رواية الشيهانة الفصل الرابع عشر 14 - بقلم Shaqraa

مساء الراحة الشيهانة الجزء الثالث عشر شفتها ابتسمت من شافتني واقفة على حيلي، وحتى نفسيتها تغيرت. لمت نفسي شلون أفكر بمصلحتي وهي بهاي المحنة. حضرت وياها العشا وصبينا. بابا من شافني هيج حسيته ارتاح وفرح. بس نظرات ماما وصفنتها توحيلي هي تدري، بس ما حسستني. بقينا نسولف، سألتهم عن الحرامي. بابا كال ابن عم بهادر تكفل بالشغلة، لأن مقدم بمكافحة الإجرام وكال هو يساعدنا ويوصي الضباط.

لا تقلقين بابا تصير عادي، بكل وقت موجود حرامية من زمن الأنبياء، قابل جديدة الشغلة. لا بس خاف يرجع. هه شيرجع بابا، صلحنا نظام الأمن مالت البيت. وأصلاً ما يجون إذا بيت بي ناس قابل ما رايدين روحهم. الله كريم. خلي حسن ينام يمّج لا تخافين. اي أحسن. صدك بيومها حسن نام يمي. خطية بقى يسولف بهاجر ويكول خاف تروح من ايدي. كتله إذا مقسومة الك تصير، وإحنا نحاول نحكي وي حنين بلكي تساعدنا. شوية واجاني مسج من حيادر. مرحبا.

أنا فزيت ووجهي بهت من الخوف، أتخيل هسه حسن عرف. بسرعة غلقت الفون وخليته بصفي. انوب كمت أرجف، بس غطيت نفسي عدل كتله السبلت بارد وضحكت مثل الثولة. يوم ثاني صحتي أحسن الحمد لله. ماما سودة عليه أباوعلها وجهها مورم وعيونها. هذا كله وتكابر ما تحسسنا تخاف ننقهر. ساعدتها بالمطبخ أحضرلها المواعين وهيج أشياء. لأن بس ذني الأكدر عليهم. ورا الغدا هم راحوا لغرفتهم وأنا لغرفتي. تذكرت فوني بعده مغلق.

فتحته لكيت مكالمات من أمينة، ومسجات من حنين. بس حيادر ما راسل غير رسالته مالت البارحة. بس أكيد هو كايل لأمينة تخابرني. ترددت أراسله بالأول، تالي كلت يريد يطمن عليه عيب لازم أجاوبه. مساء الخير. جاوبني ورا ثواني. يا هلا، شلونج؟ صحتج؟ قلبي عندج. البارحة راسلتج وبقى بالي يمّج. كلت لأمينة تتطمن كالت مغلق. تالي كالت لا يضل بالك يجوز أحد يمّها وغلقتّه. لا أحسن صرت وجاي آخذ علاج وعسل أكلت هواي. اي صح أخوي نام يمي لأن أخاف.

اه، بالعافية مدللتي. يعني أخوج نام بغرفتج؟ اي خطية فرشتله بالأرض ههه ونام. لا ينام بالهول أروحله وأروح لج وهم عينه عليج. امم. أكول شيهانتي أريد أسألج، لأن بالأول ما حجيت لخاطر صحتج. بس قلبي لاعب وما هدى لي بال. تفضل؟ عدكم عداوة وي أقارب؟ وي أحد بالمنطقة؟ لا بالعكس، أصلاً قليل يعني منطقتنا نختلط بيها. الجيران أغلبها ما تطلع. باعي أنا ما أكدر أتدخل، بس من سمعت بالسالفة هوش ما بقى براسي.

