رواية الشيهانة الفصل الحادي والأربعون 41 - بقلم Shaqraa

مساء الورد

الشيهانة
الجزء السابع والثلاثون

نزلت دمعتي وانا اباوعله راح للسيارة..
فتح الباب وصعد..بقيت واكفة اباوعله..اشرلي دخلي..
دخلت وسديت الباب..مسحت عيوني وجريت نفس..
فتت جوا ..البيت هدوء محد بالصالة..كالت ماما
روحي ارتاحي بغرفتج وبعدين نحجي..

رحت لغرفتي وسديت الباب..بقيت واكفة اباوعلها..
اتذكر ايام الجنت اخابر حيادر ..باوعت للكنتور ضحكت
ونزلت دمعتي..
فتحته واباوع لمكاني الجنت اخابره بي..
شكد جانت ايام صعبة وماما متشددة عليه..بس
حلوة واحبها..

ذبيت نفسي بفراشي وتغطيت ..اريد اغفى بلا
تفكير..احتاج اخلي راسي ع المخدة مثل ايام الطفولة..
بنظري المخدة للنوم بس..ومن كبرت عرفت المخدة
صديق اصم وابكم..تبجي يمه لا يسمعك ولا يواسيك..
بس تسندك من تبجي عليها والناس عبالهم نايم..
بقيت ابجي واستذكر مواقفي القديمة وي حيادر..
الى ان غفيت..

كعدت بالليل..طلعت بالصالة كلهم كاعدين ..
بابا فتحلي ايديه وكام..اجيت ذبيت نفسي
بحضنه وبقيت ابوس بي..
بس ماحسسني بشي ..
وحسن ومحمد يكلوله اي شاها تبوس بيها واحنا
بس بالعيد تبوسنا..ابتسم وكلهم..انت حسن تعرف شعوري
هسه..
ومحمد يجيك يوم وتجرب ..

جاوبه حسن..صدك بابا يامعزة يسر عندي ماعرف
شحجي وشوصفها..
بس محمد فرك وجهه وتنهد وسكت..
سالت حسن..لعد وينه يسر وهاجر؟
بالمطبخ جاي توكله..هو بس ياكل يخنس..نقطة ضعفه
الاكل..
ههه فدوة لحبيبي ..اروح اشوفه..

رحت للمطبخ سلمت ع هاجر لكيتها جاي تكلي
وماما بحضنها يسر توكله..
كالت امي خابرت وسلمت عليج..وفهمت قصدها
حيادر بس تستحي تحجي كدام ماما..
ماتدري بيها لاقط..لان بس حجت ماما باوعتلي..
بقيت يمهم واريد اساعدهم ماقبلو..
دخلت كعدت جوا..لحد ماتعشينا ورالكل راح نام..
وانا رحت لغرفتي..

مانعسانة ابد ..بقيت اتصفح بالفون شوية..
خابر حيادر..شوية وجاوبته..
هلو..
تنهد وحجه..شلونج شلونه ابني..؟
الحمدلله زينين..
ليش اشتكيتي لامج؟
ماشتكيت بس جزعت..من اول زواجنا انا وياك
ومساندتك..وكتلك طول ماانت وياي اتحمل..
بس توصل بيك تضربني!صح بنظرك كفخة
بس باجر تتطور وتصير سحلة..

تدرين مو قصدي ااذيج ومرات بالشقى اطكج اقوى..
صح وماتاذى خدي مساع بس تاذت روحي..
حيادر انا نفسيتي صايرة كزازة..ماتتحمل قوة بعد ولا
ضغط..
ادري بيج..عبالج ماحاس بيج؟؟بس شنو البيدي
اسوي..
خذيتلي قطعة ارض بعيدة شوية لبيتنا وابوي درى
اجه ينجلط..تدرين شنو شرطه حتى مايسويله هوسه؟
شرط علي مااحط بيها طابوكة طول ماهو عايش..
وحلفني ماابنيها..لن شوي بعيدة عنهم..

كلت ميخالف احلف واخذ غيرها وابنيها..
منها ارضي ابوي ومنها ماتصير مشكلة وانت تنقهرين..
شاها اهلي مستغلين بري بيهم..وانا مااكدر اعصيهم..
بس مااظلمج..اذا جانو اهلي ورضاهم يدخلني  الجنة..
فأنت الجنة الاريد ادخلها واصبر لاجلها..

