رواية الشيهانة الفصل السادس عشر 16 - بقلم Shaqraa

مساء الخير الشيهانة الجزء الخامس عشر نطّيت عيوني باستغراب. عفوًا؟ مسح وجهه وحكى بفظاظة. ترى فشلتيني وكسرتي وجهي. ذاك أخوي أدري بيه أغشم. احترم نفسك ترى لهسه محترمتك أنا. غصبًا عليج تحترمين. لو أعلمج الاحترام. علّم نفسك بالأول. حجيتها وأريد أمشي. اوكفيي. نتر حيل. بيا وجه تمشين بالكلية؟ وحدة غيرج هسه غاسلين عارها. رفعت صبعي وحجيت بتهديد. بهااادر لهنا وكافي. شكووو شنو الصار؟ هو طلع من راسه دخان من تصرفي. حكى بعصبية.

دروحي شوفي سمعتج. كل ثنين بحجاية عليج. وليش؟ حجيت بخوف. لأن دايحة ويا حيادر وما ضل واحد ما شافكم. والأساتذة كلوا وجهي. يابه هذا أخوك وهاي عرضك. حاجيهم انصحهم. أنا وحيادر لا كعدنا سوا ولا مشينا! حجيت بعصبية. لا تبررين. هذا مو حجيي. الكلية كلها تحجي وتحجي وتحجي وأنا ساكت. صارلهم دهر. بس اليوم من يجي رئيس القسم يعاتبني. يابه حاجي كرايب مرتك. ترى هواي يحجون عليها. وسمعت الطلاب يقولون تلتقي بأخوك بغرفتك!

من حكى هيج أحس شي براسي طك. خليت إيدي ع عيوني. وبقيت أجر نفس. طلب منك حيادر هيج؟ ها. لا ما طلب لأن يدري بيه أرده وأطيح حظه. أحس نفسي انهاريت. موضوعي وي حيادر كل شي ضده. ما أكدر أبين أي رد فعل. دنكت راسي. حجيت بصوت ناصي. هذا هو. اعتبر هذا آخر يوم أداوم. مشيت وأنا عقلي ما يريد يفكر. لأن إذا فكر راح ينشل. ماكو تبرير لحجي بهادر. شنو الي خلى الطلاب يحجون بسمعتي؟ رغم ما ماشية وي حيادر. وجبتها من أول مرحلة محافظة ع سمعتي.

هسه صدكت حجي حيدر. من جاي سائل وكايليله تقريبًا نفس الحجي. أتخيل بس. واحد من أخواني لو بابا يجي صدفة. إذا سمع هيج يحجون عني شنو ردة فعله! لا أحسن قرار أترك الكلية. لكيت نفسي نازلة من القسم وما منتبهة. كعدت يم القسم. خابرت السايق وكتله استعجل. لبست النظارة. يمكن أريد أضم دموعي. أو مالي عين أواجه الناس. معقولة الجاي يصير! هو مبهم وغريب لو أنا ثولة. ليش طلع عليه هيجي حجي ليش! ماكو دخان بلا نار. ولو بس واحد حاجي ميخالف.

مو حيدر وبهادر نفس الحجي. خابرني السايق وكمت تمشيت. أجر بخطواتي جر. صعدت حتى نسيت أسلم. هم جان مشغل أغنية محمد بويه محمد. ابتسمت ونزلت دموعي. عليها شوية. علاها ويريد يحرك. وأشوف حيادر واقف كلش يم باب السيارة. يريد يعبر بس وكف لحد ما عبرنا. نفس المرة الفاتت. نفس الأغنية مشغليها وشفته بيها بس جان بسيارته. ما لحكت أباوعله. ما شفت عيونه جان لابس نظارة. هذا جان حجي قلبي وإحساسي. يحجيها بهمس حتى لا يسمع عقلي.

عقلي جان ساكت. ما يريد يحجي شي لأن بداخله قابل. رفعت إيدي مسحت عيوني من جوا النظارة. وبقيت أصارع إحساسي. لحد ما وصلنا. كتله انتظر شوية هسه أجي. نزلت بسرعة. دخلت أمي بالمطبخ. استغربت جيتي ووضعي. ها اسم الله شبيج! ما بيه شي. أريد فلوس الكروة للسايق بالباب. يلا هسه أجيب لج. حجت وراحت مستغربة. شوية واجت. أنطتني الفلوس وطلعت بسرعة. أنطيتها للسايق وكتله بعد ما أداوم وشكرته. رجعت دخلت وهي لكيتها يم الباب تنتظرني.

