة كملت الباقي..
وكفت جاي البس الجفوف..لكيته بس واحد..
دورت منا ومنا ولا حصلته..دخلت حنين واجت
يم السنك..
وهو متروس صحون وهي فتحت الماي تغسل فوكهن..
صحت عليها بأشمئزاز..شتسوين انت؟؟
اغسل مثل ماتشوفين..
والبيت كله مغاسل ماجيتي الا هنا..
عشيرة كلها كامت تغسل وين احصل مكان بعد..
اي روحي انتظري احد يخلص وغسلي..

هي ولا اهتمت..غسلت ومضمضت ع الصحون..
لعبت نفسي كلش وانا منا اعصابي فايرة..
شبيج هييي شهالقرف ؟؟غسليهن يلا..
هيهيهي..اغسل؟؟لا واجبج هذا عيوني..وخطية
جفوفج ماكوو ..شلون تغسل شاها الناعمة اوووي...
نزعت الصدرية وذبيتها بوجهها..
ماراح تغسل لان بت عمها البقرة هي تغسل بدالها..
طلعت من المطبخ وكبل لغرفتي صعدت..
لو باقية دقيقة جوا بعد يجوز اتصرف تصرف
اندم عليه..

تمددت وغمضت عيوني بتعب..نفسيتي صفر
احساسي مكسور..
كلشي كلشي زاعجني..صايرة حتى الشي القليل
احسه عظيم..
شوية واندك الباب..مافتحته لان اعرف خالتي
عرفت ماغسلت المواعين ودزتلي احد..
غلست وغمضت..وشوية وغفيت صدك..
كعدني صوت الفون..باوعت حيادر يتصل..والساعة
ب٣ ..

مرتين دك ماجاوبت..ثالث مرة دك رديت..
فتحيلي الباب..
اي هسه..
كمت اترنح وعيوني مغمضتهم..
فتحت الباب ورجعت لفراشي..
سد الباب وقفله وراه..انا انطيته ظهر ورجعت
تمددت..
الله يساعدج مدام..
سكتت..وغمضت..

اجي كعد وصار مقابيلي..شصاير؟جوا
متعاركة ووياي متعاركة شعنده اليوم شعلان گزاره..
حجاها بضحكه..
عضيت شفتي بقهر وانا اباوعله..تستهزأ؟
وبعدين ويامن متعاركة جوا؟؟؟شوكت اجيت حتى عرفت؟؟
تدربن بالموجز من الباب يجيني..
اي ادري حاطلك جاسوس يوصلك الاخبار..
اي صفات القيادي الناجح يزرع عيون توصله الاخبار..

ها ووصلك خبر شلون طايح حظي طول اليوم؟؟؟
جر حسرة قوية وحجه..
نرجع لنفس الموضوع؟
اي نرجع لان ماعرف انت شبيك تتضايق لو
كلت شوف حل ..يعني عيشتي عيشة؟
عمري مااشتكيت من شي وقابلة لان انا مناصرني..
بس هسه من اشكيلك تكلي تحملي وتنحل ..
شوكت تنحل؟

انا حامل وكوة متحملة نفسي..اصابي تلف..
افكر بكل لحظة انزف لو طفلي يبطل حركة
واروح ويكلولي ميت..واهلك بكل ظلم وجبروت
يدوسون فوكي..
ماريد اكعد اعدد واكول امك وابوك وذاك وهذا..
بس انت اخذتني وخلوك وصي علي..
صير كد هالوصية ..حسسني الحب الحبتك بي
يستحق..حسسني بشخصيتك...تمرجللللللل...

وي هالكلمة كفخني..سدددي حلكج..
استغفرالله..استغفر الله..كام يمشي وهو يستغفر
ويروح ويرجع وينفخ..
بيج كليلي شبيج..من حبلتي لهذا الطفل صرتي
ماتتحملين احد..صرتي تكرهيني حتى انا..
يعني انت البشر الوحيد بالكون حاط املي
وسعادتي بي مليتي مني..

بس العتب مو عليج انت معذورة..بت خير
ومدللة وورطتج بيه..وفلتي روحج مني وكلتي
ماريدك..
بس انا الغصبتج وطلبتج من ابوج بالديوان..
ورضيتي لنج تحبين ابوج مو لن تحبيني..
حكج يابة حكج..زين ومنج عايشة ومتحملة وصابرة..
انا ظالمج ..

