رواية الشيهانة الفصل الرابع والأربعون 44 - بقلم Shaqraa

السلام عليكم

الشيهانة
الجزء الاربعون

قبل لا تكمل كلامها حنين انهدت بيها خالتي..
وكامت تصيح..
عاب حلكج بت الحرام تتهمين عمج ولج..
وانا كلت اكيد تتبلى لان الجهال
هم فاتحين الكنتور..
بس ماما سوت الدرج طفرتين ..وصعدتلها
مالحكت تشرد ..ماما دفعت نغم حيل..
وضربتها ع حلكها حيل وفركته بيدها وذيج
تريد تقاوم ماتكدر..

باوعتلها بخزرة وعيطة..
لساااانج اكصة اذا جبتي شرفها بشي..
ولج انت زبالة ماتسوين فلس بسوك البنات
ياناكرة ..
هالحجي ذيج تدفع بماما وماما خانكتها..وتريد
تحجي بس حجيها مامفهوم..
تالي دفعتها وطاحت ع الحايط..كامت ركض
وقبل لا تروح لغرفتها..
كالت لماما..ماامجذبة وروحي سالي البيت
كله يدري بعمي..
حجت وركضت للغرفة..

اباوع ماما وجهها تغير..صدكت بحجي حنين
عبالها صادقة..
بس ماحجت اي شي ..
ونزلت وسندتني ومشينا..قبل لا نطلع التفتت الهم
وحجت بزعل..
حسبنا الله ونعم الوكيل ولا تصدكون نسكت ع الصار..
واخذتني وطلعنا..بالحديقة جانو عادل ووليد واكفين..
ماما صاحت لوليد..
اجه يمها مدنك ويحجي ..امريني يمة..
مايأمر عليك ظالم..صيح لحيادر اذا تكدر..
صار صار..راح بسرعة دخل للديوان..

وانا منتجية ع الشجرة وفاتحة عيوني كوة..
تعبانة كلش..
ماما واكفة ع اعصابها..
اجه حيادر من الديوان..مو باوعت بوجهه ولا
ردت اشوف منه رد فعل..
تقرب يمنا..ليش واكفين هنا ماما كالت..اريدك بحجايتين..
اي اي تفضلي..حجه وهو يمشي للديوانية..

دخل ودخلنا ورا انا وماما..
هو بقى واكف وماما واكفة..بس انا كعدت لان مابيه حيل..
واشوف ماما وجهها محتقن كلش..صفنت شوية
وحجت..
حيادر شوف..الصار لبتب كله كوم والحجاية
السمعتها كلها بكوم..
ترى شعر راسي وكف وماردت افرح حنين..
هسه فهمني السمعته..

شنو صار خيرانشالله؟؟
ابوك لاعب بملابس شاها؟؟؟
انا حنت اباوعله ومن حجت ماما رفع راسه وتنهد
بعصبىة..
قبل لا ينطق ماما حجت باعصاب...
يصيير خير..
بس يجون ابوها واخوانها اخليهم يتفاهمون وياكم..
كومي شاها..

حجه حيادر وهو كوة ينطق..يمه حكج بالتسوينه..
بس بالاول سمعي مني..
شسمع؟؟؟؟؟؟ابوك يفتش بملابس بتي؟شتريدني
اسمع منكم بعد..
مالي كل حجي وياكم..ابوها راح يصير حجية وي
شيكم الجبير..
كولي ياالله يمه مو هيج السالفة:.
احنا اهل ومايصير هالشكل..

دخيل الله ودخيل اسمه..ترى لحد هسه متحملة..
راسي ماجاي يتحمل سالفة ابوك..وتريدني اسكت؟؟؟؟؟
بمه ترى هي مرتي..وانا احرص شخص عليها..
ماامبين ..لو صدك جان بعدتها عن اهلك لا وتدري
ابوك يلعب بملابسها..ولكم وين صايرة وييييين؟؟؟
ماخفت عليها منه؟؟؟

يمه سمعيني عدل..سواية ابوي من دريت بيها
لهسه انا مااحجي ويا..
رغم ادري بي يدور من فضوله..البيت كله
عده مفاتيحه ويدخل للغرف..بس غرفتي
انا شايل مفتاحها الاحتياط..وابوي رجال فضولي
وبعد جبير بالعمر..
وهو بي طبع ماكو شي مضموم عنه..
لا عبالج بس غرفتنا وكنتورنا..لا البيت كله ..

