رواية الشيهانة الفصل الثالث 3 - بقلم Shaqraa

مساء الأمان الشيهانة الجزء الثاني بقى مركز عليه أنوب بهادر ضل يخزر وذاك أخو عيونه نطت من الغضب. حنين جرت الموطا من إيدي وذبتها بالزبل. هي كلها لحظات اللي صار بيها هالشي. بس استغربت من ردة فعل حنين وي نظراته هذول. حجت وهي تكوم: امشي شاها امشي راح تتطين عيشتي من وراج! كمت وأنا ما فاهمة شتحجي. ليش شبيج صبري خل نفهم؟ حجيتها وأنا أمشي وراها. بعدنا عنهم شوية، وهي وكفت وعيونها مدمعة. شاها بهادر محذرني أحترم نفسي وأحافظ

على سمعتي احنا شسوينا؟ شنو؟ شجاب السمعة وشسوينا؟ أي ما تشوفيهم شلون يخزرون لأن جنا ناكل موطا كدام الطلاب. بربج؟ يعني واقفة وتتراجفين لأن حضرته مانعج من الأكل والشرب كدام الناس. يعني بالكافتريا مو تاكلين ويا؟ أي بس هناك هو وياي. أي هو وياج بدي كارد ويعمي كل واحد يباوع لحلكج الفاهي وأنت تاكلين. باعي هالتمزعط هذا أكرهه. الأكل والشرب ربنا حلله كدام الناس وما كال أكلوا بالخفاء. لا عباله احنا جايين من تياترو ع كولة بيبي.

ياا انصمي ولج شهرتينا. أنت انصمي واسمعيني عدل، جاي أحجي وخابر السايق. مشينا للسيارة وأول ما صعدنا كتلها لرشا تعاي اسمعي. المدام خطيبها اللي بعده قيد التنفيذ، لا تاكلون لا تشربون لا تاكلون موطا. حجت رشا بضحكة: شاها ترى مو هو السبب هي. أعرف هي وهي ناطيته مجال أكثر من لازم. جاوبت حنين بقهر: أي غير من حبه إلي. ونصوا صوتكم لا يسمعنا السايق. صوتنا ناصي ونعرف حدودنا من نحجي. بس بهادر مصخها. ترى طالعين من بيوت ناس

ينحلف بشرفها. وراح نتخرج واحنا الجامعة كلها تمدح بأخلاقنا. مو لبسج عباية عباله جنتي عريانة. ترى مو بس العباية ستر أي لبس جان مستور هو ستر وخلاص لهنا وكافي، حطيلج شخصية باجر يدوسون فوك راسج. درت وجهي عنها وهي حاولت تحاجيني ما جاوبت. جنت كاعدة بالطرف وهي بالنص. دارت ع رشا وبقت تحاجيها رشا وتنصحها. أنا كلش ما شاركت لحد ما وصلنا. دخلت للبيت أمي كاعدة بالهول تباوع تلفزيون حست عليه ضايجة.

بس ما حجيت كلت ما تسوى السالفة أحجي بيها. بدلت وحضرنا الغدا وتغدينا. رحت نمت شوية وكعدت ع صوت اتصال. باوعت حنين، ما جاوبت. سويته سايلنت ورجعت نمت. بيومها لليل هي تخابر وما جاوبها. يوم ثاني داومت وحتى بالسيارة ما حاجيتها. وهي ما تكدر تلح لأن خاف يعلى صوتي والسايق موجود. بس نزلنا من السيارة، لزمت إيدي وبقت تبجي. كافي عااد حقودة من أمس أخابرج وأنت مغلسة عليه. انقهرت من شفتها بجت، انطيتها كلينكس وجريت إيدها وكعدنا.

