رواية الشيهانة الفصل الخامس والأربعون 45 - بقلم Shaqraa

السلام عليكم

الشيهانة
الجزء الواحد والاربعون

سمعت صوت الجرس ويمكن محمد راح يفتح
لان صوت بابا وحسن قريب جاي يحجون..
ثواني واجه محمد كال لبابا..عمام حيادر اجو..
واختفى صوت بابا والولد..
انا كمت ..دخت شوية لزمت بالحايط ومشيت
للصالة ماشفت احد..
تقربت يم الاستقبال الباب مفتوح..
صار بوجهي عم حيادر وابنه..جريت نفسي
بخجل ورجعت..

رحت للمطبخ لكيت هاجر تحضر الجاي..
شافتني فزت..شكومج لبش ماصحتيلي..
لا زينة بيه امشي..لعد ماما وينها..
جوا دخلت يمهم..
منو الجاي؟
جدي وجدي جاسم وابوي وخوالي ثلاثتهم وعمي حيادر..
كملت صينية الماي واخذتها ودخلت..

كعدت ع الكرسي وانا شبه فاصلة..جسمي تعبان
ومتهالك..
ونفسيتي مدمرة ومهدمة وواصلة مرحلة مريعة..
شوي ورجعت هاجر للمطبخ..
انطتني كلاص شربت  نومي بصرة ..
وكعدت يمي..
شاها حبيبة وجهنا اسود منج..
باوعتلها بتعب بلا مااحجي..
حكج تكرهينا وشماتسوين معذورة..بس انت
طيبة وعاقلة وماتخلين واحد يعم ع غيره..

ترى امي ممرودة عليج وسارة رادت تكلج..
بس خافت لان انت عايشة هناك وشايفة شلون
عايشين وشلون احنا دايسين فوكنا..
باعي ترى جدي هذا طبعه من شفته وشافني..
ليش سارة كلتلج ماكدر اخلي حاجاتي النسائية
بالكنتور..
خوفا من جدي يشوفهن..هو بي سولة خصوصا
اذا البيت فرغ..
يكلبه كلاب بس ينبش..

انت كبل لا تجين هو نابش غرفة حنينة..
ومن حجه عمي بهادر كله انجب تضمون من وراي..
هو يدري ماضامين شي بس هو بي طبع بعد..
وتعاركت ويا حنين وبعد بطل يطب لغرفتهم..
وهم جم مرة عيب عليها يكلي وصخة وريحة
غرفتج عفن..

ومن ذاك اليوم برجعتج من يمنا ولكيتي كنتورج
معفوس..
سولفتلي سارة..من نزل عمي ومهددهم ومحلفهم..
تبارك كايلة شايفته طالع من غرفتكم..
وحنينة الجايفة كالت اي هم شفته عاد هو كايل
بس دورت ..
وعمي حيادر متعارك وياه وهولازم كلبه عود
متخربط..
بس عمي مامهتم كايلة تتعدى على مرتي وحرمتها..
كايلة ادري بالنسوان تضم بهدوم الليل ماتشوفني
نبشت بس ماشفت شي..
ماتشوفين حنينة تكلج يشمشم عود لان كلها ريحتج
معفنة ..

ووكت الصارت السالفة وبعد عمي حيادر تلاغى وي جدي..
وراح جدي رسن لجدي ابو امي واشتكى يمه ..
يكله يريد يطلع ويعوفني بحدي..
بس جدي ابو امي بعد يحب حيادر وربى عدهم ..
مامهتم لحجي جدي رسن ..
خصوصا يعد ماكله عمي حيادر على كلشي..
وهم حاجو جدي بس هو هذا طبعه..
ومن يومها عمي حيادر مغتاض مايحاجي..
بس هيج يصبح ويمسي عليه..

طبعا هي تحجي وانا صافنة عليها..احس استغفلوني
كلهم..
رغم كالت حيادر كلهم مايحجون كدامي لان
مااتحمل ومو زين عليه..
بس كلش كرهتهم..
هي صبت الجاي واخذته جوا..
وانا كمت دخلت جوا..كعدت بالصالة بس جان
الصوت مالتهم مو مفهوم ماكدرت اسمع شي..

ورا شوية اجت عاجر وبيدها يسر..شافني ذب
روحه عليه..
هي ضحكت كالت جان كاعد بحضن عمي حيادر..
ماجاوبتها بس شبكت يسر وبوسته..
لان حاليا مااحب احد ولا اريد احد..
شوية تعديت مرحلة الاكتآب بعد مافقدت
طفلي..بس الصار رجعني لنقطة الصفر..