البوكة مو مال واحد رايد فلوس، أنت المقصودة. مبين دارين بيج وحدج، خرب. يعني شنو أنا ليش؟ شاها بنية ويدرون وحدها بالبيت ومريضة حتى ما تكدر تدافع. كافي لخاطر الكريم. عقل ما براسي بعد. عفية حيادر خفت. أفّا. لا تخافين ارتاحي. الشغلة صارت يم رضيّعي. منو رضيّعي؟ ههههههه يلعن إبليسك. رضيّعي أنا يعني ابن عمي. هههههههه. عزا عبالي رجال اسمه هيج. سلامة بالك، عندج نقص مفردات يراد لج تدريب.

اي هواي مفردات ما أفهمها. فد مرة كتلي تنورتج تهافي مدري شنو ههه. عوفي السالفة، أنا حالف ما أطيح بالحرام حتى أنولج بأمر الله. ها؟ راسليني من يصير عندج وقت، حتى لو كل يومين مرة. المهم أطمن عليج. أنا واعدة ماما ما أتواصل وياك أبد. وأنا ما أضمن نفسي إذا تواصلت وياج أعرف روحي أطيح بالحرام. سؤالي عنج بشلون حالج يكفي. أوكي خليها للوقت. أنا أستأذن. ماشي صيري قوية أريدج. أوكي، باي. حذفت المراسلة وعفت الفون. صافنة بحجي حيادر.

شنو شاك يعني أنا المقصودة! خاف ناقصني خرعة هسه اخترعت بالزايد. بس يمكن هو لأن يخاف عليَّ هيجي يفكر. يعني الحرامية ماخذين الفلوس كدامهم، بس يجوز الذهب مالاكيه ما مدورين عدل. مرت يومين وحسن ينام يمي. آخر شي كتله ارجع لغرفتك، خطية متعذب وياي. بس ما قبل وصدك بقى ينام بالصالة. وكل شوية يراسلني لحد ما يتطمن نمت. ورا كم يوم وبعد التحقيق ومحاولة جمع الأدلة ما وصلوا لشي أبد. الحرامي مثل الجني ما كدرو يوصلون لطرف خيط منه.

بابا والولد يسولفون. حسب كلام الضابط المقصود مو فلوس. تذكرت كلام حيادر. يعني الغريب المبلغ الماخذيه قليل أصلاً. إحنا القاصة مالت أهلي بالمنزع ورا الغسالة. مستحيل تخطر ببال أحد. بس الفلوس اللي ماخذيها يعني مصرف يومي تقريباً مليونين جانن بالكنتور. ذهبي وذهب ماما بالجرارات موجود على حطتّه. بابا جان مستغرب من هالشي. وكلش خايف. بس الشغلة الغريبة وحيرتهم، ما لقوا أدنى شي يدين السارق.

مرت هالفترة وكلنا مضغوطين، لأن خفنا أكثر. لو جانت سرقة عادية أهون من اللي توصلوا له. خالة أم حيدر تجي لماما شوية تغير نفسيتها. وكل خميس تجينا ونروح سوا للخميس مالت خالو الله يرحمه. انتهت العطلة واليوم أول يوم دوام. كل سنة أتحمس للدوام وأنتظره يوم يوم. هالسنة كوة راح أداوم. حنين ما تداوم هالسنة، تسوي استضافة أو هيج شي. بس تمتحن فصلي ونهائي. ما يقبل حيادر تداوم ولا هي تريد.

شكد حاجيتها وقنعتها، بس رافضة بحجة تريد تتفرغ لزوجها وبيتها. وهم بهادر مأجل موضوع الأطفال هسه لحد ما تخلص دراستها. شلون عقل عنده منعها تداوم؟ وأجل موضوع الأطفال؟ المن باقية بالبيت ما أعرف. بلشت دوامي وهالسنة مرحلة رابعة. وبهادر هم ياخذنا، بس مادة بسيطة كلش اسمها اختبارات. ما أعرف هم راح يحط عقده بينا هالسنة لو لا. مشت أول أيام دوام. حيادر كلش قللت مراسلتي وياه وبس كد السلام. بس جنت أنتظر يصيرله شغل بالكلية بلكي يمر.