سكتت ماجاوبته..هو طلع وسد الباب ..
انا اختنكت ماتحملت بقيت ابجي ..واحس جسمي كله
يختض..من اشهك الشهكة تظلع من روحي..
خابرت ماما ..
هلا ماما شلونج يروحي..
جريت نفس وحجيت..تعبانة كلش..
حجت بفزة..اسم الله ياستار شبيج؟؟

ماما تعبت كلش..مشاكل ماجاي تخلص
ونفسيتي زفت..
هدي نفسج واحجيلي..شنو صاير ؟
تعاركت وي حيادر لان نفسيتي تعبانة وهو
انقهر وكال تورطتي بيه..
ومساع تعاركت وي حنين لان مضمضت بالسنك..
وشغل البيت زايد وانا نفسي بخشمي..اصلا كارهة
نفسي ومامتحملة شي..
ميخالف ماما احنا كلنا لا تفكرين زايد ولا تقلقين
انت هسه لا تضوجين وانا اتصرف..
اوكي ماما..
يلا شوي واخابرج..

سديته منها وماردت افكر بشي وشنو
رح تسوي ماما ..
ماريد افكر شراح يصير ابد..
بقيت مقرفصة بفراشي ومقهورة..
ورا ساعة او اقل خابرتني ماما..نزلي احنا جوا..
ها؟
يلا نزلي بسرعة راح ندخل جوا فتحولنا الباب..
كمت بسرعة غسلت واباوع لوجهي مخطوف
وتعبان..
لبست حجابي ونزلت..

محد بالهول بس الجهال..بس نزلت كلولي
امج اجت بالديوانية..
رحت وانا امشي بكسل..دخلت شفت كاعدين
خالتي وام عادل وامينة يمها..
اول ماشافتني اجتلي بهدوء واخذتني بحضنها..
خليت راسي ع صدرها وشبكتها حيل ..محتاجة
حضنها كلش..

كعدنا وهي جانت تحجي بثكل..خالتي كدامها تصير
سمسم لان تخاف منها..امينة كالت هي وعمي كلش
يخافون من ماما..
هي قربتني منا وبدت تسولف وياي..كامت ام عادل
وامينة..
وام عادل صاحت لغالتي..عمة ماتجين شوية محتاجينج..
هي كامت وعينها علينا تخاف احجي شي اكيد..

اول ماطلعو..حاجتني ماما بهدوء..حضري ملابسج
وامشي وياي..
هاا ماما ..
تعاب ارتاحي كم يوم وخلي اعصابج ترتاح ..
انت هسه مرموناتج مخربطة وتتحسسين..تحتاجين
راحة تامة..
وحيادر شلون..
خابرته كال جاي ..اريد احجي ويا شوية..

ورا شوية اجه حيادر ..دخل وسلم وهي كامت
وكفت..
استريحي يمه مايصير..
بصراحة ماجاية استراح..جاي اشوف راحة
بتي..
هو باوعلي ووجهه تغير..انا نزلت عيوني..
شوف حيادر..مرتك مرتين تفقد طفلها..يعني المفروض ذا
الثالث تخافون عليه..
والي جاي يصير وياها العكس..
نيتكم تموتو..

مايهمني اليصير بينكم انت وياها لان رجال ومرته
وتتفاهمون بي انتو فقط ..لان طلعت من بيتي وصارت
ببيتك..فما يحقلي احجي بهالشي..
بس اليصير بيت اهلك واليسوو اهلك وياها ثكيل..
بتكم عدنا وحاطينها بعيونا ..
البنية مايوم طلع منها العيب ومعدلة واحنا نحبها
وحسبناها بنيتنا..
ليش بتنا يمكم ماكلة الطين وساكتة..

انت كلت وحجيت بزود..لو صار شي عليها
اعزلها ويجرالها التريده..
انا اكلك شيصير اكثر بعد؟دلالها ودلعها كله نسته..
ولخاطرك كالت فدوة..بكل شي تدخلو وهم سكتت..
واحنا ماتدخلنا ..ابنها وفقدته مرتين..
وهسه حامل بثالث وتزيدون بتعذيبها..
لهنا وتعذرني ..انا راح اخذها يمنا كم يوم..
ترتاح ونفستها تتعدل..وانطيك مجال وقرر براحتك..

