رواية الشيهانة الفصل الثالث والأربعون 43 - بقلم Shaqraa

مساء الورد

الشيهانة
الجزء التاسع والثلاثون

باوعت لايدي منظرها نساني الالم..بيدي الثانية
شلت العجين ولطخته بوجه خالتي..
الله ينتقم منج لئييييمة..باعي ايدي انكسرت يا
ظاااالمة..
وهجمت عليها اريد اضربها وانا ابجي من الالم
ومن حقدي عليهم كلهم..
ام عادل لزمتني تريد تبعدني عنها وانا مجلبة
بشيلتها..اصرخ واحجي وماحس بنفسي شحجي..

هي شردت مني جوا وانا طفرت على حنين
وهي تمالخت وياي ..ضربتني بايدي التأذت
بس طلعت روحي..
دخت وكعدت بالارض وام عادل تغسل بوجهي
وتصرخ ع سارة ولج ركضي خابري عمج..

بدت عيوني تغوش وانسطرت كلش..وام عادل
تذب بوجهي ماي بارد ثلج وتحاجيني..
ولج شاها ردي علي ولج يمه شصار بيج تصخمنا
راح تروح من ايدنا البنية ياستااار..
شوي شوي استعاديت حيلي ..وردت اكوم اهد
بس محد بقت شردن..بس ام عادل وسارة وامينة
خطية مكابلتني وتبجي وهم محتارة شتسويلي..

تالي كالت انطيني مفتاحج اجيبلج عباية ونلبسج
لا تصعدين..
لان سارة خابرت حيادر حتى ياخذني للمستشفى
بس كايلة اله متخربطة ماحجت شي..
جابولي العباية دخلت ايد وحدة والثانية
ماكدر بقت جوا وربطتها  الي ام عادل
بشاش بركبتي..

لشوية اجه حيادر واحنا بالمطبخ دخل صرت بوجهه..
اجه يمي حيادر بس غضب الدنيا كله بي..امبين
جاسوسه كايله بالصار..
اول مادخل عاط..اليوم احرك البيت حررررك
شردو كبل لا ارجععععع..بس اوديها للمستشفى
اذا ماشحتتكم كو... ولكم كفاار ماسوت سوايتكم ..
امينة وام عادل لزموه لان يريد يروح لامه جوا..

تالي اخذني هو وامينة ورحنا للمستشفى
وطول الطريق ماخله غلطة ولا سب ولا عياط
ماعيطه..وامينة بس تهدي بي وتريده يسكت ماكو..
انا دوخة لزمتني كلش..بس مخلية راسي ع الكشن
وشبه واعية..

وصلنا للمستشفى واخذوني بعد اشعة وفحوصات
وتحاليل عبالك لازمين جثة ويدرسون عليها
ماخلو شي ماسوو..
ايدي جبسوها لان مكسورة..صاير عندي فقردم
حاد ونسبة الدم ٨ ..
التهاب بالامعاء حاد..

ذني كلهن لا شي قياساً بنفسيتي..الدكتور اكثر
من مرة يسالني ..انت واعية يعني تفهمين شنو نحجي..
لان شافني صافنة ومخنزرة..وكلساع ارجف..
انطوني ابرة شوي نمت ارتاحيت..
فترة قصيرة وكعدت..بعد ماانطوني علاج وتوصيات
كلش هواي..
طلعت من المستشفى..وببالي بس ارجع الم ملابسي
واروح لاهلي..

اشوف حيادر صافن ويسوق بس وجهه مايتفسر..
وكل شوي وخفف سرعة..
حاجته امينة بهدوء..حَيدَر يمه تهدى من تسوق..
مريتك وياك لا يصير شر اسم الله..
خفف شوية زين وبقى ساكت ماحجه..

وصلنا للبيت ..ساعدني انزل ولزمني من ظهري..
دخلنا جوا والبيت بلا صوت..لكيناهم كلهم بالهول..
بس شافونا سكوت تام صار..هو كال لامينة اخذيها
يمج ترتاح..
ماقبلت اروح ..باوعتلهم وانا حاقدة واول مرة احقد
هلكد ع الناس..
ليش ساكتين خفتوو منه؟؟؟من موجود تخافون من يروح
تستعبدونييي..حجيت بقهر وصوت عالي..
حيادر يباوعلي من احجي ماعترض..

جاوبني عمي..سدي حلكج هيي..
مالحكت اجاوبه وانفعل حيادر..ايي وبعد..كوم
اكتلها بعكالك بعد..لا اكلك شي اكسر رجلها مدام
مرتك كسرت ايدهاااااا..
انجب ولك هاي امك..
عاط وكام يصيح..ماعندييي امممم ماعندييي..
انا من هاليوم يتيييم..لا اريد ام ولا ابوووو..
حسبي الله بيكم وبكل واحد منكم..

ولكم كاسر ظهري من الصبح لليل واكد واتعب..
اخواني يجون للشغل بس ونسة ونراكيل وطلعة..
ويبقى الحمار مال الكراب هو يروكض منا ومنا..
هذا كله واكول اهلي..الماينفع اهله لا خير البي..
تنشبون وي مرتي ليييش..ليششش...
كام يصيح ولزمه منذر وعادل..دفعهم حيل..
وخررررو ..كلكم نفس ال... مابيكم خير ولا زين..