بس أكيد من يمر راح ينطيني خبر. أنا أصلاً بالريست أبقى بالقاعة كاعدة. يم بنات القاعة أسولف وياهن ومرات نطلع ناكل سوا بالكافتيريا. أبد ما كعدت برا لا بالحديقة لا بالكافتيريا. بعدت نفسي عن أي شي غير الدراسة. بس الزاعجني حيدر أكثر من مرة يريد يجي للكلية. أنا أرفض وأكله ما أكدر أمشي وياك الناس ما تعرفك منو وتبدي تحجي. بس أنا أصلاً بعدته لأن إذا شافه حيادر راح يصير شي جبير، ومشكلة عواقبها هواي.

وضع ماما تحسن هواي. بس على طول مراقبتني. مرات بالليل أنا جوا الغطا. تدخل للغرفة بهدوء. تفتح فوني. وتشوف ماكو شي تعوفه وتطلع. بس تلح بموضوع حيدر بطريقة غير مباشرة. وعزمتهم مرتين، هو هواي يتقرب. أنا متخذة وضع الصنم. وكل مرة يحاول يحجي بشي، أوصله فكرة هو مثل محمد وحسن بالنسبة إلي. صارت الامتحانات الفصلية وجانت حنين تجي بس تمتحن وتروح. تطلع قبل لا أطلع أصلاً. وعيت وفهمت نفسي خلاص. هي صارت الها حياتها الخاصة.

ومجبورة تلت هي لأن مشاغلها هواي. وأنا بفصل حيادر وحجي أمينة. هواي أمور كدرت أواجهها وأصير قوية. جنت هشة وبس لسان. هسه تغيرت هواي. مشت الأيام والأشهر. حيادر يمر للكلية بس قليل كلش، لأن ما عنده شغل بس يدور حجة لشوفتي. وهم ما نكعد سوا أبد كله من بعيد. خلصت السنة الأخيرة. واجت الامتحانات. المواد كلها مسيطرة عليها. بحثي أنطوني امتياز. بس الاختبارات سعيي ناصي يعني مقبول. صح هو هالسنة عاملني مثل بقية الطلاب.

بس أصلاً هو بقية الطلاب يعاملهم بفضاضة. بس المهم سعيي ناجحة عنده، لأن جنت أخاف من المشاكل وأخاف أخسر حنين بسببه. بدت فترة الفاينل وأنا بديت نظامي. أنام بنهار وأكعد بالليل. ماما تحضرلي أكلي وملابسي وتجهزلي كلشي. لأن جنت كلش مركزة بالقراية وأريد معدل حتى أكمل ماجستير. لحد ما كملت فترة الامتحانات وارتاحيت. صرت من وراها كلش ضعيفة، لأن وجباتي قلت وتفكير وقلق. بآخر يوم الامتحان. طلعت من القاعة لكيت حنين تنتظرني.

فرحت ووكفت يمها. ما أعوفج اليوم آخر يوووم. ههه لا اليوم أرجع وياج لبيتنا. صدددك. تعاي نكعد على ما يجي الخط وتخلص رشا فرة. لا نروح وي بهادر. عنده شغل بالعشار وكتله أخذنا بطريقك. يو يعني ما راح نكعد ننتظر؟ لا بهادر ينتظر. بالبيت نشبع سوالف. المشكلة أنا حيادر دزلي رسالة. كال أنتظرج من تطلعين من الامتحان أشوفج. بعد آخر يوم هذا وين أشوفه؟ دزيتله رسالة. راح أرجع وي حنين وأخوك. ما أكدر أبقى خاف تحس بيَّ.