تدري مستحيل اطاوعك او احثك تعصيهم..
بس انا شذنبي؟تعبوني حبيبي تعبت..
ميخالف اعرف..انت من خذيتج لليوم تكولين تعبت
وماتسولفين شيصير..
لو ماايحجولي اليصير وياج واعرف ابقى كلشي
مادري..
وادري بيج مو نكدية وگلبج نهر صافي..يسمع
اشكال والوان وبموجة وحدة ينسى ويخفي السمعة..

بس صبري وياي وتحملي..اليوم راسي يريد
ينفجر من التفكير..اجيبها منا احطها منا..
كلت نخلي نغم وعادل ياخذون غرفتنا واحنا
نروح للمشتمل..
لعد واولاد جابر شلون؟
ياخذون غرفة فوك ..لحد مايبنولهم مشتمل يمنا..
ياريت حبيبي ميخالف..بس يقبلون؟

اي عادل خوش عادل ونغم ماعدها سم امها..
اوكي بعد شوف شيصير..
يعني ترجعين وياي باجر؟
خليني كم يوم فدوة..
ماكدر وعيونج..باجر اجيج نروح للدكتورة نتطمن
واجيبج هنا لحدما نضبط وضعنا..
اوك بس تحاجي ماما..؟
اي الصبح اجي واحجي وياها همحكها رايدة تطمن
عليج..
اوك حبيبي يصير خير..

تفائلت بهذا المقترح صح ماابتعدت عنهم..بس
المهم خارج بيتهم..وشوية شوية ابعد نفسي
اكثر..
نمت متطمنة وكعدت من وكت..ساعة بتسعة اجة
حيادر..
بابا والولد بالشغل..استقبلته ماما وهاجر اجت صاحتلي
لان جنت العب يسر..
كتلها خليني شوية واروح خل يحجون هو وماما
ويتفاهمون..

كعدت يمي وبقت تسولف..شاها عيوني دربالج
ع سارة..
انت شخصيتج قويةوتكدرين تساعدينها..لو ماانت
جان انكشفت ..لن امي فقيرة وتخاف..
ظلي مساعدتهن عفية..كلشي ولا ياخذها ابن نهاية
ترى يحطمونها..
لا انا حاسبتها اختي..واساعدها بالاكدر عليه..
واذا احتاج حيادر يتدخل اكله..
بعد عمري كون يترس حضنج من الخلفة المعدلة
مثلج ومثل عمي..

بقيت اسولف وياها شوي واجت ماما..
شاها ماما روحي يم زوجج بالاستقبال ..
اي ماما..كمت وانا اعدل بشعري..بجامتي ضيكة
بطني طالعة شوي والتشيرت صاعد،.
باوعت شكلي يضحك..
دخلت للاستقبال هو مدنك..احمم..
رفع راسه وكام..اجه يمي بسرعة..سد الباب من وراي
وجرني لحضنه..

غمضت بارتياح وانا اشم عطره..مشتاقتله
عبالك مفاركته سنة..
رفعت راسي مبتسمة اله..شفته حضنت شفتي
وجريتتها منه بسرعة..
لا تدخل علينا ماما هههه ..
عض اصبعه بتهديد..وييل حالي رجعت اجدي
البوسة جداوة بسبب فيحاء..
يلا جيبي هدومج وتعاي..

باوع لبطني وضحك..مو خذتي هدوم ليش لابسة
هي كامزة..
علاكتي بقت بالصالة وتعاجزت اطلع اخذلي
لبس..
لبست مالت ايام الشباب..
باوع بوكاحة وضحك..كومي شيهانة يلاا..
ويين!
جيبي ملابسج نرجع..
ياا لعد والدكتورة؟
اشتعلوو غير نسيتها..

جا خليني اروح واجيج ورا الغدا..
وين تروح غير تحجيلي شنو اتفقت وي ماما..
مثل مااتفقت وياج كالت ميخالف..
العافية بالتداريج..ماتقتنع بعد بتها ياهي..
وشبيها بتها يااي..
دوهنتني ..حجه وهو صافن بوجهي ومبتسم..وانا
اباوع لعيونه المبتسمة بولع..

