رواية الشيهانة الفصل التاسع عشر 19 - بقلم Shaqraa

مساء العافية الشيهانة الجزء الثامن عشر أي غردي بعد غردي.. شلونك؟ لوني مساع مخطوف.. هسه لوني ردلي.. مرتاح؟ لا متعذب.. صوتج هسه يحفر براسي ويوسوس الي.. اممم.. تدري نسيت ليش خابرتك! تعاي بحضني.. ابقي يمي ... ابقي يمي لركصلج ركص منهوب أخليها الغجر تحتار عني تكول متعافي وأدبجلج دبج معدان أوصل الطين لجتافي يل كصيتي شعرج ليش شعرج ليل وين أنروح صار الليل مو كافي... آخ بويه مشتاق لشعرج ... وصوت أنفاسج

حارشني وأنا رجال ما سكت ع الحرشة.. هو يحجي وأنا فصلت عن الكون كله.. تركيزي وياه .. وي كل كلمة يحجيها .. قلبي يزيد نبض .. جسمي يزيد دفو رغم الجو يكص.. ها جنها سكنت انفاسج، شني خلصت المعركة وخذيتي استراحة مقاتل؟ شنو يعني.. لا انتظرك تحجي.. حجيت بهدوء.. بس أنت المخابرتني مو أنا! غير أنت تحجين.. لو دوخج حجي الليل.. هو الحجي بتوالي الليل يحلى.. ما يهمج شسمعتي.. عذريني اشتاگيت ووزني الشيطان..

لازم ما أحجي شي يمج.. باعتبارج غريبة.. اممم أوكي.. صح غريبة.. بس أريد أحاجيك بموضوع.. وأعتقد أنت تفزع للغريبة صح؟ له له.. طلع لسانج يا شيهانة.. گولي وانتخي.. يعني.. هو الموضوع يخص أخوي وهاجر بنت أخوك.. أي خيرهم؟ أنتو مو انطيتو كلمة ووافقتو على حسن؟ طبعًا.. وبعدها حجايتنا.. ليش؟ اليوم خابرت أمها گالت.. زوج خالتها التوفت.. خاطبها وأبوها وعمامها قابلين.. هاي يمته جاي هذا الأغم.. مو حجه بالسالفة

وگتله أفگس عينك إذا حطيتها عليها.. ما أعرف بس هي گالت قابلين.. وخطيه يعني بعدها شابة ليش تتحطم.. وأخوي إذا سمع.. أنت ناطي كلمة ورجعتو بيها.. ها حدج حدج.. اليرجع بحجايته هذا لا زلمة ولا ينعد ع الزلم.. هسه نايمين ما أگدر أسويلي هوسة.. باچر ورا الظهر.. خلي أهلج يجون ويتفقون ع الباقي.. وأنا موجود وأريد ابن أبوه يحجي.. ها يعني أگول لماما تجي باچر؟ أي گلي لها.. وكل ما فضت بسرعة أحسن..

مو حلو التجرجر.. وإحنا أهل وما بينا كلفة.. أوكي الصبح أگلها.. و... آسفة أزعجتك.. هه ههه.. روحي أحسنلج.. لا أعمرلي راس نرگيلة ثاني.. وهالمرة أدخل بخطيتي وخطيتج سوا.. ها.. لا رايحة رايحة باي.. هههه مع السلامة.. ضحك بانزعاج.. وأنا سديت الخط وطلعت من المنامة أهفي.. أحس احترّيت ودوخت ومدري شبيه.. أسترجع كلامه وي روحي.. عزا اليوم مو راحة كلش.. معقولة!! لا لا أنا صاير تفكيري وسخ.. بس أهم شي تطمنت ع حسن وهاجر..