رد عليَّ بسرعة. هذا هو روحي وياها وأنا جاي. رحت وياها للسيارة لقينا بهادر واقف ينتظر. عود هو ملابسه صارت أحسن. يعني مكويات وعدلات. بس الألوان مثل ألوان النفاخ، والعرض عبالك حامل بشهرها. بس باوعت لعرض بنظرونه برطمت، حتى لا أبين أضحك. صعدنا للسيارة وأنا مبرطمة. وأصلاً أنا شفتي مكتنزة. يعني من مبرطمتها عبالك واحد مرزلني وأريد أبجي. شاورتني حنين. شبيج؟ ها لا مابيه شي. رجلج ليش كل ما نجي وياه يبقى كاعد ما يسوق بسرعة؟

يجوز ينتظر الكدامه يطلع حتى يكدر يطلع. وأنا بداخلي أكول شكد شيطانة أنت شاها. تدرين بي ينتظر حيدرج بس صايرة لوتية. ابتسمت وأنا أتخيله جاي ومشتاقة أشوفه. انتبهت لصوت الباب انفتح وهو صعد. غمضت عيوني بارتباك وفتحتها. السلام عليكم. جاوبت بصوت ناصي. وعليكم السلام. عدل كعدته وتحمحم. بهادر ما لكيت غير هذا العطر بشرفك؟ أوو أنت ما يعجبك بس المواد الكيمياوية. ذني عطور نظيفة وطبيعية.

يخنك يحشر بالسيارة مسوي ريحتها جنها غرفة بيبيتي. أنا سمعت هيج بقيت أضحك على صامت شوية تطور الوضع هزاز. شفت بهادر انتبه لي. برطمت شفتي وسويت روحي صافنة. شوية واجت لي رسالة من حيادر. حنين بصفي أخاف أفتحها. بس حيادر شغلها من حاجاها. أكول خوية حنين خو ما محتاجين شي للبيت مسواك للمطبخ، دامني هنا آخذ بطريقي. هي حاجته وأنا فتحت الفون بسرعة. مكتوب. شفتج لا تلويها، لويتي قلبي وياها وشلتي ذنوبي. عدلت حلكي بسرعة وسديت الفون.

دنكت واستحيت كلش. مو عيب يباوعلي هيج؟ شبي تجرأ؟ بس حنين التهت تحاجيه وتكله شمحتاجين من السوق. وتالي رجعت حاجتني بهمس. شفتي شلون حاط نفسه بكلشي؟ باوعتلها باستغراب. وحجيت شفهي. أنجبي. هي سكتت. لحد ما وصلنا. نزلت وصارت عيني بعينه مشيت بسرعة مستحية. رحت وياها لبيتهم وأنطيت خبر لماما. جانو ينتظرونا ما متغدين. مرت عمي محضرة أكل خطية أشكال. لأن حنين هناك تكول تستحي تأكل.

تغدينا سوا وسولفنا يمهم شوية. تالي قمنا أنا وياها للغرفة. أول ما دخلنا استلمتني. بالأول وقبل كلشي لا أحجي عن موضوعج وي حيادر. شفتي تدخله؟ شبيج بعد فوقها يسأل شمحتاجين! لا يريد يشوفنا مخلصين المسواك بسرعة لو لا، لأن قبل يومين هو تسوك. ليش تفهميه غلط حنين. بالعكس يمكن يشوف إذا ناسي شي ما جايبه بذاك المسواك يجيبه هسه! شاها أنت عمية!؟ حبه عماج. تدافعيله وفرحانة بي، وهو أكبر خبيث. كمت ووكفت. حنين لا تحجين عليه ما مأذيج.

وكفت وحجت بعصبية. لااا مأذيني. من يحوم على أختي وتوأمي ويأذيها معناها أذاني. شنو يحوم ترى هو حبني ما كفر؟ حبه ما يفيدج، حبه يأذيج. وأنا جنت متوقعة عدكم علاقة، بس مو لهالدرجة. مو علاقة حنين على كيفج. لا علاقة ولازم تنهيها اليوم. وإذا ما نهيتيها أروح لأمّج وأكلها كلشي! للحكاية بقية