بقيت متمددة ع القنفة وهاجر يمي تسولف وياي
مارد ولا احجي..
خطية كلساع جايبتلي شي فاكهة لو عصير..
انتظرهم يرحون وطولو كلش هواي..
لحد غفيت بمكاني..
كعدت ع ندهة ماما ..تحجي بهدوء..كومي ماما
تعشي مايصير معدتج فارغة..
ماريد معدتي احسها فايرة..حجيت وانا مغمضة..

حجى بابا..شو كعدي بابا نشوف اذا تحتاجين
ناخذج للمستشفى..
فتحت عيوني وكعدت..هزيت راسي..لاا مايحتاج..
جان كاعد بابا ومحمد وماما بالصالة..
ماسألت عن شي لان جنت كارهة حتى الحجي
ماريد اسمع شي..
بس بابا كال..رجلج سلم عليج وراد يشوفج
كناله نايمة..
رجعت راسي ع القنفة وبقيت اباوع للسقف
ابد ماعلقت ع حجي بابا..

كامت ماما جايت صينية وكعدت تجبرني اكل
وانا معدتي تستغيث من تدخلها لكمة..
كوة وكلتني شوية..
حاجاني محمد كال شنو عاجبج شي ثاني
اجيبلج..
هزيتله راسي لا...
وعفتهم وكمت رجعت لغرفتي..جنت مخنوكة
بدموع وعبرة..
بس نمت بفراشي طلقت سراحهن..
ومنا الم ايدي كاش هاج عليه.:
بقيت مغطية راسي وابجي الى ان غفيت..

يوم ثاني الصبح ورا ماكعدت وماما لحت
اكل بس ماقبلت شربت بس حليب..
جابتلي فوني..زوجج جاي يدك شوفيه..
اخذته خليته ع جهة وماجاوبت..
هي واكفة تركب الغدا..وانا يمها بالمطبخ..
سالتني باستغراب..
ماتردين تعرفين شصار امس؟
تؤ..
لازم تعرفين ماما..
وشريد يصير يعني ؟؟
اجو عمام رجلج واخو..اعتذرو من عدنا ورادو
يشوفوج..بس ابوج كلهم ضربت ابرة ونامت
مارادج تطلعين او تضوجين..

عمهم هواي تعذر..وحسب كلامهم ابوهم موطبيعي..
يكول خااتج من قبل تسوي اعمال شعوذة..
وهو اخر تخبل..تدرين بيه انا ماعترف بهالامور رغم
هو موجود..
بس الله اليحفظنا..
يعني عمو مسحور طلع عشتو..
اي يكوا عمج..كال ماجان هيج هسه كلش.. 

وهسه زايد..اكثر..منا العمر اله حوبة ويمكن خرف
من وكت..
ومنا الشعوذة وقلة الايمان..
وهو تعرف بعد فخذ واله سمعته..صح هو شايل
ايده من كلشي..
انا وولده كايمين بالواجب..بس يبقى اسمه بعد..
وخجلانين من سوايته ونستحي نكعد عد فراشكم حتى..
بس ابوج رغم الحجي..

نزل عليهم نزلة مرتيية..
كلهم انطيتها الكم تضوي مثل الثريا..
تجيني مكسورة والاصابع مورمة والوجه
اصفر..
ليش حيادر انت مو دكيت صدرك وكلت مايمسها شر..
وحيادر هم كام يتعذر ..بس ابوج
كلش قفل عليهم..

كام عم جد هاجر باس راسه وكله حقك
بركبتنا ..وبتك ماتنضام بعد..
اعتبره شدة وعدت..واحنا حاضرين
بكلشي..
بس بعد ابوج استحي من شافهم خجلانين من الصار..
تراضو بينهم وكالو نساعد حيادر يكمل بيته..
وتجهيز شنو يعجبها نجزه هدية من عدنا..
اممم زين ماصار شي جديد..
شلون ماما..تدرين شكد جبيرة اجو واعتذرو من جبيرهم
لصغيرهم.
باوعتلها ماحجيت..وكمت رحت لغرفتي..

يوم ثاني تاخرت بالكعدة..
اجتلي هاجر جايبة فونها..
ااا شاها عمي يريدج ع الخط..
اطيتها ظهر وغطيت راسي بلا ماارد ...
هي خلت وراحت.

ورا شوية اجتني ماما للغرفة..
رجلج موجود كومي شوفي..
حجيت وانا مغطية راسي..مااريد..
لج ماما كومي عيب الولد خابر ماجاوبتي
وهسه اجه يتطمن عليج..
مااااا..
اجت تقربت يمي وجرت الغطة..
لا تصيرين جبانة وتتهربين..كومي واجهي
واحجو وتفاهمو..ليش تبقين بهيج حالة وثنينكم
ظالمين بعض..
غلست ماجاوبت..

