رواية الشيهانة الفصل السادس والأربعون 46 - بقلم Shaqraa

مساء الورد

الشيهانة
الجزء الثاني والاربعون

انفتح الباب فزينا ثنينا وانا كمزت من حضنه..
ماما دخلت وباوعتلي بنظرات ملامة..
حيادر بقى ع كعدته مااهتم ولا ارتبك مثلي.
هي باوعتلي وحجت..تعاي شوية شاها..
كمت وانا منحرجة..
هي طلعت وطلعت وراها..

راحت للمطبخ وانا امشي وراها وساكتة وخجلانة..
صح زوجي هو بس موقف مخجل..
دخلت وشالت الصينية انطتها الي..
باوعتلي وحجت بصوت ناصي..شوي انتبهو لتصرفاتكم
لا يدخل عليكم اخوج لو ابوج..
ايي اوكي..
وديها لرجلج وتفاهمو لا تنسون نفسكم..
هزيت راسي واخذت الصينية ودخلت..

وديتها للاستقبال واول مادخلت غمزلي..
غمضت بضحكة وخليت الصينية وكعدت..
هاا بس لا دخلج تحقيق المهيب..
غطيت وجهي بايديه..شكد عيب..لا تتقرب يمي بعد..
جرني وحط ايده ورا ظهري وقربني اله..
شكو هيدي واستجني..ماقربلها..ولج كلبي انفت
لو عنده لسان جان صاح كااافي..

خو ماحجت شي امج؟
لا بس كالت عيب خاف احد يدخل عليكم..
هو نصه صوته وكام يحجي همس..
تصدكين حتى مافكرت بسالفة واحد يدخل لو يشوفنا..
ماطل صبر بعد شيهانة كلش صرت وشالة..
لا اكل عدل  لا نوم كافي لا راحة ضكت..
تالي الليل ارجع للبيت الف راسي وانام..
اي كالت امينة..
اي خطية من خابرتج بالبداية ومااجاوبين
كامت تستحي تخابر تكول خليها ترتاح نفسيتها
رويحتا تعبانة..
اي كالت من خابرتني واعتذرت الها عيب خطية..

اي مو جنتي مخبلة وهسه عقلتي..
وبلكي تعقلبن اكثر وترجعين وياي..
ردت اوخر من حضنه عصرني اكثر..لا تكومين
مغصبتج على شي..كلت بلكي..
يعني تريدني ارجع لنفس المكان الي بي كلها تكرهني؟؟
لا تطلعين من غرفتج ابد..
انا اجيبلج الاكل جاهز اعتبري روحج كاعدة
بفندق..

وهم ع اساس رح يعوفوني بحالي؟
اصلا لوبيدهم يجون لهنا لبيتنا وهم يأذوني..
شيهانة ليش هالخوف كله..
جريت نفسه من حضنه وكعدت عدل..
حاجيته وانا اباوعله بقهر..هذا مو خوووف..
بس انا مااعرف اعيش وي انسان حاقد لدرجة
يستسهل موتي..

انا مااحجيلك كلشي ومو خوف منهم ولا ادعي
المثالية..
بس لان احبك وماريد من تجي تعبان ازيد تعبك واقهرك..
بس هم مايتعاشرون وماجاي اتهمهم هذا واقع..
واحد حاقد ع الثاني واحد ينهش الثاني
والكل تحسه مضغوط وباقل حجاية مني ينفجر..
انا مو قليلة لسان ولا فاهية..بس لان احبك صبرت وواجهت
وتحملت وماتمللت..
شغلي جنت اسوي واسوي زايد..حاسنتلهم
كلهم ومااذيت احد..

بس هم مثل مجموعة اسود ودخلت بينهم غنمة..
يحتارون منين وشلون يخلصون عليها..
يعني خالتي كل يوم بضبط كل يوم
وما ابالغ ولا اكذب..اذا ماترزلني تبسمرني..
كدامي تتلوك لحنين لان تخاف منها..وانا الي مامأذيتها
تحتار بأذيتي وتتفنن..
نهاية الي ماعندي اي عداوة وياها مستعدة تموت
وماتشوفني..
نزلت بتها تجيبلي ماي وانا جنت بوضع يصعب
ع الكافر ..تكتل بتها وتمنعها تصعدلي..

