رواية الشيهانة الفصل الثاني والأربعون 42 - بقلم Shaqraa

السلام عليكم

الشيهانة
الجزء الثامن والثلاثون

شفته كام يصيح ردت ارد عليه ..بس تذكرت
موجودين بنات خالهم واكيد رح يألفن من يمهن ويزيدن
حجي..ويكولون مرت حيادر صلفة..
لزمت نفسي وكمت..هو باوعلي عباله رح اصعد..
بس انا رحت لغرفة امينة تمددت..

شكد تافه وماعنده ذرة اسلوب ابد..حرامات
لو محد هنا جان رزلته وخليته يلزم حدوده..
وانا متمددة بالغرفة انفتح الباب فزيت..شفتها
بت اخت نهاية صغيرة تقريبا عشر سنوات..
صفنت بوجهي شوية تالي كالت..بيبيتي تكول
تعاي مسحي الكاع فوك دبكة..
امم اي هسه اجي..
طلعت تركض وطبكت الباب..

انا غمضت وسويت نفسي نايمة..حتى اذا رجعو
يلكوني نايمة..
ورا وقت هم انفتح الباب ..انا جنت مغمضة..
سمعتها نفسها البنية الاجت مساع حجت..ياااع نامت
الفاهية عود كلولها نظفي..وطبكت الباب وطلعت..
وانا بقيت صافنة على كلمة فاهية..
ذول ماعدهم حشيمة لاحد..

غمضت شوية هدء جسمي وقريب اريد اغفى..
حسيت بشي نزل..
طلعت للحمام بسرعة..زين قريب عليه مااعبر
من يمهم..
دخلت بس شفت شي خفيف..
باوعت وانا اطرد الاحتمال من راسي..
طلعت بسرعة وخابرت حيادر..
بس كتله هيج وضعي..كال لبسي وتحضري وجاي اخذج
للمستشفى..

اجيت اصعد وصاحت علي خالتي..هاا بعد وكت..
حاجيتها بلا ماادير بال..عوفيني..وصعدت
خليتها تدردم وراي ومادري شتحجي..
دخلت للغرفة لبست وتحضرت وكعدت..
صافنة ومابراسي اي تفكير بس اتخيل رح اروح
ويكلولي ميت..

شوية ودخل حيادر..امبين جاي يركض
صوت انفاسه عالي ووجهه مخطوف..
ها شلونج هسه ؟حجه وهو يوصل يمي..كومي كومي
بسرعة..
حط ايده ورا ظهري وطلعنا.:وهو يحاجيني وانا
مادري شيحجي..

نزلنا والكل يصيح شكو وشبيها..جاوب
بصوت عالي..عدها وجع ادعولها..امينة
جانت لابسة واجت ويانا يمكن ناطيها خبر من اجه..
نريد نظلع ..امه كالت ها اجي وياكم ..
جاوبها لا ادعيلنا يمه بس..
وطلعنا من البيت وانا بس اباوع بعيوني..

بعد مدة طويلة يلا وصلنا للمستشفى الي
تداوم بي دكتورتي..
واحنا انطيناها خبر لهذا اول ماوصلنا لكيتها..
باوعتلها وانا مصفنة..دكتورة فدوة..حجيت ولزمت
ايدها..
اخذتني وهي تحجي وياي وتهدأ بيه..بس احس
كلامها وياي مجرد مواساة مو اكثر..
احساسي يكول الطفل ميت..

وفعلا طلع ميت ..حتى هي احتارت شلون تنطقها
وانقهرت عليه لان كبير ومكتمل وكلشي مابي
ويروح هيج فجأة..
بعد ماسمعت منها هالكلام وبقت تصبر بيه..
فصلت عن الدنيا..
مادري شنو استمرت تحجي وشنو صار وراها..
كل العرفته انا رحت ببطني طفل..ورجعت بدونه..

رجعت للبيت يوم ثاني الصبح..صعدني لغرفتي ووياي
امينة صعدت..والكل يباوعلي بنظرة ماريدها
شفقة وشماته واستغراب...
صعدت لغرفتي ونيمني بسريري..انطاني الفون..
امج داكة عليج وانا ماكتلها بالليل خفت تقلق..
خابريها انت وفهميها احسن..