هي راحت تريد تطلع وحجت..كومي سمعي
من رجلج وتفهاهي ويا والتردين تسوي سوي احنا
وياج وبظهرج..
كمت وانا افكر ليش ماروح اتعارك ويا واكله
اتركني مو احسن ..
كمت اريد اروح يمه..رجعت باوعت لروحي بالمراية
شعري مرفوع وهو اصلا قصير..
بجامتي ستن ازرق وبي نجوم ولا اهتميت لمظهري..

رحت للاستقبال شفت محمد كاعد يم حيادر..
بس شافني اجيت كام طلع..
بقيت واكفة بالباب..هو كام واجه يمي قريب..
باوعتله بزعل..
جر ايدي يريد يلزمها نترت ايده..
استغفرالله شيهانة وتااالي..شنهي ماناوية تعوفين
الزعل ونتفاهم..
ماريد اتفاهم..
بس انا اريد..
وانااا ماريد مو غصب ..حجيت وانا خارزته..

يعني ماتكعدين يمي حتى احجيلج؟؟
لا اريد اروح انام..
يلا براحتج نحجي غير وكت..بس هدومج
نفهيها ..زحمة كدام اخوانج هيج ..
شنونفهيها؟
يعني عرضيها..ولا تكليلي هذا عريض..
هذا حرير ويلزك..وانت مرة متزوجة وجسمج
انثوي..انتبهي زين..

ليش لازم تطلعني غلطانة؟؟حجيت وانا
فاتحة عيوني بغضب..
استغفرالله..ماكتلج غلطانة بس انتبهي..
شلونج هسه؟
يعني...
كعدي خليني احاجيج..
مااكعد ..
براحتج ميخالف..
ليش هيج حاقدك عليه؟
حجيت بخنكة..لان اختبرت صبري هوااي..
واستغفلتني..
مااستغفلتج..بس نفسيتج جانت باقية على شعره
وتطكين..ماردت تعرفين وتتاذين..لان
اكيد تظنين سوء..رغم تعرفين ابوي عاشرتي
وشفتي..صح عنده طباع غلط بس مايطلع
منه شي حرام..

اي ليش مافهمتني..؟
جنت رايد افهمج من تستقر نفسيتج..بس وين..
احنا نطلع من كابوس ندخل بالثاني..
مو تبرير هذا..
ماجاي ابرر شي مزيف..جاي احجي
واقعي..
وادري انت صبرتي وياي صبر ينضرب
بي المثل..
وسكوتج شكد خلالي هيبة وشكد مصدوم بيج
العدو والصديق..

اليحبوني يكولون صدك انت حصلت نعمة..مدللة
وجميلة وعاقلة وتصبر..
وعذالي يستغربون شلون تتحملين وانت بت ذاك الدلال
واجيتي عشتي وي حيادر ببيئة منغلقة..تدرين جانو
مراهنين عليج شهر ماتظلين..
نسوانه كلها تحجي..هسه تجي المدلله وتشرد من اول شهر..
بس وكفتج وياي ثبتت العكس..
اب حنت اصبر لخاطرك..ومستعدة اصبر عمر..
بس لا ترجعني لذاك البيت عفية..

مارجعج هواي بس ع مايكمل بيتنا..
ماررريد ..حجيت بانزعاج وقلق..
ماروح..حتى انت ماريدك ماريد..وعفته
وطلعت..
كل همه يرجعني هناك ..مايهم شنو احس شيصير
بية..
ورا مارجع للبيت..راسلني وخابر
ماجاوبته..

وبقيت ع هالحال شهرين ونص..
صرت ابد مااحجي..وحيادر كل وقت
يدك ويريد يسمع صوتي وانا قافلة..
يجي للبيت ومااقبل اطلع احاجي..

بقى كل يوم بالضبط يجي يشوفني..يجيب
مسواك ومصرف..
ويحاول يحجي وياي بس انا قافلة..
الى ان بيوم اجه الظهر قبل الغدا..جان جايب حليب
ع مود ايدي تطيب بسرعة كل يوم بابا
يغصبني ع الحليب مالت البقر وفعلا طابت بسرعة..
بيومها حيادر اجه الظهر انطاه لماما وكلها
صيحي شاها اريد اشوفها واروح..جان بالمطبخ
ماقابل يدخل..

اجت ماما حاجتني وكالت روحيله عيب ينتظر..
انا هنا متحسنة وخبالاتي خفت كلش..يعني فترة
الازمة عدت تقريباً..
رحت للمطبخ هو جان واكف..
هلو..
رفع راسه وابتسم بتعب..وجهه كلش ضعفان
وملامحه متعبة..
هلا بعافيتي ..جنج اليوم احسن؟
اممم يعني..من حجيتها باوعلي بحسرة..
لان احنا متواعدين جنت كل مااكول اممم يبوسني..