كافي لتنقهرين بس ردت الوي أذنج حتى تخليلج شخصية وما تخلي يتدخل زيادة. لا هذا هو بس لا تزعلين عليه بعد. بوستها ودخلنا سوا للقسم. أخذنا محاضرات واليوم بهادر مو عدنا فكة. وهي طول اليوم تعتذر مني وتكلي لا تضوجين هو من حرصه هيجي يحجي. ومرت كم يوم بيت عمي سألوا عنهم وردولهم الموافقة. وتحددت خطوبتها بنص الشهر الرابع. وطبيعتهم هم يشترون نيشان مرت عمي بالأول ما قبلت وحتى ماما كلتلها خليلج شخصية لا يدوسوج

بس هي تكول هذا كله عابر وما يسوى زعل. وفعلاً أهله التكفلوا بكل شي بس هي الصالون حجزت يمنا قريب متعودين نروحله وعنده بدلات هم. أنا قبل ثلث أيام أخذني أخوي حسن بالليل وويانا ماما اشتريت فستان زيتوني طويل وضيق مقسم ع الجسم. وماما اشترت هم فستان بس ردن كاملة ومستور يعني ينطلع بي وي الحجاب نفس اللون بالحفلات نشتري دائماً. بيوم الخطوبة رحنا وين حنين للصالون ورجعنا من وكت لأن هم كالوا يجون من وكت.

جانوا محضريلها بنات عمي وبنات خالاتها ميز كامل ومجهزين من كل شي. احنا مخلين دي جي ومتونسين وهي تركص والشباب كلها برا ينتظرون أهل بهادر يجون. شوي وكالوا اجوا، عم الهدوء والكل كعد وتحضر. دخلوا نسوانهم أغلبهم مبركعات يمكن بس ثنين صغار بالابتدائية ما مبركعات. أول ما دخلوا هلهلوا ويسوون هوسات. احنا التهينا بالمطبخ نحضر. بسرعة كالوا خل يعقدون، دزت عليه حنين تريدني يمها. رحت وشفت أمه ويمها بعد بنات خمسة وحنين

مغطاية بالأبيض وهن يمها يعقدن بالغطا مالتها. أول ما شافتني أمه سلمت عليها وكالت تعاي أحبنج. كتلها شكراً. كالت تعاي صوبي شمالج. يمها بنية كالت الحجية قصدها تبوسج يعني. تقربت بوستها وابتسمت للبنات اللي يمهم أشوا عابسات ويباوعن بنص عين. حنين لزمت بإيدي وفرحانة وتكلي لزمي الجلوة. شنو جلوة؟ هذا الغطا يسموه جلوة ما تشوفين يعكروا البنات ياخذن منه مراد حتى يتزوجن. دنكت شاورتها: لا دخيلج خاف آخذ مثل بهادر.

بقت تضحك وصاحوا علينا سكتوا أجه الشيخ من ورا الباب. عقد الشيخ وكمل وأنا فزيت فزة من هلهولة أمه طفرت من مكاني. أنوب صار الضحك عليه لأن منظري صدك مضحك. وضلن يركصن ويهوسلها بس كم وحدة كاعدات ويسولفن ويباوعن علينا. لحد ما كالوا رح يدخل البنا لبسوا وأنا رحت للمطبخ كلت عليمن أخرب شعري وهو شوي وطالع. بنت عمي اجت وياي كتلها مدام التهو خناكل كيك متت جوع. ووكفنا ناكل واندك الباب. طلع ابن عمي راد كلينكس وكال خدروا جاي بسرعة.

أنا ما أعرف أسوي كلت لبنت عمي أنت سوي كالت أنا وين أضبطه وذولا أهل مضايف ما يشربون أي جاي. بقينا محتارين تالي كتلها خنسوي الأكياس الصغار ونحطهم بالغلاية. صدك طلعنا تقريباً باكيت إلا شوية وحطيناه بالغلاية وحضرنا استكاين بس ما ندري شكد نصب. بقينا ننتظر ابن عمي على ما أجه وانطانا العدد كال تسعة. لأن أغلبهم طلعوا. صبينا وأخذه وراح، وي روحته طلع بهادر واحنا رجعنا جوا ولقينا نسوانهم تتحضر تريد تطلع.