ماجاوبته بس اخذت الفون ودكيت لماما..
بسرعة جاوبت ..ها ماما صباح الخير قلقتيني ماكو
راسلتج ودكيت وماجاوبتي ..
حجيت وانا بلا رد فعل..مجرد كلمات تطلع مني..
البارحة رحت للمستشفى..ابني مات ..
شنووووو حجت بشهكة..شاها يمه شتكولين ولج
حاجيني شبيج صوتج مو طبيعي ..

نزلت الفون من اذني خليته يمي..اخذه حيادر
وحاجاها..
انا اجيت لميت رجليه اريد اقرفص وتوجعت ..
صرخت حيل وياها بجية..
امينة عدلتني وبقت تهدي بيه..بس انا انهاريت..
واسوف حيادر حط الفون يمي ويريد يحاجيني..
شاها ذكري الله..امج سمعت صرختج وتخبلت لا
يصير بيها شي ..
ولج قوي نفسج كااافي..

بقى يحجي عليه ويكلي فدوة الج وماريد طفل
يكفي احنا سوا ومامقسوملنا..بس انا عبالك
هسه كلولي مات ..وصلت لمرحلة من البجي والانهيار
فقدت وعيي..
صحيت وانا بحضن حيادر ..
من فتحت بوسني بكصتي ويهدأ بيه..مابيج شي
مابيج شي ..
شربتني امينة ماي ..وهو مددني بحضنه..
نامي وارتاحي ..انا تمددت وشيكته حيل وغمضت..
على هالوضع غفيت..

بعد وقت مر ماعرف شكد..بس نوم مزعج واحدام
مخربطة..
كعدت من النوم..فتحت عيوني اباوع..شوية شوية
ركزت..ماكو احد بالغرفة بس
ماما كاعدة يمي ع السرير ..لابسة خاتم التسبيح
وتسبح وصافنة..
باوعتلها هي بسرعة انتبهتلي..

تقربت مني ولزمت خدي..شتحسين ماما
شلون صرتي؟
هزيتلها راسي ماحجيت..
سالتني شلون مات جاوبتها هيج لوحدة وسكتت..
حجت وياي رادت حاولت تقنع بس ابد..
انا فاصلة وبس صافنة..
شوي ودخل حيادر ويا سارة مصعدة صينية
اكل..

حاولو وياي رادوني اكل ماقبلت..كوة دخلت قطعة
تكة بحلكي وشربتني ماما عصير..
بعدها قفلت ماقبل اكل غيرها ..رجعت تمددت
وانا مصفنة..
اسمع ماما تحجي وي حيادر تاخذني وياها..
هو باوعلي انا بقيت صافنة عليه..
اباوع لوجهه والتعب البي..احسه يكلي
لا تروحين..

كلت لماما كم يوم واجي..بقت تحجي وتكلي
ارتاحي ورجعي ..كتلها كم يوم واجي ..اقتنعت
لان ماتكدر تلح عليه..
صاير شكلي مثل جنازة وتحجي..
بقت بيومها يمي للمغرب وراحت ..ماتمنيتها تروح..
وماكدر افارك حيادر لان نفسيته اضرب مني..

راح وصل ماما واجه..انا صعدو يمي البنات وكلوني
شوية ..خابرني بابا والولد وكلي اجي اخذج
كتله كم يوم واجي..
على مااجه حيادر نزلو البنات..
اجه هو طلعلي ملابس واخذني للحمام غسلت..
بطلعتنا لاكتني حنين تعلج ومبتسمة..
حاجاها حيادر بنتر:.ميلي عن الطريق..
صارت ع جهة وخزرتني..

دخلني حيادر للغرفة نشفلي وانطاني ملابسي لبستها..
تمددنا بالفراش..بقى يحجي وياي بهدوء ..
شيهانتي..بنيتي ومريتي ..ماريد زعل بعد ولا بجي..
المكتوب النا صار..وبعد صارت النا عبرة..
نترك هالفترة جسمج يرتاح وتستعيدين قوتج..ومنا
يكمل بيتنا..
وهناك نخلف براحتنا..
انا امينة كالت خاف ذابيلكم شي بالغرفة..
بس مااثق بهالحجي..
وامج هم كلتلها الله الحافظ..ومانحط هيج امور
ببالنا..

اخذي وقتج وارتاحي ورجعي شيهانتي القوية..
وطفل بعد ماكو..مادامنا هنا..
مو مثل المرة الفاتت وعاندتي..هسه بعد مااقبل
حتى لو تربطيني..حجه وكرص خدي..
ماجاوبته شي بس ساكتة..وهو مستمر يشجعني
ويرفع معنوياتي..
بس انا قفلت عليه من كال ماريد طفل هسه..
وهو يحجي نمت..