هاا وين صفنا..حجيت وانا اضحك..
اندري ههه..يلا رايح..
والغدا؟ ماتتغدا يمنا..
لا محد زحمة ابوج واخوتج يرجعون
الظهر ماريد ازاحمهم..
وعندي شغلة هنا خابرني ولد لازم اروحله..
اوكي تعال من وكت بعدين..
يجرالج يالغالية..يلا في امان الله..
ربي يحرسك..

طلعت ورا لحد ماطلع ورجعت..دخلت
للمطبخ..
ماما واكفة ع السنك تغسل..رفعت راسها ..
ها راح؟
اي ورا الغدا يجي ..حتى امر للدكتورة..
غير تخلي يتغدا يمنا..
يكول مخابري بشغل ومايكدر..
الله يسهل عليه..
امين..
حجيت وانا اكعد يمها..
حجت وهي ناطيتني ظهر..اقتنعتي بفكرته؟
امم..يعني..حل مؤقت..والمهم اطلع من يمهم..
صحيح..الله كريم..
سكتت بعدها ماحجت..اعرف مامقتنعة..
بس لخاطري وماتريد تعكر مزاجي سكتت..

ورا ماتغديت وتحضرت..كعدت يمي
ووصتني..لا تسكتين عن اي شي يصير..
احجي لرجلج..واذا ماسوا حل تجين وتحجيلنا..
ماما اي مشكلة تنترك تكبر وتصير معضلة..
وانت مامجبورة تتحملين..
وبعد حجي هواي وصتني بي..واعرف كلامها
عين العقل..
بس يوكف بعيني حيادر..مو كلشي اكدر احجي..

ورا شوية اجه عليه ورحنا للدكتورة..
وضع الطفل زين بس مايه قليل..انطتين علاج
وفيتامين ..
وحذرتني كلش من القلق والنفسية..خصوصا
من شوفتها شعري شكد يتساقط..
صار خفيف كلش من القلق والتفكير..

طلعت منها وحيادر جان واكف ينتظر..
ابتسمتله..رح يجي ابو رجلين طوال مثل ابو..
رفع حواجبه وضحك..بداعتي؟
امم بداعتك هههه..
يجي بالسلامة..امشي ولا تحجين رحنا للدكتورة
اصلا..
لا مااكول اكيد..

شعاحبج تاكلين..؟
فلافل حاارة وفوكها عمبة وياها بيبسي ..
شكد تاكلين فلافل لا يطلع مفلفل..
لا عيني يطلع صاك علينا..
هههه الله  يسهل ويجي بخير..
واخذلنا لفات واكلنا وجاب ويا حب نكرز بالطريق
ونسولف..

وصلنا ورا المغرب..جانو جاي يصبون عشا..
سلمت عليهم يسلمون من ورا خاطرهم..
سويت نفسي مامهتمة..حيادر كال امشي نصعد
حط ايده ورا ظهري وصعدنا..وجابر اجه
من غرفته جان يم نهاية..
بقى ابو يصيح عليه..ماتجي تتعشى..لو انتم
كل واحد لايذله ورا مرته جنكم مكحطين..

صعدنا انا وحيادر بسرعة وفوك طكينا ضحك..
كال ابوي طلع حركتنا بجابر..
اي غير فزيت من عاط عبالي علينا ..
فتح الباب ودخلنا ..انتبه كال تدرين ماقافل الباب!!
صدك مانتبهتلك من فتحته..
خرررب..تاكدي من كنتورج بسرعة..
فتحت كنتوري..والكى ملابسي شي فوك شي
مالت النوم والداخليات معفوسة..احس دخنت
من العصبية..
همزين ذهبي كله جامعته ومخليته بالقاصة متظمنة عليه...

حيادر شاف الوضع هيج وجهه انكلب..كعد
ع طرف السرير وصفن..
ناقص منج شي؟
مادري وين يبين..اذا كلشي مخلوط المعلك على المرتب
على القطع الناعمة..شمدريني شصاير!
هسه اول مرة فاتت وعيرناها..بس مو ثاني مرة ونفس
العفسة..يعني شكد متقصدين..