والادهى من هذا كله حنين الي طلعت كابتة حقد
وغل من سنييين طويلة..
وزاد حقدها بزواجي منك..لان تعتبرني انافسها بنفس
البيت ..
الكل هناك فاهم الحياة عبارة عن حرب ضد عدو
كافر كاسر يستحق الموت بلا تردد..
وكل واحد غريب لو قريب من اهلكم يجي يغثني
لو يحجي بظهري ويروح..
عدا عمامك ماشفت منهم بس الخير..وحتى من اجو
ماما حجتلي شكد اعتذرو وشكد مستحين..

انا طول مااحجي هو يباوعلي ويسمع باهتمام..
من سكتت تنهد وكام ..
ماكلتي الا الصح..الله يسهل ويصلح الحال..
رايح انا محتاجة شي..
تقربت يمه حضنه وخلي ايدي ورا بطنه
وجريته..ضجت ؟
حط ايده ورا ظهري وقربني اله اكثر..
لا هذا حگ والحگ مايزعل..
بس وعيونج تعبت ورايدج يمي..

منا شوكي يدك براسي ومنا وحشة الغرفة ماتنحمل
وحجي الشمات هذا خلي وسكتي..
بس كله يهون اهم شي راحتج..انا ورطتج من البداية
ولازم اتحمل اليجرالي..
لا تكول هيج..تدري احبك واقبل اعيش
وياك بأي مكان..بس هم ماتقبل اتأذى..
لا اهم شي راحتج..
يلا خليني انا اروح واخابرج بعدين بالليل..
اوك حبيبي..رفعت نفسي وتقربت لشفته بسته
خفيف وابتعدت بسرعة..
ابتسملي وودعني وراح..

رجعت لغرفتي وكت غروب..كعدت اصلي
وادعي وانا كلي امل بربي يغير الحال..
مقهورة عليه وماكدر اارجع وياه ..
صح اليصير كله ماله ذنب بي..بس هم
انا مالي ذنب..
كملت صلاة وطلعت يمهم بالصالة..

اخذت يسر الاعبه وماما وبابا كاعدين بس
سكوت تام..
شوية ونزل محمد مبدل ويريد يطلع..
انا طالع وي حيادر محتاجين شي؟
لا سلامتك ماما..
باوعلي مبتسم تردين شي مني من رجلج؟
اي حلويات اشياءات جيبو بطريقكم..
هههههه تدلل ام بطن..يلا انا طالع..
الله يحرسك..

حجتها ماما وهي تباوعله يطلع..
تنهدت وحاجت بابا..
الى متى يبقى هيج؟مو تدك بالثلاثين والعمر
يمشي..
انت كلتيها يعني مو صغير وواحد ينصحه..
لا ماانصح بعد انا كافي..انصح منا تنمسح
نصيحتي منا..
اريد اكعده واحاجي..اشوف سبب رفضه لانفال
والخلاف بينهم..
ينحل نتدخل ونحله..ماينحل اخطبله وخل يتزوج
كافي عاد..

يعني جابها سنين كلها ينتظرها ومعتكف لخاطرها
وهسه من خطبها ووصلت للحلك افترقو..
شكلها مامقسومة اله وتتعبه..كافي الشافه
منها..
بقت تحجي وبابا يكلها هو مو صغير ومن هالحجي
بس ماما من تقفل بعد ماتتحاجى..

ومرت كم يوم حيادر يجي العصر ..
ابقى يمه بالاستقبال نسولف ونحجي ونتشاقى
واذا ماما رادت تجي للاستقبال لان مرات تجي تسلم
عل حيادر..
هاجر تدزلنا رسالة ونكعد عقال وهادئين..
وبالليل نتخابر فيديو.
بس حجينا عادي..