زين شكول لأمي! أگلها أمها خابرتني وگالت تگدرون تجون.. باعتبارها تستحي تخابر أمي.. أي هذا أحسن حل.. راسلت حسن وگتله باچر نروح لبيت هاجر.. وبقى يوصي ويسولف خطيه فرحان حيل.. يوم ثاني گلت لأمي.. وگالت أي أحسن حتى لو بس عقد.. لأن هم ما عندهم بنية ينحجي بيها وتطول.. وهم حجت وي بابا واتفقو ع المراسيم التجي كلها.. العصر من رادت تروح.. اجتلي للغرفة عبالها مبدلة.. شافتي گاعدة محتارة وصافنة.. ها شو بعدج؟؟ ما أروح ماما..

لا ما يصير.. أنت أخته وعيب تعتبر.. هم ناس يدورون عادات وأصول.. هسه يگولون أخته ما جايه.. گومي استعجلي يلا حتى نلحگ نروح ونرجع من وكت.. گمت غسلت ورتبت وجهي.. وگفت بالكنتور محتارة.. تالي أخذت فستان أسود كيبور.. وياه شال أحمر وبالطرف زخرفة قليلة.. خلصت وباوعت لنفسي بالمراية.. تالي صفنت ع الشال.. لا عيب أروح بأحمر وهي خالتها ميتة.. بدلته لبست بيجي.. وكملت أخذت جنطتي وطلعت.. لگيت ماما وبابا بالصالة ينتظرون..

اجيت أمشي.. ماما باوعت مبتسمة.. الله يحرسج.. خل أحطلج ملح شوية بجنطتج.. ياا لا ماما عفيه بس أفتحها يطشر.. هههه أرش عليج شوية.. لا فدوة لا.. حجيتها وأنا أمشي سريع.. رحت صعدت بالسيارة واجت لحگتني وطشت عليه شوية ملح.. وطول الطريق وهي عينها عليه.. أحسها خايفة من روحتِي الهم.. عبالك راح تخليني هناك وتجي.. أنا منا متوترة وأفكر.. حيادر مالي تفكيري.. حنين الي ما أعرف شأسوي من أشوفها.. موضوعها ذابح قلبي..

صعب من حاسبتها أخت.. وبيوم وليلة أعرف هي تگيدلي.. وبلا سبب!! وصلنا لبيتهم.. نزلنا بالباب.. جان محد يم البيت.. بس باب الديوان الخارجي مفتوح.. دگينا الباب.. ورا شوية.. فتحه أخو هاجر... عرفته العريس نفسه لأن شفته بالصور.. دنك بس شافنا ومشى گدامنا.. حياكم الله أهلًا وسهلًا.. تفضلو.. مشينا وراه ودخلنا لنفس الاستقبال الجبير الگعدنا بي.. المرة الفاتت.. بسرعة دخلت النا أم حيادر.. وسلمت ومرحبت وبدت تسولف..

اجت أم هاجر.. بس خطيه شكلها تعبان تگهر كلش.. رغم هذا وجهها بشوش أريحية.. بدو يحجون بالمهر والتجهيز وهالأمور.. بس گالت أبوها ما قبل لا هوسة ولا شي.. مجرد سيد يجي ويعقدون.. يكون العقد بيناتهم.. ماما ما اعترضت بشي أبد.. شنو يردون تگلهم أي.. بعد ما اتفقنا ع كلشي وقريب نريد نطلع.. اجت هاجر وي مرت عمها.. سلمت وگعدت.. ماما حجت وياها وگالت شنو تطلبين وشنو يعجبج.. بس هي كلشي عدها بكيفكم.. وألاحظ ماما حابتها من خلال حجيهم

سوا.. لأن ماما الشخص إذا ما ارتاحت اله.. تحاجي معلگ لحد ما هو يطفش لوحده.. قريب المغرب كلش.. خابرنا بابا وترخصنا منهم.. گمنا نريد نروح.. هذا كله وحنين أبد ما وصلت ولا اجت.. طلعنا من الاستقبال ومشينا بحديقتهم كلش واسعة.. وهم يسولفون ويانا.. نريد نطلع وانفتح الباب.. دخل حيادر بس مدنگ.. لابس دشداشة وجفية لافها ع راسه.. عيوني بقت تنط شوية اله شوية لأمي.. الس خزرتني.. هو مشى وسلم بس داير وجهه.. يعني يحجي