وهم يعرفون طبعه ونكول هذا اب وباجر
نتحاسب عليه...مانكدر نتجاوز عليه..نشوفه يدور
وويحجي ويسال حتى بالشي المضموم..
بس يشهد الله ماقصده شي..ورفع صوته وحجه
بحركة..
انا لو شايف من ابوي شي لو نظرة حرام مااظل
عايش لا ويا ولا بدونه..احط جيلات بيه
واخلصصصص..تعصب وكام يحجي بحركة..

شيهانة حاجيني من طبيتي لليوم شفتي منه عين نكسة؟؟
باوعتلي ماما وهي تنتظر جوابي..وانا عيوني تزغلل
ومامستوعبة الي صار كله..منا الم ايدي يدك براسي
منا حقدت ع حيادر حقد ماينوصف..
واحس عقلي طك كلش واتمنى مايحاجوني حتى
لا اسوي شي وانا مو بعقلي..

سالتني ماما..احجي شفتي منه شي تصرف نظرة؟؟
هزيت راسي..لاا اسلوبه ماحلو بسس موو نظرة
حراام..حجيت وانا اجر الحجاية مثل المخمور..
كمل حيادر..اي انا ادري وادري ظنج
مو محله..حكج بتج وتنغرين عليها..ومرتي ومارضه
يمسها الهوا..
بس انا اعرف ابوي..

صح ابوي غلطان ومن راسه لرجليه..بس
سالفة الحرام مامرجية منج يمه..
انت المثقفة العارفة..وتدرين ابوي رجال جبير
وطبايع البشر لو كبر محد يغيرها..
وانا ان جنت طايعة لنه اله حگ عليه..شما
غلط شما سوا اله حك الله وحك رباه..

ومحد يدري بمعزة شيهانة عندي..عادها وي
النفس لا بعد اگرب..
وماريدها تنضام لو تنذل..واهي صبرت لحد
ماانفجرت..
البيت وبديت ابني بي وماكتلها شكد وصل لن رايده
يكمل وافاجئها..
بس الدنيا تمشي وياي اعوج..وعاندني وكتي
الردي..

هزت راسها ماما وحجت بهدوء..الله يبارك
بيك ويرضى عنك..
بس ماما المسوي ابوك شي عار وعيب..
وانا ولولا انت رجل شاها وروحها معلكة بيك..
وانت رجال كفو..
جان هسه بطلعتي اخذها للمركز تشتكي..
واخلي ابوها واخوتها العصر يجون گوامة..
لان السواه ابوك عيب وعاررر..انا بهذا عمري
وسمعت اشكال الوان ومامصدكة ولا سامعة
ب سوايته ..

حكج وانا يمه من يوم العرفت لا شفت الراحة
ولا عرفتها..
وهي ماتدري وانا ماكتلها..لان ادريها اذا سمعت
تتخبل..
كتلها الجهال لاعبة بهدومج..
من ذاك اليوم لليوم انا مدوهن..بس اعرف
ابوي وطبايعة..
هو ينبش ومايخلي شي مضموم..وكل ما
يفيض كلبي غيض واريدن اروح واغضبه
احط الله بين عيوني..واكول حاجيته وعاركته كافي..

زين شكد صارلها السالفة من صارت؟
هي مرتين من اول عرسنا والثانية كريبة ماصارلها
واجد..
وانا شكيت وغالطت روحي وكلت الظن اثم..
بس من نزلت بالمرة الثانية وعاركتهم
وكعدتهم يحلفون ..
بت اخوي طفلة كالت جدي شفته يطلع من غرفتكم..
و.. ومرت بهادر كالت هو حتى بغرفتي
دور..وهو جاوبها امداج وامدا غرفتج الخايسة
ريحة العفونة طالعة من الهدوم..