كام وهو يهدء نفسه..جر نفس قوي وحجه..
هذا هو خوش حجه اروح اكلهم يفرغون الملحق..
انت ظلي هنا لا تنزلين..
اي اوكي..
نزل جوا وانا كعدت ارتب بملابسي ومقهورة ميتة..
احاول اهدي نفسي ..بس احس اعصابي طكت..
لحد ماخلصت ترتيب وبدلت ملابسي وتمددت..
حيادر تاخر وانا كلساع اكوم اخلي اذني ع الباب
خاف يصير عياط لو شي بس ماكو..

شوية وصعد ..تمدد يمي بالسرير بس ساااكت..
خفت احجي واسأل شي..
مديت ايدي لايده..
لزم ايدي وغمض..
خليته براحته كلت باجر اسأله..
صح التفكير اكلني وبس اريد اعرف شسوا..
بس امبين صار شي جبير..اعرف حيادر اذا جان
مقهور وضايج عن اذا جان مصدوم..
وهسه ثنينهم بي..

يوم ثاني الصبح كعدت ويا وسويتله ريوك..
بس هو قافل كلش..خفت افتح الموضوع ويا..
تريك وطلع..وانا صعدت نظفت وكملت ونزلت ..
خالتي ماموجودة بالهول مو عادتها ..بس احسن
اريح وعمي اذا هي ماكو هو مايكعد لوحده..

رحت للمطبخ يم ام عادل والبنات..بس الهدوء
جان طاغي ع الكل..صفنت عليهم شصاير غريبة؟؟
كلت اكيد حيادر رزلهم البارحة وسال منو فايت غرفتنا..
سوست التمن وكملت ام عادل شوي السمج ونغم
خبزت الخبز وجابته..
حنين نظفت الخضرا وراحت صعدت لغرفتها..

سالت ام عادل شبيكم؟
ها لا حبيبة مابينا شي..بس شوي عمتي تخربطت
وضيجت خلكنا..
يااا شبيها؟
مادري يمكن البارحة كلت هيس واجد وارتفع
السكر عدها..
هيس شنو هذا..
هذا التمر المدهرب بالطحين والسمسم..ماماكلة
منه انت..
احنا قليل نسوي لن محد ياكله..بس امس اخت
نهاية جابته وكلت منه عمتي وتخربطت..
عدها العافية..حجيت بصفنة وانا مستغربة..

وضعيتهم مو مال عمتي مريضة..البيت كله
يصفن..
شموكلينهم البارحة مادري..
كملنا الغدا وصعدت ارتاح..وحيادر خابرني كال
عندي شغل ارجع احتمال المغرب ..
كتله براحتك..
ادري تهرب ومايريد يرجع..بس يمكن امه
متخربطة بسببه امس !!اي احتمال لهذا
هو ضايج..

صبينا الغدا وخالتي اجت كعدت بس شكلها
مابيها شي..
صح وجهها مغيم بس هي دومها هيج يعني مو مال
مرض..
تغدينا وسط هدوء تام وبس عركة الجهال ع السفرة
ينسمع صوتها..
كملنا وكمت للمطبخ اغسل المواعين..
ودورت ع جفي ومالكيته..رغم هذا جديد اليوم استخدمته..
كلت ماكو غير حنين الحقيرة..
صعدت للغرفة جبتلي واحد ولبسته واشتغلت..
ومن خلصت اخذته وياي للغرفة حتى لا يضيع..

بيومها حيادر اجه بالليل تقريبا بالتسعة..
دخل ذب ملابسه واجه للفراش..تمدد بتعب..وشكله
صدك تعبان..
تقربت منه ع كيف وخايفة من ردة فعله..
خليت راسي ع صدره وغمضت..حجيت بهدوء..حبيبي..
ها..حجه بتنهيدة..
احجيلي عادي شبيك..من امس لليوم تخليني بنار
شصار وياك وهيج متأذي..

خليني ساكت ماريد اغثج..كافي المغثة
الحصلتها..تعال عشرين سنة ليكدام..
اوووي اسم الله عليك ليش هيج هلكد متأذي..
عصرني لحضنه حيل..متأذي ماتوازي الوجع
البيه..
كام من الفراش واخذله جكارة واجه..
كعد وكام يدخن..
تدرين؟اكتشفت روحي مثل هالجكارة..
تورث روحها وتشعلها لاجل غيرها..
تالي تنذب بالتراب وتنداس..هيج حالي انا..