ويانا ويباوع بغير جهة.. ضلو حجيه تعشو طلعتكم بيها عيبة النا.. لا ماما مشكور أبو محمد اجه بالباب.. لا صدگ.. حجاها ورجع طلع.. إحنا هم سلمنا وطلعنا.. بابا نزل من السيارة سلم عليه وحجه وياه.. وما يقبل نروح إلا نتعشى.. بس بابا گله يحتاجون روحة للسوگ.. وأنا مواعدهم ما أگدر بعد.. واعتذر منه وگله غير مرة نبقى وهذا بيتنا ومن هالحجي.. أنا گعدت بالسيارة بس أخاف أدير عيني تجاهه.. أمي إذا لگفتني تگتلني گدامه.. وتروح هيبتي...

بالليل كلش قبل لا أنام.. خابرتني هاجر وأمها شكروا مني.. سألتهم شنو صار اليوم قبل لا نجي.. سولفت أمها.. حيادر گايل الهم خابروني الجماعة ويريدون يجيون يعقدون.. وبهادر گايله ابن عمنا أولى بيها من الغريب.. بس هو مجاوبه.. أنت متعود تكسر حجي وتجفص.. بس إحنا زلم دواوين.. والمرة انطيناها لرجال.. إذا تراجعنا كل هيبة مالنا بعد.. وأصلًا كريم شنو وانطي مرة؟؟ أنا حذرته مرة بس هالمرة لو اجه أو حجه.. إلا أسكنه الفتحة الرابعة...

عرفت من كلامها حيادر صوته مسموع وحجايته مهمة.. ويمكن بهادر يضوج لأن هو أكبر منه وهيج يحبو... لأن بهادر لا خلقة ولا إخلاص لا شخصية... مرت كم يوم إحنا جهزنا بيها لهاجر.. لأن گالت أنتو اشترولي الذهب وغيره.. هم عدهم عادات.. أهل العريس يجيبون بالخطوبة جنطة.. بيها عباية وشحاطة وهالأشياء المهمة وبس قطعة وحدة.. إحنا هم ماما اشترت لها عباية حلوة بناتية أم الردان تصير.. مو مثل العادية.. وعطورات وشحاطة وحذاء ومكياج وكوستم

مرتب.. حضرناها حتى ناخذها ويانا بيوم العقد.. بيوم العقد تحضرنا بس بيت عمي وعمتي وعائلتها.. يعني بينا خمس نسوان تقريبًا.. بس الزلم لا هواي.. باعتبارها رح تصير گعدة وعد ناس شيوخ.. لازم واحد يبيض وجه.. أنا أخذت فستان گصة الحورية وردي خفيف وشال وميكب توب.. وماما ه لبست قفطان وردي.. وهي طويلة وجسمها مرتب يلوگ لها كلش.. أول ما وصلنا والشارع مليان رياجيل.. نزلونا بالكراج ما قبلو ننزل برا..

نزلنا أنا وياها وأنا جريت الجنطة.. اجت ركضت عليه بنية أخذتها مني.. ويهلون بينا ومبين عليهم فرحانين حيل.. جانت هي ملبسيها مثل الفستان أبيض وبي شغل ذهبي.. بس باين شكله قديم أو أحس شايفته! معقولة مالت حنين!! تقربت يمها وهي گاعدة جانت بالصالة الثانية يمها قليل بنات.. على ما تعقد يلا تطلع.. ولو أصلًا الحضور كلش قليل من ناحيتنا.. بس هم أهلهم هواي.. سلمت عليها وحضنتني فرحانة.. وركزت بلبسها.. هذا متأكدة مالت حنين!