خلي ببالك موضوع العزلة احسن..اعزلها بيتكم..
بمشتمل..
بيت وحد..بالتكدر عليه ومانضغط عليك..
ولو تريد احنا نشتريلها بيت يمنا ونكعدها..
يواشج..شنهي ناطور خضرا..لو مهشة ذبان انا..
حشااك رجال وكفو..
دام تكولين هيج..لا تزغريني وتكولين ناخذلها
بيت..
انا حاط سالفة البيت براسي..بس ماكو شي
صار بيوم وليلة..
واريدن ارتبه عدل ماستعجل بي..اسوي كلشي
على ذوقها..

نفسيتها وراحتها اهم من الذوق ماما..مرات نشوف
ناس كاعدة ببيوت مثل جن الدجاج..نكول
شلون متحملين..بس تلكاهم هجو من القصور الشافو
بيها ضيم..
بت صديقتي تزوجت ابن تاجر وبيتهم ٨٠٠ متر..
اليشوفها يكول اتمسح ببختها..بس اكعد بهيج بيت..
ذيج هي بعد سنة وحدة طلعت وكعدت ببيت تجاوز..
تدري ليش؟؟

لان ابو الولد راده يصير مهربجي..راده يمشي
بدرب الحرام..
عصى ابو وماقبل..شوفو مرته المر..يذبولها
ماي من جوا الباب ويكلولها مو احنا هذا جن..
لحد ماطلعو وكسبو صحتهم وراحتهم..
عاشو بمكان بسيط بس مرتاحين..

انت الكالها مكان ترتاح بي ..لان هي تحملت..
وهي تحبك وانت تحبها..لا تخربون حياتكم بسبب
احد..
باجر احد يصير اثنين وثلاثاء وانتو تنحرمون من الجمعة..
يلا من رخصتك ..خليها تجيب ملابسها وتجي..
براحتها..خل ترتاح ويصير خير..

طلعت انا بسرعة..بس حصرتني البجية عليه..
شكله يقهر وادري بي يضوج ومحد اله من اروح..
صعدت اخذتلي علاكة صغيرة كم لبسة بيها
ولبست عبايتي ونزلت..
خالتي كاعدة ويمها البنات..
ها خير ياساتر..
رايحة وي ماما ..
يااع جا وزلمتج يدري؟؟
اي هو رح يوصلنا بطريقه..
مع السلامة..

رحت للديوانية لكيتهم ينتظرون..هي كالت
اخابر محمد يجي..
بس هو كلها انا اوصلكم..
اخذ العلاكة مني وطلع كدامنا..شكله قافل كلش..
واعرفه من يقفل مايشوف دربه بعد..
صعدنا وطول الطريق سكوووت..
عبرنا ع مطعم كال من رخصتكم شوية..
نزل جاب صينيتين وبيتزا وصعد...

وبقينا سكوت لحد ماوصلنا..
قبل لا ننزل ماما سألته..طلعت برضاك صح؟؟
الله يرضى عنها انشالله..خل ترتاح احسنلها..
وشال الاكل كال لماما عشاكم على حساب علي ..
هي ضحكت وكلتله تفضل..
رفض كلش..باوعلي..انا باوعت لماما..
هي فتحت الباب بالمفتاح ودخلت..
هو تقرب يمي..غمض عيونه بعصرة وفتحها ..
شيهانة..
نعم..حجيت بعبرة..فكري بحالي..
حجه وراح ..

للحكاية بقية
بقلم شقراء(قمر كانون)

هههه يعرف بس ميقرا متشوفين ماخذة راحتي😂

سؤال مهم..شوفي ابو حيادر وام حيادر اولاد عم..يعني اخوانها يردون الشيخة وابو حيادر عنده الشيخة وشخصيته عوجه بس الي ساندو اخوانه لهذا اولاد عمه الي هم خوال حيادر..صح كدام الناس هم صحبة وكذا بس بالواقع شي تكره شي ويردون الزلة حتى يكلبون عليه وحنين اذا اشتكت عدهم راح يحجون بالمشكلة بالعشيرة ويعتبر شيخ العشيرة ظالم و و و ووتنوخذ منه المشيخة..راح اوضح هالامور بعدين من تصير مشكلة كبيرة..
بس وضحت هسه مختصر..

ههههههه اويلي عليج شجاع سمعتك خلدت😂

#تعديل..البارت طلع ناشرته وفشل التحميل هسه دخلت ولكيت معليقين ماكو بارت(ماعدكم حظ نشرته ب١٢ نزل ب٢)