حجت خالتي..انت جاي تدافعلها ولك كتلتني..
مرتك ذبت العجينة عليه هاك دشوووف باوع..
وتقربت تشوفه شكلها وهي ع حطتها ملابسها مساع
من لطشتها عجين..
انا واكفة طبعا كوة وايدي الم خفيف لان مفعول الدوا بجسمي..
وهي تقربت مني وتصيح..احجي كليلة كتلت امك
ام السحووورة..

هو اشرلي سكتي..وباوع لامه واستغفر اكثر من مرة..
انت هم حاسبةروحج ام؟؟؟ادري بيج تكرهيني من جنت
جاهل مو من هسه..
وانا كلت مسامحج المهم رضا الله..بس هالبنية انطوها
الها امانة النا..شتكلين لربج على اذيتها؟؟
عمرج ماظال بي شي،.وتهدمين بيوت وبيت ابنج هم..
اشكيج لصاحب الشكوى..لنج امي وماريد اتحاسب
يم الله عليج..

وهي بقت صافنة جانت متوقعة منه شي ثاني يمكن..
صاح بي عمي..خليك ملهستك بسوالفها من امداك
عار الزلم جنك مكحط..
وطفر عليه حيادر ولزموه اخوانه..انت وتااالي وياااك...
بهالوقت بالضبط..
سمعت صوت امي ..عبالي دخت لو هلوست.،
بس من الشفت الكل نظره عليها تاكدت صح..

دخلت ووراها تقى بت نهاية..وحجت بصوت عالي..
عفااا ولله بيوت شيوخ ومابيها ذرة اصل..
ودخلت من بينهم اجت تجاهي..وخالتي ركضتلها
وعمي طلع بسرعة هو والولد ..
هي باوعت لشكلي غمضت عيونها ..استغفرالله....
اندارت عليهم مابقى بس النسوان وحيادر..

سالته بعصبية..ليش طلعت زلمكم؟؟؟ليشش؟؟مستحين؟؟؟
لو حشيمة الي..اذا حشيمة انتو كل حشيمة ماعددددكم..
واذا تكدر اطلع اريد احاجي نسوانكم بالاول ..
هو هز راسه وطلع..
وهي عاطت بصوت عالي..
مستوحدينها؟؟؟؟عبالكم ذابتها ومااسال عنها؟؟؟
لااا بس جنت حاطتلكم اهتما اكبر من حجمكم...هي
تحجي وامينة تريد تهديها كلتلها سكتي عفية خليني احجي...
خالتي كلتلها انت مامفتهمة خل نفهمج..خاف بتج
مافهمتج..

مو بنتي الخااابرت...بت عمها خابرت تكلي توحدو
بيها وكسرو ايدها..
ولكم ليييش الله اكبررررررر..اباوعلها وجهها صار
احمر نار من الصياح وهم الكل ساكت..
تقربت من خالتي وحجت..مرة عمرج بالسبعين وظالمة
طفلة بكد بزر بزرج؟؟؟ماخفتي من ربج وانت ورااج كبر..؟؟
وانتن عود بنات حالجن حالها..تشوفنها عدو ليش؟؟؟
لان متربية ومحترمتجن وماتحش برجلها ويشبعجن دك؟؟؟

حنين من يمها طفرت..خالة محد توز برجلها
لا تشمرين بالحجي..
هي حجت هيج وركضتلها ماما لزمتها من راسها..
ولك انت بالذات كلبي ومورم منج..انت سبب
كل ضيم بيها ياااعارر..
عوفييني وخري ايدج عني ..حجت بصياح وتدفع بيد
ماما..
جابتها ماما راشدي معتبر..وراسدي ثاني
ولزمت بحجابها تجر بي وامينة وام عادل يريد
يفكوها مايكدرون..

طيحتها ماما بالكاع وشبعتها رفس..اعرف ماما من
تتعصب تفقد نهائي..
بحيث نسوان شكد وماكدرن يخلصن حنين منها..
انا بمكاني دايخة ومرةزةمثل الشارب حشيش كوة اباوع..
بعد ماخلصوها من ايد ماما ودشداشتها انشكت
وشعرها انكفش ووجها صار احمر كله..
انخلست ماحجت شي بس اخذتها نغم بسرعة
وصعدن..

وماما تجر نفس واندارت لام حيادر..
لو ماعمرج وشيباتج الا اكسر ايديج ثنينهم..
الله يكسر كلبج مثل ماحركتي كلبي عليها..
وبكل صلاة ليل اشكيج لربي وروحي وحسبي ربي بييج..
اجتلي لزمتني من ايدي..كوومي..تريد تكومني

وصاحت حنين من فوك..
كدرتي عليه جا ماتشوفين عمها التخافين تحاجي
ماتعاركينه لان ناشب وياها..
تدريبن..يفتح كنتورها يشمشم بسيتات النووم
مالتها..

للحكاية بقية
بقلم شقراء(قمر كانون)

حبيباتي هذا نص بارت هدية الكم كلهم وبالذات بنوتة
ميلادها صار خطيةوهي معلقة تريد هدية
ومامنتبهة للتعليقات اني ..
نكلها كل عام وانت بخير

ع فكرة بقى جزء بسيط من القصة يعني كم يوم ونختمها