بس ليش ما مشتري لها جديد يعني وهو حالتهم فوق المرتاحة.. ما أعرف ليش گمت ألوب.. أحس حنين متقصدة خلتها تلبسه هذا.. همست بإذنها ع كيف.. منو اختارلج اللبس هاجر؟؟ حجت وهي عيونها تتجول بحيرة.. عمة حنين گالت أخذي لبسي فال حلو.. بالعكس أنا سامعة فال مو حلووو.. وليش ما اشتريتي؟ مو ماما انطتج وگالت اشتري رغم لحيتي هي تشتريلج؟؟ خية خليها سكتة خليها.. حجت بلهجة يأس.. گومي وياي شوية.. وين غرفتج وديني الها.. ها أبدل؟

أنا عندي جديدات بس ما لبست.. گومي شوية وياي گومي.. گامت وياي وأنا سألت البنات.. عن الجنطة الي جبناها.. گالو موجودة هناك بالديوانية الجبيرة.. دزينا عليها وجابوها النا.. أخذتني لغرفة صغيرة.. دخلتني گالت غرفتي أنا وأختي.. عدها أخت صغيرة يمكن سادس ابتدائي هيج شي.. وعدها أخت رضيعة.. أنا خليتها تسولف وطلعت الها الكوستم.. گلت لها گومي بدلي هذا.. شافته هي صفنت.. تالي گالت راح أصير مثلكم هه..

ابتسمت لها وحجيت.. أنت أصلًا مثلنا شنو الفرق.. ويلا تعاي شوفي هذا اختاريته الج لأن عجبني حيل.. يا خية بالعرضة.. ألف عافية ملبوس الهنا.. يلا لبسي بسرعة.. درت وجهي عنها وهي أخذته لبيت وكملت.. طلع عليها فت.. لأن جسمها رفيع وطويلة.. وهو تنورة بينصل أوف وايت وقماشها يرسم الجسم.. والسترة نازلة شوية للورگ ومخصرة.. والتونر الجوا أوف وايت هم.. بس السترة بالجيوب والصدر بيها نقش أزرق.. شكله كلش مرتب عليها..

من لبسته حسيتها انبهرت.. وتباوع لنفسها بالمراية.. شعرها جاي أعدله الها.. واندگ الباب.. دخلت بنية صغيرة.. يلا يلا هجورة راح يجي السيد عجلي.. هي وجهها بهت وخافت.. أنا گلت للبنية روحي إحنا جايين بسرعة.. وبقيت أضحك وياها أگلها شبيج عبالك رح يعدموج.. بس تگول خايفة من كلشي.. هذا الي تحجي وتبينه أفعالها.. خايفة من كلشي.. طلعنا وأمها وماما أخذوها وحضروها وگعدت لحد ما عقدو.. وأنا أباوع بالوجوه والناس هم تباوعلي..

مستغربة منهم مدري هم مستغربين مني.. وبين هالوجوه أبد ما لمحت حنين لحد هسه!! بس خلصو العقد وبدت الهلاهل.. وبدا التوزيع.. إحنا بقينا ع جهة.. شفت حنين اجت.. لابسة فستان أحمر.. ردان كاملة.. ومليان خرز من تمشي يطلع صوت.. وطويل كلش يمشي وراها.. جانت شايلة سلة كيس المهر وتوزع.. بس ما گدرت أباوع لوجهها.. أحسها غير شخص.. أحسها جانت لابسة قناع ونزعته.. تقربت يمي توزع.. من وصلت يمي.. باوعتلي من راسي لحد رجليه..

بنظرات تحمل هواي تفكير.. انطتني علبة وهي تضحك.. أخذي أخذي بلكت تعرسين.. وعبرتني.. خلتني صافنة.. يمي بنية گاعدة بعمري شكلها.. جانت حامل بطنها كلش جبيرة.. سألتني.. أنت من أهل العريس مو.. أيي.. ها يعني تعرفينها هاي.. زين ما گصيتها يمج ههه.. لا ما أعرفها كلش.. شبيها ليش؟ عوذة شبيها بعد.. سايقة ع الجبير والزغير.. حتى الحب الجبتو والجياصة ومالات المهر.. وگفت بالمطبخ وگالت أنا أوزعهن.. دربالجن وحدة توزع وتفشلنه..