حشااك يروحي شنو هالحجي..تقربت منه
وانا اباوعله بقهر..
الضوا القليل بالغرفة منعكس ع ملامحه
ويبين تعبها اكثر..
احجيلي حيادر..
ااااخ شحجيلج وشضم عنج..
البارحة من نزلت..عرفت ياهو فاتح كنتورج..
صدك؟؟منو؟
الجهال صاعدين ولاعبين بيهن تبارك كالت..
يااا ..صدك هم دومهم يلعبون هنا مو غريبة..

زين تولي هالسالفة ليش هلكد مقهور انت؟
مقهور لن حاجيت عادل البارحة..
تصدكين يكلي تعذرني عمي ماكدر اكعد بالبيت وياهم..
هذا الربى بخيري وعلمته الصنعة وجنت اخذه
وياي للشغل..
يكلي ماكدر اطلع من الملحق..ماريد اكعد
بالبيت ماينحمل..
يكلي عمي كدرك غالي عندي بس راحتي هناك
بالملحق..شوفي باعي كلها تدور راحتها
بس انا ناذر راحتي الهم..

اي وتقهر نفسك هيج؟؟بسبب حجايته هيج وجهك
شصاير بي من التعب..
ابد لا تهتم..
ميخالف يولي مو بحاجته..وهم تجي للصدك
حقهم هم مكانهم وكعدو بي..ومانريد نزاحمهم..
احنا نبني مشتمل صغير ع كدنا..
لا مايستاهلون بعد واحد يكابلهم..
انا حصلت بيت تعبان كلش.. راح اهده وابني
جديد..
وساعتها اطلع حتى ما اكل لاحد بيهم وداعة الله..
حضنته من ظهره وحجيت همس..
احسن شي نسوي حياتي..هسه ارتاح وباجر
نحجي ..

تمدد وجرني خلاني بحضنه وسكت..بعد ماحجيت
شي..
لان شفت حجم الخيبة الي هو بيها..بين وعده لماما
وهسه يعتبر خلف الوعد وبين طلب من ابن اخو
الي حاسبه ابنه ورده..
وهذا غير الي مااعرفه..الظاهر صايراكثر..
لان حيادر هالمرة غييير..احس اكو شي ماذي
كلش وماعرفته شنو..

بقى الوضع هيج كم يوم..وخالتي متعاركة وي امينة
بس انا حنت فوك..
سارة سولفتلي كالت بيبي تعاركت وي امينة وكلنلها
اخلي بناتي يطلعن جنازتج لو جربتي تعيدين الصار..
وسارة مافهمة حجي بيبيتها وانا احتاريت اصلا ومافهمت..
بس ماكو غير عرفت بعمي رايحلها وهدت عليها..

اليوم دخلت بشهر الخامس..بس نفسيتي ساءت
لان حيادر كلش تغير وصارت روحه بخشمه
من صار موضوع الملحق..
وخصوصا بعد ماما خابرته وكلتله استعجل وابني
البيت..
صار عليه ضغط نفسي كلش..وبالبيت يحجي ع كد
السؤال..
حتى عمي يخاف يحجي ويا ..

جانت الدنيا مغرب..اجو اخوات نهاية وجهالهم..
وهن كاعدات جوا يدكن سوالف..والجهال فوك..
توني اريد انزل واسمع هوستهم بغرفة الخطار..
الباب مفتوح والعياط صاير يسمعه اخر جار..
مشيت اشوف شكو واشوف رجليه تلزك بالكاع من الدبك..
اباوعلهم مصعدين قوري جاي وكعك
وجاي ياكلون وصايرة عركة كل واحد يريد اكثر..
وتارسين المكان دبك وجاي..
كلت ولا انظفه شعليه..عدهم خوات وينظفن..

نزلت جوا وشوي ونزل بهادر..
كام يصيح بالهول..شنهي هذا الدبكة تجلب بالرجلين
شبيجن مكرمات ماتنظفن..كبر الياخذجن يالخايسات..
انا شفته هيج يصيح كمت..

للحكاية بقية
بقلم شقراء(قمر كانون)

تحليل منطقي وواقي وضيفي اله ضعف النفوس هم والحقد

احسكم واكفين وتصفكون من كتبتو هالتعليق😂

ههههههه صبريلها بس وشوفي