يعني جوابه مو مال انسان يدور حرام..
انا روحي مايهونلها تكول هالحجي..بس اكلج
ابوي عقله قل وشبه خرف..اليشوفه
يرج الكاع رج..
بس هو بدفعة يطيح..وعقله ع كده..
يمه احنا بكلشي الاعتماد على عمي وعليه..

بكل طلابة بس شغلة نطلع انا وعمي واخوي منذر..
هاي شاها تشهد هو نص وكته كاعد بالبيت يم
امي وحتى الديوان ماله غرض بي..
خوالي يردون الشيخة ومسوين المستحيل حتى ياخذونها..
وبيني وبينج اتمنى ياخذونها..
بس هو مثل الطفل ومجلب بحاجة..واحنا
دورنا ناخذ مكانه ونسوي الواجب العليه ..

ان جان تردين ترحين ؟ روحي لشيخنا الجبير
عود اشتكي يمه وهم خل يعفينا من هالبلاء
ويبلي بي غيرنا..
تراني جززززعت..لا ظلت هيبة ولا حشيمة..
شواربي انداست بالكاع وحگ الحگ..حجه
باعصاب وراح يم الباب طلعله جكارة
ووكف يدخن..

ماما حجت بهدوء..هذا هو فهمت الموضوع..
بس مرت اخوكم ضبو لسانها لان هي الفضحته..
وهم انت رجل شاها يعني ماتقبل شي يضرها..
بس انا ماخذتها وياي وماترجع بعد لحد مايكمل
بيتها..
حجه وهو صافن والجكارة بيده..
اخذيها ترتاح وانا جم مرة اكلها اوديج ماترضى..
وحكها راح اخذه ..

الله كريم..اخذنا اذا تكدر للبيت هسه..
جا اخذيلها غراض هدوم هسه اوصي البنات
يحضرلها..
لا كلشي لا تجيب عدها بغرفتها والتحتاجه احنا
موجودين..حجت امي باسلوب جاف..

وهو تقرب يريد يكومني ماقبلت انطي ايدي..
كوة لزمني واخذني للسيارة..
كعدت وماما كعدت يمي وقربتني عليها..
نمت بحضنها وهي مددت رجليه ع الكشن..
نزلت دموعي وانا اباوع راح ايلع من هذا
البيت الي ماشفت بي راحة الا القليل..
بعد ماارجعله لو كلفني الثمن غالي..

وحيادر!
حيادر انسان كذاب ويحب اهله اكثر مني..
اصلا مايحبني ..يعني طلع ابوه الي يلعب بملابسي
وهو يكلي جهال تلعب..
زين هو رجال كبير شلون تسمحله كرامته يدور
باشياء ماتخصه!شلون هيجي يسكت وهو يشوف
حيادر يحقق بالفتح كنتورنا..
مايستحي؟
حرامات طلعت وانا مامبردة كلبي منه..

طول الطريق انا نايمة بحضن ماما..عيوني
مفتوحة ودموعي تنزل وهي كل شوية
تمسح وجهي وادفع ايدها..
لحد ماوصلنا..كعدت اريد انزل..بس ماتوازنت..
بقيت منتجية شوية..وهو كلي نزلي انا اسندج..
ماقبلت انطي ايدي..

صحت مااما تعاي..اجت كلتله انا انزلها عوفها..
نزلت وطحت بحضنها..وهو لكفني لان جان بصفها
كلش واكف..
جنت شبه واعية..دخلني جوا وماما كدامه تمشي
سريع..
هاجر بالمطبخ شافتنا انصدمت..صاحتها ماما..
هاجر ماما سويلها شربت نومي بصرة عيوني بسرعة..
اي اي صااار حجت باستغراب من حالتي..

دخلني حيادر لغرفتي..مددني بالسرير وماما
نزعتني العباية..
هو وكف يم رجليه يعصر ييهن ..انا غمضت..
بس ماما كلتله انا طالعة تفاهمو..
بس سدت الباب تقرب كعد يمي ..شيهانة واعية؟
فتحت عيوني بتعب..
ريت البيج بيه..لچموني بيج لن يدرون انت بروحي...
ماكدرو يهدوني ويهدمون عمري الا بيج..