يوم ثاني كعدت احسن..الم خفيف عندي..
بس نفسيتي كلش..
بقيت خمس ايام هيج..وهو بقى وياي ماطلع للشغل
طول اليوم وياي ..الحليب مالت البقر والزبد يحاول
يوكلني كوة..
تشريب ام عادل كل يوم تسويلي..وهو يوكلني بيده..
بس اكلي قل كلش..
ماما وبابا ثلث مرات يجون يشوفوني..بس مااقبل اروح وياهم..
بس بينتلهم انا احسن..

رغم انا عايشة ع الصامت ..طول اليوم يمكن جملتين
احجي بس..
فضلت كلللش..
بعدها حيادر طلع للشغل..كعدت ويا الصبح
اريد اسويله ريوك ماقبل كال ابقي نايمة..بس كتله
اريد اتحرك..خلاني براحتي..
سويتله ريوك وكعدت ويا بس حليب شربت..
وتوسل بيه اتريك ماقبلت..
خلال هالكم يوم كلشش ضعفت..وجهي اصفر وشفافي
بيض مابيه حياة صار..

ورا ماراح للشغل دخلت للهول..شفت عمي وخالتي
كاعدين..
واستلمتني خالتي..كافي نوم وكافي دلع..
كلنا طرحنا ماسوينا سوايتج وانت ظهرج رخي..
باوعتلها بعصبية..وانا صدك بوقتها جنت شبه مخبلة..
كتلها انت شعليييج؟؟؟
وجعة ابو امي نصي حسسج..
مانصي معليج انت..حجيت بعدائية وصعدت..نظفت
الطابق كله صاير مزبلة..
والدبك بغرفة الخطار واثار الجاي مليص..
رح يصيرله اسبوع مامنظفاته..

اجلف ومادري بنفسي ذبيت حركتي كلها..
صار الفوك يلمع..
نزلت للنطبخ..ام عادل فرحت بيه وتسولف وياي..
بس انا ساكتة لا اخذ ولا انطي..
دخلت حنين مكنفة ردانها ولافة الحجاب جراوية..
ها نزلت الفايخة..ماتجين تساعدينا بالخبز..
خزرتها وماجاوبت..اخذت بيز وطلعت..

كملت التمن وام عادل طبخت المرك وكلت
السمج..
كلت لام عادل ماريد غدا راح اصعد..حاجتني ونصحتني اكلي
ولخاطر صحتج..
كتلها مااشتهي..
صعدت سبحت وتمددت بالفراش..حيادر كال مايجي
الظهر عنده شغل..
استغليتها فرصة وغفيت..
ورا وقت حسيت واحد يندهني..فتحت لكيتها تبارك..

عمة كومي تكول بيبيتي خلصنا غدا تعاي اشتغلي..
اكلج عمة عندج صبغ احمر..
كمت جريت شالي لبسته وانطيتها صبغ كالت اوكفي
اصبغ وارجعه..
كتلها اخذي..
لبست جفوفي وطلعت وقفلت الباب..

نزلت لكيت سارة تلم وياها امها..رحت للمطبخ وريحة
الزفرة قوية كلش..
لعبت نفسي..خليت الشال ع خشمي ولميت الزفر
بعلاكة وذبيته بالحاوية اليمي..
جلفت المواعين وسارة رادت تشطف وياي ماقبلت..
ماريد احد يمي ويحاجيني..اريد ابقى ساكتة..
كملت شغلي وصعدت..

ماما خابرتني كتلها تحسنت ومابيه شي..
بس حنين الحقيرة تخابر امها تكلها صارت بيه
حالة نفسية..هو فعلا اليشوفني يكول هيج
لان جنت اصفن واليباوعلي اخزره اليحاجيني مااحجي..
بس اضم عن ماما وضعي..

ورا ماخلصت مكالمة من ماما كمت رتبت غرفتي
والشي الزايد طلعته اخذ انطي لماما تودي لجمعية خيرية
من قبل نوديلهم ..
كملت غرفتي وصار وقت غروب..
اجه حيادر..
تعبان ووجهه مابي ذرة راحة..
كعد يمي يسولف..