بس سديت الباب حجت وهي تذب شالها ع كتفها. شبيج ماما؟ نزعت النظارة وجريت نفس. أروح أرتاح وبعدين أسولف لج عادي؟ حجيت بحيرة. روحي ماما. دخلت للغرفة بدلت وتمددت. ضاك نفسي وما أدري شتصرف. إذا أحجي لحنين تصير ضدي وهي منا قافلة شوية. هذا الشي ما أكدر أكتمه أكثر. كلش انهضمت. حاولت أنام. بس عبث. اجت براسي فكرة. كمت للكنتور أدور رسالة حيادر. دورت عليها لكيتها. من لزمتها جسمي قشعر. تذكرت يوم أنطانياها ولمسة إيده.

شميتها أريد أتنفس. أحس روحي مختنكة. فتحتها وأتأمل الحجي. أخذي الحجي من أمينة. ليش كال هيج؟ لأن يعرف أمينة تضم سوالفه وما تحجي؟ يمكن أكون ظالمته! ما عرف شحجي. سجلت رقمه بالفون لأن حنين ماسحته. تالي تذكرت أنا أصلًا منطيته بلوك. رحت للقائمة وشلت عنه البلوك. لازم أخابره مو مال مراسلة. كمت قفلت الباب وعليت السبلت. حتى من أتغطى ما أحتر. تغطيت بلحاف وبطانية. وكعدت بزاوية الغرفة. هذا كله حتى لا تسمعني أمي أخابر.

دكيت عليه دك. بس أحس دقات قلبي تضاعفت. فتح خط. سكوت. أنا هم سكتت. بقى يغني. يمحمد بوووية محمد. ويلحن. بكل حرف طلع من شفته أحس أذني تنتعش وجسمي ترجع له الروح. شوية وتحمحم. ياهو يتعمد بقتل الثاني شيهانة؟؟ كتمت عبرتي وحجيت. أنت أصلًا قتلتني وشلت ذنبي. ها. يصير خير وبعد؟ سكتت وأنا أجمع بالكلام. حيادر. شيهانة! ليش تكلي شيهانة؟ لأنك قوية مثلها. صعبة مثلها. حجاها وجر حسرة. أكيد تعرفيهن معناها؟ إي دورت بالكوكل وعرفت.

إيي وذكية هم. بس مو قوية. لو قوية جان واجهت مشاكلي. أنت القوي وأقوى مني. ولو مو وكت عتب أو غيره. لأن احتريت من البطانية. جر نفس وتحسر. لا متوهمة مو البطانية السبب. المشاعر السبب. ما عندي مشاعر. أ. أريد أحاجيك بموضوع. كولي أسمع؟ تركت الماستر. ها زين! شعجب خاف كرايبج ما قبل؟ محد اله حجاية عليه. تعرف شنو السبب؟ لا. السبب سمعتي صارت بكل لسان! جاوب بصيحة. شنووو! اختنكت بعبرتي بس قويت نفسي. بهادر ما حاجاك بشي؟

لا. عوفج منه واحجي عدل وفهميني. اليوم بهادر أجه تعارك وياي. لأن متحمل الحجي بسببي. الكل بالكلية يحجي عليه ويكول عندي علاقة بيك ونطلع سوا. يا ناقص عرض هذا أحط رجلي بحلكه وأشكه. شلج بهالحجي هذا ياهو كال هيج فهميني كل شي. مو أكلك بهادر الي كلي. إي وأنا أسألج منو الكال احنا نتواعد؟ حسب حجيه الطلاب. وحتى رئيس القسم سامع ومحاجيه. أستغفر الله أستغفر الله. حجاها بعصبية. أنا مساع يم الدكتور تدرين؟؟

تدرين هالحجي كله جذب وتلفيق من أخوي ال... لو اكو شي جان لمحلي وهو علاقتي بي قوية. مو تلفيق. ابن خالتي قبل فترة نفس الحجي كاله. شكال؟ سأل عني بالكلية ونفس الحجي كلوله! يعني يجيج للكلية؟؟؟؟ لا لا بس قبل لا أرفضه من حاجاني. كال اجيت للكلية أشوفج. وكلولي محجوزة لابن شيخ رسن. هيج كال صدك؟ إي إي هو كال هيجي. بيوم الخطبني بس رفضته. جا يمتى رفضتي أنت؟ هو بنفس اليوم الخطبني بي. آخر يوم الامتحانات.