شوية وطلعوا واحنا جاي نلم الهوسة ودخل بابا. ولكم من سوت الجاي فشلتونا، باوعنا عليه أنا وبت عمي بخوف. شبي ليش؟ بس لا أنت يا يابة هههه. ولك مسويته أسود ماينبلع يجلب باللهاة. أنوب مرت عمي وماما كالو غير تحجين. هسه يلزموها علينا. مبينين يدورون زلات، كتلهم سويت الأكدرله. من بعد ما ساعدناهم وحنين صعدت لغرفتها. كالت وصاني أخابره بس نخلص. ودعتها وطلعت وي ماما والأقارب. كلها راحت.

رجعنا تعبانين تمددنا بالهول والولد صعدو لغرفهم. بابا كال: أهله خوش ناس مبين عليهم. بس هو مو كلش مريح. ماما لوت شفتها وكالت: أمه كلش مو مريحة. وطبعهم مو حلو يتهامزون كدام الناس. وهو أصلاً كلش عقدة مبين. بس الله يهديهم الها ويوفقها. أنا ماكدرت أضيف شي لأن رأيي نفس رأيهم. بيومها لأن تعبانة نمت وكت، وصادف يوم ثاني سبت عطلة همزين. كعدت بالوحدة الظهر عبالك جنت بغيبوبة. دخلت عليهم بالهول كتلهم: أنا وين؟ حسن كال: بالبرزخ.

ومحمد بقى يهز براسه ويبتسم. كالو: جعنا وننتظرج، غسلي وتعاي. رحت غسلت وتغدينا وجاي أساعد ماما بتعزيل المطبخ كالت: تدرين البارحة شمتفقين أهل بهادر وي عمج؟ لا شنووو! بعد أسبوعين العرس. يااا شسالفة صدك يحجي هذا. إي أبوج حجالي كايل هو محضر كلشي غرفة وتجهيزها. ضوجتيني ماما كلش. بعد هاي الحياة ماما أنتِ إن شاء الله يجي نصيبج. خو ماتضلون طول عمركم وي بعض.

بقيت ضايجة من سمعت كلام ماما ورحت خابرتها الحقيرة مشغول، إي طبعًا نستني. رحت سبحت وعزلت كنتوري وتمددت أقلب بالفون. وخابرتني حنين. ها من لقى أحبابه نسى أصحابه. ههه لا بس جنا نحجي بتجهيزات بعد سمعتي. إي شعدج مستعجلة. أشو كطعته بوجهي يا رعنة يمكن خابرها هذا. هفتها براحتها كلت ماسببلها إحراج. يوم ثاني كالت ماتداوم تروح للمحكمة حتى تعقد. داومت وحدي وضايجة، صح أنا علاقتي بالطالبات كلها زينة بس حنين رفيقة دربي.

جان عدنا ريست بـ 11 ونص. رحت أخذتلي عصير ورحت كعدت يم بنات القسم. شوية وشفت أخو بهادر إجه. درت وجهي سويت نفسي مااشوفه. بس استغربت من تقرب باتجاهي. كمت بسرعة: من رخصتكم بنات. مشيت من يمهم هو إجه مشى وراي. عبرنا الممر ووكفني صوته. شاها من رخصتج أريدج بحجاية. وكفت بلا ماادور عليه. ممكن؟ درت عليه وأول مرة أكون هالقرب منه. وجهه صار بوجهي دنكت. تفضل نعم شنو ردت. نكدر نكعد؟ نعم تفضل. كعدنا ع المصطبة بالممر.

باوعت عليه وجهه ضعيف وملامحه حادة. عيونه مجرورة، حلكه عريض وخشمه مسطح. أحس عبالك مكابلة ذيب. وأنا شكد أضوج من هيج شكل ومكابلني بعد. أحم. شاها تعرفيني أكيد. الأعرفه أنت أخو بهادر. إي اسمي حيادر وأصغر من بهادر بعشر أشهر. الله يحفظكم. ويحفظج. أجيت اليوم أريد أحجي وياج بموضوع يخصنا ثنينا. باوعتله باستغراب. بس نظراته الجريئة خلتني أدور نظري عنه. أنت مرتبطة؟ ليش؟ بس أريد جواب إي أو لا.