بيوم خابرني بالليل..جان توه طالع من الحمام
وبس لاف الخاولي ع خصره..
كعد وجكارته بحلكه وجاي يعدل الفون حتى يباوع
عدل..
قربه للشاشة وتفاصيله لعبت باعصابي..
اشتاقيتله كلش واباوع لسريري ومكاني الفارغ..
صفنت بقهر وتمنيت وضعنا غير ونا هسه وي زوجي..

هو عدل وضعه وثتبت الفون وحاجاني..
ليش صافنة شيهانة..
برطمت ورفعت اكتافي بحيرة..
لا تبرطمين وعيونج غادي جمر وين اولي
ومرتيتي بعيدة..
رفعت راسي وعضيت شفتي بتوتر..
هو كعد لحيله وحاجاني بهمس..

شيهانتي..شو باعيلي هنا..
درت نظري اله وانا اباوعله بشوق..
مشتاكتلي؟
بهتت نظراتي وانا اباوعله..
ضحك بمكر وباوعلي بنظرات اويلي منها..
لا تباوع هيج..
بقى مستمر يباوع ومبتسم..تدرين شنو بدي
هسه؟
شنوو..
اجي وبهالليل واروي شوكي وشوكج..

اي تعال لعد شنو منتظر..
ههههههه ترى ماانكض انا تدرين بيه..
بس زحمة من ابوج واخوانج..يشوفوني جاي
بهالليل ..مالها بس تفسير واحد..
يكولون فاض شوكه وتبده وماكدر يحمل بعد..
ههه لا اذا هم هيج يكولون ماما اصلا ماتخليهم
يفتحولك الباب..
ايي شكو عليها مريعة كلبها وي ابوج وانا ظال
عيني تشوفج وكلبي يتلوع ..
وبقينا نحجي باشواقنا وواحد يكمل للثاني شلون
يعاني ..

يوم ثاني خابرني كال مااكدر اجي ..رايح
اتسوك للبيت ..
الفترة الفاتت هملته وهم جابر تسوك وجايب
اشياء قليلة وماخذ الباقي رغم انطيته فلوس
مال مسواك شهر كامل..
هم طبيعتهم يتسوكون كل شهر..يعني حيادر
اليتسوك..ويجيب كلشي من مواد غذائية
لمنظفات لحوم وكلشي يحتاجه البيت ..
بس الاشباء البسيطة وجزء من المخصر نشتري
باستمرار..
واكثر من مرة يوصون جابر ويجيب شي قليل وياخذ
بقية الفلوس..

ورا ماخابرني طلعت يم ماما كتلها مشتهية كيكة..
واجت وياي للمطبخ سويناها سوا..
وكعدت الحس بالباقي بالطاسة..اندك الجرس..
باوعنا للكامير شفنا حنين ومرت عمي وهند..
باوعتلي ماما..شوف الصلافة راح تموتني هالشيطانة..
تروحلج فدوة..خليها تجي هسه تلكيها شمتانة
عود تريد تقهرني اعرف سوالفها..
اي تصرفي طبيعي حسسها مرتاحة ولا يبين
عليج شيي..

راحت ماما تفتح وانا ركضت للغرفة..
اخذت القراصات وقلبت شعري صفح ورتبتهم
ثنينهم سوا صار كلش حلو..
رجعت ركض للمطبخ اخذ طاستي اكملها..
وتوني لازمتها وفاتو هم ووراهم ماما
باوعتلي بابتسامة..

سلمو عليه مرت عمي وهند هن من اجيت لهسه
اجولي مرتين تطمنو عليه وبس..
حنين تقربت تريد تبوسني..لطخت ايدي كيك
وخليت ايدي ورا ظهرها عود شبكتني تسلم
علي الحنونة ..
هي وخرت وعينها لشعري كلساع تحجي وتباوع لشعري..
دخلتهم ماما جوا وانا بقيت كملت وغسلت ورحت
يمهم..