اليوم مااجيت..لن عندي شغل وهم رحت تسوكت..
جر العلاكة وطلع زبيب..جبته الج اكلي ع الريك
وكبل لا تنامين..يعوضج ويرفع دمج..
هزيتله راسي..
تنهد..استغفرالله شيهانة..شبيج كليلي شتردين؟
اوديج لاهلج عمي كومي هسه اخذج..
حجيت بعصبية..اي انت تريد توديني ..تردي تخلص
مني..حتى مااصير حامل بعد..يأست مني
ماكدر اجيب..

كافي يمعودة كافي ..انت نفسيتج تعبانة وطالعة توة
من شدة وجسمج تعبان..
انطي وكت وتالي نخلف شورانا..
واذا تبقى علي انا مقتنع بيج انت وبس..مايهمني
طفل..يمتى مايصير وان ماصار كلها نعمة والحمدلله..
بس انا ارييد..
وانا كتلج هسه ماكو..
ماتقنعيني بأي شكل..صحتج اولى من كلشي..

عافني وكام ..وانا بقيت بمكاني اصفن ومقهورة..
قفلت عليه ومن حاجاني بعدين مااجاوبه..
لحد ماعاط ورزلني ونام..
واستمريت بزعلي..يراضيني وافتح موضوع
الطفل ويعيط ويتعصب..
وبالبيت مااحجي وي احد ابد..انطويت وصرت
ابد مااحجي..
وعزلت نفسي كلش بس شغل اشتغل ..وجسمي يتعب
اكثر لان اكل كللش قللت..

شعري صار خيوط ..خفييف كلش..جابلي غير
شامبو ووصفة طبية بس ماكو فايدة..
الحالة النفسية دمرته..
كمت كصيته قصير كلش..باوعت لروحي بالمراية..
بجيت ..اباوع لملامحي شكد تغيرت بهالفترة القصيرة..
وانا واكفة دخل هو للغرفة..جانت دنيا ليل..

تقرب مني صار بظهري وحضنني..حلو شعرج
لايكلج..
ابتسمت نص ابتسامة..
جرني لحضنه اكثر..باس ركبتي..قشعرت..
دارني عليه ولزم وجهي بايديه..مشتاكلج ..
رجعني ع الميز وهو ياخذ شفتي بشوق..مشتاقتلته
اكثر منه..

نسيت نفسي باحضانه ..ومن فتحت موضوع الطفل رفض..
حاولت وتوسلت بس ماقبل..
تعصبت واريد اتركه ومايقبل يفلتني منايديه..
عضيته بصدرة شلعت لحمه وماقبل يتركني..
اخر شي ابتعد وهو يسب..ضل يسب بيه وبنفسه..
انا كعدت بمكاني وبقيت ابجي..
تركني وطلع للحمام..وانا بقيت ع كعدتي..

لحد ماطلع وانا بنفس مكاني..باوعلي وجر نفس قوي..
تعاي لفراشج لا تكعدين هيج ..
ماجاوبته..
شيهاانة شجاي احجي؟؟؟
بقيت ساكتة..
جرني يريد يوديني للسرير وعتيت ايدي..
كمت اخذتلي ملابس ورحت للحمام..
سبحت وبجيت وارتاحيت وطلعت..

لكيته نايم ولازم راسه..من دخلت وخر ايده..
ادري بي مايريدني اشوفه تعبان حتى لا اضوج..
كملت واجيت تمددت بالفراش..
جرني لحضنه..اريد افلت نفسي ماخلاني..
بقيت بحضنه وانا مغمضة..راسي صدع
ودخت..
لحد ماغفيت..

ومرت كم يوم احنا هيجي نتعارك كل مااجيب سيرة
الطفل..
وكتله ماتتقرب مني اذا ماتقبل اصير حامل..
بس يعاركني ويكلي مو كيفج ومو انت التقررين..
وبعد كل مرة احنا نتعارك وتنتهي بزعلي
ويرجع يراضيني..

بالبيت عزلت نفسي كلش..كمت مااتغدى لان حيادر
مايجي الظهر..
اخلص من جمعتي وياهم..
بس اسوي شغلي واكمله واصعد للغرفة..
صار ع فقدان طفلي شهرين تقريباً..بس انا نفس
الوضع والنفسية ..
وحنين كامت تشمت بيه علني وتضحك..