لا وماأفكر هسه نهائي يمكن بعد عشر سنوات يلا أفكر. ابتسم وفر سبحته: جواب شافي هذا. يعني إذا تقدملج أحد هسه ماتوافقين؟ أنا كلت هذا شاف حنين قبلت بأخو، دار عليه خلي أكطع أمله كلش. لاااا ماأقبل نهائي ولا ببالي هالفكرة مطلقًا. كام وكف وعدل سترته: أنا أترخص وعذريني إذا زعجتج. ومرة ثانية أخذي حذر من تاكلين كدام الناس. بقيت صافنة أشو هذا سالفته لا إلها بداية لا نهاية.

بس كعد سأل وكام لا أدري بي خاطبني لروحه لا أدري لغيره. وفوقها يتدخل حتى بأكلي. يلا بعد أخو بهادر. لازم يصير مريب. بقيت كاعدة بمكاني حتى ماكمت من سلم عليه وراح. ناقصني بس أرتبط بهيج ناس أوي. لحد ماصار وكت المحاضرة وكمت دخلت. وبقيت بالقاعة لحد وكت الطلعة يلا طلعت. رجعت تغديت وخابرت حنين أشوفهم كملو عقد. دكيت عليها فصلته. عفتها ونمت كعدت ورا المغرب وأول ماكعدت فتحت الفون. مامخابرتني الحقيرة أنا الها.

طلعت لكيت أمي بالمطبخ تسوي كباب عروك للعشا. ها صح النوم. صح بدنج ماميتي. شخبار حنين ماتدرين كملو لا. إي وعازميها عيالها العصر إجت. أمّم أكول ماذكرتني. بعد ملتهية أكيد مافرغت. إيي صح. ساعة عشر ونص خابرتني: شلونها حبيبتي. هسه تذكرتي لو منتظرة شوية. هههه تغارين عليه. إي من كرد حظي. عقدتو. إيي ههه. مبرووك حقيرتي تستاهلين. ههه أحلى مباركة اجتني. أخذج لأهله ها عيني ها. إيي وبيتهم يخبل عبالك قصر، بعد أحلى من بيتنا.

وأهله شلونهم وياج؟ ماكو أحسن منهم والغرفة تخبل مسويها وكاملة. رحتي للغرفة ولج؟ إي غير غرفتي ولازم أشوفها. تريدين تقنعيني بس شفتيها؟ إي إي أصلاً احنا فقرا ههههه. مالت عليج وعليه هسه جيمس بوند هو عاد. أويلي وأحلى من جيمس بوند. لا أنتِ واصلة مرحلة متقدمة مالج علاج. عهههه ماتفرحيلي لج. أمشي أنتِ روحي طبعًا أفرحلج. فدوة لروحج شخبارج اليوم بالدوام؟ اليوم صار شي مو بالحسبان. لا صدك شنوو! أخو بهادر حاجاني. منو حيادر؟

إي كال إذا تقدملج أحد تقبلين. كتله لا وقطعت أمله. ماحجه كدامج بهادر يعني ماسمعتي هيجي شي؟ هو كال حيادر انعجب بينا وبنسبنا كال خوش ناس. بس يكول يريد وحدة تلبس عباية وبركع وماتداوم. بعد خيحطها بصندوق ويقفله ويذبه بشط العرب. مالت عليج وعلى عيالج. عابت هسه هو خطبج قابل هو بهادر يسولف عنه. يكول شكاك ومعقد ويتدخل بكلشي. حاط روحه بسوالف النسوان. مو أكلج مالت عليكم.

هههههه يروحلج فدوة أنتِ خطابتج كلها مثقفين وهاي كلاس شنو تاخذين هذا الشكاك. ماآخذه شبيه تخبلت أول تالي أترك عز أهلي ودلالهم وآخذلي أستاذ حيادر. حتى يغلفني ويحبسني بالبيت لأنه حضرته شكاك. هسه عوفج منه باجر تداومين؟ إي أداوم طبعًا. يلا روحي لعد أنا أحضرلي لبسه وأنام. سديت الخط منها وحضرتلي ملابس ونمت. الصبح إجه الخط وطلعت. صعدت بالسيارة وأشوف حنين بنيو لوك. عباية راس وتحنيكة حجاب.