ههه أي خل توزع ع أساس فد شي جبير يعني؟ لا حبوبة.. بس حتى تصير هي أم البيت.. أنا استأذنت وگمت من يمها.. لأن الجاي اسمعه شي ما يشبه شي.. لعد وين حكمهم بيها.. وين گرابهم الها عجيب! رحت گعدت ورا الناس.. ما گعدت يم أقاربنا.. أريد أنقرد شوية أركز.. هي عبالك تنتظر هالشي.. بس شافتني اجت.. شايلة فستانها بيدها وشعرها أصفر طوخ.. مكياجها صارخ.. ولا ذيج حنين.. عبرت النسوان ووگفت يمي... شلونج يا بذات.. نكارة مليح.. شنو؟

حاجيتها باستغراب حتى ما فهمت حجيها.. أي دومج ما تفهمين.. ليش ولج هيج ليش.. خليتي الواذل تشمت.. وگفت وحاجيتها وأنا متصنعة الهدوء.. شنو قصدج.. قصدي واضح.. گلج حيادر بالرسالة.. وگلج أريد أضرج مو.. ها تعترفين!! أي لأن ردت مصلحتج.. مصلحتي أعرفها ومحد يعرفها بگدي.. مصلحتي تگليله راح أنخطب لحيدر! تگليله تعال شوفني بالخورة؟؟ شنو مصلحتي؟؟ تأذين أخوي وتشحنين برجلج حتى يزوج بنت أخو؟ ليش طلعتي هيجي حقودة وممثلة ها!!

لأن أنت غبية.. تشوفيني حقودة.. كل الأريده مصلحتج.. حيادر لو بعد مية سنة ما ياخذج.. باعي تشوفين ذيج أم الأحمر.. السمينة التخبل.. هي بت خالته.. وگاتل نفسه گتل.. لحد البارحة راد يمشي عليها.. عرفي قيمتج ولا تحطين أملج بحيادر.. هذا ابن شيوخ ما ياخذ وحدة أمس ضمت كذلتها.. هااا لمصلحتج أحجي.. عافتني وراحت وأنا مصدومة.. هي شبعتني رزالة تگول مصلحتي.. لا وبعد تگلي بت خالته.. وهي بت خالته جنها هيا الشعيبي.. أصلًا نكتة هاي صدگ..

بقيت بمكاني ما گمت.. لحد ما خلص وردنا نطلع.. ماما گالت عاشت ايدج من غيرتي لبستها.. نسوانهم كلش عجبهن.. وبقن متعجبات بي وبذهبها.. صدگ ما شفتج گعدتي وي حنين أبد؟ بعدكم متعاركات؟ لا بس يعني شوية.. وهي ملتهية توزع بعد ما فارغة.. سكتت وهي تعرف بيه أجذب.. رجعنا للبيت والأقارب كلها راحت لبيوتها.. حسن شلعناه گوة وجبناه.. گلت له ماما لا تخزينا ما يقبلون أصلًا تطول يمها.. وهو يگلها حتى شوفة شرعية ما شفت خلوني أشبع..

وأخذ فونه وصعد گال أروح أخابر أحسن.. هو اشترالها فون وشريحة وانطاه الها اليوم.. محد راد يتعشى لأن جنا شبعانين كيك وحلويات.. گال بابا أريد جاي.. أنا معفية منه.. گامت ماما تسوي.. بقيت گاعدة يمه.. بس نظراته غير عن كل مرة.. صفن شوية وسألني.. بابا شنو رايج بحيادر!؟ ها؟ حجيتها وأنا لوني أصفر.. يعني كشخص وشخصية شتتشوفي؟ ها ما ما ما منتبهة.. تنهد وحجه.. هو كلش خوش إنسان.. وما عايزه شي.. تعرفين.. اليوم بديوانهم طلبج مني..