بيومها الظهر جاي نسوي غدا واجن بنات خالهم
المقيمات عدنا..
كاعدات بالمطبخ ويسولفن..انا مااشارك اصلاً..
سالتني الكبيرة..اكلج شاها ليش ماتكطعين..
شكطع؟
عدج تابعة امبينة روحي ترى تصيرين مثل امينة..
هه..خرافااات..حجيتها وطلعت لان ماريد اكمل
كلامي وياها ولا وي غيرها..

رحت جمعت ملابسي من ورا البيت..كملت
وجبت السلة ودخلت للمطبخ..شفت سعاد
مرت خالهم  الي خطبني ..جانت واكفة وتحجي..
من دخلت سلمت عليه من ورا خشمها..طبعا هي
جيتها كلش قليلة لان تكره خالتي..
بس اليوم حظ الفكر جابها..
بعد ماسلمت عليه كالت ..شنهي جا مارحتي لعارفة
لدكتورة تطيح على علتج..

جاوبتها بنتر..مابيه علة وتحليلي نظيف..
اييي يلا بلكي تكبرين وتحوين فد وحيد عاد..
انتن بنات الدلال بس چرچوب..يركضون وراجن
يفكرون بس بفراشچن..مايفكرون بخلفة وتعب وندارة..
وهسه شتردين؟؟حاجيتها وانا اقترب بعصبية مثل
الشقاوة..
لا لا شريد هيج جاي احجي شريد..
ايي معليج لا تدخلييين..ننننننن..عيبت عليها واخذت
سلتي ودخلت..يعني تصرفاتي صدك خبلة رسمي صرت..

صعدت للغرفة مانزلت لحد ماوقت غسل المواعين..
وطول اليوم ماشفتهم بعد..حتى العشا اكلت كرزات ومانزلت
اكل..
اجه حيادر وانا جنت متلاغية ويا وهم سامع بحجي
مرت خالهم..كلي معليج بيها وهي خبلة..
ماجاوبته سكتت..سولف لوحده وانا بقيت ساكتة
لحد ماغفيت..

يوم ثاني نزلت الصبح  وتريك حيادر وراح ..
اريد اصعد انظف..صاحت خالتي تعاي تعاي..
اجيت يمها وانا احجي معلك..نعم؟
كبل لا تنظفين عجني جم كرصة شعير..
شعجن مااعرف!
كلشي تعرفين..عمي جاوب..لو بس تعرفين لحيادر..
استغفرالله..حيادر بشر مو عجين..
اي امبين ..تحجي خالتي وتفر بحلكها..

واجت وياي واخذتني للمطبخ..
وكالت لام عادل طلعيلها الطحين تعجنه..
وشكد ام عادل توسلت بيها تعجن بيدالي ماقبلت..
كتلها هذا خشن شيعجنه كالت تتعلمين..
ومقبلت بحفوف الا بايدي..زين انا اظافري
طويلة..صح مو كلش بس بيهن طول..

واشوفها صاحت لبت جابر الصغيرة..ركضي
جيبي الكرطافة..
ختجيبلج الكرطافة وكرطفي ظافيرج..عمج
مايستنظفهن..
وانا شعليه واعجن اصلا؟؟مو نغم التعجن؟
اي عجنت بس نريد شعير الي ولعمج..
اي عجني انت الكم..
كتلج انت تعجنين لا اليوم اسويها دم ..واخابر حويدر
واطيح حظه..حجت بعيطة..

واجت البنية جابت المقراضة..اخذتها منها بقهر
وانا اعصابي منها جادحة..
كصيت اظافري من الاصل بحيث حسيتهن ورمن..
اكص ومااحس بنفسي..
وحطتلي مقدار طحين بالمعجانة ووكفت فوك راسي..
يلا عجني واحنا نعلمج..
وحنين واكفة ع جهة وتبتسم والبقية موجودات عدا نهاية..

ذبيت ماي على الطحين واريد المه ماينلم..صار قوي
ومايعجن..
وهي تكلي بايديج الثنين..سدي جفج ودوسي حيل حيل..
ولزمت ايدي وسدتهم قوي كالت دوسي
كل قوتج..
انا بحركة قلب دفعت ايدي اعجن وانگلبت المعجانة
وايدي طكت..
بس طكة شوغت روحي صرخت حيل وانا اباوع
لايدي منظرها يخوف..

للحكاية بقية
بقلم شقراء(قمر كانون)

وانا مالي يلمبي🤣🤣

سمايل يدك على راسه وعيونه تجدح

خية انا بريئة منه هو الحجي روحه خضرا😂