درت وجهي عنه..انتو وحوووش...ماريد اي شي
يخصكم ولا اريد ارجع بعد..
حكج ..هسه انت تعبانة ارتاحي ونحجي..
ماريد نحجي بعد..عوفني كافي اخذت جزء جبير
من حياتي..
خليلي الباقي اعيشه..
مالج عيشة بس وياي..جر حسرة طويلة وكام..

راد يبوسني من راسي وخرت ..هز راسه
وراح يريد يطلع..
دربالج ع روحج ارتاحي وامرلج..
يلا في امان الله يشيهانتي ..كسرو جناحي بيج
ومايدرون انا اكسر وماانكسر..
فتح الباب وطلع ..وانا زاد بجيي..وحتى نفسي
كوة اجره ..لا طاقة لا نشاط كلش وضعي مزري..

ورا ماطلع اجت ماما جابتلي شربت شربتني
بالشافعات كوة ربع كلاص شربت..معدتي فارغة
وتمغصني متت..
بقت كاعدة يمي تحجي وتهدي بيه..
اجت هاجر شايلة يسر كالت يريد يجي يمكم..
كتلها خلي يصعد يمي..
صعدته يمي ع السرير ..اباوع لوجهه الحلو
لبرائته..جان ممكن يكون هو والني نفس العمر..
ربي يحفظه ويزيده عمرين..

التهيت بي وهي شوية ودخلت جابت صينية اكل..
ماما كلتلها تعاي نتغدا وياها نسويلها واهس..
هي بقت مدنكة ..حاجتها ماما..شبيج هاجر صاير
شي ؟؟
هزت راها وهي مدنكة..مالي عين اكل واهلي
ماذين شاها..
ههه شبيج ماما صدك جذب..شو تعاي تقربي
انا اكوم اجيبلي ماعون واجي وياجن ..
هي كامت بسرعة..لاا انا اجيب..

راحت جابت ماعون واجت واكلو وياي..
اكلت كم خاشوكة بس كوة تحملتها معدتي
فد مرة صايرة ماتتحمل حتى ريحة الاكل..
كملنا وجابتلي هاجر ماي غسلت..
انطتني ماما علاج وكالت نامي وارتاحي..
فعلا جنت بحاجة لنومة عميقة..
بس غمضت عيوني ماطولت بسرعة نمت..

كعدت بالليل ساعة بثمانية ..باوعت باب غرفتي
مفتوح..
صحت ماما ..بسرعة اجو ركض هي وحسن
ومحمد وبابا..
بابا دنك وبعدين دخل اجه يمي وشبكني لصدره
وهو واكف..
حسن بقى واكف بالباب ومحد اجه بوسني وحاجاني..
بعدها بابا وخرني من صدره وكعد يمي ع السرير..
بقى صافن شوية..وايده ع راسه..احسه انصدم من شاف
وضعي..
الكل جان ساكن وهدوء..

مديت ايدي لزمت ايده..ركز نظره ع ايدي..
رفعها وباوعلها..صفن ع اظافري لان شوي مورمات
قرضتهن زيادة..
والقبضة بيها اثر احمر ..خله ايدي ع الفراش وكام..
بس كام حسن كله شفت؟؟شكتلك؟؟حالها
ينسكت عليه..حجه بعصبية..
جاوبه بابا بصوت عالي..امشي بوية امشي ..
لنعل شيبهم لابو كل شرييييف بيهم...

انا اتلفت بعيوني اريد افهم ومحمد لحكهم طلعو..
ما كلتلي رايحة اهدي ابوج يريد يروح يهد
على عيالج..ابقي هنا وانا اشوفه لا تخااافين..
هزيت راسي بخوف ورجعت تمددت..ايدي
بقت تصل علي واحس بيها برودة موتتني..
ضجت من عجزي وحالتي الكسيفة..
وانا اسمع بابا يصيح وحسن اكثر ومحمد يكلهم
مو هيج تنحل السالفة..
وصار عياط عالي..لحد مااندك الجرس..

للحكاية بقية
بقلم شقراء(قمر كانون)

طبعا من البارت اليجي رح تكون مرحلة جديدة
واحداث متطورة ومتجددة..
واقتربنا من بارت الفلاش الباك..

احسنت بالضبط واني مجربة هالشي🥺

يجوز تندمين 🌚🌚