يوم الجنت مراقبني بي أنت مدري صدفة. بيوم روحة الخورة!!!؟ إي هو اليوم الأسود. حجيتها وبجيت. ليش أسود اوكفي. تمسحين دموعج لا أطلع أحط ببيت عمج شاجور كامل. عزاا شعليها؟ تالي تعرفين شعليها بس صبري. بس كليلي هذا الـ... وين بيتهم؟ ليش! تكولين لو أخابر أبوج أسأله؟ صخام حيادر عفيه شبيك. بيه كل شي لا تكليلي شبيك. نار وشابة بيه. لازم هسه أروح كولي وين بيتهم؟ وصفت له منطقتهم وبيتهم. بس ما أدري بروحي شلون حجيت وشسويت.

وشلون هيج أتصرف. صبري وياي أبقي ع الخط. إيي. بقيت أنتظره ورفعت الغطى تنفست. شوية وحكى. بعدج هنا؟ إي موجودة. شوفي أنا هسه راح أحجي. بس أريد ذيج شاها القوية الشرسة. ما أريد أم دموع الينوكل حقها وتنغدر وما تدري. سمعتي؟ أحجي حيادر فدوة. شنو صار؟ أووف. مشتاق لهالحجايات. جر نفس وحكى عدل. احجيلي آخر يوم الامتحان من وصلناكم. شنو صار بهاليوم. آه يأذيني هاليوم. كافي يرحم أمج حاجيني عدل وكملي.

أوكي. ذاك اليوم الي رجعنا بي لبيت عمي أنا وحنين. عرفت علاقتي بيك. بس جانت عبالها علاقة تواصل. كتلها ما نتواصل وما نتخابر بالليل. ما صدكتني. كالت أنا أسمعج بالليل تخابرين ويتغزل بيج. حجيتها واختنكت. قوي نفسج وكملي شيهانة. كتلها ما يخابرني بالليل ما جاي أكذب عليج. كالت لعد ويامن يخلص الليل سوالف وغزل. زين. بعد؟ إي كالت حجي مو حلو تحجي بالمكالمات. تهون. تهون. وأنت شسويتي؟؟ انهاريت بوقتها. نصحتني أنساك وأنطيك بلوك.

أنا ما كدرت أنطيتها الفون كتلها أنت أنطي. والظاهر أنت ارتاحيت للبلوك حتى ما أجه ببالك تراسلني من غير رقم لو تسأل سبب تركي لك. هه. أنطيتي جهازج بوكتها إلها؟؟ إي. باعي شاها. بت عمج دزتلي هاي الرسالة من رقمج بوكتها. أقريها وحاجيني. مني من فوني! إي أقري دزيتها. اجاني سكرين من عنده. قريت الرسالة طويلة.

بدايتها. هلاو حيادر. أعرف خلصنا وقت سوا وأنا تونست وياك. بس أنا أفكر بعقلي وأطيع أهلي. خطبني ابن خالتي وأهلي كلش عاجبهم. بصراحة من حاجوني بي اقتنعت. أشوفه أنسب إلي منك. يعني تبقى ابن ريف وأنا بنت مدينة. وجنت مستحية أكلك وشلون أفاتحك. بس هسه بعد صار وقتها، وابن خالتي مقتنعة بيه. يكدر يعيشني وما يقيّد لبسي. سامحني ولا تضوج، اعتبرها تجربة. ها صدك، اليوم نطلع للخورة. نتونس وراها نروح نشتري الحلقات من الجزائر.

طبعًا أقرأ وأنا كلساع أرمش حتى أتأكد من روحي بواقع لو بحلم! حنين هيجي تكتب، عجيب! ليش يعني ليش؟ وياي شيهانة؟ تسمعين؟ أي. لزمي أعصابج وفهميني شكول. بت عمج وأخوي ما يريدونا نتزوج. أخوي يكرهني كره الحية وبت عمج تكرهج. مستحيل! لا واقع، بت عمج جذبت عليج وأنتِ صدقتيها. وشكيتي بيه وضحيتي بسهولة. تدرين بيوم اللي اجت منكم، اجاني أخوي شكال؟ كال حنين مقهورة عليك تكول شاها باعته. وهي دومها تحجي عليه بس هو مجلب بيها.