تذكرت الشغلة بسرعة درت نظري..
هو تنهد حيل..وتقرب يمي..باوع بحسرة
وانطاني علاكة ..
شنو هذا؟
فتحي وانت تعرفين..يلا انا رايح محتاجة شي؟
شكراً..
الله يسلمج..صاح بصوت عالي..في امان الله
وطلع..
بقت نظراتي وراه لحد ماطلع.
شكد احسه تعبان ومنهك وادري ابتعادي عنه
دمره ..بس يكفي التدمر من ايامي..

رجعت جوا وانا افتح العلاكة..لكيت علبة
ذهب..
فتحتها قراصات ذهب بس مو قراصاتي..
ناعمة ورفيعة وبيها من فوك طير ناعم ..
خليتها بشعري وانا اباوع لمراية المدخل..شكلها كلش
نازك..
بس ليش جاب جديدات..مو جابلي قبل
لو هذا عربون صلح..

اجت ماما شافتهم كلش عجبوها..كالت هو
جاب ذهبج كله وانطانياه..كلي تاكدي منه
خف ناقصه شي..بس من فتحته
شفت القراصات
وحدة منهم معووجة ..
شافها واخذها وياه ..الظاهر مبدلهم..
امم اي اتوقع..
الله يهديكم ويحفظكم..حجت وراحت للمطبخ..

انا دخلت جوا ..اخذت الفون شفته داز
رسائل صوتية..
فتحتهم..
مشتاقلج مريتي وشريكة روحي..اليوم من شفتج
وجهج متفح وعيونج تلم ردتلي الروح..
ذني القراصات جبتهن بدل القديمات..
لان حنين ال..من طيحت حظها مطلعة
حركتها بيهن وعاوجة وحدة والثانية حاكتها
بالكاع..
بدلتهن الج بموديل احلى ..

شيهانة رجعيلي مثل كبل..ترى وداعتج
شح الامل بيه كلش..
عايش بغربة روح وغربة احساس وانت تعرفبن
حالي ويوصلج الحجي..
سمعت كلامه كله..دمعت عيوني ورجف قلبي..
بس ماريد اضعف..ماريد حتى لا يرحعني
هناك كلشي اتوقع بعد..
دزيتله ..شكرا حلوات هواي..
بسرعة ردلي..بس؟
امممم..
بعد ماجاوبني..

ومر الوقت وصحتي كلش
تحسنت ..ايدي صارت تمام..لان اكل وفيتامين
ولحوم وحليب..بحيث رجعت صحتي كلش زينة..
رجعت اسولف وي اهلي شوية ..اكعد يمهم صح
مو هواي بس فرق عن قبل..
بيومها حيادر اجه العصر..صاحلي محمد..
رحت يمه للاستقبال..كاعد ويفرك بسبحته
وصافن..
من دخلت كام واحسه هالمرة كلش متضايق...
بسرعة اجد سد الباب وجرني لحضنه..

بقيت متصنمة مااتحرك..بس جسمي خذلني
وقلبي بقى يرفرف..
رجفة سرت بعروكي وانا اشوفه شابكني حيل
ومثل اليرتاح من بعد تعب طًويل..
شوية وسحبت نفسي من حضنه وهو رحع كعد..
شلونج؟
الحمدلله..
دومج..ان البيت راح اكمل انشالله..
بقت اشياء بسيطة ..

باوعتله شوي صفنت بملامحه..صايره عنده
هالات واضحة..وجهه ضعفان كلش..
بشرته صايرة سمرة وحيل ضعفان..
شافني صافنة بي ابتسم..هنيالي..
درت نظري عنه..
كام وكعد يمي وجرني قريب منه..
يمتى تروح السوادين..
مامخبلة انا..
جا هذا شيسمونه؟صارلي شهرين بس اريد احصلج
لو احجي ىياج كلمة ماكو..
يعني قصدك انا مخبلة..
لا مو جديد خبالج من ايام الطالبة الوكحة..

ضحكت وماريد ابينله..جر ايدي وباسها..
ليش قاسية وياي هلكد؟
لانك مخليني اخر اهتمامك..
حجيتلج كلشي وعشتي وياي وشفتي مابيدي شي..
اي مو معناه تسعدهم ع حسابي..
بعد معليج بيهم بيتنا راح يكمل فد شهر ونص تلكينه
كامل..

ومنو كلك ارجع وياك؟
يعني ماترديني؟
افكر..جرني كلش طحت بحضنه..هو كاعد وانا صرت
نايمة ع النص بحضنه..مااخليج
تفكرين اخذج غصب..
تدري بيه مااخضع..
ههه اي غير شيهانتي الماتلين..حجه وهو يحط
ايده جوا ركبتي ويرفعها يقربها من وجهه..
اندك الباب وانفتح..دخلت ماما..

للحكاية بقية
بقلم شقراء(قمر كانون)

الشعب كله يهدد بيه من امس🤢

كلش عجبني نذرج راح افكر بالموضوع😹