حجت مرت عمي بضحكة..بعدج تحبين اليبقى
من الكيك..
ايي كلش احبه ..
حجت حنين..ايي كلنا نحبه ليش اكو وحدة
ماتحبه..
حاجتها ماما..لسانج صاير فالت حنونة ..
ابتسمت بالجذب وسكتت..

بقو شوية يمنا وتسال شوكت ترجعين
وليش ماترجعين..
ماما ردتها قبل لا انا احجي..من ترتاح نفسيتها
ترجع ..يجوز اليوم يجوز بعد شهر..
رجلها قابل وكلها اهم شي راحتج..
امم هو هم مايحس بفرق وهي بعيدة لان يدخل تالي
الليل..
جاوبتها انا..اي طول اليوم يمي هنا..
هي دخنت بعد مانطقت..

وامها تخزر بيها لان اسلوبها واضح
جاية تريد تغثني مو اكثر..
وماكدرت تجي الا من تحسنت صحتي..لان
لو جاية الايام الفاتت وانا جنت خبلة وهي غاثتني
جان ماما علكتها بباب البيت..

هي ماحاجية لاهلها الصار من اجت ماما
بيوم المشكلة وكتلتها..
لان من اجت شافتني مرت عمي كالت حنين سولف
شلون متعاركين وياي ومن انكسرت ايدي
بس ماكايلة لامها ماما كتلتها وهلست شعراتها..

وي المغرب طلعو ورادت ماما تلزمهم
ع العشا..
بس كالت بهادر جايلي بالطريق لازم اروح..
طلعو وماما طلعت وراهم..وشوية
ورجعت جوا..
اخذت ملح وتفره ع راسي وتحسب وتالي
حمت البليته وخلته عليها..
الله يكفينا شرها هالحاقدة..
تولي ماما ماحاسبتها موجودة..
واحنا نحجي اندك الجرس..

باوعت حيادر اجه..طفرت ركض للباب
عدلت شعري وابستمت وفتحت الباب وصرت وراه..
الله بالخير..
هلا حبيبي ادخل..
فتح الباب ودخل مد راسه عليه وابتسم..
الله يساعدك..
يساعد بختج..حجه وهو ينطيني علاكة وبقية
العلاكات ماخلاني اشيلهن هواي..
تعال تفضل ..خوش مفاجئة تجنن..
اي شفت روحي خلصت من وكت..
وصلت وليد والمسواك ذبيته بالبيت واجيتج..

دخل للمطبخ وانطيته ماي..كعد وعيونه تتلفت..
وينها امج..
جوا يجوز دخلت تلبس حجاب لان جنا انا
وياها هنا وشفتك واجيتلك بسرعة..
بعد روحي ..شطالعة جنج بربينة..
ههه احبك من تكلي هيج..
لن انت هيج ترفة وكل الطعم بيج..
عضيت شفتي وانا التفت وراي..

ههه محد شبيج عيني ع الباب..
تقربت كعدت يمه..شخبار البيت..
كملنا الارضيات ماضل شي..
مااقتنعتي تجين تشوفينه؟
اممم اي وهم نشوف صبغ ؟
لا تكولين امممم اشتعلوووو ..
ههه بعد مااكول..
اي عفية ..هسه تجين وياي تشوفينه؟
شوكت؟
هسه مدام ليل احسن ..

اوكي اشوف ماما واجي..
كمت من يمه اريد ادخل..
شيهانة..
نعم؟
انطيها خبر مو تاخذين اذن..
وانا انتظرج برا..
ليش ابقى كاعد خاف اتاخر..
خوش رايح للاستقبال محد مو؟
لا محد ..

هو راح وانا دخلت جوا..ماما جانت
بغرفتها تصلي ..
وبابا يصلي كدامها..
بقيت واكفة انتظرتهم يخلصون..
ورا ماخلصو حجيت بخجل..
ااا حيادر كال نروح نشوف البيت وهم نطلع
نختار اصباغ للبيت..
جاوب بابا ..الله يسهل عليكم بابا ..صوري
النا حتى نشوف مو تنسين..
ايي اكييد اصوره..