وبأذاني سمعت بصوتج، شنو هذا الشكوكي وأفكر بيه بعد! صوتي! حجيت وكوة أجر النفس. أي صوتج وسمعته بأذاني، بس رغم هذا. كلت خليها تروح بسبيلها، طلعت نزوة عدها. ويجي يوم وتدمر حياتها النزوة. حيادر، عقلي رافض يصدك حنين بايعتني وليش؟ اخذي نفس وارتاحي، راجعي تصرفاتها وتعرفين. أدري ثقيل عليج هالشي، بس أنتِ صلبة وتتحملين. هسه أنا رايح بأمان الله، وتوصلج الأخبار الزينة. إي، باي. وداعة الله.

سديت الخط منه، وذبيت البطانيات عني ونمت عالأرضية. حرارة الدنيا كلها صارت براسي. حنين أختي اللي عشت وياها عمر! جنت أتقاسم وياها حتى الفراش، تسوي بيه هيجي! ما نزلت دموعي بعد، ما أريدها تنزل. من اليوم شاها الطيّبة تموت. تنولد بدلها شيهانة. وفعلًا ما أستحق حيادر، لأن بعته بتهمة بدون دليل. وهو رغم الدليل بقى محافظ عاللي بينا. بس للأسف خسرته وما أستحقه. للعصر بقيت بالغرفة ما طلعت.

أمي راسلتني، كتلتها تركيني أهدأ لا تضغطين عليه. سكتت ما حجت. لحد الليل، ساعة بالعشرة. طلعت من غرفتي. البيت هدوء، الكل بغرفته لأن بابا ينام من وكت. الولد دوامات وتعبانين. رحت للمطبخ ومالي شهية كلش بس معدتي وجعتني. أخذت كعك وصبيتلي حليب وكعدت. سمعت صوت خطوات، رفعت عيني ماما دخلت. اجت جرت الكرسي وكعدت. شنو الصاير شاها حركتي أعصابي؟ ماما أنا ما أريد أكمل بعد. ليش؟

لأن مو كدها وما أكدر، تعبت أعصابي من كلشي يتعلق بذيج الجهة. يجيج يشوفج؟ ضوجج بشي؟ أبدًا ولا أشوفه بس خلاص ما أريد، آسفة ماما خيبت أملج. هاي رغبتج هم مو بس رغبتنا، ومادام ما تريديها يعني ماكو فايدة حتى لو كملتي، لأن راح تكملين مرغمة. كومي نامي ارتاحي وجهج تعبان. كمنا سوا، هي راحت لغرفتها وأنا لغرفتي. أعرف كلمتي ما قنعتها أبدًا. بس حست بيه عندي مشكلة. ومارادت تطول بموضوع حيادر. تمددت بفراشي وكل الأفكار تتلاطم براسي.

استسلمت إلها ومن بعدها استلمني النوم. يوم ثاني كعدت الصبح، لكيت حنين مراسلتني. ما جاوبتها، لأن ما أعرف شنو لازم أتصرف. حصن مراسلني هواي ومخابرني البارحة. يريد نفتح موضوع هاجر. چان ينتظر سنة خالو تفوت ويرجع يحاجي أمي. كتبتله اليوم من ترجع من الشغل نحجي. شجعت نفسي بكم كلمة، لازم أتقوى لازم ما أنكسر. أنا وعدت نفسي أكون أقوى من أي شي. صدك أحس طاقة إيجابية مشت بشراييني. طلعت برا لكيت ماما تنظف.

صبحت عليها وبينتلها أنا زينة. ارتاحت من شافتني طبيعية. ومر اليوم وحنين راسلتني مرتين أو ثلاثة. بس ما جاوبتها. ورا المغرب حسن توه جاي من الشغل. راسلني وكال تعالوا نجتمع حتى نفتح موضوعي وي هاجر. كتبتله احنا موجودين بس جيب محمد ونزلوا. شوية واجوا هو ومحمد، بابا وماما وقاعدين بالصالة. اجوا كعدوا يمنا، بس واحد يباوع بوجه الثاني. واحد يشجع الثاني بنظراته. بهاللحظات اندك الباب. طفر حسن للباب وهو يدردم.

شوية واجه مد راسه من الباب حجه وراح. بابا هذا حيادر ابن الشيخ. كام أبوي بسرعة، عدل تيشيرته مال التراك. وراح لحيادر للاستقبال. بس أنا متعجبة شيريد.