هو كام كال اطلع اسلم عليه..وينه
بالاستقبال؟
اي بابا يجوز راح يصلي..
طلع بابا ومام اشرتلي انتظر..
من طلع اجت يمي..
دربالج ع روحج مو تضعفين وترجعين
ويا هناك بحجة رضيتي ومابقى
شي لبيتج..
لا ماما شلون ارجع ..اصلا مو كلش قريب
عليهم البيت..
يلا خير انشالله..حجت وهي مامرتاحة..

انا طلعت ع السريع لبست اسرع
عباية عندي تنسد من كدام..
وكلشي بسرعة مكياج وشال واخذت
جنطتي وطلعت ركض..
ماما بالمطبخ باوعتلي ..تعشو وروحو مو احسن؟
لا هو كال بسرعة نروح ونجي لان تعبان ويريد
يروح للبيت..
يلا دربالكم من الطريق..
ايي ماما..

رحت للاستقبال جان كاعد هو وبابا..
بس شافني كام وبابا كام ويا..
ترخصنا وطلعنا..
اول ماصعدنا بالسيارة..جر نفس عميق وحجه
بهدوء..
احس كلبي كام يعثر من كد مافرحان وجايلج
ركض..
جر ايدي حطها بيده ويمسح عليها بحنية..
تخسى الدنيا ويبلى العالم كله بلاج..شني
عيشتي انا بلة؟

ماانحرم منك حبيبي ..احنا لبعض دوم..
جا غير انت مخاوية النفس..
طوايفي وبعد طوايفي وهلي..
كلها فداج..
بقى طول الطريق لازم ايدي ويسولف
وياي..
ومن وصلنا للمنطقة..
احساسي تعقد وماعرف شنو اوصفه..
المكان العشت بي وي حيادر احبه..بس
ذاك البيت ماودي ادخله..

وصلنا للبيت مالتنا..جان ببداية فرع
ومكانه حلو..
من برا شكله كبير..فتح الباب ودخلنا..
شنو احساسج من شفتي ارتاحيتي؟؟
اي حبيبي شكله مريح مايقمت ويبين من برا
كبير..
اي تصميمه راح يعجبج كلش..

فتح الباب الجوا ودخلنا ..واخذني يشوفني
المطبخ الصالة وكل مكان بي..
اخر شي افترينا كله ورجعنا للغرفة مالتنا..
جان اكو فراش بالارض..
كعدنا ..هو باوعلي بابتسامة..توني انتبهت للغرفة
حلوة هيج..
شلوون حجيت ببلاهة..
غير بيها شيهانة واريد اصيدها..حجه وهو يقترب
مني..

دفعني ونمت ع الفراش وهو كدامي..
احتار منين ابدي وشلون اهدج بعدين..
ذبلت عيوني وانا احجي..ماريد تتركني..
غمضت عيوني ووانا احس شفافه تعانق
شفافي بشوك وحرمان ولهفة ماتنوصف..
استسلمت بكل ارادتي وانا استقبل نوبات عشقه
المجنونة وازيد وياها جنون ..

لا هو يكتفي مني ولا انا اسمح لنفسي تفكر تكتفي..
من بعد حروب السلام الدارت بينا وومانعرف شوكت
تبدي حرب تلحقها اخرى..
انتهى بينا المطاف حاضنين بعض ونهمس..
فززنا صوت الفون..
انتبهت اله ماما تخابر..

كعدت وحاولت استجمع قواي..
عدلت نبرة صوتي وجاوبتها..
هلو ماما..
ها ماما ساعة ١١ طولتو بالنا يمكم..
اي هسه شوية هسه نجي..
شاها ..
ايي اي ماما ..
اااخ ياماما ..ديلا دربالكم من الطريق..
اوكي..
سديته منها وكمت..
حبيبي يلا نرجع تاخرنا ..
خلينا الصبح ارجعج..

للحكاية بقية
بقلم شقراء(قمر كانون)

اي عفية الگيتر مالتي هم وحتى من اخليه بشعري وانام الكاه ضايع تكول بي جني 🤔